1. Ida liña meha hibagari lubaragiñe hagumeserun aturiahoun Bíbülia?

 IDA LIÑA meha hibagari lárigiñe hagumeserun aturiahoun Bíbülia hama gefentiña luagu Heowá? Añahein saragu wádangiñe mínsiñeti woun nírügü lun wasaminarun luagu. Gayaraati arufuda lani meha wagaburi le lasaminarubei ubóu luagu le buídubei luma luagu le wuribabei. Anhein ligía lubéi asuseredubei woun, wabagariduña meha “memeniginga ibidiñega Bungiu” woun (Efe. 2:12). Íbini ítara, sánsiti sun le dan le wagumeserubei aturiahoun Bíbülia.

2. Ka hafurendeirubei eibu haturiahanu Bíbülia?

² Eibu haturiahanu Bíbülia aba hafurendeirun luagu Húguchi le siélubei le hínsiñehabubei hun. Gunfuranda humuti mosu lan hadügün asansiruni súdiniti lidan hibagari luma lidan ligaburi hisaminan anhein busén hubéi hagundaaragüdüni Heowá luma lun hádangiñe humá lubúeingu. Mosu inebe lan lilurudun Heowá hun (Efe. 5:3-5).

3. a) Según Éfesuna 4:22, 24, ka labusenrubei Heowá lun wadügüni? b) Kaba wariha lidan aturiahani le?

³ Kei Heowá lubéi Wáguchi le siélubei, ani ligía adügübaliwa, garichati lun lariñaguni woun ida luba lan wóuserun. Ani ariñagati houn ha busenbaña habadiseirun: “Ánheinti luagu binadu ligaburi habagaridun, lunti hígiruni” * (aliiha huméi Éfesuna 4:22, 24). Hasaminaruña san habadiseirun? Líderagubadün aturiahani le lun hóunabun ǘrüwa álügüdahani: ka mini lubéi binadu igaburi?, ka uagu labusenra Heowá lun wagidaruni wawariua?  Ani ida luba wadügüni? ani, anhein badiseihadiwa lubéi, líderagubadiwa aturiahani le lunya magiribudun lan binadu igaburi le meha wawagubei.

4. Ida liña lóuserun aban gürigia le ígiraguagüdübei lungua lun lagumadiruni binadu igaburi?

⁴ Le ígiraguagüdübei lungua lun lagumadiruni binadu igaburi saminati ani adüga lumuti le layumahabei ǘgürügü, mini lan le ladügüña lan figóu. Gayaraati ménrengun lan lagañidun, lóuserun lau igaaduaü, meteingiradi lan ani barügua ligía lungua. Háfuga hínsiñeti lun laríagun iyawaü lánina agamariduni tuma pelikula o pikchá lánina magíaguni o anarimeni. Chóuruti anihein lan igaburi buiti luagu, ani másiñati wuriba lan lasandiragun lungua lau le lariñagubei luma le ladügübei, háfuga mégeiti línchahoun lun lasansiruni ligaburi lisaminan luma le ladügübei (Gal. 5:19-21; 2 Tim. 3:2-5).

5. Gayaraati san wagidaruni luriban igaburi wawariua? Afuranguagüda huméi (Adügaü 3:19).

⁵ Kei le chará wabéi, úati ni aban wádangiñe le gayaraati lagidaruni luriban saminaü luma luriban ayumahani lídangiñe lisaminan luma tídangiñe lanigi sunsuinagubei. Ñeinbei dan wadügün o wariñagun katei le adügüti lun wasakürihan lárigiñe (Her. 17:9; Sant. 3:2). Ligíati dan le wagidaruni binadu igaburi wawariua, magumadirun laadiwa igaburi ni échuni lánina figóu ani masubudiruadiwa lau igaburi burí lira (Isa. 55:7; aliiha huméi Adügaü 3:19).

6. Ka uagu lariñaga Heowá woun lunti lan wagidaruni luriban igaburi luma échuni lánina binadu igaburi wawariua?

⁶ Ariñagati Heowá woun lun wagidaruni luriban saminaü luma échuni wawariua ladüga wéiriti wínsiñe lun, ani busenti lun buidu lan lidin woun lidan wabagari (Isa. 48:17, 18). Subudi lumuti ánhawa lan ígiraguagüda woungua lun luriban ayumahani, wadügüba lan dañu wóuniwagua luma houn amu. Ani gáriti lun larihin aban katei ítarati.

