LARTIK LETID 10
To Kapav “Tir Vie Personalite” lor Twa
“Tir vie personalite lor zot ansam avek so bann pratik.”—KOL. 3:9, NW.
KANTIK 29 Res Dign pou Port To Nom
REZIME *
1. Kouma to lavi ti ete avan ki to etidie Labib?
KOUMA to lavi ti ete avan ki to etidie Labib avek bann Temwin Zeova? Kitfwa boukou parmi nou pa tro kontan mazinn sa lepok-la. Kifer? Parski sirman nou latitid ek nou personalite ti inflianse par lemond Satan. Si nou ti dan sa sitiasion-la, nou “ti san lesperans e san Bondie dan lemonn.” (Efe. 2:12) Me apre ki nou’nn etidie Labib, nou lavi inn sanze net!
2. Ki to’nn aprann kan to’nn etidie Labib?
2 Kan to’nn koumans etidie Labib, to’nn aprann ki to ena enn Papa ki dan lesiel ek ki Li bien kontan twa. To’nn aprann osi ki, si to anvi fer plezir Zeova ek form parti dan so fami, to pou bizin fer bann gran sanzman dan to lavi ek dan to fason panse. To pou bizin osi fer seki Zeova kontan ek rezet seki Li pa kontan.—Efe. 5:3-5.
3. Dapre Kolosien 3:9, 10, ki kitsoz Zeova demann nou pou fer, ek ki nou pou examine dan sa lartik-la?
3 Zeova Li nou Kreater ek nou Papa. Alor, Li ena drwa deside kouma bann manb so fami bizin konport zot. Enn parmi bann kitsoz ki Li demann nou avan nou batem, se ki nou fer zefor pou “tir vie personalite lor [nou] ansam avek so bann pratik.” * (Lir Kolosien 3:9, 10, NW. *) Sa lartik-la pou ed bann ki anvi pran batem pou reponn sa trwa kestion-la: (1) Ki ete “vie personalite”? (2) Kifer Zeova donn nou lord pou tir nou vie personalite lor nou? (3) Kouma nou kapav fer sa? Si nou’nn fini pran batem, sa lartik-la pou ed nou pou anpes bann kitsoz ki form parti dan nou vie personalite pou re-aparet.
KI ETE “VIE PERSONALITE”?
4. Kouma enn dimounn azir kan so “vie personalite” lor li?
4 Kan enn kikenn ena so “vie personalite” lor li, so fason panse ek so bann aksion kapav parey kouma bann dimounn dan lemond Satan. Par exanp, kitfwa li pou egois, li pou ankoler vit, li pa pou ena rekonesans, ek li pou orgeye. Kitfwa osi li pou kontan get pornografi, ouswa get bann fim ki imoral ouswa violan. Li kapav ena bann bon kalite, ek kitfwa li santi li koupab pou bann move kitsoz ki li dir ek fer. Me selman, li pena ase volonte pou li sanze.—Gal. 5:19-21; 2 Tim. 3:2-5.
Kan nou tir “vie personalite” lor nou, nou bann move dezir nepli kontrol nou (Get paragraf 5) *
5. Eski nou kapav tir net nou vie personalite lor nou? (Zist. 3:19)
5 Akoz nou inparfe, nou pa kapav tir net bann move panse ek bann move dezir ki ena dan nou leker. Parfwa, nou pou dir ek fer bann kitsoz ki nou pou regrete apre. (Zer. 17:9; Zak 3:2) Me kan nou tir nou vie personalite lor nou, nou bann move dezir nepli kontrol nou. Nou vinn enn lot kalite dimounn.—Iza. 55:7; lir Zistwar Bann Apot 3:19.
6. Kifer Zeova donn nou lord pou tir nou vie personalite lor nou?
6 Zeova donn nou lord pou tir nou vie personalite lor nou, setadir pou rezet bann move panse ek bann move labitid ki nou ena. Li demann nou pou fer sa parski Li bien kontan nou ek Li anvi ki nou ena enn zoli lavi. (Iza. 48:17, 18) Li kone ki bann dimounn ki pa rezet zot bann move dezir, zot fer zotmem ek lezot osi ditor. So leker fermal kan Li trouv nou fer noumem ek lezot ditor.
