1. Bibliata manaraq estudiarqa, ¿imanötan kawakurqantsik?

 JEHOVÄPA TESTÏGUNKUNAWAN Bibliata manaraq estudiarqa, ¿imanötan kawakurqëki? Wakinkunaqa manam yarpëllatapis munayantsu. Itsachi kë munduchö nunakunanölla pensarqantsik y portakurqantsik. Tsënö kashqa kaptinqa, shamoq tiempupaq shuyakuyninnaq y Diosninnaqmi këkarqantsik (Efes. 2:12). Peru Bibliata estudiar qallëkushqam tsëqa cambiarirqan.

2. ¿Imatataq Bibliata estudianqëkimannö yachakurqëki?

² Bibliata estudianqëkimannömi, Diosnintsik alläpa kuyashunqëkita yachakurqëki. Jehovä munanqannö kawëta munarnin y pëta sirweqninkunawan juk familianölla këta munarninqa, jukläyana kawanëkipaq y pensanëkipaq kaqtam alli entiendirqëki. Dios mandakunqankunata respetanëkipaqmi kallpachakunëki karqan (Efes. 5:3-5).

3. (1) Colosensis 3:9 y 10 ninqannö, ¿imata ruranatataq Jehoväqa munan? (2) ¿Imata ruranapaqtan këchö yachakunqantsik yanapamäshun?

³ Kamamaqnintsik y Teytantsik kaptinmi, Jehoväqa familianchö kaqkuna imanö portakuyänampaq kaqta decidin. Y bautizakuyta munaqkunatam kënö nin: “Unë imanö kayanqëkita rurëninkunatawan imëka röpatanö qotukuyë” * (leyi Colosensis 3:9, 10). ¿Qamqa bautizakuyta pensëkankiku? Këchö yachakunqantsikmi, kë kiman tapukuykunata contestanëkipaq yanapashunki: ¿imatan ‘unë imanö kanqantsikqa’?, ¿imanirtan Jehoväqa ‘unë imanö kanqantsikta’ imëka röpatanö qotukunantsikta munan? y ¿imanötan tsëtaqa lograshun? Y bautizakushqana karqa, ‘unë imanöpis kanqantsik’ noqantsikchö  yapë mana yurinampaqmi yanapamäshun.

4. Unë imanöpis kanqan dominananta dejaqqa, ¿imatataq ruran?

⁴ ‘Unë imanöpis kanqan’ dominananta dejaqqa, jutsasapa kanqanmannömi imatapis pensan y ruran. Itsa raslla cölerakoq, kikinllaman pensaq, mana agradecikoq y orgullösu kanman. Itsa revistakunachö, videukunachö o pelïculakunachö qalapächu këkaqkunata, pununakuykaqta o maqanakuykaqkunata rikë gustanman. Itsa alli nuna kanman y itsa ninqankunapita y ruranqankunapita llakikunman, peru cambianampaqqa kallpachakunmantsu (Gäl. 5:19-21; 2 Tim. 3:2-5).

5. Unë imanö kanqantsikta dejëpitaqa, ¿imatataq yarpänantsik? (Hëchus 3:19).

⁵ Imachöpis pantareq karmi, mana alli pensëkunata y mana alli munëkunataqa pensënintsikpita y shonquntsikpita chipyëpaqa ushakätsita puëdintsiktsu. Höraqa, imata ninqantsikpita o ruranqantsikpitam llakikuntsik (Jer. 17:9; Sant. 3:2). Peru unë imanö kanqantsikta dejarishqaqa, mananam mana alli munëkuna y pensëkuna dominamäshunnatsu y manam unë imanö kanqantsikpita reqimäshunnatsu (Is. 55:7; leyi Hëchus 3:19).

6. ¿Imanirtan Jehoväqa mana alli pensamientukunata y mana alli costumbrikunata dejanapaq nimantsik?

⁶ Jehoväqa alläpa kuyamarnintsik y alli kawakunata munarmi, mana alli pensëkunata y costumbrikunata dejanapaq nimantsik (Is. 48:17, 18). Pëqa musyanmi mana alli munënintsikkuna dominamashqaqa, kikintsikpaq mana alli kanampaq kaqta y wakinkunata llakitsinapaq kaqta.

