1. Uwem fo eketie didie mbemiso ọkọtọn̄ọde ndikpep Bible?

 UWEM fo eketie didie mbemiso ọkọtọn̄ọde ndikpep Bible ye Mme Ntiense Jehovah? Ediwak nnyịn isiyomke nditi mme ini oro. Anaedi ikesikere n̄kpọ inyụn̄ inam n̄kpọ nte mbon ererimbot emi. Ekpedi ntre, nnyịn “ikenyeneke idotenyịn, ikonyụn̄ inyeneke Abasi ke ererimbot.” (Eph. 2:12) Edi kpukpru oro ama okpụhọde ke ini ikọtọn̄ọde ndikpep Bible!

2. Nte okosụk ekpepde Bible aka, nso ke okokụt?

² Nte okosụk ekpepde Bible, ama edikụt ke emenyene Ete ke heaven emi amade fi etieti. Ke edieke oyomde ndinam esịt enem enye nnyụn̄ ntiene nsịne ke otu mbon emi ẹtuakde ibuot ẹnọ enye, ke ana enen̄ede okpụhọde nte esinamde n̄kpọ ye nte esikerede n̄kpọ, ekpep ndima se enye amade, onyụn̄ asua se enye asuade.​​—Eph. 5:​3-5.

3. Colossae 3:​9, 10 ọdọhọ ke nso ke Jehovah oyom nnyịn inam? Nso ke idineme ke ibuotikọ emi?

³ Sia Jehovah edide Andibot nnyịn ye Ete nnyịn ke heaven, enye enyene unen nditịn̄ nte mbon emi ẹtuakde ibuot ẹnọ enye ẹkpenamde n̄kpọ. Enye onyụn̄ oyom nnyịn ‘isio akani owo ye mme edinam esie iduọk’ mbemiso inade baptism. * (Kot Colossae 3:​9, 10.) Ibuotikọ emi ọmọn̄ an̄wam mbon emi ẹyomde ndina baptism ẹkụt ibọrọ mbụme ita emi: (1) Nso idi “akani owo”? (2) Nso inam Jehovah ọdọhọ nnyịn isio akani owo iduọk? (3) Didie ke ikeme ndinam oro? Ibuotikọ emi ayan̄wam mbon emi ẹma ẹkena baptism ẹkụt se mmọ ẹkpenamde man mmọ idifiak ikanam mme n̄kpọ emi mmọ ẹkesinamde mbemiso mmọ ẹsiode akani owo ẹduọk.

4. Owo emi mîsioho “akani owo” iduọk esinam n̄kpọ didie?

⁴ Owo emi mîsioho “akani owo” iduọk esikere n̄kpọ nte enye amade onyụn̄ anam n̄kpọ nte enye amade. Enye ekeme ndibụk ibụk, ọsọp iyatesịt, owo akpanam n̄kpọ ọnọ enye ikọmke, onyụn̄ atan̄ idem. Enye ekeme ndima ndisise ndise idan̄, oburobụt fim, m̀mê fim afai. Utọ owo oro ekeme ndinyene nti edu uwem, onyụn̄ ekeme ndisifịna enye edieke enye etịn̄de mîdịghe anamde se mîfọnke. Edi enye inyeneke se inamde enen̄ede ọdọn̄ enye ndision̄o ubọk n̄kpọn̄ ndiọi n̄kpọ oro nnyụn̄ ntre ndisikere ndiọi n̄kpọ.​​—Gal. 5:​19-21; 2 Tim. 3:​2-5.

5. Ntak emi nnyịn mîkpekereke ke iyekeme ndisio akani owo ke idem nnyịn mfep ata ofụri ofụri-e? (Utom 3:19)

⁵ Sia nnyịn mîfọnke ima, idụhe nte iditiede idiọkn̄kpọ ndomokiet idụkke nnyịn ekikere m̀mê ndidọn̄ nnyịn ndinam se mîfọnke. Ndusụk ini, imekeme nditịn̄ ikọ mîdịghe inam n̄kpọ emi ituade n̄kpọfiọk. (Jer. 17:9; Jas. 3:2) Edi edieke isiode akani owo ifep ke idem nnyịn, nnyịn ididụkke ufụn inọ idiọkn̄kpọ. Owo ididaha ndiọi n̄kpọ emi ikesinamde akpa idiọn̄ọ nnyịn aba.​​—Isa. 55:7; kot Utom 3:19.

