CHIBAABA CHAKUDIZA 10
Munateli “Kuvuula Wuntu Wawukulu”
“Vuulenu wuntu wenu wawukulu niyilwilu yawu.”—KOL. 3:9.
KAMINA 29 Twalemesha Ijina Deyi
NSAÑU YIDI MUCHIBAABA *
1. Chihandilu chenu chadiña ñahi henohu kanda mutachiki kudiza Bayibolu?
CHIHANDILU chenu chadiña ñahi henohu kanda mutachiki kudiza Bayibolu nawaYinsahu jaYehova? Etu amavulu hitwakeñaña kutoñojoka hachadiña chihandilu chetuku. Chakadi nikujina, yilwilu yetu niwuntu wetu yaluwankeni nayitoñojoka yamukaayi yamonañawu nawu yayiwahi hela yatama. Neyi dichitwadiña dikwila nawu, “hitwadiña nakuchiñejaku nawa hitwamwilukili Nzambi mukaayiku.” (Efwe. 2:12) Ilaña hanyima yakudiza Bayibolu chihandilu chetu chahimpikili!
2. Chumanyi chimwelukili mpinji yimwadizileña Bayibolu?
2 Hampinji yimwadizileña Bayibolu, mwelukili nenu mukweti Tata yenu wamwiwulu wayikeña hama. Mwelukili nenu neyi munakukeña kumuzañalesha Yehova nikwikala hakachi kachisaka chawakakudifukula indi, mwatela kuhimpa chikupu chihandilu chenu, chimwamonaña yuma nichimwatoñojokaña. Mwadizili cheñi nenu mwatela kwila yuma yamonañayi Yehova nindi yaloña nikutondolwela yuma yamonañayi nindi yatama.—Efwe. 5:3-5.
3. Kwesekeja naAKolosi 3:9, 10, yumanyi yinakukeñayi Yehova nindi twileña, nawa yumanyi yitukuhanjekahu muchinu chibaaba?
3 Nleñi yetu nawa Tata yetu wamwiwulu, Yehova wukweti wuswa wakushaku nshimbi jatela kulondelawu antu amuchisaka chindi. Nawa wakeñaña nindi henohu kanda tupapatishewi twatela kuzata nañovu kulonda tuvuuli wuntu wetu wawukulu niyilwilu yachu.” * (Tañenu AKolosi 3:9, 10.) Achinu chibaaba chikukwasha antu ejima anakukeña kupapatishewa kudihula awa malwihu asatu: (1) Indi “wuntu wawukulu” hichumanyi? (2) Muloñadi Yehova chatulejelañayi nindi tuvuuli wuntu wawukulu? (3) Tunateli kuwuvuula ñahi? Hakwila etu twapapatishewa dehi achinu chibaaba chikutukwasha kubula kwila hela kutoñojoka yuma yitwelileña henohu kanda tuvuuli wuntu wawukulu.
INDI “WUNTU WAWUKULU” HICHUMANYI?
4. Muntu welaña ñahi neyi wavwala “wuntu wawukulu”?
4 Muntu wavwala “wuntu wawukulu” kakavulu watoñojokaña nikwila yuma kwesekeja nanshidi. Nateli kwikala wadikeña, wazuwa, wabulaña kusakilila nawa wadivwimba. Nateli kudiluñisha kutala nyevulu yanzekesi nimafwilimu atama hela amadombu. Chakadi nikujina, wudi nayilwilu yikwawu yayiwahi nawa nateli kudinka nyiloña hayuma yatama yahoshañayi hela yelañayi. Ilaña hanakufwila kuhimpa chikupu yitoñojoka yindi niyilwilu yindiku.—Ñal. 5:19-21; 2 Tim. 3:2-5.
