10-زەرتتەۋ ماقالاسى
ٴسىز «ەسكى بولمىستان» ارىلا الاسىز
«ەسكى بولمىستارىڭنان ٸس-ارەكەتتەرىمەن قوسا ارىلىڭدار» (قول. 3:9).
29-ٵن اتىمىزعا زاتىمىز ساي بولسىن
اڭداتپا *
1. كيەلى كىتاپتى زەرتتەمەي تۇرعاندا، قانداي ەدىڭىز؟
ەحوبا كۋاگەرلەرىمەن كيەلى كىتاپتى زەرتتەمەي تۇرعاندا، ٴسىز قانداي ادام ەدىڭىز؟ كوبىمىز بۇرىنعى ٶمىرىمىزدى ەسكە الساق: «ماسقارا، نە دەگەن ادام بولعانمىن؟!»— دەپ قورقىپ كەتەمىز. ويتكەنى ٴبىزدىڭ دۇرىس پەن بۇرىسقا كوزقاراسىمىز جانە مىنەز-قۇلقىمىز وسى دۇنيەنىڭ تاربيەسىمەن قالىپتاستى. دەمەك، كيەلى كىتاپتا ايتىلعانداي، ٴبىز وسى دۇنيەدە «ەش ٷمىتسىز، قۇدايدى بىلمەي ٶمىر كەشتىك» (ەفەس. 2:12). ٴبىراق ەندى كيەلى كىتاپتىڭ بىلىمىمەن ٶمىرىمىز جاڭا پاراقتان باستالدى!
2. كيەلى كىتاپتى زەرتتەي باستاعاندا، ٴسىز نەنى ٴتۇسىندىڭىز؟
2 كيەلى كىتاپتى زەرتتەي باستاعاندا، كوكتە ٴسىزدى قاتتى جاقسى كورەتىن اكەڭىز بار ەكەنىن ٴبىلدىڭىز. ەحوبا قۇدايعا ۇنامدى بولۋ ٷشىن جانە قىزمەتشىلەرىنەن تۇراتىن وتباسىنا قوسىلۋ ٷشىن، ٴسىز ٶمىر-سالتىڭىزدى، وي قالپىڭىز بەن كوزقاراسىڭىزدى وزگەرتۋ كەرەكتىگىن ٴتۇسىندىڭىز. سىزگە قۇدايدىڭ جوعارعى مورالدىق نورمالارىمەن ٶمىر ٴسۇرۋدى ۇيرەنۋ قاجەت بولدى (ەفەس. 5:3—5).
3. قولوستىقتارعا 3:9، 10 عا ساي، ەحوبا نەنى قالايدى جانە بۇل ماقالادا نە قاراستىرامىز؟
3 ەحوبا ٴبىزدىڭ اكەمىز ٵرى جاراتۋشىمىز بولعاندىقتان، ٶزىنىڭ وتباسىنداعى ادامداردىڭ ٴجۇرىس-تۇرىسىنا قاتىستى تالاپتار قويۋعا قۇقىلى. ول بىزدەن شومىلدىرۋ راسىمىنەن وتپەس بۇرىن، «ەسكى بولمىسىمىزدان ٸس-ارەكەتتەرىمەن قوسا ارىلۋىمىزدى» تالاپ ەتەدى * (قولوستىقتارعا 3:9، 10 وقىڭىز). شومىلدىرۋ راسىمىنەن وتكىسى كەلەتىندەر وسى ماقالادا مىنا ٷش سۇراققا جاۋاپ الادى: 1) «ەسكى بولمىس» دەگەن نە؟ 2) ەحوبا ودان نەگە ارىلعانىمىزدى قالايدى؟ 3) بۇل ٷشىن نە ىستەۋ قاجەت؟ ال شومىلدىرۋ راسىمىنەن ٶتىپ قويعاندارعا بۇل ماقالا ەسكى بولمىستارىنا ورالماۋعا كومەكتەسەدى.
