MUSORO WO KUJIJA WO 10
Imwimwi Mungakwanisa kuvhura “Undhu Hwokare”
“Vhuranyi undhu hwokare no maitiro aho.”—VAKOROSE 3:9.
NDUMBO 29 Kuita Zvinozwirana no Zina Redu
ZVATICAJIJA *
1. Upenyu hwenyu hwainga hwakadini mucito matanga kujija Bhaibheri?
UPENYU hwenyu hwainga hwakadini mucito mukatanga kujija Bhaibheri no Zvapupu zva Jehovha? Vazinji vedu avatodi kurangarira ngo pamusoro pazvo. Mugariro wedu no undhu hwedu zvakaumbwa ngo nyika ino ngo pamusoro po zviro zvainonanga kuti zvakanaka kana zvakashata. Kudari ndizvona, tainga ticina ‘vetero, ticina Mwari munyika.’ (Vaefeso 2:12) Kujija Bhaibheri kwakatibesera kuti tiite cinjo jinodikana.
2. Ngozvapi zvamakapfumbura pamakatanga kujija Bhaibheri?
2 Pamakatanga kujija Bhaibheri makavona kuti Baba wenyu vo mudenga vanomuda maningi. Makazwisisa kuti kudari mecida kuvadakajisa no kuva umwe wo mbhuri yavo inomunamata munodikana kuita cinjo mu maponero enyu, mu mugariro no murangariro. Makajijira kupona mukuzwirana no ndhungamiriro jakakhwirira jo Bhaibheri.—Vaefeso 5:3-5.
3. Mukuzwirana na Vakorose 3:9, 10, Jehovha anoda kuti tiitenyi? Ngozvapi zvatinoda kubhuya pa musoro uwu?
3 Musiki wedu na Baba wedu vo kudenga, Jehovha, anocitendehwa cokunanga kuti vandhu vo mbhuri yake vanodikana kuva no mufambiro wakadini. Ticito tabhabhatijwa iyena anoda kuti tivhure “undhu hwokare no maitiro aho.” * (Verenganyi Vakorose 3:9, 10.) Musoro uwu unozobesera vese vanoda kubhabhatijwa kuti vadavire muvhunjo mutatu: (1) Icinyi “undhu hwokare”? (2) Ngenyi Jehovha anoda kuti tivhure undhu hwokare? (3) Tingazviitisa kudini? Kwatiri tese takaperari kubhabhatijwa, musoro uwu unozotibesera kuti titamezve kuva no undhu hwokare hwatainga tinahwo.
ICINYI “UNDHU HWOKARE”?
4. Ngozvapi zvinoita mundhu anonga ecitungamirirhwa ngo “undhu hwokare”?
4 Mundhu anotungamirihwa ngo “undhu hwokare” kazinji anorangarira no kuita zviro ngo njira yakaposeka. Kangaije iyena angava mundhu anoumbau, anokasika kunyangajwa, acingabongeseri no anojikuja. Angadakajihwa ngo kuvona zvoumitu-mitu, kuvona vandhu vanoita zvakashata kana kuvona mavhidhiyo o vandhu vanotakana. Atikani-kani kuti iyena angava no mugariro jakanaka no kutama kujizwavo ushoni ngo magama aanonanga no zvaanoita. Asi aatovangisiri kuti acinje marangariro ake no maitiro ake.—Vagaratiya 5:19-21; 2 Timoti 3:2-5.
Patinovhisa “undhu hwokare,” murangariro jakashata no maitiro akashata azvizotitungamiririzve (Vonanyi ndima 5) *
5. Ngoapi mavonero akanaka atinodikana kuva nawo patinovhisa undhu hwokare? (Mabasa o Vapostori 3:19)
5 Atizivi kukwana, ngo kudaro, akuna na umwe wedu anokwanisa kuvhisa kamare murangariro wese wakashata no cido cakashata mu mwoyo medu no mu murangariro. Asi nguva jimweni, tingaita kana kunanga zvimweni zvakashata. (Jeremia 17:9; Jakobo 3:2) Asi kudari tikavhisa undhu hwokare, marangarire no zviito zvakashata azvizotitungamiriri. Atizozivikizve inga vandhu vanoita zviro zvakashata.—Isaia 55:7; verenganyi Mabasa o Vapostori 3:19.