7. Romänus 12:1 y 2 ninqannö, ¿imatataq decidinantsik?

⁷ Itsa familiantsikchö kaqkuna y amïguntsikkuna cambianapaq kallpachakuykanqantsikpita burlakuyanman (1 Pëd. 4:3, 4). Itsa munanqantsiknö kawakunapaq derëchuyoq kanqantsikta y imata ruranapaq o mana ruranapaq ni pï nimänapaq kaqta nimashwan. Peru Jehovä mandakunqankunata mana ruraqkunaqa, manam rasumpatsu libri kayan. Rasumpa kaqchöqa, Satanaspa makinchö këkaq mundu controlanantam dejayan (leyi Romänus 12:1, 2). Satanas controlanqan mundupita y jutsata ruraq kanqantsikpita  shamoq unë imanöpis kanqantsiknölla kakunapaq, o kanan witsampita mas alli nuna kanapaq Jehovä yanapamänata permitinapaqmi, cada ünu decidinantsik (Is. 64:8).

8. ¿Imatan yanapamäshun mana alli pensëkunata y costumbrikunata dejanapaq?

⁸ Jehoväqa allim musyan mana alli pensëkunata y costumbrikunata dejanapaqqa, tiempupaqraq kanqanta y alliraq kallpachakunantsikpaq kaqta (Sal. 103:13, 14). Tsënö kaptimpis, cambianapaqmi Pëqa yachaq kanapaq y kallpayoq kanapaq Palabranwan, poderninwan y sirweqninkunawan yanapamantsik. Jehova imanö yanapashunqëkitaqa rikarqunkinachi. Qateqnin kaq pärrafukunachömi, unë imanö kanqëkita dejarnin sïguinëkipaq y bautizakunëkipaq imata ruranëkipaq kaqta rikäshun.

9. ¿Imata ruranëkipaqtan Diospa Palabran yanapashuynikita puëdin?

⁹ Imanö këkanqëkita rikänëkipaq Bibliata alli estudië. Diospa Palabranqa imëka espëju cuentam, tsëmi imanö pensanqëkita, parlanqëkita y portakunqëkita rikänëkipaq yanapashunki (Sant. 1:22-25). Bibliapita yachëkätsishoqniki y Diosta unëpana sirweq wawqi panikunam yanapashuynikita puëdiyan. ¿Imanö? Bibliachö ninqanwanmi imachö alli y imachö pishipëkanqëkita rikänëkipaq yanapayäshunki. Y mana alli costumbrikunata dejanëkipaqmi, publicacionkunachö consëjukunata ashinëkipaq yachatsiyäshunki. Y Jehoväqa listum këkan yanapashunëkipaq. Pëllam shonquntsikchö ima kanqanta musyan y yanapamënintsikta munan (Prov. 14:10; 15:11). Tsëmi Diosman llapan junaqkuna mañakunëkipaq y Palabran Bibliata estudianëkipaq churapakänëki.

10. ¿Imatataq Eliëta pasanqampita yachakunki?

¹⁰ Jehovä mandamanqantsikkunalla imapitapis mas alli kanqanta següru kë. Jehovä imatapis nimanqantsikqa biennintsikpaqmi. Mandamientunkunata respetaqkunaqa, kikinkunam mas alliqa kayan y imarëkur kawëkäyanqantam musyayan y mas kushishqam kayan (Sal. 19:7-11). Peru mana respetaq kaqkunaqa, mana alli munëninkunata rurarmi mana allichö ushayan. Dios mandakunqankunata mana wiyakoqkuna imakunapa pasayanqanta Elië jutiyoq nuna willakunqanta rikärishun. Pë jövin këkaptin Jehoväta teytankuna kuyëkäyaptimpis, mana alli amïgunkunawanmi ëwakurqan. Drögakunata utilizar, jukwan jukwan kakur y suwakurmi qallëkurqan. Mana alli geniuyoq y mas maqakoqshi tikrakurinaq. Kënömi nin: “Ichiklla parlakuychöqa, Diosta sirweqkuna mana rurayänampaq kaqtam rurëkarqä”. Peru wamrallaraq këkaptin teytankuna yachatsishqa kayanqantaqa manam qonqarqantsu. Tsëmi tiempuwanqa, Bibliata yapë estudiar qallëkurqan. Viciunkunata dejanampaqmi kallpachakurqan y 2000 watachömi bautizakurirqan. Jehovä mandakunqankunata wiyakuyqa, ¿imanötan vïdanchö yanapashqa? Pëmi kënö nin: “Kananqa tranquïlum kawakü y alli concienciayoqmi kä”. * Eliëta pasanqannömi, mandakunqankunata mana wiyakoqkunaqa kikinkuna sufriyan. Peru Jehoväqa cambiayänampaqmi yanapëta munan.