«ەسكى بولمىس» دەگەن نە؟
4. «ەسكى بولمىستىڭ» جەتەگىندەگى ادام قانداي بولادى؟
4 «ەسكى بولمىسپەن» جۇرەتىن ادام تاندىك ويلارعا بەرىلىپ، تاندىك ىستەر ىستەيدى. ول ٶزىمشىل، قىزبا مىنەزدى، العىستى بىلمەيتىن جانە ماقتانشاق بولۋى مۇمكىن. سونداي-اق ول پورنوگرافيا كورۋدى، ۇياتسىز، قاتىگەز فيلمدەردى ۇناتاتىن شىعار. ونىڭ بويىندا جاقسى قاسيەتتەر دە جوق ەمەس، ٵرى ول ايتقان جامان سوزدەرى مەن جامان ىستەرىنە ٶزىن كىنالى سەزىنەتىن دە شىعار. ٴبىراق ول ويى مەن ىستەرىن تۇزەۋگە كۇش سالمايدى (عال. 5:19—21؛ ٴتىم. 2-ح. 3:2—5).
5. ٴبىز ەسكى بولمىستان تولىقتاي ارىلا الامىز با؟ ٴتۇسىندىرىڭىز. (ەلشىلەردىڭ ىستەرى 3:19)
5 كەمەلسىز پەندە بولعاندىقتان، ەشقايسىسىمىز دا جامان قالاۋلار مەن ويلاردان تولىق قۇتىلا المايمىز. كەيدە ايتقان سوزىمىزگە نە جاساعان ىسىمىزگە سان سوعىپ قالاتىن جاعدايلار بولادى (ەرم. 17:9؛ جاق. 3:2). ٴبىراق ەسكى بولمىستان ارىلعاندا، ٴبىز بۇدان بىلاي كۇناكار ويلار مەن ىستەردىڭ امىرىنە باعىنبايمىز، ياعني جاڭا ادام بولىپ، وزگەرەمىز (يشايا 55:7؛ ەلشىلەردىڭ ىستەرى 3:19 وقىڭىز).
6. نەگە ەحوبا ەسكى بولمىسقا ٴتان جامان ويلار مەن ادەتتەردەن ارىلعانىمىزدى قالايدى؟
6 ەحوبا ٴبىزدى قاتتى جاقسى كورگەندىكتەن جانە باقىتتى بولعانىمىزدى قالاعاندىقتان، جامان ويلار مەن جامان ادەتتەردەن ارىلۋدى ايتادى (يشايا 48:17، 18). ويتكەنى ادام جامان قۇمارلىعىنىڭ جەتەگىندە كەتسە، ٶزىن دە، باسقالاردى دا جارالايتىنىن ول جاقسى بىلەدى. ەحوبا ٴبىزدىڭ دە، قاسىمىزداعى ادامداردىڭ دا قينالىپ، ازاپ شەككەنىن مۇلدەم قالامايدى.
7. ريمدىكتەرگە 12:1، 2 گە ساي، بىزدە قانداي تاڭداۋ بار؟
7 بولمىسىمىزدى وزگەرتىپ جاتقانىمىزدى كورىپ، كەيبىر دوستارىمىز بەن تۋىستارىمىز ٴبىزدى مازاق ەتىپ، ۇستىمىزدەن كۇلەتىن شىعار (پەت. 1-ح. 4:3، 4). ولار بىزگە: «نە ىستەسەڭ دە، ٶز ەركىڭ ەمەس پە؟ نەگە بىرەۋدىڭ ايتقانىمەن ٴجۇرۋىڭ كەرەك؟!»— دەيتىن شىعار. ٴبىراق ەحوبانىڭ نورمالارىمەن جۇرمەيتىن ادام ٶزىن ەركىنمىن دەپ ايتا المايدى. ويتكەنى، شىندىعىنا كەلگەندە، ولار شايتاننىڭ دۇنيەسىنىڭ دەگەنىمەن ٴجۇر (ريمدىكتەرگە 12:1، 2 وقىڭىز). ەندەشە بارىمىزگە دە تاڭداۋ جاساۋ كەرەك: ٴبىز كۇنا مەن شايتاننىڭ دۇنيەسى قالىپتاستىرعان ەسكى بولمىسپەن جۇرە بەرەمىز بە، الدە ەحوبانىڭ قولىندا بارىنشا جاقسى ادام بولىپ قالىپتاسامىز با؟ (يشايا 64:8).
