1. ˈAyaw no minanam to Fangcalay Cudad kiso i, samaanay ko kaˈorip hani?

 ITINI ˈayaw no malacafay kiso to Misawacayay Tamdaw ni Yihofa minanam to Fangcalay Cudad i, samaanay ko kaˈorip hani? ˈAlomanay tamdaw cowa kakahi miharateng to salakatay a demak. Itiya i, o pinengneng ita to kaˈorip ato capeling mafiyoray no palinian nonini a hekal, ‘itini tonini a hekal awaay ko hatokel ita, cowa ka fanaˈ to Kawas.’ (Ifiso 2:12) Kawra ikor no minanam to Fangcalay Cudad, mafalicayto a maemin.

2. Mikitini i Fangcalay Cudad mananamay iso ko maanan?

² Mikitini Fangcalay Cudad mananamay iso, i kakarayan iraay ko tada maolahay tisowanan a Wama, ci Yihofa Cingra. Mananamayho iso ano sapakahemekaw ci Yihofaan, masalalomaˈ no taˈangayay paro no lomaˈ Ningra, mamisongilaˈ a mifalic to harateng no niyah, o pinengneng to kaˈorip ato pakayraan a maˈorip, o mamidofdof to ˈakawangay a palinian no waywayan Ningra a maˈorip.—Ifiso 5:3-5.

3. (1) Mikitini Kolosay 3:9, 10, misaaliay ci Yihofa sasamaan ko pidemak ita? (2) Onini a lalakaw mamilengo to maanan?

³ Ci Yihofa o Misangaˈay a Tatapangan no mita, o Wamaho ita i kakarayan, iraay ko fadangalan patireng to rikec no lomaˈ. Misaaliay Cingra kitaanan itini ˈayaw no micada to paputisem misaˈicelto a ‘mihelong to katelangan a capeling ato katelangan a waywayan.’ * (ˈOsien ko Kolosay 3:9, 10.) Onini a lalakaw papadama to makalimay micada to paputisem a tamdaw cipinang to caˈof no tolo a salicay: (1) O maanan ko ‘katelangan a capeling’? (2) Hano misaali ci Yihofa kitaanan mihelong to katelangan a capeling? (3) Sasamaan ko pidemak ita? Onini a lalakaw o papadama to maharekayto micada to paputisem a salikaka mafanaˈ sasamaan ko pidemak ngaˈ eca piliyaw a mararaw.

4. Cecay tamdaw mafalod no ‘katelangan a capeling’ i, wa ira ko masamaanay a waywayan hani?

⁴ Cecay tamdaw mafalod no ‘katelangan a capeling,’ o harateng ato waywayan ningra o mamidoedo to mararaway a demak. Alatek misatekeday, ranikayay maketer, misatakaraway, awaay ko miakoˈiday falocoˈ. Alatek maolahay minengneng to maˈodangay a lalakaw ato kaacekan mariˈangay a ika. Manaokaniw, iraay ko ngaˈayay capeling ningra, ano mararaw ko sowal ato demak i, makesemay ko falocoˈ alatek, kawra awaay ko ˈicel ningra mifalic to harateng ato waywayan no niyah.—Kalatiya 5:19-21; 2 Timoti 3:2-5.

5. Pakayni pifalah to katelangan a capeling, papairaen ita ko maanan matatodongay a pinengneng hani? (Dmak 3:19)

⁵ Sahtoay cowa ko malefotay kita, awaay ko pakayraan misongilaˈ a mifalah to kihcod mararaway a harateng ato coos no falocoˈ. Latekay mararaway ko sowal, mararaway ko demak, telocto tada makesemay ko falocoˈ ita. (Yirimiya 17:9; Yakop 3:2) Kawra ikor no falahen ita ko katelangan a capeling i, cowato ko mamidoedo to mararaway harateng a midemak. Cowato ko mamafalod no katelangan a capeling kita, cowato kalecad to salakatay a tamdaw.—Isaya 55:7; ˈosien ko Dmak 3:19.

6. Hano palimoˈot ci Yihofa kitaanan mihelong to katelangan a capeling?

⁶ Palimoˈotay ci Yihofa kitaanan misalof to mararaway harateng ato nanaman, samanen tada maolahay Cingra kitaanan, makalimay lipahak ko kaˈorip no mita. (Isaya 48:17, 18) Mafanaˈay Cingra ano midoedo ko tamdaw to mararaway a coos, cowa ko niyah aca ko madokaˈay, midokaˈayho to tatihiay ningra a tamdaw, o papakasomad konini to falocoˈ ni Yihofa.

