مطالعے دا مضمون نمبر 10
تُسی پرانی شخصیت نُوں لا کے سُٹ سکدے او!
پرانی شخصیت نُوں اوہدے کماں سمیت لا کے سُٹ دَوو۔—کلسیوں 3:9۔
گیت نمبر 29: خدا دا ناں بلند کرو
مضمون تے اِک نظر *
1. بائبل کورس شروع کرن توں پہلاں تواڈی زندگی کیہو جیہی سی؟
یہوواہ دے گواہواں نال بائبل کورس شروع کرن توں پہلاں تواڈی زندگی کیہو جیہی سی؟ ساڈے چوں کئی لوک شاید ایہدے بارے سوچنا وی نہ چاہن۔ ساڈی شخصیت تے ایس دُنیا دا رنگ ایناں زیادہ چڑھیا ہویا سی کہ جیہڑی چیز نُوں ایہہ دُنیا صحی یاں غلط کہندی سی، اَسی وی اوسے چیز نُوں صحی یاں غلط کہنے ساں۔ اوہدوں ساڈے کول کوئی وی امید نئیں سی تے اَسی خدا نُوں وی نئیں جان دے ساں۔ (اِفسیوں 2:12) پر بائبل کورس شروع کرن توں بعد ساڈی زندگی بدلن لگ پئی۔
2. جدوں تُسی بائبل کورس شروع کیتا تے توانوں کیہہ پتہ چلیا؟
2 بائبل کورس شروع کرن توں بعد توانوں پتہ چلیا کہ تواڈا سمانی باپ تواڈے نال کِنّاں پیار کر دا اے۔ تُسی سمجھ گئے کہ جے تُسی یہوواہ نُوں خوش کرنا چاہندے او تے اوہدے بندیاں چ شامل ہونا چاہندے او تے توانوں اپنے کماں تے سوچ نُوں بدلنا پئے گا۔ توانوں اوہ کم کرنے پین گے جیہڑے یہوواہ دی نظر چ صحی نیں تے توانوں اوہناں کماں توں دُور رہنا پئے گا جیہڑے اوہدی نظر چ غلط نیں۔—اِفسیوں 5:3-5۔
3. (الف) کُلسّیوں 3:9، 10 دے مطابق یہوواہ ساڈے کولوں کیہہ چاہندا اے؟ (ب) ایس مضمون چ اَسی کیہڑیاں گلاں تے غور کراں گے؟
3 یہوواہ خدا نے سانوں بنایا اے تے اوہ ساڈا اسمانی باپ اے۔ ایس لئی اوہنوں ایہہ فیصلہ کرن دا پورا حق اے کہ اوہدے بندیاں نُوں کیہڑے کم کرنے چاہی دے نیں تے کیہڑے نئیں۔ اوہ ایہہ چاہندا اے کہ اَسی بپتسمہ لین توں پہلاں پوری کوشش کرئیے کہ اَسی پرانی شخصیت نُوں اوہدے کماں سمیت لا کے سُٹ دَئیے۔ * (کُلسّیوں 3:9، 10 نُوں پڑھو۔) جیہڑے لوک بپتسمہ لینا چاہندے نیں اوہناں نُوں ایس مضمون چ ایہناں سوالاں دے جواب مِلن گے: (1) پرانی شخصیت کیہہ اے؟ (2) یہوواہ نے ایہنوں لا کے سُٹن دا حکم کیوں دِتا اے؟ تے (3) اَسی ایہہ کیویں کر سکنے آں؟ ایہہ مضمون اوہناں لوکاں لئی وی بوہت فائدہمند اے جنہاں دا بپتسمہ ہو گیا اے۔ ایہدے ذریعے اوہ ویکھ سکن گے کہ اوہ اوہناں کماں توں دُور کیویں رہ سکدے نیں جیہڑے اوہناں دی پرانی شخصیت دا حصہ سن۔
پرانی شخصیت کیہہ اے؟
4. جیس بندے نے اپنی پرانی شخصیت نُوں نئیں لایا ہوندا، اوہ کیہہ کر دا اے؟
