1. ¿Tlen otikchiuayaj ijkuak ayamo otimomachtiayaj Biblia?

 ¿KEN otikpiaya monemilis ijkuak ayamo omitsmachtiayaj iTlaixpantijkauan Jehová? Xamo amo techpaktia tikilnamikiskej. Xamo achto otikchiuayaj ken akinmej amo kixmatij Jehová. Tla ijkon otikchiuayaj, kijtosneki amo otikixmatiayaj toTajtsin Dios uan amo otikmatiayaj tlen kichiuas satepan (Efes. 2:12). Pero axkan okachi kuali tikatej porque opejki timomachtiaj Biblia.

2. ¿Tlen otikmatki ijkuak opejki timomachtia Biblia?

² Ijkuak opejki timomachtia otikmatki toTajtsin Dios mitstlasojtla. Noijki otikajsikamatki tla otiknekiaya tiktekichiuilis Jehová, omonekiaya tikpatlas monemilis uan ken otimokuayejyekouaya. Noijki otikajsikamatki moneki tiktlakamatis tlen ye kijtoua (Efes. 5:3-5).

3. (1) Ijkon ken kijtoua Colosenses 3:9, 10, ¿tlen kineki Jehová ma tikchiuakan? (2) ¿Ken techpaleuis nin tlamachtil?

³ Jehová otechchijchi, ik non, ye kinamiki kijtos ken moneki kipiaskej innemilis akinmej pouij itech ifamilia. Akinmej kinekij moapolaktiskej ye kinmiluia ‘xikkauakan tlan achto onomechyolijtlakoaya iwa ximoyankuilikah’ * (xiktlajtolti Colosenses 3:9, 10). Tla mitspaktiskia timoapolaktis, itech nin tlamachtil tikitaskej eyi tlajtlanilmej: ¿Tlen achto otechijtlakouaya? ¿Tleka kineki Jehová ma tikpatlakan tonemilis? ¿Uan ken tikchiuaskej?  Tla yotimoapolaktijkej, nin tlamachtil techpaleuis ayakmo ma tikchiuakan tlen achto otikchiuayaj.

4. ¿Tlen kichiua akin amo kipatla inemilis?

⁴ Akin kichiua tlen teijtlakoua, mokuayejyekoua uan kichiua tlen kiyoltilana porque tlajtlakole. San niman kualani, tlaixneki, amo motlasojkamati uan moueyineki. Xamo kipaktia kitas pornografía, películas kanin mota auilnemij uan moteuiaj. Ualeua amo kuali momachilia porque ye yolkuali pero itlaj moneki kiyolinis para kipatlas tlen kichiua uan tlen mokuayejyekoua (Gál. 5:19-21; 2 Tim. 3:2-5).

5. ¿Ken moneki tikitaskej tlen kijtosneki ayakmo tikchiuaskej tlen techijtlakoua? (Hechos 3:19).

⁵ Tinochtin titlajtlakolejkej, ik non, xamo ok timokuayejyekoskej tlen amo kuali uan itlaj techyoltilanas. Ualeua timoyolkokoskej ika tlen timokuayejyekoskej uan tikchiuaskej (Jer. 17:9; Sant. 3:2). Pero ijkuak ayakmo tikchiuaj tlen techijtlakoua, tikmatiskej timonauatiskej para ayakmo titlajtlakolchijtoskej (Is. 55:7; xiktlajtolti Hechos 3:19).

6. ¿Tleka Jehová amo kineki ma timokuayejyekokan nion ma tikchiuakan tlen techijtlakoua?

⁶ Jehová techtlasojtla uan kineki kuali ma tiyetokan, ik non, ye kineki ayakmo ma timokuayejyekokan tlen amo kuali uan ayakmo ma tikchiuakan tlen achto otikchiuayaj (Is. 48:17, 18). Ye kimati tla san tiknekij tikchiuaskej tlen amo kuali, titlajyouiskej uan tikinyolkokoskej oksekimej. Uan ye sapanoua kiyolkokoua ijkuak ijkon kita.

