XNAQʼTZBʼIL 10
Jaku kyaj ttzaqpiʼna aju ojtxe tanqʼibʼila
«Ma tzʼel kykotpiʼne aju ojtxi kytene tukʼix ju ojtxi kybʼinchbʼene» (COL. 3:9).
BʼITZ 29 In jaw qnimsaʼne tbʼiya
AJU KʼELEL QNIKʼ TIʼJ *
1. ¿Tzeʼntoq qanqʼibʼil at tej naʼmxtoq qxnaqʼtzan tiʼj Tyol Dios?
¿NAʼNXPE tuʼna tzeʼntoq tanqʼibʼila at tej naʼmxtoq t-xnaqʼtzana tiʼj Tyol Dios? Nim qe nya qgan tuʼn ttzaj qnaʼn. Bʼalo iktoq qmod ex qximbʼetz ik tzeʼn kye xjal mintiʼ in che ajbʼen te Jehová. Qa ikju, mintiʼtoq qʼuqbʼil qkʼuʼj ex mintiʼtoq Dios qukʼil (Efes. 2:12). Pero chʼexpaj jlu tej t-xi tzyet tuʼn qxnaqʼtzan tiʼj Tyol Dios.
2. ¿Tiʼ el tnikʼa tiʼj akux in xnaqʼtzana tiʼj Tyol Dios?
2 Tej t-xnaqʼtzana tiʼj Xjan Uʼj, el tnikʼa tiʼj qa kʼujlaʼna tuʼn Jehová tuʼnju in nok te tbʼanel Mambʼaj. Ax ikx el tnikʼa tiʼj qa iltoq tiʼj tuʼn tbʼant chʼixpubʼil tuʼna toj tanqʼibʼila tuʼntzun ttzalaj Jehová tiʼja ex tuʼn toka te tmajen. Ex xi t-xnaqʼtzan tibʼa tuʼn tok tqʼoʼna kyoklen qe tkawbʼil Jehová (Efes. 5:3-5).
3. a) Ik tzeʼn in tzaj tqʼamaʼn Colosenses 3:9 ex 10, ¿tiʼ taj Jehová tuʼn tbʼant quʼn? b) ¿Tzeʼn kʼonil xnaqʼtzbʼil lu qiʼj?
3 Tuʼnju a Jehová Bʼinchal qe ex in nok te Qman, at toklen tuʼn ttzaj tqʼamaʼn qe alkye qmod ktel tuʼntzun qten kyxol toj tja. In tzaj tqʼamaʼn jlu kye qeju kyaj tuʼn kybautisarin: «Ma tzʼel kykotpiʼne aju ojtxi kytene tukʼix ju ojtxi kybʼinchbʼene» (kjawil uʼjit Colosenses 3:9, 10). * ¿In kubʼpe t-ximen teya tuʼn tbautisarina? Kʼonil xnaqʼtzbʼil lu tiʼja tuʼn tok tbʼiʼna tzaqʼwebʼil kyiʼj oxe xjel lu. Tnejel, ¿tiʼ aju ojtxe qanqʼibʼil? Tkabʼin, ¿tiquʼn taj Jehová tuʼn tkyaj qtzaqpiʼn? Ex toxin, ¿tzeʼn jaku bʼant quʼn? Qatzun ya o qo bautisarin, kʼonil xnaqʼtzbʼil lu qiʼj tuʼn miʼn t-xi qbʼinchaʼn juntl maj qe nya bʼaʼn ik tzeʼn ojtxe.
¿TIʼ AJU OJTXE QANQʼIBʼIL?
4. ¿Tiʼ in bʼant tuʼn jun xjal naʼmx tkyaj ttzaqpiʼn aju ojtxe tanqʼibʼil?
