1. ¿Imaynataj kausayninchej karqa?

 NIRAJ Jehovaj testigosninwan Bibliata estudiashajtinchej, ¿imaynataj kausayninchej karqa? Wakenqa ni yuyarikuyllatapis munanchejchu. Ichapis kay mundomanta runas jina karqanchej, kay mundoj yuyayninman jinataj imatapis allinpaj chayrí mana allinpaj qhawarqanchej. Jina kajtenqa ‘mana suyakuyniyoj mana Diosniyojtaj kausarqanchej’ (Efe. 2:12). Jinapis Bibliamanta yachakusqanchejrayku cambiarqanchej.

2. ¿Imastataj yachakorqanchej Bibliata estudiasqanchejman jina?

² Bibliata estudiasqanchejman jina yachakorqanchej cielopi uj Tatanchej kasqanta, maytataj munakuwasqanchejta. Yachakullarqanchejtaj Jehovata kusichinapaj, llajtanmantaj yaykunapajqa, kausayninchejta, imatachus yuyasqanchejtapis cambiananchej kasqanta. Chantá yachakullarqanchejtaj Jehovaj kamachiykunasninman jina kausakuna kasqanta (Efe. 5:3-5).

3. 1) Colosenses 3:9, 10 nisqanman jina, ¿imata ruwananchejtataj Jehová munan? 2) ¿Imaspitaj kay yachaqana yanapawasun?

³ Jehová Diosqa Ruwawajninchej Tatanchejtaj. Chayrayku niyta atin, familianmanta kajkuna imaynatachus kausananchejta. Bautizakuyta munajkunamantaj nin: “Ñaupa kausayniykichejta, ñaupa ruwasqasniykichejtapis saqeychej”, nispa (Colosenses 3:9, 10 leey). * Bautizakuyta munashanki chayqa, kay yachaqana kay kinsa imaspi sumajta yanapasonqa: ‘Ñaupa kausay’ nispa, ¿imamantataj parlashanchej? ¿Imaraykutaj Jehová munan ñaupa kausayninchejta saqenata? ¿Imaynatá ñaupa kausayninchejta saqesunman? Bautizasqasña kanchej chay, kay yachaqanaqa yanapawasun, mana ñaupa kausayninchejman jina watejmanta kausanapaj.

4. ¿Imaynataj ‘ñaupa kausayninman’ jina kausaj runa?

⁴ ‘Ñaupa kausayninman’ jina kausaj runaqa, sajra munayninman jina imatapis yuyan, ruwantaj. Chantapis ichá imallamantapis chay rato phiñarpakun, payllapaj imatapis munan, mana agradecekunchu, jatunchakuntaj. Chay runamanqa ichapis mayta gustan pornografiata qhaway, chayrí khuchichakuy imasmanta, maqanakuykunamanta peliculastapis qhaway. Payqa ichapis kʼacha runa, imatachus ruwasqanmanta, parlasqanmantapis wakin kutis ichá sonqon juchachan. Jinapis mana sonqon aysanchu ruwasqasninta, yuyasqantapis cambiananpaj (Gál. 5:19-21; 2 Tim. 3:2-5).

5. ¿Imajtintaj ñaupa kausayninchejta mana tukuysitunta saqeyta atillasunmanchu? (Hechos 3:19).

⁵ Pantaj runas kasqanchejrayku yuyayninchejmanta, sonqonchejmantapis sajra yuyaykunata, sajra munaykunata mana tukuysitunta orqhoyta atisunpunichu. Wakin kutisqa ichá imata ruwarpasparaj chayrí parlarpasparaj mayta pesachikusun (Jer. 17:9; Sant. 3:2). Jinapis ñaupa kausayninchejta saqesun chayqa, manaña sajra yuyayninchejman jinachu, nitaj sajra munayninchejman jinachu ruwasun. Niñataj imaynachus ñaupajpi karqanchej ajinachu kasun (Isa. 55:7; Hechos 3:19 leey).

6. ¿Imaraykutaj Jehová niwanchej sajra yuyayninchejta, costumbrestapis saqepunanchejta?

⁶ Jehovaqa niwanchej sajra yuyaykunata, costumbrestapis saqepunata. Chaytataj niwanchej mayta munakuwasqanchejrayku, allin rinawanchejtataj munasqanrayku (Isa. 48:17, 18). Jehovaqa yachan sajra munaynillanchejta ruwasqanchej, noqallanchejpajtaj mana allinchu kasqanta, wajkunatataj sufrichisqanchejta. Jehovataj chayta rikuspa mayta llakikun.