7. Ijkon ken kijtoua Romanos 12:1, 2, ¿tlen moneki tikchiuaskej?

⁷ Ijkuak ayakmo tikchiuaj tlen Jehová amo kipaktia xamo tofamilia uan akinmej inmiuan timouikaj techpinauiskej (1 Ped. 4:3, 4) Xamo techiluiskej moneki tikpejpenaskej tlen tikchiuaskej uan amikaj moneki technauatis. Pero akinmej amo kitlakamatij Jehová uan monauatiaj inselti kikauiliaj ma kinyekana  Satanás (xiktlajtolti Romanos 12:1, 2.) Tinochtin moneki itlaj tikpejpenaskej: ¿Tikkauiliskej Satanás ma techyekana noso tikkauiliskej Jehová ma techyekana uan ma kipatla tonemilis? (Is. 64:8).

8. ¿Tlen techpaleuis ayakmo timokuayejyekoskej tlen amo kuali nion tikchiuaskej?

⁸ Jehová kimati moneki timochijchikauaskej para amo timokuayejyekoskej nion tikchiuaskej tlen amo kuali (Sal. 103:13, 14). Pero Jehová techpaleuia ika iTlajtol, iespíritu santo uan ialtepe para ayakmo ijkon ma tikchiuakan. Xamo yotikitak ken Jehová yomitspaleui. Axkan tikitaskej tlen uelis tikchiuas para tikkauas tlen teijtlakoua uan ijkon uelis timoapolaktis.

9. ¿Ken uelis mitspaleuis iTlajtol Jehová?

⁹ Ximomachti tlen kijtoua Biblia para tikmatis tlen moneki tikchiuas. Ijkon ken se espejo, Biblia mitspaleuis xikita ken timokuayejyekoua, tlen tikijtoua uan tlen tikchiua (Sant. 1:22-25). Akin mitsmachtia uan oksekimej tokniuan uelis mitspaleuiskej. Ika Biblia mitspaleuiskej xikita tlen kuali tikchiua uan tlen oui tikita tikchiuas uan mitsititiskej amatlajkuilolmej kanin kijtoua tlen mitspaleuis ayakmo tikchiuas tlen amo kuali. Jehová kineki mitspaleuis porque san ye kimati tlen tikpia itech moyolo (Prov. 14:10; 15:11). Ik non, nochipa xiktlatlaujti uan ximomachti iTlajtol.

10. ¿Tlen techmachtia tlen okipanok Elie?

¹⁰ Moneki xikneltoka mitspaleuis tlen Jehová tlanauatia. Nochi tlen Jehová techiluia techpaleuia uan tla tiktlakamatij, kuali timomachiliskej uan tiyolpakiskej (Sal. 19:7-11). Akinmej amo kitlakamatij tlajyouiaj porque kichiuaj tlen amo kuali. Ma tikitakan tlen okijto se tlakatl tlen itoka Elie. Ye okijto tlen panoua ijkuak amo tiktlakamatij toTajtsin Dios. Maski itatajuan okitekichiuiliayaj Jehová, ijkuak okatka telpochtli opejki mouika iuan akinmej amo okitekichiuiliayaj, opejki kimotlalilia drogas, oauilnemiaya, otlachtekiaya, san niman okualaniaya uan okinekiaya tlateuis. Ye okijto: “Onikchiuaya ken akinmej amo kitekichiuiliaj Jehová”. Pero amo keman okilka tlen okimachtijkej itatajuan, ik non, oksepa opejki momachtia Biblia, omochijchika kikauas nochi tlen okichiuaya uan omoapolakti itech xiuitl 2000. ¿Ken yokipaleui kitlakamati Jehová? Ye okijto: “Kuali nimomachilia uan nikpia chipauak notlalnamikilis”. * Tlen okipanok Elie techititia akinmej amo kitlakamatij Jehová motlajyouiltiaj pero ye kineki kinpaleuis ma kitlakamatikan.