6. Nso inam Jehovah ọdọhọ nnyịn itre ndiọi n̄kpọ ye ndiọi ekikere?

⁶ Jehovah ọdọhọ nnyịn itre ndiọi n̄kpọ ye ndiọi ekikere sia enye ama nnyịn etieti, onyụn̄ oyom nnyịn ikop inem uwem. (Isa. 48:​17, 18) Enye ọdiọn̄ọ ke mbon emi ẹduọde ẹnyịne ẹnam idiọkn̄kpọ ẹsida mfịna ẹsọk idemmọ ye mbon en̄wen. Ndien esibiak Jehovah etieti ndikụt nnyịn isịnde idem nnyịn ye mbon en̄wen ke mfịna.

7. Rome 12:​1, 2 owụt ke nso ke inyene ndimek?

⁷ Ini itọn̄ọde ndikpụhọde uwem nnyịn, ndusụk mme ufan nnyịn ye mme iman nnyịn ẹkeme ndisak nnyịn. (1 Pet. 4:​3, 4) Mmọ ẹkeme ndidọhọ ke nnyịn imenyene unen ndidu uwem nnyịn nte imade, ke ikpanaha iyak owo ndomokiet ọdọhọ nnyịn nam emi kûnam oko. Edi idịghe nte ke mbon emi ẹdude uwem mmọ nte Jehovah mîmaha ẹdu ke ifụre-o. Se idude edi ke mmọ ẹyak ererimbot Satan emi ada mmọ otụn usụn̄. (Kot Rome 12:​1, 2.) Ana kpukpru nnyịn imek  m̀mê iyayak Jehovah an̄wam nnyịn ikpụhọde idu eti uwem, m̀mê idika iso idu uwem nte ererimbot Satan emi ẹmade.​​—Isa. 64:8.

8. Nso idin̄wam nnyịn itre ndiọi n̄kpọ ye ndiọi ekikere?

⁸ Jehovah ọdiọn̄ọ ke nditre ndiọi n̄kpọ ye ndiọi ekikere idịghe n̄kpọ usen kiet, ke oyonyụn̄ oyom isịn ukeme. (Ps. 103:​13, 14) Edi enye ada Ikọ esie, spirit esie, ye esop esie ọnọ nnyịn ọniọn̄ ye ukeme man ikpụhọde se ededi emi anade ikpụhọde ke uwem nnyịn. Anaedi afo omokokụt nte enye an̄wamde fi. Yak ineme ndusụk n̄kpọ emi afo akpanamde man aka iso etre mme n̄kpọ emi Abasi mîmaha onyụn̄ osio akani owo ọduọk man odot ndina baptism.

9. Nso ke Bible ekeme ndin̄wam fi anam?

⁹ Da Ikọ Abasi nen̄ede dụn̄ọde idemfo. Ikọ Abasi etie nte ukụtiso; ekeme ndin̄wam fi ọdiọn̄ọ nte afo esikerede n̄kpọ, esitịn̄de ikọ, esinyụn̄ anamde n̄kpọ. (Jas. 1:​22-25) Owo emi esikpepde fi Bible ye nditọete en̄wen emi ẹsọn̄de idem ke esop ẹkeme ndin̄wam fi. Ke uwụtn̄kpọ, mmọ ẹkeme ndida Bible n̄n̄wam fi yak ọdiọn̄ọ mme n̄kpọ emi afo esinamde ọfọn ye mbon emi mûsunamke ọfọn. Mmọ ẹkeme ndikpep fi nte akpasan̄ade okụt item Bible emi edin̄wamde fi etre ndiọi edu. Jehovah n̄ko eben̄e idem ndin̄wam fi ini ekededi. Enye edi mfọnn̄kan owo emi ekemede ndin̄wam fi sia enye ọdiọn̄ọ se isịnede fi ke esịt. (N̄ke 14:10; 15:11) Ke ntre nam emehe fi ndisibọn̄ akam nnọ enye nnyụn̄ n̄kpep Ikọ esie kpukpru usen.