7. Mikitini Loma 12:1, 2, iraay ko maanan papiliˈen ita hani?

⁷ Satapang aca, maˈaraw no paro no lomaˈ ato widang ko pisaˈicel ita a mifalic to capeling no niyah, o mamalikaf alatek. (1 Pitiro 4:3, 4) Saan cangra pasowal alatek: “Iraay ko fadangalan iso haratengay saan midemak, aka pitengil to sowal no tao.” Kawra, o cowa kakahi micada to palinian ni Yihofa a tamdaw awaay ko pasalat, o mafaloday no mikowanan ni Satan a hekal. (ˈOsien ko Loma 12:1, 2.) Soˈlinay i, kita o kahacecay tamdaw misiˈayaway to cecay papiliˈen: Papadotoc micaˈedong to katelangan a capeling, midoedo to mararaway harateng, mafalod no mikowanan ni Satan a hekal, anca papifalicen ci Yihofa kitaanan, padama kitaanan malo sangaˈayay a tamdaw.—Isaya 64:8.

8. Ci Yihofa samaanay padama kitaanan mifalah to tatiihay a harateng ato nanaman?

⁸ Mafanaˈay ci Yihofa to mamihadak kita to adihayay a toki ato ˈicel, ngaˈ mafalah ko tatiihay a harateng ato nanaman. (ˈOlic 103:13, 14) Pakaynien Ningra i Fangcalay Cudad, fangcalay saocor ato likakawa Ningra, ho malifok ita ko taneng, ˈicel ato sadama no salikaka a mifalic. Itini hakelong no kaˈorip, madeng matinakoayto iso ko sapadama Ningra. Nohatini nengnengen ko pina ciepocay a pakayraan padama tisowanan padadotoc a macakat, mihelong to katelangan a capeling, malaˈosi ko patosokan micada to paputisem.

9. O Fangcalay Cudad ngaˈayay padama tisowanan samaan ko pidemak?

⁹ Saka dademaken ko Fangcalay Cudad misongilaˈ a mikinsa to niyah. O Fangcalay Cudad malecaday o dadingoan, ngaˈay padama kitaanan mihapinang to harateng ato waywayan no niyah. (Yakop 1:22-25) Itini tonini a pakayraan, o pacekiway tisowanan a singsi ato matenesay a salikaka wa ngaˈay pafeli tisowanan to pina a sapaini. Tinakoen, ngaˈay cangra misaka dademak to Fangcalay Cudad padama tisowanan mihapinang to o maanan ko kangaˈayan ato dangoc no niyah, ngaˈayho pasifanaˈ tisowanan micekiw to mitepangan a cudad, mikilim to sapifalahaw to tatiihay nanaman a ciepocay pakayraan. Roma i, maharekayto ci Yihofa misaday padama tisowanan. Mafanaˈay Cingra o maanan ko sangaˈayay a pakayraan padama tisowanan, mafanaˈayho to harateng no falocoˈ iso. (Taneng 14:10; 15:11) Mihaenay palahaden ko ngaˈayay nanaman, mitolon to romiˈamiˈad Cingranan, ato micekiw to Fangcalay Cudad o kimad Ningra.

10. Mikitini nalifetan ni Ayli mananamay iso ko maanan?

¹⁰ Pakasoˈlin to o sangaˈayay ko palinian ni Yihofa. O saali ni Yihofa kitaanan sahtoay o saka ciepoc no mita, ano tooren ita ko palinian Ningra a maˈorip, wa sanengseng ko kaˈorip, ira ko epoc, o mamilifokho to soˈlinay a lipahak. (ˈOlic 19:7-11) Nikawrira, ano manaˈay kita micada to palinian ni Yihofa, o papakayni pidoedo to mararaway harateng adihay ko roray. Nengnengen ko nalifetan ni Ayli, misarocoday ko wama ato wina ningra pasifanaˈ cingranan maolah ci Yihofaan, kawra moetep ira ko pina ko mihecaan ningra ciwidangay to tatiihay a widang, misatapangay mitakaw to dafong, miselip to warak, malafoay ko kaˈorip. Sanay ci Ayli, itiya madoloay kako a maketer, mariˈangay ko demak. Sanay cingra: “Isalakat misowalan no Krisciyang a wama wina cowa kangaˈay demaken a demak, midemakan ako a maemin.” Kawra cowa ka pawan ci Ayli to mananamay ningra i kaemangho a soˈlinay kimad. Ikor miliyaway cingra minanam to Fangcalay Cudad, hanaca misaˈicel misawad to tatiihay a nanaman, saikor itini 2000 miheca micadaay to paputisem. Mitoor cingra to palinian ni Yihofa a maˈorip, malifokay ko maanan a epoc hani? Sowal ningra iraay ko rihaday no falocoˈ ato makoracay a makapahay falocoˈ. O nalifetan ni Ayli * pahapinangay kitaanan, o manaˈayay micada to palinian ni Yihofa a tamdaw pairaay to saka dokaˈ no niyah. Kawra, kamayan ci Yihofa makahi a padama to mahaenay a tamdaw a mafalic.