7. Romanos 12:1, 2 nisqanman jina, ¿imatataj ruwananchej tiyan?

⁷ Ichá familiaresninchej chayrí amigosninchej burlakuwanchej cambianapaj kallpachakushasqanchejmanta (1 Ped. 4:3, 4). Ichapis paykunaqa niwasun munayninchejman jina kausakuyta atisqanchejta, nitaj pipis imaynatachus kausananchejta ninawanchejta. Jinapis Jehovaj kamachiykunasninta mana kasukojkunaqa, mana munayninkuman jinapunichu kausashanku. Imajtinchus paykunaqa Satanaspa sajra mundonpa munayninman jina kausashanku (Romanos 12:1, 2 leey). Juchasapas  kasqanchejrayku, Satanaspa sajra mundonraykutaj, kausayninchejpi mana allin imasta ruwarqanchej. Jinapis Jehovaj munayninman jina kausakusun chayqa, payqa kay tiempopi sumaj cristianosman tukuchiwasun. Chayrayku, ¿ñaupa kausayninchejman jinallapunichu kausasun chayri Jehovaj kamachiykunasninman jinachu? Chaytaqa sapa uj ajllananchej tiyan (Isa. 64:8).

8. ¿Imaynatá Jehová yanapawanchej sajra yuyayninchejta, costumbrestapis saqepunapaj?

⁸ Jehovaqa yachan sajra yuyayninchejta, costumbrestapis saqepunapajqa, mayta kallpachakunanchej kasqanta, nitaj uj ratopichu chayta saqeyta atinanchejta (Sal. 103:13, 14). Jinapis Jehovaqa cambianapaj mayta yanapawanchej, yachayta, kallpata imataj qowanchej. Chaytataj ruwan Palabrannejta, espíritu santonnejta, llajtannejta ima. Qantapis Jehovaqa kunankama maytañachá yanapasunki. Jinapis, ¿imatataj ruwawaj ñaupa kausayniykita saqepunallaykipajpuni, ajinamantataj bautismoman chayanaykipaj? Chayta qhawarina.

9. ¿Imapajtaj Biblia yanapasunkiman?

⁹ Bibliata estudiashaspa allinta qhawarikuy imaspichus cambianayki kasqanta. Diospa Palabranqa uj espejo jina. Chayrayku yanapawasunman reparakunapaj imatachus yuyasqanchejta, imaynatachus parlasqanchejta, imatachus ruwasqanchejtapis (Sant. 1:22-25). Bibliamanta yachachisoj hermano, waj experienciayoj hermanospis mayta yanapasunkuman. Paykunaqa Bibliawan yanapasunkuman sutʼita reparakunaykipaj imastachus allinta ruwashasqaykita, imaspitajchus astawan kallpachakunayki kasqanta. Yachachisunkumantaj publicacionespi Bibliaj yuyaychaykunasninta maskʼayta. Ajinamanta chay yuyaychaykunawan yanapachikuspa ñaupa kausayniykita cambianaykipaj. Chantapis Jehovalla astawan yanapayta atisunkiman. Payqa yanapasuytapuni munan. Imajtinchus payqa yachan imachus sonqoykipi kasqanta (Pro. 14:10; 15:11). Chayrayku tukuy atisqaykita kallpachakuy sapa día orakunaykipaj, Bibliatapis estudianaykipaj.

10. ¿Imatataj Eliej kausayninmanta yachakunchej?

¹⁰ Qanpuni reparay Jehovaj kamachiykunasnenqa allinninchejpaj kasqanta. Jehovaqa imatapis niwanchej allinninchejpajpuni. Jehovaj kamachiykunasninta kasukojkunaqa manaña pisipajchu qhawakunku, yachanku imapajchus kausasqankuta, kusisqataj kanku (Sal. 19:7-11). Jehovaj kamachiykunasninta mana kasukojkunatajrí, sajra munayninkuman jina kausasqankurayku llakiykunallapi rikhurinku. Elie sutiyoj runamanta parlarina. Reparanataj Diospa kamachiykunasninta mana kasukuspa, imasmanchus chayayta atisqanchejta. Paypa tatasnenqa Jehovata sirverqanku, jinapis payqa jovencito kashaspa mana allin amigoswan purerqa. Ajinamanta payqa drogakorqa, millay kausaypi purerqa, suwakuytataj qallarerqa. Payqa aswan phiña runaman tukorqa, chayrayku pitapis maqarpayllata munaj. Pay nin: “Noqaqa yachashaspapis mana ruwanasta ruwarqani”, nispa. Jinapis imatachus tatasnin wawamantapacha yachachisqankuta mana qonqarqachu. Chayrayku aswan qhepaman watejmanta Bibliata estudiarqa, viciosninta saqenanpaj mayta kallpachakorqa, 2000 watapitaj bautizakorqa. ¿Imaynatá kausayninpi yanaparqa Jehovaj kamachiykunasninta kasukusqan? Pay nin: “Kunanqa sonqo tiyasqa, llimphu sonqotaj kani”, nispa. * Eliej kausayninpi reparanchej jina, Jehovaj kamachiykunasninta mana kasukojkunaqa aswan llakiykunallapi rikukunku.  Jinapis Jehovaqa paykunata cambianankupaj yanapaytapuni munan.