11. ¿Tlen kikokolia Jehová?

¹¹ Xikkokoli tlen Jehová kikokolia (Sal. 97:10). Biblia kijtoua Jehová kikokolia “akin moueyineki, akin tlakajkayaua uan akin kinokia ieso akin amitlaj itlajtlakol” (Prov. 6:16, 17). Ye noijki kikokolia akinmej kinpaktia moteuiskej uan tlakajkayauaj (Sal. 5:6). Jehová nochi non kikokolia, ik non, okinmixpolo akinmej ijkon okichiuayaj ijkuak okatka Noé (Gén. 6:13). Okse tlamantli tlen noijki kikokolia tlen okijto profeta Malaquías,  tla ikaj kikajkayaua inamik noso isiua uan mokajkauaj inmixpan tekiuajkej. Akinmej ijkon kichiuaj ye kinmixkomakas (Mal. 2:13-16; Heb. 13:4).

12. ¿Tlen kijtosneki tiktlauelitaskej tlen amo kuali?

¹² Jehová technauatia ‘xiktlawelitakah nochi tlan amo kualiʼ (Rom. 12:9). Tlajtoli tiktlauelitaskej, kijtosneki tikkokoliskej tlen amo kuali. Ma timokuayejyekokan, ¿tlen tikchiuaskiaj tla techiluiaj ma tikkuakan se tlakuali tlen yoijtlakauik? Techtlajyaltis tla ijkon techiluiskej. Ijkon moneki tikchiuaskej ijkuak Jehová techiluia ma tikkokolikan tlen amo kuali.

13. ¿Tleka moneki tikitaskej ken timokuayejyekouaj?

¹³ Kuali xikita tlen timokuayejyekoua. Uelis techyolinis itlaj ma tikchiuakan tlen timokuayejyekouaj. Ik non, Jesús okijto amo ma timokuayejyekokan tlen amo kuali para amo titlajtlakolchiuaskej (Mat. 5:21, 22, 28, 29). Tinochtin tiknekij tikyolpaktiskej toTajtsin Dios, ik non, san niman ma tikpatlakan tlen timokuayejyekouaj.

14. ¿Tlen kiteititia tlen tikijtouaj uan tlen moneki timotlajtlaniskej?

¹⁴ Kuali ximokuayejyeko ijkuak itlaj tikijtos. Jesús okijto nochi tlen timokuayejyekouaj kisa itech toyolo (Mat. 15:18). Ik non, tlen tikijtouaj kiteititia tlen timokuayejyekouaj, ximotlajtlani: “¿Nochipa nikijtoua tlen melauak maski nitlajyouis? Tla yonimonamikti, ¿nikteititia ok ikaj nikneki nikixmatis? ¿Nimochijchikaua amo ompa niyetos ijkuak oksekimej kijtouaj ken auilnemij? ¿Nimochijchikaua kuali niknankilia ijkuak ikaj nechkualania?”. Non ximokuayejyeko. Tlen titlajtouaj yetoskia ken ibotones tlen kipia se totlaken, ijkon amo oui tikmokixtiliskej. Noijki ijkon tla timochijchikauaj para amo titlakajkayauaskej nion tikijtoskej tlen pitsotik, amo oui tikitaskej tikkauaskej tlen techijtlakoua.

15. ¿Tlen okijto apóstol Pablo para ayakmo tikchiuaskej tlen techijtlakoua?

¹⁵ San niman itlaj xikpatla. Apóstol Pablo okijto moneki timochijchikauaskej para ayakmo tikchiuaskej tlen  amo kuali otikchiuayaj, ik non, okijto moneki tiktsikoskej itech se kuauitl tlen techijtlakoua (Rom. 6:6, TNM). Jesús okipejpenki ma kimiktikan porque okinekiaya kiyolpaktis Jehová. Noijki ijkon tla tiknekij tikyolpaktiskej Jehová, ayakmo ma tikchiuakan tlen ye amo kipaktia. Tla ijkon tikchiuaj, tikpiaskej chipauak totlalnamikilis uan satepan uelis tiyoltoskej nochipa (Juan 17:3; 1 Ped. 3:21). Ma tikilnamikikan Jehová amo kipatla tlen technauatia uan tejuan moneki tiktlakamatiskej (Is. 1:16-18; 55:9).