7. Dapre Romin 12:1, 2, ki swa nou tou nou ena?
7 O-koumansman, nou bann kamarad ek nou fami kitfwa pou boufonn nou parski nou pe esey fer bann sanzman dan nou personalite. (1 Pier 4:3, 4) Kitfwa zot kapav dir nou ki nou lib pou fer seki nou anvi, ek ki nou bizin pa les lezot dir nou seki nou bizin fer. Me bann dimounn ki rezet bann prinsip Zeova, zot pa vremem lib. An realite, zot pe les zot inflianse par lemond Satan. (Lir Romin 12:1, 2.) Nou tou nou ena enn swa pou fer: Swa nou les nou vie personalite lor nou ek nou les lemond Satan inflians nou, swa nou les Zeova sanz nou ek nou vinn enn pli bon dimounn.—Iza. 64:8.
KOUMA TO KAPAV “TIR” TO VIE PERSONALITE?
8. Ki kitsoz pou ed nou pou rezet bann move panse ek bann move labitid ki nou ena?
8 Zeova kone ki nou bizin fer boukou zefor pou rezet bann move panse ek bann move labitid ki nou ena. Kitfwa nou pou bizin boukou letan osi pou fer sa. (Ps. 103:13, 14) Selman, gras-a so Parol, so lespri sin, ek so lorganizasion, Zeova donn nou lafors, sazes, ek led ki nou bizin pou nou kapav fer bann sanzman. Ek nou pena okenn dout ki Li pe deza ed twa! Asterla, anou get sertin kitsoz ki kapav ed twa pou to kontign tir to vie personalite lor twa, pou ki to kapav ranpli bann kondision pou to pran batem.
9. Ki kitsoz Labib kapav ed twa pou fer?
9 Servi Labib pou examinn tomem. Labib parey kouma enn laglas. Li kapav ed twa pou examinn to bann panse, to bann parol, ek to bann aksion. (Zak 1:22-25) Anplis, sa dimounn ki fer to letid la, ouswa enn lot Kretien ki ena lexperyans, kapav donn twa bann konsey. Par exanp, zot kapav servi Labib pou ed twa pou trouv to bann kalite ek to bann defo. Zot kapav montre twa kouma pou fer bann resers dan bann piblikasion, pou to trouv bann konsey ki pou ed twa pou rezet bann move labitid ki to ena. Ek to kapav sir ki Zeova touletan pre pou ed twa. Li kone ki meyer fason pou ed twa, ek Li kone seki to ena dan to leker. (Prov. 14:10; 15:11) Alor, pran labitid pou priye Li, ek etidie Labib toulezour.
10. Ki nou kapav aprann ar lexanp Elie?
10 To bizin sir ki bann prinsip Zeova zot bon pou twa. Nou pou gagn bann bienfe si nou fer tou seki Zeova demann nou. Bann dimounn ki swiv bann prinsip Zeova, zot respekte zotmem, zot lavi ena enn sans, ek zot vremem ere. (Ps. 19:7-11) Parkont, bann dimounn ki pa swiv bann prinsip Zeova, zot fer bann kitsoz ki Zeova pa kontan ek zot bizin pey bann konsekans. Anou get lexanp Elie, enn frer ki dan lepase ti rezet bann prinsip Zeova. Elie ti grandi dan enn fami ki ti kontan Zeova. Me kan li ti zenn, li ti ena bann move frekantasion. Li ti koumans amenn enn lavi imoral, li ti koumans droge, ek li ti vinn enn voler. Elie explike ki li ti pe vinn deplizanpli violan, ek ki li ti touletan ankoler. Li dir: “An gro, mo ti fer tou bann kitsoz ki enn Kretien pa sipoze fer.” Selman, Elie pa ti bliye seki li ti aprann kan li ti zenn. Avek letan, li ti rekoumans etidie Labib. Li ti fer zefor pou rezet so bann move labitid, ek li ti pran batem lan 2000. Ki bienfe li’nn gagne kan li’nn swiv bann prinsip Zeova? Elie dir: “Asterla mo ena lape lespri ek mo konsians kler.” * Lexanp Elie montre nou ki bann dimounn ki rezet bann prinsip Zeova, zot fer zotmem ditor. Me kanmem sa, Zeova dispoze pou ed zot pou sanze.
11. Ki bann kitsoz Zeova deteste?
11 Aprann pou deteste seki Bondie deteste. (Ps. 97:10) Labib dir nou ki Zeova deteste “bann lizie ki ranpli ar lorgey, enn lalang ki koz manti ek bann lame ki vers disan inosan.” (Prov. 6:16, 17) Zeova deteste osi “bann dimounn ki violan ek ki anbet lezot.” (Ps. 5:6, NW) Zeova telman deteste sa bann kitsoz-la, ki dan lepok Noe, Li ti detrir tou bann move dimounn parski later ti ranpli ar violans. (Zen. 6:13) Anou get enn lot lexanp. Dan lepok profet Malaki, Zeova ti dir ki Li deteste bann dimounn ki fer magouy pou divors ar zot konzwin ki inosan. Bondie rezet ladorasion sa bann dimounn-la, ek Li pou ziz zot pou seki zot inn fer.—Mal. 2:13-16; Ebre 13:4.
