1. ¿Keniuj tinemiaj achto ke timomachtiskiaj Biblia?

 ¿KENIUJ tionnemia achto ke tionmomachtiskia Biblia? Miakej nion tiknekij tikelnamikiskejok. Tein tikchiuayaj uan tikijtouayaj kinextiaya ke timoyekanayaj ika tein taltikpakneminij akin amo kitekitiliaj Dios kijtouaj ke kuali uan ke amo kuali. Komo ijkon tinemiaj amo tikchiayaj tein kuali uan amo tikixmatiaj toTajtsin Dios (Efes. 2:12). Sayoj ke, nochi nejon mopatak porin peuak timomachtiaj Biblia.

2. ¿Toni tikonajsikamatik keman peuak tionmomachtia Biblia?

² Ijkon kemej tionmomachtijtiajki Biblia, tikonajsikamatik ke tikonpia se moPopaj ompa iluikak akin semi mitsontasojta. No tikonitak ke komo tikonnekia tikonyolpaktis Jiova uan tionpouis iniuan itekitikauan, monekia tikonpatas kemej tionnemia uan kemej tiontanemiliaya. Monekia tikontakamatis tein Jiova kijtoua ke kuali yetok uan tein amo kuali yetok (Efes. 5:3-5).

3. 1) Ijkon kemej kijtoua Colosenses 3:9, 10, ¿toni kineki Jiova maj tikchiuakan? 2) ¿Keniuj techpaleuis nejin tamachtilis?

³ Kemej Jiova toTachijchiujkauj uan toTajtsin, kinamiki kiniluis keniuj moneki nemiskej akin pouij iniuan ichankauan. Uan akin kinekij moauiskej kiniluia: “[Ximoajchiuilikan] ne soltik namotalnamikilis [uan] [...] ne tachiualisme” * (xikonixtajtolti Colosenses 3:9, 10). ¿Tikonnemilijtok tionmoauis? Nejin tamachtilis mitsonpaleuis xikonnankili nejin eyi netajtanilmej: ¿toni ‘soltik talnamikilis’?, ¿keyej Jiova kineki  maj timoajchiuilikan oso maj timokixtilikan? uan ¿keniuj uelis tikchiuaskej? Uan komo timoauijkejya, nejin tamachtilis techpaleuis maj amo oksepa tikchiuakan nion maj titanemilikan kemej tikchiuayaj achto ke timokixtiliskiaj ‘soltik talnamikilis’.

4. ¿Toni kichiua akin mokaua maj kiixyekana ‘soltik talnamikilis’?

⁴ Akin kikaua maj kiixyekana ‘soltik talnamikilis’ miakpa sayoj kichiua uan tanemilia itech itanejnekilis. Xa niman kualani, sayoj itech tanemilia, amo motasojkamati uan moueyineki. Xa kiuelita moixpetanis ika auilnemilis uan películas kampa nesi auilnemilis oso tateuilis. Maski ijkon, kipia miak kualneskayomej uan xa hasta amo kuali momachilia ika tein kijtoua oso kichiua, sayoj ke monekiok teisa tein uelis kipaleuis maj kipata kemej tanemilia uan tein kichiua (Gál. 5:19-21; 2 Tim. 3:2-5).

5. ¿Uelis senkis timokixtiliskej ‘soltik talnamikilis’? Xikonmelaua (Hechos 3:19).

⁵ Kemej titajtakouanij, amo uelis senkis tiktsakuiliskej tein amo kuali tein tiknemiliaj uan tein tiknejnekij. Kemansa, tikchiuaskej oso tikijtoskej teisa tein satepan tiknemiliskej maj amo tikchiuanij oso maj amo tikijtouanij (Jer. 17:9; Sant. 3:2). Sayoj ke keman timokixtiliaj ‘soltik talnamikilis’ timopataj, porin timochikauaj amo tikchiuaskejok tein amo kuali tein tiknemiliaj uan tein tiknejnekij (Is. 55:7; xikonixtajtolti Hechos 3:19).

6. ¿Keyej Jiova techiluia maj amo tiknemilikanok nion maj tikchiuakanok tein amo kuali?

⁶ Jiova techiluia maj amo tiknemilikanok nion maj tikchiuakanok tein amo kuali porin semi techtasojta uan kineki maj kuali tietokan (Is. 48:17, 18). Yejuatsin kimati ke komo tikchiuaj tein amo kuali tein tiknejnekij, timotajyouiltiaj tejuan uan no oksekin. Uan Jiova kiyolkokoua keman panoua nejon.