4 Aju xjal naʼmx tkyaj ttzaqpiʼn aju ojtxe tanqʼibʼil, in xi tbʼinchaʼn aju tajbʼil tchibʼjal, toj juntl yol, in bʼinchan il. Bʼalo jun rat in tzaj tqʼoj, oʼkx in ximen tiʼjx, mintiʼ in qʼon chjonte ex in jawlo tnimsan tibʼ. Axlo ikx, in nok tkeʼyin pornografía ex qe película in netz yekʼin yaẍbʼil moqa bʼiybʼil toj. Atlo qe tbʼanel tmod ex in tzajlo tbʼis tiʼj nya bʼaʼn in bʼant tuʼn, pero mintiʼ in nok tilil tuʼn tuʼn tkyaj ttzaqpiʼn (Gál. 5:19-21; 2 Tim. 3:2-5).
Aj in kyaj qtzaqpiʼn ojtxe tten qanqʼibʼil, ya mlay kubʼ qiʼj kyuʼn nya bʼaʼn qmod ex qbʼinchbʼen. (Qʼonka twitza tiʼj taqikʼ 5). *
5. Aj tkyaj qtzaqpiʼn ojtxe qanqʼibʼil, ¿ape t-xilen jlu qa ya mlay qo el txalpaj? (Hechos 3:19).
5 Tuʼnju aj il qoʼ, kukx jaku che ten nya bʼaʼn qximbʼetz ex nya bʼaʼn qajbʼil. At maj, jaku txi qbʼinchaʼn moqa jaku txi qqʼamaʼn jun tiʼ ex yajxitl in tzaj qbʼis tuʼn (Jer. 17:9; Sant. 3:2). Pero qa ma kyaj qtzaqpiʼn aju ojtxe qanqʼibʼil, ya mlay kubʼ qiʼj kyuʼn nya bʼaʼn ex kʼelel kynikʼ xjal tiʼj qa otoq chʼexpaj qmod (Is. 55:7; kjawil uʼjit Hechos 3:19).
6. ¿Tiquʼn in tzaj tqʼamaʼn Jehová qe tuʼn tkyaj qtzaqpiʼn qe nya bʼaʼn qximbʼetz ex qbʼinchbʼen?
6 Tuʼnju kʼujlaʼn qoʼ tuʼn Jehová ex taj tuʼn qtzalaj toj qanqʼibʼil, in tzaj tqʼamaʼn qe tuʼn tkyaj qtzaqpiʼn qe nya bʼaʼn qximbʼetz ex qbʼinchbʼen (Is. 48:17, 18). Ojtzqiʼn tuʼn Jehová qa tzul nya bʼaʼn qiʼj ex kyiʼj txqantl qa ma txi qbʼinchaʼn aju nya bʼaʼn qajbʼil. Ex in tzaj tbʼis Jehová aj tok tkeʼyin jlu.
7. Ik tzeʼn in tzaj tqʼamaʼn Romanos 12:1 ex 2, ¿tiʼ il tiʼj tuʼn tkubʼ qximen tuʼn tbʼant quʼn?
7 Bʼalo jaku che ok ten toj qja ex qe qamiw xmayil qiʼj aj tok tilil quʼn tuʼn tbʼaj qchʼexpuʼn qmod (1 Ped. 4:3, 4). Jakulo tzaj kyqʼamaʼn qa aqoʼ qo kbʼel ximente tzeʼn qo anqʼil ex qa ni jun at toklen tiʼj. Pero nya tzaqpiʼn ateʼ xjal mintiʼ in xi kybʼiʼn qe tkawbʼil Jehová, sino in xi kyqʼoʼn ambʼil te Tajaw il tuʼn kyanqʼin ik tzeʼn tajbʼil (kjawil uʼjit Romanos 12:1, 2). Qkyaqilx il tiʼj tuʼn qximen tiʼj qa kukx kxel qbʼinchaʼn nya bʼaʼn, aju at toklen tukʼil il ex tajbʼil Satanás moqa kxel qqʼoʼn ambʼil te Jehová tuʼn tbʼaj tchʼexpuʼn qmod tuʼntzun qok te tbʼanel xjal (Is. 64:8).
¿TZEʼN JAKU KYAJ QTZAQPIʼN OJTXE QANQʼIBʼIL?
8. ¿Tiʼ jaku tzʼonin qiʼj tuʼn tkyaj qtzaqpiʼn qe nya bʼaʼn qximbʼetz ex qbʼinchbʼen?