6. Ngenyi Jehovha anotingwaja kuti tisiye murangariro wakashata no zviito zvakashata zvo undhu hwokare?
6 Jehovha ari kutingwaja kuti tisiye murangariro wakashata no zviito zvakashata, ngokuti iyena anotida maningi anodazve kuti tidakajihwe ngo upenyu. (Isaia 48:17, 18) Iyena anoziva kuti vaya vanocido cokuita zvakashata vanojikhuvaza pacavo no kukhuvaza vaya vakavatendeneja. Zvinomusuruvaja maningi kuvona manera atiri kujikhuvaza no kukhuvaza vamweni.
7. Mukuzwirana na Varoma 12:1, 2, ngozvapi zvatinodikana kusana?
7 Shamwari jimweni no ukama humweni kangaije pakutanga vangaeja kutishora patinocinja undhu hwedu. (1 Pedhru 4:3, 4) Ivona vangananga kuti tino citendehwa cokuita zvese zvatinoda pacina dikano yo mundhu umweni anotivhunja zvokuita. Asi vese vayana vanoramba ndhungamiriro ja Jehovha azvirevi kuti vakasujunuka kamare. Kunasa kunanga, vari kutungamirihwa ngo nyika ino yakashata ya Sathana. (Verenganyi Varoma 12:1, 2.) Tese hedu tinodikana kusana ciro cimwe pa zviro zviviri izvi: Kuenderera mberi teciita zviro zvakashata tecitungamirihwa ndi Sathana kana totendera kucinjwa undhu hwedu ndi Jehovha tova vandhu vakanaka wari uno.—Isaia 64:8.
MUNGAITISA KUDINI KUTI ‘MUVHURE’ UNDHU HWOKARE?
8. Zvicinyi zvingatibesera kuti tisiye murangariro wakashata no zviito zvakashata?
8 Jehovha anoziva kuti zvinotora nguva no simba kuti tikwanise kusiya murangariro wakashata no zviito zvakashata. (Nduyo 103:13, 14) Ngo kudaro, ecishandisa Soko rake, mujimu wake no sangano rake, Jehovha anotipa uzivi, simba no kutibesera kuti tiite cinjo jinodikana. Atikani-kani kuti iyena wakanasiririka kuti atibesere. Wari ngatende tivone zviro zvimweni zvingatibesera kuti tivhise undhu hwokare no kukwanirisa kuti tibhabhatijwe.
9. Soko ra Mwari ringamubesera kuti muitenyi?
9 Shandisanyi Bhaibheri kuti mujipopore pacenyu. Soko ra Mwari rakadari inga supeya. Irona ringatibesera kuti tivone manera atinorangarira, mavereketere edu no zvatinoita. (Jakobo 1:22-25) Mujijisi wenyu wo Bhaibheri kana hama imweni yakakura kudivi ro umwari ingamupa ndhungamiriro. Inga muezaniso, ivona vangashandisa Matahwa kuti vamubesere kuvona pamakavangira no pamakarembera. Vangamubesera kuwana masoko ari mu Bhaibheri angamupa mazano o kuti mukwanise kunyisa zvirovejeso zvakashata. Nguva jese Jehovha anoda kumubesera kuti muiite izvi. Iyena mundhu wakanaka maningi angakwanisa kumubesera, ngokuti anonasa kuziva mwoyo wenyu. (Mazwi Akangwara 14:10; 15:11) Ngokudaro ivanyi no cirovejeso cokuita mukumbiro no kujija Soko rake njiku jese.
