1. Ényiñe jôé é mbe aya ôsusua na wo yé’é Kalate Zambe?

 ÉNYIÑE jôé é mbe aya ôsusua na wo yé’é Kalate Zambe a Bengaa be Yéhôva? Abui ya be bia e ne teke nye’e e simesa’ane biyoñe bite. Éko éziñ melu mete, émo nje é mbe é méé asimesane dangan a avale môt bi mbe, a ôsimesane wongan ô mbe ô lu’an a wu bôt be mbe be bili a lat a mam me ne mvo’é nge ke abé. Nge e ne nalé, wônaa bi mbe teke “ndi minlem a te ke Zambe si nyô.” (Beép. 2:12) Ve ayé’é Kalate Zambe e nga tyendé ényiñe jangan.

2. Jé ô nga yem éyoñ ô nga taté na wo yé’é Kalate Zambe?

² Nté ô mbe ô yé’é Bible, ô nga yeme na ô bili Ésaa yôp été a nye’e wo angôndô ya abui. Ô nga yé’é fe na nge wo kômbô nye ve nlem avak a bo ébu’a ya nda bôte jé, wo yiane bo beta mintyendan miziñ a lat a ntabane wôé, mefulu môé, a asimesane dôé. E nga sili na ô yé’é aval ô ne tôñe memvinda mé ényiñe jôé.​—Beép. 5:3-5.

3. Jé Becolossien 3:9, 10 a jô na bia yiane bo, a jé bia zu yen ayé’é di?

³ Yéhôva a ne Nté wongan a Ésaa wongan, ajô te, nnye a yiane tyi’ aval avé bibu’a ya nda bôte jé bia yiane nyiñ. A yi na ôsusua na môt a duban, a taté ve ngule ya ‘vaa nnôma môt a mimboane mié.’ * (Lañe’e Becolossien 3:9, 10.) Ayé’é di dé volô bôte ba kômbô dubane na be yalane minsili milale mi: (1) Jé é ne ‘nnôma môt’? (2) Amu jé Yéhôva a jô bia na bi vaa nye? (3) Aval avé bi ne bo de? Nge ô dubaneya, ayé’é di dé volô wo na ô wosane mbia mefulu ô mbe ô bili ôsusua na wo vaa nnôma môt.

4. Môt a ngenan a be’e ‘nnôma môt’ a wô’ô bo aya?

⁴ Môt a be’e ‘nnôma môt’ a dañe simesan a bo mbia be mam. A ne bo avale môt da jeñe fo’o ve mvo’é jé, avôle ya yaa, teke yeme ve akiba, a mebun. A ne fe nye’e a yene’e bingengeñe bia liti mame bisôk nge ke évô. Teke bisô na a bili fe mbamba mefulu méziñ, e ne fe kui na a wô’ ôson amu mbia be mam a jô nge bo, ve a nji bi nkômbane ya tyendé asimesane dé a mimboone mié.​—Beg. 5:19-21; 2 Tim. 3:2-5.

5. Ye bi ne ngule ya vaa nnôma môt éyoñe jia ya biyoñe bise? Timi’in. (Mam. 3:19)

⁵ Bia bese bi be’e metyi ya abé, ajô te teke môt éziñ a ne kui na a mane vaa mbia minkômban a mbia b’asimesan bese be ne nye nlem. Biyoñe biziñ, bi ne jô nge ke bo jam éziñ bia su’ulane jôban. (Jr. 17:9; Jc. 3:2) Ve éyoñe bi vaaya nnôma môt, mbia b’asimesan a mbia mimboone ya minsôn ba jôé ki fe bia. Bi nji beta bo avale môte bi mbe.​—És. 55:7; lañe’e Mam minlôman 3:19.

6. Amu jé Yéhôva a yi na bi vaa mbia b’asimesan a mbia mefulu ya nnôma môt?

⁶ Yéhôva a nye’e bia angôndô ya abui, jôme te nje a jô bia na bi vaa mbia b’asimesan a mbia mefulu. A yi na bi kôme bu’uban ényiñ. (És. 48:17, 18) A yeme na bôte ba wosane ki mbia minkômban mi ne be minlem ba bo bebien a bôte bevo’o abé. A wô’ô nleme mintaé éyoñ a yen ane bia telé biabebien a bôte bevo’o minju’ été.

