1. Ania idi ti biagmo sakbay a nagadalka iti Biblia?

 ANIA idi ti biagmo sakbay a nakipagadalka iti Biblia kadagiti Saksi ni Jehova? Saan a kayat a lagipen dayta ti adu kadatayo. Ti kababalin ken personalidadtayo ket posible nga im-impluensiaan idi dagiti prinsipio daytoy sistema ti bambanag​—dagiti umiso ken di umiso nga ibagbaga ti lubong. ‘Agbibiagtayo idi iti lubong nga awanan iti namnama ken awanan iti Dios.’ (Efe. 2:12) Ngem nagbalbaliw ti biagtayo idi nagadaltayo iti Biblia!

2. Ania ti naammuam idi agad-adalkan iti Biblia?

² Idi agad-adalkan iti Biblia, naammuam nga adda nailangitan nga Amam a mangay-ayat unay kenka. Naamirismo a tapno maparagsakmo ni Jehova ken agbalinka a paset ti pamilia dagiti agdaydayaw kenkuana, masapul a dakkel ti balbaliwam iti estilo ti panagbiagmo, kababalinmo, ken panagpampanunotmo. Masapul a sursuruem nga aramiden dagiti ibagbaga ni Jehova nga umiso ken saanmo nga ar-aramiden dagiti ibilangna a di umiso.​—Efe. 5:3-5.

3. Sigun iti Colosas 3:9, 10, ania ti kayat ni Jehova nga aramidentayo, ken ania dagiti pagsasaritaantayo iti daytoy nga artikulo?

³ Ti Namarsua kadatayo ken ti nailangitan nga Amatayo a ni Jehova kalinteganna nga ikeddeng no kasano ti masapul a panagtigtignay dagiti miembro ti pamiliana. Ken kidkiddawenna a sakbay nga agpabautisartayo, ikagumaantayo nga ‘uksoben ti daan a personalidad agraman dagiti aramidna.’ * (Basaen ti Colosas 3:9, 10.) Makatulong daytoy nga artikulo kadagidiay kayatda ti agpabautisar tapno masungbatanda dagitoy tallo a saludsod: (1) Ania “ti daan a personalidad”? (2) Apay nga imbilin ni Jehova nga uksobentayo dayta? (3) Kasanotayo nga aramiden  dayta? Kadatayo metten a nabautisaran, makatulong daytoy a panagadal tapno malapdantayo ti panagsubli ti daan a personalidad.

4. Ania dagiti ar-aramiden ti maysa a tao a ‘daan ti personalidadna’?

⁴ Ti tao a ‘daan ti personalidadna’ ket kaaduanna nga agpanunot ken agtignay iti pamay-an nga agresulta iti basol. Mabalin a ti la bagina ti pampanunotenna, nalaka nga agpungtot, saan a managyaman, ken napannakkel. Baka kaykayatna ti agbuya iti pornograpia, agraman kadagiti immoral wenno naranggas a pabuya. Adda met ketdi dagiti nasayaat a kualidadna, ken mabalin a makonsiensia kadagiti dakes nga ibagbaga wenno ar-aramidenna. Ngem kurang ti determinasionna a mangbalbaliw iti panagpampanunot ken kababalinna.​—Gal. 5:19-21; 2 Tim. 3:2-5.

5. Interamente kadi a mauksobtayo ti daan a personalidad? Ilawlawag. (Aramid 3:19)

⁵ Saantayo a perpekto, isu nga awan kadatayo ti interamente a makaikkat iti amin a dakes a panagpampanunot ken tarigagay ti puso ken isiptayo. No dadduma, adda maaramid wenno maibagatayo a pagbabawyantayto. (Jer. 17:9; Sant. 3:2) Ngem no uksobentayo ti daan a personalidad, maisardengtayo dagiti kababalin ken ar-aramid nga agresulta iti basol. Nagbalbaliwen ti personalidadtayo.​—Isa. 55:7; basaen ti Aramid 3:19.

6. Apay nga imbilin ni Jehova nga ikkatentayo dagiti di umiso a panagpampanunot ken isardengtayo dagiti dakes nga aramid ti daan a personalidad?

⁶ Ay-ayatennatayo unay ni Jehova ken kayatna a naragsak ti biagtayo isu nga imbilinna nga ikkatentayo dagiti di umiso a panagpampanunot ken isardengtayo dagiti dakes nga aramid. (Isa. 48:17, 18) Ammona a dagidiay timmulok kadagiti dakes a tarigagay saksaktanda ti bagida ken ti dadduma. Masaksaktan ni Jehova no makitkitanatayo a saksaktantayo ti bagitayo ken ti sabsabali.