10. Tinojijenyi ngo muezaniso wa hama Eriya?
10 Tinodikana kukhohwa kuti ndhungamiriro ja Jehovha jakanaka maningi. Tingabesereka maningi ngo zvese zvatinovhunjwa ndi Jehovha kuti tiite. Vaya vanopona mukuzwirana no ndhungamiriro ja Jehovha, vanojireremeja pacavo, vanova no cinangwa mu upenyu no kuva no mudakaro wokadi-kadi. (Nduyo 19:8-12) Ngo kusiyana, vese vayana vanoramba ndhungamiriro ja Jehovha vanotambujika ngo muviyo jinovha pakuita zviro zvakashata. Vonanyi zvakanangwa ngo hama imweni inodanijwa Eriya ngo pamusoro po kuramba ndhungamiriro ja Mwari. Ivona vakarehwa pa mbhuri inoda Jehovha. Asi pavainga vecikura, hama Eriya vakasana kutamba no shamwari jakashata. Vakatanga kuva no upenyu hwakashata, votanga kushandisa mutombo jinodhakwisa, kuita uhure no kuba. Hama Eriya vakananga kuti vakaguma pakuva mundhu acikanesi kunyangajwa no kuva mundhu wakashata. Ivona vakati: “Inini ndaiita zvese zvandakajijiswa kuti Mukristu aadikani kuita.” Ivona avazivi kukanganwa zvese zvavainga vakajija vari mujaha. Pakufamba ko nguva, vakatangazve kujija Bhaibheri. Hama Eriya vakashanda ngo simba kuti vasiye mufambiro wakashata wavainga nawo no kubhabhatijwa mu gore ra 2000. Ivona vakabesereka kudini ngo kupona mukuzwirana no ndhungamiriro ja Jehovha? Vakanangazve kuti: “Wari ndino runyararo hwomukati no hana yakacena.” * Muezaniso wa hama Eriya, unotikhombija kuti vese vayana vanoramba ndhungamiriro ja Jehovha vanojikhuvaza pacavo. Pikija zvakadaro, Jehovha anoda kuvabesera kudari ivona vakada kuita cinjo.
11. Izviro zvapi zvinonyenywa ndi Jehovha?
11 Jijiranyi kunyenya zviro zvinonyenywa ndi Jehovha. (Nduyo 97:10) Bhaibheri rinovonesa kuti Jehovha anonyenya “majiso anotheka, rurimi hwokunyepa, nyara inopopomeja ngazi icina ndava.” (Mazwi Akangwara 6:16, 17) Iyena anonyenyazve mundhu “anopopomeja ngazi no mucengeji.” (Nduyo 5:7) Jehovha anonyenya murangariro no zviito zvese izvi. Ngo kudaro, iyena wakapeja vese vaiita zvakashata mu njiku ja Nowa, ngokuti vainga vazaja nyika ngo ushati. (Genesi 6:13) Vonanyi muezaniso umweni. Ecishandisa muporofita Marakiya, Jehovha wakananga kuti iyena anonyenya vese vayana vanokasika kurambana no wavakacadha naye acina ndava. Mwari aashiri kunamata kwavanomuita perapo iyena anozovatonga ngo zviito zvavo.—Malakia 2:13-16; Vahebheru 13:4.
Kurangarira kuita ciro cinonangwa ndi Jehovha kuti cakashata kunodikana kutisembhusa inga kusembhuswa kwatinoitwa patinovona zviro zvakavora (Vonanyi ndima 11-12)
12. Zvinoda kurevenyi ‘kunyenya zvakashata’?
12 Jehovha anoda kuti ‘tinyenye zvakashata.’ (Varoma 12:9) Gama rokuti ‘kunyenya’ rinonangira mazwiro akashata atinova nao patinovona ciro cakashata. Rinorevazve kunyenya kamare ciro cakashata kana kusembhuswa ndicona. Rangariranyi manera amaizojizwa kudari mukakumbihwa kuti muhe zviro zvakavora. Kurangarira maningi ngo pamusoro pazvo zvingatomuita kuti mutame kujizwa ushoni. Munjira yakafanana, kudari tikarangarira kuita ciro cinonangwa ndi Jehovha kuti cakashata, zvinodikana kutisembhusa.
13. Ngenyi zvinosisira kungwarira murangariro wedu?
13 Ngwariranyi murangariro wenyu. Zviro zvatinorangarira zvinopsasa zviito zvedu. Izvi ndizvona zvakaita kuti Jesu atijijise kuramba murangariro jingatitungamirira pakuita cishaishi cikuru. (Mateu 5:21, 22, 28, 29) Pacina kukana-kana tinoda maningi kudakajisa Baba wedu vo kudenga. Ngo kudaro, zvinosisira maningi kukasika kuramba zviro zvakashata zvinoviya mu murangariro mwedu.