8 Ojtzqiʼn tuʼn Jehová qa in xi tiʼn ambʼil ex qa il tiʼj tuʼn tok tilil quʼn tuʼn tkyaj qtzaqpiʼn qe nya bʼaʼn qximbʼetz ex qbʼinchbʼen (Sal. 103:13, 14). Pero in nonin Jehová qiʼj aj ttzaj tqʼoʼn qipumal ex qnabʼil. In bʼant jlu tuʼn aj tajbʼen Tyol tuʼn, xewbʼaj xjan ex ttnam. Olo tzʼok tkeʼyina tzeʼn o tzʼonin Jehová tiʼja. Atzun jaʼlo, qo xnaqʼtzan tiʼj tiʼ jaku bʼant tuʼna tuʼn tkyaj ttzaqpiʼna aju ojtxe tanqʼibʼila ex tuʼn kyjapun requisito tuʼna tuʼn tbautisarina.
9. ¿Tzeʼn jaku tzʼonin Tyol Dios tiʼja?
9 Bʼaʼn tuʼn tajbʼen Tyol Dios tuʼna tuʼn tel tnikʼa tiʼj tbʼinchbʼena. In nok Tyol Dios ik tzeʼn jun espej ex jaku tzʼonin tiʼja tuʼn tel tnikʼa kyiʼj t-ximbʼetza, kyiʼj tyola ex tiʼj tmoda (Sant. 1:22-25). Jaku tzʼonin erman in qʼon xnaqʼtzbʼil teya ex junjuntl erman tuʼn kybʼant chʼixpubʼil tuʼna. ¿Tzeʼn jaku bʼant kyuʼn? Jaku tzʼajbʼen Tyol Dios kyuʼn tuʼn t-xi kyyekʼin teya alkyeqe tiʼchaq nya kwest in nela toj twitza ex alkyeqe chʼixpubʼil il tiʼj tuʼn tbʼant tuʼna tuʼntzun tkyaj ttzaqpiʼna qe nya bʼaʼn. Ax ikx, taj Jehová tuʼn tonin tiʼja ex mas tbʼanel onbʼil jaku txi tqʼoʼn teya tuʼnju ojtzqiʼn tuʼn tiʼ tkuʼx toj tanmiya (Prov. 14:10; 15:11). Tuʼntzunju, tzʼok tilil tuʼna tuʼn tnaʼna Dios ex xnaqʼtzana tiʼj Xjan Uʼj tkyaqil qʼij.
10. ¿Tiʼ xnaqʼtzbʼil in nel tiʼna tiʼjju bʼaj tiʼj Elie?
10 Qeʼk tkʼuʼja tiʼj qa tbʼanel qe tkawbʼil Jehová. Jaku qo tzalaj tuʼn tkyaqilju in tzaj tqʼamaʼn Jehová qe ex jaku ten jun tbʼanel qanqʼibʼil. Atzun jlu o tzʼok kykeʼyin qeju in xi kynimen aju in tzaj tqʼamaʼn Xjan Uʼj (Sal. 19:7-11). Atzun qeju in che ok lepeʼ tiʼjju tajbʼil kychibʼjal, in tzaj nim nya bʼaʼn kyiʼj. Qbʼinx tiʼ tqʼama Elie tiʼjju jaku bʼaj qa mintiʼ ma qo nimen te Jehová. In che ajbʼentoq tman Elie te Jehová, pero xi tjyoʼn qe nya bʼaʼn tamiw tej tokx toj tkuʼxumal. Xi tzyet tuʼn tajbʼen droga tuʼn, tuʼn telqʼan ex tuʼn tyaẍin. Chʼexpaj tmod ex ok te nya bʼaʼn xjal. Tqʼama jlu: «Toj nya nim yol, xi nbʼinchaʼne tkyaqilju mintiʼ tuʼn tbʼant tuʼn jun okslal». Pero mintiʼ ikʼ tnaʼl tuʼn aju xi xnaqʼtzaʼn te kyuʼn tman. Tuʼntzunju, xi tzyet tuʼn t-xnaqʼtzan juntl maj tiʼj Tyol Dios. Ok tilil tuʼn tuʼn tkyaj ttzaqpiʼn qe nya bʼaʼn tbʼinchbʼen ex bautisarin toj abʼqʼi 2000. ¿Alkyeqe kʼiwlabʼil in tzaj tkʼamoʼn tuʼnju in xi tnimen qe tkawbʼil Jehová? Tqʼamatl jlu: «In chin tzalaje ex in kubʼ nnaʼne bʼaʼn». * Tuʼn jlu in nel qnikʼ tiʼj qa in tzaj nya bʼaʼn kyiʼj qeju in nel kyikʼen qe tkawbʼil Jehová. Pero taj Jehová tuʼn tonin kyiʼj tuʼn kybʼant chʼixpubʼil kyuʼn.
