TANE MEKUN 10
Ijije Hi Tro Sa “Unatrije La Itre Thiina Hnapan”
“Unatrije pi la itre thiina hnapan me itre hna majemin.”—KOL. 3:9.
NYIMA 29 Loi e Tro Sa Xome Hnyawa La Ëje Së
MEKUNA KA TRU *
1. Tune kaa la aqane mele i epun qëmekene tro epuni a inine la Tusi Hmitrötr?
TUNE kaa la aqane mele i epun qëmekene tro epuni a inine la Tusi Hmitrötr memine la itre hlue i Iehova? Nyipici laka, tha ka loi kö la itre thiina së ekö. Hna ajojezine la itre mekuna i epun me aqane ujë i epun hnene la fene celë, matre thatre palakö epuni la itre hna amekötin hnei Iehova göne la loi me ngazo. “Pëkö mejiune i [epuni] lo, nge goi pë fe Akötresi [epun] e celë fen.” (Efe. 2:12) Ngo kola saze la mele i epun ngöne la epuni a nyiqaane inine la Tusi Hmitrötr!
2. Nemene la ka traqa ngöne lo epuni a inine la Tusi Hmitrötr?
2 Ame la epuni a inine la Tusi Hmitrötr ke, epuni a atre laka, tru la ihnimi Akötresie koi epun. Epuni fe a trotrohnine laka, maine epuni a ajane troa amadrinë Iehova me hane sine la lapa i Nyidrë, nyipiewekë tro epuni a saze la aqane mele i epun me itre mekuna i epun. Nge loi e tro epuni a trongëne la itre hnei Nyidrëti hna amekötin.—Efe. 5:3-5.
3. Thenge la Kolose 3:9, 10, nemene la hna upi së troa kuca hnei Iehova, nge nemene la hne së hna troa ce wang?
3 Iehova la Atre Xupi së me Keme së e hnengödrai. Celë hi matre, meköti tro Nyidrëti a qaja koi së la aqane tro sa ujë. Qëmekene tro sa xomi bapataiso, Iehova a ajane tro sa “unatrije la itre thiina hnapan me itre hna majemin.” * (E jë la Kolose 3:9, 10.) Tro la tane mekun celë a xatuane la itre ka ajane troa xomi bapataiso troa sa la köni hnying celë: (1) Nemene “la itre thiina hnapan”? (2) Pine nemene matre Iehova a ajane tro sa thipetrije la itre thiina cili? (3) Nemene la nyine tro sa kuca matre tro sa thipetrije itre ej? Nge ame kowe la itre ka xomi bapataiso, tro la tane mekun celë a xatua epun matre tha tro hmaca kö epun a hetrenyi la itre thiina cili.
ALIENE LA HNA HAPE “ITRE THIINA HNAPAN”?
4. Nemene la aqane ujë la ketre atr ka hetrenyi “la itre thiina hnapan”?
4 Ame la atr ka hetrenyi “la itre thiina hnapan” ke, angeic a kuca la itre aja ne ngönetrei. Angeic a meku angeice kö me saqe troa elëhni me pë hni ne ole me pi mama. Angeic a goeëne la itre film ka amamane la itre huliwa ka sis me isi. Maine jë, hetrenyi thei angeic la itre thiina ka lolo, nge kola huliwa la mekuthetheu i angeic pine la itre ewekë ka ngazo hnei angeic hna qaja me kuca. Ame pe, pëkö aja me trengecatre i angeic troa saze.—Gal. 5:19-21; 2 Tim. 3:2-5.
Ame la easa unatrije la “itre thiina hnapan” ke, tha itre eje hmaca kö la ka musinëne la itre mekun me aja së (Wange ju la paragarafe 5) *
5. Hapeu, ijije kö tro sa nuetrije asë la itre thiina hnapan? Qejepengöne jë (Itre hu. 3:19)
5 Pine laka, itre atr ka tha pexeje kö së, matre tha ijije kö tro sa nuetrij asë la itre aja ne la hni së me itre mekun ka ngazo. Ame itre xaa ijin, easa akötr ke, hne së hna qaja maine kuca la ketre ewekë nge tha hne së pe hna ajan. (Iere. 17:9; Iako. 3:2) Ngo ame la easa nuetrije la itre thiina hnapan ke, tha itre eje hmaca kö la ka musinëne la mele së.—Is. 55:7; e jë la Itre Huliwa 3:19.
