1. Ohunathi wambela omuhudhera Bibliya ni Anamona a Yehova, egumi yawo yaari avi?

 OHUNATHI wambela omuhudhera Bibliya ni Anamona a Yehova, egumi yawo yaari avi? Owinjhiva wa iyo, nubuwela emuthu yakale nnokanna manyazo. Mubuwelo wehu ni mweddelo naathukulihu, wahivoloweliwa ni mubuwela weelabo. Teto iyo, ‘kananna ejhehero ni kanamunonne Mulugu.’ (Efé. 2:12) Mwaha omuhudhera Bibliya iyo osaddula egumihu!

2. Omusuzaga Bibliya ohudhere ddi?

² Vano wambeliwe omuhudhera Bibliya, we woona wi Yehova Baabi anuudhivela vanlubale. Ohiya eyo, ohonelamo wihina wegi omuhagalase Yehova ni okale mweemudhini mwaaye, yohoweleya osaddula egumawo ni mubuwela wawo. Yofwanelela ohudhere werana ele eri yapama vamentoni va Yehova ni orabela dhithu dhabure.—Efé. 5:3-5.

3. Mowiwanana ni Colossenses 3:9, 10, Yehova ananaddela wihina nere ddi? Ki musolo ola nnahudhere ddi?

³ Yehova di baabihu ni mpaddusi ehu, bumwahaya oliye ohukanna oneti wowaddela emudhaye ethu enafwanelela werana ni ehinafwanelela werana. Nihinabaddiziwe, Mulugu ahinikongomedha ‘okuguula emuthu yakale ni dhoweradhiwa.’ * (Omwileri Colossenses 3:9, 10.) Musolo ola onere wakavihera ale enafuna obaddiziwa onona dhowakula dha makoho ala mararu: (1) ‘Emuthu yakale’ ddiniyani? (2) Mwahaya bwaddi Yehova agafuna wihina nikuguule? (3) Ki nnande addi? Musolo mmodhave, onere wakavihera ale ebaddiziwe, ohukanna munukwela wohogolowela emuthu yakale yanniwana.

4. Muthu anasugweriwa ni ‘emuthu yakale’ anakala avi?

⁴ Muthu anasugweriwa ni ‘emuthu yakale’ mohanganyedha dhinubuweliye ni dhineriyena, dhinomukuula Yehova. Oliye podi okala muthu anrima, oohiliba otakaleliwa, oohutamalela, ni owithukula. Podi wera muthu yoyo onodhiveliwa woona vidiyu dhamararuwo, ni dhoopanga. Naarive muthuya agaari ndo, ohukanna dhikalelo dhapama. Malabo mamodha mubuwelo podi omunyemelaga mwaha dhithu aneriyena ni anawogiye, mbwenye oliye kanna efunelo yosaddula mubuwelo waye ni dhowera dhaye. — Gál. 5:19-21; 2 Tim. 3:2-5.

5. Nakuguula ‘emuthu yakale’ enereye ddi ni iyo? (Atos 3:19)

⁵ Iyo atenihu kanilogomane, bumwahaya kannadha nanda oselela ohiya wubuwela dhithu dhabure ni dhowera dhabure nnerihuna. Labo thi labo, nnere owoga obe werana ethu enanthukulihe manyazo. (Jer. 17:9; Tia. 3:2) Mbwenye iyo nakuguula ‘emuthu yakale’, kannaasugweriwege nimakalelo abure ni dhowera dhehu. Nnere owara emuthu exa yohiyana niile nannihuna kale. — Isa. 55:7; omwileri Atos 3:19.

6. Mwahaya bwaddi Yehova agafuna wihina niselele mubuwelo wakale ni dhowera dhehu nannihuna nihinathi omuhudhera Bibliya?

⁶ Yehova anafuna wi niselele mubuwela ni dhowera dhabure, mwahaya oliye ohukanna odhivela ni iyo teto anafuna wi nikale athu oohagalala. (Isa. 48:17, 18) Oliye ohunona wihina nahiwanana emuthu yehu yakale, enere ononiha goyi nannya vamodha ni athu amodhaya. Mwebaribarene ni Yehovaya anowoona goyi aanoonaga ndo.

