1. Uga nge mbarenda geluhndu sope erlajar Pustaka?

 UGA nge mbarenda geluhndu sope erlajar Pustaka ras Saksi-Saksi Jahwe? Teremen arah kita banci saja la ateta siinget-inget mulihi uga geluhta mbarenda. Sange, perukuren ras perbahanenta banci saja ipengaruhi kai nina doni enda kerna si benar ras si salah. Paksa si e, banci saja ‘la lit arapenta ras la sitandai Dibata.’ (Ep. 2:12) Tapi kenca sipelajari Pustaka, berubah kerina!

2. Sanga mulai kam erlajar Pustaka, kai nge si tehndu?

² Sanga mulai kam erlajar Pustaka, tehndu me maka keleng kel ate Bapakta si i surga man bandu. Tehndu ka maka arus ubahndu lagu langkahndu ras carandu rukur gelah banci banndu meriah ukur Jahwe, ras gelah banci kam jadi bagin arah keluargaNa. Arus ka usahakenndu ngikutken patoken Jahwe kerna kai si benar ras si salah.​—Ep. 5:3-5.

3. Menurut Kolose 3:9, 10, kai si perentahken Jahwe man banta, janah kai kari sibahas bas artikel enda?

³ Jahwe kap Si Nciptaken kita ras Ia me Bapakta. Emaka, lit hakNa nentuken aturen kerna lagu langkah man anggota keluargaNa. Ate Jahwe, sope kita iperidiken, siusahaken min ‘nangtangi sipat-sipat si ndekah ras kerina perbahanenna.’ * (Baca Kolose 3:9, 10.) Artikel enda banci nampati kalak si merhat iperidiken njawap telu penungkunen enda: (1) Kai maksudna “sipat-sipat si ndekah”? (2) Engkai maka perentahken Jahwe gelah sitangtangi sipat-sipat si ndekah e? (3) Uga carata ngelakokenca? Artikel enda pe banci nampati kita si enggo iperidiken gelah lanai sipake sipat-sipat si ndekah.

4. Uga kin kalakna si pakena denga “sipat-sipat si ndekah”?

⁴ Adi lit kalak si pakena denga “sipat-sipat si ndekah,” biasana perukuren ras perbahanenna ngikutken sura-surana si erdosa. Banci saja ia kalakna egois, nukah merawa, la meteh ngata bujur, ras sombong. Banci saja meriah kapna nonton pornografi, film-film si lit i je perbahanen seks si salah, ntah pe kekerasen. Pasti nge lit sipat-sipatna si mehuli, janah banci saja salah kapna bana perban ranan ras perbahanenna si la mehuli. Tapi, la mbelin sura-surana guna ngubah carana rukur ras perbahanenna.​—Gal. 5:19-21; 2 Tim. 3:2-5.

5. Payo nge banci tuhu-tuhu siambekken kerina perukuren ras sura-surata si salah? Jelasken. (Perbahanen Rasul-Rasul 3:19)

⁵ Kerina kita la sempurna, emaka labo banci siambekken kerina perukuren ras sura-surata si salah amin pe enggo siusahaken kel. Mon-mon, banci saja sikataken ntah pe silakoken kai si dungna erban kita menyesal. (Jer. 17:9; Jak. 3:2) Tapi adi sitangtangi sipat-sipatta si ndekah, lanai kita ikendaliken sura-surata si salah ntah pe lanai terus silakoken kai si la mehuli. Dungna, sipat-sipatta banci tuhu-tuhu berubah.​—Jes. 55:7; baca Perbahanen Rasul-Rasul 3:19.

6. Engkai maka pindo Jahwe siambekken perukuren si salah ras sipengadi kebiasan si la mehuli?

⁶ Engkai maka pindo Jahwe siambekken perukuren si salah ras sipengadi kebiasan si la mehuli? Perban keleng kel ateNa kita janah ateNa meriah min ukurta. (Jes. 48:17, 18) TehNa maka adi la silawan sura-surata si salah, e banci ngerugiken kita ras kalak si lit i deherta. Adi bage si terjadi, sedih kel akap Jahwe.

