1. Ngmle uangerang a klengar er kau er a uchei er a obo mosuub a Biblia?

 NGMLE uangerang a klengar er kau er a uchei er omosuub a Biblia lobengterir a Resioning er a Jehovah? A rebetok er kid a locha diak el sorir el melatk er tiakid el taem. A osenged er a tekoi me a blekerdeled a locha mle oltirakl er a uldasu er tia el beluulechad el kirel a ungil me a mekngit. Ng ‘dimlak chomeltked er tial belulechad, el dimlak a Dios er kid.’ (Efe 2:12, BT) Engdi a omesubed er a Biblia ngildechii tiang!

2. Ngngera ke mlo metik er a omomuchel el mesuub er a Biblia?

² Ngar er a omesubem er a Biblia e ke mlo medengei el kmo ngngar ngii a Chedam el ngar er a eanged el kmal betik a rengul er kau. Ke mlo mtebengii el kmo a lsekum e ngsoam lodeuir a rengul e mo chedal a telungalek er ngii, e ngngar ngii a kirem el melodech er a klengar er kau me a rolel omomdasu. Ngkirem el mesuub el mo kiei loltirakl aike el soal a Jehovah.​—Efe. 5:3-5.

3. A doltirakl er a Kolose 3:9, 10, BT e a Jehovah ngngera soal a doruul er ngii? E ngera kede mo mesaod er tia el suobel?

³ A Jehovah el Demad e Ulemeob a ngar ngii a llemeltel el olterekokl er a kirel omerellir a rechedal a telungalek er ngii. E ngii a kmo a uchei er a demetecholb e ngkired el “medebedii el choitii ngikel mechut el chad ma chomerellel.” * (Monguiu er a Kolose 3:9, 10, BT. *) Tia el suobel a mo ngosuterir tirke el sorir el mo metecholb longer aika el edei el ker: (1) Ngngera  “ngikel mechut el chad”? (2) Ngera uchul me a Jehovah mengerechir er kid el mo medebedii? (3) Ngmekera de bedebedii? A lsekum e ke mla metecholb e tia el suobel a mo ngosukau me ngdiak mluut el mo otungii ngike el mechut el chad.

4. Ngua ngera blekerdelel a chad el ngar cheungel a klisichel “ngikel mechut el chad”?

⁴ A chad el ngar cheungel a klisichel “ngikel mechut el chad” a blechoel el omdasu e meruul a tekoi loltirakl er a klechad. Ngika locha di melatk er a di ngii, bekongesengasech a rengul, diak loba omereng el saul, e kedidai a rengul. Nglocha soal omes a siasing er a remeau me a movie er a deleboes me a koadelchad. Nglocha ngar ngii a ungil blekerdelel e locha ouuchel a rengul kirel a mekngit lomerellel me a omelekingel. Me nguaisei engdi ngdiak a urungulel el mo melodech a blekerdelel me a uldesuel.​—Gal. 5:19-21; 2 Ti. 3:2-5.

5. Ngera el tabesul el uldasu a kired el mo oba el kirel sel de bedebedii ngike el mechut el chad? (Rellir 3:19)

⁵ Ngdiak demecherrungel me ngdiak el sebeched el medobed a rokui el mekngit er a uldesued me a rengud. Ngngar ngii a taem el bo dedu me a lechub e kede remuul a tekoi el bo douuchel a rengud el kirel. (Jer. 17:9; Jak. 3:2) Me nguaisei engdi sel de bedebedii el choitii ngike el mechut el chad e aika el mekngit el uldasu me a omeruul a mo diak el lomtebechel er kid. Kede mo ngodech el chad.​—Isa. 55:7; monguiu er a Rellir 3:19.

6. Ngera uchul me a Jehovah a dmu er kid el mo mengoit a diak lungil uldasu me a mekngit el omeruul?

⁶ A Jehovah a dmu er kid el mo mengoit a diak lungil uldasu me a mekngit el omeruul le ngkmal betik a rengul er kid e soal a bo doldeu a rengud er a klengar. (Isa. 48:17, 18) Ngmedengei el kmo tirke el mo oltirakl a mekngit el ngelbesel a rengrir a di melemall er tir me tirke el iliuekl er tir. Ngkmal mekngit a rengul lomes er kid el di kid el melemall er kid me a rebebil.