ەسكى بولمىستان قالاي ارىلامىز؟
8. جامان ويلار مەن ادەتتەردەن قاشىق بولۋعا نە كومەكتەسەدى؟
8 ەحوبا جامان ويلاردان ارىلىپ، جامان ادەتتەرىمىزدى تاستاۋ ٷشىن، ٴبىراز ۋاقىت پەن كۇش جۇمساۋىمىز كەرەكتىگىن بىلەدى (ٴزاب. 103:13، 14). دەسە دە ول بىزگە ٶزىنىڭ ٴسوزى، كيەلى رۋحى جانە ۇيىمى ارقىلى كومەكتەسىپ، قاجەتتى دانالىق پەن كۇش بەرەدى ٵرى قولداۋ كورسەتەدى. ونىڭ كومەگىن كورىپ تە كەلە جاتقان شىعارسىز. ال ەندى ٴسىزدىڭ تاراپىڭىزدان جاسالاتىن ناقتى-ناقتى قادامدارعا توقتالىپ وتەيىك. بۇل ارەكەتتەر سىزگە ەسكى بولمىسىڭىزدان ارىلا ٴتۇسىپ، شومىلدىرۋ راسىمىنەن وتۋگە لايىقتى بولۋعا كومەكتەسەدى.
9. قۇداي ٴسوزى سىزگە قالاي كومەكتەسەدى؟
9 كيەلى كىتاپتى وقىعاندا، ٶز-ٶزىڭىزدى جاقسىلاپ تەكسەرىڭىز. كيەلى كىتاپ اينا سياقتى: ول ٴبىزدىڭ قالاي ويلانىپ، قالاي سويلەپ، قالاي ارەكەت ەتىپ جۇرگەنىمىزدى كورسەتىپ بەرەدى (جاق. 1:22—25). سىزبەن كيەلى كىتاپتى زەرتتەپ جۇرگەن باۋىرلاس پەن باسقا دا تولىسقان ماسىحشىلەر كيەلى كىتاپپەن ٶزىڭىزدى قالاي تەكسەرۋگە بولاتىنىن ۇيرەتە الادى. مىسالى، ولار جازبالاردى قولدانىپ، سىزگە مىقتى جانە ٵلسىز جاقتارىڭىزدى انىقتاۋعا كومەكتەسە الادى. سوسىن سىزگە جامان ادەتتەرىڭىزدەن ارىلۋعا كومەكتەسەتىن كيەلى كىتاپقا نەگىزدەلگەن مالىمەتتى تابۋدى دا ۇيرەتەدى. ەحوبا دا سىزگە جاردەم بەرۋگە ٵرقاشان ٵزىر. ول ٴسىزدىڭ جۇرەگىڭىزدى كورىپ تۇرعاندىقتان، سىزگە ەڭ جاقسى كومەكتى ۇسىنادى (ناق. س. 14:10؛ 15:11). سوندىقتان كۇندە وعان دۇعا ەتىپ، كۇندە ٴسوزىن زەرتتەۋدى ادەتكە اينالدىرىڭىز.
10. ەليدىڭ جاعدايىنان نە ٴتۇسىندىڭىز؟
10 ەحوبانىڭ نورمالارىن ۇستانۋ ەڭ دۇرىس شەشىم ەكەنىنە كۇماندانباڭىز. ەحوبا بىزدەن نە تالاپ ەتسە دە، بارلىعى ٴبىزدىڭ يگىلىگىمىز ٷشىن. ونىڭ نورمالارىمەن ٶمىر سۇرە باستاعاندا، ادام ٶزىنىڭ ٴقادىر-قاسيەتىن سەزىنەدى، ومىرىنە ٴمان-ماعىنا كىرەدى ٵرى شىنايى باقىتقا كەنەلەدى (ٴزاب. 19:7—11). ال قۇدايدىڭ نورمالارىن ۇستانبايتىندار بولسا ٴتاننىڭ ىستەرىنىڭ زاردابىن تارتىپ جاتادى. ەلي ەسىمدى ەر كىسىمەن وسىلاي بولعان. اتا-اناسى وعان ەحوبانىڭ ٴبىلىمىن بەرىپ وسىرگەن. ٴبىراق