1. Саво живото сине тут англедер те проучине и Библија?

 САВО живото сине тут англедер те проучине и Библија е Јеховаскере сведоконцар? Бут џене амендар на мангена ни те сетинен пе башо адава. Најверојатно о размислување таро акава свето бут влијајнѓа упро тло стави хем тли личност, башо адава сој исправно а сој погрешно. Ако акава сине случај туја да тегани сиан сине „бизи надеж хем бизо Девел“ (Еф. 2:12). Ама одкеда почминѓан те проучине и Библија, тло живото менинѓа пе.

2. Со дознајнѓан одкеда почминѓан те проучине и Библија?

² Кеда почминѓан те проучине и Библија, дознајнѓан кај иси тут јекх небесно Дад кова со бут мангела тут. Халиљан кај ако мангеа те кере бахтало е Јехова хем ако мангеа те ове дело тари лескири фамилија таро верна слуге, ка ваљани те кере баре промене ко тло живото хем ко тло размислување. Хем кај ка ваљани те сикљове те живине спрема лескере уче мерилија (Еф. 5:3-5).

3. Спрема Колошаните 3:9, 10, со очекујнела о Јехова те кера хем башо со ка кера лафи ки акаја статија?

³ Амаро Створители хем небесно Дад, о Јехова, иси ле право те одлучинел сар ваљани те понашинен пе окола сој тане дело тари лескири фамилија. Хем адалеске очекујнела амендар панда англедер те крстина амен те „хуљава и пурани личност хем лакере постапке“. * (Читин Колошаните 3:9, 10.) Акаја статија ка поможинел околенге со мангена те крстинен пе те добинен одговор ко акала трин пучиба: 1) Сој тани и „пурани личност“? 2) Соске о Јехова родела амендар те хуљава ла? хем 3) Сар шај те кера адава? А околенге  сој више крстиме, акаја статија ка поможинел те на дозволинен о особине тари пурани личност палем те појавинен пе.

4. Сар постапинела некој со на хуљавѓа „и пурани личност“?

⁴ Окова со дозволинела те влијајнел упри лесте и пурани личност обично размислинела хем постапинела ко телесно начин. Ов шај тано себично, сигате хољанела, нане благодарно хем тано гордо. Шај дикхела порнографија хем филмија коте со иси неморал хем насилство. Ле сигурно иси ле шукар особине хем шај чак осетинела пе криво башо буќа со вакерела хем со керела. Ама нане ле бари желба те керел промене ко пло размислување хем постапке (Гал. 5:19-21; 2. Тим. 3:2-5).

5. Објаснин дали шај целосно те хуљава и пурани личност (Дела 3:19).

⁵ Адалеске со сием несовршена, никој амендар нашти целосно те цидел са о лошна мисле хем желбе таро пло вило хем тари годи. Понекогаш ка кера или ка вакера нешто башо кова со покасно ка каина амен (Ерем. 17:9; Јак. 3:2). Ама адалеа со хуљаваја и пурани личност, на сием више робија е телесна ставенге хем постапкенге, хем адалеске улем бут појавер мануша. (Иса. 55:7; читин Дела 3:19.)

6. Соске о Јехова охрабринела амен те цида амендар о погрешно размислување хем о лошна навике тари пурани личност?

⁶ О Јехова поттикнинела амен те цида амендар о погрешно размислување хем о лошна навике соске бут мангела амен хем мангела те уживина ко живото (Иса. 48:17, 18). Ов џанела кај окола со на боринена пе против о погрешна желбе керена штета песке, хем е јаверенге. Ле дукхала ле кеда дикхела адава.

7. Спрема Римјаните 12:1, 2, со ваљани секова јекх амендар те одлучинел?

⁷ Шај несаве таро амаре амала хем фамилија ко почеток ка асан аменге адалеске со мангаја те кера промене ки амари личност (1. Пет. 4:3, 4). Шај ка вакерен аменге кај иси амен право те кера со мангаја хем кај на ваљани те дозволина о јавера те вакерен аменге со те кера. Ама уствари, окола со на прифатинена е Јеховаскере  мерилија ни хари нане независна, соске ола дозволинена о свето кова сој водимо таро Сатана те обликујнел лен. (Читин Римјаните 12:1, 2.) Сарине амен мора те одлучина дали ка икера амари пурани личност, која сој тани обликујми таро грево хем таро свето е Сатанаскоро, или ка дозволина о Јехова те променинел амен хем те ова и најшукар личност со шај те ова панда акана (Иса. 64:8).

8. Со шај те поможинел амен те шај те цида амендар о лошна мисле хем о погрешна навике?

⁸ О Јехова џанела кај ка ваљанел аменге време хем трудо те шај те цида амендар о погрешна мисле хем о лошна навике (Пс. 103:13, 14). Ама преку пло Лафи, пло духо, хем пли организација, о Јехова дела амен и мудрост, и сила хем и поддршка со ваљани аменге те шај те менина амен. Хем сигурно ов више поможинѓа туке. Те дикха некобор буќа со шај те кере кола со ка поможинен туке понадари да те хуљаве и пурани личност, хем те ове спремно башо крстибе.