7. Mowiwanana ni Romanos 12:1, 2, yothoma baani nnafwanelelihu werana?

⁷ Podi wera akwihu amodha obe amudhihu enoniteya yanoonaga nisaddulaga emuthu yehu yakale. (1 Ped. 4:3, 4) Aliwa podi onaddela wihina nihikanna ofuru wowerana nnafunihu, bumwahaya kuwahiye athu wuthomela dhithu onafuniwe werana. Mbwenye ohimwiwelela Yehova, kawinanvaha muthu ofuru wohaddeliwa. Mwebaribarene muthu ola anna osugweriwa ni elabo ya Saddana. (Omwileri Romanos 12:1, 2.) Mwebaribarene iyo aatene nnofwanelela werana  yothoma yehu: Owadelela emuthu yakale enasugweriwa ni dhothega dha elabo ya Saddana, obe omweenya Yehova osaddula emuthu yehu wihina nikale athu apama. — Isa. 64:8.

8. Enaanikavihere ddi orabela mubuwelo ni dhowera dhabure?

⁸ Yehova ohunona wihina kannande osaddula makalelo ehu owubuwela ni dhilamalelo dhabure mudhidhi mug’onove. (Sal. 103:13, 14) Yehova ononikavihera mwadhatedhene wihina nande wisaddula, wodhela omulabihera Bibliya, muzimu waye wotxena, ni nikuru naaye. Mwebaribarene we onorajhihaga woona makalelo Yehova ukaviheriye. Vano nnafuna noone ethu onahoweliwe werana wihina okuguule emuthu yakale windo obaddiziwe.

9. Madhu a Mulugu, enukavihere addi?

⁹ Omulabihere Bibliya wihina wipenddena. Madhu a Mulugu, eri ninga espelyu nnanikavihera woona emuthu yehu, makalelo ehu owubuwela, oowoga ni owerana dhithudha. (Tia. 1:22-25) Ddibila anuhudhiha Bibliya obe ddibila mmodha owithwelavo omuzimuni, podi wukavihera. Motajhiha, aliwa podi omulabihedha Bibliya, wihina yutonyihedhe dhithu dhapama onandiwe werana ni mwego onahoweliwe wiwomihedha. Aliwa podi wuhudhiha otola dholebela ofwanya muselu dhinukavihere owanana dhilamalelo dhinugonjhiha. Onaaddiwale wihina Yehova anofuna wukavihera. Kawo muthu onna efunelo yowi ndala omukwaranya Yehova, mwaha oliye ohunona murima wawo. (Pro. 14:10; 15:11) Bumwahaya, obajha ovanene, okanne elamalelo yoolobela ni yomuhudhera Bibliya malabo amatene.

10. Ohudhere ddi niile empadduwele Elie?

¹⁰ Kuwanganyedhe wihina ndhe ananiloba Yehova, siri dhapamadha. Dhatedhene Yehova ananilobiye dhinonikavihera. Ole anerana efunelo ya Mulugu, anowivaha thima ni ohukanna osogolo wapama, teto ohagalala waye fwebaribari. (Sal. 19:7-11) Mbwenye ale ehinamwiwelela Yehova anawogiye, enofwanyiwa makathamiho owinjhiva mwaha wowerana yothega. Kasugwa ethu awonge Elie wodhela muselu wohiwelela dhoholela dha mBibliyani. Oliye abaliwe murala wekiristawu wamudhivela vanlubale Yehova. Mbwenye nuwunnuwa, Elie okanna wandana wabure. Oliye wambela ojha murombwe dhoviriganiha ogoogo, oraruwa, ni okala mbava. Elie anihina, oliye wambela okala muthu owopiha ni oowali. “Ni madhu mamodha, oliye onorumedha wihina dhatedhene gerimina sidhendhe gahudherimi wihina giheregena ngaari mukiristawu.” Mbwenye Elie kadduwale dhithu aahudheriye agaari mwaana. Nlabo nimodha, ohogolowela omuhudhera Bibliya. Oliye wilibihera vanlubale wihina aselele dhilamalelo dhabure, vano yaka ya 2000 oliye obaddiziwa. Wawiwelela malamulo a Yehova, wamukavihere addi? Elie anihina: “Peeno gihikanna murenddele ni mubuwela wohinyemela.” * Yopadduwa ela enowoniha wi ole ahiniwelela dhoholela dha Yehova onowitotela makathamiho. Naari dhigarive ndo, Yehova onofuna wakavihera athu ala osaddula emuthu yewa.

