ບົດຄວາມສຶກສາທີ 10
ເຈົ້າສາມາດ “ຖິ້ມລັກສະນະນິດໄສເກົ່າ” ໄດ້
“ໃຫ້ຖິ້ມລັກສະນະນິດໄສເກົ່າກັບສິ່ງຕ່າງໆທີ່ເຄີຍເຮັດ.”—ກລຊ. 3:9
ເພງ 29 ໃຊ້ຊີວິດໃຫ້ສົມກັບຊື່ຂອງພວກເຮົາ
ໃຈຄວາມສຳຄັນ *
1. ຊີວິດຂອງເຈົ້າເປັນແນວໃດກ່ອນທີ່ຈະສຶກສາຄຳພີໄບເບິນ?
ຊີວິດຂອງເຈົ້າເປັນແນວໃດກ່ອນທີ່ຈະຮຽນຄຳພີໄບເບິນກັບພະຍານພະເຢໂຫວາ? ພວກເຮົາຫຼາຍຄົນບໍ່ຢາກຄິດເຖິງເລື່ອງນີ້ ເພາະຕອນນັ້ນເຮົາ “ບໍ່ມີຄວາມຫວັງແລະບໍ່ຮູ້ຈັກພະເຈົ້າ.” (ອຟຊ. 2:12) ເຮົາກໍເລີຍໃຊ້ຊີວິດຄືກັບຄົນທົ່ວໄປໃນໂລກ. ແຕ່ຫຼັງຈາກທີ່ມາຮຽນຄຳພີໄບເບິນ ຊີວິດຂອງເຮົາກໍປ່ຽນໄປ!
2. ເມື່ອຮຽນຄຳພີໄບເບິນ ເຈົ້າໄດ້ເຂົ້າໃຈເລື່ອງຫຍັງ?
2 ເມື່ອເຈົ້າມາຮຽນຄຳພີໄບເບິນ ເຈົ້າກໍຮູ້ວ່າພະເຢໂຫວາພໍ່ທີ່ຢູ່ໃນສະຫວັນຮັກເຈົ້າຫຼາຍ ແລະເຂົ້າໃຈ ວ່າຖ້າເຈົ້າຢາກເຮັດໃຫ້ເພິ່ນພໍໃຈແລະເຂົ້າມາຢູ່ໃນຄອບຄົວຂອງເພິ່ນ ເຈົ້າກໍຕ້ອງໄດ້ປ່ຽນແປງຄວາມຄິດແລະນິດໄສໃຈຄໍຂອງເຈົ້າ ແລະໃຊ້ຊີວິດຕາມຫຼັກການຂອງພະເຢໂຫວາ.—ອຟຊ. 5:3-5
3. ຕາມໂກໂລຊາຍ 3:9, 10 ພະເຢໂຫວາຢາກໃຫ້ເຮົາເຮັດຫຍັງ ແລະເຮົາຈະຮຽນຫຍັງໃນບົດຄວາມນີ້?
3 ຍ້ອນພະເຢໂຫວາເປັນຜູ້ສ້າງແລະເປັນພໍ່ຂອງເຮົາ ເພິ່ນຈຶ່ງມີສິດທີ່ຈະບອກເຮົາວ່າເຮົາຄວນເຮັດຫຍັງແດ່. ແລະກ່ອນທີ່ເຮົາຈະຮັບບັບເຕມາ ເພິ່ນກໍຢາກໃຫ້ເຮົາ “ຖິ້ມລັກສະນະນິດໄສເກົ່າກັບສິ່ງຕ່າງໆທີ່ເຄີຍເຮັດ.” * (ອ່ານໂກໂລຊາຍ 3:9, 10) ບົດຄວາມນີ້ຈະຊ່ວຍໃຫ້ຜູ້ທີ່ຢາກຮັບບັບເຕມາຕອບຄຳຖາມ 3 ຂໍ້ຕໍ່ໄປນີ້: (1) “ລັກສະນະນິດໄສເກົ່າ” ແມ່ນຫຍັງ? (2) ເປັນຫຍັງພະເຢໂຫວາຢາກໃຫ້ເຮົາຖິ້ມລັກສະນະນິດໄສເກົ່າ? (3) ເຮົາຈະຖິ້ມລັກສະນະນິດໄສເກົ່າໄດ້ແນວໃດ? ແລະບົດຄວາມນີ້ຍັງຈະຊ່ວຍຜູ້ທີ່ຮັບບັບເຕມາແລ້ວໃຫ້ລະວັງທີ່ຈະບໍ່ກັບໄປມີນິດໄສແບບເກົ່າ.
“ລັກສະນະນິດໄສເກົ່າ” ແມ່ນຫຍັງ?
4. ຄົນທີ່ມີ “ລັກສະນະນິດໄສເກົ່າ” ເປັນຄົນແບບໃດ?