7. Bagi si ikataken bas Roma 12:1, 2, pilihen kai si arus siban?

⁷ Sanga siusahaken ngubah sipat-sipatta, banci saja piga-piga temanta ntah pe keluargata nokohi kita. (1 Pet. 4:3, 4) Banci saja ikataken kalak e maka bebas kita ngelakoken kai pe bagi sura-surata janah labo lit hak kalak ngatur-ngatur kita. Tapi situhuna, kalak si la nggit ngikutken  patoken Jahwe labo tuhu-tuhu bebas, perban nggit kalak e ipengaruhi doni enda. (Baca Roma 12:1, 2.) Emaka arus siban pilihen: Tetap nge ateta make sipat-sipat si ndekah si ipengaruhi sura-surata si erdosa ras doni enda? Ntah, nggit nge kita ibentuk Jahwe gelah jadi kalak si reh ulina?​—Jes. 64:8.

8. Uga cara Jahwe nampati kita ngambekken perukuren si salah ras mpengadi kebiasan si la mehuli?

⁸ Iteh Jahwe maka perlu kita waktu ras usaha gelah banci ngambekken perukuren si salah ras mpengadi kebiasan si la mehuli. (Ms. 103:13, 14) Tapi, nggit Jahwe nampati kita janah bereNa kita kepentaren ras gegeh gelah banci robah. Si e ilakokenNa arah Pustaka, kesah si badiaNa, ras organisasiNa. Kam pe pasti enggo pernah isampati Jahwe. Gundari, sibahas piga-piga si banci silakoken gelah banci tuhu-tuhu sitangtangi sipat-sipat si ndekah ras gelah banci kita iperidiken.

9. Pustaka banci nampati kam ngelakoken kai?

⁹ Gunakenlah Pustaka mereksa dirindu. Pustaka bali bagi cermin. Banci pakendu Pustaka guna mereksa carandu rukur, rananndu, bage pe perbahanenndu. (Jak. 1:22-25) Kalak si ngajarken Pustaka man bandu ras turang senina si paguh kinitekenna banci nampati kam mereksa dirindu. Contohna, banci ipake kalak e ayat-ayat Pustaka guna nampati kam meteh kelebihen ras kelemahenndu. Banci ka kam iajarina ndarami informasi si erpalasken Pustaka si banci nampati kam mpengadi kebiasan si la mehuli. Jahwe pe lalap nggit nampati kam. TehNa cara si mehulina guna nampati kam ras tehNa isi pusuhndu. (Kua. 14:10; 15:11) Emaka tiap wari, usahakenlah ertoto man baNa ras pelajarilah Pustaka.

10. Kai nge si banci sipelajari arah pengalamen Elie?

¹⁰ Teklah kam maka patoken Jahwe me si mehulina. Adi siikutken kerina peraten Jahwe, sidat me gunana. Meriah me siakap ndalani geluhta, tuhu-tuhu meriah ukurta, janah merga siakap banta. (Ms. 19:7-11) Tapi, kalak si la nggit ngikutken patoken Jahwe, inanamina me akibat arah perbahanenna si la mehuli. Perdiateken pengalamen sekalak dilaki si gelarna Elie. Orang tuana engkelengi Jahwe janah ia pe ipebelin kitik-kitik nari guna engkelengi Jahwe. Tapi sanga remaja Elie, erteman ia ras kalak si la mehuli. Akibatna mulai pakena narkoba, lakokenna perbahanen seks si salah, ras nangko ia. Ia pe jadi kalak si nukah merawa ras kasar. Nina Elie, “Situhuna, enggo kulakoken kerina si kuteh la banci ilakoken kalak Kristen.” Tapi, inget Elie denga kai si pelajarina sanga ia kitik denga. Dungna, erlajar Pustaka ia mulihi. Erjuang kel ia mpengadi kebiasanna si la mehuli, janah dungna iperidiken ia bas tahun 2000. Kai gunana man Elie perban dalankenna mulihi patoken Jahwe? Ikatakenna maka gundari enggo dame perukurenna janah bersih pusuh peratenna. * Arah pengalamen e, siteh maka kalak si la nggit ngikutken patoken Jahwe pasti ngerugiken bana. Amin pe bage, nggit Jahwe nampati kalak e gelah robah.