4 جیس بندے نے اپنی پرانی شخصیت نُوں نئیں لایا ہوندا اے، اوہ عام طور تے ایہو جہے کم کردا اے جنہاں نُوں بائبل چ جسم دے کم کہیا گیا اے۔ ایہو جیہا بندہ خودغرض ہوندا اے۔ اوہ بوہت چھیتی غصے چ آ جاندا اے تے اوہ ناشکرا تے مغرور ہوندا اے۔ اوہنوں ماردھاڑ والیاں فلماں تے گندیاں تصویراں تے فلماں ویکھنا چنگا لگدا اے۔ ایہدے چ کوئی شک نئیں کہ اوہدے چ کجھ خوبیاں وی ہو سکدیاں نیں تے اوہنوں اپنے بھیڑے کماں تے گلاں تے افسوس وی ہوندا ہوئے گا۔ پر اوہدے دل چ اپنے بھیڑے کماں تے سوچ نُوں بدلن دی خواہش نئیں ہوندی۔—گلتیوں 5:19-21؛ 2-تیمُتھیُس 3:2-5۔
جدوں اَسی پرانی شخصیت نُوں لا کے سُٹ دَواں گے تے اَسی جسم دے کماں دے غلام نئیں بناں گے۔ (پیراگراف 5 نُوں ویکھو۔) *
5. کیہہ اَسی پوری طرحاں پرانی شخصیت نُوں لا کے سُٹ سکنے آں؟ وضاحت کرو۔ (اعمال 3:19)
5 اَسی سارے عیبدار آں ایس لئی ساڈے چوں کوئی وی پوری طرحاں اپنے دل تے دماغ وچوں بھیڑی سوچ تے خواہشاں نُوں نئیں کڈھ سکدا۔ کدی کدار اَسی کوئی ایہو جہی گل کہہ دَواں گے یاں کوئی ایہو جیہا کم کر دَواں گے جدے تے سانوں بعد چوں پچھتاوا ہوئے گا۔ (یرمیاہ 17:9؛ یعقوب 3:2) پر جدوں اَسی پرانی شخصیت نُوں لا کے سُٹ دیاں گے تے اَسی جسم دے کماں دے غلام نئیں بناں گے سگوں اَسی اِک فرق شخص بن جانواں گے۔—یسعیاہ 55:7؛ اعمال 3:19 نُوں پڑھو۔
6. یہوواہ خدا کیوں چاہندا اے کہ اَسی غلط سوچ توں دُور رہیے تے بھیڑیاں عادتاں نُوں چھڈ دَئیے؟
6 یہوواہ خدا ساڈے نال بوہت پیار کردا اے تے اوہدی خواہش اے کہ اَسی خوش رہیے۔ ایس لئی اوہ چاہندا اے کہ اَسی غلط سوچ توں دُور رہیے تے بھیڑیاں عادتاں نُوں چھڈ دَئیے۔ (یسعیاہ 48:17، 18) اوہ جان دا اے کہ جیہڑا بندہ اپنی غلط سوچ نُوں پورا کر دا اے، اوہ اپنے آپ نُوں تے دُوجیاں نُوں تکلیف دیندا اے۔ یہوواہ نُوں ایہہ ویکھ کے بڑا دُکھ ہوندا اے۔
7. رومیوں 12:1، 2 دے مطابق سانوں کیہڑا فیصلہ کرنا پئے گا؟
7 جدوں اَسی اپنی شخصیت نُوں بدلن دی کوشش کر رہے ہنے آں تے ہو سکدا اے کہ شروع شروع چ ساڈے دوست یاں ساڈے گھر والے ساڈا مذاق اُڈان۔ (1-پطرس 4:3، 4) شاید اوہ کہن کہ سانوں دُوجیاں دے پچھے لگن دی بجائے اوہ کرنا چاہی دا اے جو ساڈا دل کر دا اے۔ پر جیہڑے لوک یہوواہ دے اصولاں دے مطابق نئیں چل رہے ہوندے، اوہ آزاد نئیں ہوندے۔ اصل چ اوہ شیطان دی دُنیا دے طور طریقیاں دے مطابق چل رہے ہوندے نیں۔ (رومیوں 12:1، 2 نُوں پڑھو۔) ہُن اَسی ایہہ فیصلہ کرنا اے کہ کیہہ اَسی پرانی شخصیت نُوں پائی رکھاں گے جیہڑی گُناہ تے شیطان دی دُنیا دے مطابق ڈھلی ہوئی اے؟ یاں فیر کیہہ اَسی یہوواہ دی مدد نال اپنی شخصیت نُوں اوناں چنگا بناواں گے جِنّاں ہُن ساڈے لئی ممکن اے؟—یسعیاہ 64:8۔
