1. Antoy inkatoom nensaman antis kan nampa-Bible study?

 ANTOY inkatoom nensaman antis kan nampa-Bible study ed Saray Tasi nen Jehova? Seguro anggad nayari et agtayo la labay ya isipen. Ompan naimpluensyaan itayo na ugali tan estandarte na saray totoo ed sayan mundo. Kanian nensaman, ‘anggapoy ilalo tayo tan agtayo kabat so Dios.’ (Efe. 2:12) Pero anguman itan nen nampa-Bible study tayo!

2. Anto ray naaralan mo nen nampa-Bible study ka?

² Nen nampa-Bible study ka, akabat moy Aman Jehova, tan naamtaan mo ya inar-aro to ka. Naaralan mo met ya pian napaliket moy Dios tan magmaliw kan lingkor to, wala ray kaukolan mon umanen ya ugali tan kagagawam. Tan naamtaan mo ya say kaukolan mo lan unoren et say estandarte nen Jehova, aliwan say estandarte na sayan mundo.—Efe. 5:3-5.

3. Base ed Colosas 3:9, 10, antoy labay nen Jehova ya gawaen tayo, tan anto ran tepet so ebatan tayo ed sayan artikulo?

³ Si Jehova so Ama tayo ta sikato so Amalsa ed sikatayo, kanian walay karapatan ton mangibaga no anto ray dapat tan agtayo dapat gawaen. Ingganggan to ya antis tayon nabautismoan, kaukolan tayon ‘lakseben so daan a personalidad pati saray kagagawa na satan.’ * (Basaen so Colosas 3:9, 10.) No say sakey ya Bible study et labay to lay manpabautismo, makatulong iyan artikulo pian naamtaan toy ebat ed sarayan tepet: (1) Anto ta’y “daan a personalidad”? (2) Akin et igaganggan itayo nen Jehova ya lakseben itan? (3) Panon tayon nagawaan itan? Diad tua, anggan sikatayo ran bautismado la et makaaral  met ed sayan artikulo pian agtayo la nipawil imay daan a personalidad ya nilakseb tayo la.

4. Antoy ugali tan kagagawa na sakey a too no akasulong ed sikato so “daan a personalidad”?

⁴ No say akasulong ed sakey ya too et say “daan a personalidad,” makalaman so panagnonot tan kagagawa to. Kanian sarili to labat so sankanonot to, mipepetang so ulo to, agto amtay misalamat, tan ma-pride. Ompan labalabay toy mannengneng na pornograpiya tan manbantay na palabas ya imoral o puro laban tan pateyan. Ompan mabait met ya too tan nakokonsiensia met no maminsan. Pero anggano amta ton mauges so gagawaen to, agto labay so manguman.—Gal. 5:19-21; 2 Tim. 3:2-5.

5. Kasin agka lan balot nalingo no nilakseb mo lay daan a personalidad mo? Ipaliwawa. (Gawa 3:19)

⁵ Siempre, ag-itayo perpekto kanian agtayo naekal so amin ya mauges ya iisipen tan nalilikna tayo. Walan-walay panaon ya makapangibaga o makagawa tayoy pagbabawian tayo lanlamang. (Jer. 17:9; Sant. 3:2) Pero no nilakseb tayo la so daan a personalidad tayo, aliwa lan makalaman so ugali tan kagagawa tayo. Tua, nalingo tayo nin siansia, pero anguman lay inkatoo tayo.—Isa. 55:7; basaen so Gawa 3:19.

6. Akin et igaganggan itayo nen Jehova ya lakseben tayoy daan a personalidad tayo?

⁶ Igaganggan itayo nen Jehova ya lakseben so daan a personalidad tayo ta inar-aro to tayo tan labay to ya maliket so bilay tayo. (Isa. 48:17, 18) Amta to ya no manpadaeg tayo ed saray mauges ya pilalek tayo, sikatayo lanlamang so nasakitan tan nadamay so arum. Tan diad tua, nasasakitan ya mismo si Aman Jehova no nanengneng to ya aanien tayo iray mauges ya resulta na ginawa tayo.