7. Kemej kijtoua Romanos 12:1, 2, ¿toni moneki tikixpejpenaskej?

⁷ Xa seki tochankauan uan akin kuali iniuan timouikaj techpijpinaujtiskej porin timochikauaj tikpataskej kemej titanemiliaj uan tein tikchiuaj (1 Ped. 4:3, 4). Xa kijtoskej ke tejuan tikmatij keniuj tinemiskej uan amo akin monekiskia techiluis toni tikchiuaskej. Sayoj ke  akin amo kinekij kitakamatiskej itanauatiluan Jiova, tein melauj amo kichiuaj tein yejuan kinekij, ta kikauaj maj kinixyekana tein amo kuali tein onkak nikan taltikpak kampa Satanás taixyekana (xikonixtajtolti Romanos 12:1, 2). Tinochin moneki tikixpejpenaskej ox tiksentokaskej ika ‘soltik talnamikilis’ tein tikpiaj porin titajtakolejkej uan porin itech taltikpak taixyekana Satanás, oso tikauaskej maj Jiova techpaleui maj timopatakan uan tikchiuaskej tein kuali hasta kampa tiueliskej (Is. 64:8).

8. ¿Toni techpaleuis maj amo tiknemilikanok uan maj amo tikchiuakanok tein amo kuali?

⁸ Jiova kiajsikamati ke amo ijsiujka uelis tikpataskej kemej titanemiliaj uan tein tikchiuaj uan ke moneki timochikauaskej (Sal. 103:13, 14). Sayoj ke yejuatsin techmaka tamatilis, chikaualis uan nochi tein techpaleuis maj timopatakan ika iTajtol, iespíritu uan inechikol. Tejuatsin xa tikonitania keniuj Jiova mitsonpaleuiani. Axkan tikitaskej toni uelis mitsonpaleuis xikonsentoka xionmokixtili ‘soltik talnamikilis’, uan xikonchiua tein moneki para uelis tionmoauis.

9. ¿Keniuj uelis mitsonpaleuis iTajtol Dios?

⁹ Ika Biblia xikonita toni moneki tikonpatas. ITajtol Dios kemej yeskia se espejo, yejua ika uelis mitsonpaleuis xikonita keniuj tiontanemilia, keniuj tiontajtoua uan tein tikonchiua (Sant. 1:22-25). Akin mitsonmachtia Biblia uan okseki tokniuan akin uejkaujya kitekitiliaj Jiova uelis mitsonpaleuiskej. ¿Keniuj? Ika Biblia mitsonpaleuiskej xikonita tein ueli tikonchiua uan tein ouij mitsonkisa tikonchiuas, mitsonnextiliskej keniuj uelis tikontemos tamachtilis tein mitsonpaleuis amo xikonchiuaok seki taman tein amo kuali. Jiova kineki nochipa mitsonpaleuis uan yejuatsin uelis okachi kuali kichiuas porin kuali mitsonixmati (Prov. 14:10; 15:11). Yejua ika, nochipa xionmotataujti uan xionmomachti Biblia mojmostaj.

10. ¿Toni mitsonmachtia tein kipanok Elie?

¹⁰ Xikonneltoka ke itanauatiluan Jiova semi techpaleuiaj. Nochi tein Jiova technauatia techpaleuia. Akin kitakamatij itanauatiluan kuali momachiliaj uan yekmelauj yolpakij (Sal. 19:7-11). Sayoj ke akin amo kitakamatij Dios tajyouiaj porin kichiuaj tein amo kuali. Maj tikitakan tein panoua keman amo se kitakamati itanauatiluan Dios ika tein kipanok se takat akin monotsa Elie. Maski itatuan kitekitiliayaj Jiova, keman katka telpoch peuak mouika iniuan amo kuali tasojiknimej. Peuak kikui droga, auilnemi uan tachteki. Elie kijtoua ke okachi kualania uan tateuiaya. Yejua kijtoua: “Nikchiuaya nochi tein nechmachtijkaj ke amo moneki kichiuas se itekitikauj Dios”. Sayoj ke amo kielkauak tein kimachtijkaj itatuan keman okichpilok katka. Yejua ika satepan peuak oksepa momachtia Biblia. Semi mochikauak amo kichiuasok tein amo kuali uan moauij itech xiuit 2000. ¿Keniuj kipaleuiani kitakamatis itanauatiluan Jiova? Elie kijtoua: “Kuali nimomachilia uan amo nechkuejmoloua notanemilil”. * Tein kipanok Elie kinextia ke akin amo kitakamatij itanauatiluan Jiova yejuan motajyouiltiaj. Sayoj ke Jiova kineki kinpaleuis maj mopatakan.

