1. Bibliapita manaraj yachacurga, ¿imanotaj cawayninchi cashga?

 JEHOVAPA testiguncunawan Bibliapita manaraj yachacurirga, ¿imanotaj cawayniqui cargan? Waquinninchega chaycunaman yarpaytapis manami munanchinachu. ¿Imanir? Chay wichan Jehovata mana sirvej runacunano cawacushcanchi, paycuna ima ali cashganta y ima mana ali cashganta nimashganchicunata rurashcanchi. Jina “kay patsacho Diosniynaq” ogracashga runano cawaycashcanchi (Efes. 2:12). Bibliapita yachacurmi ichanga chayno cashganachu.

2. ¿Imatataj yachacushcanqui Bibliapita yachacur galaycushgayquipita?

² Cada cadala Bibliapita yachacurmi, Jehová Taytayquino alapa cuyashushgayquita ricashcanqui. Jina tantiacushcanqui Jehovata cushichinayquipaj y sirvejninno familiancho canayquipäga yarpayniquicho y cawayniquichopis cambiucunataraj ruranayquipaj. Jina Jehovapa mandamientuncunatapis cäsucunayqui cargan (Efes. 5:3-5).

3. 1) Efesios 4:22, 24 nishganno, ¿imatataj Jehová munan rurananchipaj? 2) ¿Cay yachachicuyga imanotaj yanapämäshun?

³ Taytalanchi Jehová Camacojninchi captinmi, payga camacächishga imano sirvejnincuna cawapäcunanpaj. Chaymi bautizacuyta munajcunata payga nin: “Makwa röpata jitariqno unay kawashqaykita jitarqäriy” * (leiriy Efesios 4:22, 24). ¿Bautizacunayquipächu yarpaycanqui? Cay yachachicuymi yanapäshunqui caycunata tantianayquipaj: ¿ima ninantaj “unay kawashqaykita jitarqäriy”?, ¿imanirtaj Jehová munan chayta ruranayquipaj? y ¿imanotaj logranquiman? Bautizacushgana  caycarpis cay yachachicuyga yanapämäshun guepaman mana cutinapaj, sinoga Jehová munashganno sirvir caycänapaj.

4. Pipis unay cawashganta mana cachariptenga, ¿imanotaj cawan?

⁴ Pipis unay cawashganta mana cachariptenga, quiquinpa munayninta rurar cawan. Chaymi imalapitapis jucla piñacun, quiquilanman yarpan, ali tucun ni agradecicunpischu. Jina videucunacho ganra ruraycunata y mana ali peliculacunatapis ricaräcun. Ichanga shongunchoga alicunata ruraytachi munan, chaymi mana alicunata rurashganpita y rimashganpitapis pësacun. Pero yarpaynincho y ruraynincunacho cambiucunata rurananpäga voluntänin pishin (Gál. 5:19-21; 2 Tim. 3:2-5).

5. Hechos 3:19 textuga, ¿imataj nimanchi unay cawashganchita jaguirinapaj cajpita?

⁵ Juchasapa captinchimi yarpayninchipita y shongunchipitapis mana ali yarpaycunata y mana ali munashganchicunatapis ushajpa ilgächiyta camäpacunchichu. Chaymi öraga imalatapis rurarinchi o parlarinchi, nircur pësacunchi (Jer. 17:9; Sant. 3:2). Unay cawashganchita cachariptinchi ichanga Jehová munashgannona cawar galaycunchi y guepaman mana cutinapaj calpachacunchi (Is. 55:7; leiriy Hechos 3:19).

6. ¿Imanirtaj Jehová nimanchi mana ali yarpaycunata y mana ali costumbricunatapis jaguirinapaj?

⁶ Jehovaga amatar cuyamanchi y ali cawananchipämi munan. Chaymi nimanchi mana ali yarpaycunata y mana ali costumbricunatapis jaguirinapaj (Is. 48:17, 18). Payga musyanmi mana ali munashganchicunata ruraptinchega laquicushunmi y waquincunatapis laquichishunmi. Jina paypis laquicunmi mana alicunata ruraptinchega.

