1. Fa i libi be de fosi i bigin sutudeli Beibel?

 FA I libi be de fosi i bigin sutudeli Beibel anga den Yehofa Kotoigi? Kande son wan fu u nai wani pakisei a sani ya. U be e denki, efuso du sani enke fa a goontapu ya wani. Neen meke ‘wi á be abi nawan howpu, wi á be sabi Gadu tu’ (Efe. 2:12). Ma u libi kengi di u bigin sutudeli Beibel.

2. San i leli di i bigin sutudeli Beibel?

² Di i bigin sutudeli Beibel, i leli taki yu abi wan Dda a hemel di lobi i. I kon si taki efi i wani Yehofa piisii, i mu kengi a fasi fa yu e denki anga a fasi fa yu e du sani. A te yu o du den sani ya fosi yu o man kon aini a gaan osufamii fi en.​—Efe. 5:3-5.

3. Enke fa Kolosesama 3:9, 10 e soi, da san Yehofa wani u du? San wi o luku aini a artikel ya?

³ Yehofa a u Dda, neen meke ala sani. A abi a leti fu taigi den sama di de aini a osufamii fi en fa den mu du sani. Fosi u dopu, a wani u ‘kengi a fasi fa u be fosi, da u tapu anga den sani di u be e du. * (Leisi Kolosesama 3:9, 10.) A artikel ya o yeepi den sama di wani dopu fu piki den akisi ya: (1) San a wani taki fu ‘kengi a fasi fa u be de fosi’? (2) Saide Yehofa wani u kengi a fasi fa u be de fosi? (3) Fa u sa du a sani ya? Den sama di dopu kaba  seefi sa fende wini fu a artikel ya, bika a o yeepi den fu si san den mu du fu den á daai go du den sani di den be fika.

4. Fa wan sama di á ‘kengi a fasi fa a be de fosi’ e tyai enseefi?

⁴ Wan sama di á kengi a fasi fa a be de fosi e du san den sondu fii fi en wani. Sowan sama e denki enseefi namo, en ati e boon gaw, a á sabi kiyoo, ai fii enseefi tu. Kande a sama ya e luku sekisi felon efuso feti felon. Sowan sama e abi bun manii tu. Son yuu en kosensi e fon mi en te ai denki efuso du sani di á bun. Ma a nai meke bunbun moiti fu kengi en manii.​—Gal. 5:19-21; 2 Tim. 3:2-5.

5. San u mu holi a pakisei te wi e meke moiti fu kengi a fasi fa u be de fosi? (Toli fu den apostel 3:19)

⁵ Ala wi abi sondu, neen meke winsi fa wi e meke moiti, son yuu wi o go e denki efuso du sani di á bun (Yel. 17:9; Yak. 3:2). Ma efu u kengi a fasi fa u be de fosi, den sondu fii fu u ná o basi u moo. Sama ná o sabi wi enke wan sama di abi den manii de moo.​—Yes. 55:7; leisi Toli fu den apostel 3:19.

6. Saide Yehofa wani u kengi a fasi fa u be de fosi?

⁶ A fu di Yehofa lobi u meke a wani u kengi u manii. A wani u du sani di e meke u piisii (Yes. 48:17, 18). A sabi taki a omen sani e miti den sama di nai feti anga den sondu fii fu den. Den mati anga den famii fu den e fii den takuu bakapisi fu den sani di den e du tu. Ai hati Yehofa te ai si den takuu bakapisi di den sani di wi e du e tyai gi wi anga taawan.

7. Enke fa Romesama 12:1, 2 e soi, da san ala u mu du?

⁷ Biginbigin kande den mati anga den famii fi yu o soso i fu di i bigin du sani taa fasi (1 Peit. 4:3, 4). Kande den e taigi i taki yu abi a leti fu du san i wani, yu á mu meke sama taigi i san i mu du. Den sama di nai dini Yehofa e si enke den fii, ma a san a goontapu fu Saatan wani den e du. (Leisi Romesama 12:1, 2.) Ala u mu luku san u wani. Yu o tan du den sani di a goontapu fu Saatan e  gi sama taanga-sikin fu du, efuso yu o meke Yehofa yeepi i fu kengi i manii?​—Yes. 64:8.

8. San o yeepi u fu wi á denki efuso du sani di á bun?

⁸ Yehofa sabi taki a bunbun moiti u mu meke fu kengi a fasi fa u be e denki, anga a fasi fa u be e du sani. A sabi taki a sani ya o teke ten tu (Ps. 103:13, 14). Ma Yehofa gi wi a Beibel, en santa yeye, anga en olikanisâsi fu yeepi u. Ai gi u koni anga kaakiti. Ai holibaka gi u tu. A omen fasi Yehofa yeepi i kaba. Meke u luku san iseefi sa du fu kengi a fasi fa i be de fosi, fi i sa dopu.

