1. ¿Imaynataq vidanchik karqa bibliata manaraq estudiachkaptinchik?

 ¿IMAYNATAQ vidanchik karqa testigokunawan manaraq bibliata estudiachkaptinchik? Wakiqninchikqa yuyariytapas manam munanchikchu. Hawa runakuna hinam kawsakurqanchik, Diostapas manam riqsirqanchikchu (Efes. 2:12). Bibliata estudiayta qallaykuspanchikmi ichaqa allinña kawsakurqanchik.

2. ¿Imakunatam ruwarqanchik bibliata estudiayta qallaykuspa?

² Bibliata estudiayta qallaykuspanchikmi ichaqa yacharurqanchik, Diosninchikqa anchata kuyawasqanchikta. Chaymi Jehova Diosta kusichinapaqwan runankunawan hukllawakunapaqqa, ñawpaq vidanchikta saqinanchik karqa. Jehova Diospa kamachikuyninkunatam kasukunanchik karqa (Efes. 5:3-5).

3. (1) ¿Ima ruwananchiktam Jehova Diosqa munan Colosenses 3:9, 10 nisqanman hinaqa? (2) ¿Imapaqmi kay yachachikuyqa yanapawasun?

³ Jehova Diosninchik unanchawaqninchik kasqanraykum, paypa munasqanman hina kawsakunanchik. Chaymi bautizakuyta munaqkunataqa kaynata nin: “Saqiychikyá ñawpa vidaykichikta hinaspa tukuy mana allin ruwasqaykichikta”, nispa * (leey Colosenses 3:9, 10). ¿Imaynataq ñawpaq vidanchikqa karqa? ¿Imaynanpitaq Jehova Diosqa munan ñawpaq vidanchikta saqinanchikta? ¿Imaynatam ñawpaq vidanchikta saqichwan? Bautizakuyta munaptikiqa kay yachachikuymi yanapasunki chaykunamanta yachanaykipaq.  Bautizasqaña kaptinchikpas, kay yachachikuymi yanapawasun ñawpaq vidanchikman mana kutinanchikpaq.

4. ¿Imaynam ñawpaq vidanman kutiq runaqa?

⁴ Pipas ñawpaq vidanman kutiqqa aychaman hinam ruwan, aychaman hinam piensan. Chayna runaqa piñakuqllañam, mana agradesekuqllañam, hatun tukuqllañam. Wakinpiqa qalalla kaqkunatam qawakun, videopipas huchapakuykunatawan maqanakuykunallatam qawakun. Ichapas chay runaqa chay ruwasqankunamanta ukunpi ñakakun, ichaqa manam kallpanchakunchu piensasqankunatawan ruwasqankunata saqinanpaqqa (Gal. 5:19-21; 2 Tim. 3:2-5).

5. ¿Ñawpaq vidanchikta saqiyqa qalaypaq mana pantaychu? (Rimarimuytaq Hechos 3:19 nisqanmantapas).

⁵ Pantaq kasqanchikraykum wakinpiqa hinalla mana allinkunata piensanchik, mana allinkunata sunqunchikpi munanchik. Wakinpiqa mana allinkunata rimaruspam ñakakunchik (Jer. 17:9; Sant. 3:2). Ñawpaq vidanchikta saqiruspanchikmi ichaqa, mana allin ruwaykunawanqa manaña aysachikusunñachu (Is. 55:7; leey Hechos 3:19).

6. ¿Imaynanpitaq Jehova Diosqa niwanchik ñawpaq vidanchikta saqinanchikpaq?

⁶ ¿Imaynanpitaq Jehova Diosqa niwanchik ñawpaq vidanchikta saqinanchikpaq? Kuyawasqanchikraykum, allin kawsakunanchikta munasqanraykum (Is. 48:17, 18). Payqa manam munanchu mana allinta kawsakuspanchik mana allinman chayananchiktaqa, hukkunatapas ñakarichinanchiktaqa. Imapas sasachakuyman chayaruptinchikqa payqa ancha-anchatam llakikun.

