ARTIKULO KʼAWUAITA 10
Bʉa idubʉseabʉ «nãã kayirua jʉ̃badara»
«Idubʉidua nãã kayirua jʉ̃badara» (COL. 3:9).
TRÃBI 29 Sobiapanʉ bʉ trʉ̃ta jaradiapanʉ baera
KʼÃRẼTA ŨDUDAITA *
1. ¿Sãwũãbasi bʉ bebʉra Daizeze ʉ̃rʉ kʼawua jʉ̃drʉi nãã?
¿SÃWŨÃBASI bʉra Jeowa ʉ̃rʉ Kʼawuabipanʉrãbawara Daizeze ʉ̃rʉ kʼawua jʉ̃drʉi nããra? Dayirãba nãã sãwũã obadata krĩchabʉrʉdera kʼawuabʉ bia ba ẽ basita. Daya krĩchabadara akʉza daya obadara naʉ̃ drʉadeba obʉ kĩrãkʼa basi baera ãyita bigara dayitabida bigabasi, adewara ãyita mitiara dayitabida mitiabasi. Mawũã basi baera nebiata jʉ̃ãna ẽ basi akʉza «Daizezeʉ̃me ãba pana ẽ basi» (Efes. 2:12). Mamina daya Daizeze ʉ̃rʉ kʼawua jʉ̃drʉda tẽãra awuara besi.
2. ¿Kʼãrẽta kʼawuasi bʉa Daizeze Bedʼea ʉ̃rʉ kʼawua jʉ̃drʉda tẽãra?
2 Bʉa Daizeze ʉ̃rʉ kʼawua jʉ̃drʉda tẽã, ũdusi bʉa erbʉta Daizeze bʉ wãrĩnu kãgabʉta. Adewara bʉa kʼawuasi Jeowata sobiabikĩrãbasibʉrʉ akʉza iyi pʉwʉrʉde bakĩrãbasibʉrʉ, bʉa krĩchabʉta akʉza bʉa obʉta awuara oibarabasi. Adewara kʼawuaibarabasi saʉ̃ta Jeowaita yibiata akʉza saʉ̃ta iyita zeri ẽãta (Efes. 5:3-5).
3. (1) Colosenses 3:9, 10ba jarabʉdebara, ¿kʼarẽta kãgabʉ Jeowaba dayirãba odamarẽã? (2) ¿Kʼãrẽta kʼawuadai naʉ̃ artikulodera?
3 Jeowaba dayirãta pãrãsi baera, kʼawuabʉ saʉ̃ta yibiata dayirãita akʉza saʉ̃ta biga ẽãta. Maʉ̃ kʼarea Jeowaba dayirã buru kʼoei nãã jarabʉ, zarea omarẽã dayirãba nãã nemitia obadata idʉbʉita * (akʉra Colosenses 3:9, 10). Naʉ̃ artikuloba kʼarebayi yi ẽbẽrarã buru kʼoekĩrãpanʉraba bedʼea ũbea panʉnamarẽã: (1) ¿Kʼãrẽta jarakĩrãbʉ nãã kayirua jʉ̃badabara? (2) ¿Kʼãrẽa Jeowabara widibʉ naʉ̃ kayirua idubʉmarẽã? (3) ¿Kʼãrẽba kʼarebaseabʉ maʉ̃ nemitia obʉ idubʉita? Akʉza yi buru kʼoebʉrata kʼarebayi, ãya nãã obadata jẽda oẽ bʼaita.
¿KʼÃRẼTA JARAKĨRÃBɄ NÃÃ KAYIRUA JɄ̃BADABARA?
4. ¿Kʼãrẽta obʉ ẽbẽra «nãã kayirua jʉ̃bʉbara»?
