EKICWEKA C’OKWEGA 10
Nobasa kujura “omuntu owa kare”
“Mukajura omuntu owa kare n’emitwarize yeye.”—KOL 3:9.
ECESHONGORO CA 29 Okurinda Eiziina Ryaitu
EMPINYE *
1. Ni bata oku wabire obireho otakatandikire kwega Bibuli?
NI BATA oku wabire obireho otakatandikire kwega Bibuli n’Abahamya ba Yehova? Abingi omuri itwe bakitekatekaho, nikibisa enshoni. Egi nsi ekaba yahindwire oku turi kureba ebintu n’emitwarize yitu ahabw’okuba eyine emisinge yayo y’ekirungi n’ekibi. Obwe rero, tukaba ‘tutine amasiko, kandi turi omu nsi tutine Ruhanga.’ (Efe 2:12) Mazima, okwega Bibuli kukatuhindura!
2. Ni enki eki wamanyire oku wagenzire ori kwega Bibuli?
2 Oku wagenzire ori kwega Bibuli, okamanya ku oyine Sho w’omu iguru ori kukukunda munonga. Kandi okamanya ku waba ori kwenda kushemeza Yehova, okaba omwe omu bari kumuramya, oshemerire kukora empinduka z’amani omu kubaho kwawe, omu ku ori kureba ebintu, n’omu bi ori kutekateka. Okamanya ku oshemerire kubaho ori kukuratiza emisinge ya Yehova.—Efe 5:3-5.
3. Tukuratize ebiri omu Bakolosayi 3:9, 10, Yehova natushaba kukora ki, kandi shi ni enki eki twaza kwega omuri eki kicweka?
3 Omuhangi witu Tata w’omu iguru Yehova, ayine obugabe bw’okuteraho ab’omu ka yeye ebiragiro by’oku bashemerire kutwaza. Kandi natushaba ngu mbere y’okubatizibwa, tubanze tutemu amani “tujure omuntu owa kare n’emitwarize yeye.” * (Shoma omu Bakolosayi 3:9, 10.) Eki kicweka caza kukwasa abari kwenda kubatizibwa kugarukamu ebi bibuzo bishatu: (1) “Omuntu owa kare” naba ari ata? (2) Ahabw’enki Yehova ari kutushaba kumujura? (3) Tukakikora tuta? Nambwenu, itwe ababatizibwe eki kicweka caza kutukwasa kumanya oku turi kubasa kugumizamu kwerinda kugira ngu eyo mitwarize y’omuntu owa kare etagaruka.
“OMUNTU OWA KARE” NABA ARI ATA?
4. Ni eha mitwarize eyi omuntu ari kuba ayine yaba ari kutegekwa n’“omuntu owa kare”?
4 Obushangirwe omuntu ori kutegekwa n’“omuntu owa kare” naba ari kutekateka kandi akora ebikorwa by’omubiri. Naba ari kwekunda, ari entasima kandi ari kwetungura. Nabasa kuba ari kukunda kureba za puronogurafi, kandi areba za filimu ezirimu ebikorwa by’obushambani ninga obwitani. Hatariho okubanganisa nabasa kuba ayine emicwe mirungi emwe, kandi obumwe nabasa kwecwera orubanja ahabw’ebintu bibi ebi ari kugamba ninga ebi ari kukora. Konka, nabura amani g’okuhindura ebitekateko n’ebikorwa byeye.—Gal 5:19-21; 2 Tim 3:2-5.
Twajura “omuntu owa kare,” tituri kugaruka kutegekwa n’emitekatecere n’ebikorwa bya kare (Reba paragurafu ya 5) *
5. Ni eha mitekatecere eyi tushemerire kugira aha bikwatirine n’okujura omuntu owa kare? (Ebyakozirwe 3:19)
5 Tituhikirire; obwe rero, tihine omuntu ori kubasa kweyihamu ebitekateko n’ebyetengo byeye byona bya kare ebiri omu mutima gweye. Obumwe, nitubasa kukora ninga tugamba ekintu, bwanyima twefuza. (Yer 17:9; Yak 3:2) Konka twajura omuntu owa kare, emitwarize n’ebikorwa by’omubiri nibiba bitacatutegeka. Byona nibiba byaturugireho.—Isa 55:7; shoma omu Byakozirwe 3:19.