Neyi tuvuula “wuntu wawukulu,” yilwilu niyaaku yakumujimba hiyikutuyuulaña cheñiku (Talenu paragilafu 5) *
5. Yitoñojoka yamuchidinyi yitwatela kwikala nayu kutalisha hakuvuula wuntu wawukulu? (Yilwilu 3:19)
5 Wejima wetu twawanina wanyi. Dichi kwosi muntu wunateli kufumisha chikupu yitoñojoka yatama hela kufwila kwatama muyitoñojoka yetuku. Mpinji yikwawu tukwilaña hela kuhosha yuma yitunateli kuditoñesha. (Yere. 17:9; Yak. 3:2) Ilaña neyi tuvuula “wuntu wawukulu” yilwilu yakumujimba niyaaku hiyikutuyuulañaku. Twekalaña ambukaku.—Isa. 55:7; tañenu Yilwilu 3:19.
6. Muloñadi Yehova chatulejelañayi nindi tuvuuli yilwilu yatama niyitoñojoka yatama yawuntu wawukulu?
6 Yehova watulejaña nindi tuleki kwikala nayitoñojoka yatama niyilwilu yatama muloña watukeña nankashi nawa nakukeña etu tudiluñisheña wumi. (Isa. 48:17, 18) Weluka nindi antu abulaña kutondolwela kufwila kwatama. Adikatishaña awenawu niakwawu. Watiyaña kutama neyi yamona tunakudikatisha etu aweni niakwetu antu.
7. Kwesekeja naARoma 12:1, 2, chumanyi chitwatela kutondahu?
7 Amabwambu jetu amakwawu niantu amuchisaka chetu anateli kutusupisha muloña wakwila tunakufwila kuhimpa wuntu wetu. (1 Pet. 4:3, 4) Anateli kuhosha nawu tukweti wuswa wakwila yuma yejima yitunakukeña nawa hitwatela kwiteja antu amakwawu kutuleja yuma yitwatela kwilaku. Hela chochu, awa antu akaanaña nshimbi jaYehova hiyekala asubukaku. Munjila yikwawu, etejaña kaayi kanakuyulewa naSatana kuyiwumba. (Tañenu ARoma 12:1, 2.) Wejima wetu twatela kutondahu chuma chimu: Chili kutwalekahu kwikala nawuntu wawukulu, waluwañeshawu kudi nshidi nikaayi kaSatana, hela kwiteja Yehova atubalumuni kulonda twikali antu amawahi.—Isa. 64:8.
TUNATELI KUVUULA ÑAHI “WUNTU WAWUKULU?”
8. Yumanyi yikutukwasha kutondolwela yilwilu yatama?
8 Yehova weluka nindi hakuhita mpinji yeneni nawa twatela kuzata nañovu hakwila tuleki yitoñojoka niyilwilu yatama. (Mas. 103:13, 14) Hela chochu, kuhitila Mwizu Dindi, spiritu yindi nikuloñesha kwindi, Yehova watwinkaña maana, ñovu nawa watukwashaña kulonda tuhimpi wuntu wetu. Chakadi nikujina nayikwashi dehi. Chayinu mpinji tuhanjekenu hayuma yikwawu yimwatela kwila kulonda chiyikwashi kuvuula wuntu wawukulu nawa mushikihu kupapatishewa.
9. Izu daNzambi dinateli kuyikwasha kwiladi?
9 Zatishenu Bayibolu kulonda mudishinshiki chikupu nikwiluka chimwekala. Izu daNzambi dekala neyi chibanjilu; dinateli kuyikwasha kudishinshika chimwatoñojokaña, chimwahoshaña nichimwelaña yuma. (Yak. 1:22-25) Muntu wayidizishaña Bayibolu niakaKristu amakwawu anateli kuyikwasha. Chakutalilahu, anateli kuzatisha Nsona kulonda ayikwashi mwiluki himwakolela nihimwazeyela. Anateli kuyidizisha chakuwana nsañu yamuBayibolu yinateli kuyikwasha chikupu kuleka yilwilu yatama. Nawa Yehova wadiloñesha kuyikwasha mpinji yejima. Diyi hohu wunateli kuyikwasha muloña weluka yuma yidi mumuchima wenu. (Yish. 14:10; 15:11) Dichi lombenuña kudi yena nawa dizenuña Izu dindi mpinji yejima.
