10 YACHACHIKUY
¿Imaraykun “ñaupa kausayninchista” saqepunanchis?
“Saqepuychis ñaupa kausayniykichistapas, amaña chaytaqa ruwaychischu” (COL. 3:9)
29 TAKI Sutiykitan apayku
KAYKUNAMANTAN YACHASUN *
1. ¿Imaynatan kausaranchis manaraq Bibliata estudiashaspa?
¿IMAYNATAN kausaranki manaraq Bibliata estudiashaspa? Diosta mana serviq runakuna jinapaschá kausaranchis. Paykuna jinapaschá piensaranchispas p’achakuranchispas. Chaymantapas mana suyakuyniyoq imapaschá karanchis. Manapaschá Jehová Diostapas allintachu reqsiranchis (Efes. 2:12). Chhaynaña karanchis chaypas Bibliata estudiaymi yanapawaranchis ñaupa kausayninchista saqepunanchispaq.
2. ¿Imatan Bibliata estudiaspa yacharanchis?
2 Bibliata estudiaspan yacharanchis Jehová Diosqa anchatapuni munakuwasqanchista. Chayta yachaspan llaqtanpi kayta munaranchis. Chaymi kallpachakuranchis paypa munayninman jina imatapas ruwananchispaq, piensasqanchistapas cambiananchispaq (Efes. 5:3-5).
3. a) Colosenses 3:9, 10 nisqan jina, ¿ima saqepunanchistan Jehová Dios munan? b) ¿Imata ruwananchispaqmi kay yachachikuypi yachasqanchis yanapawasun?
3 Jehová Diosqa kamawaqninchis kasqanraykun niwanchis imaynatas kausananchis chayta. Chaymi llapa bautizakuy munaqkunatapas nin: “Saqepuychis ñaupa kausayniykichista, * amaña chaytaqa ruwaychischu”, nispa (leey Colosenses 3:9, 10). ¿Iman ñaupa kausayninchis? ¿Imaraykun Jehová Dios munan ñaupa kausayninchista saqepunanchista? ¿Imakunan yanapawasunman ñaupa kausayninchista saqepunanchispaq? Chaykunamantan kay yachachikuypi yachasunchis.
¿IMAN ÑAUPA KAUSAYNINCHIS?
4. ¿Imaynan kanku ñaupa kausayninkuta mana saqepuq runakuna?
4 Ñaupa kausayninkuta mana saqepuq runakunaqa munasqankuman jinallan imatapas ruwanku, paykunallapin piensanku, usqhayllan phiñakunku, jatunchakuqmi kanku, qhelli ruwaykunatataqmi qhawankupas. Allin kaqtaña ruwayta munankuman chaypas sasapaschá paykunapaqqa kanman chaykunata saqepuy. Ichaqa Jehová Diosta munakuymi yanapanman mana allin piensasqankutapas ruwasqankutapas cambianankupaq (Gál. 5:19-21; 2 Tim. 3:2-5).
Ñaupa kausayninchista saqepuspaqa mana allin ruwaykunatan saqepushanchis (5 parrafota qhaway) *
5. ¿Imaraykun kallpachakunanchis llapa ñaupa kausayninchista saqepunanchispaq? (Hechos 3:19).
5 Mayninpiqa juchasapa kasqanchisraykun mana allin piensaykuna umanchisman jamunman, otaq mana allinta piensaspa imatapas rimasunman (Jer. 17:9; Sant. 3:2). Chayraykun kallpachakunanchis llapa ñaupa kausayninchista saqepunanchispaq. Chayta ruwasunchis chayqa kusisqan kausasunchis (Isa. 55:7; leey Hechos 3:19).
6. ¿Imaraykun Jehová Dios munan mana allin piensaykunatapas costumbrekunatapas saqepunanchista?
6 Jehová Diosqa anchatapunin munakuwanchis, kusisqa kausananchistataqmi munanpas. Chayraykun munan mana allin piensaykunatapas costumbrekunatapas saqepunanchista (Isa. 48:17, 18). Mana allin ruwaykunapi purispaqa sinchitan sufrisunman, familianchiskunapas sufrinkumanmi. Jehová Diosqa noqanchismantan llakikun. Chaymi mana munanchu chhaynapi tarikunanchista.
7. ¿Imatan sapankanchispas ajllakunanchis?
7 Mayninpiqa yaqapaschá amigonchiskunapas familianchiskunapas cambiasqanchista rikuspa noqanchismanta burlakunkuman (1 Ped. 4:3, 4). Yaqapaschá niwasunman: “Noqanchisqa libren kanchis ima munasqanchistapas ruwananchispaqqa”, nispa. Chhaynataña runakuna piensanku chaypas manan librepunichu kanku. Aswanpas Satanaspa munayninman jinan imatapas ruwanku (leey Romanos 12:1, 2). Chhaynaqa sapankanchismi ajllakunanchis ñaupa kausayninchisman jinallachu kausasunchis icha Jehová Diospa munayninman jinachu kausasunchis chayta (Isa. 64:8).