جاسوسپىرىم كەزىندە ەلي جامان ورتامەن ارالاسا باستايدى. ول ەسىرتكى قابىلداپ، ازعىن ٶمىر كەشىپ، ۇرلىق جاساي باستايدى. ٴسۇيتىپ، ونىڭ مىنەزى وزگەرىپ، وتە ىزاقور ٵرى قاتىگەز بولىپ كەتەدى. «مەن ماسىحشىلەرگە بولمايتىن نارسەنىڭ ٴبارىن جاساپ شىقتىم»،— دەپ مويىندادى ول. ٴبىراق بالا كەزىندە ەستىگەن شىندىق ونىڭ جۇرەگىندە قالىپ قويعاندىقتان، تۇبىندە ول قايتادان كيەلى كىتاپتى زەرتتەي باستايدى. جامان ادەتتەرىن تاستاۋ ٷشىن ەلي كوپ كۇش سالىپ، 2000-جىلى شومىلدىرۋ راسىمىنەن ٶتتى. ونىڭ ايتۋىنشا، ەحوبانىڭ نورمالارىن ۇستانىپ ٶمىر سۇرگەننىڭ ارقاسىندا ەندى ونىڭ جانى تىنىش، ار-ۇجدانى دا تازا *. ەليدىڭ جاعدايىنان تۇسىنگەنىمىز — ادام ەحوبانىڭ نورمالارىن ۇستانبايتىن بولسا، ول ٶز جانىنا ٶزى جارا سالادى. ٴبىراق سونىڭ وزىندە ەحوبا وعان جاقسى جاققا وزگەرۋگە كومەكتەسۋگە دايىن.
11. ەحوبا قانداي ىستەردى جەك كورەدى؟
11 ەحوبا جەك كورەتىندى جەك كورۋدى ۇيرەنىڭىز (ٴزاب. 97:10). كيەلى كىتاپتا ەحوبا «مەنمەن كوز، وتىرىك ايتاتىن ٴتىل، جازىقسىزدىڭ قانىن توگەتىن قولدى» جەك كورەتىنى ايتىلعان (ناق. س. 6:16، 17). سونداي-اق وعان «قاتىگەزدەر مەن وتىرىكشىلەر جەككورىنىشتى» (ٴزاب. 5:6). ەحوبا وسىنداي وي قالىپ پەن ٸس-ارەكەتتى جەك كورەتىنى سونشا — نۇحتىڭ كەزىندە جەردى زۇلىمدىققا تولتىرعان ادامداردى تۇگەل جويىپ جىبەرگەن (مۇس. 1-ج. 6:13). ال مالاحي پايعامباردىڭ كەزىندە وزدەرىنىڭ بەيكۇنا جارىنان اجىراسۋ ٷشىن قۋلىق-سۇمدىققا باراتىنداردى جەك كورەتىنىن ايتقان. ەحوبا ولاردىڭ عيباداتتارىن قابىلدامايدى جانە سول قىلىقتارى ٷشىن جاۋاپقا تارتادى (مالح. 2:13—16؛ ەۆر. 13:4).
12. «جاماندىقتان جيرەنۋ» دەگەن نەنى بىلدىرەدى؟
12 ەحوبا بىزگە: «جاماندىقتان جيرەنىڭدەر»،— دەيدى (ريم. 12:9). «جيرەنۋ» دەگەن ٴبىر نارسەنى سۋقانىمىز سۇيمەي، قاتتى جەك كورۋدى بىلدىرەدى. مىسالى، الدىڭىزعا بىرەۋ ٴشىرىپ، ساسىپ كەتكەن تاماق قويسا، قانداي سەزىمدە بولاسىز؟ بۇنى ەلەستەتكەننىڭ وزىنەن-اق جۇرەگىمىز اينىپ، جامان سەزىنىپ كەتەمىز. سول سياقتى، ەحوبا جەك كورەتىن نارسەنى ىستەۋ دەگەن ويدىڭ وزىنەن شوشىپ، قاتتى جەركەنىپ كەتۋىمىز كەرەك.
