TLAMACHTILI 10
Uelis tijpatlas monemilis
“Keja se mokixtilia itlake sosoltik, ya inmokixtilijtokej inmotlajtlakolchijkatlalnamikilis” (COL. 3:9).
UIKATL 29 Ma tijuejkapantlalikaj Jehová itoka
TLEN MOIXTOMAS *
1. ¿Kenijkatsa eliyaya tonemilis kema ayamo tikixmatiyayaj Jehová?
UELIS amo techpaktia tikilnamikisej kenijkatsa tieliyayaj kema ayamo tikixmatiyayaj Jehová. Uelis timonejnemiltiyayaj kej maseualmej katli kichiuaj tlen amo kuali. Ipan nopa tonali amo tijpiayayaj ipan ajkia timotemachisej pampa amo tikixmatiyayaj toTeotsij (Efes. 2:12). Uan kema pejki timomachtiaj Biblia, tonemilis mopatlak.
2. ¿Tlake tijyekok kema pejki timomachtia Biblia?
2 Kema timomachtijtiajki Biblia, tijyekok toTeotsij eli kej moTata katli tlauel mitsiknelia. Tijyekok tlaj tijneki tijyolpakiltis uan tielis se tlen ichampoyouaj, monekiyaya tijpatlas se keski tlamantli ipan monemilis uan kej timoiljuia. Nojkia, monekiyaya tijchiuas toTeotsij itlanauatiljuaj (Efes. 5:3-5).
3. 1) Kej kiijtoua Colosenses 3:9, 10, ¿tlake kineki Jehová ma tijchiuakaj? 2) ¿Kenijkatsa techpaleuis ni tlamachtili?
3 Jehová techchijchijki uan nojkia eli toTata, yeka kinamiki kiijtos kenijkatsa moneki timonejnemiltisej. Uan katli kinekij moatsonpoliuiltisej kiniljuia ayokmo ma kichiuakaj tlen uejkajkia kichiuayayaj * (xijpoua Colosenses 3:9, 10). ¿Tijneki timoatsonpoliuiltis? Ni tlamachtili mitspaleuis tijnankilis eyi tlajtlanili: 1) ¿Tlake kiijtosneki totlajtlakolchijkatlalnamikilis? 2) ¿Kenke Jehová kineki ma tijpatlakaj tonemilis? 3) ¿Kenijkatsa uelis tijchiuasej? Uan tlaj ya timoatsonpoliuiltijkej, ni tlamachtili techpaleuis ayokmo sampa ma timonejnemiltikaj kej uejkajkia tijchiuayayaj.
¿TLAKE KIIJTOSNEKI TOTLAJTLAKOLCHIJKATLALNAMIKILIS?
4. ¿Kenijkatsa monejnemiltia katli kichiua tlen itlajtlakolchijkatlalnamikilis kineki?
4 Se akajya katli kichiua tlen itlajtlakolchijkatlalnamikilis kineki, moiljuia uan kichiua san tlen ya kineki. Uelis nima kualani, amo kitekipachoua tlen sekinok kiyolmatij, amo tetlaskamati uan tlauel moueyimati. Uelis moyolpakiltia ika pornografía uan kiita películas kampa momekatiaj o kampa momiktiaj. Maske uelis nopa maseuali kinextia kuajkuali tlamantli uan kiyolkokoua tlen kiijtoua o tlen kichiua, nojua kipoloua kiyololinis se tlamantli uan kiampa kipatlas kej moiljuia uan kej monejnemiltia (Gál. 5:19-21; 2 Tim. 3:2-5).
Kema ayokmo tijchiuaj tlen totlajtlakolchijkatlalnamikilis kineki, ayokmo tijkauaj ya nopa ma technauati. (Xikita párrafo 5). *
5. Kej kiijtoua Hechos 3:19, ¿nelnelia uelis tijkauasej tlen amo kuali? Xikixtoma.
5 Nochi titlajtlakolejkej, yeka kemantika nojua timoiljuiaj uan tijnekij tijchiuasej tlen amo kuali. Nojkia, kemantika tijchiuasej o tikijtosej tlen teipa techyolkokos (Jer. 17:9; Sant. 3:2). Yeka, kema ayokmo tijkauaj ma techyakana totlajtlakolchijkatlalnamikilis, techpaleuia ayokmo ma tijchiuakaj tlen amo kuali uan tijnextisej kuali timonejnemiltiaj (Is. 55:7; xijpoua Hechos 3:19, TNM). *
6. ¿Kenke Jehová techiljuia ayokmo ma tijchiuakaj yon ma timoiljuikaj tlen amo kuali?