6. Pine nemene matre Iehova a upi së troa thipetrije la itre mekun me itre hna majemine ka ngazo?
6 Iehova a hnimi së, matre Nyidrëti a upi së troa thipetrije la itre mekun me itre hna majemine ka ngazo, matre tro sa mele madrin. (Is. 48:17, 18) Atre hi Iehova laka, ame la itre ka kei kowe la itre aja ka ngazo ke, angatr a sipu akötrë angatre kö me itre xan. Eje hi, hleuhleu catre Nyidrë ngöne la easa akötr me akötrë itre xan.
7. Thenge la Roma 12:1, 2, nemene la itre mekun nyine tro sa iën?
7 Maine jë, itre sinee me fami së a hnyimasai së ke, easa ajane troa saze la mele së. (1 Pet. 4:3, 4) Maine pena, angatr a qaja ka hape, isa qanyi së kö iëne la nyine tro sa kuca, nge pëkö ka troa qeje së. Ngo ame la ka thipetrije la itre trepene meköti Iehova ke, hetre ka xomehnöthe la mele i angatr. Eje hi, angeic a nue la fene i Satana troa musinëne la mele i angeic. (E jë la Roma 12:1, 2.) Celë hi matre, nyipiewekë tro sa atreine axecië mekun hnyawa: tro kö sa nue la ngazo me fene i Satana troa musinëne la mele së? Maine nue Iehova pena troa saze la mele së me itre thiina së?—Is. 64:8.
AQANE TROA “UNATRIJE” LA ITRE THIINA HNAPAN
8. Nemene la ka troa xatua së matre troa thipetrije la itre mekun me itre hna majemin ka ngazo?
8 Atre hi Iehova laka, nyipiewekë tro sa xomi ijine me nue trengecatr, matre troa thipetrije la itre mekun me itre hna majemin ka ngazo. (Sal. 103:13, 14) Celë hi matre, Iehova a xatua së jëne la Tusi Hmitrötr, me uati hmitrötr, me organizasio i Nyidrë. Hnei Nyidrëti hna hamëne la inamacan me trengecatr me ixatua ka ijij, matre tro sa saze la mele së. Haawe, tro sa ce wang enehila la nyine tro sa kuca matre atreine thipetrije la itre thiina hnapan me hane xomi bapataiso.
9. Tune kaa la aqane troa xatua epun hnene la Tusi Hmitrötr?
9 Troa isa waipengö së jëne la Tusi Hmitrötr. Hna aceitunën la Tusi Hmitrötr memine la ketre ithulu. Ej a aijijë së troa isa waipengö së ngöne la aqane mekun, aqane ithanata, me aqane ujë. (Iako. 1:22-25) Ijije hi troa xatua epun hnene la itre ka hamë ini me itre xaa Keresiano ka macaj. Jëne la Tusi Hmitrötr, tro angatr a xatua epun troa canga öhne la itre ewekë ka loi maine ka ngazo thei epun. Ketre, tro angatr a amamane koi epun la aqane troa thele eamo e hnine la Tusi Hmitrötr, matre tro epuni a atreine thipetrije la itre hna majemin ka ngazo. Eje hi, aja i Iehova troa xatua epun. Atre hi Nyidrëti la itre hnei epuni hna ajan me itre aliene hni epun. (Ite edomë 14:10; 15:11) Celë hi matre, nyipiewekë tro epuni a catre thith me inine la Tusi Hmitrötr e nöjei drai.