11. ¿Imastataj Jehová chejnikun?

¹¹ Jehovaj chejnikusqan imasta chejnikuna (Sal. 97:10). Bibliaqa nin Jehovaqa mayta chejnikusqanta “may maylla qhawaykachaj ñawista, llullakoj simita, mana juchayoj runata wañuchej makista” ima (Pro. 6:16, 17). Chantapis payqa chejnikullantaj “runa wañuchista, engañaj runastapis” (Sal. 5:6). Jehovaqa tukuy chay imasta maytapuni chejnikun. Noej tiemponpeqa sajra runas kay jallpʼata maqanakuykunawan juntʼacherqanku. Chayraykutaj Jehovaqa paykunata tukuyninkuta chinkacherqa (Gén. 6:13). Chantapis Jehovaqa profeta Malaquiasnejta nillarqataj imatawanchus chejnikusqanta. Pay nerqa pillapis qosanmanta chayrí warminmanta divorciakuyta munaspa wasanchajtaqa, mayta chejnikusqanta. Jehovaqa chay runaspa yupaychasqankuta mana allinpajchu qhawan, paykunatataj juzganqa (Mal. 2:13-16; Heb. 13:4).

12. ¿Imatá ruwanchej imatapis chejnikuspa?

¹² Jehovaqa kamachiwanchej: “Sajra kajtaqa chejnisqata chejnikuychej”, nispa (Rom. 12:9). Imatapis chejnisqata chejnikuspa chayrí millachikuspaqa mana rikuyllatapis munanchejchu. Pillapis millay pʼosqosqa mikhunata mikhuykunanchejta niwajtinchej, ¿mikhuykullasunmanchu? Mana. Astawanpis ichá chay rato “weqʼoj” nichiwasunman. Ajinallatataj Jehovaj chejnikusqan imastapis chejnikunanchej tiyan.

13. ¿Imaraykutaj imapichus piensasqanchejta sumajta qhawarikunanchej tiyan?

¹³ Imaspichus piensasqanchejta allinta qhawarikuna. Imatapis piensasqanchejman jina ruwanchej. Chayrayku Jesusqa yachacherqa jatun juchapi urmachinawanchejpaj jina kaj yuyaykunata qhesachananchej kasqanta (Mat. 5:21, 22, 28, 29). Tatanchej Jehovataqa kusichiyta munanchej. Chayrayku mana allin yuyaykunataqa qhesachananchejpuni tiyan.

14. ¿Imatataj parlasqanchej rikuchin chanta ima tapuykunapitaj piensarinanchej tiyan?

¹⁴ Ama imatapis parlarparinallachu. Jesús nerqa: ‘Simimanta llojsej imasqa sonqomanta llojsimun’, nispa (Mat. 15:18). Arí, parlasqanchejqa sutʼita rikuchin imayna runaschus kasqanchejta. Kay tapuykunapi piensarina: “¿Cheqa kajtapunichu parlani mana allinniypaj kajtinpis? Casado chayrí casada kani chay, ¿allintachu qhawarikuni mana wajkunawan coqueteanaypaj? ¿Khuchichakuy imasmanta ni tumpitallatapis parlanaypaj kallpachakunichu?  Pillapis phiñachiwajtin, ¿kʼachallamantachu kutichini?”. Allinpuni kanman chaykunapi piensarinanchej. Parlasqanchejqa ropanchejpi botones jina kanman. Ropanchejta botonaraspaqa orqhokuyta atillanchej. Ajinallatataj pitapis mana millay imasta ninapaj, mana llullakunapaj, nitaj khuchichakuy imasmanta parlanapaj kallpachakusun chayqa, ñaupa kausayninchejta cambiayta atillasun.

15. ¿Imatataj ruwananchej tiyan ñaupa kausayninchejta rakhu kʼaspiman clavaykunapaj?

