1. ¿Bajcheʼ yilal añonla cheʼ bʌ maxto woliyoñicla ti estudio?

 ¿BAJCHEʼ yilal añet cheʼ bʌ maxto woliyetic (choncoletic) ti estudio a wicʼot jiñi i testigojob Jehová? Cabʌlonla maʼañic mi lac mulan laj cʼajtesan. Tajol mi lac tsajcan ili pañimil (mulawil) ti bajcheʼ yilal lac melbal (chaʼlibal) yicʼot lac ñaʼtʌbal. Mi cheʼ añonla ti ñaxan bajcheʼ iliyi, ti jimbʌ ora maʼañic lac pijtaya i maʼañic la quicʼot Dios (Efes. 2:12). Pero tsaʼ laj qʼuextʌyi iliyi cheʼ bʌ tsaʼ caji laj cʌn chuqui miʼ yʌl jiñi Biblia.

2. ¿Chuqui tac tsaʼ cʌñʌ cheʼ bʌ tsaʼ cajiyet ti estudio?

² Cheʼ bʌ tsaʼ cʌñʌ majlel chuqui miʼ yʌl jiñi Biblia, tsaʼ cʌñʌ chaʼan yaʼ ti panchan an juntiquil a Tat muʼ bʌ i wen cʼuxbiñet. Tsaʼ qʼuele jaʼel chaʼan cabʌl chuqui tac yom maʼ qʼuextan ti a cuxtʌlel yicʼot ti a ñaʼtʌbal mi a wom a tijicñesan Dios yicʼot chaʼan maʼ sujtel tiʼ wiñic. Yom maʼ jacʼ jiñi i mandar tac Dios (Efes. 5:3-5).

3. a) Cheʼ bajcheʼ miʼ yʌl Colosenses 3:9, 10, ¿chuqui yom Jehová chaʼan mi lac mel? b) ¿Bajcheʼ mi caj i coltañonla ili estudio?

³ Jehová jiñʌch muʼ bʌ i mejlel i yʌl bajcheʼ yilal yomob i melbal jiñi ochemoʼ bʌ tiʼ familia come jiñʌch tsaʼ bʌ i meleyonla (pʌtʌyonla) i jiñʌch lac Tat am bʌ ti panchan. I miʼ suben jiñi muʼ bʌ caj i chʼʌmob jaʼ: «Cʌyʌla jiñi ñoxix bʌ laʼ melbal tac yicʼot jiñi ñʌmʌl bʌ laʼ mel» * (pejcan Colosenses 3:9, 10). ¿Woli (yʌquel) baʼ ñaʼtan a chʼʌmjaʼ? Ili estudio mi caj i coltañet a jacʼ uxpʼejl cʼajtiya: ¿Chuqui jiñi ñoxix bʌ lac melbal tac?, ¿chucoch  yom Jehová chaʼan mi laj cʌy?, yicʼot ¿bajcheʼ miʼ mejlel lac mel (chaʼlen)? I mi chʼʌmʌlix lac chaʼan jaʼ, ili estudio mi caj i coltañonla chaʼan maʼañix miʼ chaʼ tilel jiñi ñoxix bʌ lac melbal.

4. ¿Bajcheʼ yilal juntiquil muʼ bʌ i yʌcʼ chaʼan miʼ mʌlben jiñi ñoxix bʌ i melbal?

⁴ Jiñi muʼ bʌ i yʌqʼuen i mʌlben (jotben) jiñi ñoxix bʌ i melbal miʼ mel yicʼot miʼ ñaʼtan cheʼ bajcheʼ yom i bʌcʼtal, ili yom i yʌl, chaʼan miʼ mʌl jiñi mulil. Tajol ti ora miʼ michʼan, mucʼ jach i bajñel ñaʼtan i bʌ, maʼañic miʼ yʌqʼuen wocolix i yʌlʌ yambʌlob yicʼot miʼ qʼuel i bʌ ti ñuc. Tajol miʼ mulan i qʼuel pornografía yicʼot película tac baqui an tsʼiʼlel, jatsʼ o tsʌnsa. Miʼ mejlel la cʌl chaʼan añʌch wen tac bʌ i melbal jaʼel i tajol mach tijicñayic miʼ yubin chaʼan jiñi muʼ bʌ i yʌl o muʼ bʌ i mel, pero anto chuqui yom miʼ coltan chaʼan miʼ qʼuextan jiñi i ñaʼtʌbal yicʼot i melbal (Gál. 5:19-21; 2 Tim. 3:2-5).