7. Según Rómana 12:1, 2, ka lunbei wanúadiruni?

⁷ Anihein dan añahein lan hádangiñe waduheñu hama wamadagu ha adügütiña bula wau ladüga wáfaagun lun wasansiruni wagaburi (1 Fe. 4:3, 4). Másiñati hariñagun woun garichatiwa lan lun wadügüni le wabusenrubei ani úati lan lunti lariñaguni woun kaba lan wadüga. Le linarün katei, ha máhabaña lun lilurudun  Heowá madügün hamuti le habusenrubei. Lubaragiñe lira, ígiraguagüdatiña houngua lun lagumadiruniña ubóu le lábugiñebei lubafu Satanási (aliiha huméi Rómana 12:1, 2). Sun wagía mosu wanúadirun kaba lan wadüga: werederun lau binadu wagaburi le lanügübei figóu luma ubóu le lábugiñebei lagumadihan Satanási odi wígiraguagüdün woungua lun lasansiruni Heowá wagaburi lun ábatima wamá gürigia le buiti (Isa. 64:8).

8. Kaba íderaguawa lun wígiruni luriban saminaü luma échuni?

⁸ Subuditi lun Heowá mégeiwa lan dan luma áfaaguni lun ligirún luriban saminaü luma échuni (Sal. 103:13, 14). Ru lumutu Heowá Lererun, lani sífiri tuma lóundarun lun líchuguni lichú aau luma erei le wemegeirubei woun lun wadügün asansiruni lidan wabagari. Chóuruti ariha humaali lan ida liña lan líderagunün Heowá. Guentó, wariha ka lan gayaraabei hadügüni lun hasigirun agidarei binadu igaburi huáriua luma lun hadügüni le mégeiwabei lun habadiseirun.

9. Ka gayaraabei tadügün Lererun Bungiu huagu?

⁹ Yusu humoun Bíbülia lúntima harihini ida hiña lan. Ítaratiña Lererun Bungiu kei aban isubusei, ligía gayara lubéi tíderagunün akutihei ligaburi hisaminan, hayanuhan luma hóuserun (Sant. 1:22-25). Gayaraati líchugun íbiri le íchugubei aturiahani tídangiñeti Bíbülia hun hama amu íbirigu ha lǘhaña lidan afiñeni adundehani hun. Ida? Lau hayusurunu Bíbülia lun híderagunün asubudirei halíaba lan hemegeira ídemuei luma lau harufuduni hun halíaba lan háluaha ídemuei tídangiñeti Bíbülia le gayaraabei líderagunün ígirei luriban échuni. Ani aranseñu liña Heowá lun líderagunün súnwandan. Úati amu luéi le gayaraabei líderagunün, ladüga subudi lumuti le tídanbei hanigi (Ari. 14:10; 15:11). Ligíati, hechu humá afurieida luma aturiahoun Lererun Bungiu sagü weyu.

10. Ka hafurendeirubei lídangiñe le asuseredubei lun Elie?

¹⁰ Chouru huméi lilurudun lan Heowá buídutimabei. Sun le lariñagubei Heowá woun lun wabuidun guánarügü. Ha inebehabubaña lun lilurudun buítimati hasandiragun houngua, ibihatiña aban ibagari le gasuuniti luma ugundani le inarüniti (Sal. 19:7-11). Ánhañati ha maganbadibaña, súfuri hamuti wuribani le lanügübei layumahan ǘgürügü. Ariha huméi le lariñagubei aban gürigia le gíribei Elie luagu le asuseredubei dan le maganbadiwa lan lun lilurudun Bungiu. Lau sun gefentiña lan meha luagu Heowá lagübürigu, dan le wéiyaraühali aba láluahan hagübüri umadagu. Aba lagumeserun ayusura düroga, adüga magíaguni luma íweruha. Ariñagati ábatima lan lawosudun ligaburi ani eibu dan ábatima furunde lan. Abahüdaguati: “Lidan murusun dimurei, adüga numuti sun le meha arufudahóubei nun, moun lumuti lan ladügüni aban kristiánu”. Lau sun lira, mabulieidun lumuti sun le harufudahabei lagübürigu lun dan meha ñǘgili. Ligíati, lau lásügürün dan ábaya lagumeserun aturiahoun Bíbülia. Áfaaguati saragu lun lígiruni sun katei wuribati le meha ladügübei ani aba labadiseirun lidan irumu 2000. Ida liña lanügün saragu buiti lun lasigiruni lilurudun Heowá lidan libagari? Ariñagati: “Darangila hali nasandiragun nungua ani harumaali nisaminan”. * Kei le asuseredubei lun Elie, ha máhabaña lun Heowá adügatiña dañu hóuniwagua. Íbini ítara, aranseñu liña Heowá lun líderaguniña asansirei hagaburi.

