1. Kon bo bida tabata promé ku bo a studia Beibel?

 KON bo bida tabata promé ku bo a studia Beibel ku Testigunan di Yehova? Hopi di nos lo preferá pa no papia ni pensa riba e kos ei. Kisas e tempu ei, nos manera di pensa i personalidat tabata segun e normanan di mundu. Si esei tabata e kaso, nos “no tabatin speransa i tabata biba den mundu sin Dios.” (Efe. 2:12) Pero ora nos a kuminsá studia Beibel, tur e kosnan ei a kambia.

2. Kiko ta algun kos ku bo a bin haña sa segun ku bo tabata studia Beibel?

² Segun ku bo tabata studia Beibel bo a bin haña sa ku Yehova, bo Tata den shelu, ta stima bo masha hopi mes. Anto bo a bin komprondé ku si bo ke agrad’é anto bira parti di su famia, bo mester hasi kambionan grandi den bo bida i den bo manera di pensa. Sí, bo mester a siña biba segun Yehova su normanan haltu.—Efe. 5:3-5.

3. Segun Kolosensenan 3:9 i 10, kiko Yehova ke pa nos hasi, i kiko nos ta bai studia den e artíkulo akí?

³ Yehova ta nos Kreador i nos Tata den shelu. P’esei, e tin tur derecho pa disidí kon e miembronan di su famia tin ku komportá nan mes. Anto promé ku bo batisá, e ke pa bo “kita e personalidat bieu ku su práktikanan.” * (Lesa Kolosensenan 3:9, 10.) E artíkulo akí lo yuda esnan ku ke batisá, kontestá e siguiente preguntanan:  (1) Kiko e “personalidat bieu” ta? (2) Dikon Yehova ke pa nos kit’é? (3) Kon nos por hasi esei? Anto si nos ta batisá kaba, e artíkulo akí lo yuda nos pa no bisti e personalidat bieu bèk.

4. Kon un hende ku tin “e personalidat bieu” bistí ta aktua?

⁴ Generalmente, un hende ku tin “e personalidat bieu” bistí ta aktua i pensa segun e deseo di karni. Kisas e ta kla pa rabia, e ta egoista, malagradesí i orguyoso. Podisé e gusta pornografia, pelíkulanan violento òf inmoral. Sin duda, e tin su bon kualidatnan i ora e pensa riba e kosnan robes ku e ta bisa òf hasi e ta sintié malu. Pero, e no tin sufisiente forsa pa kambia.—Gal. 5:19-21; 2 Tim. 3:2-5.

5. Ta posibel pa un hende kita e personalidat bieu kompletamente? Splika. (Echonan 3:19)

⁵ Debí ku nos ta imperfekto, ni maske kuantu nos purba, nos niun no por kita tur deseo ni pensamentu robes. Tin biaha nos por bisa òf hasi kos ku despues ta duel nos. (Yer. 17:9; Sant. 3:2) Pero, un hende ku ta kita e personalidat bieu no ta laga su deseo i aktitut robes domin’é. E ta kambia; e no ta e hende di ántes mas.—Isa. 55:7; lesa Echonan 3:19.

6. Dikon Yehova ke pa nos rechasá pensamentu- i hábitonan robes?

⁶ Yehova stima nos masha hopi mes i ke pa nos disfrutá di bida. P’esei e ke pa nos rechasá pensamentu- i hábitonan robes. (Isa. 48:17, 18) E sa ku esnan ku stòp di lucha kontra nan deseonan robes, no ta djis hùrt nan mes pero tambe esnan rònt di nan. Anto esei ta duel e masha hopi mes.

7. Segun Romanonan 12:1 i 2, ki eskoho nos tin?

⁷ Kisas ora algun di nos famia- i amigunan mira ku nos ke hasi kambionan den nos personalidat, nan por hasi chèrchi di nos. (1 Ped. 4:3, 4) Tin di nan por bisa: ‘No laga hende bisa bo kiko bo tin ku hasi. Bo tin derecho di hasi loke abo ke.’ Pero eigenlijk, un hende ku no ta sigui Yehova su normanan no ta independiente. Mas bien, sin ku e sa, e ta laga Satanas i su mundu moldi’é. (Lesa Romanonan  12:1, 2.) Nos kada un tin ku skohe: Sea nos ta keda ku nos personalidat bieu bistí, formá pa Satanas su mundu di piká, òf nos ta laga Yehova moldia nos den e mihó persona ku nos por ta awor.—Isa. 64:8.

8. Kiko lo yuda nos evitá pensamentu robes i mal hábito?

⁸ Yehova sa ku ta tuma tempu i esfuerso pa nos evitá pensamentu robes i mal hábito. (Sal. 103:13, 14) Pero, mediante su Palabra, su spiritu i su organisashon, e ta duna nos e sabiduria, forsa i yudansa ku nos tin mester. Sin duda, bo a mira kon el a yuda bo kaba. Awor ban wak algun kos ku bo por hasi pa sigui kita e personalidat bieu i kualifiká pa boutismo.