5. ¿Muʼ ba i mejlel lac junyaj luʼ cʌy jiñi ñoxix bʌ lac melbal? (Hechos 3:19).

⁵ Maʼañic majqui miʼ mejlel i junyaj luʼ locʼsan tiʼ pusicʼal yicʼot tiʼ ñaʼtʌbal jiñi mach bʌ weñic come luʼ xmulilonla. An i tajol, mi caj lac mel o mi caj la cʌl muʼ bʌ i yʌqʼueñonla lac chaʼ ñaʼtan lac bʌ (Jer. 17:9; Sant. 3:2). Pero cheʼ bʌ mi laj cʌy jiñi ñoxix bʌ lac melbal, maʼañix mi caj i mʌlbeñonla jiñi melbalʌl tac muʼ bʌ i yʌcʼonla ti mulil i mach jiñic muʼ bʌ caj i pʌs bajcheʼ yilalonla (Is. 55:7; pejcan Hechos 3:19).

6. ¿Chucoch miʼ subeñonla Jehová chaʼan yom mi laj cʌy jiñi mach bʌ weñic lac ñaʼtʌbal yicʼot lac melbal?

⁶ Jehová miʼ subeñonla chaʼan mi laj cʌy jiñi mach bʌ weñic lac melbal yicʼot lac ñaʼtʌbal come miʼ wen cʼuxbiñonla yicʼot yom chaʼan wen mi la cajñel (Is. 48:17, 18). Yujil chaʼan, mi tsaʼ la cʌcʼʌ chaʼan miʼ mʌlbeñonla jiñi mach bʌ weñic, mi caj lac ticʼlan lac bʌ yicʼot jiñi yañoʼ bʌ. I Jehová cʼux miʼ yubin cheʼ bʌ miʼ yujtel jiñi.

7. Cheʼ bajcheʼ miʼ yʌl Romanos 12:1, 2, ¿chuqui yom mi lac mel ti lac pejtelel?

⁷ Tajol an lac familiajob yicʼot la camigojob muʼ bʌ i wajleñonla come woli lac chaʼlen wersa chaʼan mi laj qʼuextan lac melbal (1 Ped. 4:3, 4). Tajol miʼ yʌlob chaʼan miʼ mejlel lac mel chuqui jach la com i chaʼan maʼañic majqui yom miʼ subeñonla chuqui yom mi lac mel. Pero jiñi maʼañic bʌ miʼ qʼuelob ti ñuc  i mandar tac Jehová mach librejobic tiʼ sujm. Woliʼ yʌcʼob i bʌ tiʼ cʼʌb ili i pañimil Satanás (pejcan Romanos 12:1, 2). An chuqui yom mi lac yajcan ti lac pejtelel: Mi lac bej ajñel yicʼot jiñi ñoxix bʌ lac melbal am bʌ lac chaʼan tiʼ caj jiñi mulil yicʼot chaʼan añonla tiʼ pañimil Satanás, o mi la cʌcʼ chaʼan Jehová miʼ qʼuextañonla majlel chaʼan mi lac sujtel ti ñumen wem bʌ lac piʼʌl ili ora (Is. 64:8).

8. ¿Chuqui miʼ coltañonla chaʼan mi laj cʌy jiñi mach bʌ weñic lac melbal yicʼot lac ñaʼtʌbal?

⁸ Jehová yujil chaʼan yom mi lac chaʼlen wersa yicʼot chaʼan mach ti orajic miʼ mejlel laj cʌy jiñi mach bʌ weñic lac melbal yicʼot lac ñaʼtʌbal (Sal. 103:13, 14). Pero miʼ cʼʌn jiñi i Tʼan, jiñi i yespíritu yicʼot jiñi i yorganización chaʼan miʼ yʌqʼueñonla lac ñaʼtʌbal, lac pʼʌtʌlel yicʼot chaʼan miʼ coltañonla laj qʼuextan lac bʌ. Tajol qʼuelbilix a chaʼan i coltaya Jehová. Laʼ laj qʼuel chuqui tac miʼ mejlel a mel chaʼan miʼ mejlel a cʌy jiñi ñoxix bʌ a melbal i maʼ mejlel ti chʼʌmjaʼ.

