1. Onghalamwenyo yoye oya li ya tya ngahelipi, ofimbo ino hovela okukonakona Ombiibeli?

 ONGHALAMWENYO yoye oya li ya tya ngahelipi, ofimbo ino hovela okukonakona Ombiibeli nEendombwedi daJehova? Vahapu vomufye katu hole okudiladila kombinga yaasho. Eholokepo letu nosho yo omaukwatya etu okwa li a nwefwa mo komifikamhango dounyuni ou, di na sha naasho shi li mondjila naasho sha puka. Katwa li tu shii sha shi na sha ‘neudaneko laKalunga nokatwa li tu na eteelelo.’ (Ef. 2:12) Okukonakona Ombiibeli oko kwe tu kwafela tu xwepopale.

2. Oshike wa mona, eshi wa hovela okukonakona Ombiibeli?

² Eshi wa konakona Ombiibeli, owa mona kutya ou na Jehova, oo e li Xo womeulu noku ku hole neenghono. Owa mona kutya opo u mu hafife nou kale oshitukulwa shoukwaneumbo wovapiya vaye, owa pumbwa okuninga elunduluko linene monghalamwenyo yoye, meholokepo nosho yo monghedi yoye yokudiladila. Owe lihonga okuninga osho a ti kutya oshi li mondjila nokuhenuka osho a ti kutya osha puka. — Ef. 5:3-5.

3. Metwokumwe nOvakolossi 3:9, 10, Jehova okwa hala tu ninge shike, noshike hatu ka kundafana moshitukulwa eshi?

³ Jehova oku na oufemba wokutokola nghee oilyo youkwaneumbo waye i na okulihumbata, molwaashi oku li Omushiti naTate yetu womeulu. Okwa teelela tu ninge eenghendabala da mana mo tu ‘lidule omunhu mukulu noilonga yaye,’ ofimbo inatu ninginifwa.” * (Lesha Ovakolossi 3:9, 10.) Oshitukulwa eshi otashi ka kwafela ovo va hala okuningifwa va nyamukule omapulo atatu: (1) “Omunhu mukulu” oshike? (2) Omolwashike Jehova  te tu ladipike tu mu lidule? (3) Ongahelipi hatu dulu okuninga ngaho? Ofimbo ovo twa ninginifwa nale, ohatu ka konakona osho tashi dulu oku tu kwafela tu henuke okushuna komunhu mukulu.

4. Omunhu oo ta pangelwa ‘komunhu mukulu’ oha katuka ngahelipi?

⁴ Omunhu oo ta pangelwa “komunhu mukulu” oha katuka noha diladila pambelela. Okulihole ye mwene, ha handuka diva, ehe na olupandu noku na ounhwa. Otashi dulika nokuli ha tale omafano oipala nosho yo eemuvi odo inadi koshoka, ile da kwatela mo elongifo leenghono. Oha kala e na omaukwatya amwe mawa notashi dulika a kale e udite ondjo omolwoinima ii oyo a popya, ile a ninga. Ashike iha kala e na omukumo wokulundulula okudiladila neenghatu daye. — Gal. 5:19-21; 2 Tim. 3:2-5.

5. Etaleko li li pandjele lilipi twa pumbwa okukala tu na, ngeenge tashi uya pokulidula omunhu mukulu? (Oilonga 3:19)

⁵ Itatu dulu okweefa po filufilu omahalo nomadiladilo mai, oo e li momitima detu notaa ingaana mufye, molwaashi inatu wanenena. Omafimbo amwe, otashi dulika tu popye, ile tu ninge sha osho hatu ke livela ombedi lwanima. (Jer. 17:9; Jak. 3:2) Ndele okulidula omunhu mukulu osha hala okutya itatu pangelwa vali koikala yopambelela noitatu longo vali oilonga ii. Ohatu kala twa yooloka ko filufilu kounhu, oo twa li nale. — Jes. 55:7; lesha Oilonga 3:19.

6. Omolwashike Jehova te tu ladipike tu efe po okudiladila kwa puka neenghedi dii domunhu mukulu?

⁶ Jehova ote tu ladipike tu efe po okudiladila kwa puka neenghedi dii, molwaashi oku tu hole neenghono nokwa hala tu hafele onghalamwenyo. (Jes. 48:17, 18) Oku shii kutya ovo have liyandje komahalo a puka ohave liyahameke vo vene nosho yo vamwe. Ohashi mu yahameke oku tu tala hatu liyahameke fye vene nosho yo vakwetu.