10. Chumanyi chimunadizili kuchakutalilahu chaElie?
10 Ilukenu chikupu nenu nshimbi jaYehova jajiwahi nankashi. Yuma yejima yatulejañayi Yehova nindi twileña yinateli kutukwasha. Antu alondelaña nshimbi jindi ayilemeshaña, akweti nkeñelu muchihandilu nawa akweti muzañalu walala. (Mas. 19:7-11) Kwambukaku, antu adiwulaña nshimbi jindi amwenañamu jakala muloña wakulondela nyidimu yakumujimba. Talenu chahosheliyi Elie kutalisha hakukaana nshimbi jaNzambi. Amukulishili kudi anvwali amukeña Yehova. Ilaña Elie chakulileñayi wadikundili nawantu atama. Watachikili kuzatisha yitumbu yashetana, kwila wuvumbi niwukombi. Elie wahosheli nindi wekalili muntu wazuwa nawa mukamadombu. Wahosheli nindi: “Nelileña yuma yejima yandizishiliwu nawu mukaKristu hatela kuyilaku.” Hela chochu, Elie havulameneni yuma yejima yadiziliyi kuwansiku. Nkumininaku, watachikili cheñi kudiza Bayibolu. Wazatili nañovu kulonda aleki yilwilu yindi yatama nawa wapapatisheweli mu 2000. Indi kulondela nshimbi jaYehova kunamukwashi ñahi? Elie wahosheli nindi: “Ichi nikweti kuwunda kwamuyitoñojoka nawa nikweti chinleji chitooka.” * Ichi chakutalilahu chinakumwekesha nawu, antu akaanaña nshimbi jaYehova adikatishaña awenawu. Hela chochu, Yehova nakukeñesha chikupu kuyikwasha kulonda abalumuki.
11. Yumanyi yahelayi Yehova?
11 Helenu yuma yahelayi Yehova. (Mas. 97:10) Bayibolu yashimunaña nawu Yehova wahela “mesu adinka wanta, idimi datwambaña, nimakasa apwekeshaña mashi akadi muloña.” (Yish. 6:16, 17) Cheñi, “wahela chikupu akamadombu niantu atwambaña.” (Mas. 5:6) Yehova wahela yilwilu yejimiyi chakwila wajilumwini antu ejima atama mumafuku aNowa muloña enzesheli iseki dejima namadombu. (Kutach. 6:13) Talenu chakutalilahu chikwawu. Kuhitila mudi kaprofwetu Malaki, Yehova wahosheli nindi waheleli antu ejima akwatilileña makasu añodijawu akadi muloña kulonda ayiseñi. Nzambi wakaanaña kudifukula kwawu nawa wakayisompesha hayilwilu yawu.—Mal. 2:13-16; Heb. 13:4.
Kwila chuma chamonañayi Yehova nindi chatama twatela kuchimonaña netu chawunyeñu neyi kwiji kuda yakuda yatoka (Talenu paragilafu 11-12)
12. “Kuhela yuma yatama” kwatalisha mudihi?
12 Yehova wakeñaña nindi “tuheli yuma yatama.” (Rom. 12:9) Izu dakwila nawu “kuhela” damwekeshaña chitwatiyaña daya mukwila nawu kuhela chuma chikupu, kuchitiya wunyeñu. Fwikijenu chimwadi kutiya neyi ayileja nawu mudi yakuda yatoka. Kutoñojoka hachumichi kukuyiletesha mukati. Munjila yoyimu, twatela kutiya wunyeñu nachuma chahoshayi Yehova nindi chatama.
13. Muloñadi chitwatela kukiñila yitoñojoka yetu?
13 Kiñenu yitoñojoka yenu. Yuma yitwatoñojokañahu diyi yitwelaña. Dichaletesheli Yesu atuleji kukaana yitoñojoka yinateli kutuletesha etu kukoña nshidi yahamesu bwi-i. (Mat. 5:21, 22, 28, 29) Chakadi nikujina, tunakukeña kumuzañalesha Tata yetu wamwiwulu. Dichi chalema nankashi kukaana yitoñojoka yejima yatama yinateli kwinza muyitoñojoka yetu.