4 ໂດຍທົ່ວໄປແລ້ວ ຄົນທີ່ມີ “ລັກສະນະນິດໄສເກົ່າ” ມັກຈະຄິດແລະເຮັດຕາມໃຈຕົວເອງ. ລາວອາດຈະເປັນຄົນເຫັນແກ່ຕົວ ໃຈຮ້າຍງ່າຍ ບໍ່ຮູ້ບຸນຄຸນ ເປັນຄົນຍິ່ງ ມັກເບິ່ງສື່ລາມົກ ແລະເບິ່ງໜັງທີ່ມີຄວາມຮຸນແຮງຫຼືຜິດສິນລະທຳ. ທີ່ຈິງ ລາວກໍມີຈຸດດີຢູ່ ແລະລາວອາດຮູ້ສຶກຜິດກັບສິ່ງທີ່ບໍ່ດີທີ່ລາວເວົ້າແລະເຮັດ ແຕ່ລາວບໍ່ໄດ້ມີແຮງກະຕຸ້ນພໍທີ່ຈະປ່ຽນແປງຕົວເອງ.—ຄລຕ. 5:19-21; 2 ຕມ. 3:2-5
ເມື່ອເຮົາ “ຖິ້ມລັກສະນະນິດໄສເກົ່າ” ແລ້ວ ຄວາມຄິດແລະຄວາມຕ້ອງການທີ່ບໍ່ດີກໍບໍ່ສາມາດຄວບຄຸມເຮົາໄດ້. (ເບິ່ງຂໍ້ 5) *
5. ເຮົາສາມາດຖິ້ມລັກສະນະນິດໄສເກົ່າທັງໝົດໄດ້ບໍ? ຂໍໃຫ້ອະທິບາຍ. (ກິດຈະການ 3:19)
5 ຍ້ອນເຮົາເປັນຄົນບໍ່ສົມບູນແບບ ເຮົາຈຶ່ງບໍ່ສາມາດກຳຈັດຄວາມຄິດແລະຄວາມຕ້ອງການທີ່ບໍ່ດີທັງໝົດອອກໄປໄດ້. ບາງເທື່ອເຮົາອາດຈະເວົ້າຫຼືເຮັດບາງຢ່າງທີ່ເຮັດໃຫ້ມາເສຍໃຈພາຍຫຼັງ. (ຢເຣ. 17:9; ຢກບ. 3:2) ແຕ່ຖ້າເຮົາຖິ້ມລັກສະນະນິດໄສເກົ່າແລ້ວ ຄວາມຄິດແລະຄວາມຕ້ອງການທີ່ບໍ່ດີກໍບໍ່ສາມາດຄວບຄຸມເຮົາໄດ້ ເຖິງວ່າເຮົາຍັງຈະມີນິດໄສທີ່ບໍ່ດີບາງຢ່າງຢູ່. ເມື່ອເຮັດແບບນີ້ ຄົນອື່ນກໍຈະເຫັນວ່າເຮົາກາຍເປັນຄົນໃໝ່.—ເອຊາ. 55:7; ອ່ານກິດຈະການ 3:19
6. ເປັນຫຍັງພະເຢໂຫວາຈຶ່ງຢາກໃຫ້ເຮົາຖິ້ມຄວາມຄິດແລະນິດໄສທີ່ບໍ່ດີ?
6 ພະເຢໂຫວາຢາກໃຫ້ເຮົາຖິ້ມຄວາມຄິດແລະນິດໄສທີ່ບໍ່ດີຍ້ອນເພິ່ນຮັກເຮົາຫຼາຍແລະເພິ່ນກໍຢາກໃຫ້ເຮົາມີຊີວິດທີ່ມີຄວາມສຸກ. (ເອຊາ. 48:17, 18) ເພິ່ນຮູ້ວ່າຜູ້ທີ່ມີນິດໄສທີ່ບໍ່ດີແບບນີ້ຈະເຮັດໃຫ້ທັງຕົວເອງແລະຄົນອື່ນເສຍໃຈ ແລະເມື່ອເພິ່ນເຫັນແບບນັ້ນ ເພິ່ນກໍຮູ້ສຶກເສຍໃຈຄືກັນ.
7. ຕາມໂຣມ 12:1, 2 ເຮົາຕ້ອງຕັດສິນໃຈເລື່ອງຫຍັງ?
7 ໝູ່ບາງຄົນແລະຄົນໃນຄອບຄົວຂອງເຮົາອາດຈະເຍາະເຍີ້ຍທີ່ເຫັນເຮົາພະຍາຍາມປ່ຽນແປງຕົວເອງ. (1 ປຕ. 4:3, 4) ເຂົາເຈົ້າອາດຈະບອກວ່າ ເຮົາມີສິດເຮັດຫຍັງກໍໄດ້ຕາມໃຈຕົວເອງ ບໍ່ຈຳເປັນຕ້ອງໃຫ້ຄົນອື່ນມາບອກ. ແຕ່ຂໍໃຫ້ຈື່ໄວ້ວ່າ ຜູ້ທີ່ບໍ່ເຮັດຕາມຫຼັກການຂອງພະເຢໂຫວາຈະບໍ່ມີອິດສະຫຼະແທ້ ເພາະເຂົາເຈົ້າກຳລັງຖືກຊາຕານຄວບຄຸມຢູ່. (ອ່ານໂຣມ 12:1, 2) ເຮົາທຸກຄົນຕ້ອງຕັດສິນໃຈເລືອກເອງວ່າ ເຮົາຈະຍັງມີນິດໄສແບບເກົ່າຕໍ່ໄປເຊິ່ງຖືກຄວບຄຸມໂດຍບາບຂອງເຮົາແລະໂລກຂອງຊາຕານ ຫຼືເຮົາຈະຍອມໃຫ້ພະເຢໂຫວາຊ່ວຍເຮົາປ່ຽນແປງຕົວເອງໃຫ້ເປັນຄົນດີຂຶ້ນ.—ເອຊາ. 64:8
ເຮົາຈະຖິ້ມ “ລັກສະນະນິດໄສເກົ່າ” ແນວໃດ?