10. Nso ke mbụk Elie ekpep fi?

¹⁰ Nen̄ede nịm ke nte Jehovah ọdọhọde idu uwem ọfọn akan. Kpukpru se Jehovah ọdọhọde inam ẹdifọn ye nnyịn. Mbon emi ẹsidude uwem nte Jehovah ọdọhọde isikereke ke mmimọ iwọrọke n̄kpọ, uwem mmọ esinyene ibuot, mmọ ẹsinyụn̄ ẹkop ata inemesịt. (Ps. 19:​7-11) Edi mbon emi ẹmekde ndidu uwem nte Jehovah mîmaha ẹsinyene mme mfịna oro mbon emi ẹnamde utom obụkidem ẹsinyenede. Ete kiet emi ekerede Elie etịn̄ se isitịbede edieke owo esịnde ndidu uwem nte Jehovah ọdọhọde. Ete ye eka esie ẹkedi Mme Ntiense Jehovah. Edi ini Elie edide uyen, enye ama odụk idiọk nsan̄a. Enye ama etiene mme ufan esie ọn̄wọn̄ ikọn̄ekpo, anam oburobụt n̄kpọ, eyịp n̄kpọ, onyụn̄ anam ndiọi n̄kpọ en̄wen ntre. Elie ọdọhọ ke ekedi nte eyo esierede, ntre ke imọ inen̄ede ikpon esịt inyụn̄ inam n̄kpọ afai afai. Enye ọdọhọ ke kpukpru se ẹkekpepde imọ ke Bible ẹte imọ ikûnam, ke oro ke imọ ikakam inam. Edi enye ikefreke mme n̄kpọ oro ẹkekpepde enye ini enye edide uyen. Nte ini akade, enye ama afiak ọtọn̄ọ ndikpep Bible. Enye ama esịn idem etre ndiọi n̄kpọ emi enye ekesinamde onyụn̄ ana baptism ke isua 2000. Nso ufọn ke enye ọbọ idahaemi enye odude uwem nte Abasi ọdọhọde mi? Enye ọdọhọ ke imọ imenyene emem idahaemi, esịt inyụn̄ imiaha imọ ufen aba. * Mbụk Elie emi owụt ke mbon emi ẹsịnde ndidu uwem nte Jehovah ọdọhọde ẹsisịn idemmọ ke mfịna. Kpa ye oro, Jehovah eben̄e idem ndin̄wam mmọ ẹkpụhọde.

11. Siak mme n̄kpọ emi Jehovah asuade.

¹¹ Kpep ndisua se Jehovah asuade. (Ps. 97:10) Bible ọdọhọ ke Jehovah asasua ‘enyịn ntan̄idem, edeme nsu, ye ubọk eke ọduọkde iyịp eke mîduehe.’ (N̄ke 6:​16, 17) Enye onyụn̄ “asasua ọduọkiyịp ye owo abian̄a.” (Ps. 5:6) Jehovah ndinen̄ede nsua mme n̄kpọ emi akanam enye osobo kpukpru ndiọi owo  ke eyo Noah sia mmọ ẹma ẹnam afai ọyọhọ isọn̄. (Gen. 6:13) Se Jehovah ọkọdọhọde prọfet Malachi anam ikụt n̄kpọ en̄wen emi enye asuade, oro edi, ke Enye asasua mbon emi ẹdade n̄kari ẹdian̄ade ndọ mmọ. Jehovah inyịmeke se mmọ ẹnamde ẹnọ enye, oyonyụn̄ ekpe ikpe ọnọ mmọ.​​—Mal. 2:​13-16; Heb. 13:4.

12. Ọwọrọ nso ndinen̄ede nsua se idiọkde?

¹² Jehovah oyom nnyịn inen̄ede ‘isua se idiọkde.’ (Rome 12:9) Ndidọhọ ke owo enen̄ede asua n̄kpọ ọwọrọ ke owo iyomke-yom ndikụt n̄kpọ oro ke enyịn, ke n̄kpọ oro etetek enye esịt. Nso ke akpanam edieke ẹnyande udia emi ama akabiara ama ẹnọ fi ẹte adia? Ndikekere utọ n̄kpọ oro ekeme nditek fi esịt. Ukem ntre n̄ko, ndikekere ndinam n̄kpọ emi Jehovah ọdọhọde ke ifọnke akpana etek nnyịn esịt.