¹⁵ Cambianapaj kallpachakuna. Apóstol Pabloqa cambiananchejpuni kasqanta entiendechinawanchejpaj nerqa, ñaupa kausayninchejta rakhu kʼaspiman clavaykunanchejta (Rom. 6:6). Jesusqa Jehovata kusichiyta munasqanrayku saqerqa rakhu kʼaspiman clavanankuta. Noqanchejpis Jehovata kusichiyta munasqanchejrayku sajra ruwaykunata, costumbresta ima saqepuna tiyan. Imajtinchus Jehovaqa chay imasta chejnikun. Chayta ruwaspalla llimphu sonqoyoj kasun, wiñay kausaytapis japʼiyta atisun (Juan 17:3; 1 Ped. 3:21). Jehovaqa mana noqanchejrayku kamachiykunasninta cambianqachu. Astawanpis noqanchej cambiananchej tiyan paypa kamachiykunasninman jina kausakunapaj (Isa. 1:16-18; 55:9).

16. ¿Imaraykutaj mana sajra munayninchejwan atipachikunapaj kallpachakunallanchejpuni tiyan?

¹⁶ Ama sajra munayninchejwan atipachikunachu. Bautizasqaña kaspapis, sajra munayninchejwan mana atipachikunapaj kallpachakunallanchejpuni tiyan. Mauriciomanta parlarina. Payqa jovencitonmantapacha qhari masisnillanwantaj khuchichakoj. Tiemponmantaj Jehovaj testigosninta rejserqa, Bibliatataj estudiayta qallarerqa. Payqa ñaupa kausayninta cambiarqa, 2002 watapitaj bautizakorqa. Jehovata ashkha watastaña sirvispapis pay nin: “Wakin kutisqa mayta kallpachakuni mana sajra munayniywan atipachikunaypaj”, nispa. Jinapis payqa mana desanimakunchu, imajtinchus nillanpuni: “Jehovaqa mana sajra munayniyman jina ruwajtiy mayta kusikun. Chaytaj mayta sonqochawan”, nispa. *

17. ¿Imatataj yachakunchej Nabihaj experiencianmanta?

¹⁷ Jehovamanta yanapata mañakuna, espíritu santonwan yanapanawanchejpi atienekuna, amataj kallpallanchejpeqa (Gál. 5:22; Fili. 4:6). Ñaupa kausayninchejta saqepunapaj, niñataj chayman jina ujtawan ruwanapajqa, mayta kallpachakunanchej tiyan. Nabiha sutiyoj warmimanta  parlarina. Paytaqa tatan sojta watitasnillayojraj kashajtin saqerparerqa. Pay nin: “Tatay saqerpariwasqanmanta maytapuni llakikoj kani”, nispa. Payqa wiñasqanman jina imamantapis chay rato phiñarpakoj, pitapis maqarpayllata munaj. Payqa drogasta vendespa japʼichikorqa, jinamantataj ashkha watasta carcelpi karqa. Aswan qhepamantaj carcelman predicaj rej testigos payman Bibliamanta yachacherqanku. Pay nin: “Wakin viciosniytaqa qonqayta atillarqani. Jinapis cigarro pitaytaqa mana qonqayta aterqanichu”, nispa. Payqa wata kurajtapuni mayta kallpachakorqa chay viciota qonqananpaj, jinapis atiparqapuni. ¿Imataj yanaparqa atipananpaj? Pay nin: “Jehovamanta sapa kuti mañakusqayrayku vicioyta atiparqani”, nispa. Chantá nillantaj: “Noqaqa Jehovata kusichiyta munasqayrayku cambiarqani, chayrayku niyman tukuypis cambiayta atinankuta”, nispa. *

18. Ñaupa cristianospa tiemponkupi runas, ¿imatataj ruwarqanku Jehovaj kamachisninman tukunankupaj?

¹⁸ Ñaupa cristianospa tiemponkupi Jehovaqa wakin qharista, wakin warmista ajllarqa Cristowan khuska kamachimunankupaj. Chay runasqa niraj cristianosman tukushaspa millay imasta ruwasqanku. Paykunamanta wakenqa kasqanku qhenchachakojkuna, qharipura puñuykojkuna, suwas ima. Jinapis Jehovaqa espíritu santonwan paykunata yanaparqa. Ajinamanta ñaupa kausayninkuta cambiarqanku (1 Corintios 6:9-11 leey). Kay tiempopipis Bibliaqa may chhika runasta yanapashallantaj cambianankupaj. * Ashkhasqa sajra ruwaykunasninkuta, viciosninkuta ima saqeporqanku. Paykuna jina qanpis cambiayta atiwaj, bautismomanpis chayayta atiwaj.

19. ¿Imatataj qhepan yachaqanapi yachakusun?

¹⁹ Bautizakuyta munajkunaqa, mana ñaupa kausayninkuta saqenallankupajchu kallpachakunanku tiyan, manaqa Diospa qosqan mosoj kausaywan pʼachallikunankupajpis. Qhepan yachaqanapi yachakusun imaynatachus mosoj kausaywan pʼachallikunanchejta, imaynatatajchus wajkunapis chaypaj yanapanawanchejta.