7. Ntyi’an ôvé Beromain 12:1, 2 a jô na bia yiane nyoñ?

⁷ Bemvôé bangan béziñ a bibu’a ya menda me bôte mangan be ne taté na ba kpwe’ele bia amu bia jeñe na bi bo mintyendan ényiñe jangan. (1 P. 4:3, 4) Be ne jô na môt ase a ne fili ya bo jôm ése a yi, a na sa ke bôte befe mbe ba yiane kate bia jam bia yiane bo. Ve nya ajôô a ne na, bôte ba bene tôñe memvinda me Yéhôva be nji bi nya éto fili, amu ba jô’é na émo Satan nje é méé be. (Lañe’e Beromain 12:1, 2.) Bia bese  bia yiane nyoñe ntyi’an: Ye bii ke ôsu a ba’ale nnôma môt, nyi metyi ya abé a émo Satan bi maneya méé, nge ke na, ye bii kañese na Yéhôva a wulu binyiñe biangan ndemben bii bo mbamba be bôt?​—És. 64:8.

8. Jé é ne volô bia na bi wosane mbia b’asimesan a mbia mefulu?

⁸ Yéhôva a yeme na dé sili bia abui éyoñ a abui ngul asu na bi wosane mbia b’asimesan a mbia mefulu. (Bs. 103:13, 14) Ve a zene ya Kalate wé, mbamba nsisime wé, a ékôane jé, Yéhôva a ve bia fek, ngul, a mvolane wo sili asu na bi bo mintyendan. Teke bisô na a volôya wo abui azukui den. Bi tame zu yene mam méziñ me ne volô bia na bi ke ôsu a wosane nnôma môt a na bi bo ngule ya baptizôban.

9. Aval avé Kalate Zambe a ne volô wo?

⁹ Bela’ane Kalate Zambe asu na ô yem avale môt ô ne. Kalate Zambe a ne ane ngobô; a ne volô wo na ô yemelan ôsimesane wôé, ô fase minkobô miôé, a mimboone miôé. (Jc. 1:22-25) Ñye’ele Bible wôé a bitôtôlô Bekristene bife be ne fe ve wo melep. Be ne belane Kalate Zambe na be liti wo mbamba mefulu ô bili, a mame wo yiane sôan. Bé ye’ele wo aval ô ne jeñe mbamba melebe ya Kalate Zambe me ne volô wo na ô wosane mbia mefulu. Yéhôva a ne fe wo bebé éyoñ ése wé yi mvolan. Nnye a ne kôme volô wo, amu a yeme mam mese me ne wo nlem été. (Min. 14:10; 15:11) Ajô te, jeñe’e na ô bi fulu ya ye’elane nye a lañe Kalate wé môs ôse.

10. Jé nkañete Élie wo ye’ele bia?

¹⁰ Tabe’e ndi na memvinda me Yéhôva me ne asu mfi wôé. Bia bi bibotan éyoñ ése bia bo jame Yéhôva a jô bia na bi bo. Bôte ba tôñe memvinda me Yéhôva ba ba’ale éjijine jap, ényiñe jap é bili nsôñan, a be bili benya meva’a. (Bs. 19:7-11) Ve ba ki ba bene me tôñe ba tôbane minju’u mia so mbia minkômbane ya minsôn. Tame yene jame môt éziñ a ne jôé na Élie a nga tôbane de amu a nga bene tôñe memvinda me Yéhôva. Bebiaé bé be nga yale nye benya mejôô, ve éyoñ a nga bo ésoé, Élie a nga taté na a bi mbia mewoso. Ane a nga taté na a nyu banga a bo mvine mame ya bisôk, a wubu’u fe. Élie a mbe ôngase a évô. A jô na: “Nge ma wôlôkan, me ne jô na me nga bo avale mam ese be nga ye’ele ma na Kristen é nji yiane bo.” Ve, Élie a nji vuane mam a nga yé’é aso mongô. Môs éziñ, a nga beta taté na a yé’é Bible. A nga ve ngul ése asu na a jô’é mbia mefulu a mbe a bili, a baptizôban mbu 2000. Bibotane bivé Élie a bi nté ane a tôñe memvinda me Yéhôva? A jô na: “Éyoñe ji, nlem ô bôô ma si ne mieññ, a mone môte ya nleme wom a ne mfuban.” * Nkañete ôte wo liti bia na bôte ba bene tôñe memvinda me Yéhôva ba telé bebien mbia été. Ve to’o nalé, Yéhôva a ngenan a bili nkômbane ya volô be.