13. Ntak emi anade ikpeme se ikerede-e?

¹³ Kpeme se afo ekerede. Se isikerede ke isinam. Oro akanam Jesus ọdọhọ nnyịn ikûkere mme n̄kpọ emi ẹkemede ndinam nnyịn ikanam akwa idiọkn̄kpọ. (Matt. 5:​21, 22, 28, 29) Kpukpru nnyịn iyom ndinam esịt enem Ete nnyịn ke heaven. Ke ntre, enen̄ede ọfọn yak isisọsọp isio idiọk ekikere ekededi emi odụkde nnyịn esịt ifep!

14. Se isitịn̄de esiwụt nso? Mme mbụme ewe ke ikpọbọrọ?

¹⁴ Kpeme se afo etịn̄de. Jesus ọkọdọhọ ke “mme n̄kpọ emi ẹwọrọde owo ke inua ẹto esịt ẹn̄wọn̄ọ.” (Matt. 15:18) Akpanikọ edi oro. Se nnyịn isitịn̄de esinam ẹdiọn̄ọ utọ owo emi nnyịn idide. Ke ntre bụp idemfo ete: ‘Ndi mmesitre ndisu nsu ekpededi mmọn̄ ndụk mfịna edieke ntịn̄de akpanikọ? Ekpedi mmọdọ ebe m̀mê n̄wan, ndi mmenen̄ede n̄kpeme mbak ndimen mbre emi n̄kpebrede ye ebe m̀mê n̄wan mi n̄kebre ye owo en̄wen? Ndi mmọsọn oburobụt ikọ ukem nte n̄kpọsọnde udọn̄ọ emi ekemede ndibe owo? Ndi mmesitịn̄ ikọ sụn̄sụn̄ ini ẹnamde se iyatde mi?’ Ọyọfọn etieti edieke etịmde etie ekere mme mbụme emi. Ndikpahade n̄kpaha ọfọn̄ esinam emem utom ndision̄o ọfọn̄. Ukem ntre, nditre ndisitọk owo, nsu nsu, nnyụn̄ ntịn̄ oburobụt ikọ ayanam emem fi utom ndisio akani owo nduọk.

15. Ọwọrọ nso ndikọn̄ akani owo emi nnyịn ikedide ‘ndian ke eto’?

¹⁵ Ben̄e idem ndinam se ededi emi anade  anam man osio akani owo ọduọk. Apostle Paul ama ọnọ ata eti uwụtn̄kpọ emi anamde ikụt ke nnyịn ndikpụhọde uwem nnyịn idịghe n̄kpọ mbubru. Enye ekewet ete ke ana ikọn̄ akani owo emi nnyịn ikedide ‘idian ke eto.’ (Rome 6:6) Ikọ esie ọkọwọrọ ke ana ikpebe Christ. Jesus ama enyịme yak ẹkọn̄ imọ ke eto ndutụhọ man esịt enem Jehovah. Ukem ntre n̄ko, edieke iyomde ndinam esịt enem Jehovah, ana iben̄e idem nditre n̄kpọ ekededi emi Jehovah asuade. Nnyịn mînamke ntre, esịt nnyịn idisanake, nnyịn idinyụn̄ ikemeke ndidu uwem ke nsinsi. (John 17:3; 1 Pet. 3:21) Ti ke Jehovah idikpụhọke nte enye ọdọhọde idu uwem man esịt enem nnyịn. Utu ke oro, nnyịn inyene ndikpụhọde n̄kpọ ke uwem nnyịn man ekekem ye nte Jehovah ọdọhọde idu uwem.​​—Isa. 1:​16-18; 55:9.

16. Ntak emi anade ebiere ke ayaka iso an̄wana man osio akani owo ọduọk-ọ?

¹⁶ Ka iso ndin̄wana man etre ndiọi n̄kpọ. Idem ke ama akana baptism, ana aka iso an̄wana mbak udûnam mme ubọkutom obụkidem. Yak idọhọ fi n̄kpọ iban̄a ete kiet emi ekerede Maurício. Ini enye ekedide akparawa, enye ama ọtọn̄ọ ndisidan̄ ye irenowo nte enye. Edi ekem ko, enye ama okụt Mme Ntiense Jehovah onyụn̄ ọtọn̄ọ ndikpep Bible. Ke enye ama okokpụhọde uwem esie, enye ama ana baptism ke 2002. Kpa ye emi enye ama akanam n̄kpọ Jehovah ke ediwak isua, enye ọdọhọ ke enyene mme ini emi ndiọi n̄kpọ ẹsidụkde imọ ekikere tutu imọ in̄wana etieti mbak imọ ikûnam ndiọi n̄kpọ oro. Edi enye iyakke idem emem enye. Utu ke oro, enye ọdọhọ ete: “Esịt enem mi ndifiọk ke Jehovah oyokop inemesịt edieke nsọn̄ọde nda ntre ndiọi uwem oro.” *