7. A doltirakl er a Rom 12:1, 2, e ngngera el omelilt a dobang?

⁷ A rebebil er a rechedad me a resechelid a uchelel e te locha mo melenguul er kid el melasem el melodech a blekerdeled. (1 Pe. 4:3, 4) Te locha mo melekoi el kmo ngngar ngii a llemelted el meruul aike el soad e lak  debechititerir a rechad me louchais er kid a sebeched el meruul me a diak. Me nguaisei engdi tirke el oltngakl a llechul a Jehovah a diak lemera el oba ilmokl. Ngbai mera er ngii tirka omechei er tia el beluulechad el cheltikaik er a Satan me ngomekrael er tir. (Monguiu er a Rom 12:1, 2.) Kid el rokui a kired el melilt: Kede melemolem loltirakl er sel dimla blekerdeled el ngii a cheltikaik er a klengit me a beluulechad er a Satan, me a lechub e kede mecherei a Jehovah me ngomeob er kid me ngmo sebeched el mo ngike el kot el ungil chad.​—Isa. 64:8.

8. Ngera sebechel ngosukid el mo mengeroid er kid er a diak el lungil uldasu me a mekngit el omeruul?

⁸ A Jehovah a medengei el kmo kede dousbech a taem e dirrek el kired el meringel el loureor el mo mengeroid er kid er a diak el lungil uldasu me a mekngit el omeruul. (Psa. 103:13, 14) Me nguaisei engdi ngoeak a Tekingel, chedaol reng er ngii, me a cheldebechelel, e ngomeskid a llomeserreng, klisiich, me a ngeso el mo melodech a blekerdeled. E ngii a locha kmal mla ngosukau. Ka me dosaod a bebil el tekoi el sebechem el meruul el ngosukau el medebedii ngike el mechut el chad e mo nguu a techolb.

9. A Tekingel a Dios ngsebechel ngosukau el mo mekerang?

⁹ Mousbech er a Biblia el merriter er kau. A Tekingel a Dios a di ua dirk. Ngsebechel ngosukid el tiriter a rolel a domdasu, dongedecheduch, me a rolel a doruul a tekoi. (Jak. 1:22-25) Ngike el mesuub a Biblia lobengkem me a remesisiich er a klemerang el Kristiano a sebechir el omeskau a ulekrael. El ua tiang, ngsebechir lousbech er a Biblia el ngosukau el mo medengei aike el omungil er ngii me aike el chelitechetum. Ngsebechir el ngosukau el mo meduch el di kau el osiik a ulekrael el mengai a uchetemel er a Biblia el ngii a mo ngosukau el chemoit a mekngit lomeruul. E a Jehovah a kmal kltmokl el olengeseu er kau. Ngii a medengelii sel kot lungil rolel e ke mongeseu. Ngmedengei aike el ngar er a rengum. (Osi. 14:10; 15:11) Me mrellii el mo blekerdelem el meluluuch e mesuub er a Tekingel er a bek el sils.

10. Ngera ke silubii er a experience er a Elie?

¹⁰ Bo lulterekokl a rengum el kmo a rolel a Jehovah a kot lungil. Ngmo uchul a klungioled sel doruul aike el rokui el ledu Jehovah er kid. Tirke el oltirakl a llechul a mo ungil a uldesuir el kirir, mo er ngii a moktek er a klengar er tir, e metik er a mera el deurreng. (Psa. 19:7-11) Engdi tirke el diak e di oltirakl er a urerel a klechad a chuarm er a rsel a mekngit el omerellir. Molatk a tekingel a Elie el kirel a oltngakl a llechul a Jehovah. A rechad er a blil el ulemekeroul er ngii a betik a rengrir er a Jehovah. Engdi sera bo lengeasek e ngmlo teloi er a mekngit el klausechelei. Ngmlo melai a mekngit el kar, meruul a deleboes, e merechorech. Ngmelekoi el kmo ngkmal mlo bekongesengasech a rengul e soal di okoad. Ngkmo, “Ak mlo meruul aike el tekoi el kmlosisechakl el kmo ngdiak el kirir a Rekristiano el meruul.” Me nguaisei engdi ngdimlak lobes aike el lesiluub er a lengalek. Cherengel a taem e ngliluut el mo mesuub a Biblia. Ngmle meringel loureor el mengoit aika el mekngit lomerellel e miltecholb er a 2000. Ngera el klungiaol a bla lengai le ngii loltirakl a llechul a Jehovah? A Elie a kmo: “Chelechang ngbudech a uldesuek e klikiid a ukltkek.” * Ngua desa er tia el experience, tirke el lotngakl a llechul a Jehovah a di melemall er tir. Me nguaisei engdi Jehovah a kmal kongei el ngosuterir el ngodechii a klengar er tir.