11. Ci Yihofa ˈintehay to maanan a demak?

¹¹ Ka ˈinteh to kaˈintehan ni Yihofa a demak. (ˈOlic 97:10) Sowal no Fangcalay Cudad, ˈintehay ci Yihofa to ‘misatakaraway a mata, misamangahay a sema, mipatayay to tamdaw a kamay.’ (Taneng  6:16, 17) ‘ˈIntehay to mariˈangay tamdaw, milipalaway to tao a tamdaw’ Cingra. (ˈOlic 5:6) Ci Yihofa ˈintehay to mahaenay a waywayan ato demak, mansa itini lintad ni Nowa palaˈafo to polong a tatiihay tamdaw itiya, samanen mitomesan nangra ko mariˈangay demak i cikiw. (Satapangan 6:13) Nengnengen ko roma tinakoan. Itini lintad ni Malaki, o romaroma tamdaw tano misaˈfitay a pakayraan milikong to fafahi. Sowal ni Yihofa ˈintehay Cingra to mahaenay a tamdaw, cowa ko cacadaen Ningra ko pidoko nangra, o papakayni tatiihay a demak nangra misawkit cangranan.—Malaki 2:13-16; Hipray 13:4.

12. O maanan ko tatodong no ‘kaˈintehen ko tatiihay’ hani?

¹² Pakafanaˈan ni Yihofa kita: ‘Kaˈintehen ko tatiihay.’ (Loma 12:9) O ‘kaˈintehen’ o ciˈicelay a harateng, tatodong i, tada teliiyay to cecay a demak, tada mapiliˈay. Haratengen hena, ira ko tamdaw pakaen tisowanan to maponiˈay a kakaenen, sasamaan ko harateng iso hani? O piharateng aca iso tonini a demak saka otaˈawto. Malecaday, o piharateng aca to mararaway a demak i pinengneng ni Yihofa, tada kapiliˈanto ano haratengen ita.

13. Misamanay o mamidipot kita to harateng no niyah?

¹³ Dipoten ko harateng iso. O harateng mifiyoray to waywayan, mihaenay, sowal ni Yis o fafalahen ko mikayatay to sakararaw a harateng. (Matay 5:21, 22, 28, 29) Makalimay kita pakahemek to kakarayan a Wama, mihaenay ano ira ko mararaway a harateng no ponoˈ, tatangsolen a mifalah, tada kalimlaan ko pihaen to demak!

14. (1) O sasowalen ita ngaˈayay patalahkal to maanan? (2) O lalicayen ita ko niyah to maanan a salicay?

¹⁴ ˈImeren ko sasowalen no miso. Sowal ni Yis: ‘O maharatengay i falocoˈ mahadakay i ngoyos.’ (Matay 15:18) Soˈlinayto o sasowalen ita patahkalay to i kemoday a falocoˈ ita, o soˈliˈlinay a waywayan ita. Ngaˈayay salalicayen iso ko niyah to laenoay a salicay: “Ano pasowal to soˈlinay a sowal ano papaira to sakaafad ako, wa manaˈay kako a misamangah han? Madimadiay kako to raramod eca pikalona to roma tamdaw hokira? Papakaliyas kako to kaacekan a sasowalen, malecad to miliyasay to midengaay a adada han? Ano pakararaw ko tao takowanan i, wa damsay kako a pacaˈof han?” Miharateng tonini a salicay wa ira ko sapadama tisowanan. Ngaˈayay patinakoen ita to sakofit no rikoˈ ko sasowalen, ano tedalen ko sakofit wa madoloto mahelong ko rikoˈ, malecaday, sapihelongaw kita to katelangan a capeling i, o fafalahen ko cowa ka satamdaw a sasowalen, ecato pisamangah, pakangodo to tamdaw ato somowal to kaacekan a sasowalen.

15. O katelangan a capeling ita ‘paceken i pisemseman a hecek’ o maanan ko tatodong?

¹⁵ Makahi misongilaˈ a mifalic. Misaka dademakan ni Pawlo ko cecay ciˈicelay a sapatinako mitadtad to mamifalic kita to pakayraan no niyah a maˈorip, sanay cingra o ‘papaceken i hecek’ ko katelangan a capeling ita. (Loma 6:6) Pakayni sapakahemekaw ci Yihofaan, hayi sanay ci Yis kinafalah to ˈorip, paceken no tamdaw i pisemseman a hecek. Malecaday, sapakahemekaw ci Yihofaan, o mamakahi kita tanektek ko pidemak. Mikilamit a mifalah to kaˈintehan ni Yihofa a waywayan ato demak, edengan mihaen ko demak ngaˈ ira ko makoracay makapahay falocoˈ ato midaˈocay ˈorip a hatokel. (Yohani 17:3; 1 Pitiro 3:21) Haratengen, ci Yihofa cowa ko papalecad kitaanan a mifalic to palinian no Niyah. O kita ko mamifalic, hanaca misaˈicel palecad to palinian Ningra.—Isaya 1:16-18; 55:9.