4 Ẽbẽra «yi kayirua jʉ̃bʉra» krĩcha mitiata erbʉ, ʉ̃ta krĩchabʉ, mesera kĩrʉbʉ, ẽbẽrarã ãkadabeta akʉbʉ adewara pelikula kayiruata akʉbʉ. Naʉ̃ra ẽbẽrabara dayirã jõma kĩrãkʼa, ãyi sode nebiata erbʉ, maʉ̃ba edaʉde bia senti ẽ ãya obʉ kʼarea mawũã ẽ bʉrʉ ãya jarada kʼarea, mamina ãya nebia okĩrãbʉmina neẽ kʼarebata akʉza kʼãrẽa nebia oita (Gál. 5:19-21; 2 Tim. 3:2-5).
Dayirãba nãã kayirua jʉ̃badata idubʉbʉrʉdera. (Akʉra parrapo 5). *
5. ¿Dayirãba kayirua jʉ̃bʉra jipa amaeseabʉka? Jara ũrĩbira (Hechos 3:19).
5 Dayirã jõmaʉ̃ta nemitia omia, Adán akʉza Evadeba zesi baera maʉ̃ba jipara amae ẽ dayirãba nemitia obʉra, maʉ̃ kʼarea edaʉde krĩcha obʉ aña bedʼeasi baera mawũã ẽ bʉrʉ aña krĩchasi baera (Jer. 17:9; Sant. 3:2). Mamina dayirãba nãã kayirua jʉ̃badata idubʉbʉrʉdera, maʉ̃bara ewari jõmaʉ̃nẽ wua kayiruata obinʉma ẽ bayi, mawũãsidu dayirã bebʉra awuara panañi (Is. 55:7; akʉra Hechos 3:19).
6. ¿Kʼãrẽa Jeowabara zokʼabʉ nãã kayirua obadata akʉza krĩchabadata idubʉmarẽã?
6 Jeowaba zokʼabʉ dayirãba, nemitia obʉta akʉza nemitia krĩchabʉta idubʉmarẽã, iya kãgabʉ baera dayirã sobia bamarẽã (Is. 48:17, 18). Jeowabara kʼawuabʉ dayirãba nemitia obʉta idubʉ ẽ bʉrʉ akʉza krĩcha mitiata idubʉ ẽ bʉrʉ, dayita zʉbʉriaita akʉza dayi kʼawapanʉsida. Jeowaitara pʉ dayirã mawũã akʉira.
7. Romanos 12:1, 2de jarabʉdebara, ¿kʼãrẽta jidaibara?
7 Ʉ̃kʉrʉ dayi mebẽrãdebemara akʉza dayi neũdukʼawuaradebemara dayi kʼarea ipidaseapanʉ daya awuara okĩrãbʉ kʼarea (1 Ped. 4:3, 4). Ãya jaraseapanʉ dayirãbara oseabʉta daya okĩrãta akʉza mia abaʉba jarabe ẽãta kʼãrẽta oibarata. Mamina dayirãba ũrĩ ẽ bʉrʉ Jeowaba zokʼabʉta, ãyara oẽ marẽã jarabe ẽ, wãrĩnuaradera dayirãba okĩrãta opanʉ ẽ, awuarabʉrʉ naʉ̃ drʉade zokʼabʉta opanʉ (akʉra Romanos 12:1, 2). Dayirãba kʼawua jidaibara: Iduaribita Jeowaba audre ẽbẽra bia babimarẽã mawũã ẽ bʉrʉ yi kayiruata obʼaita Diaruba omarẽã kãgabʉ kĩrãkʼa (Is. 64:8).
¿SÃWŨÃ IDUBɄSEABɄ NÃÃ KAYIRUA JɄ̃BADARA?
8. ¿Kʼãrẽba kʼarebai kayirua nãã obadata idubʉita?