9. Anga san a Wowtu fu Gadu sa yeepi i?

⁹ Koboloiki Beibel fu ondoosuku iseefi. A Wowtu fu Gadu de enke wan sipikii. A sa yeepi u fu ondoosuku a fasi fa wi e denki, a fasi fa wi e taki, anga a fasi fa wi e du sani (Yak. 1:22-25). I sa akisi a sama di e sutudeli anga i, efuso taa baala anga sisa di abi ondoofeni fu poti yu a pasi. Den o koboloiki Beibel fu soi i san yu e du bun kaba, anga san i sa du moo bun. Den sa soi i tu fa iseefi sa wooko anga den leli fu Beibel fu ondoosuku iseefi. Boiti dati, na ala yuu Yehofa de kabakaba fu yeepi i. Neen na a moo bun Sama di sa yeepi i, bika a sabi san de aini yu ati (Odo 14:10; 15:11). Neen meke i mu abi a gwenti fu e begi en. I mu e sutudeli a Wowtu fi en ala dei tu.

10. San a toli fu Elie e leli i?

¹⁰ I mu e biibi taki Yehofa sabi san moo bun gi u. Ala den sani di Yehofa e akisi u fu du e tyai wini gi u. Den sama di e libi enke fa a wani e lesipeki denseefi, den abi howpu, den e piisii tuutuu (Ps. 19:7-11). Ma den sama di nai du sani enke fa Yehofa wani, e fii den takuu bakapisi fu den sani di den e du. Luku san be miti wan man den e kai Elie. A taki en mma anga en dda be kiya en anga den leli fu Yehofa. Ma di a kon moo bigi, a bigin paa anga takuu mati. A sani ya meke a be bigin somoko takuu tabaka. A be e libi wan yayo-libi, a be e fufuu tu. Elie taki na ala yuu en ati be e boon, neen meke na ala yuu a be e feti anga sama. A taki: ‘Mi be e du ala den sani di mi be leli taki wan Kelesten á mu du.’ Ma Elie á be feegete den sani di a be leli di a be yonkuu. Bakaten a bigin sutudeli Beibel baka. A meke moiti kengi a fasi fa a be e libi, neen a dopu aini a yali 2000. Sowtu wini a fende di a du a sani ya? A taki: ‘Nownow mi e lesipeki miseefi. Mi kosensi nai fon mi moo tu.’ * A toli fu Elie e leli u taki sani nai waka bun anga den sama di nai libi enke fa Yehofa wani. Ma solanga den wani kengi, Yehofa de kabakaba fu langa wan ana gi den.

11. San a wantu sani di Yehofa e buuse?

¹¹ I mu e buuse den sani Yehofa e buuse (Ps. 97:10). Beibel taki Yehofa ‘e buuse sama di e fii enke den bun moo taawan, sama di e lei, anga sama di e kii taawan di á du ogii’ (Odo 6:16, 17). Boiti dati Yehofa ‘á lobi sama di e du ogii, anga sama di e koli taawan’ (Ps. 5:6). A fu di  Yehofa e buuse den manii ya meke a be kii ala den sama na a ten fu Nowa (Gen. 6:13). Yehofa be meke polofeiti Maleyaki taigi a foluku fi en taki ai buuse den sama di e booko toow anga den toowpaa fu lawlaw sani ede. A á wani den sowtu sama ya dini en. A o akisi den faantiwowtu fu a sani ya tu.​—Male. 2:13-16; Heb. 13:4.

12. San a wani taki fu ‘buuse ogii’?

¹² Yehofa wani u ‘buuse ogii’ (Rom. 12:9). Te wan sama e buuse wan sani, a nai wani si a sani de na ain seefiseefi. Pakisei fa i be o fii efu wan sama gi i wan beenki poli nyanyan. Te i luku a nyanyan ala yu ati e daai. A letiso a mu de anga den sani di Yehofa á lobi. Wi á mu e denki seefi fu du den sani ya.

13. Saide wi á mu e pakisei sani di á bun?

¹³ Kibii a denki fi i. A den sani di wi e denki, wi e du bakaten. Neen meke Yesesi be taki wi á mu e pakisei sani di sa meke u du sani di Yehofa e buuse (Mat. 5:21, 22, 28, 29). U wani u Dda di de a hemel piisii. Neen meke u mu e du ala san u poi fu u nai pakisei sani di sa meke u du sani di a á lobi.

14. Saide u mu luku bun anga den sani di wi e taki? San u mu akisi useefi?

¹⁴ Luku bun san yu e taki. Yesesi be taki: ‘Ma a san de aini wan sama ati, ai taki’ (Mat. 15:18). Den sani di wi e taki e soi fa u de tuutuu. Neen meke u mu akisi useefi taki: ‘Na ala yuu mi e taki a tuu, winsi son yuu a sani de sa meke mi kon aini polobelema? Efu mi a wan sama di toow, mi e luku bun fu mi nai poolo gi taa sama? Mi gwenti taki tyobo taki? Mi e taki switi anga taawan, winsi mi ati boon a den?’ A be o bun fu teke ten pakisei fa i be o piki den akisi ya. Efu wi e meke moiti fu u nai ligei, fu u nai lei, efuso taki tyobo taki, a o moo makiliki gi u fu kengi a fasi fa u be de fosi.

