1. Baibul do so stadilaia neganai, emu mauri be ede bamona?

 IEHOVA ENA WITNES ida Baibul do so stadilaia neganai, emu mauri be ede bamona? Ita momo na asita uramu una nega baita laloa. Reana una nega ai eda lalohadai bona mauri dalana na ina tanobada oromana ena heau dalana heḡereḡerena, eiava tanobada taudia edia lalohadai maoro eiava kerere heḡereḡerena ai ta mauriva. Bema unu ta noho tomava, ita na da ‘asi eda helaro bona asi eda Dirava tanobada ai.’ (Efe. 2:12) To Baibul ta stadilaia neganai unu iboudiai na e idau!

2. Baibul o stadilaia neganai, dahaka o diba?

² Baibul o stadilaia neganai, o diba oi na mai Tamamu guba ai bona ia ese e lalokau henimu badamu. O laloparara bema o uramu Iehova ba hamoalea bona ia e tomadiho heniamu ruma besena lalonai ba noho, emu mauri dalana bona lalohadai ba haidau na namo. Danu o diba iena kara maoromaoro taravatudia ba badina na ḡau badana.​—Efe. 5:3-5.

3. Kolose 3:9, 10 heḡereḡerena, Iehova be e uramu dahaka baita kara, bona ina atikol ai dahaka baita herevalaimu?

³ Ita Ihavarada Tauna bona Tamada, Iehova, na mai ena maoro ena ruma bese baine hamaorodia ede bae mauri toma. Bona e uramu do asita bapatiso neganai, “tau gunana” o mauri gunana ena kara baita koki na namo. * (Kolose 3:9, 10 ba duahi.) Ina atikol ese e uramu bae bapatiso taudia be durudiamu, ini henanadai toi bae haerelai: (1) “Tau gunana” anina be dahaka? (2) Dahaka dainai Iehova na e uramu baita dokia oho  eiava baita rakatania vaitani? (3) Edena dala ai una baita karaia diba? Ita ta bapatiso tauda na, ina stadi ese be durudamu eda mauri gunana ena kara basita karadia lou totona.

4. “Tau gunana” o mauri gunana e maurilaiamu tauna ena kara be ede bamona?

⁴ “Tau gunana” o mauri gunana e maurilaiamu tauna na tauani ḡaudia mo be lalomu bona be karamu. Sibona be helalomu, be badu haraḡamu, tenkiu karana basine hahedinaraiamu, bona be hekokorokumu. Reana ponografi bona matabodaḡa laulaudia, eiava daḡedaḡe muvidia i’itadia karana be moalelaiamu. Momokani, ia na mai ena kara namodia haida, bona reana ena hereva o kara kereredia daidiai be lalohisihisimu. To lalona na dia goada ena lalohadai bona ena kara baine haidaudia.​—Gal. 5:19-21; 2 Tim. 3:2-5.

5. Mauri gunana be baita rakatania diba, a? Mani a herevalaia. (Apos. 3:19)

⁵ Ita na dia ḡoevadae tauda dainai, ita ta na dia heḡereḡere kudouna bona darana amo lalohadai dikadia bona ura dikadia iboudiai baine kokidia diba. Nega haida, baita karamu o baita gwauraimu ḡaudia daidiai baita lalohisihisimu. (Ier. 17:9; Iak. 3:2) To bema mauri gunana baita rakataniamu, tanobada ena kara bona lalohadai ese ita na basie biagudamu. Bona unu kara na da basita karamu.​—Isa. 55:7; Aposetolo Edia Kara 3:19 ba duahia.

6. Dahaka dainai Iehova ese e haḡanidamu lalohadai kereredia bona kara mirodia baita dadarai vaitani?

⁶ Iehova ese e haḡanidamu lalohadai kereredia bona kara mirodia na baita dadarai vaitani, badina ia ese ita na e lalokau henida badamu bona e uramu mauri baita moalelaia. (Isa. 48:17, 18) Mai dibana ura kereredia asie dadaraimu taudia ese sibodia bona ma haida e hahisidiamu. E itadamu siboda ta hahehisimu bona ma haida ta hahisidiamu neganai, lalona na e hisihisimu.