11. ¿Alkyeqe tiʼchaq in nel tikʼun Jehová?
11 Bʼaʼn tuʼn tel tikʼuna aju in nel tikʼun Jehová (Sal. 97:10). In tzaj tqʼamaʼn Xjan Uʼj qa in nel tikʼun Jehová «aju xjal in jaw tniman tibʼ, aju xjal nikʼal yol» ex «aju xjal in kubʼ bʼyonte kye qe xjal mintiʼ kyil» (Prov. 6:16, 17). Ax ikx, in che el tikʼun «qe xjal sbʼul ex qe bʼyol xjal» (Sal. 5:6). Nya bʼaʼn in nela kymod xjal lu toj twitz Jehová. Tuʼntzunju, e kubʼ tnajsaʼn qe xjal toj tqʼijlalil Noé tuʼnju otoq noj twitz Txʼotxʼ tuʼn nya bʼaʼn kybʼinchbʼen (Gén. 6:13). Ax ikx, xi tqʼamaʼn Jehová juntl tiʼ in nel tikʼun te profeta Malaquías. Tqʼama qa in nel tikʼun qe xjal in che sbʼun tiʼj kyxuʼjil moqa tiʼj kychmil ex qa in nel kydivorciarin kyibʼ. Mintiʼ in xi tkʼamoʼn Jehová kykʼulbʼil xjal lu ex kxel kyqʼoʼn kwent te (Mal. 2:13-16; Heb. 13:4).
Il tiʼj tuʼn tel qikʼun qe nya bʼaʼn ik tzeʼn in nel qikʼun jun qʼayne wabʼj. (Qʼonka twitza tiʼj taqikʼ 11 ex 12).
12. ¿Tiʼ in bʼant quʼn qa nya bʼaʼn in nela jun tiʼ toj qwitz?
12 In tzaj tqʼamaʼn Jehová jlu qe: «Kyikʼun ele aju mya bʼaʼn» (Rom. 12:9). Qa nya bʼaʼn in nela jun tiʼ toj qwitz, in nel qikʼun ex nya qaj tuʼn tok qqʼoʼn qwitz tiʼj. Qo ximen tiʼj qa ma tzaj qʼamaʼn qe tuʼn t-xi qwaʼn qʼayne wabʼj. ¿Jakupe txi qwaʼn? Mlay ex jaku tzaj molmon qkʼuʼj aj qximen tiʼj. Ax jlu tuʼn tbʼant quʼn kyiʼj tiʼchaq in tzaj tqʼamaʼn Jehová qe tuʼn tel qikʼun.
13. ¿Tiquʼn nim toklen tuʼn tok qxqʼuqin qximbʼetz?
13 Bʼaʼn tuʼn tok t-xqʼuqina aju in kubʼ t-ximana. In xi qbʼinchaʼn aju in kubʼ qximen. Tuʼntzunju, tqʼama Jesús tuʼn tel qikʼun qe nya bʼaʼn ximbʼetz tuʼnju jaku qo kubʼ tzʼaq toj il kyuʼn (Mat. 5:21, 22, 28, 29). Qkyaqilx qaj tuʼn ttzalaj tanmi Jehová quʼn, tuʼntzunju, nim toklen tuʼn tel qikʼun nya bʼaʼn ximbʼetz.