10. Nemene la ini hnei epuni hna xom qa ngöne la hna melën hnei Elie?
10 Troa xecie koi së laka, ka sisitria catre la itre trepene meköti Iehova. Eje hi, hetre eloin e tro sa drengethenge Iehova. Ame la itre ka trongëne la itre trepene meköti Iehova ke, angatr a metrötrëne la mele i angatr. Hetre aliene la mele i angatr nge angatr a madrin. (Sal. 19:7-11) Ame pena la itre ka tha idrei me ka kuca la itre huliwa ne ngönetrei ke, hetre pun ka ngazo koi angatr. Hanawang la hna melën hnei Elie. Hna hetru angeic ngöne la nyipici. Ngo ame lo angeic a nekötrahmany, hnei angeic hna nyiqane ce tro memine la itre ka tha nyihlue i Iehova kö. E cili, hnei angeic hna xomi dorog me kuca la itre huliwa ka sis me atrekënö. Nge angeice ha canga elëhni me isi. Öni Elie: “Hnenge hna kuca la itre ewekë ka isazikeu memine la itre hna qaja hnei Tusi Hmitrötr.” Ame pe, tha thëthëhmine kö angeic la itre hnei angeic hna inin. Celë hi matre, hnei angeice hmaca hna inine la Tusi Hmitrötr. Ngacama tha ka hmaloi kö, ngo hnei angeic hna nue trengecatr matre troa thipetrije la itre aja ka ngazo me xomi bapataiso lo 2000. Nemene la itre eloine hna kapa hnei Elie qa ngöne la hna trongëne la itre trepene meköt? Öni angeic: “Tingeting me lolo la itre mekunang, nge lolo la mekuthetheung.” * Tui Elie, itre ka thipetrije la itre trepene meköti Iehova a sipu akötrë angatre kö. Ame pe, aja i Iehova troa xatua angatr troa saze la mele i angatr.
11. Nemene la itre ewekë hna methinëne hnei Iehova?
11 Troa methinëne la itre hnei Iehova hna methinën. (Sal. 97:10) Tusi Hmitrötr a qaja ka hape, Iehova a methinëne la itre ka “pi tru, me sesepeneqë ate thoi, me lue ime luete aneni madra ka pë ethan.” (Ite edomë 6:16, 17) Nyidrëti “a sisine la ate kuci madra me iaö.” (Sal. 5:6) Celë hi matre, hnei Iehova ekö hna lep apatrene la itre atr ka ngazo ngöne lo hneijine i Noa. Hnei angatr hna atiqane la fen hnei iangazo me isi. (Gen. 6:13) Ketre, hnei Iehova hna qaja jëne Malaki perofeta ka hape, Nyidrëti a methinëne la itre ka pi seihnacil. Tha tro kö Nyidrëti a kepe angatr, ngo tro pe Nyidrëti a ameköti angatr.—Mal. 2:13-16; Heb. 13:4.
Loi e tro sa goeëne la itre ewekë hna sisine hnei Iehova ceitu me itre xeni ka pi (Wange ju la paragarafe 11-12)
12. Nemene la aliene la hna hape, “sisine jë la ngazo”?
12 Iehova a ajane tro sa ‘sisine la ngazo.’ (Rom. 12:9) Ame la hnaewekë “sisine” ke, kola qaja la ketre ewekë hna xelene catrën, nge kösë easa goeëne la ketre ewekë ka pi. Pane mekune jë laka, kola upi së troa xeni la ewekë cili. Tro hë sa pi hmitra me wezipo. Ketre tune fe, loi e tro sa ananyine la itre ewekë hna sisine hnei Iehova.
13. Pine nemene matre nyipiewekë tro sa thupëne la itre mekuna së?
13 Troa thupëne la itre mekuna së. Itre mekuna së la ka upi së troa kuca la ketre ewekë. Celë hi kepin matre hnei Iesu hna ini së troa thipetrije la itre mekun ka upi së troa kuca la itre ewekë ka ngazo. (Mat. 5:21, 22, 28, 29) Maine easa ajane troa amadrinëne la hni Iehova, Keme së e hnengödrai, nyipiewekë tro sa canga thipetrije la itre mekun ka ngazo!