13. جامان ويلاردى تىيىپ وتىرۋ نەگە ماڭىزدى؟
13 ويلارىڭىزدى تىزگىندەپ وتىرىڭىز. ويدان ارەكەت تۋادى. سوندىقتان يسا ويلارىمىز اۋىر كۇناعا اپارماي تۇرعاندا، ولاردى تىيىپ تاستاۋ كەرەكتىگىن ايتقان (مات. 5:21، 22، 28، 29). ٴبىز كوكتەگى اكەمىزگە ۇنامدى بولعىمىز كەلەدى، سولاي ەمەس پە؟ سوندىقتان كەلگەن جامان ويدىڭ ٴبارىن بىردەن قۋىپ تاستاعانىمىز وتە ماڭىزدى!
14. ٴتىلىمىز نەنى ايان ەتەدى جانە ٶزىمىزدى قانداي سۇراقتارمەن تەكسەرگەنىمىز ٴجون؟
14 اڭداپ سويلەڭىز. يسا: «ادامنىڭ اۋزىنان شىعاتىندارى جۇرەكتەن شىعادى»،— دەگەن (مات. 15:18). راسىندا دا، ٴبىزدىڭ ٴتىلىمىز — ىشكى دۇنيەمىزدىڭ ايناسى. سوندىقتان دا مىنا سۇراقتارمەن ٶزىڭىزدى جاقسىلاپ تەكسەرىپ كورىڭىز: «ٶزىمنىڭ قينالىپ قالاتىنىمدى بىلسەم دە، شىندىقتى جاسىرماي ايتامىن با؟ جۇبايىمنان وزگە ادامعا قىلىمسىپ-قىرىنداۋدان اۋلاقپىن با؟ ۇياتسىز، تۇرپايى اڭگىمەلەردەن جيىركەنىپ، قاشامىن با؟ اشۋىما ٴتيىپ تۇرعان ادامعا سابىرمەن جاۋاپ بەرە الامىن با؟» وسى جايتتارعا ٴمان بەرگەنىڭىزدىڭ پايداسى كوپ. ويتكەنى ەسكى بولمىستى كيىم دەپ ەلەستەتسەك، جالعان، تۇرپايى، قورلىق سوزدەر سول كيىمدى ۇستاپ تۇرعان تۇيمەلەر سياقتى. وسىنداي سوزدەردەن ارىلاتىن بولساق، ەسكى بولمىستى دا شەشىپ تاستاۋ وڭاي بولادى.
15. ەسكى بولمىسىمىزدى «باعاناعا ٸلۋ» دەگەن نەنى بىلدىرەدى؟
15 وزگەرۋگە نىق بەكىنىپ، باتىل ارەكەت ەتىڭىز. ەلشى پاۋىل ەسكى بولمىسىمىزدى «باعاناعا ٸلۋ» كەرەكتىگىن ايتقان. بۇل وتكىر سوزدەر ەسكى ٶمىر سالتىمىزدى وزگەرتۋدىڭ قانشالىقتى ماڭىزدى ەكەنىن كورسەتەدى (ريم. 6:6). يسا ەحوبانىڭ جۇرەگىن قۋانتۋ ٷشىن باعاناعا شەگەلەنۋگە دە دايىن بولدى. وعان ۇقساپ ٴبىز دە، ەحوبا جەك كورەتىن مىنەز-قۇلقىمىز بەن ىستەرىمىزدى شەگەلەپ، كوزىن قۇرتۋعا دايىن بولۋىمىز قاجەت. سوندا عانا تازا ار-ۇجدانعا جانە بولاشاقتا ماڭگى ٶمىر ٴسۇرۋ ۇمىتىنە يە بولامىز (جوح. 17:3؛ پەت. 1-ح. 3:21). ۇمىتپاڭىز، ەحوبا ٶزىنىڭ نورمالارىن ٴبىزدىڭ ىڭعايىمىزعا قاراي وزگەرتپەيدى. ونىڭ نورمالارىنا ساي كەلۋ ٷشىن، كەرىسىنشە، ٴبىز وزگەرۋگە ٴتيىسپىز (يشايا 1:16—18؛ 55:9).