7. Metwokumwe nOvaroma 12:1, 2, ehoololo lilipi tu na?

⁷ Ookaume ketu vamwe nosho yo ovapambele otashi dulika ve tu sheke pehovelo, eshi hatu kendabala okuninga omalunduluko. (1 Pet. 4:3, 4) Otashi dulika va popye kutya otu na oufemba wokuninga osho twa hala noinatu pumbwa okulombwelwa kuvamwe osho tu na okuninga. Ashike ovo inava hala okushikula omafinamhango aJehova inava manguluka. Paushili wo vene, otava efa va nwefwe mo kounyuni ou  waSatana. (Lesha Ovaroma 12:1, 2.) Atusheni otu na okuninga ehoololo. Ohatu dulu okuhoolola okukala twa djala omunhu mukulu, oo ta wilikwa koulunde nosho yo kounyuni waSatana. Ile ohatu dulu okuhoolola tu efe Jehova e tu lundulule tu kale ovanhu vawa, ngaashi tu li paife ngaha. — Jes. 64:8.

8. Oshike tashi tu kwafele tu henuke okudiladila kwa puka nosho yo elihumbato lii?

⁸ Jehova oku shii kutya otashi tu pula efimbo nosho yo eenghendabala, opo tu efe po okudiladila kwa puka nelihumbato lii. (Eps. 103:13, 14) Ashike ohe tu pe ounongo, eenghono nohe tu yambidida. Osho ohe shi ningi okupitila mEendjovo daye, momhepo yaye iyapuki nosho yo mehangano laye. Okwa kala noku tu kwafela okudja monakudiwa. Paife natu ka taleni keenghatu dimwe, odo wa pumbwa okukatuka, opo u ninge exumokomesho u lidule omunhu mukulu nou kale wa wana okuninginifwa.

9. Eendjovo daKalunga otadi dulu oku ku kwafela u ninge shike?

⁹ Longifa Ombiibeli u likonakone nawanawa. Eendjovo daKalunga oda fa esipili. Otadi dulu oku ku kwafela u lundulule okudiladila, okupopya neenghatu doye. (Jak. 1:22-25) Omuhongi woye wOmbiibeli nosho yo Ovakriste va pyokoka otave ke ku kwafela. Pashihopaenenwa, otava dulu okulongifa Ombiibeli, opo ve ku kwafele u mone opo to shi endifa nawa nosho yo opo u na ounghundi. Otave ke ku kwafela nghee to dulu okumona ouyelele wa kanghamena kOmbiibeli u na sha nanghee to dulu okufinda elihumbato lii. Jehova okwe lilongekida alushe oku ku kwafela. Ota dulu oku ku kwafela monghedi ya denga mbada, molwaashi oku shii osho shi li momutima woye. (Omayel. 14:10; 15:11) Onghee hano, kala ho ilikana kuye pandjikilile nokukala ho konakona Eendjovo daye efiku keshe.

10. Oshike we lihonga moshimoniwa shaElie?

¹⁰ Kala wa tomhwa kutya omifikamhango daJehova oda denga mbada. Ohatu mono ouwa, ngeenge hatu ningi keshe osho Jehova e tu lombwela tu ninge. Ovo hava kala metwokumwe nomifikamhango daye ove lifimaneka vo vene, ve na onghalamwenyo i na eityo nova hafa shili. (Eps. 19:7-11) Mepingafano naasho, ovo have lipwililikile omifikamhango daye ohava mono oilanduliko yoilonga yombelela. Didilika osho omulumenhu wedina Elie a popya shi na sha nokulipwililikila omifikamhango daJehova. Okwa tekulwa kovadali ve hole Jehova. Eshi a li peedula dokamukondapweyu, okwa li a hovela okweendafana novanhu va puka. Okwa kala nonghedi yokukalamwenyo inai koshoka, ngaashi okulongifa oingangamifi, okuya moluhaelo nokuvaka. Elie okwa popya kutya okwa enda ta ningi omuhandunhu nomunamapove. Okwa ti: “Pehovelo, onda li handi ningi oinima aishe oyo nda hongwa kutya oya puka okuningwa kOmukriste.” Elie ka li a dimbwa osho a hongwa okudja kounona. Mokweendela ko kwefimbo, okwa li vali a hovela okukonakona Ombiibeli. Okwa longa noudiinini, opo a efe po elihumbato lii nokwa ninginifwa mo 2000. Ouwa ulipi a mona, eshi a kala metwokumwe nomifikamhango daJehova? Okwa ti: “Paife ondi na ombili yopamadiladilo neliudo la koshoka.” * Ngaashi oshimoniwa shaye sha ulika, ovo have lipwililikile omifikamhango daJehova ohave liyahameke vo vene. Ashike nande ongaho, Jehova okwa halelela oku va kwafela va ninge omalunduluko.