11. Mam mevé Yéhôva a vini?

¹¹ Yé’é na wo vini mame Yéhôva a vini. (Bs. 97:10) Kalate Zambe a jô na Yéhôva a vini “mis me ne bives, ôyem ô ne minsos, mo ma kulu metyi me ne te étom.” (Min. 6:16, 17) A “wô’ô [fe] môt a ne ñwôé bôt a medu’an nyé.” (Bs. 5:6)  Yéhôva a vini mam mete aval e ne na, a nga mane wôé bebo mam abé bese melu me Noé, éyoñ évô é nga mane jaé si nyi ne lut. (Met. 6:13) Bi tame nyoñ éve’an éfe. Yéhôva a nga lôme nkulu mejô Malachie na a ke kate ayoñe dé abim avé a vini bôte ba bôndé mefe’e na be tyame melu’u map. Zambe a nga jô be na a vo’o kañese ékaña’a jap, a na é ve be ma’ane ya mbia mimboone miap.​—Mal. 2:13-16; Beh. 13:4.

12. Jé ja tinane na e ’vini mam me ne abé’?

¹² Yéhôva a yi na bi ‘vini mam me ne abé.’ (Bero. 12:9) Éfia be nga kôñelane na “vini” ja tinane na môt a wô’ô jam éziñ sañe biko, nge ke na a wô’ô je nyé. Éve’an é ne na, wé wô’ôtan aya nge ba jô wo na ô di bidi bi nto ébol. Éko éziñ fo’o ve éyoñe wo simesane jam ete, wo wô’ô de angôndô. Avale te da da, fo’o ve ôsimesane ya bo jame Yéhôva a yen abé wo yiane bia vindane nlem.

13. Amu jé bia yiane wosane mbia b’asimesan?

¹³ Wosa’ane mbia b’asimesan. Mam me ne bia ôsimesan mme me wô’ô wulu mimboone miangan. Jôme te nje Yésus a nga jô bia na bia yiane titan asimesan e ne tindi bia na bi bo nsem. (Mt. 5:21, 22, 28, 29) Bia kômbô ve Ésaa wongan ya yôp nlem avak, sa nalé? Nde, e ne nya mfii na bi ji’a titane mbia b’asimesan bese be ne so bia nlem!

14. Jé mam ma kui bia anyu ma liti, a minsili mivé bia yiane sili biabebien?

¹⁴ Tabe’e ntyel a mam ma kui wo anyu. Yésus a nga jô na: “Mam ma kui anyu ma so nlem.” (Mt. 15:18) Ôwé, mam bia jô ma liti avale môte bi ne. Ajô te, sili’i womiene minsili mi: ‘Ye me wô’ô bene laane minsos to’o éyoñe ma yeme na nge me kobô benya mejôô, me ne tôbane nju’ éziñ? Nge me ne nlu’an, ye ma tabe ntyele ya bo môt mfe ayas? Ye ma ve ngul ése na me sa’ale mvite minkobô? Ye me wô’ô yalane bôt évôvoé été éyoñe ba soñe ma?’ E ne mfi na ô nyoñ éyoñe ya fase minsili mite. Be ne ve’e mejô ma so wo anyu a kilisi. Aval ane kilisi a late biyé, avale te da da, mvite minkobô mia yemete nnôma môt. Ajô te, nge bia kômbô vaa nnôma môt tyi’ibi, bia yiane jô’é mvite minkobô a minsos.

15. Jé ja tinane na e ’tyelé’ nnôma môt élé mintaé yôp?

 ¹⁵ Bo’o mintyendane mia sili. Nlômane Paul ô nga belane mbamba éve’ela asu na ô ye’ele bia mfi ya bo mintyendan ényiñe jangan. A nga jô na bia yiane tyelé ‘nnôma môt’ élé mintaé yôp. (Bero. 6:6) Nalé a tinane na bia yiane tôñ éve’ela Yésus. A mbe nkômesane ya wu élé mintaé yôp asu na a ve Yéhôva nlem avak. Avale te da da, asu na bi ve Yéhôva nlem avak, bia fe bia yiane bo nkômesane ya ve ngul ése asu na bi wosane mimboon a mbia mefulu ma ve nye nlem abé. A ne fo’o ve éyoñe bii bo mam mete nje bii bi mone môte ya nlem a too mfuban, a ndi nleme ya nyiñe nnôm éto. (Jean 17:3; 1 P. 3:21) Te vuane na Yéhôva a ye ke tyendé memvinda mé asu na me lu’an a nkômbane wongan. Bia bia yiane bo mintyendan mia sili asu na bi tôñe memvinda mé.​—És. 1:16-18; 55:9.