8. ສິ່ງໃດຈະຊ່ວຍເຮົາໃຫ້ປ່ຽນແປງນິດໄສທີ່ບໍ່ດີ?
8 ພະເຢໂຫວາຮູ້ວ່າເຮົາຕ້ອງໃຊ້ເວລາແລະຄວາມພະຍາຍາມຫຼາຍທີ່ຈະປ່ຽນແປງນິດໄສທີ່ບໍ່ດີ. (ເພງ. 103:13, 14) ດັ່ງນັ້ນ ເພິ່ນຈຶ່ງໃຫ້ເຮົາມີສະຕິປັນຍາ ກຳລັງ ແລະຄວາມຊ່ວຍເຫຼືອໂດຍຜ່ານທາງຄຳພີໄບເບິນ ພະລັງບໍລິສຸດ ແລະອົງການຂອງເພິ່ນ ເຊິ່ງເພິ່ນອາດຈະເຄີຍຊ່ວຍເຮົາມາແລ້ວ. ຕອນນີ້ໃຫ້ເຮົາມາເບິ່ງບາງສິ່ງທີ່ເຮົາເຮັດໄດ້ເພື່ອຈະຊ່ວຍເຮົາໃຫ້ຖິ້ມນິດໄສທີ່ບໍ່ດີແລະມີຄຸນສົມບັດທີ່ຈະຮັບບັບເຕມາ.
9. ຄຳພີໄບເບິນຊ່ວຍເຈົ້າແນວໃດ?
9 ໃຊ້ຄຳພີໄບເບິນກວດເບິ່ງຕົວເອງ. ຄຳພີໄບເບິນປຽບຄືກັບແວ່ນແຍງທີ່ຊ່ວຍເຈົ້າໃຫ້ກວດເບິ່ງຄວາມຄິດ ຄຳເວົ້າ ແລະການກະທຳຂອງຕົວເອງ. (ຢກບ. 1:22-25) ຜູ້ນຳການສຶກສາຂອງເຈົ້າແລະພີ່ນ້ອງຄົນອື່ນໆທີ່ມີຄວາມເຊື່ອເຂັ້ມແຂງກໍສາມາດໃຫ້ຄຳແນະນຳກັບເຈົ້າ. ຕົວຢ່າງເຊັ່ນ: ເຂົາເຈົ້າຈະໃຊ້ຄຳພີໄບເບິນເພື່ອຊ່ວຍເຈົ້າຮູ້ຈຸດດີແລະຈຸດອ່ອນຂອງຕົວເອງ. ເຂົາເຈົ້າຍັງຊ່ວຍເຈົ້າໃຫ້ຮູ້ວິທີຊອກຫາຄຳແນະນຳທີ່ຊ່ວຍໃຫ້ເຈົ້າປ່ຽນແປງນິດໄສທີ່ບໍ່ດີ. ແລະພະເຢໂຫວາກໍພ້ອມສະເໝີທີ່ຈະຊ່ວຍເຫຼືອເຈົ້າ. ເພິ່ນຮູ້ຈັກຕົວເຈົ້າດີ ແລະຮູ້ວິທີທີ່ດີທີ່ສຸດທີ່ຈະຊ່ວຍເຈົ້າ. (ສຸພາ. 14:10; 15:11) ດັ່ງນັ້ນ ໃຫ້ເຈົ້າອະທິດຖານເຖິງພະເຢໂຫວາແລະສຶກສາຄຳພີໄບເບິນທຸກມື້.
10. ເຈົ້າໄດ້ບົດຮຽນຫຍັງຈາກປະສົບການຂອງເອລີ?