11. ¿Imakunatataq Jehoväqa chikin?

¹¹ Jehovä chikinqanta chikita yachakuy (Sal. 97:10). Bibliachöqa, nuna mayinta mana kaqpaq churaqta, ulikoqta y jutsannaq nunata wanutseqta Jehovä chikinqantam nin (Prov. 6:16, 17). Jina ‘maqakoqkunata y engañakoqkunatam’  melanan (Sal. 5:6, TNM). Jehoväqa Noëpa tiempunchö tsënö pensaqkuna y portakoqkuna entëru Patsachö mana allita miratsishqa kayaptinmi, pëkunata melanar ushakätsirqan (Gen. 6:13). Jina divorciakuyta munar jutsannaq majankunata engañaqkunatapis Jehoväqa chikinmi, tsëtam willakoqnin Malaquïastawan willatsikurqan. Jehoväqa manam tsënö nunakuna adorayanqanta chaskintsu y cuentatam mañanqa (Mal. 2:13-16; Heb. 13:4).

12. ¿Ima ninantan mana alli rurëkunata melanëqa?

¹² Jehoväqa këtam mandamantsik: “Alläpa mana alli kaqta melanäyë” (Rom. 12:9). Melanëpaq neq palabraqa, imatapis rikëkur o muskïkur shonquntsik jitanëta munanqampaqmi yarpätsimantsik. Pensarishun, ¿imanöraq karishwan pochqushqa mikuyta mikunapaq nimashqaqa? Tsëman pensashqallam shonquntsikpis jitanärin. Tsë cuentallam, ima rurëkuna mana alli kanqanta Jehovä nimanqantsikman pensëllatapis alläpa melanashwan.

13. ¿Imanirtan imaman pensanqantsikta alli rikänantsik?

¹³ Imakunaman pensanqëkita alli rikë. Imamampis pensanqantsikpitam imatapis rurantsik. Tsëmi Jesusqa, jutsa rurëman chätsimänapaq kaqkunaman mana pensanapaq consejamarqantsik (Mat. 5:21, 22, 28, 29). Noqantsikqa, Teytantsik Jehovä kushishqa kanantam munantsik. Tsëqa mana alli pensëkuna chämunqan höram, juk asuntukunaman pensëta procurashun.

14. ¿Imanö kanqantsiktataq imatapis parlanqantsik rikätsikunman y ima tapukuykunamantan yarpachakushwan?

¹⁴ Shimikita alli tsarë. Jesusmi kënö nirqan: “Shimipita yarqamoqqa shonqupitam yarqamun” (Mat. 15:18). Awmi, imatapis parlanqantsikqa shonquntsikchö ima kanqantam rikätsikun. Kë tapukuykunaman pensanëkipaq tiempuykita patsätsi: “Mana allichö quedanä kaptimpis, ¿rasumpa kaqllataku parlä? Casädu karqa, ¿pitapis enamorëpa mana tratanäpaqku churapakarqö? Muyakoq o shukukoq qeshyapitanöku, ¿mana alli rurëkunapaq parlëkunapita cuidakü? Pipis cöleratsimaptinqa, ¿alli shimïpaku parlapä?”. Parlakunqëkiqa botonarëkaq ropëkinömi kanman. Röpëkita cambiakunëkipaqqa, puntataqa botonkunataran jorqunëki. Tsënöllam insultakuypa, mana rasumpa kaqta y mana allikunata mana  parlanapaq kallpachakushqaqa, röpantsikta botonkuna mana tsaraqtanömi unë imanö kanqantsikta röpa cuentatanö jorqakurishun.

15. ¿Imatataq ruranantsik unë imanöpis kanqantsikta qeruman clavaq cuenta kanapaq?

¹⁵ Ruranëkipaq churapakanqëkikunata jinan höra rurë. Apostol Pabluqa, imanir jinan höra cambianapaq kaqtam juk igualatsikuywan entienditsikurqan. Unë imanö kanqantsikta qeruman clavaq cuenta kanapaqmi nimarqantsik (Rom. 6:6). Jesusqa Jehovä kushishqa kananta munarmi, qeruman clavayänanta permitirqan. Tsënöllam, Diosnintsik kushishqa kananta munarqa, mana alli pensëkunata y costumbrikunata dejanapaq kallpachakunantsik. Tsëta rurashqallam, alli concienciayoq kashun y mana wanushpa kawakuyta shuyaräshun (Juan 17:3; 1 Pëd. 3:21). Yarpäshun, Jehoväqa manam kushishqa kanapaqtsu mandakunqankunata cambianqa. Tsëpa rantinqa, mandakunqannö kawanapaqmi noqantsik cambianantsik (Is. 1:16-18; 55:9).