11. Ngera el tekoi a louketui a Jehovah?

 ¹¹ Bo mouketui aike el louketui a Jehovah. (Psa. 97:10) A Biblia ouchais el kmo a Jehovah ouketui a “simang el ues, ma bulak el chur, ma chim el omekoad er a re diak a telemellir el chad.” (Osi. 6:16-19) Ngdirrek el “ouketui er a re merserasech a chimorir ma re cheblad el chad.” (Psa. 5:6) A Jehovah kmal ouketui aika el blekeradel me ngulekngemedeterir a remekngit el chad er a taem er a Noah e le beluulechad a mle mui er a mekngit el omeruul. (Gen. 6:13) Molatk er a ta er a olechotel. A Jehovah dilung loeak a profet Malakai el kmo ngouketui er tirke el osiik a rolel e merort er a rebecherir el diak a telemellir. A Dios a kmal diak lekengei er a omengull er tir e moukerrekeriil er tir el kirel omerellir.​—Mal. 2:13-16; Heb. 13:4.

12. Ngera belkul a bom ‘imikr a mekngit’?

¹² A Jehovah soal a bo de ‘imikr a mekngit.’ (Rom 12:9) A tekoi el ‘imikr’ a mesaod el kirel a mesisiich el uldesuel a rengud. Ngbelkul a kmo kede kmal ouketui e mederdirk a rengud er ngii. Ka di molatk er sel uldesuem a lsekum a chad a dmu er kau me ke mengang a kall el mla mo bekngiuk. Ngsoam lomudech sel omolatk er ngii. Me ngdi osisiu, a uldasu el mo meruul a tekoi el Jehovah a dmung mekngit a kirel kikiongel el tekoi er a uldesued.

13. Ngera uchul me ngkired el mengkar er a uldesued?

¹³ Mongkar er a uldesuem. Aike el domdasu a mekrael a omerelled. Sei a uchul me a Jesus a ullisechakl er kid el mo oltngakl a uldasu el sebechel mekrolid el mo rullii a oberaod el klengit. (Mt. 5:21, 22, 28, 29) Kid a kmal soad lodeuir a rengul a Demad el ngar er a eanged. Me ngkmal klou a ultutelel demereched lotngakl a diak lungil uldasu!

14. A tekinged ngngera ngochotii, e ngera el ker a kired el di kid longer?

¹⁴ Mutebechelii a ngerem. A Jesus a dilu el kmo: “A ikel me tuobed er a ngerel a ngar a reng el mei.” (Mt. 15:18) Chochoi, a tekinged ouchais el kmo ngngera ngar er a rengud. Me di lekau loker: ‘Ngak ngkmal diak kengei el mo omulak alta ngsebechel mo uchul a telemellek? Ngak el bechiil el chad ak kerekikl el diak bo kuruul er a ulengemechek? Ngak ak mengeroid er ngak er a diak el klikiid el cheldecheduch el ua lemekngit el rakt? Ngak ak ungil mengedecheduch er a chad el rullii a chetik?’ Ngmo ngosukau sel bo mungil melatk aika el ker. A cheldechedecham a sebeched lomekesiu er ngii el mora resmelel a bail. Sel obora  tkurrebab el sebechem el mo diak momulak e mo diak molekoi a mekngit e melemall a reng el cheldecheduch e ngmo beot er kau a medebedii ngike el mechut el chad.

15. Ngera belkul a de dmelii a dimla klechad er kid er a “teluo el kerrekar”?

¹⁵ Mkengei el di mereched el mo remuul a kirel ruoll. A apostol Paulus a meketeklii a klungel a ultutelel a dolodech er a klengar er kid. Ngmilluches el kmo ngkired el dmelii sel dimla klechad er kid er a “teluo el kerrekar.” (Rom 6:6, NW) Tia belkul a kmo kede mo oukerebai er a Kristus. Ngkired el mekoad a uldasu me a omeruul el Jehovah a ouketui. Sel doruul el uaisei e ngmo klikiid a ukltked me kid a nguu omelatk er a diak a ulebengelel klengar. (Jn. 17:3; 1 Pe. 3:21) Lak dobes el kmo a Jehovah a kmal diak bo lolodech er ngii el mo oltirakl er a soad. Ngbai kired el melodech er kid el mo oltirakl a llechul.​—Isa. 1:16-18; 55:9.