14. ¿Tiʼ in tzaj kyyekʼin qyol ex alkyeqe xjel bʼaʼn tuʼn qximen tiʼj?
14 Ximana kyiʼj tyola. Tqʼama Jesús jlu: «Aju tyol xjal nneʼtz tuj ttziʼ, tuj tanmi xjal in jatz» (Mat. 15:18). Ax tok qe yol lu. Jaku tzʼel kynikʼ txqantl tiʼjju tkuʼx toj qanmi kyuʼn qyol. Tuʼntzunju, bʼaʼn tuʼn tkubʼ t-xjelina jlu: «¿In xipe nqʼamaʼne axix tok maske jaku tzaj nya bʼaʼn wiʼje? Qa o chin kubʼ mojeʼye, ¿in nokpe tilil wuʼne tuʼn miʼn tkubʼ nyekʼine nkʼujlabʼile tiʼj juntl xjal? ¿In nokpe tilil wuʼne tuʼn miʼn nyoline kyiʼj tiʼchaq at toklen tukʼil yaẍbʼil? ¿Tojpe tumel in xi ntzaqʼweʼne aj tok bʼinchaʼn jun nya bʼaʼn wiʼje?». Bʼaʼn tuʼn tel tpaʼna ambʼil tuʼn t-ximana kyiʼj xjel lu. Qa kukx in qo yolin kyiʼj nya bʼaʼn yol, jaku tzʼok qmojbʼaʼn tukʼil noqʼ moqa qʼin in nok tmojbʼaʼn jun xbʼalun. Pero qa ma tzʼel qikʼen nikʼaj yol, yasbʼil ex qeju yol at kyoklen tukʼil yaẍbʼil, kʼonil qiʼj tuʼn tkyaj qtzaqpiʼn ojtxe tten qanqʼibʼil.
15. ¿Tiʼ il tiʼj tuʼn tbʼant quʼn tuʼn tkyaj qqʼoʼn qe nya bʼaʼn qbʼinchbʼen twitz tzeʼ?
15 Bʼinchama qe chʼixpubʼil. Ajbʼen jun techel tuʼn apóstol Pablo tuʼn tel qnikʼ tiʼj qa il tiʼj tuʼn kybʼant chʼixpubʼil quʼn. Tqʼama qa il tiʼj tuʼn tkyaj qqʼoʼn ojtxe tten qanqʼibʼil twitz tzeʼ (Rom. 6:6, TNM). Xi tqʼoʼn Jesús ambʼil tuʼn tjaw yobʼin twitz tzeʼ tuʼnju tajtoq tuʼn ttzalaj Jehová tuʼn. Ax ikx qe, qa qaj tuʼn ttzalaj Jehová quʼn, nim toklen tuʼn tkyaj qtzaqpiʼn qe nya bʼaʼn qbʼinchbʼen ex tuʼn kybʼant chʼixpubʼil quʼn. Qa ma bʼant jlu quʼn, kbʼel qnaʼn bʼaʼn ex ktel qʼuqbʼil qkʼuʼj tuʼn qanqʼin te jumajx (Juan 17:3; 1 Ped. 3:21). Bʼaʼn tuʼn ttzaj qnaʼn qa mlay bʼaj tchʼexpuʼn Jehová qe tkawbʼil noq tuʼn qtzalaj. Sino aqoʼ kbʼantel chʼixpubʼil quʼn ex tuʼn qok lepeʼ kyiʼj tkawbʼil (Is. 1:16-18; 55:9).
16. ¿Tiquʼn kukx kʼokel tilil tuʼna tuʼn tkubʼ tiʼj jun nya bʼaʼn?