¿IMAKUNAN YANAPAWASUNMAN ÑAUPA KAUSAYNINCHISTA SAQEPUNANCHISPAQ?
8. ¿Imakunawanmi Jehová Dios yanapawanchis mana allin piensaykunatapas costumbrekunatapas saqepunanchispaq?
8 Jehová Diosqa yachanmi mana allin piensaykunatapas costumbrekunatapas saqepuyqa sasa kasqanta (Sal. 103:13, 14). Chayraykun payqa yanapawanchis Bibliawan, santo espiritunwan, llaqtanwan ima. Kunanmi yachasunchis imakunatas ruwananchis ñaupa kausayninchista saqepunanchispaq chayta. Chaymanta yachaymi yanapanqa bautizakuy munaqkunata iñiyninkupi wiñarinankupaq.
9. ¿Imaynatan Bibliata estudiay yanapawanchis?
9 Bibliata estudiaspan allinta t’ajwirikunanchis. Bibliaqa juj espejo jinan. Chaymi reparachiwanchis imayna piensasqanchista, rimasqanchista, ruwasqanchistapas (Sant. 1:22-25). Bibliata estudiashanki chayqa yachachiqniykin Bibliawan yanapasunkiman imayna kasqaykita reparakunaykipaq. Chaymantapas yachachisunkimanmi wakin qelqanchiskunapi yanapaykunata maskhanaykipaq. Chay qelqanchiskunata estudiaymi yanapasunki Jehová Diospa cheqnikusqan ruwaykunata saqepunaykipaq. Chaymantapas Jehová Diosmi santo espiritunwan yanapasunki (Prov. 14:10; 15:11). Chhaynaqa kallpachakushallay sapa p’unchay Bibliata estudianaykipaq, Jehová Diosmantapas mañakunaykipaq.
10. ¿Imatan Elie iñiqmasinchismanta yachasunman?
10 Jehová Diospa kamachikuyninkunatan kasukunanchis. Jehová Diospa kamachikuyninkunaqa allinninchispaqmi. Sichus kasukusunchis chayqa thajmi kasunchis, kusisqataqmi kausasunpas (Sal. 19:7-11). Jehová Diospa kamachikuyninkunata mana kasukuq runakunaqa sasachakuykunallapin tarikunku. Yachasun Elie iñiqmasinchismanta. Paymanqa tayta-mamansi juch’uychanmantapacha Jehová Diosmanta yachachisqaku. Wiñaruspas ichaqa mana allin amigokunawan juñukuyta qallarisqa. Chaysi tiempowanqa drogakuyta qallarisqa, qhelli ruwaykunapi purisqa, suwakusqa ima. Payqa millay runamansi tukupusqa. Paymi nin: “Noqaqa manan tayta-mamaypa yachachiwasqankuman jinachu kausarani”, nispa. Chaykunataña ruwasharan chaypas manas jayk’aqpas qonqasqachu tayta-mamanpa yachachisqanta. Chaysi tiempowanqa jujmanta Biblia estudiayta qallarisqa, jinaspa vicionkunata saqespa 2000 watapi bautizakapusqa. Elie iñiqmasinchismi nin: “Jehová Diospa kamachikuyninkunata kasukuyqa anchatapunin yanapawaran. Kunanqa thajmi kausani, allin concienciayoqtaqmi kanipas”, nispa. * Jehová Diosta mana kasukuq runakunaqa sasachakuykunallapin tarikunku, ichaqa Jehová Diosmi paykunataqa yanapayta munashan.
11. ¿Ima ruwaykunatan Jehová Dios cheqnikun?
11 Jehová Diospa llapa cheqnikusqantan cheqnikunanchis (Sal. 97:10). Jehová Diosqa cheqnikunmi jatunchakuq runakunata, llullakuq runakunata, runa wañuchiqkunatapas (Prov. 6:16, 17). Cheqnikullantaqmi runamasinkuta engañaq runakunatapas (Sal. 5:6). Chayraykun Jehová Diosqa Noepa tiemponpi mana kasukuq runakunata chinkachipuran (Gén. 6:13). Chaymantapas Jehová Diosqa cheqnikunmi qosanta otaq esposanta engañaq runakunata. Chayraykun Jehová Diosqa paykunaq yupaychasqanta mana chaskinchu, imachus ruwasqankumantataqmi cuentatapas mañanqa (Mal. 2:13-16; Heb. 13:4).