Nou bizin ena degou pou bann kitsoz ki Zeova deteste, parey kouma nou ena degou pou enn manze ki gate (Get paragraf 11-12)
12. Ki savedir “ena degou pou seki move”?
12 Zeova anvi ki nou “ena degou pou seki move.” (Rom. 12:9, NW) Lexpresion “ena degou” se enn santiman bien for, parski li vedir ki nou extra deteste enn kitsoz. Mazine seki to ti pou resanti si ti demann twa pou manz enn manze ki gate! Zis mazinn sa kitfwa kapav fer twa tom malad, pa vre! Dan mem fason, zis mazinn fer bann kitsoz ki Zeova deteste bizin fer nou gagn degou!
13. Kifer nou bizin protez nou bann panse?
13 Protez to bann panse. Se nou bann panse ki inflians nou bann aksion. Akoz samem ki Zezi ti ansegn nou ki nou bizin rezet bann panse ki kapav fer nou fer pese. (Mat. 5:21, 22, 28, 29, NW) Nou anvi fer nou Papa Zeova plezir, pa vre! Alor, li bien inportan ki nou rezet deswit ninport ki move panse ki nou kapav ena!
14. Ki kitsoz nou bann parol montre lor noumem, ek ki kestion nou bizin poz noumem?
14 Vey bien lor seki to dir. Zezi ti dir: “Seki sorti dan labous sorti dan leker.” (Mat. 15:18) Wi, nou bann parol kapav montre seki nou ete vremem. Alor, poz tomem sa bann kestion-la: ‘Eski mo pou koz laverite mem si laverite kapav fer mwa gagn bann problem? Si mo marye, kan mo pe koz avek enn kikenn ki pa mo konzwin, eski mo donn li linpresion ki mo interese ar li? Eski mo rezet bann koze ki imoral? Kan enn kikenn fer mwa ankoler, eski mo reponn dan enn fason kalm?’ Li bon ki to reflesi lor sa bann kestion-la. Nou kapav konpar nou bann parol ar bann bouton ki ena lor enn linz. Li pou pli fasil pou nou tir linz-la lor nou, si nou larg so bann bouton. Dan mem fason, si nou fer zefor pou rezet bann koze ki fos, ki blesan, ek ki imoral, li pou pli fasil pou nou tir vie personalite lor nou.
15. Ki savedir koulout nou vie personalite lor poto?
15 To bizin pre pou fer tou seki bizin. Lapot Pol ti servi enn lexanp pou montre nou ki li bien inportan ki nou fer bann sanzman dan nou lavi. Li ti dir ki nou bizin koulout nou vie personalite ‘lor poto.’ (Rom. 6:6, NW) Pou fer Zeova plezir, Zezi ti aksepte ki koulout li lor enn poto. Dan mem fason, pou nou fer Zeova plezir, nou bizin pre pou rezet tou bann latitid ek tou bann pratik ki Zeova deteste. Kan nou fer sa, nou pou ena enn konsians kler ek nou pou ena posibilite pou viv pou touletan. (Zan 17:3; 1 Pier 3:21) Pa bliye ki Zeova pa pou sanz so bann prinsip pou fer nou plezir. Se nou ki bizin fer bann sanzman ek swiv so bann prinsip.—Iza. 1:16-18; 55:9.
16. Kifer nou bizin bien deside pou kontign lit kont bann move dezir?
16 Kontign lit kont bann move dezir. Mem apre to batem, to pou bizin kontign lit kont to bann move dezir. Anou get lexanp enn frer ki apel Maurício. Kan li ti zenn, li ti enn omosexiel. Plitar, li ti zwenn bann Temwin Zeova ek li ti koumans etidie Labib. Lerla, li ti fer bann sanzman dan so lavi, ek li ti pran batem an 2002. Mem si li pe servi Zeova depi plizir lane asterla, Maurício dir: “Ena fwa, mo bizin lit kont bann move dezir.” Me Maurício pa dekouraze. Li dir: “Mo kone ki, kan mo fer zefor pou lit kont mo bann move dezir, sa fer Zeova plezir, ek sa bien rasir mwa.” *