تُسی کیویں پرانی شخصیت نُوں لا کے سُٹ سکدے او؟
8. غلط سوچ تے بھیڑیاں عادتاں نُوں چھڈن چ کیہڑی چیز ساڈی مدد کر سکدی اے؟
8 یہوواہ جان دا اے کہ سانوں اپنی غلط سوچ نُوں دُور کرن تے بھیڑیاں عادتاں نُوں چھڈن چ کافی وقت لگ سکدا اے تے ایہدے لئی سانوں بوہت کوشش وی کرنی پے سکدی اے۔ (زبور 103:13، 14) پر اوہ اپنے کلام، پاک روح تے اپنی تنظیم دے ذریعے سانوں سمجھ تے طاقت دے سکدا اے تاکہ اَسی اپنے آپ نُوں بدل سکئے۔ ایہدے چ کوئی شک نئیں کہ اوہنے ایس بارے پہلے وی تواڈی مدد کیتی اے۔ آؤ ہُن کجھ ایہو جہیاں گلاں تے غور کرنے آں جنہاں دے ذریعے اَسی پرانی شخصیت نُوں لا کے سُٹ سکنے آں تے بپتسمہ لین دے لائق بن سکنے آں۔
9. خدا دا کلام کیہہ کرن چ تواڈی مدد کر سکدا اے؟
9 خدا دے کلام دے ذریعے چنگی طرحاں اپنا جائزہ لوو۔ خدا دا کلام اِک شیشے وانگوں اے۔ ایہہ تواڈی مدد کر سکدا اے کہ تُسی اپنی سوچ، کماں تے گلاں دا جائزہ لوو۔ (یعقوب 1:22-25) تُسی جیس یہوواہ دے گواہ نال بائبل کورس کر رہے او، اوہ تے کجھ ہور پُختہ مسیحی توانوں چنگے مشورے دے سکدے نیں۔ مثال لئی، اوہ بائبل چوں توانوں دَس سکدے نیں کہ تواڈے چ کیہڑیاں چنگیاں گلاں نیں تے تُسی کتھے بہتری لیا سکدے او۔ اوہ توانوں سکھا سکدے نیں کہ تُسی بھیڑیاں عادتاں نُوں چھڈن لئی چنگے مشورے کتھوں لبھ سکدے او۔ یہوواہ وی تواڈی مدد کرن لئی ہمیشاں تیار اے۔اوہ چنگی طرحاں جان دا اے کہ اوہ کیس طرحاں تواڈی مدد کر سکدا اے تے اوہ تواڈے دل نُوں وی جان دا اے۔ (امثال 14:10؛ 15:11) ایس لئی ہر روز اوہدے کولوں دُعا کرن تے اوہدے کلام نُوں پڑھن دی عادت بناؤ۔
10. تُسی بھرا ایلی توں کیہہ سکھیا اے؟
10 ایس گل دا پورا یقین رکھو کہ یہوواہ دے اصول سب توں چنگے نیں۔ یہوواہ خدا سانوں جیہڑا وی کم کرن نُوں کہندا اے، اوہدے چ ساڈا ای بھلا ہوندا اے۔ جیہڑے لوک اوہدے اصولاں دے مطابق زندگی گزاردے نیں، اوہناں نُوں زندگی دا مقصد تے سچی خوشی مِلدی اے۔ (زبور 19:7-11) پر جیہڑے لوک یہوواہ دے اصولاں دے مطابق نئیں چلدے، اوہناں نُوں اپنے بھیڑے کماں دی وجہ توں تکلیف چکنی پیندی اے۔ ذرا غور کرو کہ یہوواہ دے اصولاں نُوں نظر انداز کرن بارے اِک بھرا نے کیہہ کہیا۔ اوہدا نال ایلی اے۔اوہدے ماں پیو یہوواہ نال بوہت پیار کر دے سن۔ پر جدوں بھرا ایلی نوجوان سی تے اوہنے کجھ بھیڑے لوکاں نال دوستی کر لئی۔ اوہنے چوری کرنا، نشہ کرنا تے ناجائز جنسی کم کرنا شروع کر دِتے۔ بھرا ایلی دَسدا اے کہ اوہنوں محسوس ہویا کہ اوہنے بوہت زیادہ غصہ تے مارکٹائی کرنا شروع کر دِتی سی۔ اوہ کہندا اے: ”اصل چ میں ہر اوہ کم کر رہیا ساں جدے بارے میں سکھیا سی کہ اِک مسیحی نُوں نئیں کرنا چاہی دا۔“ پر بھرا ایلی نے بچپن توں جیہڑیاں گلاں سکھیاں سن، اوہ اوہناں نُوں بُھلیا نئیں سی۔ اوہنے فیر توں بائبل چوں تلیم حاصل کرنی شروع کر دِتی۔ اوہنے اپنی بھیڑیاں عادتاں نُوں چھڈن لئی سخت محنت کیتی تے سن 2000 چ بپتسمہ لے لیا۔ یہوواہ دے اصولاں دے مطابق زندگی گزارن نال اوہنوں کیہہ فائدہ ہویا؟ بھرا ایلی نے کہیا: ”ہُن میں ذہنی طور تے مطمئن آں تے میرا ضمیر صاف اے۔ * بھرا ایلی دی مثال توں پتہ چلدا اے کہ جیہڑے لوک یہوواہ دے اصولاں نُوں نئیں من دے،اوہ اپنے آپ نُوں تکلیف پونچاندے نیں۔ پر یہوواہ فیر وی ایہو جہے لوکاں دی مدد کرن نُوں تیار اے تاکہ اوہ اپنے آپ نُوں بدل لین۔
11. یہوواہ کیہڑیاں چیزاں توں نفرت کر دا اے؟
11 اوہناں چیزاں توں نفرت کرو جنہاں توں یہوواہ نفرت کر دا اے۔ (زبور 97:10) بائبل توں پتہ چلدا اے کہ یہوواہ نُوں اُچیاں اَکھاں،جھوٹھی زبان تے بے گُناہ دا خون کرن والے ہتھاں توں نفرت اے۔ (امثال 6:16، 17) یہوواہ نُوں ظلم کرن والیاں تے دھوکھا دین والیاں توں نفرت اے۔ (زبور 5:6) یہوواہ نُوں ایہناں گلاں تے کماں توں اینی سخت نفرت اے کہ اوہنے نوح دے زمانے چ اوہناں سارے بھیڑے لوکاں نُوں ختم کر دِتا جنہاں نے زمین تے ہر پاسے ظلم پھیلایا ہویا سی۔ (پیدایش 6:13) ذرا اِک مثال تے غور کرو۔ یہوواہ خدا نے ملاکی نبی دے ذریعے دَسیا کہ اوہنوں اوہناں لوکاں توں نفرت اے جیہڑے اپنے جیون ساتھی نُوں طلاق دین لئی چالاں چلدے نیں۔ یہوواہ ایہو جہے لوکاں دی عبادت نُوں قبول نئیں کردا تے اوہناں نُوں اوہناں دے کماں دی سزا دے گا۔—ملاکی 2:13-16؛ عبرانیوں 13:4۔
جنہاں کماں توں یہوواہ نُوں نفرت اے، سانوں اوہناں کماں توں اُنج ای کریچ کھانی چاہی دی اے جیویں اَسی گلے سڑے کھانے توں کریچ کھانے آں۔ (پیراگراف نمبر 11، 12 نُوں ویکھو۔)
12. بُرائی توں کریچ کھان دا کیہہ مطلب اے؟
12 یہوواہ چاہندا اے کہ اَسی بُرائی توں کریچ کھائیے۔ (رومیوں 12:9) کریچ کھان دا مطلب کسے چیز توں سخت نفرت کرنا اے۔ ذرا سوچو کہ جے توانوں کہیا جائے کہ پلیٹ چ رکھیا ہویا گلیا سڑیا کھانا کھا لوو تے توانوں اوہدے توں کِنّی کریچ آئے گی! شاید ایہہ سوچ کے ای تواڈا دل خراب ہون لگ پووے۔ ایسے طرحاں جے ساڈے ذہن چ کسے ایہو جہی چیز دا خیال وی آندا اے جدے توں یہوواہ نُوں نفرت اے تے سانوں اوہدے توں نفرت کرنی چاہی دی اے۔