16. Hano mamisetek kiso to falocoˈ papadadotoc micoˈay to mararaway a coos hani?

¹⁶ Padadotoc malalood to mararaway a coos. Soˈlin micadaayto kiso to paputisem, o papadadotoc micoˈay to mararaway a coos. Nengnengen ko tinakoan ni Mawlisiaw, kaemangho cingra o tongsinlinayto ko kaˈorip, ikor malitemohay ningra ko Misawacayay Tamdaw ni Yihofa hanaca misatapangay minanam to Fangcalay Cudad. Mafalic cingra i nokaˈorip ikor, itiniay 2002 miheca micada to paputisem. Soˈlin halafinayto cingra midoko ci Yihofaan, kawra sanay ko sowal ningra: “Latekay kamayan kako malalood to mararaway a coos.” Kawra, cowa ka toled cingra, sanay: “Mafanaˈay kako, ano eca pidoedo ko niyah tonini a mararaway coos, o ngangaˈay pakahemek ci Yihofaan. Mihaenay, iraay ko ˈicel ako padadotoc a tanektek.” *

17. Mikitini i nalifetan ni Napiha mananamay iso ko manan?

¹⁷ Mitolon micangacang to sapadama ni Yihofa, mitadiˈec to fangcalay saocor Ningra, eca ko ˈicel no niyah. (Kalatiya 5:22; Filipi 4:6) Sapihelongaw kita to katelangan a capeling, eca ka piliyaw a mararaw, oha mamisetek to falocoˈ. Nengnengen ko nalifetan ni Napiha. Enem ko mihecaan ningra i, mifalahanto no wama, sanay cingra: “Tada taˈangayay ko pisetiˈ nonini takowanan, midokaˈay to nafalocoˈan ako.” Lomahadto cingra, halicalohay hinaketeray, ikor pacakayay to warak a malepel, pinaay miheca a mapalit. Itini kapalitan malitemohay ko mitosilay a Misawacayay Tamdaw ni Yihofa, orato misatapangay minanam to Fangcalay Cudad, hanaca taˈangayay ko kafalic. Sanay cingra: “O roma tatiihay nanaman madoloay sawaden, kawra pasangaray misawad to tamako.” Misaˈicel ci Napiha to cecay miheca ikor i, malaˈosiayto misawad to tamako. Samaanay ko demak ningra hani? Sanay cingra: “Sakakaay kalimlaan i, padadotoc micangacang to sapadama ni Yihofa.” Tano nalifetan no niyah ko sapakalalok ningra to tao, sanay: “Pakasoˈlinay kako, o mahaenay takowanan a tamdaw ngaˈayayho a mafalic, malo kaolahan no Kawas a tamdaw, mihaenay i, ano cimato o ngangaˈay pakadangar.” *

18. Mikitini 1 Korinto 6:9-11, ˈalomanay midokoay to Kawas a tamdaw ngangaˈay samaan ko pidemak hani?

¹⁸ O saka 1 hahekalan a Krisciyang o mipiliˈan no Kawas, iraay ko tokel tayra i kakarayan malacafay ci Yisan mala hongti, kawra i lalomaˈ nangra iraay ko na midemakay to adihayay tatiihay demak a tamdaw, tinakoen maˈaˈodangay, mitakaway, tongsinlinay a waywayan. Kawra itini sapadama no fangcalay saocor, ngaˈayay cangra misongilaˈ mifalic to capeling no niyah. (ˈOsien ko 1 Korinto 6:9-11.) Anini, ikor no minanam ko ˈalomanay tamdaw to Fangcalay Cudad i, ngaˈayay mafalic ko kaˈorip, hanaca mifalah to cilamitayto a tatiihay nanaman. * O tinakoan nangra paihkalay, ano kisoto wa ngaˈay misongilaˈ mifalic to capeling no niyah, malaˈosi ko patosokan a micada to paputisem.

19. Dotoc a lalakaw mamilengo to maanan?

¹⁹ Sapicadaaw to paputisem a tamdaw cowa ko pihelong aca to katelangan a capeling, mamisaˈicelho micaˈedong to faelohay a capeling. Dotoc a lalakaw mamilengo sasamaan ko pidemak ita, ato sasamaan ko roma tamdaw padama kitaanan.