17. Nso ke Nabiha etịn̄ emi ọsọn̄ọde fi idem?

¹⁷ Bọn̄ akam dọhọ Jehovah an̄wam fi, nyụn̄ beri edem ke spirit esie, kûberi ke ukeme fo. (Gal. 5:22; Phil. 4:6) Ana inen̄ede isịn ukeme edieke iyomde nditre ndiọi uwem, mînyụn̄ iyomke ndifiak n̄kanam mmọ. Ete eyenan̄wan kiet emi ekerede Nabiha ama ọkpọn̄ mmọ ini enye edide eyen isua itiokiet. Enye ọdọhọ ke n̄kpọ oro ama abiak imọ idiọk idiọk. Ekedi nte enye okponde owo aka, ntre ke enye ọdọdiọn̄ edi owo iyatesịt esinyụn̄ oyom ikọ. Enye ama ọtọn̄ọ ndinyam n̄kpọsọn̄  ibọk. Ẹma ẹmụm enye ẹnyụn̄ ẹkọbi enye ke ufan̄ isua ifan̄. Ini Mme Ntiense Jehovah ẹkade ndikwọrọ ikọ ke ufọk-n̄kpọkọbi oro, enye ama ọtọn̄ọ ndikpep Bible. Nabiha ama ọtọn̄ọ ndinen̄ede n̄kpụhọde n̄kpọ ke uwem esie. Enye ọdọhọ ke ‘ikọsọn̄ke imọ nditre ndusụk idiọk uwem emi imọ ikesidude, edi ke ama ọsọn̄ imọ etieti nditre sika.’ Kpa ye oro, enye ama etre ndin̄wọn̄ sika ke enye ama eketịme ke se ibede ufan̄ isua kiet. Nso ikan̄wam enye yak etre? Enye ọdọhọ ete: “Akakan n̄kpọ emi akan̄wamde mi edi akam oro n̄kesibọn̄de kpukpru ini n̄kpe Jehovah ubọk nte an̄wam mi.” Idahaemi enye esidọhọ mme owo ete: “Mmenen̄ede nnịm ke edieke owo nte ami okokpụhọrede, ke owo ekededi ekeme ndikpụhọde n̄ko.” *

18. Akpa Corinth 6:​9-11 owụt ke nso ke ediwak ikọt Jehovah ẹnam?

¹⁸ Ke eyo mme apostle, ndusụk mbon emi Jehovah ekemekde yak ẹketiene Jesus ẹkara ke heaven ẹma ẹsinam ata ndiọi n̄kpọ. Ke uwụtn̄kpọ, ndusụk mmọ ẹma ẹsisịn efịbe, ẹyịp inọ, irenowo ẹdan̄ ye irenowo, iban ẹnyụn̄ ẹdan̄ ye iban. Edi edisana spirit Abasi ama an̄wam mmọ yak ẹkpụhọde. (Kot 1 Corinth 6:​9-11.) Mfịn n̄ko, Bible an̄wam ediwak miliọn mme owo yak ẹkpụhọde uwem mmọ. * Mmọ ẹma ẹtre ndiọi n̄kpọ emi ẹkenen̄erede ẹsọn̄ mmọ nditre. Mbụk mmọ owụt ke afo n̄ko emekeme nditre nditie nte ekesitiede onyụn̄ etre ndiọi n̄kpọ man odot ndina baptism.

19. Nso ke idineme ke ibuotikọ emi etienede?

¹⁹ Ana mbon emi ẹyomde ndina baptism ẹsịn ukeme man ẹsio akani owo ẹduọk. Edi ana mmọ ẹsịn ukeme n̄ko man ẹmen obufa owo ẹsịne. Ibuotikọ emi etienede ayanam ikụt nte ikemede ndinam oro ye nte mbon en̄wen ẹkemede ndin̄wam nnyịn.