8 Jeowaba kʼawuabʉ dayirãba krĩcha mitia erbʉta akʉza nekʼãrẽ kayirua obʉ idubʉira zarea oibarata akʉza ewari nesidata, naʉ̃ idubʉira mesera idubʉ ẽ baera (Sal. 103:13, 14). Maʉ̃ kʼarea Jeowaba iyi Bedʼeadeba, iyi jaure zareadeba akʉza iyi organizasioneba zarea diabʉ akʉza buru bia diabʉ mitia idubʉita. Atia akʉdayi kʼãrẽta oseapanʉta nekayirua nãã obada idubʉita, mawũã buru kʼoeita.
9. ¿Kʼãrẽne kʼarebaseabʉ Daizeze Bedʼeabara?
9 Daizeze Bedʼeata zokʼara bʉyikʉza biʼia akʉita. Daizeze Bedʼeara espejo kĩrãkʼabʉ, kʼarebaseabʉ baera bʉa akʉita bʉ sãwũã bedʼeabʉta, sãwũã krĩchabʉta akʉza kʼãrẽta obʉta (Sant. 1:22-25). Nejaradiabariba akʉza mebẽrã kongregasionebemane Daizeze Bedʼea ʉ̃rʉ biʼia kʼawuabʉba, kʼarebaseabʉ bʉa Daizeze Bedʼeadeba kʼawuaita kʼãrẽ nebiata erbʉta akʉza kʼãrẽ kayiruata erbʉta. Adewara Jeowaba bia kʼarebakĩrãbʉ, iya kʼawuabʉ sãwũã kʼarebaseabʉta kʼawuabʉ baera dayirã sode kʼãrẽta bʉta. Maʉ̃ kʼarea nrʉemaza yiwidʼibara akʉza iyi Bedʼeata akʉibara (Prov. 14:10; 15:11).
10. ¿Kʼãrẽta kʼawuapanʉ Elie berabaridebara?
10 Wãrĩnu ĩjãra Jeowaba dayirã omarẽã zokʼabʉra audre yibiata. Ẽbẽra Jeowaba zokʼabʉ obʉra sobiabʉ akʉza iyikʉza wawia ũdubibʉ. Maʉ̃ba Jeowaba zokʼabʉra yibia dayirãita (Sal. 19:7-11). Mamina yi ẽbẽra Jeowaba zokʼabʉ oẽãra zʉbʉriabʉ nemitiata obʉ baera. Akʉdaya kʼãrẽta jarasita Elieba Daizeze Bedʼea ũrĩ ẽ ʉ̃rʉ. Yibarirãra Jeowa ʉ̃rʉ Kʼawuabipanʉrãbasi, maʉ̃ba wiñayiruiduba Daizeze ʉ̃rʉ kʼawuabasi iyara. Maʉ̃ta iyi kʉrabachʉdade, nemitiata ojʉ̃drʉsi, nezrʉga jʉ̃drʉsi, chirua kayirua bʉratʉmata do jʉ̃drʉsi akʉza wẽrãrasida erkʼãĩbasi akʉza mejãcha kĩrʉmiabasi adewara badumae yõ jʉ̃drʉsi. Iya jarabʉ: «Mʉ̃ yibariraba mʉ̃a oẽ marẽã jaradiadara, mʉ̃a jõma osi» Mamina Eliebara kĩrãdua ẽ basi yibariraba jaradiadara. Jẽda Daizeze ʉ̃rʉ kʼawuasi, zarea osi iya nemitia obada idubʉita akʉza buru kʼoesi poaga 2000de. ¿Kʼãrẽne kʼarebasi Daizezeba zokʼabʉ obʉbara? Aduʼa bʼaita akʉza Daizeze kʼawa bʼaita. * Naʉ̃ba jaradiabʉ ẽbẽraba Jeowaba zokʼabʉta oẽ bʉrʉ zʉbʉria ũduita, mamina mawũãsidu Jeowaba ãyira kʼarebakĩrãbʉ awuara bamarẽã.
11. ¿Kʼãrẽta jʉra Jeowabara?