14. Nemene la hna amamane hnene la aqane ithanata së, nge nemene la itre hnying hne së hna troa sa?
14 Troa thupëne la aqane ithanata së. Öni Iesu: “Ame la ewekë ka tro qa ngöne la që, tre ka qaa kuhu hni lai.” (Mat. 15:18) Jëne la aqane ithanata së, kola mama la aliene hni së. Celë hi matre, loi e tro sa isa hnying ka hape: ‘Tro kö ni a qaja la nyipici, ngacama troa hetre ethan koi ni? Maine ka faipoipo ni, eni kö a thupën matre tha tro kö a iwesiwesikeu me ketre? Eni kö a thupëne matre tha tro kö a ihnyima me qaja la itre trengewekë ka sis? Eni kö a sa amenyiken ngöne la kola ithanata akökötrenyi koi ni?’ Nyipiewekë tro sa lapa mekun la itre hnying celë. Ketre, hna aceitunëne la aqane ithanata së memine la kola cai mano. Maine tro sa thipetrije la iqaqa me trengathoi me itre trengewekë ka sis, tro ha hmaloi koi së troa nuetrije la itre thiina hnapan.
15. Nemene la aliene la hna hape, “hna athip hune la sinöe la itre thiina së hnapan”?
15 Troa hetre aja matre canga saze. Hnei Paulo aposetolo hna hamëne la ketre ceitun ka amamane la enyipiewekëne troa saze la aqane mele së. Hnei nyidrëti hna qaja ka hape, loi e tro sa ‘athip hune la sinöe la itre thiina së hnapan.’ (Rom. 6:6) Ketre, nyipiewekë tro sa xötrethenge la tulu i Iesu. Loi e tro sa nuetrije la itre thiina me ewekë hna sisine hnei Iehova. E cili, tro ha lolo la mekuthetheu së nge tro hë sa hetrenyi la mel ka pë pun. (Ioane 17:3; 1 Pet. 3:21) Tha tro kö sa mekun laka, tro Iehova a saze la itre trepene meköti Nyidrë matre troa amadrinë së. Easë pe la ka troa saze aqane mel, me trongën la itre trepene meköt.—Is. 1:16-18; 55:9.
16. Pine nemene matre nyipiewekë tro sa catre isi memine la itre aja ne ngönetrei?
16 Troa isi memine la itre aja ne ngönetrei. Ngacama ka bapataiso hë së, ngo loi e tro palahi sa isi memine la itre aja ne ngönetrei. Hanawang la hna melën hnei Maurício. Ame lo angeic a nekötrahmany, hnei angeic hna ce lapa memine la ketre nekötrahmany. Ngo hnei angeic hna nyiqaane ini Tusi Hmitrötr memine la ketre hlue i Iehova. E cili, hnei angeic hna saze la aqane mele i angeic me xomi bapataiso lo 2002. Ngacama ekö hë angeic ngöne la nyipici, ngo öni Maurício: “Eni palahi a isi memine la itre aja ka ngazo.” Ame pe, tha angeice kö a nue la itre aja cili troa ajolë angeic. Angeice pe a cile catr. Öni angeic: “Atre hnyawa hi ni laka, maine tro ni a catre isi memine la itre aja ka ngazo, tro hë ni a amadrinë Iehova.” *
17. Nemene la ini hnei epuni hna xom qa ngöne la hna melën hnei Nabiha?
17 Troa sipo ixatua koi Iehova me mejiun koi Nyidrë, ngo tha kowe kö la sipu trengecatre së. (Gal. 5:22; Fil. 4:6) Loi e tro sa nue trengecatr matre troa nuetrije la itre thiina hnapan. Hanawang la hna melën hnei Nabiha. Hnene la keme i angeic hna trotrije la hnalapa ngöne lo kola 6 lao macatre i angeic. Öni Nabiha: “Akötr me hleuhleu la meleng.” Ame hë la angeic a tru, angeice ha nyiqane calogitr me canga elëhni. Hnei angeice fe hna salemë dorog, matre nyimu macatre ne akalabusi angeic. Hnene la itre hlue i Iehova ka iwai ngöne kalabus hna nyiqaane ini tusi me angeic. E cili, hnei Nabiha hna saze la aqane mele i angeic. Öni Nabiha: “Hmaloi koi ni troa nue la itre ajang ka ngazo. Ngo ame la ka jol ke, troa nue la sixa.” Traqa koi caa macatre ne isi Nabiha memine la aja cili. Nemene la ka xatua Nabiha? Öni angeic: “Atreine ni nue la sixa ke, hnenge hna catre thith me sipo ixatua koi Iehova.” Hnei angeice fe hna ithuecatr koi itre xan me hape: “Maine hnenge hna atreine saze la meleng matre troa amadrinë Iehova ke, ijiji epuni fe!” *
IJIJE HI TRO EPUNI A XOMI BAPATAISO!