15. San a wani taki fu sipikii den gaandi manii fu wi a wan ponsu?

¹⁵ I mu de kabakaba fu kengi. Apostel Pawlesi be gi wan ageisitoli di e soi on pelensipali a de fu kengi a fasi fa u be de fosi. A be taki u mu ‘sipikii den  gaandi manii fu u na a ponsu’ (Rom. 6:6). A sani ya wani taki u mu waka a Yesesi baka. Yesesi be de kabakaba fu dede a wan ponsu fu di a be wani Yehofa piisii. A letiso useefi mu de kabakaba fu kengi den manii di Yehofa á lobi. Efu u du a sani ya, wi o abi wan kiin kosensi, wi o abi a howpu fu libi fu teego tu (Yoh. 17:3; 1 Peit. 3:21). Yehofa ná o kengi den weiti fi en fu wi ede, a wi mu kengi den manii fu u, fu u sa holi den weiti fi en.​—Yes. 1:16-18; 55:9.

16. Saide u mu e meke moiti fu u nai du san den sondu fii fu u wani?

¹⁶ Meke moiti fi yu á du san a sondu sikin wani. Winsi i dopu kaba, toku yu o abi fu tan meke a moiti ya ete. Luku a toli fu wan man den e kai Maurício. Fosi a bigin dini Yehofa, a be e libi anga taa man. Bakaten a miti den Kotoigi, neen a bigin sutudeli Beibel. A meke moiti kengi a fasi fa a be e libi, neen a dopu aini 2002. Maurício taki: ‘A omen yali kaba mi e dini Yehofa. Ma mi á mu lei, son yuu mi abi fu feti anga den fii ya ete.’ Ma Maurício nai lasi-ati. A taki: ‘Mi e fende taanga-sikin te mi e pakisei taki te mi nai du san den sondu fii fu mi wani, da Yehofa e piisii.’ *

17. San i lobi fu a toli fu Nabiha?

¹⁷ Begi Yehofa fu a yeepi yu anga en santa yeye, ná fitoow i eigi kaakiti (Gal. 5:22; Filip. 4:6). A bunbun moiti u mu meke fu kengi a fasi fa u be de fosi. Luku a toli fu wan uman den e kai Nabiha. Di a be abi feifi yali, en dda gwe fika a osufamii fi en. Nabiha taki: ‘Ná pikin hati a sani ya be hati mi, neen meke mi ati be e boon gaw.’ Bakaten Nabiha bigin seli takuu tabaka. Di sikowtu kisi en, den sooto en omen yali. Den Kotoigi be e go a den sitaafu-osu fu leli sama sani fu Beibel. A so den bigin sutudeli anga Nabiha. A omen sani a kengi aini en libi di a bigin sutudeli. A taki: ‘Son sani á be taanga gi mi fu kengi. Ma ná pikin taanga a be taanga gi mi fu tapu anga a somoko di mi be e somoko.’ A wan yali langa Nabiha feti fu tapu anga a takuu  gwenti ya. San yeepi en? A taki: ‘A moo pelensipali sani di yeepi mi, na a begi di mi be e begi Yehofa.’ Nownow Nabiha lobi taigi taawan taki: ‘Efu mi be poi kengi fu libi enke fa Yehofa wani, da taa sama sa du a sani ya tu.’ *

18. Enke fa 1 Korentesama 6:9-11 e soi, da san a foluku fu Gadu be poi du aini a ten di pasa?

¹⁸ Aini a ten fu den apostel, son wan fu den man anga uman di Yehofa be teke fu go tii makandaa anga Yesesi a hemel be e du sani di a á lobi. Son wan fu den be e libi wan hululibi, man anga man be e libi, son wan fu den be e fufuu. Ma a santa yeye fu Yehofa yeepi den fu kengi a fasi fa den be de fosi. (Leisi 1 Korentesama 6:9-11.) A so Beibel yeepi miliyunmiliyun sama aini a ten ya fu kengi tu. * Den be poi kengi manii di á bun, winsi fa a sani ya be taanga. A toli fu den sama ya e leli u taki iseefi poi fika manii di Yehofa á lobi fi i sa dopu.

19. San wi o luku aini a taa artikel?

¹⁹ Aini a artikel ya u luku taki efu wan sama wani dopu, a mu meke moiti fu kengi a fasi fa a be de fosi, da a bigin du sani enke fa Yehofa wani. Aini a taa artikel wi o luku fa u sa du a sani ya, anga fa taa sama sa yeepi u.