OBHEASACHO LEKH 10
Tumi Tumcho ‘Porno Sobhav Soddun Diunk Zata’
‘Tumchem pornem patki soimb ani tacheo chali soddun diat.’—KOL. 3:9.
GIT 29 Living Up to Our Name
KITEM XIKTOLIM *
1. Jehovachea Sakxeam sangata Bible xikchea poilim tumchem jivit koxem aslem?
JEHOVACHEA Sakxeam sangata Bible xikchea poilim tumchem jivit koxem aslem? Amchea modlea choddxea zannank ghoddie tea vixim ugddas pasun korunk naka astolem. Karonn chodd korun amchi vagnnuk ani chintop ghoddie sonvsarachea lokam bhaxen aslem astolem. Mhunnche, borem ani vaitt kitem tem ami tanchea dorjeam pormonnem tharaitalim astolim. Taka lagon ‘bhorvonso ani Devui nastana hea sonvsarant ami jietalim.’ (Ef. 2:12) Punn Bible xiklolean amchem akʼkhem jivit bodolʼlem!
2. Tumi Bible xikonk laglim tednam tumkam kitem kollon ailem?
2 Tumi Bible xikonk laglim tednam tumkam ek sorgincho Bap asa ani to tumcho khub mog korta mhunn tumkam kollon ailem. Toxench, taka khuxal korunk ani tachea familicho bhag zaunk, tumi tumchea chintpant, sobhavant ani vagnnukent bodlav korunk zai mhunn tumkam kollon ailem. Karonn hea fuddem borem ani vaitt kitem, tem tachea dorjeam pormonnem tharaunk zai mhunn tumi xiklim.—Ef. 5:3-5.
3. Koloskarank 3:9, 10 pormonnem ami kitem kelolem Jehovak zai, ani hea lekhant ami kitem polloitolim?
3 Jehova Dev amcho Rochnnar ani sorgincho Bap zaun asa dekhun, tachea familint ami koxem jieunk zai tem fokot toch tharaunk xokta. Ani ami bautizm gheunchea poilim, amchem ‘pornem patki soimb vo sobhav soddun dilolo taka zai.’ * (Koloskarank 3:9, 10 vachat.) Tor hea lekhant bautizm gheunk sodhtat tankam tin prosnanche zobab zannam zaunk mellttole: (1) ‘Pornem patki soimb vo sobhav’ mhunnttlear kitem? (2) Ami to soddun dilʼlo Jehovak kiteak zai? (3) To soddun diunk ami kitem korunk zai? Toxench, bautizm ghetloleank tannim soddun dilʼlo porno sobhav portun apnnaina zaunk ho lekh modot kortolo.
‘PORNEM PATKI SOIMB VO SOBHAV’ MHUNNTTLEAR KITEM?
4. ‘Pornnem patki soimb vo sobhav’ aslolo munis koso vagta?
4 ‘Pornem patki soimb vo sobhav’ aslolea eka munxachem chintop ani vagnnuk chodd korun chukichi asta. To ghoddie svarthi, rokddoch ragar zata toslo, onupkari ani gorvixtt asonk xokta. Toxench, taka ghoddie burxim chitram ani pozddim vo hinvsen bhorlolim pichʼcheram pollounk avoddtta astolem. Taka ghoddie bore gunn asot, ani apunn korta tea vaitt kamam vixim taka vaitt dista zait. Punn aplem chintop ani vagnnuk bodlunk tacho nichov ghott na astolo.—Gal. 5:19-21; 2 Tim. 3:2-5.
Ami ‘porno sobhav’ soddun ditat tednam ami vaitt chintnank ani sobhavak amcher tabo cholounk dinant (Peregraf 5 polloiat) *
5. Porno sobhav ami purnn toren soddun diunk xoktat kai? Somzaiat. (Itihas 3:19)
5 Ami soglim opurnn. Tor amchea kallzant ani monant aslolim vaitt chintnam ani anvdde ami purnn toren kaddun uddounk xokonant. Hea pasot, thodde pavtti ami amchea utramnim ani kornneamnim chuktat ani hea vixim amkam uprant vaitt dista. (Jer. 17:9; Jak. 3:2) Punn porno sobhav soddun divop hacho orth, ami patki soimbachea chintnank ani anvddeank amcher tabo cholounk dinant. Hea toren ami bodlun novim munxam zatat.—Iz. 55:7; Itihas 3:19 vachat.