6. Ahabw’enki Yehova ari kutushaba kweyihaho emitekatecere n’ebikorwa by’omuntu owa kare?
6 Yehova natushaba ngu tweyiheho eyo mitekatecere n’ebikorwa bibi ahabw’okuba natukunda munonga kandi nayenda ngu tubeho tushemerirwe. (Isa 48:17, 18) Namanya ku abari kwikiriza kutegekwa n’ebyetengo bibi bari kweshasha kandi bakashasha n’abandi. Yehova nagubwa kubi yareba turi kweshasha kandi tukashasha n’abandi.
7. Tukuratize ebiri omu Baroma 12:1, 2, ni eha nsharamu eyi tushemerire kukora?
7 Abamwe omuri banywani bitu n’ab’omu maka gitu nibabasa kutushecerera bareba turi kuhinduka. (1 Pet 4:3, 4) Nibabasa kugamba ku twine obugabe bw’okukora eki turi kwenda cona kandi ku hatine omuntu oshemerire kutugambira ec’okukora. Konka abari kwanga kugendera aha misinge ya Yehova, na bo ni abagaragwa. Mazima, nibaba bayikirize ngu ensi ya Sitane ebategeke. (Shoma omu Baroma 12:1, 2.) Buri omwe ashemerire kweshariramu kuguma ajwire omuntu owa kare ori kweshushanisa n’egi nsi ya Sitane, ninga shi ayikiriza Yehova kumuhindura kugira ngu abe omuntu murungi omuri obu bwire.—Isa 64:8.
NI BATA OKU TURI KUBASA “KUJURA” OMUNTU OWA KARE?
8. Ni enki ekirije kukukwasa kwerinda ebitekateko n’ebikorwa bibi?
8 Yehova namanya ku kirije kututwara obwire, kugira ngu tubase kwerinda ebitekateko n’ebikorwa bibi. (Zab 103:13, 14) Konka, Yehova natukwasa akoresize Ekigambo ceye, omwika gweye n’ekitongore ceye, kandi atuha amani agari kutukwasa kuhinduka. Hatariho okubanganisa, Yehova natukwasa. Reka tushwijume ebintu ebi ori kubasa kukora kugira ngu ogire entunguka, ojure omuntu owa kare kandi oyijuze ebiri kushabwa abari kwenda kubatizibwa.
9. Ekigambo ca Ruhanga nikibasa kukukwasa kukora ki?
9 Guma okorese Bibuli omu kweshwijuma. Ekigambo ca Ruhanga ni nk’endeberwamo. Nikibasa kukukwasa kweshwijuma omu bi ori kutekateka, ebi ori kugamba n’ebi ori kukora. (Yak 1:22-25) Ori kukwegesa Bibuli na benetata na banyanyazi abakuzire omu by’omwika nibabasa kukuha obuhabuzi. Ecokureberaho: Nibabasa kukoresa Ebyahandikirwe, bakukwasa kumanya ebi ori kubasa kukora, n’ahu oyine obweremwa. Nibabasa kukukwasa kumanya oku ori kubasa kurondera obuhabuzi omu bitabo byitu, bukakukwasa kureka ebikorwa bibi. Burijo, Yehova naba ayetegwire kukukwasa. Namanya oku ari kubasa kukukwasa ahakuba namanya ebiri omu mutima gwawe. (Emi 14:10; 15:11) Gira akamanyiro k’okumushaba burizoba kandi oyeyegese Ekigambo ceye burijo.