10 ໝັ້ນໃຈວ່າຫຼັກສິນລະທຳຂອງພະເຢໂຫວາດີທີ່ສຸດ. ທຸກສິ່ງທີ່ພະເຢໂຫວາຂໍໃຫ້ເຮົາເຮັດເປັນປະໂຫຍດຕໍ່ຕົວເຮົາເອງ. ດັ່ງນັ້ນ ຜູ້ທີ່ເຮັດຕາມຫຼັກສິນລະທຳຂອງພະເຢໂຫວາຈະມີຄວາມສຸກແທ້ ມີຄວາມນັບຖືຕົວເອງ ແລະມີຈຸດມຸ່ງໝາຍໃນຊີວິດ. (ເພງ. 19:7-11) ກົງກັນຂ້າມ ຜູ້ທີ່ບໍ່ໄດ້ເຮັດຕາມຫຼັກສິນລະທຳຂອງພະເຢໂຫວາຈະມີບັນຫາຫຼາຍຢ່າງຍ້ອນເຮັດຕາມໃຈຂອງຕົວເອງ. ໃຫ້ເຮົາມາເບິ່ງປະສົບການຂອງຜູ້ຊາຍຄົນໜຶ່ງທີ່ຊື່ ເອລີ. ລາວເກີດໃນຄອບຄົວທີ່ພໍ່ແມ່ຮັກແລະຮັບໃຊ້ພະເຢໂຫວາ ແຕ່ລາວພັດບໍ່ໄດ້ເຮັດຕາມຫຼັກການຂອງພະເຢໂຫວາເລີຍ. ຕອນເປັນໄວລຸ້ນ ລາວຄົບຫາກັບໝູ່ທີ່ບໍ່ດີແລະໃຊ້ຊີວິດແບບເຂົາເຈົ້າ ເຊັ່ນ: ໃຊ້ຢາເສບຕິດ ເຮັດຜິດສິນລະທຳທາງເພດ ແລະເປັນຄົນຂີ້ລັກ. ລາວກາຍເປັນຄົນໃຈຮ້າຍແລະມັກໃຊ້ຄວາມຮຸນແຮງຫຼາຍຂຶ້ນ. ເອລີບອກວ່າ: “ຂ້ອຍເຮັດກົງກັນຂ້າມກັບທຸກຢ່າງທີ່ຮຽນໃນຄຳພີໄບເບິນເລີຍ.” ແຕ່ເອລີບໍ່ລືມສິ່ງທີ່ເຄີຍຮຽນໃນຄຳພີໄບເບິນ. ໃນທີ່ສຸດ ລາວກໍກັບມາສຶກສາຄຳພີໄບເບິນອີກ ລາວໄດ້ພະຍາຍາມຫຼາຍແທ້ໆທີ່ຈະປ່ຽນແປງນິດໄສທີ່ບໍ່ດີ ແລະຮັບບັບເຕມາໃນປີ 2000. ການໃຊ້ຊີວິດຕາມຫຼັກສິນລະທຳຂອງພະເຢໂຫວາຊ່ວຍເອລີແນວໃດ? ເອລີບອກວ່າ: “ຕອນນີ້ຂ້ອຍຮູ້ສຶກສະຫງົບໃຈ ແລະບໍ່ຮູ້ສຶກຜິດອີກຕໍ່ໄປ.” * ປະສົບການຂອງເອລີສອນເຮົາໃຫ້ຮູ້ວ່າ ຜູ້ທີ່ບໍ່ເຮັດຕາມຫຼັກສິນລະທຳຂອງພະເຢໂຫວາຈະເຮັດໃຫ້ຕົວເອງເຈັບປວດໃຈ. ແຕ່ເຖິງຈະເປັນແນວນັ້ນ ພະເຢໂຫວາກໍພ້ອມທີ່ຈະຊ່ວຍເຫຼືອເຂົາເຈົ້າໃຫ້ປ່ຽນແປງຕົວເອງ.
11. ມີຫຍັງແດ່ທີ່ພະເຢໂຫວາກຽດຊັງ?
11 ຊັງສິ່ງທີ່ພະເຢໂຫວາກຽດຊັງ. (ເພງ. 97:10) ຄຳພີໄບເບິນບອກໃຫ້ເຮົາຮູ້ວ່າພະເຢໂຫວາຊັງ “ຕາທີ່ຍິ່ງຈອງຫອງ ລີ້ນທີ່ເວົ້າຕົວະ ມືທີ່ຂ້າຄົນທີ່ບໍ່ມີຄວາມຜິດ.” (ສຸພາ. 6:16, 17, ລ.ມ.) ແລະເພິ່ນກໍ “ກຽດຊັງຄົນທີ່ມັກຄວາມຮຸນແຮງແລະຄົນຫຼອກລວງ.” (ເພງ. 5:6, ລ.ມ.) ພະເຢໂຫວາກຽດຊັງຄວາມຄິດແລະການກະທຳແບບນີ້ຫຼາຍ ເພິ່ນຈຶ່ງໄດ້ທຳລາຍຄົນຊົ່ວໃນສະໄໝຂອງໂນອາຍ້ອນເຂົາເຈົ້າເຮັດໃຫ້ໂລກເຕັມໄປດ້ວຍຄວາມຮຸນແຮງ. (ຕົ້ນ. 6:13) ແລະໃຫ້ເຮົາມາເບິ່ງອີກຕົວຢ່າງໜຶ່ງ. ພະເຢໂຫວາໄດ້ບອກຜ່ານທາງຜູ້ພະຍາກອນມາລາກີວ່າ ເພິ່ນກຽດຊັງຜູ້ທີ່ວາງແຜນຢ່າຮ້າງກັບຜົວຫຼືເມຍທີ່ບໍ່ມີຄວາມຜິດ. ພະເຢໂຫວາບໍ່ຍອມຮັບການນະມັດສະການຂອງເຂົາເຈົ້າ ແລະເພິ່ນຍັງຈະຕັດສິນການກະທຳຂອງເຂົາເຈົ້ານຳ.—ມລກີ. 2:13-16; ຮຣ. 13:4
ການເຮັດສິ່ງທີ່ພະເຢໂຫວາບໍ່ມັກຄວນເຮັດໃຫ້ເຮົາຮູ້ສຶກລັງກຽດຄືກັບກິນອາຫານທີ່ບູດເນົ່າ (ເບິ່ງຂໍ້ 11-12)
12. ການ “ກຽດຊັງສິ່ງທີ່ຊົ່ວ” ໝາຍຄວາມວ່າແນວໃດ?