6. Ami porno sobhav pois kelʼlo Jehovak kiteak zai?
6 Tor ami porno sobhav pois kelʼlo Jehovak kiteak zai? Karonn to amcho khub mog korta ani ami khuxal aslolim taka zai. (Iz. 48:17, 18) Toxench, ami him vaitt kamam kortat tednam ami amkanch ani amchea bhonvtonnim asloleank pasun dukhoitolim mhunn to zannam. Ani hem polloun taka khub dukh zata.
7. Romkarank 12:1, 2-a pormonnem ami kitem vinchun kaddunk zata?
7 Punn porno sobhav ami soddun ditat tem polloun amchim thoddim ixttam vo familichim ghoddie amchim fokannam korunk xoktat. (1 Ped. 4:3, 4) Karonn tankam disot ki Devachea dorjeam pormonnem jienastana, amkam zai toxem jietat zalear amkam svotontrtai melltta. Punn khorem mhunnttlear, ami pornea sobhava pormonnem jietat zalear ami Soitan choloita tea sonvsarachea tabeant ietat ani amkam svotontrtai mellona. (Romkarank 12:1, 2 vachat.) Tor ami amkanch vicharunk zai: ‘Ami pornea sobhava pormonnem jieun hea sonvsarachea ani patkachea tabeant jieunk sodhtat vo Jehovachi modot gheun amcho sobhav bodlun ami borim munxam zaunk sodhtat?’—Iz. 64:8.
TUMCHO PORNO SOBHAV TUMI KOSO ‘SODDUN DIUNK’ ZATA?
8. Amcho porno sobhav soddun diunk Jehova amkam koxi modot korta?
8 Tumcho porno sobhav soddun diunk tumkam vell lagtolo ani zaito vavr korcho poddttolo mhunn Jehova zannam. (St. 103:13, 14) Hea pasot to tumkam aplem Utor, povitr xokti ani songottnne udexim goroz ti zannvai, ghottai ani tenko dita. Tor Jehovachi hi modot tumi ghetat astolim. Punn tumcho porno sobhav soddun diun, bautizm gheunk toiar zaunk tumi kitem korunk zata tem atam polloum-ia.
9. Devachea Utrantlean tumkam koxi modot mellonk xokta?
9 Bible uzar korun tumchich choukoxi korat. Devachem Utor eka arxea bhaxen amchem chintop, ulovop ani vagnnuke vixim choukoxi korunk amkam modot korunk xokta. (Jak. 1:22-25) Toxench, amcho Bible xikoupi vo her onubhov aslolim bhav-bhoinnam amkam modot korunk xoktat. Udharonnak, amche bore gunn ani oskotai-o kitem tem zannam zaunk tim Bible-antlim thoddim versam dakhounk xoktat. Ani amkam asloleo vaitt sonvoim-o pois korunk amkam boro solʼlo khoim mellonk xokta tem tim amkam dakhounk xoktat. Tea bhair, Jehova amchem kalliz zannam. Tea pasot to amkam ekdom bore toren modot korunk xokta. Ani oxem korunk to sodanch toiar asa. (Mho. 14:10; 15:11) Tor dor disak, tache lagim magnnem korop ani Bible vachop kednanch soddun dium nakat.