18. Thenge la 1 Korinito 6:9-11, nemene la hna atreine kuca hnene la itre hlue i Iehova?
18 Hnei Iehova hna iëne la itre trahmanyi me föe ka mel ngöne lo hneijine i Iesu, matre troa hane ce musi me Keriso e hnengödrai. Ngo hnei itre xan hna kuca ekö la itre huliwa ka sis, tune la nyixetë me ce lapa hnei lue föe maine lue trahmany, me atrekënö. Ngo jëne la ixatua ne la uati hmitrötre i Akötresie, hnei angatre hna saze la aqane mele i angatr. (E jë la 1 Korinito 6:9-11.) Ketre tune fe enehila, Tusi Hmitrötr a xatuane la itre milio lao atr troa saze la aqane mele i angatr, me catre isi memine la itre aja ka ngazo. * Eje hi, kola amamane hnene la itre tulu i angatr laka, ijije hi tro sa nuetrije la itre thiina hnapan me hane xomi bapataiso.
19. Nemene la hne së hna troa ce wang ngöne la ketre tane mekun?
19 Maine epuni a ajane troa xomi bapataiso, nyipiewekë tro epuni a nuetrije la itre thiina hnapan, me heetrëne la iheetr ka hnyipixe. Ame ngöne la ketre tane mekun, tro sa ce wang la itre nyine troa kuca göne lai me aqane troa xatua së hnei itre xan.
NYIMA 41 Epi Shamatine La Thithing
^ Maine easa ajane troa xomi bapataiso, loi e tro sa saze la itre thiina së hnapan. Ame ngöne la tane mekun celë, tro sa ce wang la itre thiina hnapan, memine la kepin matre nyipiewekë tro sa thipetrije la itre thiina cili. Nge tro sa ce wang la aqane tro sa nuetrije itre ej. Ame ngöne la ketre tane mekun, tro sa ce ithanatane la aqane tro sa eënyine la itre thiina ka hnyipixe thupene la easa bapataiso.
^ GÖI TROA TROTROHNIN: Ame la troa “unatrije la itre thiina hnapan” ke, kolo lai a hape, qëmekene tro sa xomi bapataiso, loi e tro sa thipetrije la itre hna majemin me itre thiina hna methinën hnei Iehova.—Efe. 4:22.
^ Maine epuni a aja itre xaa ithuemacany, wange ju la Ita Ne Thup ne 1 Eiperem 2012 hna hape, “Il fallait que je revienne vers Jéhovah,” ngöne la tane mekun hna hape, “La Bible transforme des vies.”
^ Maine epuni a aja itre xaa ithuemacany, wange ju la Ita Ne Thup ne 1 Mei 2012, Qene Wiwi, hna hape, “Ils m’ont parlé avec bonté” ngöne la tane mekun hna hape, “La Bible transforme des vies.”
^ Maine epuni a aja itre xaa ithuemacany, wange ju la Ita Ne Thup ne 1 Okotropa 2012, Qene Wiwi, hna hape, “J’étais une jeune femme coléreuse et agressive,” ngöne la tane mekun hna hape, “La Bible transforme des vies.”
^ Wange ju la hna eköhagen hna hape, “ Saze Hë La Mel, Hnei Tusi Hmitrötr.”
^ ITRE FOTO: Easa nuetrije la itre thiina hnapan, tune la easa unatrije la ketre iheetr ka hnyiqetr.