16. ¿Tleka ok moneki timochijchikauas para amo tikchiuas tlen amo kuali?

¹⁶ Ximochijchikaua para amo tikchiuas tlen amo kuali. Ijkuak yotimoapolakti ok moneki timochijchikauas para ayakmo tikchiuas tlen amo kuali. Ma tikitakan tlen okipanok Mauricio. Ijkuak okatka telpochtli okipaktiaya mosiuakopas. Satepan opejki momachtia iuan iTlaixpantijkauan Jehová, okipatlak inemilis uan omoapolakti itech 2002. Maski yikipia miak xiuitl kitekichiuilia Jehová, ye kijtoua: “Ualeua moneki nimochijchikauas para amo nimokuayejyekos tlen amo kuali. Nikmati Jehová kiyolpaktia porque nimochijchikaua amo nikchiua tlen amo kuali”. *

17. ¿Tlen mitsmachtia tlen okipanok Nabiha?

¹⁷ Xiktlatlaujti ma mitspaleui Jehová uan xikkauili ma mitsyekana iespíritu santo (Gál. 5:22; Filip. 4:6). Moneki timochijchikauas para ayakmo tikchiuas tlen amo kuali. Xikita tlen okipanok se siuatl tlen itoka Nabiha. Ijkuak ye okipiaya chikuase xiuitl, itajtsin okikajte. Ye okijto: “Sapanoua onimoyolkoko ijkuak notajtsin onechkajte”. Ijkuak omoskaltijtiaya opejki kualani uan okinekiaya ikaj kiteuis uan satepan opejki kinemaka drogas uan okitsakej miak xiuitl. Sekimej tokniuan opejki kimachtiaj uan okipatlak inemilis, noijki okijto: “Seki tlamantli san niman onikka pero sapanoua oui onikitak ayakmo nitlachichinas”. Kanaj se xiuitl omochijchika para ayakmo tlachichinas uan satepan  ayakmo ijkon okichi. ¿Tlen okipaleui? Ye okijto: “Nochipa oniktlatlaujtiaya Jehová uan onechpaleui ayakmo ma nitlachichina”. Noijki okijto: “¡Tla ne oniuelik onikpatlak nonemilis para nikyolpaktis Jehová oksekimej noijki uelis ijkon kichiuaskej!”. *

18. Ijkon ken kijtoua 1 Corintios 6:9-11, ¿tlen yokichijkej sekimej tokniuan?

¹⁸ Itech achto siglo akinmej Jehová okinpejpenki para ma tlanauatikan iuan Jesús noijki okichijkej seki tlamantli amo kuali. Sekimej oauilnemiayaj, otlachtekiayaj uan omosiuakopayaj. Pero Jehová okinpaleui ika iespíritu santo para ayakmo ijkon ma kichiuakan (xiktlajtolti 1 Corintios 6:9-11). Axkan tlen kijtoua Biblia miakej yokinpaleui ma kipatlakan innemilis. * Ayakmo kichiuaj tlen amo kuali. Tlen yejuan okichijkej kiteititia tejuatsin noijki uelis tikpias kuali monemilis uan ijkon uelis timoapolaktis.

19. ¿Tlen timomachtiskej itech okse tlamachtil?

¹⁹ Akinmej kinekij moapolaktiskej amo san moneki ayakmo kichiuaskej tlen teijtlakoua, noijki moneki mochijchikauaskej para kichiuaskej tlen Jehová kineki. Itech okse tlamachtil tikitaskej ken uelis tikchiuaskej uan ken oksekimej uelis techpaleuiskej.