11. Dhithu baani Yehova aniddiye?

¹¹ Ohudhere widda ele aniidda Yehova. (Sal. 97:10) Bibliya anihina wi Yehova anowidda ‘mento anrima, nlumi nowoota, malada enakuthula nikame naathu ehinna muladdu.’  (Pro. 6:16, 17) Oliye ‘onotakaleliwa naathu enakuthula nikame ni aliba woota.’ (Sal. 5:6) Yehova onowidda dhithu ndha, bumwahaya oliye adhe aatolosege athu a malabo a Nowe, mwaha aliwa yaari apanga. (Gén. 6:13) Kasugwa yopadduwa emodha. Yehova omulabihedha namavuhulela Malakiya, wihina awoge wi oliye anowawidda athu enathoma omwalana bure-bure ni mamuniwa obe ni mwariwa vihiri muladdu wapameene. Webedha wa athu yala vamentoni va Yehova kawinna mabasa, teto oliye anere watoriha mwaha dhowera dhewa.—Mal. 2:13-16; Heb. 13:4.

12. Widda ethu yabure enatapulela ddi?

¹² Yolebela ya Romanos. 12:9 enihina ‘mwiidde obure.’ Siyeyo Yehova ananifuniyena. Widda ethu yabure kahiyo ethu yamasika. Niiddaga ethu, enontakalela ni enoneddiha murima. Bu mubuwelo mmodhave, yahere muthu eere wuloba wihina ojhe yojha yovudda, podi wera wubuwelave baahi wakalege ninga othapike. Ni makalelo mamodhave, enofwanelela okanna mubuwelo yola nafunaga werana ethu enamutakalela Yehova.

13. Mwahaya bwaddi nigafwanelela oobarela mubuwela wehu?

¹³ Obarele mubuwelo wawo. Mubuwelo wehu ononthukulela werana ethu-siithu. Bumwahaya Yesu adhe anaaddelege wihina nisukume mubuwelo onanthukulele werana yothega. (Mat. 5:21, 22, 28, 29) Mwebaribarene, ethu nnafunihu mwigumini mwehu fumuhagalasa Yehova. Wihina nande, sathima osukuma mowaguva mubuwelo wamutene wabure onavira mmuruni mwehu!

14. Dhithu dhinawogihu dhinoniha ddi wodhela emuthu yehu, ki makoho baani nnafwanelelihu wawerana?

¹⁴ Orajhihege wubuwela ohunathi owoga. Yesu enre: ‘Dhatedhene dhinawoga mulomo dhinakuma mmurimani.’ (Mat. 15:18) Mwebaribarene dhithu dhinawogihu dhinowoniha emuthu yehu yavati vamurima. Bumwahaya wikohe: ‘Ginowoga ebaribari naarive akala ethuya enere ogitotela makathamiho? Ginomuriha mamunaga obe naari mwaraga? Teto kaginamugayela muthu mmodha nihitelanihu vamodha? Mwebaribarene ginowilibihera ohuwoga dhithu dhamanyazo? Muthu agukuula ginokurumuwa murima?’ Wapendda makoho yala, podi osaddula ethu-sithu mwigumini mwawo. Ninga eriiwa yorusa okuguula kamiza ohunaafugule mabontawuya, emodhave enere orusa okuguula emuthu yakale  nahiselela owoga nuuwali, nootaga obe naari niwogaga dhithu dhamanyazo.

15. Okomeliwa vantxikwani emuthu yehu yakale enatapulela ddi?

¹⁵ Werena ethu-siithu enahoweleya. Murumiwi Pawulo ohulabihedha nladdaniho nohikala namasika wihina awoge mwahaya edhe ekalege yathima osaddula emuthu yehu. Oliye ohuleba wi ‘emuthu yehu yakale ehikomeliwa vantxikwani nagoyi.’ (Rom. 6:6) Obe neere, nnofwanelela omutajhiha Yesu. Oliye ahenya opiwa wihina amuhagalase Yehova. Ni makalelo mamodhave, ni iyowa nnofwanelela werana ethu-sithu wihina niselele dhithu dhiniidda Yehova wihina nimuhagalase. Akala nnofuna okanna mubuwela wohinyemela ni egumi yohimala osogolo, nihare thalo dhendha. (João 17:3; 1 Ped. 3:21) Nubuwele wihina Yehova kadha asaddula mubuwelo waye wodhela ele eri yapama ni yabure wihina anihagalase. Mwebaribarene di iyo anahowela wisaddula wihina nimuhagalase.—Isa. 1:16-18; 55:9.