6 Jehová techiljuia ayokmo ma timoiljuikaj yon ma tijchiuakaj tlen amo kuali, pampa techiknelia uan kineki kuali ma tiitstokaj (Is. 48:17, 18). Kimati tlaj tijchiuasej tlen amo kuali, uelis timoyolkokosej uan tikinyolkokosej sekinok. Uan ya tlauel kiyolkokoua kema kiampa pano.
7. Kej kiijtoua Romanos 12:1, 2, ¿tlake moneki tijtlapejpenisej?
7 Kemantika uelis tochampoyouaj uan touampoyouaj techpinajtisej pampa tijnekij tijpatlasej tonemilis (1 Ped. 4:3, 4). Uelis techiljuisej amo aka kinamiki techiljuis kenijkatsa tiitstosej uan tlake moneki tijchiuasej. Maske kiampa techiljuisej, nopa amo nelia pampa katli amo kichiuaj tlen Jehová tetlajtolmaka, kikauaj Satanás ma kinyakana (xijpoua Romanos 12:1, 2). Nochi moneki tijtlapejpenisej tlake tijchiuasej: tlaj tijkauasej ma techyakana totlajtlakolchijkatlalnamikilis uan Satanás, o tijkauasej Jehová ma techpaleui kuali timonejnemiltisej (Is. 64:8).
¿KENIJKATSA TIJPATLASEJ TOTLAJTLAKOLCHIJKATLALNAMIKILIS?
8. ¿Tlake techpaleuis ayokmo timoiljuisej yon tijchiuasej tlen amo kuali?
8 Jehová kimati kemantika amo nima tijpatlaj kej timonejnemiltiaj uan kej timoiljuiaj, uan moneki tijchiuasej kampeka tijpatlasej (Sal. 103:13, 14). Yeka, ya techmaka tlalnamikilistli, chikaualistli uan techpaleuia tijpatlasej tonemilis, uan kichiua ika Biblia, itonal uan itlanechikol. Uan uelis ya tikitstok kenijkatsa Jehová mitspaleuijtok. Nama, ma tikitakaj tlake uelis tijchiuas uan kiampa tijkauas tlen amo kuali uan uelis timoatsonpoliuiltis.
9. ¿Kenijkatsa mitspaleuis Biblia?
9 Xikita ika Biblia tlen nojua uelis tijpatlas. ToTeotsij iTlajtol eli kejuak se teskatl, yeka uelis mitspaleuis tikitas tlen timoiljuia, kenijkatsa tikamanalti uan timonejnemiltia (Sant. 1:22-25). Katli mitsmachtia uan sekinok toikniuaj katli miak xiuitl tlatekipanojtokej uelis mitspaleuisej. ¿Kenijkatsa kichiuasej? Ika Biblia uelis mitsnextilisej tlake kuali tijchiua uan tlake nojua moneki tijpatlas, uan nojkia mitsmachtisej kenijkatsa tijtemos ipan amatlajkuiloli tlen mitspaleuis tijkauas tlen amo kuali. Nojkia, Jehová nochipa mitspaleuis uan kimati kenijkatsa kichiuas, pampa ya kimati tlen eltok ipan moyolo (Prov. 14:10; 15:11). Yeka, xijchiua kampeka mojmostla timomaijtos uan timomachtis Biblia.
10. ¿Tlake tijyekouaj tlen kipanok Elie?