7. Roma 12:1, 2 ena hereva heḡereḡerena, dahaka abi hidi baita karaia na namo?

⁷ Reana matamanai turada bona eda ruma bese taudia haida ese be hevasehalaidamu, badina ta uramu eda mauri dalana baita haidaua. (1 Pet. 4:3, 4) Reana be gwaumu ita na mai eda maoro eda ura karadia baita kara, bona namona na ta ese basine hamaoroda  dahaka baita kara. Iehova ena dala e dadaraimu taudia na dia sibodia edia dala e badinamu, to Satana ese e biaguamu tanobadana ena lalohadai e badinaiamu. (Roma 12:1, 2 ba duahi.) Ita iboudai na abi hidi ta baita karaia: Ita be ta uramu eda mauri gunana, kara dika bona Satana ena tanobada ese e biaguamu maurina, dounu baita badinaia eiava Iehova ese eda kara baine haidau bena taunimanima namona ta ai baitala diba.​—Isa. 64:8.

8. Dahaka ese baine duruda diba lalohadai kereredia bona ta manadalai kara kereredia baita dadaraidia?

⁸ Iehova na mai dibana lalohadai kereredia bona kara mirodia idadaraidia na dia haraḡa. (Sal. 103:13, 14) To, Ia ese ena Hereva, ena lauma, bona ena orea amo aonega, goada bona heduru e henidamu, eda mauri baita haidaua totona. Ia ese oi na de durumu. Hari, ba kara diba ḡaudia haida mani aita herevalai, unu ese be durumumu emu mauri gunana bo rakataniamu, bona bo heḡereḡeremu bapatiso bo abimu.

9. Dirava ena Hereva ese baine durumu diba dahaka ba kara?

⁹ Baibul ba ḡaukaralaia emu kara ba haerodia. Dirava ena Hereva na hevarivari na heto; be durumu dibamu emu lalohadai, hereva bona kara ba haerodia. (Iak. 1:22-25) E stadi henimumu tauna bona lo Kristen taudia ma haida ese bae durumu diba. Heḡereḡere, Baibul amo be durumumu emu goada bona manoka ḡaudia ba lalopararalai totona. Idia ese bae durumu diba Baibul e herevalaimu bukadia amo sisiba namodia ba tahu, unu amo o manadalai kara kereredia ba dadaraidia. Bona Iehova na nega iboudiai noho heḡaeḡae oi baine durumu. Oi idurumu daladia na mai dibana namonamo, badina kudoumu ai e miamu ḡaudia na mai dibana. (Her. 14:10; 15:11) Una dainai dina ta ta ai ba ḡuriḡuri henia bona ena Hereva ba stadilaia.

10. Elie ena ekspiriens amo dahaka o dibamu?

¹⁰ Bavabia dae vaitani Iehova ena dala na nanamo heherea. Iehova ese e noidamu ḡaudia baita karamu neganai, namo baita davari dibamu. Iehova ena dala e badinamu taudia ese edia mauri na e laloa badamu, e dibamu edia mauri na mai anina, bona e moalemu. (Sal. 19:7-11) To, Iehova ena dala e dadaraimu taudia na tauanina ena kara dikadia e karamu dainai dika e davarimu. Mani tau ta ladana Elie ese Dirava ena dala idadaraina ena dika e herevalaia dalana aita laloa. Ia tamana sinana na Iehova e lalokau heniamu taudia. To Elie na laḡanina 13 ela 19 lalonai, hebamo dikadia ai e vareai. Una dainai drag e ḡaukaralai kerereva, matabodaḡa karadia e karava, bona e henaohenaova. Danu e badu momova bona e daḡedaḡe bada hereava. Ia na e gwa: “Maraḡigu ai na diba Kristen taudia ese basie kara karadia iboudiai na karava.” To, Elie ese maraḡina ai e diba ḡaudia na se lalodia boio. Gabeai, Baibul ma e stadilaia lou. Bona e hekwarahi e manadalai kara kereredia e rakatani vaitani, bena laḡani 2000 ai e bapatiso. Iehova ena dala e badinaia dainai dahaka namo e davari? Elie na e gwa: “Hari, na lalomainomu bona lalogu mamina na ḡoeva.” * Ina ekspiriens ese e hahedinaraiamu, Iehova ena dala e dadaraimu taudia na sibodia e hahedikamu. To Iehova na dounu e uramu baine durudia edia kara bae haidau.

