1. Bible i zir ṭan hmaa i nun chu eng ang nge a nih?

 JEHOVA Thuhretute nêna Bible i zir ṭan hmaa i nun chu eng ang nge a nih? Kan zînga tam tak chuan ngaihtuah lêt ringawt pawh kan duh lo ngei ang. Kan pâwn lam lan dân leh miziate chu he khawvêlin a ngaihhlutte—thil dik leh dik lo chungchânga khawvêl tehnate—thununa a awm ngei a rinawm. Chutiang a nih chuan, ‘khawvêlah hian beiseina rêng nei lo leh Pathian lovin kan awm a ni.’ (Eph. 2:12) Mahse, Bible kan zir hnu chuan kan nun kawng chu thlâk danglam a ni ta!

2. Bible i zir hnu chuan eng nge i hmuh chhuah?

² Bible i zir hnu chuan, nangmah hmangaih êm êmtu vânah Pa i nei tih i hria a. Jehova tihlâwm leh amah chibai bûktute zînga tel i duh chuan i nun dân te, pâwn lam lan dân te, leh i ngaihtuah dânte chu nasa taka thlâk danglam a ngai tih i hre ta a. A tehna sâng tak mila nun chu i zir a ngai a ni.—Eph. 5:3-5.

3. Kolossa 3:9, 10-a sawi angin, Jehova’n eng ti tûrin nge min duh a, he thuziakah hian eng nge kan sawiho vang?

³ Min Siamtu leh kan Pa vâna mi Jehova chuan a chhûngkaw zînga mite neih tûr nungchang chungchânga thu tlûkna siam tûrin dikna a nei a. Chu bâkah, baptisma kan chan hmain, theih tâwp chhuaha ‘mihring hlui chu a thiltihte chawpa hlîp thla’ tûrin min phût a ni. * (Kolossa 3:9, 10 chhiar rawh.) He thuziak hian baptisma chang duhte chu hêng zawhna pathumte chhâng thei tûrin a ṭanpui ang: (1) “Mihring hlui” chu eng nge ni? (2) Engvângin nge chu chu Jehova’n hlîp thla tûra  min fuih? (3) Engtin nge kan hlihthlâk theih? tihte hi. Baptisma chang tawhte tân chuan he thuziak hian kan mihring hlui miziate nei leh tawh lo tûrin min ṭanpui ang.

4. Engtin nge mi chuan “mihring hlui” thununa a awm hunah thil a tih ṭhin?

⁴ “Mihring hlui” thununa awm chuan tisa mi angin a ngaihtuahin thil a ti tlângpui ṭhîn. Ani chu mahni hmasial tak, thinur hma tak, lâwm nachâng hre lo, leh chapo tak a ni thei a. Saruak lem leh thuziakte en leh nungchang bawlhhlawhna emaw, tharum thawhna emaw lam hawi film en chu nuam a ti thei a ni. Ani chuan mize ṭha ṭhenkhat a neiin, thil ṭha lo a sawite leh a tihte avângin mahni inthiam lohna a nei pawh a ni thei. Mahse, a ngaihtuahna leh a nungchangte thlâk danglam tûrin chêttîrtu a nei lo a ni.—Gal. 5:19-21; 2 Tim. 3:2-5.

5. Mihring hlui hlihthlâk chungchângah eng rilru put hmang inâwm tak nge kan neih ang? (Tirhkohte 3:19)

⁵ Ṭha famkim lo kan nih avângin, kan thinlung leh rilru aṭanga ngaihtuahna ṭha lo leh châkna ṭha lo zawng zawng paih bo vek thei tu mah kan awm lo. A châng chuan, a hnua kan inchhîr lehna tûr thute sawiin, thilte kan ti ṭhîn a. (Jer. 17:9; Jak. 3:2) Mahse, mihring hlui kan hlihthlâk hian tisa lam ngaihtuahna leh thiltihte chuan min thunun tawh lo va. Mihring thar kan ni tawh a ni.—Is. 55:7; Tirhkohte 3:19 chhiar rawh.

6. Engvângin nge Jehova’n mihring hlui mizia ngaihtuahna ṭha lo leh chîn dân ṭha lote bânsan tûra min fuih?

⁶ Jehova chuan min hmangaih êm avâng leh hlim taka nun hmang tûra min duh avângin ngaihtuahna ṭha lote leh chîn dân ṭha lote bânsan tûrin min fuih a. (Is. 48:17, 18) Ani chuan châkna sual thununa awmte’n mahni leh an vêla awmte an tina ṭhîn tih a hria a. Mahni leh mi dangte an tina hmuh chu hrehawm a ti a ni.