9. ¿Bajcheʼ miʼ mejlel i coltañet jiñi i Tʼan Dios?

⁹ Cʼʌñʌ jiñi Biblia chaʼan maʼ tsajin a bʌ. Jiñi i Tʼan Dios lajalʌch bajcheʼ jumpʼejl espejo, jin chaʼan miʼ mejlel i coltañet chaʼan maʼ qʼuel bajcheʼ yilal a ñaʼtʌbal, a melbal yicʼot chuqui tac maʼ wʌl (Sant. 1:22-25). Miʼ mejlel i coltañet jiñi muʼ bʌ i yʌqʼueñet estudio yicʼot yambʌ hermanojob wen chajpʌbiloʼ bʌ. ¿Bajcheʼ? Miʼ cʼʌñob jiñi Biblia chaʼan miʼ pʌsbeñetob chuqui tac wem bʌ maʼ mel yicʼot chuqui tac yom bʌ maʼ tojʼesan, i miʼ pʌsbeñetob bajcheʼ tac miʼ mejlel a sʌclan ti Biblia o yaʼ ti lac jun tac jiñi tema tac muʼ bʌ i mejlel i coltañet chaʼan maʼ cʌy jiñi mach bʌ weñic. I Jehová tiʼ pejtelel ora chajpʌbil chaʼan miʼ coltañet. Jiñʌch ñumen wem bʌ miʼ mejlel i coltañet, come yujil chuqui an ti a pusicʼal (Pr. 14:10; 15:11). Jin chaʼan, ñʌmtesan a bʌ chaʼan ti jujumpʼejl qʼuin maʼ pejcan ti oración yicʼot maʼ pejcʌben i Tʼan.

10. ¿Chuqui maʼ cʌn tiʼ tojlel Elie?

¹⁰ Ñopo chaʼan jiñi i mandar tac Jehová jiñʌch ñumen wem bʌ. Chaʼañʌch lac wenlel pejtelel muʼ bʌ i subeñonla Jehová. Jiñi muʼ bʌ i jacʼbeñob i mandar tac miʼ tajob i ñʌchʼtʌlel, miʼ tajbeñob i sujmlel i cuxtʌlel yicʼot tijicñayobʌch tiʼ sujm (Sal. 19:7-11). Pero jiñi muʼ bʌ i melob chuqui tac yomob i bʌcʼtal miʼ tajob wocol. Qʼuele chuqui tsiʼ yʌlʌ juntiquil wiñic i cʼabaʼ Elie chaʼan chuqui tac miʼ yujtel cheʼ bʌ maʼañic mi lac jacʼben i tʼan Jehová. Anquese jiñi i tat i ñaʼ miʼ cʼuxbiñob Jehová, Elie tsiʼ taja mach bʌ weñic i yamigojob. Tsaʼ caji i cʼʌn droga, tsaʼ caji ti tsʼiʼlel yicʼot ti xujchʼ. Ñumen jontol (maña) tsaʼ sujti. Miʼ yʌl: «Tsaʼ c mele pejtelel chuqui mach bʌ yomic miʼ mel juntiquil xñoptʼan». Pero maʼañic tsaʼ ñajʌyi i chaʼan pejtelel chuqui tsiʼ pʌsbe i tat i ñaʼ cheʼ bʌ alʌto. Jin chaʼan ti wiʼil tsaʼ chaʼ caji i pejcan jiñi Biblia. Tsiʼ chaʼle wersa chaʼan miʼ cʌy jiñi mach tac bʌ weñic i tsiʼ chʼʌmʌ jaʼ ti 2000. ¿Chuqui ti wenlel an i taja cheʼ miʼ jacʼben i mandar tac Jehová? Miʼ yʌl: «An c ñʌchʼtʌlel yicʼot sʌc bʌ j conciencia». * Jiñi tsaʼ bʌ ujti tiʼ tojlel Elie miʼ pʌsbeñonla chaʼan mucʼ jach i bajñel ticʼlañob i bʌ jiñi maʼañic bʌ miʼ jacʼbeñob i mandar tac Jehová. Pero Jehová yomʌch i coltañob chaʼan miʼ qʼuextañob i bʌ.