11. ¿Toni kitauelita Jiova?

¹¹ Xikontauelita tein Jiova kitauelita (Sal. 97:10). Biblia kijtoua ke Jiova kitauelita “akin moueyimati, akin amo kijtoua tein melauj uan akin temiktia” (Prov. 6:16, 17). No kintauelita  “taltikpakneminij akin kiuelitaj tateuiskej uan akin takajkayauaj” (Sal. 5:6). Jiova semi kitauelita nejin tachiualismej yejua ika kinixpoloj taltikpakneminij akin kichiuayaj tein amo kuali itech itonaluan Noé, porin itech nochi taltikpak nochin semi tateuiayaj (Gén. 6:13). Maj tikitakan okse neskayot, itechkopa tanauatijkej Malaquías Jiova kijtoj ke kitauelita maj aksa kikajkayaua inamik uan maj mokauakan ininixpan tekiuanij. Dios amo kiselia inintaueyichiualis akin kichiuaj nejin uan amo uejkaua kinmelauas (Mal. 2:13-16; Heb. 13:4).

12. ¿Toni kijtosneki se kitauelitas tein amo kuali?

¹² Jiova technauatia: “Xiktauelitstiyakan nochi tataman chiualisme den amokuali” (Rom. 12:9). Tajtol “xiktauelitstiyakan” kiteajsikamatiltia teisa tein amo se kineki se kiitas, tein semi se kitauelita oso tetajyaltij. Maj tiknemilikan toni tikchiuaskiaj komo techiluiskiaj maj tikuakan se tapalol tein amo kualtiaok, hasta komo sayoj tiknemiliskiaj semi techtajyaltiskia. Yejua nejon monekiskia tikmachiliskej maski sayoj tiknemiliskiaj tikchiuaskej teisa tein Jiova kijtoua ke amo kuali.

13. ¿Keyej moneki timoyekpiaskej ika tein tiknemiliaj?

¹³ Xionmoyekpia ika tein tikonnemilia. Tein tiknemiliaj yejua tein tikchiuaj. Yejua ika Jesús kijtoj maj amo tiknemilikan nion teyi tein uelis kichiuas maj titajtakokan (Mat. 5:21, 22, 28, 29). ¿Melauj ke tiknekij tikyolpaktiskej toTajtsin Jiova? Komo ijkon, moneki niman timoajchiuiliskej komo peua tiknemiliaj teisa tein amo kuali.

14. ¿Toni kinextia tein tikijtouaj, uan toni monekiskia timotajtaniskej?

¹⁴ Kuali xikonnemili tein tikonijtoua. Jesús kijtoj: “Tajtolis ten kisa tech se iten, yejua ne ualeua tech se iyolo” (Mat. 15:18). Tein tikijtouaj kinextia keniuj yekmelauj titamatij. Xionmotajtani: “¿Nochipa nikijtoua tein melauj maski nejon uelis kichiuas maj nimokuejmolkalaki? Komo nimonamiktijya, ¿nimoyekpia uan amo niknextia ke nikinuelita oksekin? ¿Senkis amo ika nitajtoua auilnemilis? ¿Amo nitetauelnankilia maski aksa kichiua teisa tein nechkualantia?”. Itech xiontanemili nejin netajtanilmej. Tein tikijtouaj kemej yeskia botones tein kipia se taken, komo tikixtiliaj botones okachi amo ouij timokixtiliskej taken. No ijkon, komo timochikauaj amo titeuijuikaltiskej, amo titakajkayauaj nion ika titajtouaj auilnemilis, okachi amo ouij techkisas timokixtiliskej ‘soltik talnamikilis’.

15. ¿Toni moneki tikchiuaskej para “[tikoujpanpiloskej] soltik totalnamikilis”?

 ¹⁵ Xikonchiua tein monekis. Tatitanil Pablo ika tajtoj se neskayot porin kinekia techpaleuis maj tikajsikamatikan ke semi moneki timopataskej. Kijtoj ke moneki “[tikoujpanpiloskej] soltik totalnamikilis” (Rom. 6:6). Jesús motemakak maj kipilouanij itech se kouit porin kinekia kiyolpaktis Jiova. No ijkon, komo tiknekij tikyolpaktiskej Dios moneki senkis tikixtaliskej amo tiknemiliskejok nion tikchiuaskejok tein yejuatsin kitauelita. Sayoj komo tikchiuaj nejin, uelis tikpiaskej totanemilil chipauak uan uelis tikchiaskej tinemiskej nochipaya (Juan 17:3; 1 Ped. 3:21). Maj tikelnamikikan ke Jiova amo kipatas itanauatiluan para techyolpaktis, ta moneki tejuan timopataskej para uelis tiktakamatiskej tein yejuatsin tanauatia (Is. 1:16-18; 55:9).