17. Ki kitsoz ankourazan to’nn aprann ar lexanp Nabiha?
17 Priye Zeova pou ki Li ed twa, ek kont lor so lespri sin, pa lor to prop lafors. (Gal. 5:22; Fil. 4:6) Nou bizin fer boukou zefor si nou anvi tir nou vie personalite lor nou ek anpes li revini. Anou get lexanp enn madam ki apel Nabiha. So papa ti abandonn li kan li ti ena sis-an. Nabiha dir: “Sa ti bien afekte mwa.” Akoz sa, amezir ki li ti pe grandi, Nabiha ti ankoler vit ek li ti bien agresif. Li ti koumans vann ladrog, ek li ti pas plizir lane dan prizon. Kan bann Temwin Zeova ti pres dan prizon, Nabiha ti koumans etidie Labib avek zot, ek li ti koumans fer bann gran sanzman dan so lavi. Li dir: “Li ti fasil pou mo aret sertin move labitid ki mo ti ena, me sa ti bien difisil pou mo aret fime.” Nabiha ti fer boukou zefor pandan plis ki enn-an, pou ki li aret sa move labitid-la, ek li ti reisi aret fime. Kouma li ti fer sa? Li dir: “Mo ti priye Zeova souvan, ek se sirtou gras-a lapriyer ki mo’nn reisi aret fime.” Asterla Nabiha dir: “Mo sir ki si mo’nn kapav fer bann sanzman pou fer Zeova plezir, ninport kisannla kapav fer sa!” *
TO KAPAV RANPLI BANN KONDISION POU PRAN BATEM!
18. Dapre 1 Korintien 6:9-11, ki kitsoz boukou serviter Zeova inn reisi fer?
18 Dan premie siek, sertin parmi bann dimounn ki Zeova ti swazir pou regn ansam avek Zezi dan lesiel, ti pe fer bann move kitsoz avan ki zot vinn Kretien. Par exanp, sertin parmi zot ti bann omosexiel, bann voler, ek ti pe pratik limoralite. Me gras-a lespri sin Bondie, zot ti reisi sanz zot personalite. (Lir 1 Korintien 6:9-11.) Dan mem fason azordi, Labib pe ed bann milyon dimounn pou fer bann sanzman dan zot lavi. * Mem si sa ti bien difisil, zot inn reisi aret bann move labitid ki zot ti ena depi plizir lane. Sa bann lexanp-la montre ki, twa osi to kapav fer bann sanzman dan to personalite ek aret to bann move labitid, pou ki to kapav ranpli bann kondision pou to pran batem.
19. Ki nou pou examine dan prosin lartik?
19 Bann dimounn ki anvi pran batem, bizin tir vie personalite lor zot. Me zot bizin osi fer zefor pou met nouvo personalite lor zot. Dan prosin lartik, nou pou gete kouma nou kapav fer sa ek kouma lezot kapav ed nou pou fer sa.
KANTIK 41 Silteple, Tann Mo Lapriyer
^ par. 5 Pou nou ranpli bann kondision pou pran batem, nou bizin dispoze pou fer bann sanzman dan nou personalite. Dan sa lartik-la, nou pou gete ki ete vie personalite, kifer nou bizin tir nou vie personalite lor nou, ek kouma nou kapav fer sa. Dan prosin lartik, nou pou gete kouma nou kapav kontign met nouvo personalite lor nou, mem apre nou batem.
^ par. 3 EXPRESION KI’NN EXPLIKE: “Tir vie personalite” vedir rezet bann latitid ek bann dezir ki Zeova deteste. Nou bizin koumans tir nou vie personalite lor nou avan ki nou pran batem.—Efe. 4:22.
^ par. 3 Kolosien 3:9, 10: “9 Pa koz manti sakenn ar so kamarad. Tir vie personalite lor zot ansam avek so bann pratik, 10 ek met nouvo personalite lor zot, ki gras-a konesans exakt pe kontign renouvle dapre resanblans sa Kikenn ki finn kree li-la.”
^ par. 10 Pou gagn plis ransegnman, get lartik « La Bible transforme des vies—“ Il fallait que je revienne vers Jéhovah. ” » dan Latour Degard 1e Avril 2012, an Franse.
^ par. 16 Pou gagn plis ransegnman, get lartik « La Bible transforme des vies—“ Ils m’ont parlé avec bonté. ” » dan Latour Degard 1e Me 2012, an Franse.
^ par. 17 Pou gagn plis ransegnman, get lartik « La Bible transforme des vies—“ J’étais une jeune femme coléreuse et agressive. ” » dan Latour Degard 1e Oktob 2012, an Franse.
^ par. 18 Get lankadre “ Labib Sanz Bann Dimounn.”
^ par. 65 DESKRIPSION ZIMAZ: Rezet bann move latitid ek bann move aksion se koumadir nou pe tir enn vie linz lor nou.