10. Elie-chea onubhovantlean tumi kitem xiklim?
10 Jehovachea dorjeam pormonnem jievop sogleam-von faideachem mhunn khatri korun gheiat. Pornea sobhava pormonnem jielear, ami patki soimbachim kamam adartat ani tacho vaitt porinnam amkam bhogcho poddtta. Punn Jehovachea dorjeam pormonnem jielear amcho resped ami hogddaunchimnant, amchea jivitant ek udʼdhex astolo ani amkam khori khuxalkai mellttoli. (St. 19:7-11) Hem zannam zaunk Elie-chea jivitant kitem ghoddlem tem polloum-ia. Elie-chim avoi-bapui Jehovachim Sakxi aslim. Elie vhodd zalo toso tannem vaitt sangati vinchun kaddle. Taka lagon to drugs gheunk laglo, onoitik jivit jieunk laglo ani chori korunk laglo. To mhunntta, “Eka Kristanvan korunk zainaslem tem soglem hanvem kelem.” Hacho porinnam kitem zalo? To chodd ani chodd ragixtt zalo ani sodanch zhogddim korunk fuddem sortalo. Punn Elie lhan astana tachea avoi-bapain taka kitem xikoilolem tem to kednanch visronk na. Tor to porot Bible xikonk laglo ani apleo vaitt sonvoim-o soddun, 2000 hea vorsak tannem bautizm ghetlo. Tor atam tachem jivit koxem asa? Elie sangta: “Mhaka monachi xanti ani ek nitoll ontoskornn asa.” * Tor Elie-chea udharonnantlean amkam kollon ieta ki Jehovache dorje ami nakartat zalear ami amkanch dukhoitat. Punn amchi vatt bodlunk ami toiar asat zalear Jehova amkam modot korta. Ani to sangta tem soglem kortat tednam amkam khub faido zata.
11. Jehova kiteacho dves korta?
11 Jehova dves korta tacho dves korat. (St. 97:10) Jehova kiteacho dves korta? Bible sangta ki Jehova “ek gorvixtt nodor, ek fottkiri jib, ani niropradhi rogot varovpi hat,” hancho dves korta. (Mho. 6:16, 17) Toxench, ‘rogtak tanelʼlea ani lottik munxancho Jehovak kanttallo ieta.’ (St. 5:6) Ani heach karonnak lagon tannem Noahchea disamnim aslolea noxttea lokancho nas korun uddoilo. (Ut. 6:13) Tea bhair, Jehova oslea munxancho dves korta jim aplea kazari sangateacho ghat korun tankam divors ditat. Hea vixim tannem Malaki provadea udexim sanglolem ki oslea munxanchi bhokti to nakarta ani tanchea vagnnuke pasot to tancho hixob ghetolo.—Mal. 2:13-16; Heb. 13:4.
Kuslolem kitem-i khaunchea vixim chintlearuch amkam vitt ieta teach bhaxen Jehova dves korta tem korchea vixim chintlearuch amkam vitt ieunk zai (Peregraf 11-12 polloiat)
12. ‘Vaittacho dves korop’ mhunnttlear kitem?
12 Ami ‘vaittacho dves kelʼlo’ Jehovak zai. (Rom. 12:9) “Dves” hea utracho orth, ek vost sarkich nakarop vo tachi vitt ievop. Konnui tumkam kuslolem jevonn jevunk laita mhunn chintat. Tea vixim chintunuch tumkam vitt ietoli nhoi? Teach bhaxen, Jehova dves korta tea vostum vixim chintlearuch amkam vitt ieunk zai.
13. Vaitt chintop nakarop kiteak gorjechem?
13 Vaitt vostum vixim chintinakat. Ami jem kitem chintʼtat tench ami chodd korun korunk pavtat. Ani teach pasot Jezun, amkam gombhir patkant ghaltat toslim chintnam nakarunk xikoilem. (Mt. 5:21, 22, 28, 29) Ami Jehovak khuxal korunk axetat dekhun amchea monant ietat tim vaitt chitnam rokddinch nakarop khub gorjechem!