11. Kai saja nge si segat ate Jahwe?

 ¹¹ Segatlah atendu kai si segat ate Jahwe. (Ms. 97:10) Ikataken bas Pustaka maka segat ate Jahwe ‘pengenen mata si sombong, dilah perbual, ras tan si munuh kalak si la ersalah.’ (Kua. 6:16, 17) Selain si e, “ciga ate Jahwe man kalak kejam ras penipu.” (Ms. 5:6) Segat kel ate Jahwe si e ndai kerina. E me sebapna maka ikernepkenNa kerina kalak jahat si lit bas jaman Nuah, si erban doni enda dem alu kejahaten. (Kej. 6:13) Ikataken Jahwe ka arah Nabi Maleaki maka segat ateNa kalak si la setia si ceraikenna diberuna si la ersalah. La nggit Dibata ngaloken persembahen kalak e janah pasti pagi hukumNa kalak e.​—Mal. 2:13-16; Heb. 13:4.

12. Kai ertina ‘ciga ate nandangi kai si jahat’?

¹² Ate Jahwe ‘ciga min ateta kai si jahat.’ (Rom. 12:9) Kata “ciga” maksudna segat ateta ntah pe la teta bage. Cuba bayangken adi suruh kalak kam man buah si macik. Ngukurisa saja pe banci saja ciga tendu. Bage ka pe, arus ciga ateta nandangi kai si segat ate Jahwe. Alu bage, ngukurisa saja pe la kita nggit.

13. Engkai maka arus sijaga perukurenta?

¹³ Jagalah perukurenndu. Kai si lit bas ukurta banci mpengaruhi perbahanenta. E me sebapna ikataken Jesus maka arus siambekken perukuren si banci erban kita ngelakoken dosa si serius. (Mat. 5:21, 22, 28, 29) Pasti siban ateta meriah ukur Bapakta si i surga. Emaka, sanga lit perukurenta si salah, mislah siambekken!

14. Kai si banci teridah arah rananta, ras penungkunen kai saja si perlu siukuri?

¹⁴ Jagalah rananndu. Nina Jesus, “Kai pe si ndarat arah babah nari rehna arah pusuh nari.” (Mat. 15:18) Rananta banci ncidahken uga situhuna isi pusuhta. Emaka, cuba ukuri penungkunen-penungkunen enda: ‘Lalap nge aku jujur amin pe e banci erban aku kena masalah? Adi aku enggo erjabu, kujaga nge rananku gelah la nggoda kalak si labo teman geluhku? Tuhu nge segat ateku cakap kotor janah la aku nggit makesa? Sanga lit kalak si erban aku merawa, banci nge aku tetap tenang ngerana man bana? Penungkunen-penungkunen e perlu siukuri alu mbages. Kata-kata si la mehuli banci ipeseri ras kancing-kancing baju.  Baju e banci reh nukahna itangtangi adi ibuka lebe kancing-kancingna. Bage ka pe, adi sitangtangi ateta sipat-sipatta si ndekah, ula nai kita erbual janah ula sibelasken ranan si kasar ntah pe cakap kotor.

15. Kai maksudna sipat-sipatta si ndekah arus “ipakuken bas tiang”?

¹⁵ Banlah perubahen si iperluken. Arah sada perumpaman si mejile, ijelasken Rasul Paulus kerna uga pentingna erban perubahen. Itulisna maka sipat-sipatta si ndekah arus “ipakuken bas tiang.” (Rom. 6:6) Gelah meriah ukur Jahwe, nggit Kristus ipakuken bas tiang. Kita pe bage, gelah meriah ukur Jahwe, nggit min kita mpengadi perbahanen ras kebiasanta si segat ate Jahwe. Adi silakoken si e, banci sidatken pusuh peraten si bersih ras arapen guna nggeluh ermeriah ukur seh rasa lalap. (Joh. 17:3; 1 Pet. 3:21) Ingetlah maka ngasa ndigan pe labo pernah iubah Jahwe patokenNa guna ngikutken sura-surata. Kita nge si perlu robah ras siikutken patoken-patokenNa.​—Jes. 1:16-18; 55:9.