11. Oinima ilipi Jehova e tonde?

¹¹ Lihonga okukala u tonde oinima oyo Jehova  e tonde. (Eps. 97:10) Ombiibeli oya popya kutya Jehova oku tonde “omesho elinenepeko, elaka li noipupulu, nomake taa tileshi ohonde ihe netimba.” (Omayel. 6:16, 17) Oku tonde yo “ovadipai novanekonda.” (Eps. 5:6) Jehova oku tonde oikala nosho yo eenghatu da tya ngaho. Okwa li a hanauna po ovakolokoshi vopefimbo laNoa, molwaashi kombada yedu okwa li ku yadi elongifo leenghono. (Gen. 6:13) Diladila vali koshihopaenenwa shimwe. Jehova okwa popya okupitila momuprofeti Malakia kutya oku tonde ovo hava teya ohombo nookaume kavo kopahombo ovo vehe na ondjo. Kalunga ina hokwa onghedi yovanhu ya tya ngaho yoku mu longela note ke va tokola omolweenghatu davo. — Mal. 2:13-16; Heb. 13:4.

12. Osha hala okutya ngahelipi ‘okutonda owii’?

¹² Jehova okwa hala tu ‘tonde owii.’ (Rom. 12:9) Oshitya “tondeni” osha kwatela mo omaliudo omoule, okukala tu yele oshinima shonhumba noku shi nyanyala. Diladila ashike kutya oto kala u udite ngahelipi, ngeenge owa pewa okayaxa ke na oikulya ya ola. Otashi dulika nokuli u kunge, ngeenge to shi diladila. Sha faafana, ngeenge otwa hangwa komadiladilo tu ninge oshinima shonhumba osho Jehova e tonde, otwa pumbwa oku shi nyanyala.

13. Omolwashike tu na okwaamena omadiladilo etu?

¹³ Amena omadiladilo oye. Omadiladilo etu ohaa nwefa mo eenghatu detu. Nomolwaasho Jesus e tu honga tu efe po omadiladilo mai, oo tae tu ningifa tu ye menyono la kwata moiti. (Mat. 5:21, 22, 28, 29) Otwa hala okuhafifa Tate yetu womeulu. Onghee hano, osha fimana okweendelela okweefa po omadiladilo mai, oo taa ingaana mufye.

14. Eendjovo detu ohadi holola shike kombinga yetu, nomapulo elipi twa pumbwa okunyamukula?

¹⁴ Pangela elaka loye. Jesus okwa ti: ‘Keshe osho tashi di mokanya otashi di komutima.’ (Mat. 15:18) Onghee hano, eendjovo detu ohadi holola osho shi li momitima detu. Otwa pumbwa okulipula omapulo aa: ‘Mbela ohandi henuka ngoo okupopya oipupulu, nonande oshili otai dulu okutwalifa nge moshiponga? Ngeenge ondi li mohombo, ohandi henuka ngoo okuulikila ovanhu voukashikekookanhu wa yooloka ko ku wange oikala yopaihole? Ohandi henuka ngoo filufilu okupopya eendjovo inadi koshoka? Ohandi popi ngoo nombili nomunhu oo a udifa nge nai?’ Omapulo oo otae ke ku kwafela neenghono. Eendjovo doye otadi dulu okufaafanifwa noulenga woshikutu. Ngeenge owa kendabala okweefa po okupopya inaku koshoka,  okupopya kombinga yomilele noipupulu, otashi ka kala shipu kwoove okulidula omunhu mukulu.

15. Osha hala okutya ngahelipi ‘okuvalela komuti’ omunhu wetu mukulu?

¹⁵ Kala u na ehalo lokukatuka onghatu ya kwata moiti. Omuyapostoli Paulus okwa longifa efaneko la kwata moiti, opo e tu honge nghee sha kwata moiti okuninga omalunduluko monghalamwenyo yetu. Okwa popya kutya ohatu dulu okuvalela ounhu wetu mukulu “komuti.” (Rom. 6:6) Noitya imwe, otwa hala okushikula filufilu oshihopaenenwa shaKristus. Otwa pumbwa okudipaa oikala noilonga oyo Jehova e tonde. Ngeenge otwa ningi ngaho, ohatu ka kala tu na eliudo la koshoka nosho yo eteelelo loku ka hafela onghalamwenyo fiyo alushe. (Joh. 17:3; 1 Pet. 3:21) Dimbuluka kutya Jehova ita lundulula omifikamhango daye, opo di tu wapalele. Ndele ponhele yaasho, ofye twa pumbwa okuninga omalunduluko nokukala metwokumwe nado. — Jes. 1:16-18; 55:9.