14. Amchea uloupantlean kitem kollon ieta, ani ami amkanch kosle prosn vicharunk zai?
14 Tumchea uloupacher tabo dovrat. Jezun mhunnttlem: “Jem tonddantlem bhair sorta tem kallzant thaun ieta.” (Mt. 15:18) Khorench, amchea uloupantlean ami khoreanich koslim munxam tem kollon ieta. Tor ami amkanch osle prosn vicharunk zai: ‘Hanv sot uloilear trasant poddttolom mhunn hanv zannam zalear pasun, hanv sot uloita kai? Hanv kazari zalear, dusream sangata mirop vo flirt korop hanv nakarta kai? Hanv pozddem ulovop sarkench pois korta kai? Dusrim mhaka rag haddttat tea ritin uloilear pasun, hanv tankam bore toren zobab dita kai?’ Hea prosnancher niall kelolean tumi koslim munxam tem zannam zaunk tumkam modot zatoli. Vaitt ulovop, ami nheslolea kopddeanchea button-ank sor korunk zata. Ami button kaddlear te kopdde kaddunk sompem zata. Teach bhaxen, ami fotti marop, gallio marop, pozddem ulovop bond kelem zalear amcho porno sobhav kaddunk pasun amkam sompem zatolem.
15. Amchea adlea-pornea soimbak ‘khambear khillavop’ mhunnche kitem?
15 Bodlav korunk pavl gheiat. Bodlav korop kitlem gorjechem tem somzaunk apostl Paulun ek borem udharonn dilem. Tannem mhunnttlem: “Amchea adlea-pornea soimbak khambear khillailem.” (Rom 6:6, NW) Jehovak manvota tem korunk Jezu moronk toiar aslo. Teach bhaxen, ami pasun taka manvota tem korunk amchem vaitt chintop ani sobhav marun uddounk toiar asonk zai. Ami oxem kelem zalear amkam ek nitoll ontoskornn astolem ani fuddarak sasnachem jivit mellttolem. (Juanv 17:3; 1 Ped. 3:21) Ami hem ugddas dovrunk zai: Amkam khuxal korunk Jehova aple dorje bodolchona. Punn taka manvota tem korunk ami amchem chintop bodlop gorjechem.—Iz. 1:16-18; 55:9.
16. Vaitt anvdde pois korit ravonk ami kiteak ghott nichov korunk zai?
16 Vaitt anvdde pois korit ravat. Bautizm ghetlea uprant pasun amkam vaitt anvdde pois korit ravonk poddttole. Hem amkam Maurício-chea onubhovantlean kollon ieta. To tornatto aslo tednam to dadleam sangata onoitik sombond dovortalo. Uprant to Jehovachea Sakxeam sangata Bible obheas korunk laglo. Tannem aplea jivitant bodlav kelo ani 2002-ant tannem bautizm ghetlo. To zaitea vorsam thaun Jehovachi seva korta. Tori astana, to oso mhunntta: “Thodde pavtti mhojea monant vaitt anvdde ietat ani te pois korunk mhaka vavrit ravchem poddtta.” Punn to niraxi zaina. To sangta: “Vaitt anvdde pois kelolean hanv Jehovak khuxal korta hem zannam zaun mhaka dhir melltta.” *
17. Nabiha-chea udharonnantlean tumkam kitem urba melltta?
17 Svotacher patieunchea bodlek, Jehova lagim magnnem korun tachi povitr xokti magat. (Gal. 5:22; Filp. 4:6) Ami amcho porno sobhav kaddun uddounk ani to porot iena zaunk khub vavr korchi goroz asa. Hea vixim ami Nabiha-cho onubhov polloum-ia. Tem sov vorsanchem aslem tednam tacho bapui taka soddun gelo. “Tea vellar hanv sarkench tuttlem,” oxem tem sangta. Ani uprant tem vaddlem toxem, tem ekdom ragixtt zalem. Tem drugs-ancho dhondo korunk laglem ani hea pasot pulisamnim taka dhorlem ani thoddim vorsam taka jail-int sarunk poddlim. Jail-int astana Jehovachea Sakxeamnim taka bhett dili tednam tem tanchea sangata Bible obheas korunk laglem, ani aplea jivitant vhodd bodlav korunk laglem. Nabiha sangta: “Thoddeo vaitt sonvoim-o soddunk mhaka sompem aslem. Punn sigrett soddunk ekdom kotthin zalem.” Sigrett soddunk taka ek vorsa poros chodd vell laglo. Punn hem tem koxem korunk pavlem tea vixim Nabiha sangta, “Hanv soddun dinastana Jehova lagim magnnem korit ravlem.” Tor tem atam herank sangta: “Jehovak khuxal korunk hanv mhojea jivitant bodlav korunk xoklem zalear, konnem-i korunk zata mhunn mhaka khatri asa.” *
TUMI BAUTIZM GHEUNK PURTIM ZAUNK XOKTAT!