11. Ka burí katei iyereegubei lun Heowá?

¹¹ Furendei humá asandira iyereehabúni luagu le iyereegubei lun Heowá (Sal. 97:10). Ariñagatu  Bíbülia iyereegu lan burí katei le lun Heowá: “Agu pántati, iñeñein yeetu, úhabu le áfarahati gürigia maduruntiña” (Ari. 6:16, 17). Ariñagatu giñe: “Günringua bumutiña ha marasualugubaña bugabaña gáfarahatiña” (Sal. 5:6). Wéiriti liyereegun katei burí le lun Heowá darí lun lagumuchagun hau wuribatiña ha meha lídanbaña lidaani Noé ladüga buíngüda hamaali meha ubóu lau anarimeni (Agu. 6:13). Ábaya katei le iyereegubei lun Heowá, le uágubei layanuha liyumulugugiñe profeta Malakíasi, dan le hagabarahan maríeitiña lúnrügü hígiragun. Máhati Heowá lun háhuduragun gürigia ha adügübalin katei burí le, ani laguseragüdübaña (Mal. 2:13-16; Ebü. 13:4).

12. Ka mini lubéi liyereegudun aban katei wuribati woun?

¹² Ariñagati Heowá woun: “Iyereegu lan wuribani hun” (Rom. 12:9). Dimurei iyereegu adügati lun wasaminarun luagu le wasandirubei múnadagiñe wabiti. Mini lan wasandirun iyereehabúni o lahahünedun aban katei woun. Samina wamá kaba lan hamuga wadüga anhein lamuriahóun wama lun weigin éigini gádeihali. Láurügü wasaminarun luagu aba lahahünedun woun. Ligiaméme lunbei wasandiruni láurügü wasaminarun wadügün aban katei le mínsiñebei lun Heowá.

13. Ka uagu lunti lubéi wóunigiruni ka lan uagun wasaminara?

¹³ Góunigi huméi ka lan uagun hasaminara. Gániti le wasaminarubei luagu le wadügübei. Ligía larufudahabei Hesusu lun wamahadun lun furumiñeguarügü saminaü le gayaraabei lanügüniwa lun wadügün somu figóu le wéiriti (Mat. 5:21, 22, 28, 29). Ma inarüni busentiwa lan wagundaaragüdüni Wáguchi le siélubei? Anhein ítara liña lubéi súdiniti lun wamahadun lun furumiñeguarügü saminaü le wuribabei.

14. Ka larufudubei dimurei le wariñagubei wawagu ani ka lunbei wálügüdagun woungua?

¹⁴ Góunigi huméi le hariñagubei. Ariñagati Hesusu: “Dimurei le áfuridubei lídangiñe iyumaü, tídangiñe anigi liabin” (Mat. 15:18). Ítara liña. Arufuda lumuti dimurei le wariñagubei kátawa lan. Álügüdagua humá hungua: “Ariñaga numuti san inarüni súnwandan, íbini anhein anüga turobuli nun? Anhein maríei nubéi, duaritina san luéi nadariha amu gürigia? Dan le san layanuhóun luagu magíaguni, aba san nadisedun? Óunabatina san lau darangilaü dan le hagañidagüdünina amu gürigia?”. Direi humá dan lun hasaminarun luagu álügüdahani burí le. Ítara liña dimurei luagu wagaburi, kei aban filu le aubei tahüchawagua daüguaü. Ánhawa  áfaagua lun wagidaruni anabahani, iyeeni luma ayanuhani luagu magíaguni wawariua, úaalime filu lun lágüdahani binadu igaburi.

15. Ka lunbei wadügüni lun wádaraguni binadu wagaburi luagu wagabu?

¹⁵ Aranse humá lun hadügüni le mégeiwabei lau lóufudagun. Yúsuti apostolu Pábulu aban hénpulu lun larufudaha woun súdini lan lun wadügüni asansiruni le mégeiwabei lidan wabagari. Ariñagati lunti lan wádaraguni binadu wagaburi luagu wagabu (Rom. 6:6). Aranseñu liña meha Hesusu lun ladarawagún luagu wagabu, ladüga busén lan lun lagundaaragüdüni Heowá. Ítarameme anhein busén wabéi lun wagundaaragüdüni Bungiu, mosu aranseñu wamá lun wagidaruni igaburi luma échuni le mínsiñebei lun wawariua. Ánheingubeirügü wadüga katei le, harumabei wasaminan ani hemenigibadiwa lun wawinwandun lun súnwandan (Huan 17:3; 1 Fe. 3:21). Haritagua huméi masansirun lubéi lan Heowá lilurudun lúnrügü lagundaragüdüniwa. Wagía lunbei wasansiruni wagaburi lun gaganbadi wamá lun lilurudun (Isa. 1:16-18; 55:9).