Jehová Diospa cheqnikusqan ruwaykunataqa malograsqa mijunata jinan qhawarinanchis (11, 12 parrafokunata qhaway)
12. ¿Imaynatan qhawarinanchis Jehová Diospa cheqnikusqan ruwaykunata?
12 Jehová Diosmi kamachiwanchis: “Mana allin kaqta cheqnikuychis”, nispa (Rom. 12:9). Kaypi piensay, ¿mijuwaqchu malograsqa mijunata? Manan jayk’aqpas chaytaqa mijusunmanchu ¿riki? Aswanpas millakusunmanmi. Chhaynatan Jehová Diospa cheqnikusqan ruwaykunatapas qhawarinanchis.
13. ¿Imaraykun mana allin piensaykunamanta cuidakunanchis?
13 Mana allin piensaykunamantan cuidakunanchis. Runakunaqa piensasqanchisman jinan imatapas ruwanchis. Mana allin ruwaykunapi piensaspaqa juchamanmi urmasunman. Chaymi Jesuspas discipulonkunata niran mana allin piensaykunamanta cuidakunankupaq (Mat. 5:21, 22, 28, 29). Sichus Jehová Diosta kusichiyta munanchis chayqa umanchismantan mana allin piensaykunata usqhaylla wijch’upunanchis.
14. ¿Imaraykun allinta piensaspa rimananchis? ¿Ima tapuykunapin piensananchis?
14 Allinta piensaspan rimananchis. Jesusmi niran: “Simimanta lloqsimuqmi ichaqa sonqomanta paqarimun”, nispa (Mat. 15:18). Runakunaqa sonqonchispi imachus kasqanman jinan imatapas rimanchis. Chaymi kaykunata tapukunanchis: “¿Cheqaqllatachu imatapas rimani? ¿Juj qharitachu juj warmitachu pujllapayani casarasqaña kashaspapas? ¿Qhelli ruwaykunallamantachu jujkunawan rimani? ¿Usqhayllachu imawanpas phiñakuni?”, nispa. Chay tapuykunapi piensaymi yanapawasun allinta piensaspa imatapas rimananchispaq, ama llullakuspalla rimananchispaq, qhelli rimaykunamantapas cuidakunanchispaq.
15. ¿Imakunatan ruwananchis Jehová Diosta kusichinanchispaq?
15 Mana allin ruwaykunatan saqepunanchis. Apóstol Pablon niran: “Ñaupa kausayninchisqa paywan kuskan k’aspipi clavasqa karan”, nispa. Chay nisqanwanmi cristianokunata kallpachasharan ñaupa kausayninkuta saqepunankupaq (Rom. 6:6). Jesusqa Jehová Diosta kusichiyta munaspan k’aspipi warkusqa karan. Noqanchispas kallpachakunanchismi Jehová Diospa cheqnikusqan ruwaykunata, mana allin piensaykunata, costumbrekunatapas saqepunanchispaq. Chayta ruwasunchis chayqa Jehová Diostan kusichisunchis, allin concienciayoqtaqmi kasunpas, jinaspapas jamuq tiempopin wiñaypaq kusisqa kausasunchis (Juan 17:3; 1 Ped. 3:21). Jehová Diosqa manan munasqanchisman jinachu ima kamachikuyninkunatapas cambianqa, aswanpas noqanchismi kallpachakunanchis Jehová Diospa kamachikuyninkunaman jina kausananchispaq (Isa. 1:16-18; 55:9).
16. ¿Imaraykun kallpachakushanallanchis mana allin piensaykunata umanchismanta wijch’upunanchispaq?
16 Kallpachakushallasun mana allin ruwaykunata saqepunanchispaq. Bautizasqaña kashanchis chaypas kallpachakushanallanchismi mana allin piensaykunata umanchismanta wijch’upunanchispaq. Yachasun Maurício iñiqmasinchismanta. Payqa waynacha kasqanmantapachas qhelli ruwaykunapi purisqa. Tiempowanmi ichaqa Bibliata estudiayta qallarisqa, chaysi qhelli ruwaykunata saqepuspa 2002 watapi bautizakapusqa. Payqa askha watakunañan Jehová Diosta servishan. Paymi nin: “Chay mana allin ruwaykunata saqepuyqa sinchi sasan karan. Mayninpiqa mana allin piensaykunan umayman jamun, chaymi kallpachakushallani mana allin piensaykunata umaymanta wijch’upunaypaq. Chaykunata ruwaspan Jehová Diosta kusichiyta munani”, nispa. *
17. ¿Imata ruwanaykipaqmi kallpachasunki Nabiha iñiqmasinchismanta yachay?
