Asa mba Hainao?
Ino nahatsara Jehovah nan̈ambela iro Israelita aby io han̈amia domohin̈y ndreky pizon hatao sôron̈o?
TAMY Lalàn̈a namezany Jehovah, samby nety natao sôron̈o na domohin̈y na pizon. Matetiky, vôron̈o aroe io voaton̈ono miaraka, amy lalàn̈a momba fan̈anaovan̈a sôron̈o. Iro koa tsisy domohin̈y, mety soloandro pizon, na mifamadiky amy zen̈y. (Lev. 1:14; 12:8; 14:30) Nety tsara raha zen̈y, fotony domohin̈y tsy voatery ho hita mandavataon̈o. Nan̈ino?
Domohin̈y
Domohin̈y aby io vôron̈o pifindra monin̈y. Lera andra mafana, iro mandeha an Israely. Fa isaka fanjava Oktobra, iro mifindra atsimony Israely. Mafana baka an̈y amy leranizen̈y. Lera lohataon̈o, domohin̈y aby io mimpody an Israely ndraiky. (Tonon. 2:11, 12; Jer. 8:7) Ke sarotro tamindro Israelita aby io nahita domohin̈y hatao sôron̈o, koa fa ririn̈iny.
Pizon
Ankoatranizen̈y koa, pizon tsy mifindra monin̈y, ke izio nisy tan Israely fo mandavataon̈o. Ndray izy aby maro olo nitarimy izio. (Ampiràn̈a amy Jaona 2:14, 16.) Koran̈iny boky Kakazo Ndreky Biby amy Baiboly Ao (angiley) fa “presky olo jiaby ta Palestiny, na tantanambe zen̈y na tambanivolo, samby nitarimy pizon aby. Kila olo manan̈a tran̈ony pizon, na lavaka tamy riba nipitrahany pizonany.”—Ampiràn̈a aminy Isaia 60:8.
Pizon an̈atiny tran̈ony
Hita baka amy zen̈y fa Jehovah ten̈a be fitiavan̈a sady mahay mandanjalanja, fotony ikeny fo sôron̈o nataondro Israelita aby io, na domohin̈y nisy tamindro na pizon.