16. Ngera uchul me ngkirem el rullii er a rengum el mo melemolem el oltngakl a mekngit el ngibes?

¹⁶ Molemolem loltngakl a mekngit el ngibes. Mo lmuut er a uriul er a techolb me ngkirem el dirk oldechelakl a mekngit el ngibes. Molatk er a Maurício. Ngika er a lengeasek e ngmlo ousechelei er a resechal. Cherengel a taem e ngmlo medengelterir a Resioning er a Jehovah e ulemuchel el mesuub a Biblia. Ngngildechii a klengar er ngii e miltecholb er a 2002. Alta ngmla mesiou er a Jehovah el betok er rak engdi ngmelekoi el kmo: “Ak di bleketakl el ouchais el kmo ngngar ngii a taem el kirek el meringel loltngakl a mekngit el ngelbesel a renguk.” Engdi ngdiak lebecherei tiang me lechitechetur. Ngbai melekoi el kmo: “Ngsmisichii a renguk e le kmedengei el kmo sel kngiltii el diak bo kultirakl aika el mekngit el ngelbesel a renguk e ak odeuir a rengul a Jehovah.” *

17. Ngera kmal melisiich er kau er a experience er a Nabiha?

¹⁷ Moluluuch lolengit er a ngelsuil a Jehovah e multuil er a chedaol reng er ngii el diak di le klisichem. (Gal. 5:22; Fil. 4:6) Ngkired el rullii er a rengud a medebedii ngike el mechut el chad e diak deluut el mo oubail er ngii. Molatk er a redil el Nabiha. A demal a chilitii er a ledirk elolem a rekil. Ngdmu el kmo: “Tia kmal tilemellii a renguk.” Sera lorael el mo klou e ngkmal di kesib a rengul e bekongesengasech a rengul. Ngmlo olterau a mekngit el kar e mlekelebus el telkib el taem. A Resioning luleldingel  a blil a kelebus a mlo mesuub lobengkel. A Nabiha mlo meruul a meklou el omelodech er a klengar er ngii. Ngdmu el kmo: “A bebil omelodech a mle beot engdi a mengoit er omeloko el dekool a kmal mle meringel.” Ngmle meringel loureor el kirel me a uriul er a ta el rak e ngmlo mesisiich er ngii. Ngmilekera rullii tiang? Ngdmu el kmo: “Ngmle blakerreng er ngak el meluluuch el mora Jehovah a ngilsukak el choitii.” Chelecha e ngouchais er a rebebil el kmo: “Ngulterekokl a renguk el kmo a lsekum ngak a sebechek el meruul omelodech el mo odeuir a rengul a Jehovah, e a ngii di el chad me ngsebechel!” *

18. A doltirakl er a 1 Korinth 6:9-11, a rebetok er a remesiungel a Dios ngngera te mla remuul?

¹⁸ Sera taem er a rekot el Kristiano, e a rebebil er tirke el lengilelteterir a Jehovah el mo mengedereder lobengkel a Kristus a mirruul a kmal mekngit el tekoi er a uchei. El ua tiang, a uchei e te mlara laokreng, menguchet a raod, me a remerechorech. Engdi ngoeak a ngelsuil a Jehovah e ngmle sebechir el ngodechii a klengar er tir. (Monguiu er a 1 Korinth 6:9-11.) Ngdi osisiu er chelecha el taem, a Biblia mla ngosuterir a rebetok el miliol el mo meruul omelodech er a klengar er tir. * Te mla mo mesisiich er a omeruul el kmal mle meringel er tir a mengoit. A kerebai er tir ochotii el kmo, kau me ngkmal sebechem el meruul omelodech e mo mesisiich er a diak lungil omeruul me bo lsebechem el mo nguu a techolb.

19. Ngera kede mo mesaod er ngii er a ongingil el suobel?

¹⁹ Ngike el soal el mo nguu a techolb a diak di lekirel loureor el mo medebedii ngike el mechut el chad e ngdirrek el kirel meringel loureor el mo milii er ngike el beches el chad. Sel ongingil suobel a mo mesaod er a rolel e ngsebeched el meruul er tiang me a rolel e a rebebil a sebechir el ngosukid.