11. ¿Chuqui tac miʼ tsʼaʼlen Jehová?

¹¹ Cʌñʌ a tsʼaʼlen chuqui miʼ tsʼaʼlen Jehová (Sal. 97:10). Jiñi Biblia miʼ yʌl chaʼan Jehová miʼ tsʼaʼlen «jini muʼ bʌ i chañʼesan i bʌ, jini muʼ bʌ i chaʼlen lot, jini muʼ bʌ i tsʌnsan  jini toj bʌ» (Pr. 6:16, 17). Cheʼ jaʼel tsʼaʼ miʼ qʼuel «jini muʼ bʌ i chaʼlen tsʌnsa yicʼot jini muʼ bʌ i chaʼlen lot» (Sal. 5:6). Jehová miʼ wen tsʼaʼlen pejtelel ili melbalʌl tac, jin chaʼan tsiʼ jisa pejtelel jiñi jontoloʼ bʌ tiʼ yorajlel Noé come tsiʼ butʼuyob ti jontolil ili pañimil (Gn. 6:13). Yambʌ muʼ bʌ i tsʼaʼlen Jehová jiñʌch tsaʼ bʌ i yʌlʌ tiʼ tojlel jiñi xʼaltʼan Malaquías: Cheʼ an majqui miʼ lotin i yijñam o i ñoxiʼal yicʼot yambʌ chaʼan miʼ mejlel i chaʼlen i bʌ ti divorciar. Dios maʼañic miʼ chʼʌm i chʼujutesaya jiñi muʼ bʌ i mel bajcheʼ iliyi i mi caj i yʌqʼuen i toj i mul (Mal. 2:13-16; Heb. 13:4).

12. ¿Chuqui yom i yʌl cheʼ mi lac tsʼaʼlen chuqui mach bʌ weñic?

¹² Jehová miʼ subeñonla: «Tsʼaʼlenla chuqui mach bʌ weñic» (Rom. 12:9). Jiñi tʼan tsʼaʼlenla miʼ yʌqʼueñonla lac ñaʼtan junchajp mach bʌ añic mi lac wis mulan. Ili yom i yʌl chaʼan mi lac wen tsʼaʼlen o mach la comic laj qʼuel. Laʼcu lac ñaʼtan bajcheʼ yubil mi la cubin cheʼ muqʼuic lac subentel chaʼan mi laj cʼux mach bʌ weñix bʌlñʌcʼʌl. Miʼ mejlel la cʌl chaʼan mi lac wen biʼlen. Cheʼʌch yom mi la cubin jaʼel cheʼ bʌ miʼ ñumel ti lac jol lac mel junchajp mach bʌ añic miʼ mulan Jehová.

13. ¿Chucoch yom mi lac wen cʌntan chuqui mi lac ñaʼtan?

¹³ Wen cʌntan chuqui tac maʼ ñaʼtan. Jiñi muʼ bʌ lac ñaʼtan mi lac pʌs ti chuqui tac mi lac mel. Jin chaʼan Jesús tsiʼ pʌsʌ chaʼan yom mi lac choc loqʼuel pejtelel jiñi lac ñaʼtʌbal muʼ bʌ i mejlel i yʌcʼonla ti tsʌts bʌ mulil (Mat. 5:21, 22, 28, 29). La com lac mel chuqui tac miʼ tijicñesan Jehová, ¿ñomach? Mi cheʼʌchi, wen ñuc i cʼʌjñibal cheʼ ti ora mi lac choc loqʼuel jiñi mach bʌ weñic lac ñaʼtʌbal.

14. ¿Chuqui miʼ pʌs ti lac tojlel jiñi muʼ bʌ la cʌl, i chuqui tac yom mi laj cʼajtiben lac bʌ?