7. Sigun iti Roma 12:1, 2, ania dagiti pagpiliantayo?

⁷ Iti damo, mabalin nga uyawendatayo ti dadduma a gagayyem ken kapamiliatayo ta ikagkagumaantayo a balbaliwan ti personalidadtayo. (1 Ped. 4:3, 4) Mabalin nga ibagada nga adda kalintegantayo a mangaramid iti aniaman a kayattayo ken ditay ipalubos a ti dadduma ti mangdiktar iti aramidentayo. Ngem awan a talaga  ti wayawaya dagidiay saan a mangsursurot kadagiti pagalagadan ni Jehova. Kinaagpaysuanna, agpapaimpluensiada ketdi iti lubong nga iturturayan ni Satanas. (Basaen ti Roma 12:1, 2.) Masapul nga agpili ti tunggal maysa kadatayo: Pagtalinaedentayo ti daan a personalidadtayo, nga im-impluensiaan ti basol ken lubong ni Satanas, wenno ipalubostayo a pormaennatayo ni Jehova iti kasayaatan a tao a mabalintayo ita a pagbalinan.​—Isa. 64:8.

8. Ania ti makatulong tapno maikkattayo dagiti di umiso a panagpampanunot ken maisardengtayo dagiti dakes nga aramid?

⁸ Ammo ni Jehova a tiempo ken panagporsegi ti kasapulan tapno maikkattayo dagiti di umiso a panagpampanunot ken maisardengtayo dagiti dakes nga aramid. (Sal. 103:13, 14) Ngem babaen ti Sao ni Jehova, ti espirituna, ken ti organisasionna, maipaayannatayo iti sirib, bileg, ken tulong a kasapulantayo tapno mabalbaliwan ti kinataotayo. Sigurado a tultulongannakan. Kitaentayo itan ti dadduma a mabalinmo nga aramiden tapno maitultuloymo nga uksoben ti daan a personalidad ken makualipikarka nga agpabautisar.

9. Iti tulong ti Sao ti Dios, ania ti maaramidmo?

⁹ Usarem ti Biblia tapno masukimatmo a naimbag ti bagim. Ti Sao ti Dios ket kas iti sarming; matulongannaka a manganalisar iti panagpampanunotmo, panagsasaom, ken panagtigtignaymo. (Sant. 1:22-25) Mabalin a balakadandaka ti mangyad-adal kenka iti Biblia ken ti dadduma a Kristiano a nataengan iti naespirituan. Kas pagarigan, mabalin nga usarenda ti Biblia tapno matulongandaka a mangkita kadagiti paglaingam ken pagkapuyam. Maisurodaka no kasano ti agbirok kadagiti naibatay-Biblia nga impormasion a naglaon kadagiti makatulong a balakad no kasano a maisardeng dagiti dakes nga aramid. Ken kanayon a sisasagana ni Jehova a tumulong kenka. Isu ti kasayaatan a tumulong kenka ta ammona ti linaon ti pusom. (Prov. 14:10; 15:11) Isu nga iyugalim ti agkararag kenkuana ken inaldaw nga adalem ti Saona.

10. Ania ti nasursurom iti kapadasan ni Elie?

¹⁰ Kombinsidoka koma a dagiti pagalagadan ni Jehova ti kasayaatan. Pagsayaatantayo ti amin nga ipapaaramid kadatayo ni Jehova. Dagidiay mangsursurot kadagiti pagalagadanna adda respetoda iti bagida, adda direksion ti biagda, ken pudpudno a naragsakda. (Sal. 19:7-11) Ngem dagidiay saan a mangsursurot kadagiti pagalagadan ni Jehova, apitenda dagiti dakes nga epekto dagiti aramid ti lasag. Kitaentayo ti imbaga ti maysa a lalaki nga agnagan iti Elie maipapan iti saan a panangsurot kadagiti pagalagadan ti Dios. Pinadakkel dagiti nagannakna a mangay-ayat ken Jehova. Ngem idi tin-edyeren ni Elie, nakibarkada kadagiti dakes a kakadua. Nangrugi nga agdroga, nagbiag nga immoral, ken nagtakaw. Imbaga ni Elie a nagbalin isuna a managpungpungtot ken naranggas. Inaminna: “Kinapudnona, sinukirko amin a Nakristianuan a prinsipio a naisuro kaniak.” Ngem saan a nalipatan ni Elie dagiti naisuro kenkuana idi ubing pay. Idi agangay, nagadal manen iti Biblia. Inkagumaanna nga isardeng dagiti dakes nga aramidna ket nagpabautisar idi 2000. Kasano a nagsayaatanna ti panangsurotna kadagiti pagalagadan ni Jehova? Imbaga ni Elie: “Natalna itan ti panunotko ken nadalus ti konsiensiak.” * Kas ipakita daytoy a kapadasan, dagidiay saan a mangsurot kadagiti pagalagadan ni Jehova saksaktanda laeng ti bagida. Nupay kasta, nakasagana ni Jehova a tumulong kadakuada nga agbalbaliw.