11. Ededia kara be Iehova ese e inai henidiamu?

¹¹ Iehova ese e inai henimu ḡaudia ba inai henidia karana ba dibaia. (Sal. 97:10) Baibul ese  e hahedinaraiamu, Iehova ese “hekokoroku matadia, koikoi malana, bona asi ena kerere tauna rarana e hahebubuamu imadia,” na e inai henidiamu. (Her. 6:16, 17) Danu ia ese “ala-ala taudia bona koikoi taudia na e inai henidiamu.” (Sal. 5:6) Iehova ese unu kara na e inai henidia badamu dainai, Noa ena negai kara dika taudia iboudiai na e haoredia vaitani badina tanobada na daḡedaḡe karadia amo e hahonua. (Gen. 6:13) Haheitalai ma ta aita laloa. Iehova na peroveta tauna Malaki ena amo e gwa, adavadia asi edia kerere to koikoi dalanai e kohodiamu (divorce) taudia na e inai henidiamu. Dirava ese edia tomadiho karana na se abia daemu bona edia kara dainai be hahemaoro henidiamu.​—Mal. 2:13-16; Heb. 13:4.

12. “Dika ḡaudia baita inai heni” anina be dahaka?

¹² Iehova na e uramu “dika ḡaudia baita inai heni.” (Roma 12:9, NWT) Ina hereva “inai heni” na ḡau ta basita ura henia hemamina e herevalaia; anina na ḡau ta basita ura henia momokani bona baita dadaraia vaitani. Oi be ede bo hemami tomamu bema ta ese baine hamaoromu aniani bodaḡana bavania? Reana una bo laloamu neganai, mumuta ese be abimumu. Iehova ese baine gwauraia dika ḡauna ikarana danu unu baita laloa toma na namo.

13. Dahaka dainai eda lalohadai baita gimaia na mai anina bada?

¹³ Emu lalohadai ba gimaia. Eda lalohadai ese eda kara e biagumu. Una dainai Iesu ese e hadibada kara dika ikarana lalohadaina baita dadaraia. (Mat. 5:21, 22, 28, 29) Ta uramu Tamada guba ai e nohomu baita hamoalea, ani? Una dainai, lalohadai dikadia ta abimu neganai, baita dadarai haraḡa na mai anina bada!

14. Eda hereva ese dahaka e hahedinaraiamu, bona ededia henanadai baita haerelai na namo?

¹⁴ Emu hereva ba biagua. Iesu na eto: “Uduna amo e lasimu ḡaudia na lalona amo e daemu.” (Mat. 15:18) Oibe, ta gwauraimu ḡaudia ese lalodai e miamu ḡaudia e hahedinaraimu. Una dainai, sibomu ba henanadai: ‘Lau be asina uramu baina koikoi, ena be hereva momokani ba gwauraimu neganai ba hisihisimu, a? Lau na da na headava dainai, na henahua tohomu heḡahusi dalanai ma ta basina hereva henia, a? Lau ese hereva mirodia igwauraidia karana be na dadaraia vaitanimu, a? Ta ese e habadugumu neganai, mai manaugu ida na haeremu, eiava?’ Unu henanadai bo haerodia  namonamomu karana ese oi na be durumumu. Emu hereva na dabua e turia heboumu varona ida baita haheḡereḡerea diba. Bema basio hekwarahimu hereva dikadia, koikoidia, bona mirodia basio kokimu, varo ese dabua e turia heboumu heḡereḡerena, mauri gunana na basio rakatania dibamu.

15. Eda mauri gunana “au” ai baita kokoa kau anina be dahaka?

¹⁵ Mai emu ura ida kara ta ba karaia. Aposetolo Paulo ese haheitalai namo hereana ta e ḡaukaralaia, unu amo e hadibadamu eda mauri dalana baita haidaua na mai anina bada. Ia na e gwa namona na eda mauri gunana na “au” ai baita kokoa kau. (Roma 6:6, NWT) Anina na, ta uramu Keriso baita tohotohoa. Iehova ese e inai henimu karadia bona daladia iboudiai baita hamasedia na namo. Bema unu baita kara tomamu, laloda na be ḡoevamu bona mauri hanaihanai baita moalelaiamu. (Ioa. 17:3; 1 Pet. 3:21) Ba helalotao, Iehova ese ena dala na basine haidaumu ita baine hamoaleda totona. To, namona na ita ese eda mauri dalana baita haidaua, unu amo Iena dala baita badinaia diba.​—Isa. 1:16-18; 55:9.