9. Сар шај е Девлескоро Лафи те поможинел туке?

⁹ Користин и Библија те шај шукар те испитине тут. Е Девлескоро Лафи тано сар јекх ајна. Шај те поможинел туке те испитине сар размислинеа, сар кереа лафи хем сар постапинеа (Јак. 1:22-25). Окова со проучинела туја и Библија или несаве јавера зрела христијања шај те ден тут корисна советија. На пример, шај несаве стихонцар те поможинен туке те хаљове кола тане тле јака хем слаба стране. Исто аѓаар шај те сикавен тут сар те аракхе практична советија ко амаре публикацие башо адава сар те циде тутар о лошна навике. Хем џанѓола пе, о Јехова секогаш тано спремно те поможинел туке. Ов најшукар шај те поможинел туке, соске џанела со иси тут ко вило (Изр. 14:10; 15:11). Адалеске, нека овел тут навика секова диве те молине тут хем те проучине лескоро Лафи.

10. Со сиклиљан таро е Илиаскоро пример?

¹⁰ Ов уверимо кај е Јеховаскере мерилија тане најшукар. Са со родела амендар о Јехова те кера тано амаре шукарипаске. Окола со живинена спрема лескере мерилија дикхена шукар ки песте, иси лен смисла ко живото хем тане чаче бахтале (Пс. 19:7-11). А окола со отфрлинена е Јеховаскере мерилија иси лен баре последице кола со авена таро постапке е грешно телоскере. Дикх со вакерела о Или кова со ко почеток отфрлинѓа е Девлескере мерилија. Ов барило родителенцар кола со мангена е Јехова, ама кеда сине тинејџери ле сине ле лошно друштво, почминѓа те дрогиринел пе, те живинел неморално хем те чорел. О Или овела сине са похољамо хем понасилно. Ов вакерела: „Керава сине са со сиклиљум ма те керав“. Ама ов никогаш на бистерѓа са со сиклило сар тикно хем адалеске пало несаво време почминѓа палем те проучинел и Библија. Ов бут трудинѓа пе те цидел о лошна навике хем крстинѓа пе ко 2000-то берш. Сави корист сине ле адалеске со живинѓа спрема е Јеховаскере мерилија? О Или вакерела: „Акана иси ман андруно мир хем чисто совест“. * Таро акава пример шај те сикљова кај окола со отфрлинена е Јеховаскере мерилија керена штета коркори песке. Ама о Јехова тано сепак спремно те поможинел ленге те керен промене.

11. Кола буќа мрзинела о Јехова?

¹¹ Сикљов те мрзине адава со мрзинела  о Јехова (Пс. 97:10). И Библија вакерела кај о Јехова мрзинела „горда јакхја, и чхиб со ховавела, хем васта со чхорена невино рат“ (Изр. 6:16, 17). Хем исто аѓаар „тане леске одвратна о мануша кола сој тане насилна хем ховавена“ (Пс. 5:6). О Јехова добором бут мрзинела асавке ставија хем постапке со одлучинѓа те уништинел са е лошнон ко е Ноескере диве соске ола пхерѓе и пхув насилствоја (1. Мој. 6:13). Размислин башо јавер пример. Преку о пророко о Малахија, о Јехова вакерѓа кај мрзинела околен со постапинена неверно пумаре ромњенцар соске развединена пе ленцар бизи нисави причина. О Јехова на прифатинела ленгири служба, хем ка судинел ленге башо ленгере постапке (Мал. 2:13-16; Евр. 13:4).

12. Со значинела „те мрзина о лошнипе“?

¹² О Јехова мангела „те мрзина о лошнипе“ (Рим. 12:9). О грчко лафи „те мрзина“ сикавела кај ваљани те овел аменге нешто одвратно или те гадона амен таро адава. Сар би осетинеа тут ако некој дела тут те ха румими храна? Сигурно само со размислинеа башо адава гадонеа тут. Слично, чак и мисла те кере нешто сој лошно ваљани те овел туке одвратно.

13. Соске мора те отфрлина о погрешна мисле?

¹³ Отфрлин о погрешна мисле. Амаре мисле влијајнена упро амаре постапке. Баш адалеске о Исус поттикнинѓа амен те отфрлина мисле кола со шај те чхивен амен те кера пхаро грево (Мат. 5:21, 22, 28, 29). Сигурно мангаја те кера е Јехова бахтало хем адалеске тано важно сигате те отфрлина секоја погрешно мисла која со ка појавинел пе аменге ки годи.

14. Со сикавена амаре лафија баши аменде, хем со ваљани те пуча амен?