14. Nhoshelu yetu yamwekeshaña chumanyi, nawa malwihwinyi itukwakula?
14 Yuulenuña nhoshelu yenu. Yesu wahosheli nindi: “Yuma yejima yedikaña mukanwa yafumaña mumuchima.” (Mat. 15:18) Mwamweni, nhoshelu yetu yamwekeshaña chitwekala munyichima yetu. Dichi dihulenu nenu: ‘Komana nakaanaña kutwamba hela chakwila kuhosha walala kukunletela kukala? Ami nekala muwulu komana nekala wasoñama kulonda nibuleña kusenseka namuntu wabula kwikala mwinikwami? Komana natondolwelaña chikupu nhoshelu yatama? Neyi muntu nanhilishi, komana namwakulaña mumesu akuwunda?’ Chikuyikwasha nankashi neyi mutoñojoka nakanañachima hanawa malwihu. Nhoshelu yenu anateli kuyesekeja namuchiminu wachakuvwala. Neyi muzata nañovu yenu yejima kulonda muleki nhoshelu yakasawuntu, yakutwamba nawa yatama, chikuyipelela kuvuula wuntu wawukulu.
15. Kupopela wuntu wetu wawukulu “hamutondu” kwatalisha mudihi?
15 Fwilenuña kuhimpa. Kapostolu Pawulu wazatishili chakutalilahu kulonda atudizishi nindi chalema nankashi kuhimpa chihandilu chetu. Wasonekeli nindi twatela kupopela wuntu wetu wawukulu “hamutondu.” (Rom. 6:6) Munjila yikwawu, tunakukeña kulondela chakutalilahu chaYesu. Twatela kufumisha mudi etu yilwilu niyaaku yahelayi Yehova. Neyi tulondela iji njila tukwikala nachinleji chitooka nawa twakadiluñisha wumi haya nyaaka. (Yow. 17:3; 1 Pet. 3:21) Anukenu nenu Yehova hamba kahimpa nshimbi jindi kwesekeja nachitunakukeña etuku. Ilaña etu aweni twatela kuhimpa kulonda twovwahileña nshimbi jindi.—Isa. 1:16-18; 55:9.
16. Muloñadi chimwatela kutwalekelahu kukaana kufwila kwatama?
16 Twalekenuhu kukaana kufwila kwatama. Nihanyima yakwila munapapatishewi dehi, mwatela kutwalekahu kukaana kufwila kwatama. Talenu chuma chamumwekeneni Maurício. Hadiñayi kansi watachikili kudikama nawakwawu amayala. Nkumininaku wadibulakeni nawantu jaYehova nawa watachikili kudiza Bayibolu. Hanyima yakuhimpa chihandilu chindi wapapatisheweli mu 2002. Hela chakwila namukalakeli Yehova hadi yaaka yayivulu, Maurício wahosheli nindi: “Mpinji yikwawu nalwishileña nakufwila kwatama.” Hetejaña chumichi kumuzeyeshaku. Ilaña wahosheli nindi: “Nakoleshewaña muloña neluka nami neyi nibula kwila iyi yuma, nukumuzañalesha Yehova.” *
17. Chumanyi chinayitiyishi kuwaha munsañu yamumwekeneni Nabiha?
17 Lombenu kulonda Yehova ayikwashi nawa shindamenenu haspiritu yindi bayi hañovu jenuku. (Ñal. 5:22; Fwili. 4:6) Twatela kuzata nañovu chikupu neyi chakwila tunakukeña kuvuula wuntu wawukulu nikuwuleka chikupu. Talenu chuma chamumwekeneni mumbanda wejina daNabiha. Atata yindi amushiyili hadiñayi hohu nayaaka 6. Wahosheli nindi: “Chumichi channeñesheli nankashi.” Chakuliliyi Nabiha wekalili wazuwa nankashi nawa wakuma muchima. Watachikili kulandisha yitumbu yashetana, amukasili nawa washakamini yaaka yayivulu mukaleya. Watachikili kudiza Bayibolu nawaYinsahu ayili nakuhempula kukaleya. Nabiha watachikili kuhimpa chikupu. Wahosheli nindi: “Yaaku yami yikwawu yinnadiña nayu yadiña yaswayi kuleka. Ilaña chadiña chakala kuleka kupepa makanya.” Nabiha wakabakeni kubadika hadi chaaka chimu. Nkumininaku walekeli kupepa. Watwesheli ñahi? Wahosheli nindi, “Chuma chabadika kulema kulomba kudi Yehova mpinji yejima, dikwankwashili kuleka.” Ichi walejaña akwawu nindi: “Nelukili chikupu nami neyi ami, natwesheli kuhimpa kulonda nimuzañaleshi Yehova dikwila nawu muntu wudi wejima wukutwesha!” *
MUNETELI KUSHIKAHU KULONDA MUPAPATISHEWI!