16. Dahaka dainai laloda baita hadai hanaihanai eda manoka ḡaudia baita dadarai?

¹⁶ Hanaihanai eda manoka ḡaudia baita dadarai. Ena be bo bapatisomu, to dounu tauani ena ura dikadia ba dadaraidia na namo. Mani tau ta ladana Maurício ena ekspiriens aita laloa. Ia na matamatanai, kekeni edia kara e karava. To gabeai, Iehova ena taunimanima e davaridia bona idia ida Baibul stadi e hamatamaia. Ena mauri dalana e haidaua murinai, laḡani 2002 ai e bapatiso. Ena be laḡani momo Iehova e hesiai henia, to Maurício na e gwa: “Baina gwau diba nega momo na hekwarahimu ura dikadia baina dadarai.” Una ese ia lalona na se hamanokaia. To, ia na e gwa: “Na dibamu unu ura dikadia ba dadaraimu neganai, Iehova na be moalemu dainai, una ese e hagoadagumu.” *

17. Nabiha ena ekspiriens amo dahaka ese eme hagoadamu?

¹⁷ Ḡuriḡuri amo Iehova ena lauma ena heduru ba noia, bona sibomu emu goada ai basio tabekau. (Gal. 5:22; Fili. 4:6) Namona na laloda baita hadai bema ta uramu eda mauri gunana baita kokia bona baita rakatania vaitani. Mani hahine ta ladana Nabiha enai e vara ḡauna  aita laloa. Laḡanina 6 neganai tamana ese e rakatania. Ia na e gwa: “Lalogu na e hahisia bada herea.” Nabiha e bada neganai, e badu haraḡava bona e daḡedaḡeva. Ia na drag e hoihoilaiva dainai, pulis ese e abia, bona laḡani haida dibura ai e noho. Dibura rumana e vadivadia Witnes taudia ese Baibul amo e stadi henia matama. Nabiha ese ena kara haida na e haidau. Ia na e gwa: “Na manadalai karadia haida baina rakatani na haraḡa. To siga ani karana baina hadokoa na auka.” Nabiha na laḡani ta mai kahana e hekwarahi murinai, siga ani karana e hadokoa. Dahaka ese e durua? Ia na e gwa: “Hanaihanai Iehova na ḡuriḡuri heniava karana ese e durugu, siga ani karana na hadokoa.” Hari ia ese ma haida e hamaorodiamu: “Na diba momokanimu bema lau na Iehova baina hamoalea totona sensi na kara, ma haida danu bae kara diba!” *

18. Korinto Ginigunana 6:9-11 heḡereḡerena, Dirava ena hesiai taudia momo be dahaka e kara?

¹⁸ Kristen ginigunadia edia negai, Iehova ese e abidia hidi Keriso ida bae lohia tataudia bona hahinedia haida edia kara, guna na dia nanamo. Heḡereḡere, e heudahanaiva, tatau na hahine edia kara e karava eiava hahine na tatau edia kara e karava, bona e henaohenaova. To, Dirava ena lauma helaḡa ena heduru dainai, edia mauri gunadia na e haidau. (1 Korinto 6:9-11 ba duahi.) Una heḡereḡerena, hari ina negai Baibul ese taunimanima milion momo na e durudiamu edia mauri e haidaumu. * Idia ese e manadalai momokani kara dikadia na e rakatani vaitani. Edia haheitalai ese e hamomokaniamu, oi danu emu mauri gunana na ba haidaua diba bona o manadalai kara dikadia na ba rakatani diba, unu amo ba heḡereḡere ba bapatiso.

19. Atikol gabena ese dahaka be herevalaimu?

¹⁹ E uramu bae bapatiso taudia ese dia mauri gunana mo bae rakatania, to danu, bae hekwarahi mauri matamatana bae badinaia na ḡau badana. Atikol gabena ese una baita karaia dalana bona haida ese bae duruda diba daladia be herevalaimu.