12 ພະເຢໂຫວາຢາກໃຫ້ເຮົາ “ກຽດຊັງສິ່ງທີ່ຊົ່ວ.” (ຣມ. 12:9) ຄຳວ່າ “ກຽດຊັງ“ ສະແດງເຖິງຄວາມຮູ້ສຶກທີ່ບໍ່ມັກເອົາແທ້ເອົາວ່າ. ນັ້ນໝາຍຄວາມວ່າຖ້າເຮົາກຽດຊັງສິ່ງໃດສິ່ງໜຶ່ງ ເຮົາຈະຮູ້ສຶກລັງກຽດສິ່ງນັ້ນ. ເພື່ອຈະເຂົ້າໃຈເລື່ອງນີ້ຫຼາຍຂຶ້ນ ລອງນຶກພາບວ່າເຈົ້າຊິຮູ້ສຶກແນວໃດຖ້າມີບາງຄົນບອກໃຫ້ເຈົ້າກິນອາຫານທີ່ບູດເນົ່າ. ພຽງແຕ່ຄິດ ເຈົ້າກໍຄືຊິຮູ້ສຶກປວດຮາກແລ້ວແມ່ນບໍ? ຄ້າຍຄືກັນ ພຽງແຕ່ຄິດວ່າຈະເຮັດສິ່ງທີ່ພະເຢໂຫວາກຽດຊັງກໍຄວນຈະເຮັດໃຫ້ເຮົາຮູ້ສຶກລັງກຽດສິ່ງນັ້ນແລ້ວບໍ່ແມ່ນບໍ?
13. ເປັນຫຍັງເຮົາຕ້ອງປົກປ້ອງຄວາມຄິດຂອງເຮົາ?
13 ປົກປ້ອງຄວາມຄິດຂອງເຮົາ. ຍ້ອນຄວາມຄິດກະຕຸ້ນເຮົາໃຫ້ລົງມືເຮັດ ນີ້ຈຶ່ງເປັນເຫດຜົນທີ່ພະເຢຊູສອນເຮົາໃຫ້ກຳຈັດຄວາມຄິດທີ່ຈະພາເຮົາເຮັດຜິດຮ້າຍແຮງ. (ມທ. 5:21, 22, 28, 29) ຍ້ອນເຮົາຢາກໃຫ້ພະເຢໂຫວາພໍ່ທີ່ຢູ່ໃນສະຫວັນພໍໃຈໃນຕົວເຮົາ ດັ່ງນັ້ນເມື່ອເຮົາເລີ່ມມີຄວາມຄິດທີ່ບໍ່ດີ ໃຫ້ເຮົາຮີບຈຳກັດມັນອອກໄປທັນທີ.
14. ຄຳເວົ້າຂອງເຮົາບົ່ງບອກຫຍັງ ແລະເຮົາຄວນຖາມຕົວເອງແນວໃດ?
14 ຄວບຄຸມຄຳເວົ້າ. ພະເຢຊູບອກວ່າ: “ສິ່ງທີ່ອອກຈາກປາກ ກໍມາຈາກໃຈ.” (ມທ. 15:18) ນັ້ນໝາຍຄວາມວ່າຄຳເວົ້າຂອງເຮົາບົ່ງບອກໃຫ້ຮູ້ວ່າເຮົາເປັນຄົນແນວໃດແທ້ໆ. ດັ່ງນັ້ນ ຂໍໃຫ້ເຮົາຖາມຕົວເອງວ່າ: ‘ຂ້ອຍຄວນເວົ້າຕົວະບໍ ຖ້າເວົ້າຄວາມຈິງແລ້ວເຮັດໃຫ້ຕົວເອງມີບັນຫາ? ຖ້າຂ້ອຍແຕ່ງດອງແລ້ວ ຂ້ອຍໄດ້ລະວັງທີ່ຈະບໍ່ເຮັດໃຫ້ເພດກົງກັນຂ້າມຮູ້ສຶກວ່າຂ້ອຍກຳລັງຈີບລາວບໍ? ຂ້ອຍລະວັງທີ່ຈະບໍ່ເວົ້າເລື່ອງລາມົກບໍ? ເມື່ອມີຄົນເຮັດໃຫ້ຂ້ອຍໃຈຮ້າຍ ຂ້ອຍຍັງຈະເວົ້າດີໆກັບລາວບໍ?’ ການຄິດເຖິງຄຳຖາມເຫຼົ່ານີ້ຈະຊ່ວຍເຮົາໃຫ້ລະວັງຄຳເວົ້າໄດ້. ຄຳເວົ້າຂອງເຮົາອາດປຽບຄືກັບກະດຸມເສື້ອ ຖ້າເຮົາແກະກະດຸມອອກກ່ອນ ເຮົາກໍຈະແກ້ເສື້ອໄດ້ງ່າຍຂຶ້ນ. ຄ້າຍຄືກັນ ຖ້າເຮົາລະວັງທີ່ຈະບໍ່ເວົ້າຕົວະ ເວົ້າຫຍາບຄາຍ ແລະເວົ້າເລື່ອງລາມົກມັນກໍງ່າຍຂຶ້ນທີ່ເຮົາຈະຖິ້ມລັກສະນະນິດໄສເກົ່າ.