10. Ni enki eki wayegera aha cokureberaho ca Elie?
10 Yikiriza ku emisinge ya Yehova ari yo mirungi. Nitugasirwa twakora ekintu cona eki Yehova ari kutushaba ngu tukore. Abari kugendera aha misinge yeye nibamarwa, bagira amagara agine ekigendererwa, kandi batunga okushemererwa. (Zab 19:7-11) Ekiri kutana n’eco, abari kwanga kugendera aha misinge ya Yehova nibatunga okubonabona okuri kuruga omu kukora ebikorwa by’omubiri. Reba eki omushija ori kwetwa Elie yagambire aha bikwatirine n’okwanga kugendera aha misinge ya Yehova. Akarerwa n’abazire ababire bari kukunda Yehova. Konka ku yabire omunyeto akatandika kwekwatanisa n’abanywani ababi. Akatandika kukoresa ebitaburabwonko, kandi yaza omu bikorwa by’obushambani n’obushuma. Elie akagamba ku byatumire yakizaho kuba omuhwashoni n’omurwani. Akagamba ati: “Nkatandika kukora ebintu ebi Abakristo batashemerire kukora.” Konka tarayebirwe ebi yayegire acari muto. Mporampora, akashuba kwega Bibuli. Akareka ebikorwa bibi, rero yabatizibwa omu mwaka gwa 2000. Ni bata oku kugendera aha misinge ya Yehova camugasire? Elie akagamba ati: “Hati nyine obusinge n’omuntuwomunda otari kuncwera orubanja.” * Nk’oku eco cokureberaho kiri kubyereka, abari kwanga kugendera aha misinge ya Yehova nibeshasha. Konka n’obu kiri kisyo, Yehova natura ayetegwire kubakwasa kugira ngu bahinduke.
11. Ni biha bintu ebi Yehova ari kwanga?
11 Guma oyange ebi Yehova ari kwanga. (Zab 97:10) Bibuli negamba ku Yehova ari kwanga “amisho g’amaryo, orurimi oruri kubiha, n’emikono eshesha eshagama y’abatine rubanja.” (Emi 6:16, 17) Nambwenu “nayangira kimwe omwisi w’abantu, n’abari kugamba ebishuba.” (Zab 5:6) Yehova nayanga munonga eyo mitwarize n’ebikorwa bibi. Ni yo nshonga yacwecerize abantu b’omu bwire bwa Nowa ababire nibakora ebikorwa bibi. (Kut 6:13) Reba ekindi cokureberaho: Yehova akoresize omuhanuzi Malaki, akagamba ku ari kwanga abantu abari kuronda orwekwaso rw’okutana n’abu batasine. Ruhanga tari kwikiriza okuramya kwabo kandi nayija kubacwera orubanja.—Mal 2:13-16; Heb 13:4.
Okukora ekintu eki Yehova ari kwanga ni nk’okurya ebyokurya bigagire (Reba paragurafu ya 11-12)
12. “Okwangira kimwe ekibi” nikimanyisa ki?
12 Yehova nayenda ngu “twangire kimwe ekibi.” (Rom 12:9) “Okwangira kimwe” ekintu nibishaba amani g’omu nyehurira; nikimanyisa okukizira. Tekateka aha ku ori kubasa kwehurira omuntu yakushaba kurya ebyokurya bigagire. Nikibasa kutuma wayenda kutanaka. Omu buryo nk’obwe, twatekateka aha kukora ekintu eki Yehova ari kwanga, tushemerire kucangira kimwe.
13. Ahabw’enki tushemerire kurinda ebitekateko byitu?
13 Rinda ebitekateko byawe. Ebi turi kukora nibiruga omu bi turi kutekateka. Ni yo nshonga ahabw’enki Yesu yatushabire kwerinda ebitekateko bibi ebiri kubasa kutuma twakora ebibi by’amani. (Mat 5:21, 22, 28, 29) Mazima, nitwenda kushemeza Tata w’omu iguru. Obwe rero, ni ec’obwenge kuhika turi kweyihamu ekitekateko cona kibi ecayija omu bwenge bwitu.