10 Ximotemachi toTeotsij itlanauatiljuaj tlauel tepaleuia. Jehová techtlajtolmaka pampa kineki kuali ma tiitstokaj. Katli kichiuaj tlen ya kineki, moitaj kej kinamiki, kuali kiyolmatij uan tlauel yolpakij (Sal. 19:7-11). Uan katli kichiuaj san tlen inijuantij kinekij, tlauel tlaijiyouiaj. Ma tikitakaj tlen kipanok se tlakatl katli itoka Elie, ya amo kichijki Jehová itlanauatiljuaj. Maske itatauaj kiikneliyayaj Jehová, ya pejki mouika ininuaya katli amo kuali monejnemiltiyayaj. Yeka, nojkia kitekiuiyaya drogas, momekatiyaya, tlachtekiyaya uan tlauel mosisiniyaya. Ya kiijtoua: “Nijchiuayaya nochi tlen se Cristo itokilijka amo kinamiki kichiuas”. Maske amo kuali monejnemiltik, amo kema kiilkajki tlen itatauaj kimachtijkej. Yeka, sampa pejki momachtia, kichijki se ueyi kampeka kikauas tlen momajtoya kichiuas, uan ipan xiuitl 2000 moatsonpoliuiltik. ¿Kenijkatsa kipaleuik? Ya kiijtoua: “Kuali nijyolmati uan amo nechyolkokoua notlalnamikilis”. * Kej kipanok Elie, tikitaj amo yolpakij katli amo kinekij kichiuasej toTeotsij itlanauatiljuaj. Maske sekij amo kuali monejnemiltiaj, Jehová nochipa kineki kinpaleuis ma kipatlakaj ininnemilis.
11. ¿Tlake tlamantli kikualankaita Jehová?
11 Xijkualankaita tlen Jehová kikualankaita (Sal. 97:10). Biblia kiijtoua Jehová kikualankaita katli “moueyimati; se tlen teistlakauia; [uan] se tlen kimiktia seyok tlen axtleno kichiuilijtok” (Prov. 6:16, 17). Nojkia ‘axkineki kinitas tlen tlakajkayauaj uan temiktiaj’ (Sal. 5:6). Jehová kiijia ni tlamantli uan kema kiampa monejnemiltiaj. Yeka, kema Noé itstoya kintsontlamiltik nopa maseualmej, pampa tlauel mosisiniyayaj (Gén. 6:13). Seyok tlamantli tlen Jehová kikualankaita eli tlen kiijtok ika tlajtolpanextijketl Malaquías: kema katli mosenkajtokej mokajkayauaj pampa kinekij kiixpolosej inintoka kampa nesi mosenkajtokej. Katli kichiuaj ni tlamantli, toTeotsij amo kinselia kema kiueyichiuaj, uan ya kintlajtolsenkauas (Mal. 2:13-16; Heb. 13:4).
Kema tijnekisej tijchiuasej tlen Jehová kikualankaita, moneki tikijiasej kej se tlamantli tlen lochontok. (Xikita párrafos 11, 12).
12. ¿Tlake kiijtosneki tikijiasej tlen amo kuali?
12 Jehová technauatia: “Xijtlauelkauakaj [xikijiakaj, TNM] tlen axkuali” (Rom. 12:9). Nopa tlajtoli xikijia kiijtosneki amo tijnekis tikitas o amo tijnekis tijchiuas tlen amo kuali. Ma timoiljuikaj, ¿tlake tijchiuaskiaj tlaj techiljuiskiaj ma tijkuakaj se tlamantli tlen lochontok? Uelis nima tielmoyauiskiaj, maske ayamo tijkuaj. Kiampa moneki tikitasej kema tijnekisej tijchiuasej se tlamantli tlen Jehová kikualankaita.
13. ¿Kenke amo kinamiki timoiljuisej tlen amo kuali?
13 Amo ximoiljui tlen amo kuali. Tlen timoiljuiaj, ya nopa tijchiuaj. Yeka, Jesús techmachtik amo ma timoiljuikaj ipan tlamantli tlen uelis kichiuas ma titlajtlakolchiuakaj (Mat. 5:21, 22, 28, 29). Tojuantij tijnekij tijyolpakiltisej toTata Jehová, uan yeka amo kinamiki timoiljuisej tlen amo kuali.
14. ¿Tlake kinextia tlen tikijtouaj, uan tlake moneki timotlatsintokisej?