9. Kiko Beibel por yuda bo hasi?

⁹ Usa Beibel pa analisá bo mes. Beibel ta manera un spil, e por yuda bo analisá dikon bo ta pensa, papia i aktua na un sierto manera. (Sant. 1:22-25) E ruman ku ta studia bo i e otro rumannan den kongregashon eksperensiá t’ei pa yuda bo. Por ehèmpel, nan ta usa Beibel pa yuda bo mira bo puntonan fuerte i bo puntonan débil. Nan por mustra bo kon pa buska informashon basá riba Beibel ku por yuda bo stòp ku mal hábito. Anto Yehova semper ta kla pa yuda bo. E ta e mihó persona pa yuda bo pasobra e sa kiko bo tin den bo kurason. (Pro. 14:10; 15:11) Pues, krea e kustumber di hasi orashon i di studia su Palabra tur dia.  

10. Kiko bo ta siña for di loke a pasa ku Elie?

¹⁰ Konvensé bo mes ku no tin nada mihó ku Yehova su normanan. Tur kos ku Yehova pidi nos hasi ta pa nos mes bon. Hende ku ta biba segun Su normanan ta siña balorá nan mes mas, ta haña un propósito den bida i ta bira realmente felis. (Sal. 19:7-11) Pero, esnan ku no ta wòri nan kabes ku Yehova su normanan tin ku karga e konsekuensianan di e obranan di karni. Anto ta esei a pasa ku Elie. Su mayornan tabata Testigu di Yehova. Pero, ora e tabata un tiner, el a kuminsá anda ku mal amigu. Esei a pone ku el a kuminsá usa droga, hiba un bida inmoral i hòrta. Tambe el a ripará ku e tabata birando un hende violento, ku tabata rabia masha lihé. Elie a bisa: “Ku poko palabra, mi a hasi tur e kosnan ku un kristian no mester hasi.” Pero, Elie no a lubidá e kosnan ku el a siña for di su infansia. Ku tempu el a kuminsá studia Beibel atrobe. El a hasi hopi esfuerso pa stòp ku su mal hábitonan, anto na aña 2000 el a batisá. Kon Elie a benefisiá awor ku e ta siguiendo Yehova su normanan? El a bisa: “Awor mi tin pas mental i un konsenshi limpi.” * Manera nos a mira den kaso di Elie, esnan ku no ta hasi kaso di Yehova su normanan ta hasi nan mes hopi doló. Pero, asta e ora ei Yehova ta dispuesto pa yuda nan kambia.

11. Kiko ta e kosnan ku Yehova ta odia?

¹¹ Siña odia e kosnan ku Yehova ta odia. (Sal. 97:10) Beibel ta bisa ku Yehova ta odia “wowonan altanero, un lenga mentiroso, i mannan ku ta drama sanger inosente.” (Pro. 6:16, 17) Ademas, e ta odia hende violento i tur gañadó. (Sal. 5:6) Yehova ta odia e kosnan ei asina hopi ku den tempu di Noe el a destruí tur e hendenan  malbado pasobra nan a yena e tera ku violensia. (Gén. 6:13) Wak un otro kos ku Yehova ta odia. Mediante su profeta Malakías, el a bisa ku e ta odia esnan ku ta buska tur manera pa divorsiá nan kasá inosente. Yehova no ta aseptá nan adorashon i lo e husga nan mal kondukta.—Mal. 2:13-16; Heb. 13:4.

12. Kiko ta nifiká aboresé, òf odia, loke ta malu?

¹² Yehova ke pa nos aboresé, òf odia, loke ta malu. (Rom. 12:9) Aboresé ta nifiká ku bo ta odia un kos asina tantu ku bo ta haña fis di dje. Imaginá ku bo tin ku kome un tayó di kuminda putrí. Kon bo ta sinti? Djis pensa riba dje so bo stoma ta wal. Asina tambe, djis pensa di hasi algu ku Yehova ta odia mester wal nos stoma.

13. Dikon nos tin ku dominá nos pensamentunan?

¹³ Dominá bo pensamentunan. Loke nos ta pensa tin influensia riba loke nos ta hasi. Ta p’esei Hesus a bisa ku nos tin ku stòp di pensa riba e kosnan ku por pone nos kai den piká. (Mat. 5:21, 22, 28, 29) No tin duda ku nos tur ke hasi Yehova kontentu. P’esei, ta masha importante pa ora un kos robes bini na nos mente nos rechas’é mesora.