16 Kukx tzʼok tilil tuʼna tuʼn tkubʼ kyiʼj nya bʼaʼn. Aj tbautisarina, kukx kʼokel tilil tuʼna tuʼn tkubʼ kyiʼj nya bʼaʼn tajbʼila. Ximana tiʼjju bʼaj tiʼj Maurício. Tgantoq qe xinaq tej tzmatoq kuʼxun. Tej tikʼ ambʼil, ok tojtzqiʼn qe testigo de Jehová ex xi tzyet tuʼn t-xnaqʼtzan tiʼj Tyol Dios. Bʼant chʼixpubʼil tuʼn toj tanqʼibʼil ex bautisarin toj 2002. Ma tzikʼ nim abʼqʼi in najbʼen te Jehová, pero in tzaj tqʼamaʼn jlu: «Waje tuʼn t-xi nqʼamaʼne qa nya oʼkx jun maj o tzʼok tilil wuʼne tuʼn tkubʼ tiʼj nya bʼaʼn wajbʼile». Pero mintiʼ in xi tqʼoʼn ambʼil tuʼn ttzaj bʼaj tkʼuʼj tuʼn jlu. Tqʼamatl Maurício jlu: «In chewix wanmiye aj nximane tiʼj qa in tzalaj Jehová wiʼje qa mintiʼ in xi nbʼinchaʼne aju wajbʼile». *
17. ¿Tiʼ taja tuʼn tbʼant tuʼna tuʼnju ma tzʼok tbʼiʼna aju ikʼ tiʼj Nabiha?
17 Qaninxa onbʼil te Jehová, qaninxa tuʼn ttzaj tqʼoʼn xewbʼaj xjan teya ex miʼn tzʼok qeʼ tkʼuʼja tiʼjxa (Gál. 5:22; Filip. 4:6). Tuʼn tkyaj ttzaqpiʼna ojtxe tten tanqʼibʼila te jumajx, il tiʼj tuʼn tok tilil tuʼna. Qbʼinx aju bʼaj tiʼj jun xuʼj Nabiha tbʼi. Kyaj kolin tuʼn tman tej qʼiʼntoq qaq abʼqʼi tuʼn. Tqʼama jlu: «Tej nkyaj koline tuʼn nmane, kubʼ nnaʼne nim bʼis». Tuʼn jlu, ten nya bʼaʼn tmod ex jun rattoq in tzaj tqʼoj. Ax ikx, ok ten kʼayil droga ex okx qʼoʼn nim abʼqʼi toj cárcel. Xi tzyet tuʼn t-xnaqʼtzan tiʼj Tyol Dios kyukʼil junjun testigo de Jehová in che pon visitaril qe xjal toj cárcel. Tuʼn jlu bʼant nim chʼixpubʼil tuʼn. Tqʼamatl jlu: «Ateʼ junjun tiʼchaq nya kwest ela toj nwitze tuʼn tkyaj ntzaqpiʼne. [...] Pero kwest ela toj nwitze tuʼn tkyaj ntzaqpiʼne sichʼ». Xi tiʼn mas te jun abʼqʼi tuʼn tkyaj ttzaqpiʼn ex kubʼ tiʼj tuʼn. ¿Tiʼ onin tiʼj? Tqʼama jlu: «Kyaj ntzaqpiʼne sichʼ tuʼnju kukx in nnaʼne Dios te Jehová». Ex tqʼama jlu: «Qʼuqli nkʼuʼje tiʼj qa jaku bʼant chʼixpubʼil tuʼn alkyexku xjal ik tzeʼn weye qa taj tuʼn ttzalaj Jehová tuʼn». *