7. Base ed Roma 12:1, 2, anto so duaran pampilian tayo?

⁷ No nanengneng na saray kapamilyam tan kakaarom ya uumanen mo lay kabibilay mo, ompan diad gapo et elek-elekan tan balawen da ka. (1 Ped. 4:3, 4) Ompan ibaga ra ya walay karapatan mo ya gawaen no antoy labay mo tan agka dapat padidiktaan ed arum. Balet diad tua, sikara so padidiktaan ed mundo nen Satanas ta kontrolado to ra. (Basaen so Roma 12:1, 2.) Niay pampilian mo: No agka manguman, unor-unor ka labat ed  makasalanan a laman mo tan ed mundo nen Satanas. Pero no lakseben moy daan ya personalidad mo, tulongan ka nen Jehova pian magmaliw kan maong ya too.—Isa. 64:8.

8. Anto ray uusaren nen Jehova pian natulongan to tayon ekalen iray mauges ya ugali tan kagagawa tayo?

⁸ Amta nen Jehova ya agnaekal ya tampol iray mauges ya ugali tan kagagawa tayo. (Sal. 103:13, 14) Pero uusaren toy Biblia, say masanton espiritu to, tan say organisasyon to pian nawalaan tayoy karunongan, determinasyon, tan biskeg ya manguman. Seguradon wala la ray nauman mod sarilim diad tulong nen Jehova. Pantongtongan tayo natan iray sarag mo nin gawaen pian nitultuloy mon nalakseb so daan ya personalidad mo tan magmaliw kan kualipikado parad bautismo.

9. Antoy nitulong ed sika na Biblia?

⁹ Usar moy Biblia pian nausisam so sarilim. Say Biblia et singa espiho—no babasaen mo itan, nanengneng mo no wala ray kaukolan mon umanen ed panag-isip mo, panagsalitam, tan kagagawam. (Sant. 1:22-25) Natulongan ka met na mangiyaaral ed sika tan arum nin maespiritual ya agagi ed kongregasyon. Singa bilang, sarag dan ipaimano ed sika so ibabaga na Biblia pian nanengneng mo no anto la ray inaligwasan mo tan no anto ni ray kaukolan mon umanen ed sarilim. Sarag da ka met ya ibangat no panon kan man-research ed saray publikasyon tayo ya makatulong pian naekal mo ray makapuy ya ugalim, kagagawam, tan bisyom. Tan agmo lilingwanan ya wadtan si Jehova ya ontulong ed sika. Nanenengneng to no antoy walad pusom, kanian amta to no panon to kan tulongan. (Pro. 14:10; 15:11) Kanian lanang kan manpikasi tan inagew-agew kan manbasa na Biblia.

10. Antoy naaralan mo ed eksperiensya nen Elie?

¹⁰ Tandaan mo ya parad pankaabigan mo lanlamang no unoren mo ray ganggan nen Jehova. Labay to ya maong so pansumpalan tayo. Saramay manguunor ed ganggan to et nalilikna day tuan liket, walay direksion na bilay da, tan walay respeto dad sarili da. (Sal. 19:7-11) Pero saramay aga manguunor ed ganggan to, aanien da so mauges ya resulta na kagagawa ra. Imanoen so agawa ed si Elie. Tasi iray atateng to, tan imbangat da ya aroen to met si Jehova. Pero imbaliwala to ray ganggan na Dios. Nen tinedyer lay Elie, sikatoy abarkada tan naimpluensyaan dan man-drugs, manggaway imoral, tan mantakew. Imbaga to ya nagmaliw ya barumbado tan mipepetang so ulo to. Oniay inamin to: “Diad katuaan to, ginawak ya amin iray bengatlan agmanepeg ed sakey a Kristiano.” Pero, ag-alingwanan nen Elie iray naaralan tod Biblia nen ugaw ni. Ag-abayag, nampa-Bible study lamet si Elie. Ginawa toy anggaay nayarian to ya ekalen iray aliwliwan ugali tan kagagawa to, tan abautismoan nen Abril 2000. Oniay imbaga nen Elie ya resulta nen uunoren to lay ganggan nen Jehova: “Natan et walaan ak lay maligen a nonot tan malinis a konsiensia.” * Antoy naaralan tayo ed eksperiensya nen Elie? No agtayo unoren iray ganggan nen Jehova, sikatayo lanlamang so nasakitan. Pero akaparaan nin siansia si Jehova ya ontulong no nanengneng to ya desidido tayo lan manguman.