16. Amu jé bia yiane ke ôsu a wosane mbia minkômbane ya minsôn?

¹⁶ Kele’ ôsu a wosane mbia minkômban ya minsôn. To’o éyoñ ô dubaneya, wo yiane ke ôsu a wosane mbia minkômbane ya minsôn. Tame yene jam e nga kui fam éziñ é ne jô na Maurício. Éyoñ a mbe ésoé, a nga taté na a diñe befam bevok. Môs éziñ a nga tôbane Bengaa be Yéhôva, ane a nga taté na a yé’é Bible a be. Éyoñ a nga mane bo mintyendan mia sili, a nga baptizôban mbu 2002. Akusa bo a boya Yéhôva ésaé den a nto abui mimbu, Mauricio a jô na: “Me ngenan me kele’ ôsu a wosane mbia b’asimesane biyoñe biziñ.” Ve a sili ki mo si. A jô na: “Ma bi ngule nyul amu ma yeme na éyoñe ma tyi’i na ma tôñe ki mbia minkômbane mia so ma nlem, ma ve Yéhôva nlem avak.” *

17. Jé nkañete Nabiha wo ye’ele wo?

¹⁷ Ye’ela’ane Yéhôva, tabe’e ndi na mbamba nsisime wé a ye volô wo, te tabe womiene mebun. (Beg. 5:22; Beph. 4:6) Bia yiane saé a ngul ése nge bia yi na bi vaa nnôma môt, a na a bo teke beta so. Tame yene jam e nga kui Nabiha. Ésaa wé a nga li’i nye étam, valé a bili fo’o ve mimbu mi saman. A jô na: “Jam ete e nga bo ma  angôndô ya mintaé nlem.” Éyoñ a nga bo nya môtô, Nabiha a nga bo avale môt e ne ôngase, e nye’e mejô. A nga taté na a kuane banga, ane be nga su’ulane bi nye, a fete nye mimbôk. A nga bo abime mimbu éziñ nda mimbôk, ane Bengaa be Yéhôva be mbe be za’a kañete nda mimbôk éte be nga taté na ba yé’é Bible a nye. Nabiha a nga taté na a bo beta mintyendan. A jô na: “Me nga ji’a telé mbia mefulu mam méziñ. Ve me nga yen ayaé ya telé nyuane sika.” Nabiha a nga kui na a jô’é nyuane sika mvuse mbu wua a mvuk. Jé é nga volô nye? Émien a jô na: “Jam e nga dañe me volô e mbe meye’elane me mbe me bo’o Yéhôva mban.” A lebe bôte bevo’ éyoñe ji na: “Me too ndi na nge me nga kui na me bo mintyendan asu na me ve Yéhôva nlem avak, môt ase a ne de bo!” *

18. Bela’ane 1 Becorinthien 6:9-11 asu na ô liti jam abui bebo bisaé be Yéhôva béziñ be nga kui na be bo.

¹⁸ Ntete mimbu ôsu, befam a binga béziñ Yéhôva a nga tobe na be ke jôé a Yésus yôp be nga kui na be telé mbia mimboon. Éve’an é ne na, bevo’o y’été be mbe be bo’o mejian, mvine mame ya bisôk, a wup. Ve mbamba nsisime Zambe a nga volô be na be jaé mfefé môt. (Lañe’e 1 Becorinthien 6:9-11.) Avale te fe, den, Kalate Zambe a volô bemillion be bôte na be bo mintyendan binyiñe biap. * Be nga kui na be vaa mbia mefulu me mbe me nto be nyulu nyulu. Minkañete miap mia liti na wo fe ô ne wosane mbia mefulu ô bili a bo mintyendan mia sili asu na ô baptizôban.

19. Jé bii yen ayé’é da zu?

¹⁹ Ane ô vaa na ba yiane saé a ngul ése asu na be vaa nnôma môt, bôte ba kômbô baptizôban ba yiane fe ve ngule na be jaé mfefé môt. Ayé’é da zu dé liti bia aval avé bi ne bo de, a aval avé bôte bevo’o be ne volô bia.