13. سانوں اپنے دل چ بھیڑے خیال کیوں نئیں آن دینے چاہی دے؟
13 اپنے دل چ بھیڑے خیال نہ آن دَوو۔ ساڈی سوچ دا ساڈے کماں تے اثر ہوندا اے۔ ایس لئی یسوع مسیح نے کہیا سی کہ سانوں اپنے دل چوں ایہو جہے خیال کڈھ دینے چاہی دے نیں جنہاں دی وجہ توں اَسی کوئی بوہت وڈا گُناہ کر بیٹھاں گے۔ (متی 5:21، 22، 28، 29) اَسی سارے اپنے اسمانی باپ نُوں خوش کرنا چاہنے آں۔ ایس لئی ایہہ بوہت ضروری اے کہ جیویں ای ساڈے دل چ کوئی بھیڑا خیال آئے، سانوں اوہنوں اپنے دل چوں کڈھ دینا چاہی دا اے۔
14. (الف) ساڈیاں گلاں توں ساڈے بارے کیہہ پتہ چلدا اے؟ (ب) سانوں اپنے آپ کولوں کیہڑے سوال پچھنے چاہی دے نیں؟
14 سوچ سمجھ کے گل کرو۔ یسوع مسیح نے کہیا سی: جیہڑیاں چیزاں انسان دے موُنہہ چوں نکل دِیاں نیں، اوہ اوہدے دل چوں آندیاں نیں۔ (متی 15:18) ساڈیاں گلاں توں پتہ چلدا اے کہ ساڈے دل چ کیہہ اے۔ ایس لئی اپنے آپ کولوں ایہہ سوال پچھو: ”کیہہ میں اوس ویلے وی جھوٹھ نئیں بولاں گا جدوں سچ دَسن نال مینوں نقصان ہوئے گا؟ اِک شادیشُدہ شخص دے طور تے کیہہ میں ایس گل دا خیال رکھنا واں کہ میں کسے نال وی عشق نہ لڑاواں؟ کیہہ میں کسے وی طرحاں دی گندی گل کرن توں باز رہنا واں؟ جدوں دُوجے مینوں غصہ دَواندے نیں تے کیہہ میں سکون نال اوہناں نال گل کرنا واں؟“ ایہناں سوالاں تے غور کرن نال توانوں بوہت فائدہ ہوئے گا۔ جیس طرحاں سلائیاں نال اِک سویٹر بن دا اے اوسے طرحاں ساڈیاں گلاں نال ساڈی شخصیت بن دی اے۔ایس لئی جے اَسی چاہنے آں کہ اَسی اپنی پرانی شخصیت نُوں لا کے سُٹ دَئیے تے سانوں گالاں کڈھنا، جھوٹھ بولنا تے گندیاں گلاں کرنا چھڈنا پئے گا۔
15. اپنی پرانی شخصیت نُوں سُولی تے ٹنگن دا کیہہ مطلب اے؟
15 پرانی شخصیت نُوں لا کے سُٹ دین لئی جو وی کرنا پئے، اوہ کرو۔ پولُس رسول نے اِک مثال دے ذریعے واضح کیتا کہ ایہہ کِنّاں ضروری اے کہ اَسی اپنے آپ نُوں بدلئے۔ اوہنے کہیا کہ سانوں پرانی شخصیت نُوں سُولی تے ٹنگ دینا چاہی دا اے۔ (رومیوں 6:6) ایہدا مطلب اے کہ سانوں یسوع مسیح دی مثال تے عمل کرنا چاہی دا اے۔ سانوں ایہو جہی سوچ یاں کماں نُوں چھڈ دینا چاہی دا اے جنہاں توں یہوواہ نفرت کردا اے۔ایہہ کم کرن نال ساڈا ضمیر صاف رہوے گا تے اَسی ہمیشاں تک زندہ رہن دی امید وی رکھ سکاں گے۔ (یوحنا 17:3؛ 1-پطرس 3:21) یاد رکھو کہ یہوواہ سانوں خوش کرن لئی اپنے اصولاں نُوں نئیں بدلے گا سگوں سانوں اپنے آپ نُوں یہوواہ دے اصولاں مطابق بدلنا پئے گا۔—یسعیاہ 1:16-18؛ 55:9۔