11. Ania dagiti kagura ni Jehova?

 ¹¹ Sursuruem a guraen dagiti kagura ni Jehova. (Sal. 97:10) Ibaga ti Biblia a kagura ni Jehova dagiti “natangsit a mata, ulbod a dila, ken ima nga agibukbok iti dara ti inosente a tao.” (Prov. 6:16, 17) ‘Kagurana met dagiti naranggas ken manangallilaw a tattao.’ (Sal. 5:6) Kagura unay ni Jehova dagita a kababalin ken ar-aramid isu a dinadaelna ti amin a managdakdakes idi kaaldawan ni Noe gapu ta pinunnoda ti daga iti kinaranggas. (Gen. 6:13) Daytoy pay ti sabali a pagarigan. Impaibaga ni Jehova ken propeta Malakias a kagurana dagidiay nangaramid iti makaallilaw a plano a mangidiborsio kadagiti inosente nga assawada. Saan nga inawat ti Dios ti panagdaydayawda ken ukomenna ida gapu iti ar-aramidenda.​—Mal. 2:13-16; Heb. 13:4.

12. Ania ti kaipapananna no ‘guraentayo ti dakes’?

¹² Kayat ni Jehova a ‘guraentayo ti dakes.’ (Roma 12:9) Ti sao a ‘guraen’ ket nakaro nga emosional a reaksion; kaipapananna ti napalalo a pananggura iti maysa a banag ken pannakarurod iti dayta. Imadyinem ti reaksionmo no adda mangibaga a manganka iti nabangles wenno nalungsot. Pampanunotem pay laeng, makasarsaruakan. Kasta met koma ti masapul a reaksiontayo iti aniaman nga aramid nga ibilang ni Jehova a dakes. Pampanunotentay pay laeng dayta, kaguratayon.

13. Apay a masapul a protektarantayo ti panagpampanunottayo?

¹³ Protektaram ti panagpampanunotmo. Dagiti pampanunotentayo idiktarda dagiti aramidentayo. Dayta ti rason nga insuro ni Jesus nga ikkatentayo iti isiptayo ti aniaman a banag a mangiturong kadatayo a mangaramid iti nakaro a basol. (Mat. 5:21, 22, 28, 29) Kayattayo a paragsaken ti nailangitan nga Amatayo, saan kadi? No ngarud makapanunottayo iti aniaman a dakes, nagpateg a dagus nga ikkatentayo dagita iti isiptayo!

14. Ania ti ipakita ti panagsasaotayo, ken ania dagiti saludsod a masapul a sungbatantayo?

¹⁴ Kontrolem ti panagsasaom. Imbaga ni Jesus: “Ti rummuar iti ngiwat agtaud iti puso.” (Mat. 15:18) Wen, adu ti ipakita ti panagsasaotayo maipapan iti kinataotayo. Isu nga isaludsodmo dagitoy iti bagim: ‘Saanak kadi nga agulbod, uray no agproblemaakto no ibagak ti agpayso? No adda asawak, naannadak kadi tapno saanak nga agalembong wenno ag-flirt iti saanko a kasekso? Interamente kadi a likliklikak ti immoral a panagsasao? No  makapasuron ti makisarsarita kaniak, kalmado kadi latta ti panagsungbatko?’ Makatulong no panunotem a naimbag dagita a saludsod. Ti panagsasaom ket kas kadagiti butones ti bado. No ikkatem dagiti butones, nalaklakam nga uksoben ti bado. Kasta met, no ikagumaam nga isardeng ti agulbod, agraman ti abusado ken immoral a panagsasao, nalaklakam nga uksoben ti daan a personalidad.