16. ¿Imanirtan pishipanqantsikkunachö alliyänapaq kallpachakurnin sïguinantsik?

¹⁶ Pishipanqëkichö alliyänëkipaq kallpachakurnin sïgui. Bautizakurirpis, mana alli munëkunaman mana pensanëkipaqqa kallpachakurmi sïguinëki. Jövin kanqampita ollqu mayinwan pununakoq Mauriciu pasanqanman pensarishun. Jehoväpa testïgunkunatam reqirirqan y Bibliata estudiarmi qallëkurqan. Unë mana alli rurëninkunatam dejarirqan y 2002 watachömi bautizakurirqan. Jehoväta mëtsika watapana sirwikarpis kënömi nin: “Mëtsika kutim kallpachakurqö mana alli munëkunaman mana pensanäpaq”. Peru tsëkuna qelanäratsinantaqa manam permitintsu, tsëmi kënö nin: “Tsë mana alli munëkunaman mana yarparäkunqäpita Jehovä kushishqa kanqanta musyëqa alläpam yanapaman”. *

17. Nabiha cambianqampitaqa, ¿imatataq yachakuntsik?

¹⁷ Ama kikikillamanqa confiakuytsu, poderninwan Jehovä yanapëkushunëkipaq mañakuy (Gäl. 5:22; Filip. 4:6). Unë imanö kanqëkita röpatanö qotukunëkipaq y yapë mana churakunëkipaqqa, alliran kallpachakunëki. Nabiha jutiyoq warmita ima pasanqanta rikärishun. Joqta watayoq këkaptinllaran teytanqa jaqirir ëwakurqan. Pëmi kënö willakun: “Tsëta ruranqanqa alläpam llakitsimarqan”.  Winanqanmannömi mas mana alli geniuyoq y maqakoq tikrakurirqan. Drögakunatam rantikur qallëkurqan, tsëmi prësuyarqan y carcelchö atska watakuna llawirarqan. Tsë carcelman yachatsikoq ëwaq Testïgukunawanmi, Bibliapita yachakur qallëkurqan. Tsëmi imëkachö cambiar qallëkurqan. Pëmi kënö willakun: “Wakin viciukunataqa rasllam dejarirqä. […] Peru cigärru shoquyta dejëqa, manam fäciltsu karqan”. Juk watapitapis mas kallpachakur-ran tsë viciuta dejarqan. ¿Imanötan tsëtaqa lograrqan? Pëmi kënö nin: “Jehoväta kutin kutin mañakur-raqmi tsëtaqa lograrqä”. Y kënö nirmi usharin: “Jehovä kushishqa kanampaq noqa cambiashqa këkaptïqa, pï mëpis cambiëta puëdinmi”. *

18. 1 Corintius 6:9 a 11 ninqannö, ¿imatataq Diosta mëtsikaq sirweqkuna lograyashqa?

¹⁸ Cristuwan gobernayänampaq punta cristiänukuna witsan Jehovä akranqan ollqukuna y warmikunaqa, manaraq cristiänu karninqa mana allikunatam rurashqa kayarqan. Wakinqa, mana majankunawan kakoq, ollqupura o warmipura kakoq y ladronmi kayarqan. Tsënö kaptimpis, poderninwan Jehovä yanapaptinmi, mana alli rurëninkunata dejayarqan (leyi 1 Corintius 6:9-11). Kanan witsampis, mëtsikaq nunakunam Bibliata estudiarnin mana alli costumbrinkunata dejayashqa. * Pëkuna cambiayanqanqa, bautizakunëkipaq cambiëta y viciukunata dejëta puëdinëkipaq kaqtam rikätsishunki.

19. ¿Imatataq qateqnin kaqchö yachakushun?

¹⁹ Unë imanöpis kayanqanta dejayänampaq kallpachakurpis, bautizakuyta munaqkunaqa mushoq imanöpis këta imëka röpatanö vistikuyänampaqmi kallpachakuyänan. Qateqnin kaqchömi, tsëta imanö ruranapaq kaqta y wakinkuna imanö yanapamänapaq kaqta yachakushun.