11. Anto ray kabkabusol nen Jehova?

¹¹ Busolen no antoy kabusol nen Jehova. (Sal. 97:10) Ibabaga na Biblia ya kabusol nen Jehova so “mapaatagey iran mata, matilan dila, tan saray lima a mamapaagus na dala na  andiay kasalanan.” (Pro. 6:16, 17) Tan kabkabusol to ray “totoon maruksa tan managpalikdo.” (Sal. 5:6) Ontan lay pambusol nen Jehova ed sarayan ugali tan kagagawa kanian dineral toy amin ya mauges tan maruksan totoo nen panaon nen Noe! (Gen. 6:13) Tan diad panaon nen propetan Malaquias, imbaga nen Jehova ya kabkabusol to iramay ididiborsyo day asawa ra ya anggapo met so rason! Lapud sayan ginawa ra, ag-inawat nen Jehova so panagdayew da. Diad tua, ibabaga na Biblia ya “ukomen na Dios” iramay aga matoor ed asawa ra!—Heb. 13:4; Mal. 2:13-16.

12. Antoy labay ya ibaga na samay ganggan nen Jehova ya, “Dimla yo so mauges”?

¹² Oniay ganggan nen Jehova ed sikatayo: “Dimla yo so mauges.” (Roma 12:9) No nadidimla ka ed sakey a bengatla, talagan kabkabusol mo, kanian agmo anggan labay ya isipen o nengnengen! Imadyin mo pa no antoy reaksion mo no bilang ta parungoan da kay panangan ya abulok tan nabibigis la. Ompan iimadyinen mo ni labat et makakauta ka la! Ontan ya ontan met komon so reaksion tayo ed saray kagagawa ya kabusol nen Jehova. Agtayo anggan labay ya isipen iratan!

13. Akin et importante ya protektaan tayoy nonot tayo?

¹³ Protektaan moy nonot mo. Maslak, no antoy mabetbet tayon iisipen, sikatoy gawaen tayo. Atan so rason no akin ya imbaga nen Jesus ya ekalen tayon tampol ed isip tayo so antokaman ya manresulta ed pankasalanan tayo. (Mat. 5:21, 22, 28, 29) Labay tayon napaliket si Aman Jehova, kanian ekalen tayon tampol sirin so amin ya aliwliwan ompapasok ed isip tayo.

14. Antoy napatnagan ed panagsalita tayo, tan anto ray nepeg tayon itepet ed sarili tayo?

¹⁴ Kontrol moy dilam tan apipiger moy panagsalitam. Imbaga nen Jesus: “Antokaman ya ompapaway ed sangi et manlalapud puso.” (Mat. 15:18) On, say bungay-sangi tayo et pakapatnagan no antoy walad puso tayo. Kanian tepetan tayoy sarili tayo: ‘Kasin agak mantitila, anggano amtak ya naproblema ak laingen no ibagak so tua? No wala lay asawak, kasin aasikasoen koy pitotongtong kod arum tan agak mifi-flirt? Kasin seseguroen ko ya anggapoy ompapaway ya bastos ed sangik? Kasin kalmado nin siansiay panagsalitak anggano makapasyodot so situasyon?’ Isip mon maong iratan ya tepet pian nausisam so sarilim. Say  panagsalita tayo et singa butones na kawes. No nakal mo lay butones, mainomay mo lan nalakseb so kawes mo. Kanian no labay tayon lakseben so daan ya personalidad tayo, ekalen tayoy ansakit tan bastos ya panagsalita, tan agtayo dapat mantitila.

15. Antoy labay ya ibaga nen apostol Pablo nen imbaga ton kaukolan tayon ‘ipasak ed poste’ so daan ya personalidad tayo?

¹⁵ Gawam so anggaay nayarian mo pian makapanguman ka. Walay ilustrasyon ya inusar nen apostol Pablo pian ipanengneng ya talagan importante ya umanen tayoy kabibilay tayo. Imbaga to ya nepeg tayon ‘ipasak ed poste’ so daan a personalidad tayo. (Roma 6:6) Antoy labay ya ibaga nen Pablo? Idadanet to ya kaukolan tayon aligen si Jesus. Akaparaan si Jesus ya paipasak ed poste pian nagawaan toy panlabayan nen Jehova. Singa si Jesus, “ipasak” tayo iray aliwliwan ugali tan kagagawa tayo pian “ompatey” iratan tan naunor tayoy Aman Jehova. No gawaen tayo itan, magmaliw ya malinis so konsiensia tayo tan walay ilalo tayon manbilay ya andi-anggaan. (Juan 17:3; 1 Ped. 3:21) Tandaan tayo ya agbalot iyabeba nen Jehova so atagey ya estandarte to. Sikatayo dapat so manguman pian naunor tayo itan.—Isa. 1:16-18; 55:9.