7. Rom 12:1, 2-naa sawi angin, duh thlan tûr eng nge kan neih?

⁷ Kan ṭhiante leh chhûngte zînga ṭhenkhat chuan kan mizia thlâk danglam kan tum avângin a tîr chuan min nuihsawh pawh a ni thei. (1 Pet. 4:3, 4) Anni chuan kan duh apiang ti tûrin dikna kan nei a, mi dangte’n kan tih tûrte min hrilh a ngai lo niin an sawi mai thei bawk. Mahse, Jehova tehna  hnâwltute chuan zalênna dik tak an nei lo. A nihna takah chuan, Setana thuneihna hnuaia awm he khawvêl thununin an awm zâwk a ni. (Rom 12:1, 2 chhiar rawh.) Kan za hian duh thlan tûr kan nei a ni: Sual leh Setana khawvêl thununa awm mihring hlui angin kan awm zawm zêl thei a, a nih loh leh tûn dinhmuna a ṭha thei ang bera Jehova min siam ṭhatna chu kan pawm thei a ni.—Is. 64:8.

8. Ngaihtuahna ṭha lo leh chîn dân ṭha lote bânsan tûrin engin nge min ṭanpui thei?

⁸ Jehova chuan ngaihtuahna ṭha lo leh chîn dân ṭha lote bânsan tûr chuan theih tâwp chhuah leh hun pêk a ngai dâwn tih a hria a. (Sâm 103:13, 14) Mahse, Bible, thlarau thianghlim, leh a inawpna pâwl hmangin inthlâk danglam tûra kan mamawh finna te, chakna te, leh ṭanpuinate min pe a ni. Eng emaw chen chu a ṭanpuina i dawng tawh ngei ang. Mihring hlui hlîp thlaa baptisma chang thei khawpa hmasawn chho zêl tûra min ṭanpuitu rahbi pawimawh ṭhenkhat i lo sawiho vang u.

9. Bible-in eng ti tûrin nge a ṭanpui theih che?

⁹ Ngun taka mahni inendik nân Bible hmang rawh. Bible hi dârthlalang ang a ni a; i ngaihtuah dân te, thusawi dân te, leh thiltih dânte endik tûrin a ṭanpui thei che a ni. (Jak. 1:22-25) Bible zirpuitu che leh thlarau lama puitling Kristian unaute chuan thurâwnte an pe thei che a. Entîr nân, i chakna laite leh chak lohna laite hre tûrin Bible hmangin an ṭanpui thei che a. Chîn dân ṭha lote hneh theih dân chungchânga fuihna ṭha tak tak târ langtu Bible ṭanchhan thu leh hla chhuahte zawng hmu tûrin an ṭanpui thei bawk che a ni. Chu bâkah, Jehova chu ṭanpui tûr chein a inpeih reng a. Ani chu i thinlunga awmte hretu a nih avângin i tâna ṭanpuitu ṭha ber a ni. (Thuf. 14:10; 15:11) Chuvângin, nî tin a hnênah ṭawngṭai la, Bible zir ziah ang che.

10. Elie-a thiltawn aṭangin eng nge i zir?

¹⁰ Jehova tehnate chu a ṭha ber tih ring tlat rawh. Jehova’n ti tûra min phût apiangte chu kan hlâwkpui thei a. A tehnate mila nungte chuan mahni inzahna te, nuna thiltum te, leh hlimna dik takte an nei a ni. (Sâm 19:7-11) Chumi nêna inkalh takin, Jehova tehna hnâwltute chuan tisa lam thiltiha an inhman avângin a sawhkhâwkte chu an tuar ṭhîn. Pathian tehnate hnâwl chungchânga Elie-a thusawi hi lo chhinchhiah rawh. Ani chu Jehova hmangaihtu nu leh pate enkawlna hnuaia seilian a ni a. Mahse, a rawn tleirâwl chhoh chuan ṭhian sualte a kâwm a. Tichuan, ruihhlo hman sual te, nungchang bawlhhlawhnaa inhman te, leh rûkrûkte chu a chîng chho ta a ni. Amah ngeiin a thin a chhiat thu leh a nunrâwn chhoh tial tial thu a sawi a. “Kristiante tâna tih loh tûr thilte chu ka ti deuh vek,” tiin a sawi belh bawk. Mahse, Elie-a chuan a tleirâwl chhoh laia a thu hriatte chu a theihnghilh lo. A tâwpah chuan, Bible a zir ṭha leh a. Theih tâwp chhuaha a chîn dân ṭha lote a bânsan hnu kum 2000-ah baptisma a chang a ni. Engtin nge Jehova tehnate mila nun chu a hlâwkpui? Elie-a chuan: “Tûnah chuan, rilrua thlamuanna leh chhia leh ṭha hriatna thiang tak ka nei tawh,” * tiin a sawi. He thiltawnin a târ lan angin, Jehova tehna hnâwltute chuan mahni an intina ṭhîn a. Chuti chung pawhin, Jehova chuan anni chu inthlâk danglam tûrin ṭanpui a duh a ni.