¹⁴ Cʌntan chuqui tac maʼ wʌl. Jesús tsiʼ yʌlʌ: «Jiñi muʼ bʌ i loqʼuel ti laʼ wej tilem ti laʼ pusicʼal» (Mat. 15:18). Cheʼʌchi. Jiñi chuqui tac mi la cʌl miʼ pʌs bajcheʼ yilalonla. Cʼajtiben a bʌ: «¿Muʼ ba cʌl chuqui tac i sujm bʌ, anquese jiñi miʼ mejlel i yʌcʼon ti wocol? Mi ñujpuñemon, ¿muʼ ba j cʌntan c bʌ ti bajcheʼ yilalon tiʼ tojlel yambʌlob? ¿Muʼ ba j cʌntan c bʌ chaʼan maʼañic mi cʌl chaʼan tac bʌ tsʼiʼlel? ¿Wem ba bajcheʼ mic jacʼ cheʼ bʌ an majqui miʼ yʌcʼon ti michʼ?». Wen ñaʼtan ili cʼajtiya tac. Jiñi muʼ bʌ la cʌl lajal bajcheʼ jiñi puy baqui chucul jumpʼejl pisil. Mi mucʼʌch lac chaʼlen wersa chaʼan maʼañic mi la cʌl mach bʌ weñic, lot tac yicʼot  chaʼan tac bʌ tsʼiʼlel maʼañix baqui mi caj i chuc i bʌ jiñi ñoxix bʌ lac melbal.

15. ¿Chuqui yom mi lac mel chaʼan mi lac chʼij ti teʼ jiñi ñoxix bʌ lac melbal?

¹⁵ Mele pejtelel chuqui yom chaʼan maʼ qʼuextan a bʌ. Jiñi apóstol Pablo tsiʼ cʼʌñʌ jumpʼejl lajiya chaʼan miʼ coltañonla lac ñaʼtan chaʼan wen ñucʌch i cʼʌjñibal cheʼ mi laj qʼuextan lac bʌ. Tsiʼ yʌlʌ chaʼan yom mi lac chʼij ti teʼ jiñi ñoxix bʌ lac melbal (Rom. 6:6). Jesús tsiʼ yʌcʼʌ i bʌ chaʼan miʼ chʼijtʌl ti teʼ come yom i tijicñesan Jehová. Mi la com lac tijicñesan Jehová jaʼel yom mi lac chaʼlen wersa chaʼan mi laj cʌy jiñi lac melbal tac yicʼot lac ñaʼtʌbal muʼ bʌ i tsʼaʼlen. Mi mucʼʌch lac mel iliyi, mi caj lac taj sʌc bʌ laj conciencia yicʼot jiñi lac pijtaya chaʼan mi lac chumtʌl tiʼ pejtelel ora (Juan 17:3; 1 Ped. 3:21). Laʼ laj cʼajtesan chaʼan Jehová maʼañic mi caj i qʼuextan jiñi i mandar tac chaʼan jach miʼ tijicñesañonla. Joñonla yom mi laj qʼuextan lac bʌ chaʼan mi lac jacʼben i mandar tac (Is. 1:16-18; 55:9).

16. ¿Chucoch yomʌch maʼ chʌn chaʼlen wersa chaʼan maʼ mʌlben jiñi a cʼunlel?

¹⁶ Bej chaʼlen wersa chaʼan maʼ mʌlben jiñi a cʼunlel. Anquese tsaʼix a chʼʌmʌ jaʼ, yom maʼ bej chaʼlen wersa chaʼan maʼ mʌlben jiñi mach tac bʌ weñic. Ñaʼtancu tsaʼ bʌ ujti tiʼ tojlel Maurício, tsaʼ bʌ sujti ti homosexual cheʼ bʌ chʼitonto. Ti wiʼil, tsiʼ cʌñʌ jiñi i testigojob Jehová i tsaʼ caji ti estudio. Tsiʼ qʼuexta jiñi i melbal i tsiʼ chʼʌmʌ jaʼ ti 2002. Anquese cabʌlix jab cajel i melben i yeʼtel (troñel) Jehová, miʼ yʌl: «Tiʼ sujm mic chʌn chaʼlen wersa chaʼan mic mʌlben jiñi mach bʌ weñic». Pero maʼañic miʼ yʌcʼ chaʼan jiñi miʼ yʌqʼuen i chʼijyemlel come miʼ yʌl: «Wen tijicña mi cubin cheʼ cujil chaʼan Jehová wen tijicña yicʼoton cheʼ maʼañic mic mel jiñi». *

17. ¿Bajcheʼ miʼ coltañet tsaʼ bʌ ujti tiʼ tojlel Nabiha?