JAKU CHE JAPUN REQUISITO TUʼNA TUʼN TBAUTISARINA
18. Ik tzeʼn in tzaj tqʼamaʼn 1 Corintios 6:9 a 11, ¿tiʼ o bʼant kyuʼn nim tmajen Jehová?
18 Toj tnejel syent abʼqʼi, jaw tskʼoʼn Jehová junjun xinaq ex xuʼj tuʼn kykawin tukʼil Jesús maske otoq bʼant nim nya bʼaʼn kyuʼn. Jun techel, ateʼ junjun otoq che yaẍin, otoq che elqʼan ex ateʼ junjun xinaq otoq pon kykʼuʼj tiʼj juntl xinaq. Pero chʼexpaj kyanqʼibʼil tuʼn tonbʼil xewbʼaj xjan (kjawil uʼjit 1 Corintios 6:9-11). Ax ikx toj ambʼil jaʼlo, o tzʼonin Tyol Dios kyiʼj nim millón xjal tuʼn tchʼexpaj kyanqʼibʼil. * O kyaj kytzaqpiʼn nya bʼaʼn kybʼinchbʼen maske otoq che naqʼet tiʼj. Aju o bʼaj kyiʼj, in tzaj tyekʼin teya qa ax ikx jaku che bʼant chʼixpubʼil tuʼna tuʼn tkyaj ttzaqpiʼna qe nya bʼaʼn ex jaku che japun requisito tuʼna tuʼn tbautisarina.
19. ¿Tiʼ kʼelel qnikʼ tiʼj toj juntl xnaqʼtzbʼil?
19 Kykyaqilx qeju kyaj tuʼn kybautisarin, nya oʼkx kjel kytzaqpiʼn ojtxe tten kyanqʼibʼil, sino ax ikx il tiʼj tuʼn tten akʼaj kymod ex kybʼinchbʼen. Toj juntl xnaqʼtzbʼil, kʼelel qnikʼ tiʼj tzeʼn jaku bʼant jlu quʼn ex tzeʼn jaku che onin txqantl qiʼj.
BʼITZ 41 Bʼintza nnaʼj Diose Mambʼaj Jehová
^ taqik' 5 Qa taj jun xjal in xnaqʼtzan tiʼj Tyol Dios tuʼn tbautisarin, il tiʼj tuʼn tbʼant chʼixpubʼil tuʼn toj tanqʼibʼil. Toj xnaqʼtzbʼil lu, kʼelel qnikʼ tiʼj tiʼ aju ojtxe qanqʼibʼil, tiquʼn il tiʼj tuʼn tkyaj qtzaqpiʼn ex tzeʼn jaku bʼant quʼn. Toj juntl xnaqʼtzbʼil, kʼelel qnikʼ tiʼj tiʼ jaku bʼant quʼn tuʼn kukx tbʼant chʼixpubʼil quʼn maske ya o qo bautisarin.
^ taqik' 3 YOL NIM TOKLEN: Aju tuʼn tkyaj qtzaqpiʼn ojtxe qanqʼibʼil, atz in yolin jlu tiʼjju tuʼn tbʼaj qchʼexpuʼn qmod ex qximbʼetz nya bʼaʼn in nela toj twitz Jehová. Il tiʼj tuʼn kybʼant chʼixpubʼil lu quʼn naʼmxtoq qbautisarin (Efes. 4:22).
^ taqik' 10 Qa taja tuʼn tok tbʼiʼna mas tqanil, jaku jaw tuʼjina xnaqʼtzbʼil «Chʼexpaj kyanqʼibʼil tuʼn Tyol Dios: ‹Wajtoqe tuʼn nmeltzʼaje tukʼil Jehová›», aju etz toj uʼj Aju Xqʼuqil te 1 te abril te 2012.
^ taqik' 16 Qa taja tuʼn tok tbʼiʼna mas tqanil, jaku jaw tuʼjina xnaqʼtzbʼil «La Biblia les cambió la vida: ‹Fueron muy amables conmigo›», aju etz toj La Atalaya te 1 te mayo te 2012.
^ taqik' 17 Qa taja tuʼn tok tbʼiʼna mas tqanil, jaku jaw tuʼjina xnaqʼtzbʼil «La Biblia les cambió la vida: ‹Llegué a ser una joven irritable y agresiva›», aju etz toj La Atalaya te 1 te octubre te 2012.
^ taqik' 18 Qʼonka twitza tiʼj recuadro, « Chʼexpaj kyanqʼibʼil tuʼn Tyol Dios».
^ taqik' 64 TQANIL TIʼJ TILBʼILAL: Aj tkyaj qtzaqpiʼn qe nya bʼaʼn qmod ex qbʼinchbʼen, in nok jlu ik tzeʼn in nel qiʼn jun ttxʼaqin qxbʼalun.