16. Engkai maka arus terus silawan sura-sura si salah?

¹⁶ Teruslah lawan sura-sura si salah. Kenca iperidiken pe arus denga terus silawan sura-sura si salah. Cuba perdiateken pengalamen sekalak turang seninata si gelarna Maurício. Sanga ia nguda denga, jadi homo ia. Bas pudi wari, jumpa ia ras Saksi-Saksi Jahwe janah mulai ia erlajar Pustaka. Kenca iperobahina lagu langkahna, iperidiken me ia bas tahun 2002. Amin pe enggo ertahun-tahun dekahna Maurício ngelayani Jahwe, bagenda nina, “Mon-mon, arus denga kulawan sura-suraku si salah.” Tapi labo kitik ukurna perban si e. Nina, “Kuteh maka banci nge kuban meriah ukur Jahwe adi la kuikutken sura-sura si salah e.” *

17. Kai si menarik akapndu arah pengalamen Nabiha?

¹⁷ Ertotolah mindo penampat Jahwe ras andalken kesah si badiaNa, labo gegehndu. (Gal. 5:22; Pil. 4:6) Arus siusahaken kel gelah banci sitangtangi sipat-sipat si ndekah. Cuba siperdiateken pengalamen  sekalak turang seninata si gelarna Nabiha. Sanga umurna enem tahun, itadingken bapakna ia. Ikatakenna maka kejadin e erban getem kel pusuhna. Perban pengalamen e, Nabiha jadi kalak si nukah merawa. Bas pudi wari, jadi pengedar narkoba ia. Jenari itangkap ia ras ipenjaraken piga-piga tahun dekahna. Bas penjara, mulai ia erlajar Pustaka ras Saksi-Saksi Jahwe si reh ku je. Mulai me iban Nabiha perubahen si mbelin bas geluhna. Bagenda nina, “Piga-piga kebiasanku si la mehuli banci mis kupengadi.” Tapi mesera kel kapna ngadi ngisap. Kenca erjuang ia lebih setahun, dungna banci ia ngadi ngisap. Menurut Nabiha, si utamana kel nampati ia eme terus ertoto man Jahwe. Gundari, banci katakenna bagenda, “Tek aku maka adi aku pe banci robah guna erban meriah ukur Jahwe, ise pe banci nge robah!” *

18. Menurut 1 Korinti 6:9-11, perubahen kai saja si enggo ilakoken enterem umat Jahwe?

¹⁸ Bas abad pertama, arah kalak si ipilih Jahwe guna merentah ras Kristus, lit piga-piga si mbarenda kebiasanna la mehuli. Contohna, piga-piga arah kalak e erlua-lua, ngelakoken homoseks, ras nangko. Tapi alu penampat kesah si badia Dibata, banci kalak e robah. (Baca 1 Korinti 6:9-11.) Gundari pe, jutan kalak enggo perobahina lagu langkahna kenca erlajar Pustaka. * Banci pengadi kalak e kebiasan si la mehuli amin pe enggo ndekah kel ilakokenna. Pengalamen kalak e mbuktiken maka banci perobahindu sipat-sipatndu ras pengadindu kebiasan si la mehuli. Alu bage, banci kam iperidiken.

19. Kai kari sibahas bas artikel seterusna?

¹⁹ Kalak si atena iperidiken arus tangtangina sipat-sipat si ndekah ras usahakenna make sipat-sipat si mbaru. Bas artikel seterusna, sibahas kari uga carata ngelakokenca ras uga kalak si deban banci nampati kita.