14. Kiko e kosnan ku nos ta papia ta revelá, i ki preguntanan nos ke kontestá?

¹⁴ Dominá bo lenga. Hesus a bisa ku “e kosnan ku ta sali for di boka ta bini di kurason.” (Mat. 15:18) Pues, loke bo ta papia ta revelá ken realmente bo ta. P’esei, hasi bo mes e siguiente preguntanan: ‘Semper mi ta papia e bèrdat asta si esei por hinka mi den problema? Si mi ta kasá, lo mi evitá di flirt ku un hende ku no ta mi kasá? Mi ta evitá di papia kos inmoral i di dòbel sintí? Ora un hende pone mi konsumí, mi por kontest’é na un manera kalmu?’ Tuma bo tempu i pensa bon riba e preguntanan ei. Bo por kompará abla ku e botonnan di un paña. Si bo lòs e botonnan lo ta hopi mas fásil pa kita e paña. Pues, si bo hasi bo bèst pa stòp di gaña, papia kos inmoral òf ofensivo, lo ta hopi mas fásil pa kita e personalidat bieu.

15. Kiko nos tin ku hasi pa klaba nos personalidat bieu “na staka”?

¹⁵ Sea dispuesto pa hasi e kambionan  nesesario. Pa yuda nos komprondé kon determiná nos mester ta pa hasi kambio den nos bida, Apòstel Pablo a skirbi ku nos tin ku “klabá” nos personalidat bieu “na staka.” (Rom. 6:6) Hesus tabata dispuesto pa ser klabá na staka pasobra e tabata ke agradá Yehova. Asina tambe, si nos ke hasi Yehova kontentu, nos mester ta dispuesto pa mata e aktitut- i práktikanan ku Yehova ta odia. Ta solamente si nos hasi e kosnan ei, nos ta haña un konsenshi limpi i e speransa pa biba pa semper. (Huan 17:3; 1 Ped. 3:21) Kòrda, Yehova no ta bai kambia su normanan pa nos. Mas bien, ta nos tin ku kambia pa kuadra ku su normanan.—Isa. 1:16-18; 55:9.

16. Dikon nos mester ta determiná pa sigui lucha kontra deseonan robes?

¹⁶ Sigui lucha kontra deseonan robes. Esei ta loke bo tin ku hasi asta despues ku bo batisá. Wak kiko a pasa ku Maurício, kende for di yòn tabata hiba un bida homoseksual. Ku tempu el a topa Testigunan di Yehova i a kuminsá studia. El a hasi kambionan den su bida i a batisá na 2002. Aunke awor e tin hopi aña ta sirbi Yehova, Maurício a bisa: “Mi tin ku atmití ku tin biaha mi mester a lucha duru kontra mi deseonan robes.” En bes di laga esei desanim’é, el a bisa: “Loke ta un konsuelo pa mi ta di sa ku ora mi skohe pa no aktua riba mi deseonan robes, mi ta hasiendo Yehova masha kontentu.” *

17. Kiko bo ta gusta di Nabiha su eksperensia?

¹⁷ Sigui pidi Yehova pa su yudansa, dependé riba su spiritu i no riba bo propio forsa. (Gal. 5:22; Flp. 4:6) Nos mester hasi hopi esfuerso si nos ke kita e personalidat bieu i no bistié mas. Esei ta loke e relato di Nabiha ta mustra. Ora e tabatin seis aña su tata a bandon’é. El a bisa: “E kos ei a hasi mi masha hopi doló mes.” Segun ku e tabata krese, e tabatin hopi rabia i e tabata hopi agresivo. El a kuminsá bende droga, nan a arest’é i el a sinta un par di aña den prizòn. Testigunan di Yehova ku tabata bin prediká den prizòn a kuminsá studia Beibel kuné. Nabiha a kuminsá hasi kambionan  grandi den su bida. El a bisa: “Tabata fásil pa stòp ku algun di mi bisionan. Pero, humamentu sí tabata un otro kos.” Pa mas ku un aña Nabiha a lucha pa e por a laga e bisio ei. Ta kon el a logra stòp? El a bisa: “Loke foral a yuda mi tabata di hasi hopi orashon na Yehova.” Awor e ta konta otro hende: “Mi tin sigur ku si ami por a hasi kambio pa sirbi Yehova, tur hende por!” *

18. Segun 1 Korintionan 6:9-11, kiko hopi di Yehova su sirbidónan a logra hasi?

¹⁸ Den promé siglo, algun di e hendenan ku Yehova a skohe pa ta ko-gobernante ku Kristu a yega di hasi kosnan hopi malu. Por ehèmpel, algu di nan tabata kometé adulterio, tabata homoseksual i ladron. Pero, ku yudansa di Yehova su spiritu santu nan por a kambia nan personalidat. (Lesa 1 Korintionan 6:9-11.) Di mes manera, awe Beibel ta yudando miónes di hende pa hasi kambio. * Aunke no tabata fásil, nan a logra stòp ku nan mal hábitonan. Nan ehèmpel ta proba ku bo por kambia bo personalidat i vense mal hábito pa asina bo kualifiká pa boutismo.

19. Kiko nos ta bai studia den e siguiente artíkulo?

¹⁹ Si bo ke batisá, bo no tin ku djis kita e personalidat bieu pero bo tin ku bisti e personalidat nobo tambe. Den e siguiente artíkulo, nos ta bai wak kon pa hasi esei i kiko otro hende por hasi pa yuda bo.