11 Jʉrara Jeowaba jʉrabʉra (Sal. 97:10). Daizeze Bedʼeabara jarabʉ Jeowaba jʉrabʉta «Yi dabʉ kayirua akʉbʉta, kĩrãmeba sewida jarabʉta akʉza ẽbẽra bia beapanʉta» (Prov. 6:16, 17). Adewara iya jʉra ẽbẽra sewanebʉra jarabʉta akʉza yõmiata (Sal. 5:6). Jeowaba jʉra ẽbẽrarã naʉ̃ kayirua obʉrãra, maʉ̃ba Noé ewaridera makenasi ẽbẽrarã naʉ̃ drʉa kayiruaba birabidara (Gén. 6:13). Akʉdadrʉ awuru yizata. Propeta Malaquíasdeba, Jeowaba jarasi iya jʉrata ẽbẽrarã mia erkʼãĩbʉta ãyi kima idubʉita ãĩba ẽãbʉta. Ẽbẽrarã naʉ̃ kʼãwũã opanʉrãra Jeowabara mitia akʉbʉ akʉza iya jarabʉ, iyabʉrʉ kʼawua oita yi mawũã obʉra (Mal. 2:13-16; Heb. 13:4).
Dayirãba Jeowaba jʉrabʉta oita, naʉ̃ra yiko berawama kĩrãkʼa igara akʉdaibara. (Akʉra parrapo 11 akʉza 12).
12. ¿Kʼãrẽta jarakĩrãbʉ nemitia jʉraibara?
12 Jeowabara kãgabʉ dayirãba yi kayiruata jʉradamarẽã (Rom. 12:9). Bedʼea jʉraibara jarakĩrãbʉ jipa igaraita. Krĩchara bʉ sãwũã sentita jaradara yiko berawabʉta komarẽã bʉra maʉ̃ kʼareara mitia sentibaibara, abarika berabaribʉ dayirãba Jeowaba jʉrabʉta oita krĩchabʉrʉde, naʉ̃ra yiko berawama kĩrãkʼa obʉ baera igaraibara.
13. ¿Kʼãrẽa bia akʉibara dayi krĩchara?
13 Biʼia akʉra bʉ krĩchata. Dayirãba krĩcha mitiata erpanʉbʉrʉ nemitiata oseapanʉ. Maʉ̃ kʼarea Jesuba jarasi idubʉibarata krĩcha mitia erbʉra (Mat. 5:21, 22, 28, 29). Dayirãba Jeowata sobiabikĩrãpanʉbʉrʉ mesera ãĩbʉeibara krĩcha mitia erpanʉta.
14. Bʉ bedʼeabʉdebara, ¿kʼãrẽta ũdubibʉ akʉza kʼãrẽta widiseabʉ?
14 Jʉra kʼawuabara bʉa kʼãrẽ jarabʉdeba. Jesuba jarasi: «Yedʼauba ze bʼʉra sodʼeba ze bʼʉa» (Mat. 15:18). Mawũã, dayi bedʼeabʉdeba ũdubibʉ dayi sode kʼãrẽta erbʉta. Mawũẽra bʉyikʉza widira: ¿Wãrĩnuta jaraika mʉ̃ bedʼea zroma ũduimina? Mʉ̃ta juwa jidabʉbʉrʉ, ¿mʉ̃ra jʉrakʼawua bedʼeabʉka awurʉ̃me audua ẽ bʼaita? ¿Dayirã zarea obʉka dayi bedʼeabʉrʉde bedʼea ẽ bʼaita mia erkʼãi ʉ̃rʉ? ¿Awuruba mʉ̃aʼa mitia bedʼeabʉrʉdera mʉ̃ara ibiade panʉika? Naʉ̃ ʉ̃rʉ biʼia krĩchabʉbʉrʉ naʉ̃ba kʼarebaseabʉ. Dayi bedʼeabʉra ilo kĩrãkʼabʉ. Bʉa kasubʉrʉdera ilobara wuara ãba kara erbʉ. Maʉ̃ kĩrãkʼabʉ dayirã imitia bedʼeabʉde, naʉ̃ kayirua jʉ̃badama jarabʉ kĩrãkʼabʉ. Maʉ̃ kʼarea nãã nekayirua jõma obadata, imiita bedʼeabadata akʉza sewida jarabadata, idubʉibara.