14 Kuali ximoiljui kenijkatsa tikamanalti. Jesús kiijtok: “Kema se kiijtoua se tlajtoli fiero, uajka kisas ipan iyolo” (Mat. 15:18). Uan nelia tlen kiijtok, kej tikamanaltij kinextia tlake eltok ipan toyolo. Ximotlatsintoki: “¿Nochipa nikijtoua tlen melauak maske nijmati teipa nijpias kuesoli? Tlaj ya nijpia nonamik, ¿nikinpeualtia sekinok? ¿Nikijtoua tlamantli tlen sokiyo? ¿Nima nikualani kema nechtlaijiljuiaj?”. Kuali ximoiljui ipan ni tlajtlanili. Tlen tikijtouaj, eli kej nopa ikpatl tlen ika kiijtsontokej se yoyomitl. Yeka, tlaj tijchiuaj kampeka ayokmo titeyolkokosej ika tlen tikijtosej, ayokmo tiistlakatisej yon tikijtosej tlen sokio, kejuak ayokmo “ijtsontos” nopa amo kuali ipan totlakayo.
15. ¿Tlake moneki tijchiuasej uan kiampa kejuak tijkuapilosej tonemilis tlen kichiua ma titlajtlakolchiuakaj?
15 Nima xijpatla monemilis. Apóstol Pablo kiijtok ika se keski tlajtoli kampa kinextik moneki nima tijpatlasej tonemilis. Ya kiijtok moneki kejuak tijkuapilosej tonemilis tlen kichiua ma titlajtlakolchiuakaj (Rom. 6:6). Jesús kikajki ma kikuapilokaj pampa kinejki kiyolpakiltis Jehová. Tlaj tojuantij nojkia tijnekij tijyolpakiltisej, moneki tijkauasej nochi tlen ya kikualankaita. Tlaj kiampa tijchiuaj, amo techyolkokos totlalnamikilis uan teipa uelis tiitstosej nochipa (Juan 17:3; 1 Ped. 3:21). Ma tikilnamikikaj, Jehová amo kipatlas itlanauatiljuaj san pampa kinekis techyolpakiltis, moneki tojuantij tijpatlasej tonemilis uan tijchiuasej tlen kiijtoua itlanauatiljuaj (Is. 1:16-18; 55:9).
16. ¿Kenke moneki timosentlalijtosej amo tijchiuasej tlen kineki totlakayo?
16 Amo xijkaua ma mitstlani tlen kineki motlakayo. Maske ya timoatsonpoliuiltik, nojua moneki tijpatlatias monemilis. Ximoiljui ipan tlen kipanok Maurício, kema nojua eliyaya telpokatl pejki mosiuaneki. Teipa, kinixmatki Jehová itlajtoltemakauaj uan pejki momachtia Biblia. Kipatlak inemilis uan moatsonpoliuiltik ipan 2002. Maske ya uejkajtok kitekipanoua Jehová, ya kiijtoua: “Nochipa nijchiua kampeka amo nimoiljuis yon nijchiuas tlen notlakayo kineki”. Maske kiampa kipano, nojua kichiua kampeka kuali tlatekipanos, yeka nojkia kiijtoua: “Tlauel nechyolchikaua pampa nijmati Jehová tlauel yolpaki kema kiita nijchiua kampeka amo nijchiuas tlen amo kuali”. *
17. ¿Kenijkatsa techpaleuia tlen Nabiha kichijki?
17 Xikiljui Jehová ma mitspaleui ika itonal uan amo ximotemachi san ipan ta (Gál. 5:22; Filip. 4:6). Tlaj ayokmo tijneki tijchiuas tlen motlajtlakolchijkatlalnamikilis kineki, moneki tijchiuas se ueyi kampeka. Xikita tlen kipanok se siuatl katli itoka Nabiha. Itata kitlauelkajki kema kipiayaya chikuasej xiuitl, ya kiijtoua: “Tlen nechpanok tlauel nechyolkokok”. Yeka kema moichpokachijki, tlauel mosisiniyaya. Pejki kinamaka drogas, kiitskijkej uan miak xiuitl tsaktoya. Se keskij toikniuaj katli tlajtolmoyauayayaj kampa tsaktoya, pejkej kimachtiaj. Yeka, pejki kipatla inemilis. Ya kiijtoua: “Maske se keski tlamantli nima nijkajki, [...] tlauel ouij nijmatki ayokmo nitlachichinas”. Kipano se xiuitl kichijki kampeka kikauas tlachichinas. ¿Tlake kipaleuik? Ya kiijtoua: “Tlauel nimomaijtok, yeka uelki nijkaua nitlachichina”. Ya nojkia kiijtoua: “Tlaj na uelki nijpatlak nonemilis uan kiampa nijyolpakiltis Jehová, sekinok nojkia uelisej”. *