14. Ni enki eki ebi turi kugamba biri kwereka, kandi shi ni biha bibuzo ebi tushemerire kwebuza?
14 Yerinde omu bi ori kugamba. Yesu akagamba ati: “Ebiruga omu kanwa biba nibiruga omu mutima.” (Mat 15:18) Mazima, ebi turi kugamba nibyereka ebiri omu mutima gwitu. Obwe rero, nobasa kwebuza ngu: ‘Mbehi ninyerinda kubiha n’obu okugambisa amazima byakuba birandetere ebizibu? Mbehi yaba nyine owu twatasine, ninyerinda kugira obunywani oburengeserize n’ondijo muntu owu tutaratasine? Mbehi ninyerinda kugamba enkuru z’eby’obushambani? Mbehi hagira owangambira kubi, nimugarukamu nturize?’ Nikija kukukwasa waguma kweshwijuma okoresize ebyo bibuzo. Ebigambo byawe nibibasa kugeranisibwa n’amapesha agari aha kijwaro. Ku gari kuba gigwire nobasa kukihamu omu buryo bworobi. Ni co kimwe, wakora cona eki ori kubasa okeyihamu okugamba kubi n’okubiha kandi okerinda kugamba aha nkuru z’eby’obushambani, nikija kukorobera kujura omuntu owa kare.
15. Kuhanika omuntu owa kare “aha kiti” nikimanyisa ki?
15 Guma oyetegwire kukora cona eki ori kubasa. Entumwa Pawulo akakoresa ecokureberaho kirungi ekiri kutwereka oku kiri ec’omugasho kuhinduka omu kubaho kwitu. Akahandika ku tushemerire kuhanika “omuntu witu owa kare” aha kiti. (Rom 6:6) Akaba ari kwenda kugamba ku tushemerire kutoreza ecokureberaho ca Kristo. Tushemerire kweyihaho emitwarize n’ebikorwa bibi ebi Yehova ari kwanga. Ku turakore ebyo ni bwo turije kugira omuntuwomunda otari kutucwera orubanja, kandi tukagira n’amasiko g’amagara agatahwaho. (Yoh 17:3; 1 Pet 3:21) Guma oyijuke ku Yehova atarije kuhindura emisinge yeye kugira ngu ebugane n’ebi turi kwenda. Ahobwe, n’itwe abashemerire kuhinduka tukebuganisa n’eyo misinge.—Isa 1:16-18; 55:9.
16. Ahabw’enki tushemerire kumaririra kugumizamu kurwanisa obweremwa bw’omubiri?
16 Gumizamu kurwanisa obweremwa bw’omubiri. Na bwanyima y’okubatizibwa, n’oba oshemerire kurwanisa obweremwa bw’omubiri. Reba ebyahikire aha mushija ori kwetwa Maurício. Obu yabire acari omunyeto, akatandika kukora ebikorwa by’obutingwa. Bwanyima, akabugana n’Abahamya ba Yehova kandi yatandika kwega Bibuli. Ku yamazire kuhinduka omu kubaho kweye, akabatizibwa omu mwaka gwa 2002. N’obu Maurício amazire emyaka myingi ari kuhereza Yehova, akagamba ati: “Na hati, hine obu ndi kuba nshemerire kurwanisa ebyetengo bibi.” Konka eco tikiri kumumaramu amani. Akagamba ati: “Nikimpumuriza, ku ndi kumanya ngu narwanisa ebyetengo bibi, nimba nashemeza Yehova.” *
17. Ni enki eki wayegera aha byahikire ahari Nabiha?
17 Shaba Yehova obuyambi kandi oyesige omwika gweye omu mwanya g’okweyesiga. (Gal 5:22; Fil 4:6) Tushemerire kutaho amani mingi twaba turi kwenda kujura omuntu owa kare kandi tukerinda kugaruka kumujwara. Reba ebyahikire aha mukazi ori kwetwa Nabiha. Ishe akabasiga obu yabire ayine emyaka mukaga. Akagamba ati: “Kikatuma nagira obusaasi bwingi munonga.” Oku Nabiha yagenzire nakura, akakizaho kuba omugomi. Bwanyima akatandika kushubura ebitaburabwonko, kandi yatebwa omu kihome. Omuhamya omwe akamutayayira ahu yabire asibirwe kandi yatandika kumwegesa Bibuli. Nabiha akatandika kukora empinduka z’amani. Akagamba ati: “Okureka ebikorwa bibi kikanyorobera, konka okucweka aha kuresa etabi co kikangumira munonga.” Nabiha akamara emyaka myingi yaremirwe kucweka aha kuresa, konka mporampora akija kubibasa. Ni enki ecamukwasize? Akagamba ati: “Ekintu c’omugasho ecatumire nabireka, ni okushaba Yehova burijo.” Hati nakunda kugambira abandi ati: “Ninyesiga ku yaba nabasize kukora empinduka kugira ngu nshemeze Yehova, buri omwe ari kubasa kuzikora!” *
NOBASA KWIJUZA EBIRI KUSHABWA ABARI KWENDA KUBATIZIBWA!