15. ການຄຶງລັກສະນະນິດໄສເກົ່າໝາຍຄວາມວ່າແນວໃດ?
15 ຕັ້ງໃຈທີ່ຈະປ່ຽນແປງຕົວເອງ. ອັກຄະສາວົກໂປໂລໃຊ້ຄຳປຽບທຽບເພື່ອສອນເຮົາວ່າ ເປັນເລື່ອງສຳຄັນຫຼາຍທີ່ເຮົາຕ້ອງປ່ຽນແປງຕົວເອງ. ລາວບອກວ່າເຮົາຕ້ອງ “ຄຶງ” “ລັກສະນະນິດໄສເກົ່າ” ຂອງເຮົາ. (ຣມ. 6:6) ນັ້ນໝາຍຄວາມວ່າ ຖ້າເຮົາຢາກເຮັດຕາມຕົວຢ່າງຂອງພະເຢຊູ ເຮົາກໍຕ້ອງກຳຈັດຄວາມຄິດແລະການກະທຳທີ່ພະເຢໂຫວາບໍ່ມັກ. ຖ້າເຮົາເຮັດແບບນີ້ເຮົາກໍມີຄວາມຫວັງທີ່ຈະມີຊີວິດຕະຫຼອດໄປ ແລະບໍ່ມີຫຍັງລົບກວນໃຈເຮົາ. (ຢຮ. 17:3; 1 ປຕ. 3:21) ຂໍໃຫ້ຈື່ໄວ້ວ່າ ພະເຢໂຫວາຈະບໍ່ປ່ຽນຫຼັກການຂອງເພິ່ນເພື່ອໃຫ້ເຂົ້າກັບເຮົາ ແຕ່ເຮົາຕ້ອງເປັນຜູ້ທີ່ປ່ຽນແປງຕົວເອງເພື່ອໃຫ້ເຂົ້າກັບຫຼັກການຂອງເພິ່ນ.—ເອຊາ. 1:16-18; 55:9
16. ເປັນຫຍັງເຈົ້າຕ້ອງຕໍ່ສູ້ກັບຄວາມຕ້ອງການທີ່ຜິດໆຕໍ່ໄປ?
16 ຕໍ່ສູ້ກັບຄວາມຕ້ອງການທີ່ຜິດໆຕໍ່ໄປ. ເຖິງວ່າເຈົ້າຈະຮັບບັບເຕມາແລ້ວ ແຕ່ເຈົ້າກໍຍັງຕ້ອງໄດ້ຕໍ່ສູ້ກັບຄວາມຕ້ອງການທີ່ຜິດໆຕໍ່ໄປ. ໃຫ້ເຮົາມາເບິ່ງປະສົບການຂອງຜູ້ຊາຍຄົນໜຶ່ງທີ່ຊື່ ມໍຣິຊີໂອ. ຕອນທີ່ລາວເປັນໄວລຸ້ນ ລາວໃຊ້ຊີວິດແບບຄົນຮັກເພດດຽວກັນ. ແຕ່ໃນທີ່ສຸດເມື່ອລາວພົບກັບພະຍານພະເຢໂຫວາ ລາວກໍໄດ້ເລີ່ມຮຽນຄຳພີໄບເບິນ ແລະຫຼັງຈາກນັ້ນລາວກໍໄດ້ປ່ຽນແປງຊີວິດຕົວເອງແລະຮັບບັບເຕມາໃນປີ 2002. ເຖິງວ່າລາວຈະຮັບໃຊ້ພະເຢໂຫວາມາຫຼາຍປີ ແຕ່ລາວບອກວ່າ: “ບາງເທື່ອຂ້ອຍຍັງໄດ້ຕໍ່ສູ້ກັບຄວາມຕ້ອງການທີ່ຜິດໆຢູ່.” ແຕ່ເລື່ອງນີ້ກໍບໍ່ໄດ້ເຮັດໃຫ້ລາວຮູ້ສຶກທໍ້ໃຈ. ລາວບອກວ່າ: “ຂ້ອຍໄດ້ກຳລັງໃຈທີ່ຮູ້ວ່າ ເມື່ອຂ້ອຍບໍ່ໄດ້ເຮັດຕາມຄວາມຕ້ອງການທີ່ຜິດໆ ຂ້ອຍກໍຈະເຮັດໃຫ້ພະເຢໂຫວາພໍໃຈ.” *
17. ປະສົບການຂອງນາບີຮາເຮັດໃຫ້ເຈົ້າໄດ້ຮັບກຳລັງໃຈແນວໃດ?