14. Mabhuire atinoita anovonesenyi ngo pamusoro pedu? Tinodikana kujiita muvhunjo japi?
14 Ngwariranyi zvamunovereketa. Jesu wakati: “Asi zviri zvese zvinobuda ngo pamuromo zvinovha ngo mumwoyo.” (Mateu 15:18) Hina, zvatinovereketa zvinovonesa kamare kuti itusu tiri vandhu vomushovonyi ngo mukati. Ngo kudaro, zvivhunjisenyi kudari: ‘Inini ndinoregera kunyepa pikija kuti ndikabhuya cokwadi zvinozondibarira zvineso? Inga mundhu wakacadha, kunanga kuti ndinoita zvese zvandinokwanisa kuti nditame kuvonesa kuti ndinoda mundhu wandicikazivi kucadha naye? Ndinoita zvese zvandinokwanisa kuti nditame kubhuya magama akashata? Ndinokwanisa kudavira mundhu munjira yakapfava paanonga andinyangajisa?’ Munozovona kuti munobesereka maningi kudari mukarangarira ngo pamusoro po muvhunjo iji. Zvamunovereketa kangaije zvinoezaniswa no zvokusimira. Kudari tikavangisira kuti titame kubhuya magama okunyepa no akashata, zvinozotirerukira kuti tivhise undhu hwokare.
15. Zvinoda kurevenyi kukohomera undhu hwedu hwokare “pa mutanda”?
15 Ivanyi no cido cokuita zviya zvinodikana. Mupostori Pauro wakashandisa muezaniso kuti atijijise kusisira ko kuita cinjo mu upenyu hwedu. Iyena wakatara kuti tinodikana kukhohomera undhu hwedu hwokare “pa mutanda.” (Varoma 6:6) Ngo magama amweni tinodikana kutevera muezaniso wa Jesu. Tinodikana kuuraya murangariro no zviito zvinonyenyiwa ndi Jehovha. Kudari tikaita zviro izvi, tinozova no hana yakacena no kuva no vetero yokuzova no upenyu hunodakajisa hwo kuenda no kwenda. (Johani 17:3; 1 Pedhru 3:21) Ceukijanyi kuti Jehovha aazocinji ndhungamiriro jake kuti jitidakajise. Kusiyapo izvi, tinodikana kucinja kuti tizwirane no ndhungamiriro jake.—Isaia 1:16-18; 55:9.
16. Ngenyi tinodikana kutema civaringo cokuenderera mberi tecihwisana no zvido zvedu?
16 Endereranyi mberi mecihwa kuti munyise zvido zvakashata. Pikija kuti makapera kubhabhatijwa munodikana kuenderera mberi mecihwa kuti munyise zvido zvakashata. Rangariranyi ngo muezaniso wo hama imweni inodanijwa Maurisiyo. Pavainga mujaha, ivona vakatanga kuva no upenyu hwokuvatana no vanarume doni. Pakufamba ko nguva, ivona vakasongana no Zvapupu zva Jehovha votanga kujija Bhaibheri. Novapera kuita cinjo mu upenyu hwavo, vakabhabhatijwa mu gore ra 2002. Pikija vecishandira Jehovha wari uno ko makore akawanda, hama Maurisiyo vakati: “Ndinotendera kuti ndaidikana kuhwisana no zvido zvakashata nguva jimweni.” Ivona avazivi kutendera kuti izvi zvivarembese. Kusiyapo zvondhozvo, ivona vakati: “Ndaidikana kuva no cicunge ngokuti ndaiziva kuti kudari ndikatama kuita mukuzwirana no zvido zvangu, ndaizokwanisa kudakajisa Jehovha.” *
17. Ngozvapi zvinovangisa zvamawana pa muezaniso wa hambzaji Nabhiha?
17 Kumbiranyi besero ra Jehovha ngo kuita mukumbiro no kuthemba mujimu wake, kuciripi simba renyu. (Vagaratiya 5:22; Vafiripi 4:6) Tinodikana kushanda ngo simba kudari tinoda kuvhisa undhu hwokare no kuenderera mberi takadaro. Vonanyi muezaniso wa hambzaji inodanijwa Nabhiha. Ivona vakasiiwa ndi baba wavo pavainga no makore matandhatu basi. Hambzaji Nabhiha vakati: “Izvo zvakaita kuti ndihwajihwe maningi kamare.” Pavainga vecikura, ivona vainga mundhu ano hasha maningi no mundhu anodakarira zvokutakana. Ivona vakatanga kutengesa mbhanje, vosungwa no kugara mu kadheya ko makore manganani. Zvapupu zvakavavhakacira pavainga mukadheya votanga kujija Bhaibheri na ivona. Hambzaji Nabhiha vakatanga kuita cinjo huru mu upenyu hwavo. Ivona vakati: “Kusiya kuita zviro zvimweni zvakashata, zvainga zvakareruka. Asi kusiya kubhema zvainesa maningi kamare.” Hambzaji Nabhiha vakavangisira ko mutengo unokwana gore rimwe. Ngo kudaro, padoko ngo padoko vakatanga kusiya kubhema. Vakazviitisa kudini? Ivona vakati: “Ciro cinosisira maningi candakaita ikuita mukumbiro kuti Jehovha andibesere kusiya zviro zvakashata zvandaiita.” Wari ivona vanovhunja vamweni veciti: “Kudari inini ndakakwanisa kuita cinjo kuti ndidakajise Jehovha mundhu ari wese angakwanisavo.” *