18. Tukuratize ebiri omu 1 Bakorinto 6:9-11, ni enki eki abingi omu bahereza ba Ruhanga bakozire?
18 Abamwe omu bashija n’abakazi b’omu kinyigana c’okubanza, abu Yehova yatorine ngu bije kutegeka na Kristo bakaba nibakora ebikorwa bibi munonga. Ecokureberaho: Bakaba bari abashambani, ebitingwa, n’abashuma. Konka ahabw’obuyambi bw’omwika oguri kwera bakabasa kuhindura emitwarize yabo. (Shoma omu 1 Bakorinto 6:9-11.) Ni co kimwe, Bibuli ekakwasa abantu abari kurenga za miliyoni b’omuri obu bwire kuhindura omu kubaho kwabo. * Bakareka ebikorwa bibi ebi babire nibakora. Ecokureberaho cabo, nicereka ku n’iwe ori kubasa kujwara omuntu omusya kandi okuhindura emitwarize yawe okijuza ebiri kushabwa abari kwenda kubatizibwa.
19. Ni enki eki turishwijuma omu kicweka ekiri kukurataho?
19 Oyihireho okujura omuntu owa kare, abari kwenda kubatizibwa bashemerire kutaho amani kugira ngu bajware omuntu omusya. Ekicweka ekiri kukurataho, nicereka oku turi kubasa kukikora n’oku abandi bari kubasa kutukwasa.
ECESHONGORO CA 41 Ninkweshengyereza Hurira Okushaba Kwangye
^ par. 5 Kugira ngu twijuze ebiri kushabwa abari kwenda kubatizibwa, tushemerire kuba twetegwire kuhindura emitwarize yitu. Eki kicweka caza kutukwasa kushoborocerwa ebiri kwereka omuntu owa kare, enshonga ahabw’enki tushemerire kumujura, n’oku turi kubasa kumujura. Ekicweka ekiri kukurataho, nikija kutukwasa kumanya oku turi kubasa kugumizamu kujwara omuntu omusya, na bwanyima y’okubatizibwa.
^ par. 3 EBIGAMBO EBISHOBORWIRWE: “Okujura omuntu owa kare” nikimanyisa okweyihaho emitwarize n’ebyetengo ebitari kushemeza Yehova. Eco tushemerire kukikora tutakabatizibwe.—Efe 4:22.
^ par. 10 Kugira ngu omanye byingi, reba ekicweka ekiri kugira ngu: “Bibuli nehindura amagara g’abantu—‘Nkaba ninyenda kugarukira Yehova,’” omu Munara g’Omurinzi, 1 Okwakana, 2012.
^ par. 16 Kugira ngu omanye byingi, reba ekicweka ekiri kugira ngu: “Bibuli nehindura amagara g’abantu—‘Bakantwariza ge,’” omu Munara g’Omurinzi, 1 Okwakatano, 2012.
^ par. 17 Kugira ngu omanye byingi, reba ekicweka ekiri kugira ngu: “Bibuli nehindura amagara g’abantu—‘Nkaba ndi omuhara w’omugomi,’” ekiri omu Munara g’Omurinzi, 1 Okwikumi, 2012.
^ par. 18 Reba akashanduku akari kugira ngu: “ Bibuli nehindura amagara g’abantu.”
^ par. 64 EKISHUSHANI: Okureka emitwarize n’ebikorwa bibi nikigeranisibwa n’okujura ekijwaro kikuzire.