17 ອະທິດຖານຂໍໃຫ້ພະເຢໂຫວາຊ່ວຍແລະເພິ່ງພະລັງບໍລິສຸດ ບໍ່ເພິ່ງຕົວເອງ. (ຄລຕ. 5:22; ຟລປ. 4:6) ເຮົາຕ້ອງພະຍາຍາມຖິ້ມລັກສະນະນິດໄສເກົ່າແລະບໍ່ກັບໄປເຮັດແບບເກົ່າອີກ. ໃຫ້ເຮົາມາເບິ່ງປະສົບການຂອງຜູ້ຍິງຄົນໜຶ່ງທີ່ຊື່ນາບີຮາ. ພໍ່ຂອງລາວໄດ້ຖິ້ມລາວຕອນອາຍຸ 6 ປີ ລາວບອກວ່າ: “ເລື່ອງນີ້ເຮັດໃຫ້ຂ້ອຍເຈັບປວດໃຈຫຼາຍ.” ເມື່ອໃຫຍ່ຂຶ້ນມາ ລາວກາຍເປັນຄົນໃຈຮ້ອນແລະໂມໂຫງ່າຍ. ລາວເລີ່ມຂາຍຢາເສບຕິດແລະກໍຖືກຈັບເຂົ້າຄຸກເປັນເວລາຫຼາຍປີ. ແຕ່ເມື່ອພະຍານພະເຢໂຫວາມາຢາມຄົນທີ່ຢູ່ໃນຄຸກແລະເລີ່ມສຶກສາຄຳພີໄບເບິນໃຫ້ລາວ ລາວກໍໄດ້ເລີ່ມປ່ຽນແປງຕົວເອງຫຼາຍຢ່າງ. ລາວບອກວ່າ: “ນິດໄສທີ່ບໍ່ດີຫຼາຍຢ່າງກໍປ່ຽນໄດ້ງ່າຍ ແຕ່ຊິໃຫ້ເຊົາສູບຢາມັນຍາກຫຼາຍ.” ນາບີຮາຕ້ອງໃຊ້ເວລາຫຼາຍກວ່າໜຶ່ງປີເພື່ອທີ່ຈະເຊົາສູບຢາ ແລະໃນທີ່ສຸດລາວກໍສາມາດເຊົາສູບຢາໄດ້. ລາວເຮັດແບບນັ້ນໄດ້ແນວໃດ? ລາວບອກວ່າ: “ສິ່ງສຳຄັນທີ່ສຸດແມ່ນ ຂ້ອຍອະທິດຖານເຖິງພະເຢໂຫວາເປັນປະຈຳເພື່ອຊ່ວຍຂ້ອຍໃຫ້ເຊົາສູບຢາໄດ້.” ຕອນນີ້ລາວຢາກບອກກັບຄົນອື່ນໆວ່າ: “ຂ້ອຍໝັ້ນໃຈວ່າ ຖ້າຂ້ອຍສາມາດປ່ຽນແປງຕົວເອງເພື່ອເຮັດໃຫ້ພະເຢໂຫວາພໍໃຈໄດ້ ໃຜໆ ກໍສາມາດເຮັດໄດ້ຄືກັນ!” *
ເຈົ້າສາມາດມີຄຸນສົມບັດທີ່ຈະຮັບບັບເຕມາໄດ້!
18. ຕາມ 1 ໂກຣິນໂທ 6:9-11 ຜູ້ຮັບໃຊ້ຂອງພະເຢໂຫວາຫຼາຍຄົນໄດ້ເຮັດຫຍັງ?
18 ຄລິດສະຕຽນໃນສະຕະວັດທຳອິດທີ່ພະເຢໂຫວາເລືອກໃຫ້ປົກຄອງຮ່ວມກັບພະຄລິດກໍເຄີຍມີນິດໄສທີ່ບໍ່ດີຫຼາຍຢ່າງ ເຊັ່ນ: ບາງຄົນເຄີຍຫຼິ້ນຊູ້ ຮັກເພດດຽວກັນ ແລະເປັນຄົນຂີ້ລັກ. ແຕ່ດ້ວຍຄວາມຊ່ວຍເຫຼືອຈາກພະລັງບໍລິສຸດຂອງພະເຢໂຫວາ ເຂົາເຈົ້າສາມາດປ່ຽນແປງນິດໄສຂອງຕົວເອງໄດ້. (ອ່ານ 1 ໂກຣິນໂທ 6:9-11) ໃນທຸກມື້ນີ້ກໍຄ້າຍຄືກັນ ຄຳພີໄບເບິນໄດ້ຊ່ວຍຫຼາຍລ້ານຄົນໃຫ້ປ່ຽນແປງຊີວິດຂອງຕົວເອງ ແມ່ນແຕ່ບາງຄົນທີ່ເຄີຍມີນິດໄສທີ່ຮູ້ສຶກວ່າປ່ຽນຍາກກໍສາມາດປ່ຽນໄດ້. * ຈາກຕົວຢ່າງເຫຼົ່ານີ້ສະແດງໃຫ້ເຫັນວ່າເຈົ້າກໍສາມາດປ່ຽນແປງນິດໄສທີ່ບໍ່ດີຂອງຕົວເອງ ແລະມີຄຸນສົມບັດທີ່ຈະຮັບບັບເຕມາໄດ້.