18. Kwesekeja na 1 AKorinda 6:9-11, yumanyi yineli ambuña aYehova amavulu?
18 Mumafuku awapostolu, amayala niambanda amakwawu atondeliyi Yehova kulonda akayuuli hamu naKristu, adiñahu nayilwilu yatama henohu kanda ekali akaKristu. Chakutalilahu, adiña akawujila, akawutumwa niamakombi. Hela chochu nawukwashu waspiritu yaNzambi yajila, atwesheli kuhimpa wuntu wawu. (Tañenu 1 AKorinda 6:9-11.) Chochimu nimakonu, Bayibolu yinakwashi antu amavulu nankashi kuhimpa yihandilu yawu. * Analeki yaaku yatama yayikalilileña kuleka. Chakutalilahu chawu chinakumwekesha nawu ninenu munateli kuhimpa wuntu wenu nikuleka yilwilu yatama kulonda mushikuhu kupapatishewa.
19. Yumanyi yitukahanjeka muchibaaba chinalondelihu?
19 Kubombela hakuzata nañovu kulonda avuuli wuntu wawukulu, antu anakukeña kupapatishewa atela kuzata nañovu kulonda avwali wuntu wawuha. Chibaaba chinalondelihu chikashimuna chitunateli kwila mwenimu, nichinateli kutukwashawu antu amakwawu.
KAMINA 41 Tiya Kulomba Kwami
^ para. 5 Hakwila tushikihu kupapatishewa, twatela kuhimpa wuntu wetu. Achinu chibaaba chikutukwasha kwiluka yilwilu yawuntu wawukulu, muloña waweni wutwatela kuyivuulila nichitunateli kuyivuula. Chibaaba chinahiñihu chikashimuna chitunateli kuvwala wuntu wawuha nihanyima yakupapatishewa.
^ para. 3 KULUMBULULA MAZU: “Kuvuula wuntu wawukulu” kwatalisha mukuleka kwila yuma niyaaku yamuneñeshaña Yehova. Chumichi chatela kuzatika henohu muntu kanda apapatishewi.—Efwe. 4:22.
^ para. 10 Neyi munakukeña nsañu jikwawu, talenu chibaaba chinakwila nawu “Bayibolu Yahimpaña Yihandilu Yawantu, mutu nawu ‘Nakeñeleña Kufunta Kudi Yehova,’” muKaposhi Kakutalila kaApril 1, 2012.
^ para. 16 Neyi munakukeña nsañu jikwawu, talenu chibaaba chinakuhosha nawu “The Bible Changes Lives—‘They Were Very Kind to Me,’” chasonekeliwu muKaposhi Kakutalila kaMay 1, 2012.
^ para. 17 Neyi munakukeña nsañu yikwawu, talenu chibaaba chinakuhosha nawu “Bayibolu Yahimpaña Yihandilu Yawantu, ‘Nekalili Kansi Wamumbanda Wazuwa Nawa Wakuma Muchima’” muKaposhi Kakutalila kaOctober 1, 2012, kaEngilishi.
^ para. 18 Talenu chikasha chinakwila nawu “ Bayibolu Yahimpaña Yihandilu Yawantu.”
^ para. 64 KULUMBULULA MWEVULU: Kuleka yilwilu niyaaku yatama kudi neyi kuvuula chakuvwala chachikulu.