16. Ka uagu lunti lubéi aranseñu humá lun hageindagun luma hidebilin?

¹⁶ Sigí humá ageindagua luma hidebilin. Íbini lárigiñe habadiseirun mosu hasigirun ageindagua luma luriban hayumaha. Samina wamá luagu le asuseredubei lun Maurício, le meha magüsibei lúmagiñe nibureingili. Lau lásügürün dan, aba lasubudiruniña gefentiña luagu Heowá, aba lagumeserun aturiahoun Bíbülia. Adügati asansiruni lidan libagari ani aba labadiseirun lidan irumu 2002. Lau sun barühali lan saragu irumu eseriwida lun Heowá, ariñagati: “Anihein dan ñǘbuingili luriban ayumahani nun ani áfaaguatina lun nagidaruni nuáriua”. Gama lumoun mígiraguagüdünti lungua lun lábürühan larüna, ariñagati: “Gúndaatina nasubudiruni anhein lan mábürühan narüna, gunda lan Heowá nau”. *

17. Ka hafurendeirubei lídangiñe le asuseredubei tun Nabiha?

¹⁷ Amuriaha humá ídemuei luma Heowá ani afiñe humá luagu sífiri sandu mama luagu hubafu guánarügü (Gal. 5:22; Fil. 4:6). Lun wagidaruni binadu igaburi luma lun magiribudun lan, mosu wáfaagun saragu. Ariha waméi le asuseredubei tun aban würi to gíriboun Nabiha. Aba meha lachagarunu túguchi dan le sisi lubéi irumu  tau. Ariñagatu: “Wéiriti meha igarigu le nasandirubei”. Eibu taweiridun aba gañi gañi tan ani fasi tuguya. Aba tádaragun tungua aluguraha düroga, aba tarügüdǘn ani aba tásügürün saragu irumu furisunrugu. Gumesetu aturiahoun Bíbülia hama gefentiña luagu Heowá ha meha ñǘdünbaña apurichiha furisunrugu. Ábati tagumeserun adüga óunwenbu asansiruni. Ariñagatu giñe: “Ménrengunti meha nun nígirun fiu bisiu. […] Gama lumoun, hénrenguti meha nun nígiruni agumulahani”. Sügütu lóugiñe aban irumu áfaagua lun tígiruni bisiu le, ani adüga tumuti. Ariñagayatu: “Ibiha numuti seremei lun nayumuragun lun Heowá súnwandan”. Guentó ariñagatu houn amu: “Chóurutina anhein gayara lubéi nadügüni asansiruni le lun nagundaaragüdüni Heowá gayaraati hadügüni furumiñeguarügü”. *

18. Según 1 Korintuna 6:9-11, ka ibiha hamaalibei saragu hádangiñe lubúeingu Bungiu?

¹⁸ Lidan furumiñeti sígulu, añahein meha hádangiñe wügüriña hama würiña ha lanúadirubaña Heowá lun harúeihan úara luma Kristu adügatiña meha wuribani lubaragiñe kristiánugu hamá. Kei hénpulu, añahein meha hádangiñe, gagabarahatiña meha, magüsi ani híweru hagía. Íbini ítara, lau lídehan sífiri sandu sansi hamuti hagaburi (aliiha huméi 1 Korintuna 6:9-11). Uguñe weyu, íderaguataña giñe Bíbülia saragu míñunu gürigia asansirei hagaburi. * Ígira hamaali lagübüri burí échuni le meha hawagubei. Arufuda lumuti hénpulu burí le hun gayara lan giñe hasansiruni higaburi luma hígiruni luriban échuni lun hadügüni le mégeiwabei lun habadiseirun.

19. Kaba wariha lidan leweñegua aturiahani?

¹⁹ Ha busenbaña habadiseirun, úati buídurügü lan háfaagun lun hagidaruni lubuidun igaburi hawariua, mosu giñe háfaagun lun hadaüragun lau iseri igaburi. Layanuhaba leweñegua aturiahani luagu ida luba lan wadügüni luma ida luba lan híderaguniwa amu.