16. Akin et importante ya tuloytuloy tayon labanan iray makalaman ya pilalek tayo?

¹⁶ Itultuloy mon labanan iray makalaman ya pilalek mo. Anggano abautismoan ka la, kaukolan mo nin labanan iray makalaman ya pilalek mo. Imanoen so eksperiensya na sakey ya laki, si Maurício. Nen tinedyer ni, akirelasyon ed nanduruman lalaki. Pero apulongan na saray Tasi tan nampa-Bible study. Inuman toy bilay to, tan abautismoan nen 2002. Anggano dakel lan taon ya manlilingkor ed si Jehova, oniay imbaga to: “Aminen ko ya no maminsan, lalabanan ko nin siansia iray makasalanan ya pilalek ko.” Pero ag-onsusuko si Maurício. Oniay imbaga to: “Say mamapabiskeg ed liknaan ko et amay amtak ya napapaliket koy Aman Jehova no nanenengneng to ya agak manpapadaeg ed saray pilalek ko.” *

17. Parad sika, akin et makapaseseg so eksperiensya nen Nabiha?

¹⁷ Ipikasim ed si Jehova ya tulongan to ka, tan manmatalek kad masanton espiritu to, aliwan diad sarilim. (Gal. 5:22; Fil. 4:6) Dapat desidido tayo ya lakseben so daan ya personalidad,  tan agtayo lan balot ipapawil itan. Imanoen so eksperiensya nen Nabiha. Nen anem taon to ni labat, tinaynan nen tatay to so pamilya ra. Oniay imbaga to: “Asakisakitan ak. Pakaliknak et anggapoy mangaaro ed siak.” Nen binmaleg si Nabiha, nagmaliw ya mapaspasnok tan palaban. Sikatoy asangkot ed panaglakoy drugs, kanian pigay taon ya apriso. Wala ray Tasi ya ompapasyar ed prisoan tan nampaiyaral na Biblia si Nabiha. Kalkalna ton inekal iray bisyo to. “Mainomay kon inekal so arum ya bisyok,” so kuan to. “Nairapan ak balet ya itunda so panagsigarilyok. Sakey taon kon nilabanan ya anggad nakal kon siansia.” Antoy akatulong ed sikato? Oniay imbaga to: “Say manunan rason kanian nakal ko itan et say agmanundan impanpikasik ed si Jehova.” Oniay mensahe to ed saramay labay da met ya umanen so bilay da: “Manisia ak ya no asarag koy anguman pian paliketey Jehova, sarag met na anggan siopa!” *

18. Base ed 1 Corinto 6:9-11, anton pananguman so agawaan na saray lingkor na Dios nensaman?

¹⁸ Nen inmunan siglo, wala ray lalaki tan bibii ya pinili nen Jehova ya nakaiba nen Jesus ya manuley diad tawen ya dati et mauges so kabibilay da. Say arum ed sikara et datin imoral, homoseksual, tan matakew. Pero diad tulong na masanton espiritu na Dios, asarag day manguman. (Basaen so 1 Corinto 6:9-11.) Minilyon met natan so natutulongan na Biblia pian nauman day bilay da. * Nitunda da iray aliwliwan bisyo tan kagagawa ra. No asarag da itan, labay ton ibaga, sarag mo met ya umanen so inkatoom tan itunda iray mauges ya kagagawam pian magmaliw kan kualipikado parad bautismo.

19. Antoy aralen tayo ed ontumbok ya artikulo?

¹⁹ Pian say sakey et onkualipika parad bautismo, agto labat dapat lalakseben so daan ya personalidad. Kaukolan to met ya isulong so balon personalidad. Aralen tayod ontumbok ya artikulo no panon tayon nagawaan itan tan no antoy nitulong na arum ed sikatayo.