16. ¿Keyej moneki tikonsentokas tionmochikauas amo tikonchiuasok tein amo kuali tein tikonnejneki?

¹⁶ Xionmochikaua amo tikonchiuasok tein amo kuali tein tikonnejneki. Satepan ke tionmoauis moneki tikonsentokas tionmochikauas amo tikonchiuas tein amo kuali tein tikonnejneki. Xikonnemili tein kipanok Mauricio, keman katka telpoch peuak kinuelita takamej. Satepan kinixmatik itaixpantijkauan Jiova uan peuak momachtia Biblia. Kipatak miak taman tein kichiuaya uan moauij itech xiuit 2002. Maski uejkaujya kitekitilia Jiova, Mauricio kijtoua: “Miakpa nimochikauani amo nikchiuas tein amo kuali tein niknejneki”. Sayoj ke nejon amo kichiua maj mosenkaua, porin no kijtoua: “Nechyolchikaua nikmatis ke komo amo nikchiua tein niknejneki, nikyolpaktia Jiova”. *

17. ¿Toni tein kipanok Nabiha mitsonyolchikaua?

¹⁷ Xikontajtani Jiova maj mitsonpaleui uan xiontakuaujtamati ke iyektikatsin espíritu mitsonpaleuis, amo moselti moneki tikonchiuas (Gál. 5:22; Filip. 4:6). Komo tikonneki tionmokixtilis ‘soltik talnamikilis’ uan amo oksepa tionmotalilis moneki semi tionmochikauas. Xikonita tein kipanok se siuat akin monotsa Nabiha. Ipopaj kikaujteuak keman kipiaya chikuasen xiuit. Yejua kijtoua: “Nejon kichiuak maj semi nimotayokoltiani”. Ijkon kemej moskaltijtiajki okachi niman kualania uan tateuiaya. Peuak kinamaka drogas,  kitsakkej uan miak xiujmej tsaktoya. Seki tokniuan akin yayaj tanojnotsatij ompa, peuak kimachtiaj ika Biblia. Yejua peuak kipata miak taman. Kijtoua: “Seki taman amo ouij nechkisak nikakuas. [...] Sayoj ke semi ouij nechkisak amo nitachichinasok”. Uelik senkis kikauak panoua se xiuit satepan, ¿toni kipaleuij? Kijtoua: “Sayoj uelik nikauak porin nochipa niktataujtij Jiova”. Uan no kijtoua: “Nikyekmati ke komo nejua uelik nikpatak tein nikchiuaya porin niknekia nikyolpaktis Jiova, akin yeski uelis kichiuas”. *

18. Kemej kijtoua 1 Corintios 6:9-11, ¿toni uelini kichiuanij miakej itekitikauan Dios?

¹⁸ Itech yekinika siglo seki takamej uan siuamej akin Jiova kinixpejpenak maj tekiuajtikan iuan Cristo, achto kichiujkaj tein amo kuali. Kemej neskayot, auilnemiaj, motekayaj iniuan inintakaikniuan oso ininsiuaikniuan uan tachtekiaj. Sayoj ke yektikatsin espíritu kinpaleuij maj mopatakan (xikonixtajtolti 1 Corintios 6:9-11). Axkan, Biblia no kinpaleuiani millones taltikpakneminij maj mopatakan. * Kikaujkej miak taman tein semi momattoyaj kichiuaskej. Tein kichiujkej kinextia ke tejuatsin no uelis tionmopatas uan tikonkauas tein amo kuali tein tikonchiuaya uan ijkon uelis tionmoauis.

19. ¿Toni tikitaskej itech okse tamachtilis?

¹⁹ Akin kinekij moauiskej amo sayoj moneki mochikauaskej mokixtiliskej ‘soltik talnamikilis’, ta no moneki mochikauaskej motaliliskej “chipauak talnamikilis”. Itech okse tamachtilis tikitaskej keniuj uelis tikchiuaskej nejon uan keniuj oksekin uelis techpaleuiskej.