7. Romanos 12:1, 2 nishganno, ¿imatataj lapanchi acrashwan?

⁷ Ali cajcunata ruranapaj calpachacuptinchega maygan castanchicuna y amigunchicunapis burlacunmanchi (1 Ped. 4:3, 4). Y caynopis nimashwanchi ‘quiquiqui munashgayquino cawacunquiman, ¿imanirtaj waquincuna nishushgayquita ruranqui?’ nir. Pero Jehovapa leynincunata mana cäsucojcunaga quiquinmi engañacun. Y Satanaspa  munaynincho caycaj runacunano cawapäcun (leiriy Romanos 12:1, 2). Pero lapanchimi acrananchi: unay cawashganchinolachush cawacuyta munanchi, o Jehovatachush cäsucuyta munanchi ichic ichiclapa ali runaman ticranapaj (Is. 64:8).

8. ¿Ima yanapacuycunataj caycan mana ali yarpaycunata y mana ali costumbricunatapis jaguirinapaj?

⁸ Jehovaga musyanmi mana ali yarpaycunata y mana ali costumbricunatapis jaguirinapäga tiempuwanrämi cananpaj (Sal. 103:13, 14). Pero payga ali yachayta y calpantapis gomanchi cambiucunata ruranapaj, y chaytaga ruran Palabranwan, espiritunwan y sirvejnincunawanpis. Maynachi ricashcanqui imano Jehová yanapäshushcanqui. Canan yachacurcushun imacunatash ruranquiman unay cawashgayquita jaguirinayquipaj, nircur bautizacunayquipaj.

9. ¿Imanotaj Diospa Palabranga yanapäshunquiman?

⁹ Bibliapita shumaj yachacuy. Diospa Palabranga espejo japuymi. Chayga yanaparcushunqui cuentata gocunayquipaj parlashgayquicuna, yarpashgayquicuna y rurashgayquicunapis alichush caycan o manachush (Sant. 1:22-25). Yachachishojniqui y waquin pogushga hermanucunapis Bibliawanmi yanapäshunqui cuentata gocunayquipaj imacunacho ali caycanqui y imacunacho mejoranayquipäpis. Jina yachachishunqui publicaciuncunacho yachachicuycunata ashinayquipaj imano mana ali costumbricunata vencinayquipaj. Y Jehovapis listo caycanmi yanapäshunayquipaj. Payga musyanmi shonguyquicho ima caycashgantapis (Prov. 14:10; 15:11). Chaymi mana yamacaypa Jehovata mañacuy y Palabranpitapis waran waran yachacunayquipaj calpachacuy.

10. ¿Imataj yachacunqui Elie ima pasashganpita?

¹⁰ Diospa mandamientuncuna alapa ali cashganta yarparay. Jehová nimashganchicunaga bienninchipämi caycan. Chaymi mandamientuncunata cäsucojcunaga ali cajcunaman yarpapäcun, ali runacunaman ticrapäcun y cushishgana cawapäcun (Sal. 19:7-11). Shongun munashgalanta rurajcuna ichanga nacaycarla cawapäcun. Elie jutiyoj runa nishganman yarpachacuy, payga wilacamun imatash pasanman Jehovata mana cäsucurga. Taytancunash Jehovata cuyaptinpis, payga mozularaj caycar mana ali amiguncunawan shuntacaj. Drogatapis shoguytash galaycurgan, jucwan jucwan cacurgan y suwacurpis galaycurganshi. Imalapitapis jucla piñacurshi, waquincunata magaytaraj munaj. Payga nin: “Juc cristiano mana rurananpaj cajcunata rurargä”. Ichanga wamralaraj captin taytancuna yachachishgantaga manashi gongarganchu. Chayshi tiempuwan yapay Bibliapita yachacur galaycorgan. Imaycanopapis calpachacurganshi mana ali ruraynincunata jaguirinanpaj, chaymi 2000 watacho bautizacorgan. ¿Imanotaj Elieta yanapashga Diospa mandamientuncunata cäsucushganpita? Payga nin: “Jauca jaucala cawacö y concienciäpis alimi caycan”. * Chauraga Elie nishgannopis, Jehovata mana cäsucojcunaga mana alichomi ushan. Pero pipis cambiayta munaptenga Jehová yanapangami.