11. Jehova huat zâwngte chu engte nge ni?

¹¹ Jehova huat zâwngte chu huat tum rawh. (Sâm 97:10) Bible chuan Jehova’n “mit chapo  te, lei dawthei te, pawi khawih lo thisen chhuahna kut te” chu a hua tih a târ lang a. (Thuf. 6:16, 17) Ani chuan “thisen chhuah hmang leh bum hmang mi chu a ten riau ṭhîn.” (Sâm 5:6) Chutiang rilru put hmang leh thiltihte chu a huat êm avângin, Nova hun laia lei pumpui inpâwngnêknaa tikhattu mi suaksual zawng zawng chu a ti boral vek a ni. (Gen. 6:13) Entîrna dang hi han ngaihtuah teh. Zâwlnei Malakia hmangin, Jehova chuan sualna nei lo an kawppuite an ṭhen theih nâna bumtute chu a hua tih a sawi a. Amah an biakna a pawm loh bâkah, an nungchang avângin an chungah ro a la rêl dâwn a ni.—Mal. 2:13-16; Heb. 13:4.

12. ‘Sual lam hua’ tih awmzia chu eng nge ni?

¹² Jehova chuan ‘sual lam haw’ tûrin min duh a. (Rom 12:9) “Hua” tih thu mal hian duh lohna nasa tak a kâwk a; duh lo tak zet, a tena ten tihna a ni. Ei tûr ṭawih chhe tawh ei tûra tih ni ta la, i duh loh dân tûrzia mai chu han mitthla teh. I ngaihtuah ringawt pawhin i luak a chhuak hial thei ang. Chutiang bawkin, Jehova’n thil sual nia a sawite ti anga inngaihtuah chhin ringawt pawh a tenin kan ten tûr a ni.

13. Engvângin nge kan ngaihtuahna kan vên ṭhat ang?

¹³ I ngaihtuahna chu vêng ṭha rawh. Kan ngaihtuahna hian kan thiltihte a thunun a. Chuvângin, Isua chuan sual lian tak min tihtîr theitu ngaihtuahnate chu hnâwl tûrin min hrilh a ni. (Mt. 5:21, 22, 28, 29) Kan Pa vâna mi tihlâwm chu kan duh a ni lâwm ni? Chuti a nih chuan, kan rilrua lo lût ngaihtuahna ṭha lote hnâwl nghâl vat chu a va pawimawh tak êm!

14. Kan thusawiin kan chungchâng eng nge a târ lan a, eng zawhnate nge kan inzawh ang?

¹⁴ I thusawiah fîmkhur rawh. Isua chuan: “Kaa chhuakte erawh chu thinlung aṭanga lo chhuak a ni,” tiin a sawi. (Mt. 15:18) Ni e, kan thusawi hian kan chhûng lam nihna a târ lang nasa ṭhîn hle. Chuvângin, hêng zawhnate hi inzâwt ang che: ‘Thu dik sawinain buaina min thlen dâwn a nih pawhin, dâwt sawi loh chu ka tum tlat em? Kawppui nei tawh ka nih angin, ka kawppui ni lo mi dangte chu chhai lo tûrin ka fîmkhur em? Ṭawngkam bawlhhlawh hman loh chu ka tum tlat em? Miin min tihlungnih loh hian dam takin ka chhâng lêt em?’ tihte hi. Chûng zawhnate ngun taka ngaihtuah chu a ṭangkai hle tih i hmu ang. I thusawite chu  kawrkilh ang a ni a. I kawrkilhte i phelh chuan, i thawmhnaw hâk lai chu phelh a awlsam lehzual ngei ang. Chutiang bawkin, i thusawiah ṭawng chaltlai te, dâwt thu te, leh ṭawngkam bawlhhlawhte hmang lo tûra theih tâwp i chhuah chuan mihring mize hlui hlihthlâk chu a awlsam lehzual tih i hmu ang.

15. Kan mihring hlui chu “khenbehin” a awm tih awmzia chu eng nge ni?

¹⁵ Hma lâk vat inhuam rawh. Tirhkoh Paula’n kan mize thlâk danglam a pawimawhzia min zirtîr nân entîrna ṭha tak a hmang a. Kan mihring hlui chu “khenbehin” a awm tûr a ni tih a ziak a. (Rom 6:6) Thu danga sawi chuan, Krista entawn tûr siam chu zui kan duh tûr a ni. Jehova huat zâwng rilru put hmang leh chîn dânte chu kan paih bo tûr a ni a. Chutianga kan tih chauhvin, chhia leh ṭha hriatna thiang leh chatuana nun beiseina kan nei thei ang. (Joh. 17:3; 1 Pet. 3:21) Jehova chuan min tihlim tûrin a tehnate chu a thlâk danglam ngai lo vang. Chu aiin, a tehnate kan zui theih nân keimahni kan inthlâk danglam a ngai zâwk a ni.—Is. 1:16-18; 55:9.