16. Omolwashike tu na okukala twa tokola toko okutwikila okukondjifa omahalo etu mai?

¹⁶ Twikila okukondjifa omahalo mai. Nokuli nokonima eshi wa ninginifwa, owa pumbwa okutwikila okukondjifa omahalo mai. Diladila koshihopaenenwa shomumwatate wedina Maurício. Eshi a li omunyasha, okwa li a ninga eshenge. Mokweendela ko kwefimbo, okwa li a shakeneka ovapiya vaJehova, ndele ta hovele okukonakona Ombiibeli. Konima eshi a ninga omalunduluko, okwa ninginifwa mo 2002. Nonande opa pita omido dihapu ta longele Jehova, Maurício okwa ti: “Ondi shii kutya ondi na okukondjifa omahalo mai omafimbo nomafimbo.” Ashike osho inashi mu shololifa. Ponhele yaasho, okwa ti: “Ohandi kala ndi na ouladi wokuheliyandja komahalo oo mai nondi shii kutya ohandi hafifa Jehova.” *

17. Oshike tashi tu omukumo moshimoniwa shaNabiha?

¹⁷ Pula Jehova e ku kwafele nokukala we lineekela momhepo yaye iyapuki, ndele hameenghono doye mwene. (Gal. 5:22; Fil. 4:6) Otwa pumbwa okulonga noudiinini, ngeenge otwa hala okulidula filufilu omunhu mukulu. Diladila koshimoniwa shomumwameme wedina Nabiha. Eshi a li e na omido hamano, xe okwa li e mu fiya po. Okwa ti: “Osho osha li sha etela nge epolimano.” Eshi Nabiha a enda ta kulu, okwa hovela okukala omuhandunhu nomukwanyanya.  Okwa li a hovela okulandifa oingangamifi, a li a kwatwa po nokwa kala modolongo oule womido donhumba. Eendombwedi oda li da talela po odolongo omo a li noda li da hovela okukonakona naye Ombiibeli. Opo nee okwa li a hovela okuninga omalunduluko manene. Okwa ti: “Osha li shipu kwaame okweefa po oinima imwe. Ashike okweefa po okushila omakaya, Shipanga okwa li ta nyenge Nangolo.” Nabiha okwa kala ta kondjifa okweefa po okushila omakaya oule wodula nasha, ashike okwa ka pondola. Oshike she mu kwafela a pondole? Okwa ti: “Osho sha fimanenena, onda kala handi ilikana kuJehova pandjikilile a kwafele nge ndi a efe po.” Paife oha lombwele vamwe ta ti: “Onda tomhwa kutya ngeenge onda ninga omalunduluko a tya ngaho, opo ndi hafife Jehova, keshe umwe ota dulu.” *

18. Metwokumwe no 1 Ovakorinto 6:9-11, ovapiya vaKalunga vahapu ova li va dula okuninga shike?

¹⁸ Pefimbo lovayapostoli vaJesus, ovalumenhu novakainhu vamwe, ovo Jehova a hoolola va ka pangele pamwe naKristus, ova li ve na okweefa po oilonga yonhumba ii. Pashihopaenenwa, vamwe ova li ovanyoni vohombo, omashenge neembudi. Ashike kekwafo lomhepo iyapuki yaKalunga, ova li va dula okuninga omalunduluko. (Lesha 1 Ovakorinto 6:9-11.) Sha faafana nokunena, Ombiibeli oya kwafela ovanhu omamiliyona va lundulule onghedi yavo yokukalamwenyo. * Ova dula okweefa po filufilu oikala yavo ii. Oihopaenenwa yavo otai ulike kutya naave oto dulu okuninga omalunduluko nokufinda eenghedindjikilile dii, opo u kale wa wana okuninginifwa.

19. Oshike hatu ka kundafana moshitukulwa tashi shikula ko?

¹⁹ Kakele kokulidula omunhu mukulu, ovo va hala okuninginifwa ove na okuninga eenghendabala, opo va djale omunhu mupe. Moshitukulwa tashi shikula ko, ohatu ka kundafana nghee hatu dulu okuninga ngaho nosho yo okukwafelafana.