11. ¿Ima ruraycunatataj Jehová chiquin?

¹¹ Jehová chiquishgancunata chiquiy (Sal. 97:10). Bibliami nin Jehovaga “alli-tucojcunata, llullacunata, alli goyäcoj runata wañuchejta” chiquin (Prov. 6:16, 17). Payga “sakyapakuq runakunata y wanutsikuq runakunataqa”  manami chasquinchu (Sal. 5:6). Chay ruraycunataga Jehová alapami melanäcun. Chaymi Noé cawashgan wichan fiyu runacunata ushacächergan (Gén. 6:13). Jina Malaquías profetanwanmi wilachicurgan pipis majanta jarucuptin divorciacunanpaj chiquishganta. Chayno runacunapa aduraciunnintaga Diosninchi manami chasquinchu, paycunata cuentata mañanga (Mal. 2:13-16; Heb. 13:4).

12. ¿Ima ninantaj Jehová chiquishgan ruraycunata chiquinapaj?

¹² Jehovaga nimanchi: “Mana allicunata ruranayquipäga yarpayllapis ama yarpaychu” (Rom. 12:9). Cayga ninanmi lapan mana ali ruraycunata chiquinapaj o melanapaj. Pipis ismush micuyta micunapaj nimaptinchega, chaytaga yarpaylapis yarpanchichu micunapaj ¿au? Y öraga ‘atataj pitaj chayta micunga’ ninchirämi. Chaynolami yarpaylapis yarpashwanchu Jehová chiquishgan ruraycunata ruranapaj. Chaycunataga pasaypa melanashwanmi.

13. ¿Imanirtaj ali cajcunalaman yarparashwan?

¹³ Cuidacuy imacunamantaj yarparanqui. Ima yarpashganchicunapitami rurayninchicuna caycan. Chaymi Jesusga nergan mana ali yarpaycunapita cuidacunapaj, chaycunaga juchacunamanmi ishquichimäshun (Mat. 5:21, 22, 28, 29). ¿Manachu Taytalanchi Jehovata cushichiyta munanchi? Chauraga umanchipita ima mana ali yarpaycunatapis jucla jorgushwan.

14. ¿Imatataj rimashganchicunacho ricacämun, y imacunatataj tapucunanchi?

¹⁴ Shumaj yarpachacur-raj parlay. Jesusga nergan: “Rimashanchïcunami ichanga shongunchïcho yarpashanchïpita yargamun” (Mat. 15:18). Chayga rasunmi. Shongunchicho ima caycashganpitami rimanchi. Tapucuy: “¿Imaypis rasun cajlatachu parlä quiquëpa mana ali captinpis? Casado captëga, ¿shumajchu tantiä majäpa trucan pilawanpis alapa parlaptëga mana ali cashganta? Runacuna jucwan jucwan cacushganpita parlayta galaycuptin, ¿juclachu witicö? ¿Pipis rabiachimaptenga ali shimilapachu parlapä?”. Chay tapucuycunaman yarpachacuy. ¿Manachu botuncuna yanapacun ropanchi ali camaränanpaj? Ichanga mana captenga facilmi caycan lojtirinapaj. Rimashganchicunapis botoncuna japuymi caycan. Chauraga ali shimilapa, rasun  cajlata parlanapaj calpachacuptinchega, facilmi canga unay cawashganchita jaguirinapaj.

15. ¿Imatataj rurashwan unay cawashganchino manana cawanapaj?

¹⁵ Valurcharcuy cambianayquipaj. Apóstol Pabluga juc tantiachicuywanmi shumaj tantiachicurgan alapa ali cashganta cambiucunata ruranapaj. Payga nergan unay cawayninchita guerucho Jesusta wanuchishganno wanuchinapaj (Rom. 6:6). Jesusga Taytanta cushichiyta munarmi guerucho clavananpaj permitergan. Chaynolami noganchipis Jehovata cushichiyta munarga calpachacushun mana ali ruraycunata y mana ali costumbricunatapis chipyaj ushacächinapaj. Chaycunata ruraptinchirämi conciencianchipis ali caycanga y shamoj tiempuchopis ali cawayta chasquishun (Juan 17:3; 1 Ped. 3:21). Cayta yarpäshun: Jehovapa leynincunaga manami imaypis cambianchu. Chaymi payga shuyaran cambiucunata ruranapaj y munashganno cawanapaj (Is. 1:16-18; 55:9).