7. ¿Imatam tantiakunanchik Romanos 12:1, 2 nisqanman hinaqa?

⁷ Wakinpiqa ayllunchikkunawan amistadninchikkunapas asikuwasunchá ñawpaq vidanchikta saqinapaq kallpanchakusqanchikrayku (1 Ped. 4:3, 4). Wakinpiqa ichapas niwasun munasqanchikman hina kawsakunapaq, ichaqa Jehova Diosta qipanchaqkunaqa sasachakuypim tarikunku. Paykunaqa satanaspa munasqantam ruwanku (leey Romanos 12:1, 2). Llapallanchikmi  tantiakunanchik, ñawpaq vidanchikman kutispa satanaspa munasqanta ruwanapaq utaq Jehova Diosman hapipakuspa allin runaña kanapaqpas (Is. 64:8).

8. ¿Imaynatam Jehova Diosqa yanapawanchik mana allin piensaykunatawan mana allin ruwaykunata saqinanchikpaq?

⁸ Mana allin piensasqanchikkunatawan mana allin ruwasqanchikkunata saqinapaqqa tiempochakuspam kallpanchakuna, chayta ruwananchiktam Jehova Diospas munan (Sal. 103:13, 14). Payqa yanapawanchiktaqmi palabranwan yachayta quwaspanchik, atiyninwan kallpata quwaspanchik, testigonkunawan yanapawaspanchik. Qawarqanchikñachá Jehova Diospa imayna yanapawasqanchiktaqa. Qatiqninpim yachachkasunchik ñawpaq vidanchikta saqispa bautizakunapaq imata ruwanamanta.

9. ¿Imapaqmi yanapawachwan Diospa palabranqa?

⁹ Imayna kasqanchikta yachananchikpaqyá bibliata leesun. Diospa palabranqa espejo hinam, yanapawanchikmi piensasqanchikpas, rimasqanchikpas, ruwasqanchikpas imayna kasqanta yachananchikpaq (Sant. 1:22-25). Diosmanta yachachiwaqninchikwan wakin iñiqkunapas yanapawachwanmi. Yanapawachwanmi imakunapi allinña kasqanchikta, imakunapi kallpanchakunanchikraq kasqanta yachananchikpaq. Yanapawachwantaqmi mana allin ruwaykunata saqinanchikpaq yachachikuykunata maskaypipas. Jehova Diospas chayllam kachkan yanapaykuwananchikpaq. Sunqunchikpi ima kasqanta yachasqanraykum, payqa aswan allinta yanapawasun (Prov. 14:10; 15:11). Chaypaqqa, payta mañakuspam sapa punchaw palabranta estudiananchik.

10. ¿Imatam Eliepa vidanmanta yachachwan?

¹⁰ Amayá iskayrayasunchu Jehova Diospa kamachikuyninkuna allinninchikpaq kasqanmantaqa. Jehova Diosqa imatapas niwanchik allinninchikpaqmi. Pipas kasukuqqa kikintam kuyakun, allintam kawsakun, kusisqam kawsakun (Sal. 19:7-11). Mana kasukuqkunam ichaqa llumpayta ñakarinku, Elie sutiyuq runatapas chaynam pasarqa. Paypa tayta-mamanqa Diosman sunqus kasqaku, ichaqa mana allin amistadkunawansi payqa pasakusqa. Hinaspas drogakuyllapi kasqa, huchallapi kasqa, suwakuyllapi kasqa. Chayna kawsakusqanraykus piñakuqllaña, maqakuqllaña rikurirusqa. Paymi nin: “Mana ruwanay kaqkunatam ruwarqani”, nispa. Ichaqa manas qunqasqachu tayta-mamanpa yachachisqantaqa. Chaysi bibliata kaqmanta estudiananpaq kallpanchakusqa. Mana allin ruwasqankunata saqispansi 2000 watapi bautizakusqa. ¿Yanaparqachu Elieta Diospa kamachikuyninkunata kasukuyninqa? Paymi nin: “Kunanqa hawkañam tarikuni, manañam imamantapas ñakakunichu”, nispa. * Diospa kamachikuyninkunata mana kasukuqkunaqa Elie hinam ñakarinku. Ichaqa Diosninchikqa chayllam kachkan yanapaykuwananchikpaq.