UELIS TIJPATLAS MONEMILIS UAN TIMOATSONPOLIUILTIS
18. Kej kiijtoua 1 Corintios 6:9-11, ¿tlake kichijtokej miakej toTeotsij itekipanojkauaj?
18 Ipan achtoui siglo, nopa tlakamej uan siuamej tlen Jehová kintlapejpenik ma tlanauatikaj iuaya Cristo, nojkia kichijkej tlen amo kuali. Se neskayotl, maske momekatiyayaj, mosiuanekiyayaj o motlakanekiyayaj uan tlachtekiyayaj, toTeotsij itonal kinpaleuik ma kipatlakaj ininnemilis (xijpoua 1 Corintios 6:9-11). Ipan ni tonali, Biblia nojua kinpaleuijtok tlauel miakej maseualmej ma kipatlakaj ininnemilis. * Inijuantij ayokmo kichiuaj tlen momajtoyaj kichiuaj. Ni kinextia ta nojkia uelis tijpatlas kej tieli uan ayokmo tijchiuas tlen amo kuali, uan kiampa uelis timoatsonpoliuiltis.
19. ¿Tlake tikitasej ipan nopa seyok tlamachtili?
19 Katli kinekij moatsonpoliuiltisej moneki amo san kikauasej tlen amo kuali, nojkia moneki kichiuasej kampeka kipatlatiasej ininnemilis. Ipan nopa seyok tlamachtili tikitasej kenijkatsa uelis tijchiuasej uan kenijkatsa sekinok uelis techpaleuisej.
UIKATL 41 Jehová xijkaki notlamaijtol
^ Tlaj se akajya katli momachtia Biblia kineki moatsonpoliuiltis, moneki kipatlas se keski tlamantli ipan inemilis. Ipan ni tlamachtili tikitasej tlake kiijtosneki totlajtlakolchijkatlalnamikilis, kenke moneki tijpatlasej uan kenijkatsa tijchiuasej. Uan ipan nopa seyok tlamachtili tikitasej kenijkatsa nojua uelis tijpatlatiasej tonemilis, maske ya timoatsonpoliuiltijkej.
^ TLEN TLAUEL IPATI: Kema ipan Biblia kiijtoua “inmokixtilijtokej inmotlajtlakolchijkatlalnamikilis”, kiijtosneki ayokmo tijchiuasej yon timoiljuisej tlen Jehová kikualankaita. Ni moneki tijchiuasej kema ayamo timoatsonpoliuiltiaj (Efes. 4:22).
^ Hechos 3:19, TNM: “Uajka, ximoyolkuepakaj uan ayokmo xijchiuakaj tlen inkichiuayayaj uan kej nopa inmechtlapojpoljuisej inmotlajtlakoljuaj uan inkipiasej tlayolseuilistli tlen temaka Jehová”.
^ Tlaj nojua tijneki tijmatis, xikita tlamachtili “La Biblia les cambió la vida: ‘Necesitaba volver a Jehová’”, tlen kiski ipan La Atalaya 1, abril 2012.
^ Tlaj nojua tijneki tijmatis, xikita tlamachtili “La Biblia les cambió la vida: ‘Fueron muy amables conmigo’”, tlen kiski ipan La Atalaya mayo 1, 2012.
^ Tlaj nojua tijneki tijmatis, xikita tlamachtili “La Biblia les cambió la vida: ‘Llegué a ser una joven irritable y agresiva’”, tlen kiski ipan La Atalaya octubre 1, 2012.
^ Xikita recuadro “ Biblia kinpaleuik kuali ma monejnemiltikaj”.
^ TLEN NESI IPAN TLAIXKOPINKAYOTL. Sanse kej kema timokixtiliaj se yoyomitl tlen sosoltik, nojkia moneki ayokmo tijchiuasej tlen amo kuali.