16. ¿Imanirtaj calpachacunquiman mana ali munayniquicunata vencinayquipaj?

¹⁶ Mana ali munayniquita vencinayquipaj calpachacuy. Bautizashgana caycarpis jinala luchaycanquiman mana ali munayniquicunata vencinayquipaj. Maurício imapa pasashganta yarpachacuy, payshi joven caycar warmino comportacoj. Ichanga tiempuwan Jehovapa testiguncunatash reguirgan y Bibliapitami yachacur galaycorgan. Chaura cawayninchoshi cambiucunata rurargan y 2002 watacho bautizacorgan. Achca watapana Jehovata sirviycarpis, payga nin: “Öraga luchaycärämi mana alicunaman mana ishquinäpaj”. Pero chaycunalamanga manami yarparäcunchu, caytapis nin: “Mana ali munashgäcunata mana ruranäpaj calpachacuptëga, Jehová nogawan caycashganta musyä y chayga cushichimanmi”. *

17. Nabiha warmi ima pasashganpitaga, ¿imataj yachacunqui?

¹⁷ Jehovata ruwacuy espiritunta goycushunayquipaj, quiquilayquimanga yäracuychu (Gál. 5:22; Filip. 4:6). Shumajrämi calpachacunayqui unay cawashgayquita jitargärinayquipaj y guepaman mana cutinayquipaj. Nabiha jutiyoj warmita ima pasashganta ricärishun. Sojta watayojla caycaptinshi taytan jaguirergan. Payga nin: “Chayga alapa  sasami cashga, waran waran laquishgala cacoj cä”. Más jatunyarcuptinshi imalapitapis rabiacoj y pitapis magaytash munaj. Nircur drogacunatapis ranticur galaycorgan, chayraycurshi carcelcho achca watacuna caycargan. Chaura carcelchoshi Testigucunawan Bibliapita yachacur galaycorgan y cawaynincho cambiucunata rurargan. Payga nin: “Waquin cambiucunataga jucla rurargä. […] Cigarro mucayta jaguinäpaj ichanga sasarämi cashga”. Juc watapitapis masräshi pasargan cigarro mucayta jaguirinanpaj. ¿Imanotaj logrargan? Cayno wilacun: “Jehovata cutin cutin mañacoj cä yanapämänanpaj. Cananga musyämi pipis Jehovata cushichiyta munarga, cambiucunata rurayta puedinmi. Noga chayta rurargä, chaura waquincunapis puedinmi”. *

18. 1 Corintios 6:9-11 nishganno, ¿imatataj achca runacuna rurargan Jehovata sirvinanpaj?

¹⁸ Unay tiempucho waquin warmi y runacuna Diosta manaraj sirviptin, majanta jarucur cawacärej, jucwan jucwan cacärej y juccunaga suwacoj cargan. Pero Jehovapa santo espiritunpa yanapacuyninwanga lapan mana ali costumbrincunata y mana ali yarpaynincunatapis chipyaj cambiargan. Chaymi Jehová waquincunata acrargan cielupita Jesuswan gobernapäcamunanpaj (leiriy 1 Corintios 6:9-11). Canan wichanpis aypala runacuna Bibliapita yachacur cawaynincunacho cambiucunata rurargan. * Lapan mana ali costumbrincunata cacharergan. Chauraga gampis unay cawashgayquita jaguiriyta puedinquimi, chaynopa nircur bautizacunayquipaj.

19. ¿Imatataj gatejnin yachachicuycho ricashun?

¹⁹ Pipis bautizacuyta munarga manami unay cawashganlatachu jaguirinman, sinoga calpachacunman Jehová munashganno imaypis cawananpaj. Gatejnin yachachicuycho ricashun imanomi chayta rurashwan y waquincuna imano yanapämänanchipaj cajtapis.