11. ¿Imakunatam Jehova Diosqa chiqnin?

¹¹ Jehova Diospa chiqnisqan kaqkunatayá chiqnisun (Sal. 97:10). Bibliapim niwanchik Jehova Diosqa hatun tukuqkunata, llullakuqkunata, runa wañuchiqkunata  chiqnisqanmanta (Prov. 6:16, 17). Nintaqmi peleollapi kaq runatawan engañaq runataqa chiqnisqanmanta (Sal. 5:6). Jehova Diosqa chayna runakunataqa chiqninmi, chayraykum Noeypa tiemponpi mana allin runakunatapas chinkarachirqa (Gen. 6:13). Chiqnintaqmi warminta saqispa hukwan kakuqkunatapas, chaytam willachirqa serviqnin Malaquiaswan. Chayna runakunataqa Jehova Diosqa manam chaskinchu. Paykunamantaqa cuentatam mañanqa (Mal. 2:13-16; Heb. 13:4).

12. ¿Ima ninantaq mana allin ruwaykunata chiqniyqa?

¹² Jehova Diosmi niwanchik: ‘Chiqniychikyá mana allin kaqtaqa’, nispa (Rom. 12:9). Puchqusqa utaq quqarasqa mikuyta mikunanchikpaq niwaptinchik, ¿mikuchwanchu? Manam munachwanchu, millakuchwanmi ¿aw? Chaynatam millakunanchik utaq chiqninanchik Jehova Diospa chiqnisqan mana allin ruwaykunataqa.

13. ¿Imaynanpitaq imayna piensasqanchikta qawarikunanchik?

¹³ Imapas piensasqanchikkunatam qawarikunanchik. Imatapas ruwanapaqqa puntataraqmi piensanchik, chayraykum Jesuspas niwarqanchik huchaman apaqninchik mana allin piensaykunata saqinapaq (Mat. 5:21, 22, 28, 29). Ñuqanchikqa taytanchik Jehova Diosta kusichiytam munanchik, chayraykum mana allin piensaykunataqa chaylla saqinanchik.

14. ¿Imapim qawakun imayna kasqanchik? ¿Imakunatam nikunanchik?

¹⁴ Rimasqanchiktayá qawarikusun. Jesusmi nirqa: “Simimanta lluqsiqmi ichaqa sunqumanta lluqsimun”, nispa (Mat. 15:18). Awriki, chaynam. Rimasqanchikkunapim qawakunqa imayna runa kasqanchik. Chayraykum nikunanchik: “¿Chiqaptachu rimani mana allinniypaq kaptinpas? ¿Warmiymanta huk warmikunawanchu asikachachkani? ¿Chiqninichu huchapakuymanta rimaykunata? ¿Sumaqllatachu rimani pipas piñachiwaptin?”, nispa. Tiempochakusunyá chaykunapi yuyaymananapaq. Ninaqa waykusqaqa astawanmi lenguan, mana waykusqam ichaqa mana, yaqa chaynam imapas mana allinkunata ruwaptinchikqa ñawpaq vidanchik astawan qawakunqa.

15. ¿Imatam ruwananchik ñawpaq vidanchikta qirupi warkunapaq?

 ¹⁵ Tantiasqanchikman hinayá ruwasun. Apostol Pablom nirqa imaynapas ñawpaq vidanchikta saqinapaq. Nirqam ñawpaq vidanchikta qirupi warkuchkaq hina saqinamanta (Rom. 6:6). Jesuspas Diospa munayninta ruwananpaqmi qirupi warkusqa karqa. Chaynam ñuqanchikpas Diospa munayninta ruwanapaqqa ñawpaq vidanchikta saqinanchik. Chayta ruwaspallam hawkaqa kasun hinaspa wiñay kawsaytaqa haypasun (Juan 17:3; 1 Ped. 3:21). Jehova Diosqa kamachikuyninkunataqa manam ñuqanchikpa munasqanchikman hinachu churanqa, aswanqa ñuqanchikmi paypa kamachikuyninpa nisqanman hina kawsananchik (Is. 1:16-18; 55:9).