17 Jehová Diospa santo espirituntan mañakunanchis (Gál. 5:22; Filip. 4:6). Ñaupa kausayninchista saqepuyqa sasapaschá kanqa. Ichaqa Jehová Diospa yanapayninwanqa atillasunmi chaykuna saqepuyta. Yachasun Nabiha iñiqmasinchismanta. Paymi nin: “Papayqa soqta watachayoq kashaqtiymi saqepuwaran. Chaymi sinchi phiñasqa kasharani. Tiempowanqa sinchi millay runamanmi tukupurani”, nispa. Payqa drogakunatas vendeq, chayraykus paytaqa carcelpi wisq’asqaku. Ichaqa carcelpi kashaqtinsi Jehová Diospa testigonkunawan Biblia estudiayta qallarisqa. Chaysi kallpachakusqa pisi-pisimanta cambiananpaq. Paymi nin: “Wakin vicioykunata saqepuyqa facil-llan karan, cigarro fumaytan ichaqa sasata saqepurani”, nispa. ¿Iman hermananchista yanaparan vicionkunata saqepunanpaq? Paymi nin: “Jehová Diosmanta sapa kutilla mañakuymi yanapawaran. Jehová Diospa yanapayninwanqa llapanchispas atisunmanmi cambiayta”, nispa. *
KALLPACHAKUSHALLAY BAUTIZAKUNAYKIPAQ
18. 1 Corintios 6:9-11 nisqan jina, ¿imata saqepunankupaqmi kallpachakuranku ñaupa tiempopi cristianokuna? ¿Imatan kay tiempopi millonninpi runakunapas ruwashanku?
18 Apostolkunaq tiemponpin Jehová Diosqa wakin runakunata ajllaran Jesuswan kuska janaq pachamanta kamachikamunankupaq. Chay cristianokunaqa manaraq Jehová Diosta reqsishaspan imaymana juchakunapi puriranku. Wakinqa wasanchay juchapin puriranku, suwakuranku, qharipura warmipura ima puñuranku. Jehová Diospa yanapayninwanmi ichaqa chay mana allin ruwaykunata saqepuranku (leey 1 Corintios 6:9-11). Kay tiempopipas millonninpi runakunan Jehová Diospa cheqnikusqan ruwaykunata saqepushanku. * Sichus Bibliata estudiashanki chayqa kallpachakushallay Jehová Diospa cheqnisqan ruwaykunata saqepunaykipaq.
19. ¿Imakunamantan qatimuq yachachikuypi yachasunchis?
19 Sichus bautizakuyta munashanki chayqa ñaupa kausayniykita mauk’a p’achata jina wijch’upuy, jinaspa kallpachakuy Jehová Diospa munayninman jina imatapas ruwanaykipaq. Qatimuq yachachikuypin yachasunchis imaynatas mosoq runa kaywan p’achakusunman chayta, imaynatas hermanonchiskunapas yanapawasunman mosoq runa kaywan p’achakunanchispaq chaytapas.
41 TAKI “Mañakusqayta uyariykuway”
^ Yachachisqanchis runakuna bautizakunankupaqqa ñaupa kausayninkutan saqepunanku. Ichaqa, ¿iman ñaupa kausayninchis? ¿Imaraykun ñaupa kausayninchista saqepunanchis? ¿Imakunan yanapawasunman ñaupa kausayninchista saqepunanchispaq? Chaykunamantan kay yachachikuypi yachasunchis. Qatimuq yachachikuypitaq yachasunchis imaraykus bautizakusqanchis qhepamanpas mosoq runa kaywan p’achakushanallanchis chayta.
^ ASTAWAN YACHANAPAQ: “Ñaupa kausayninchista” saqepuyqa Jehová Diospa cheqnikusqan ruwaykunata mana allin piensaykunata ima saqepuymi. Chaykunataqa manaraq bautizakushaspan saqepunanchis (Efes. 4:22).
^ Qhaway “La Biblia les cambió la vida: ‘Necesitaba volver a Jehová’” nisqata, 2012 watamanta 1 abril killamanta La Atalaya qelqapi.
^ Qhaway “La Biblia les cambió la vida: ‘Fueron muy amables conmigo’” nisqata, 2012 watamanta 1 mayo killamanta La Atalaya qelqapi.
^ Qhaway “La Biblia les cambió la vida: ‘Llegué a ser una joven irritable y agresiva’” nisqata, 2012 watamanta, 1 octubre killamanta La Atalaya qelqapi.
^ Qhaway “Bibliaq yanapayninwan cambianku” nisqata.
^ FOTOMANTA WILLAKUY: Ñaupa kausayninchistaqa mauk’a p’achanchista jinan wijch’upunanchis. Chhaynatan Jehová Diospa cheqnikusqan ruwaykunatapas saqepunanchis.