16. سانوں ایہہ ارادہ کیوں کرنا چاہی دا اے کہ اَسی بھیڑیاں خواہشاں دا مقابلہ کردے رہواں گے؟
16 بھیڑیاں خواہشاں دا مقابلہ کر دے رہوو۔ بپتسمہ لین دے بعد وی توانوں اپنیاں بھیڑیاں خواہشاں دا مقابلہ کرنا جاری رکھنا پئے گا۔ ذرا اِک بھرا دی مثال تے غور کرو جدا نال ماریسیو اے۔ جدوں اوہ جوان سی تے اوہنے دُوجے بندیاں نال جنسی کم کرنے شروع کر دِتے۔ فیر اوہ یہوواہ دے گواہواں نال بائبل کورس کرن لگ پیا۔ اوہنے اپنے آپ نُوں بدلیا تے 2002 چ بپتسمہ لے لیا۔ ہُن اوہنوں یہوواہ دی عبادت کردے ہوئے کئی سال ہو گئے نیں۔ پر فیر وی اوہ کہندا اے: ”مینوں حالے وی کدی کدار اپنیاں غلط خواہشاں نال لڑنا پیندا اے۔“ پر ایہدی وجہ توں اوہ بےحوصلہ نئیں ہوندا۔ اوہ کہندا اے: ”مینوں ایہہ سوچ کے بڑا حوصلہ مِلدا اے کہ میں اپنیاں غلط خواہشاں نُوں پورا نہ کر کے اصل چ یہوواہ نُوں خوش کرنا واں۔“ *
17. توانوں بھین نبیہا دی مثال توں کیہہ حوصلہ ملیا اے؟
17 دُعا چ یہوواہ کولوں مدد منگو تے اپنی طاقت تے نئیں سگوں یہوواہ دی طاقت تے بھروسا کرو۔ (گلتیوں 5:22؛ فِلپّیوں 4:6) جے اَسی چاہنے آں کہ اَسی پرانی شخصیت نُوں لا کے سُٹ دَئیے تے فیر ایہنوں دُبارہ کدی نہ پائیے تے ایہدے لئی سانوں بڑی محنت کرنی پئے گی۔ ایس بارے اِک بھین دی مثال تے غور کرو جدا ناں نبیہا اے۔ جدوں اوہ چھ سال دی سی تے اوہدا پیو اوہنوں چھڈ کے چلا گیا۔ اوہ کہندی اے: ”ایس وجہ توں میں اندروں بوہت ٹُٹ گئی۔“ جدوں نبیہا وڈی ہوئی تے اوہ بوہت غصے والی بن گئی۔ اوہنے نشے والیاں چیزاں دی سمگلنگ کرنی شروع کر دِتی جدی وجہ توں اوہنوں کئی سال جیل چ رہنا پیا۔ یہوواہ دے کجھ گواہ اوس جیل چ قیدیاں نُوں بائبل دی تلیم دین جاندے سن۔ نبیہا نے اوہناں نال بائبل کورس کرنا شروع کر دِتا۔ بائبل دی تلیم حاصل کرن نال اوہدی زندگی بدلن لگ پئی۔ اوہ کہندی اے: ”اپنیاں کجھ بھیڑیاں عادتاں نُوں چھڈنا میرے لئی ایناں مشکل نئیں سی۔ پر مینوں سگریٹ چھڈنا بوہت مشکل لگ رہیا سی۔“ نبیہا نُوں اپنی ایہہ عادت چھڈن چ اِک سال توں زیادہ عرصہ لگ گیا۔ آخرکار اوہ ایہدے چ کامیاب ہو گئی۔ پر اوہنے ایہہ سب کیویں کیتا؟ اوہ کہندی اے: ”جیس چیز نے میری سب توں زیادہ مدد کیتی، اوہ ایہہ سی کہ میں وار وار یہوواہ کولوں دُعا کردی رہی۔“ ہُن اوہ کہندی اے: ”مینوں پورا یقین اے کہ جے یہوواہ دی مدد نال میرے ورگی انسان بدل سکدی اے تے فیر کوئی وی بدل سکدا اے۔“
تُسی بپتسمہ لین دے لائق بن سکدے او!