16. نەگە السىزدىكتەرمەن كۇرەسە بەرۋگە بەكىنۋىمىز كەرەك؟
16 السىزدىكتەرىڭىزبەن كۇرەسۋدى دوعارماڭىز. شومىلدىرۋ راسىمىنەن وتكەننەن كەيىن دە، سىزگە ٴتاننىڭ قالاۋلارىن تىيىپ وتىرۋ كەرەك بولادى. ماۋريسيو دەگەن ەر باۋىرلاسىمىزدىڭ مىسالىن الايىقشى. جاس كەزىندە ول گوموسەكسۋاليست بولعان. كەيىن ول ەحوبا كۋاگەرلەرىمەن كەزدەسىپ، كيەلى كىتاپتى زەرتتەي باستايدى. ول بىرتە-بىرتە ٴجۇرىس-تۇرىسىن تۇزەپ، 2002-جىلى شومىلدىرۋ راسىمىنەن وتەدى. ەحوباعا كوپ جىلدان بەرى قىزمەت ەتىپ جۇرسە دە، ماۋريسيو: «جامان قالاۋلارىم كەيدە قىلاڭ بەرىپ تۇرادى، سولارمەن ٵلى دە كۇرەسەمىن»،— دەپ مويىندايدى. ٴبىراق ول بۇل ٷشىن ەڭسەسىن تۇسىرمەيدى. «سول قالاۋلارىما بەرىلمەسەم، ەحوباعا ۇنامدى بولاتىنىمدى بىلەمىن. وسى ماعان كۇش بەرەدى»،— دەيدى ماۋريسيو *.
17. نابيحانىڭ وقيعاسى بىزگە قانداي سەنىمدىلىك بەرەدى؟
17 ەحوباعا دۇعا ەتىڭىز، ٶز كۇشىڭىزگە ەمەس، ونىڭ كيەلى رۋحىنا ارقا سۇيەڭىز (عال. 5:22؛ ٴفىلىپ. 4:6). ەسكى بولمىسىمىزدان ارىلىپ، ونى جانىمىزعا ەش جۋىتپاۋ ٷشىن كوپ كۇش سالۋىمىز كەرەك. بۇعان نابيحا دەگەن ايەلدىڭ مىسالىن كەلتىرۋگە بولادى. التى جاسىندا ونى اكەسى تاستاپ كەتكەن. بۇل ونىڭ جان دۇنيەسىن قاتتى جاراقاتتادى. ول كەيىن ىزاقور، وتە اشۋشاڭ بولىپ وسەدى. ەسىرتكى ساتۋمەن اينالىسىپ ٴجۇرىپ، تۇرمەگە تۇسەدى دە، نابيحا سوندا ٴبىراز جىل وتىرادى. كەيىن ول تۇرمەگە ۋاعىزداپ كەلگەن ەحوبا كۋاگەرلەرىمەن كيەلى كىتاپتى زەرتتەي باستايدى. ول كوپتەگەن جامان ىستەرىن تاستاپ، قاتتى وزگەرەدى. «كەيبىر جامان ادەتتەرىمنەن تەز ارىلعانمەن، ەڭ قيىنى تەمەكى تاستاۋ بولدى»،— دەيدى ول. نابيحا ٴبىر جارىم جىلدان استام ۋاقىت بويى كۇرەسىپ، بۇل تاۋەلدىلىكتەن اقىرى ارىلا الدى. «مەن ەحوباعا دۇعا ايتا بەردىم، ايتا بەردىم. ماعان كومەكتەسكەن ەڭ باستى نارسە وسى بولدى. باسقالارعا ايتارىم — ەحوباعا ۇنامدى بولۋ ٷشىن مەن وزگەرە السام، وندا كەز كەلگەن ادام وزگەرە الادى!»— دەيدى نابيحا *.
ٴسىز شومىلدىرۋ راسىمىنەن وتۋگە لايىق بولا الاسىز!