15. ¿Kʼãrẽta jarakĩrãbʉ nãã kayirua jʉ̃badara bakʉrʉma kachibara?
15 Nekʼãrẽ jõma oibara nemitia idubʉita. Apostol Pablobara yiza aba zokʼasi jaradiaita kʼãrẽa yibiata awuara bʼaira. Maʉ̃ kʼarea iya jarasi daya nãã kayirua jʉ̃badara bakuruma kachibarata (Rom. 6:6). Jesubara iduaribisi iyira bakuruma kachimarẽã, Jeowaba bia akʉmarẽã kãgabasi baera. Jipa wua oẽ baibara Jeowaba jʉrabʉra, mawũã opanʉbʉrʉ Jesude kĩrãkʼa odayi akʉza aduʼa panañi, adewara ẽjũã biade baseapanañi (Juan 17:3; 1 Ped. 3:21). Kĩrãbedadrʉ, Jeowabara iya zokʼabʉra awuara oẽãta, awuarabʉrʉ dayiratrʉ̃ zarea odaibarata iya zokʼabʉde bʼaita (Is. 1:16-18; 55:9).
16. ¿Kʼãrẽa zarea oibara daya nemitia okĩrãbʉa yi edebi ẽ bʼaita?
16 Zarea ora bʉa nemitia okĩrãbʉa yi edebi ẽ bʼaita. Zarea obara bʉ buru kʼoeda tẽãbida nemitia oẽ bʼaita. Ũrĩnadrʉ Mauricio nebʉrata. Iyara warraraenaʉ̃ba abari yumakẽrãta kãgabasi. Mamina tẽãne Daizeze Bedʼea ʉ̃rʉ kʼawuasi, maʉ̃ kʼarea iya nemitia obadara wĩka wĩkaʉde idubʉ wãsi. Maʉ̃ tẽã buru koesi poaga 2002de. Iyita dããrabamina Jeowa ode bʉta, iya jarabʉ: «Edaʉde mʉ̃a nãã obadata biode okĩrãbʉ, mamina mʉ̃ra, maʉ̃ kʼarea krĩcha zroma oẽ awuarabʉrʉ kʼawuabʉ mʉ̃a maʉ̃ta oẽ baera Jeowata sobiabita». *
17. ¿Bʉra kʼãrẽne kʼarebabʉ Nabiha berabaridebara?
17 Jeowa soiduba yiwidʼira iya kʼarebamarẽã, bʉyikʉza ĩjãikaʉde ĩjãra Daizeze jaure zarea (Gál. 5:22; Filip. 4:6). Dayirãra zarea odaibara nãã kayirua jʉ̃bada idubʉita akʉza maʉ̃ta wua oda ẽ bʼaita. Akʉdaya kʼãrẽta berabarisita ẽbẽra wẽrã yi trʉ̃ Nabiha. Iyi poga seisbaside yi zezeba amaesi. Iya jarabʉ: «Naʉ̃ra mʉ̃itara arigʉ pʉbasi». Iyima warisidera, chirua bʉratʉma kayiruata nedobasi akʉza yõmiabasi, maʉ̃ kʼarea karselde eda bʉesida. Jeowa ʉ̃rʉ Kʼawuabipanʉrãba akʉ jʉ̃ẽpanasi karselta, mama ãyibawara kʼawua jʉ̃drʉsi Daizeze Bedʼea ʉ̃rʉ. Iya jarabʉ: «Mʉ̃a nemitiata obasi, ʉ̃kʉrʉ nemitia idubʉira zare ẽ basi, mamina sigarriyo dobʉ idubʉira mejãchade zareabasi». Nabihaʼra poaga mejãcha bayeda zarea osi sigarriyo dobʉ idubʉita, mawũã obʉde jipa idubʉsi, ¿kʼãrẽba kʼarebasi? Iya jarabʉ: «Ewari jõmaʉ̃nẽ yiwidʼibasita Jeowa kʼarebamarẽã sigarriyo dobʉ idubʉita». Idi ewadera iya jarabʉ wuabemara: «Mʉ̃ta zarea erbasibʉrʉ maʉ̃ nemitia obʉ idubʉita, wuabemarabida idubʉseabʉ». *
BɄRA BURU KʼOESEABɄ
18. 1 Corintios 6:9-11 bayeda jarabʉdera ʉ̃kʉrʉ ẽbẽrarã Jeowaba kãgabʉde baya, ¿kʼãrẽta osida?