¹⁷ Cʼajtiben i coltaya Jehová i coltan a bʌ ti jiñi chʼujul bʌ i yespíritu, mach ti a bajñel pʼʌtʌlelic (Gál. 5:22; Filip. 4:6). Yom maʼ chʌn chaʼlen wersa chaʼan maʼ choc jiñi ñoxix bʌ a melbal tac yicʼot chaʼan maʼañic miʼ chaʼ sujtel ti a tojlel. Qʼuele tsaʼ bʌ ujti tiʼ tojlel juntiquil xʼixic i cʼabaʼ Nabiha. Jiñi i papá tsiʼ cʌyʌ cheʼ bʌ an jaxto seis i jabilel. Miʼ yʌl: «Jiñi tsiʼ wen aqʼueyon c chʼijyemlel». Cheʼ bʌ tsaʼ coli majlel, ñumen jontol tsaʼ sujti. Tsaʼ caji i chon droga, tsiʼ chucuyob i cabʌl jab tsaʼ ajñi ti cárcel.  Jiñi Testigojob muʼ bʌ i cʼotelob ti subtʼan yaʼ ti cárcel tsaʼ caji i yʌqʼueñob estudio. Cheʼ jiñi, tsaʼ caji i qʼuextan i melbal. Miʼ yʌl: «An mach bʌ wen wocolic tsaʼ cubi chaʼan mij cʌy. […] Pero wen wocol tsaʼ cubi chaʼan mij cʌy jiñi droga». Ñumen ti jumpʼejl jab tsiʼ chaʼle wersa chaʼan miʼ cʌy, i tsaʼʌch mejli. ¿Bajcheʼ? Miʼ yʌl: «Tsaʼ bʌ i coltayon chaʼan mij cʌy jiñʌch cheʼ tsaʼ c chʌn chaʼle oración». I ti wiʼil miʼ yʌl: «Cujil chaʼan, mi joñon tsaʼʌch mejli j qʼuextan c bʌ chaʼan mic tijicñesan Jehová, majqui jach yambʌ miʼ mejlel i mel». *

18. Cheʼ bajcheʼ miʼ yʌl 1 Corintios 6:9-11, ¿chuqui an i meleyob yonlel i wiñicob Dios?

¹⁸ Cheʼ ti ñaxam bʌ siglo, Jehová tsiʼ yajca lac piʼʌlob chaʼan miʼ chaʼleñob yumʌntel yicʼot Cristo anquese tsiʼ meleyob mach bʌ weñic ti ñaxan. Jumpʼejl ejemplo, an xtsʼiʼleloʼ bʌ ti ñaxan, homosexualoʼ bʌ yicʼot xujchʼoʼ bʌ. Pero tsaʼʌch i qʼuextayob i bʌ tiʼ coltaya jiñi chʼujul bʌ espíritu (pejcan 1 Corintios 6:9-11). Ili ora, jiñi Biblia an i colta yonlel lac piʼʌlob chaʼan miʼ qʼuextañob i bʌ. * Cʌybil i chaʼañob jiñi mach bʌ weñic ñʌmʌl bʌ i melob. Jiñi miʼ pʌs chaʼan mucʼʌch i mejlel a qʼuextan a bʌ yicʼot a cʌy mach tac bʌ weñic chaʼan maʼ mejlel ti chʼʌmjaʼ.

19. ¿Chuqui mi caj laj qʼuel ti jiñi yambʌ estudio?

¹⁹ Jiñi yomoʼ bʌ i chʼʌmob jaʼ mach cojic jach yom miʼ chaʼleñob wersa chaʼan miʼ cʌyob jiñi ñoxix bʌ i melbal, yom miʼ chaʼleñob wersa jaʼel chaʼan miʼ lʌpob jiñi tsijiʼ bʌ. Ti jiñi yambʌ estudio mi caj laj qʼuel bajcheʼ miʼ mejlel lac mel yicʼot bajcheʼ miʼ mejlel i coltañonla yañoʼ bʌ.