18. 1 Korintkarank 6:9-11 pormonnem, aiz Jehovachi seva korpi zaitim bhav-bhoinnam kitem korunk pavleant?
18 Poilea xekddeantlim thoddim bhav-bhoinnam sot xikchea poilim khub vaitt kamam kortalim. Zoxem, tim pordvari, apleach lingachea munxam kodde pozoddponn korpi ani chorio korpi munxam zaun aslim. Punn Jehovachea povitr xoktechea modotin tim apleo heo vaitt sonvoim-o soddun diunk pavlim. (1 Korintkarank 6:9-11 vachat.) Ani uprant, Jehovan tankam Jezu Krista sangata sorgar raj cholounk vinchun kaddlim. Teach bhaxen, aiz zaitea lokank poilim khub vaitt sonvoim-o asleo. Punn Bible xikonk laglea uprant, lakʼkhamnim lok aplem jivit bodlunk pavle. * Ani tankam soddun diunk khub kotthin asleo teo sonvoim-o pasun tim soddunk pavlim. Tor tim oxem korunk xoktat zalear, tumi-i tumchea jivitant bodlav korun ani vaitt sonvoim-o soddun diun, bautizm gheunk purtim zaunk xoktat.
19. Ami fuddlea lekhant kitem polloitolim?
19 Porno sobhav soddun dilearuch puro nhoi. Punn bautizm gheunk sodhtat tannim novo sobhav pasun apnnaunk zai. Tor hem ami koxem korunk zata ani oxem korunk dusreamnim amkam koxi modot korunk zata tem ami fuddlea lekhant polloitolim.
GIT 41 Please Hear My Prayer
^ per. 5 Ami bautizm gheunk sodhtat zalear ami amchea sobhavant bodol korunk zai. Tor hea lekhant, pornem patki soimb vo sobhav mhunnttlear kitem, ami to kiteak soddun diunk zai ani hem ami koxem korunk zata tem ami polloitolim. Ani fuddlea lekhant, bautizm ghetlea uprant pasun, novea munxacho akar vo sobhav ami koso apnnait ravonk zata tem ami xiktolim.
^ per. 3 UTRACHI SOMZONNI: ‘Pornem patki soimb soddun divop’ mhunnche, Jehovak manvona toslo sobhav ani anvdde soddun divop. Hem bautizm gheunchea poilim korunk zai.—Ef. 4:22.
^ per. 10 Anik zannam zaunk Abril 1, 2012-chea Pahrogupur masikent aslolo, “The Bible Changes Lives—‘I Needed to Return to Jehovah,’” (Inglez bhaxen) ho lekh polloiat.
^ per. 16 Anik zannam zaunk May 1, 2012-chea Pahrogupur masikent aslolo, “The Bible Changes Lives—‘They Were Very Kind to Me,’” (Inglez bhaxen) ho lekh polloiat.
^ per. 17 Anik zannam zaunk Otumbr 1, 2012-chea Pahrogupur masikent aslolo, “The Bible Changes Lives—‘I Became an Angry, Aggressive Young Woman,’” (Inglez bhaxen) ho lekh polloiat.
^ per. 18 “ Bible Jivit Bodolta” hem boks polloiat.
^ per. 64 CHITRACHI MAHITI: Ami porne kopdde kaddun uddoitat tea bhaxen vaitt chintnam ani sobhav ami kaddun uddounk zai.