15. Ania ti kayatna a sawen no ilansatayo iti “kayo” ti daan a personalidadtayo?

¹⁵ Sisasaganaka koma nga agtignay a dagus. Nagusar ni apostol Pablo iti ilustrasion a mangisuro a nakapatpateg a balbaliwantayo ti estilo ti panagbiagtayo. Insuratna a masapul nga ilansatayo iti “kayo” ti daan a personalidadtayo. (Roma 6:6) Iti sabali a pannao, kayattayo a tuladen ti ulidan ni Kristo. Masapul nga ikkatentayo dagiti kababalin ken aramid a kagura ni Jehova. No aramidentayo dagita, maaddaantayo iti nadalus a konsiensia ken namnama nga agbiag a naragsak iti agnanayon. (Juan 17:3; 1 Ped. 3:21) Laglagipentayo a saan a baliwan ni Jehova dagiti pagalagadanna tapno laeng pagustuannatayo. Imbes ketdi, masapul a balbaliwantayo ti kinataotayo ken sumurottayo kadagiti pagalagadanna.​—Isa. 1:16-18; 55:9.

16. Apay a determinadoka koma nga agtultuloy a manglaban kadagiti pagkapuyam?

¹⁶ Itultuloymo a labanan dagiti pagkapuyam. Uray no nabautisarankan, masapul nga itultuloymo a labanan dagiti di umiso a tarigagaymo. Kitaentayo ti kapadasan ti lalaki nga agnagan Maurício. Idi ubing pay, nagbalinen a homoseksual ti estilo ti panagbiagna. Idi agangay, naam-ammona dagiti Saksi ni Jehova ken nagpayadal iti Biblia. Binalbaliwanna ti biagna, ket nagpabautisar idi 2002. Uray no adu a tawenen nga agserserbi ken Jehova, kinuna ni Maurício: “Aklonek a no dadduma masapul a labanak dagiti di umiso a tarigagayko.” Ngem dina ipalpalubos a kumapuy ti determinasionna. Imbagana: “Ammok a no diak tumulok kadagita a tarigagay, agbalinak a makaay-ayo ken Jehova.” *

17. Ania ti nakaparegtaam iti kapadasan ni Nabiha?

¹⁷ Ikararagmo a tulongannaka ni Jehova, ken agpannurayka iti espirituna, saan nga iti bukodmo a pigsa. (Gal. 5:22; Fil. 4:6) Masapul nga agporsegitayo no kayattayo nga uksoben ti daan a personalidad ken saanen nga isuot dayta. Kitaentayo ti kapadasan ti babai nga agnagan Nabiha. Inabandona ni tatangna idi innem  laeng ti tawenna. “Kasta unay ti leddaangko,” imbagana. Bayat a dumakdakkel ni Nabiha, nagbalin a managpungpungtot ken agresibo. Naglako iti droga, naaresto, ken naibalud iti sumagmamano a tawen. Inyadalan dagiti Saksi a mangaskasaba iti pagbaludan. Rinugian ni Nabiha a balbaliwan ti biagna. “Nalaka laeng a naisardengko ti dadduma a bisiok,” kinunana. “Ngem narigatanak a nangisardeng iti panagsigariliok.” Nasurok a makatawen nga inkarigatan dayta ni Nabiha agingga a naisardengna met laengen dayta. Ania ti inaramidna? Kinunana: “Ti kangrunaan a nakatulong kaniak ket ti masansan a panagkararag ken Jehova.” Ibagbagana itan iti dadduma: “Kombinsidoak a no nakapagbalbaliwak tapno maay-ayok ni Jehova, ammok a kabaelan met ti asinoman!” *

18. Sigun iti 1 Corinto 6:9-11, ania ti nabaelan nga aramiden ti adu nga adipen ti Dios?

¹⁸ Idi umuna a siglo, dadduma a lallaki ken babbai a pinili ni Jehova a makipagturay ken Kristo ket dati nga agar-aramid iti dakes. Kas pagarigan, mannakikamalala, homoseksual, ken mannanakawda. Ngem iti tulong ti nasantuan nga espiritu ti Dios, nabalbaliwanda ti personalidadda. (Basaen ti 1 Corinto 6:9-11.) Ita, minilion a tattao ti natulongan metten ti Biblia a mangbalbaliw iti biagda. * Naikkatda dagiti dakes nga aramid a nagrigat nga isardeng. Paneknekan ti ulidanda a kayam met a balbaliwan ti personalidadmo ken maisardengmo dagiti dakes nga aramid tapno makualipikarka nga agpabautisar.

19. Ania ti adalentayo iti sumaruno nga artikulo?

¹⁹ Malaksid iti panagporsegi a manguksob iti daan a personalidad, dagidiay kayatda ti agpabautisar masapul a pagreggetanda nga isuot ti baro a personalidad. Ilawlawag ti sumaruno nga artikulo no kasanotayo a maaramid dayta ken no kasano a makatulong kadatayo ti dadduma.