16. Engvângin nge tisa lama chak lohnate do zawm zêl chu kan tum tlat ang?

¹⁶ Tisa lama chak lohnate chu do zawm zêl rawh. Baptisma i chan hnuah pawh, tisa châknate chu i do zawm zêl a ngai a. Maurício-a thiltawn hi han ngaihtuah teh. A tleirâwl chhoh chuan neih inang kawp chîng mi a ni a. A tâwpah, Jehova Thuhretute nên intawngin Bible a zir ṭan a. A nuna inthlâk danglamnate a siam hnu chuan, kum 2002-ah baptisma a chang ta a ni. Kum tam tak chhûng Jehova rawng a bâwl tawh chung pawhin, Maurício-a chuan: “Châkna sual ka do a ngaih chângte a la awm,” tiin a sawi. Mahse, chumi avânga lunghnual chu a duh lo. Chu aiin, “Chûng châknate ka tihpuitlin loh hian Jehova a lâwm tih ka hriat avângin, thlamuanna ka nei a ni,” * tiin a sawi.

17. Nabiha-i thiltawn aṭangin eng chakna nge i hmuh?

¹⁷ Jehova ṭanpuina dîl la, mahni chakna ni lovin, a thlarau thianghlim rinchhan rawh. (Gal. 5:22; Phil. 4:6) Mihring hlui hlîp thla a, bânsan hlen kan duh chuan, theih tâwp kan chhuah tûr a ni. Nu pakhat Nabiha-i thiltawn hi han ngaihtuah teh. Kum ruk mi lek a nihin a pain a kalsan a. Ani chuan, “Chu chuan ka rilru a tina hle,” tiin a sawi. A lo puitlin chhoh  chuan, Nabiha-i chu mi thinchhe tak a rawn ni a. Ruihhlo zawrhnaahte a tel a, man a tâwk a, kum eng emaw zât tân ina khung a ni. Tân in va tlawhtu Thuhretute chuan ani chu Bible an zirpui ṭan a. Nabiha-i chuan inthlâk danglamna nasa tak a siam a ni. “Chîn dân ṭha lo ka neih ṭhenkhat chu bânsan harsa ka ti hran lo; mahse, mei zûk bânsan erawh harsa ka ti tak zet,” tiin a sawi. Nabiha-i chuan kum khat aia tam a beih hnu chuan a bânsan thei ta a ni. Engtin nge a bânsan theih? Ani chuan, “Eng dang zawng aiin, Jehova hnêna ṭawngṭai fan fannain bânsan thei tûrin min ṭanpui a ni,” tiin a sawi. Tûnah chuan mi dangte hnênah: “Jehova tihlâwm ka duh avânga ka inthlâk danglam thei a nih chuan, tu pawhin an thei tih ka chiang!” * tiin a sawi tawh a ni.

18. Korinth thawn khat 6:9-11-a sawi angin, Pathian chhiahhlawh tam takte chuan eng nge an tih theih?

¹⁸ Jehova’n Krista rorêlpui tûrte atâna a thlan kum zabi khatnaa mi ṭhenkhatte pawh chîn dân ṭha lote thununin an lo awm tawh ṭhîn a. Entîr nân, anni chu uirê te, mawngkawhur te, leh rûk hmangte an ni tawh ṭhîn a. Mahse, Pathian thlarau thianghlim ṭanpuinain, an miziate chu an thlâk danglam thei a ni. (1 Korinth 6:9-11 chhiar rawh.) Chutiang bawkin, tûn laiah pawh Bible chuan mi maktaduai tam tak chu an nunah inthlâk danglamna siam tûrin a ṭanpui tawh a. * Anni chuan awlsam taka bânsan mai theih loh chîn dân ṭha lote chu an hneh thei a ni. An entawn tûr siamte chuan nang pawh, baptisma chang thei tûrin i miziate chu i thlâk danglam theiin, chîn dân ṭha lote pawh i bânsan thei tih a finfiah a ni.

19. A dawta thuziakah eng nge kan sawiho vang?

¹⁹ Mihring hlui hlîp thla tûra theih tâwp chhuah a ngaih bâkah, baptisma chang duhte chuan mihring thara inthuam tûrin theih tâwp an chhuah a ngai bawk. A dawta thuziakah chuan, chutianga kan tihtheih dân leh mi dangte’n min ṭanpui theih dân sawiho a ni ang.