18. قورىنتتىقتارعا 1-حات 6:9—11-تارماقتارعا ساي، قۇدايدىڭ كوپتەگەن قىزمەتشىلەرى نە ىستەي الدى؟
18 ماسىحپەن بىرگە بيلىك ەتەدى دەپ تاڭدالعان ەرلەر مەن ايەلدەردىڭ اراسىندا كەزىندە جامان ىستەرمەن اينالىسقاندارى دا بولعان. مىسالى، كەيبىرەۋلەرى ۇرى، نەكە ادالدىعىن بۇزۋشى، ەركەكقۇمار ەركەك بولعان. ٴبىراق قۇدايدىڭ كيەلى رۋحىنىڭ ارقاسىندا ولار وسى ەسكى بولمىستارىنان ارىلا الدى (قورىنتتىقتارعا 1-حات 6:9—11 وقىڭىز). ٴدال سولاي بۇگىندە دە كيەلى كىتاپ ميلليونداعان ادامعا وزگەرۋگە كومەكتەسىپ جاتىر *. ولار ٴتىپتى بويلارىنا ابدەن ٴسىڭىپ كەتكەن جامان ادەتتەرىنەن دە قۇتىلا الدى. بۇل نەنى دالەلدەيدى؟ ٴسىز دە جامان ادەتتەرىڭىزدى جەڭىپ، بولمىسىڭىزدى وزگەرتىپ، شومىلدىرۋ راسىمىنەن وتۋگە لايىق بولا الاسىز.
19. كەلەسى ماقالادا نە تۋرالى بىلەمىز؟
19 شومىلدىرۋ راسىمىنەن وتەمىن دەۋشىلەر ەسكى بولمىستان ارىلۋدان بولەك، جاڭا بولمىسقا يە بولۋعا ۇمتىلۋلارى كەرەك. كەلەسى ماقالادا جاڭا بولمىسقا قالاي يە بولا الاتىنىمىزدى جانە وسى ورايدا باسقالار بىزگە قالاي كومەكتەسسە بولاتىنىن بىلەمىز.
41-ٵن ەستي كور مەنى دەپ وتىنەم
^ شومىلدىرۋ راسىمىنەن وتۋگە لايىقتى بولۋ ٷشىن بىزگە بولمىسىمىزدى وزگەرتۋ قاجەت بولادى. وسى ماقالادا ەسكى بولمىستىڭ ارەكەتتەرىنە نە جاتاتىنىن، ودان نە ٷشىن ارىلۋىمىز كەرەكتىگىن جانە قالاي ارىلا الاتىنىمىزدى بىلەمىز. ال كەلەسى ماقالادا شومىلدىرۋ راسىمىنەن وتكەننەن كەيىن دە، جاڭا بولمىسقا يە بولا بەرۋ ٷشىن نە ىستەۋ قاجەت ەكەنىن قاراستىرامىز.
^ ٴسوز ٴمانى: «ەسكى بولمىستان ارىلۋ» دەگەن ەحوباعا ۇنامسىز وي قالىپ پەن قالاۋلاردان ارىلۋدى بىلدىرەدى. ادام ەسكى بولمىسىنان شومىلدىرۋ راسىمىنە دەيىن ارىلا باستاعانى ٴجون (ەفەس. 4:22).
^ كوبىرەك ٴبىلۋ ٷشىن، 2012-جىلدىڭ 1-ساۋىرىندە شىققان «كۇزەت مۇناراسىنىڭ» (حانزۇشا) «كيەلى كىتاپ ادامنىڭ ٶمىرىن وزگەرتەدى» ايدارىنداعى «مەن ەحوباعا قايتا ورالۋدى شەشتىم» دەگەن تاقىرىپتى قاراڭىز.
^ كوبىرەك ٴبىلۋ ٷشىن، 2012-جىلدىڭ 1-شىلدەسىندە شىققان «كۇزەت مۇناراسىنىڭ» (حانزۇشا) «كيەلى كىتاپ ادامنىڭ ٶمىرىن وزگەرتەدى» ايدارىنداعى «ولار ماعان مەيىرىممەن قارادى» دەگەن تاقىرىپتى قاراڭىز.
^ كوبىرەك ٴبىلۋ ٷشىن، 2012-جىلدىڭ 1-قازانىندا شىققان «كۇزەت مۇناراسىنىڭ» (حانزۇشا) «كيەلى كىتاپ ادامنىڭ ٶمىرىن وزگەرتەدى» ايدارىنداعى «مەن قاتىگەز ٵرى اشۋشاڭ بولاتىنمىن» دەگەن تاقىرىپتى قاراڭىز.
^ « كيەلى كىتاپ ادام ٶمىرىن وزگەرتەدى» دەگەن قورشاۋدى قاراڭىز.
^ سۋرەت سيپاتتاماسى: جامان ويلار مەن ٸس-ارەكەتتەردەن ارىلۋ ەسكى كيىمدى شەشىپ تاستاۋ سياقتى