18. 1-کُرنتھیوں 6:9-11 دے مطابق خدا دے بوہت سارے بندیاں نے کیہہ کیتا؟
18 پہلی صدی عیسوی چ یہوواہ نے جنہاں لوکاں نُوں یسوع مسیح نال حکمرانی کرن لئی چنیا، اوہناں وچوں کئی لوک بوہت بھیڑے کم کر دے سن۔ مثال لئی، اوہ حرامکاری، ہم جنسپرستی تے چوری کر دے سن۔ پر یہوواہ دی پاک روح دی مدد نال اوہ اپنی شخصیت نُوں بدل سکے۔ (1-کُرنتھیوں 6:9-11 نُوں پڑھو۔) اَج وی بائبل دی مدد نال لکھاں لوکاں نے اپنے آپ نُوں بدل لیا اے۔ * اوہناں نے اپنیاں ایہو جہیاں عادتاں تے قابو پا لیا اے جنہاں نُوں چھڈنا اوہناں لئی بوہت مشکل سی۔ اوہناں دی زندگی توں پتہ چلدا اے کہ بپتسمہ لین دے لائق بنن لئی تُسی وی اپنی زندگی نُوں بدل سکدے او تے بھیڑیاں عادتاں نُوں چھڈ سکدے او۔
19. اگلے مضمون چ اَسی کیہڑی گل تے غور کراں گے؟
19 جیہڑے لوک بپتسمہ لینا چاہندے نیں، اوہناں نُوں پرانی شخصیت نُوں نہ صرف لا کے سُٹ دینا چاہی دا اے سگوں نوِیں شخصیت نُوں پان دی وی پوری کوشش کرنی چاہی دی اے۔ اگلے مضمون چ اَسی ویکھاں گے کہ اَسی اِنج کیویں کر سکنے آں تے ایس معاملے چ دُوجے ساڈی مدد کیویں کر سکدے نیں۔
گیت نمبر 126: خبردار رہوو، دلیر بنو
^ جے اَسی بپتسمہ لین دے لائق بننا چاہنے آں تے سانوں اپنی شخصیت نُوں بدلن لئی تیار رہنا چاہی دا اے۔ ایس مضمون چ اَسی ویکھاں گے کہ پرانی شخصیت کیہہ اے، سانوں کیوں ایہنوں لا کے سُٹ دینا چاہی دا اے،تے اَسی ایہہ کیویں کر سکنے آں۔ اگلے مضمون چ اَسی ویکھاں گے کہ اَسی کیہہ کر سکنے آں تاکہ اَسی بپتسمہ لین دے بعد وی نوِیں شخصیت نُوں پاندے رہیے۔
^ اِصطلاح دی وضاحت: پرانی شخصیت نُوں لا کے سُٹن دا مطلب ایہہ وے کہ اَسی اوہناں خواہشاں تے کماں توں دُور رہیے جیہڑے یہوواہ نُوں پسند نئیں۔ سانوں ایہہ بپتسمہ لین توں پہلاں کرنا چاہی دا اے۔—اِفسیوں 4:22۔
^ ہور جانن لئی مضمون ”پاک کلام کی تعلیم زندگی سنوارتی ہے—”مجھے یہوواہ کی طرف لوٹنے کی ضرورت تھی““ نُوں ویکھو۔ ایہنوں پڑھن لئی اُردو زبان چ jw.org تے تلاش دے خانے چ موضوع نُوں لکھو تے فیر تلاش دا بٹن دباؤ۔
^ ہور جانن لئی مضمون ”پاک کلام کی تعلیم زندگی سنوارتی ہے—”وہ میرے ساتھ بڑی شفقت سے پیش آئے““ نُوں ویکھو۔ ایہنوں پڑھن لئی اُردو زبان چ jw.org تے تلاش دے خانے چ موضوع نُوں لکھو تے فیر تلاش دا بٹن دباؤ۔
^ بکس ” پاک کلام کی تعلیم زندگی سنوارتی ہے“ نُوں ویکھو۔
^ تصویر دی وضاحت: غلط سوچ نُوں دُور کرنا تے گندے کماں نُوں چھڈنا بالکل اِنج ای اے جیویں کہ پرانے کپڑیاں نُوں لانا۔