MUNGAKWANIRISA KUTI MUBHABHATIJWE
18. Mukuzwirana na 1 Vakorinte 6:9-11, zvicinyi zvakakwaniswa kuitwa ngo vashandiri vazinji va Jehovha?
18 Muzana rokutanga romakore, vanarume novanakaji vainga vakasaniwa ndi Jehovha kuti vave majimambo pamwepo na Kristu, vaingavo veciitavo zviro zvakashata. Inga muezaniso, vamweni vavo vainga mahure, vaiita vatano mwanarume no mwanarume, mwanakaji no mwanakaji no kuita zvoumbavha. Asi ngo besero ro mujimu wa Jehovha ivona vakakwanisa kucinja undhu hwavo. (Verenganyi 1 Vakorinte 6:9-11.) Mukuezanavo nyamasi uno, Bhaibheri riri kubesera zviuru zvo vandhu kuti vaite cinjo mu upenyu hwavo. * Ivona vari kukwanisa kunyisa zviro zvakashatisisa zvavaiita. Muezaniso wavo unovonesa kuti imwimwi mungakwanisa kuitavo cinjo pa undhu hwenyu no kusiya zvirovejeso zvakashata kuti mukwanirise kubhabhatijwa.
19. Zvicinyi zvatinozovona pa musoro unotevera?
19 Kusiyapo kuvangisira kuti vavhise undhu hwokare, vaya vanoda kubhabhatijwa vanodikanavo kuvangisira kuti vasimire undhu hupsa. Musoro unotevera, unozovonesa kuti tingazviitisa kudini zvondhozvo no kuvona kuti vamweni vangatibeseresa kudini.
NDUMBO 41 Ndapota Izwanyi Mukumbiro Wangu
^ ndim. 5 Kuti tigume pakubhabhatijwa tinodikana kuita cinjo. Musoro uwu unozotibesera kuvona kuti icinyi undhu hwokare, ngenyi tinodikana kuhuvhisa perapo tingazviitisa kudini. Pa musoro unotevera tinoda kuzovonazve kuti tingaendereresa kudini mberi tecisimira undhu hupsa pikija patinopera kubhabhatijwa.
^ ndim. 3 KUSANANGUHWA KO MAGAMA: Kuvhura “undhu hwokare” zvinoreva kusiya mugariro no cido cokutama kudakajisa Jehovha. Izvi zvinodikana kuitwa ticito tikabhabhatijwa.—Vaefeso 4:22.
^ ndim. 10 Kuti muwane masoko mazinji, vonanyi musoro unoti: “Bhaibheri Rinochinja Upenyu—‘Ndaida kudzoka kuna Jehovha,’” wakabudiswa mu Murindiri wo 1 wa Abril wo 2012, mu Cishona.
^ ndim. 16 Kuti muwane masoko mazinji, vonanyi musoro unoti: “Bhaibheri Rinochinja Upenyu—‘Vakandiitira mutsa chaizvo,’” wakabudiswa mu Murindiri wo 1 wa Maio wo 2012 mu Cishona.
^ ndim. 17 Kuti muwane masoko mazinji, vonanyi musoro unoti: “Bhaibheri Rinochinja Upenyu—‘Ndakaguma ndava musikana ane hasha, anoda zvokurwa,’” wakabudiswa mu Murindiri wo 1 wa Outubro wo 2012, mu Cishona.
^ ndim. 18 Vonanyi bhokiso rinoti “ Bhaibheri Rinocinja Upenyu.”
^ ndim. 64 KUDURUJIHWA KO FOTO: Kuvhisa murangariro no zviito zvakashata kwakadari inga kuvhura nguvo yakapsipa.