16. Mwahaya bwaddi egafwanelelaga wihina wikome owanana dhilamalelo dhabure?

¹⁶ Ohuselele owanana dhilamalelo dhabure. Naarive ogabaddiziwe, onofwanelela owanegenave dhilamalelo dhabure. Kasugwa yotajhiha ya ddibila anithaniwa Maurício. Agaari muzombwe oliye othukula mweddelo waathu enagonihana alobwanave obe ahiyanave. Nuuvira mudhidhi, oliye waanona Anamona a Yehova ni wambela omuhudhera Bibliya. Vano nusaddula egumaye, yaka ya 2002 obaddiziwa. Naarive amulabelaga Yehova yaka dhowinjhivadhene, Maurício anihina: “Kaginakuwa wihina malabo mamodha goowanana dhilamalelo dhabure.” Mbwenye oliye kanahiya wihina dhithu ndha dhimukwerebeyihe. Oliye onosorihave egi: “Ethu enagilibiha fuunona wihina ganda ogonjhiha dhilamalelo ndha dhabure ginomuhagalasa vanlubale Yehova.” *

17. Ethu baani yudhivele ni yopadduwa ya murogola Nabiha?

¹⁷ Omulobe Yehova nikavihero, ni ororomele muzimu waye wotxena ohiya kopolo dhawo. (Gál. 5:22; Fil. 4:6) Wihina nikuguule emuthu yakale nannihuna, nnohowela wilibihera vanlubale. Kasugwa yotajhiha ya murogola anithaniwa Nabiha. Makolwaye emusukumme aganna yaka 6. Oliye anihina: “Ela yogipiha  mbani vanlubale.” Kadda labo navira Nabiha eera othabwa okala muthu abure. Vasogolova oliye wambela ojha murombwe dhoviriganiha ogoogo, ovokeriwa mukambura ni ovira yaka dhowinjhivadhene agaari mwemmo. Agaari mukambura, Namona a Yehova omwaredhela ni wambela omuhudhera Bibliya nuliye. Nabiha wambela osaddula egumaye. “Dhilamalelo dhimodha dhahikweya oselela. Mbwenye ohiya omujha soola kayari ethu yamasika.” Nabiha aahiwana yaka yantero wihina aselele elamalelo ela. Oliye andile addi? Mwinnyene anihina: “ Ethu yagikavihere owanana elamalelo ela, fulobela ni murimaga wamutene wa Yehova.” Gihikanna ebaribari wihina, akala gihanda wisaddula wihina gimuhagalase Yehova, muthu di muthu podi wanda!” *

18. Mowiwanana ni 1 Coríntios 6:9-11, adhaari owinjhiva a Yehova, dhithu baani enandiwa werana?

¹⁸ Mudhidhi warumiwi, alobwana ni ahiyana yakenle muzimu wotxena wihina yathonge ni Yesu odhulu, yaherana dhithu dhowinjhiva dhabure ehinathi okala makiristawu. Motajhiha, amodhaya yaari anamararuwa, yahithukula mweddelo wogonihana ahiyanave obe alobwanave, ni yaari ambava. Mbwenye nnikavihero na muzimu wotxena, aliwa wanda osaddula emuthu yewa yakale. (Omwileri 1 Coríntios 6:9-11.) Ni makalelo mamodhave, malabo a peeno Bibliya onowakavihera athu owinjhiva osaddula egumiwa. * Aliwa ehanda osukuma dhilamalelo ndha dhabure, dhamenle musisi mmurimani mwewa. Yotajhiha yewa, enowoniha wi niweya podi wanda osaddula emuthu yawo wihina ofwanelele obaddiziwa.

19. Musolo onaharela nnaasuzihe ddi?

¹⁹ Ale enafuna wipeleka wihina ebaddiziwe, ethu enahoweliwa kahiyo okuguulave emuthu yakale baani, mbwenye enofwanelela yilibihere wihina eware emuthu exa. Musolo onaharela, onere onisuziha makalelo nnafunihu werana ni makalelo athu amodha enafuniwa onikavihera.