18 Ʉ̃kʉrʉ kristianora siglo nããradebemara Jeowaba jidadara Jesuʼʉ̃me zokʼaita, nãã nemitia omiabasi. Bari jaraita ʉ̃kʉrʉra nezrʉgamiabasi, ãĩbamiabasi akʉza abari yumakẽrãta kãgabasi. Mamina Daizeze jaure zareaba kʼarebasi maʉ̃ mitia obʉ idubʉita (akʉra 1 Corintios 6:9-11). Idi ewadera abarika berabaribʉ, Daizeze Bedʼeabara kʼarebabʉ ʉ̃kʉrʉba nãã nemitia obadara maʉ̃ idubʉita. * Ãyi yizaba ũdubibʉ bʉabida awuara oseabʉta, mawũã buru kʼoeseabʉta.
19. ¿Kʼãrẽta akʉdai wuarebema artikulodera?
19 Yi buru kʼoekĩrãbʉra idubʉibara nãã kayirua jʉ̃badara, adewara zarea oibara jʉ̃ita yiwidita. Wuarebema artikulode kʼawuadayi sãwũã oseabʉta maʉ̃ra akʉza wuabemarabara sãwũã kʼarebaseabʉta.
TRÃBI 41 Padre, escucha mi oración
^ par. 5 Dayita buru kʼoeibʉrʉ daya nãã kayirua obadata idubʉibara. Naʉ̃ artikulode kʼawuadayi kʼãrẽta idubʉibarata, kʼãrẽa nesidapanʉta naʉ̃ idubʉita akʉza sãwũã idubʉibara. Wuarebema artikulode kʼawuadayi kʼãrẽa nebia obaseabʉta wua yiwidi jʉ̃bʉ kĩrãkʼa.
^ par. 3 KʼÃRẼTA JARAKĨRÃKɄ: Bedʼea «idubʉidua nãã kayirua jʉ̃badata» jarakĩrãbʉ idubʉita krĩcha mitiata akʉza nekʼãrẽ Jeowaba kãga ẽãta. Naʉ̃ta idubʉibara buru kʼoei nãã (Efes. 4:22).
^ par. 10 Bʉa audre kʼawuakĩrãbʉbʉrʉ akʉra «La Biblia les cambió la vida. ‹Necesitaba volver a Jehová›», La Atalaya del 1 de abril de 2012.
^ par. 16 Audre kʼawuakĩrãbʉbʉrʉ akʉra «La Biblia les cambió la vida ‹Fueron muy amables conmigo›», La Atalaya del 1 de mayo de 2012.
^ par. 17 Bʉa audre kʼawuakĩrãbʉbʉrʉ akʉra «La Biblia les cambio la vida ‹Llegué a ser una joven irritable y agresiva›», La Atalaya del 1 de octubre de 2012.
^ par. 18 Akʉra rekuadro « Daizeze Bedʼeabara awuara babibʉ».
^ par. 64 POTORABA ŨDUBIBɄTA: Daya wua zõrã jʉ̃bʉta wẽãbari kĩrãkʼa nemitia obʉsida mawũã idubʉibara.