19. ເຮົາຈະຮຽນຫຍັງໃນບົດຄວາມຕໍ່ໄປ?
19 ນອກຈາກຈະຖິ້ມລັກສະນະນິດໄສເກົ່າແລ້ວ ຜູ້ທີ່ຢາກຮັບບັບເຕມາຕ້ອງພະຍາຍາມທີ່ຈະມີລັກສະນະນິດໄສໃໝ່. ໃນບົດຄວາມຕໍ່ໄປ ເຮົາຈະໄດ້ຮຽນວ່າເຮົາຈະເຮັດແບບນັ້ນໄດ້ແນວໃດ ແລະຄົນອື່ນຈະຊ່ວຍເຮົາແນວໃດ.
ເພງ 41 ຂໍຟັງຄຳອະທິດຖານຂອງເຮົາ
^ ເຮົາຕ້ອງເຕັມໃຈປ່ຽນແປງນິດໄສຂອງຕົວເອງເພື່ອຈະຮັບບັບເຕມາໄດ້. ໃນບົດຄວາມນີ້ຈະຊ່ວຍເຮົາໃຫ້ເຫັນວ່າ ລັກສະນະນິດໄສເກົ່າແມ່ນຫຍັງ? ເປັນຫຍັງ ເຮົາຕ້ອງຖິ້ມລັກສະນະນິດໄສນີ້? ແລະເຮົາຈະຖິ້ມລັກສະນະນິດໄສນີ້ໄດ້ແນວໃດ? ໃນບົດຄວາມຕໍ່ໄປ ເຮົາຈະມາເບິ່ງວ່າເຮົາຈະມີລັກສະນະນິດໄສໃໝ່ຕໍ່ໆໄປໄດ້ແນວໃດເຖິງວ່າຈະຮັບບັບເຕມາແລ້ວ.
^ ການອະທິບາຍສຳນວນ: ການ “ຖິ້ມລັກສະນະນິດໄສເກົ່າ” ໝາຍຄວາມວ່າ ເຮົາຕ້ອງກຳຈັດຄວາມຄິດແລະຄວາມຕ້ອງການທີ່ພະເຢໂຫວາບໍ່ມັກ ເຊິ່ງເຮົາຄວນເຮັດແບບນັ້ນກ່ອນທີ່ຈະຮັບບັບເຕມາ.—ອຟຊ. 4:22
^ ສຳລັບຂໍ້ມູນເພີ່ມເຕີມ ໃຫ້ເບິ່ງບົດຄວາມທີ່ຊື່ວ່າ “ຄຳພີໄບເບິນປ່ຽນຊີວິດຄົນ—‘ຂ້ອຍຕ້ອງກັບໄປຫາພະເຢໂຫວາ’” ໃນຫໍສັງເກດການ 1 ເມສາ 2012 (ພາສາໄທ)
^ ສຳລັບຂໍ້ມູນເພີ່ມເຕີມ ໃຫ້ເບິ່ງບົດຄວາມທີ່ຊື່ວ່າ “ຄຳພີໄບເບິນປ່ຽນຊີວິດຄົນ—‘ພວກເຂົາດີກັບຂ້ອຍຫຼາຍ’” ໃນຫໍສັງເກດການ 1 ພຶດສະພາ 2012 (ພາສາໄທ)
^ ສຳລັບຂໍ້ມູນເພີ່ມເຕີມ ໃຫ້ເບິ່ງບົດຄວາມທີ່ຊື່ວ່າ “ຄຳພີໄບເບິນປ່ຽນຊີວິດຄົນ—‘ຂ້ອຍເປັນເດັກໄວລຸ້ນທີ່ກ້າວລ້າວແລະໂມໂຫງ່າຍ’” ໃນຫໍສັງເກດການ 1 ຕຸລາ 2012 (ພາສາໄທ)
^ ເບິ່ງຂອບ “ ຄຳພີໄບເບິນປ່ຽນຊີວິດຄົນ.”
^ ຄຳອະທິບາຍຮູບພາບ: ໃຫ້ເຮົາພະຍາຍາມຖິ້ມຄວາມຄິດແລະການກະທຳທີ່ບໍ່ດີ ຄືກັບທີ່ເຮົາແກ້ເສື້ອເກົ່າຖິ້ມ.