16. ¿Imaynanpitaq hinalla kallpanchakunanchik mana allin ruwaykunaman mana wichiykunapaq?

¹⁶ Hinallayá kallpanchakusunchik mana allin ruwaykunaman mana wichinanchikpaq. Bautizakuruspanchikpas hinallam kallpanchakunanchik mana allin ruwaykunata saqinapaq. Rimarisunchik Mauriciomanta, payqa qarimasillanwanmi kakuq. Chaymantam testigokunata riqsiruspan bibliata estudiayta qallaykurqa. Chay mana allin ruwayninkunata saqispanmi 2002 watapi bautizakurqa. Achka wataña Diosta servichkaspanpas kaynatam nin: “Achka kutipim yaqalla ñawpaq vidayman kutirurqani”, nispa. Chaywanpas kaynatam nin: “Ichaqa manam ñawpaq vidaymanqa kutirqanichu, chaywanqa Jehova Diosninchikmi anchata kusikun”, nispa. *

17. ¿Imapaqmi kallpanchawanchik Nabihapa vidanmanta yachasqanchik?

¹⁷ Jehova Diostayá mañakusunchik, atiyninpiyá hapipakusunchik, amayá kikillanchikpichu (Gal. 5:22; Filip. 4:6). Ñawpaq vidanchikta saqinanchikpaqqa anchatam kallpanchakunanchik. Manachayqa kaqmantam kutiruchwan. Nabiha sutiyuq warmimantayá rimarisun. Paypaqa taytansi saqiruspa ripukusqa suqta watallanpiraq kachkaptin. Paymi kaynata nin: “Taytay ripukuptinqa anchatam sasachakurqani”, nispa. Chaysi wiñasqanman hinaqa  piñallaña, mana ima niykunaña kasqa. Chaymanta qipamansi droga rantikusqanpi hapirachikuspan carcelman risqa. Chaypis testigokuna bibliamanta yachachiyta qallaykusqa. Yachasqanman hinas mana allin ruwaykunata saqiyta qallaykusqa. Paymi nin: “Wakin mana allin ruwaykunataqa chayllam saqirurqani, tabacotam ichaqa mana saqiyta atirqanichu”, nispa. Wata masninpim chayta saqirurqa. ¿Imaynata? Hina paymi kaynata nin: “Chaypaqqa tukuy tiempo Jehova Diosta mañakuyniymi yanapawarqa”, nispa. Ninraqmi: “Diosta kusichinayrayku mana allin ruwaykunata ñuqapas saqiptiyqa, hukkunapas atinmankum”, nispa. *

18. ¿Imatam ruwarqaku Diosta yupaychaq ñawpaq runakuna 1 Corintios 6:9-11 nisqanman hinaqa?

¹⁸ Jesuswan kamachimunankupaq Jehova Diospa akllasqan, ñawpaq runakunapas, mana allin ruwaqkunam karqaku. Wakinkum karqaku huchapakuqkuna, qarimasillanwan kaqkuna, suwakuna. Ichaqa, Dios atiyninwan yanapaptinmi, ñawpaq vidankuta saqirqaku (leey 1 Corintios 6:9-11). Kunanpas bibliapi yachachikuykunam achkallay-achka runakunata yanaparqa, ñawpaq vidankuta saqinankupaq. * Paykunamanta yachayqa yanapawachwanmi, ñawpaq vidanchikta saqispa bautizakunanchikpaq.

19. ¿Imamantam hawanta yachasun?

¹⁹ Bautizakuyta munaqkunaqa ñawpaq vidankuta saqiruspankupas, kallpanchakunankum musuq runaña kanankupaq. Hawantam yachachkasunchik, musuq runaña kanapaq imata ruwanamanta, pikuna yanapawananchikmanta.