¹⁴ Пазин ко тле лафија. О Исус вакерѓа: „Са со икљола таро муј авела таро вило“ (Мат. 15:18). Адава сар кераја лафи откринела бут башо адава саве сием андралдан. Адалеске, пуч тут: „Дали сиум спремно секогаш те вакерав о чачипе чак кеда џанава кај адава шај те керел манге проблемија? Ако сиум ко брако, дали пазинава те на флертујнав некасаја таро спротивно пол? Дали избегинава те користинав безобразна лафија? Дали керава лафи ко јекх смиримо начин кеда некој нервиринела ман?“ Ка овел шукар ако размислинеа башо акала пучиба. Тле лафија шај те спорединен пе копченцар ко јекх шеј. Ако пхравеа о  копче ка шај полокхе те хуљаве адава шеј. Слично, ако трудинеа тут те на користине насилна, ховавне хем безобразна лафија, ка овел туке полокхо те хуљаве и пурани личност.

15. Со значинела те ковина амари пурани личност „ко стубо“?

¹⁵ Ов спремно те кере са сој потребно. О апостол Павле користинѓа споредба која со сикавела аменге кобор тано важно те кера промене ки амари личност. Ов пишинѓа кај мора те ковина амари пурани личност „ко стубо“ (Рим. 6:6). О Исус сине спремно те овел ковимо ко стубо те шај те керел е Јеховаскири волја. Слично, ако мангаја те кера е Јеховаскири волја, ваљани спремно те мудара амаре ставија хем постапке кола со мрзинела лен. Ако кераја адава тегани ка овел амен чисто совест хем и надеж вечно те живина (Јован 17:3; 1. Пет. 3:21). Ма бистре, о Јехова нане те менинел пле мерилија те шај аменге те овел шукар. Наместо адава, амен сием адала со ваљани те менина амен хем те икера лескере мерилија (Иса. 1:16-18; 55:9).

16. Соске мора те ова одлучна понадари да те борина амен против о погрешна желбе?

¹⁶ Понадари да борин тут против о погрешна желбе. Чак откеда ка крстине тут, ваљани понадари да те борине тут против о погрешна желбе. Размислин башо искуство јекхе манушескоро со викинела пе Марисио. Кеда сине терно почминѓа те живинел сар хомосексуалцо. Пало несаво време почминѓа те проучинел и Библија е Јеховаскере сведоконцар. Одкеда керѓа промене ко пло живото крстинѓа пе ко 2002-то берш. Иако служинела е Јеховаске више бершенцар о Марисио вакерела: „Мора те признајнав кај понекогаш мора понадари да те боринав ман погрешно желбенцар“. Ама на обесхрабринѓа пе. Наместо адава, ов вакерела: „Дела ман сила адава со сиум свесно кај секогаш кеда постапинава исправно керава е Јехова бахтало“. *

17. Соске е Набихакоро искуство охрабринела тут?

¹⁷ Молин тут баши е Јеховаскири помош, хем нека овел тут доверба ко лескоро духо а на ки тли сила (Гал. 5:22; Фил. 4:6). Ваљани бут те трудина амен ако мангаја те хуљава амари пурани личност хем те на урава ла више. Те дикха о искуство јекхе џувљакоро  која со викинела пе Набиха. Лакоро дад гело песке кхералдан кеда сине ла само шов берш. Ој вакерела: „Адава бут дукхандило ман“. Сар бајрола сине и Набиха овела сине са понервозно хем поагресивно. Почминѓа те бикинел дрога хем адалеске сине некобор берша пханли ко затвор. Кеда е Јеховаскере сведокија почминѓе те проповединен ко затвор, почминѓе те проучинен лаја и Библија. И Набиха керѓа баре промене ко пло живото, ој вакерела: „Несаве таро мле лошна навике сине локхе те чхинавав, ама сине манге бут пхаро те чхинавав е цигараја“. И Набиха мучинѓа пе повише таро јекх берш те шај те чхинавел е цигараја хем ко крајо успејнѓа. Сар успејнѓа ко адава? Ој вакерела: „Највише поможинѓа манге адава со стално молинава ман сине е Јеховаске“. Акана е јаверенге вакерела: „Уверими сиум кај ако ме шај сине те керав промене те шај те угодинав е Јеховаске, тегани секој шај!“ *

18. Спрема 1. Коринќаните 6:9-11, со шај сине те керен бут таро е Јеховаскере слуге?

¹⁸ Ко прво веко, несаве таро мануша кола со биринѓа лен о Јехова те владинен е Христосеа, англедер керена сине бут лошна буќа. На пример несаве лендар керена сине прељуба, сине хомосексуалција хем чора. Ама о свети дух поможинѓа ленге те менинен пумари личност. (Читин 1. Коринќаните 6:9-11.) Слично, и Библија авдиве да поможинѓа милиоња манушенге те керен промене ко пумаро живото. * Ола успејнѓе те циден пестар навике кола со сине бут хор ки ленде. Ленгоро пример сикавела кај ту да шај те кере промене ки тли личност хем те чхинаве е лошна навикенцар те шај те ове спремно те крстине тут.

19. Башо со ка кера лафи ки следно статија?

¹⁹ Освен со ваљани те трудинен пе те хуљавен и пурани личност, окола со мангена те крстинен пе, ваљани те уравен и неви личност. И следно статија ка керел лафи башо адава сар шај те кера адава хем сар шај о јавера те поможинен амен.