1. E faapeʻī le olaga na e ola aʻe ai a o leʻi suʻesuʻeina le Tusi Paia?

 O LE ā le ituaiga olaga na e ola ai a o leʻi suʻesuʻeina le Tusi Paia ma Molimau a Ieova? O le toʻatele o i tatou e lē mananaʻo e toe mafaufau i ai. Na taaʻina o tatou uiga ma amioga i le vaaiga a le lalolagi e faatatau i le mea saʻo ma le mea sesē. Pe afai o lea, sa leai so tatou faamoemoe ma na aunoa tatou ma le Atua i le lalolagi. (Efe. 2:12) Ae na suia na uiga ina ua tatou suʻesuʻeina le Tusi Paia.

2. O le ā na e aʻoaʻoina a o suʻesuʻeina le Tusi Paia?

² A o e suʻesuʻeina le Tusi Paia na e aʻoaʻoina ai, e iai lou Tamā i le lagi e alofa faapelepele iā te oe. Na e iloa ai foʻi pe a e manaʻo e faafiafia Ieova ma avea ma se tasi o lona aiga tapuaʻi, e tatau ona e faia ni suiga tetele i le auala e te ola ai, ou uiga, amioga ma mafaufauga. Na tatau foʻi ona e aʻoaʻoina le auala e ola ai i tapulaa maualuluga a Ieova.​—Efe. 5:3-5.

3. I le Kolose 3:9, 10, o le ā e finagalo Ieova e tatou te faia, ma o le ā o le a tatou talanoaina i lenei suʻesuʻega?

³ O Ieova o Lē na foafoaina mea ma o lo tatou Tamā i le lagi, e iā te ia la le aiā e filifili ai le auala e tatau ona amioaʻi ai ona tagata tapuaʻi. A o tatou leʻi papatiso, e finagalo o ia e tatou te faia taumafaiga uma ina “ia toese le tagata tuai ma ana gaoioiga.” * (Faitau le Kolose 3:9, 10.) E fesoasoani lenei suʻesuʻega iā i latou e mananaʻo e papatiso ina ia tali ai fesili nei e tolu: (1) O le ā le “tagata tuai”? (2) Aiseā e finagalo ai Ieova  e tatou te toese le tagata tuai? (3) O le ā le auala e tatou te toese ai le tagata tuai? E fesoasoani foʻi lenei suʻesuʻega iā i latou ua uma ona papatiso, e teena ai le toe mapuna aʻe o uiga tuai.

4. O le ā le auala e gaoioi ai se tasi pe a pulea e le “tagata tuai”?

⁴ O se tasi e pulea e le “tagata tuai,” e masani ona mafaufau ma gaoioi i se auala agasala. Atonu e manatu faapito, maitaita, lē lotofaafetai ma faamaualuga. Pe atonu foʻi e fiafia e matamata i ata matagā taufeusuaʻiga ma amioga lē mamā po o ata sauā. E mautinoa e iai uiga lelei o lenā tagata. Atonu e na te lagona le nofosala ona o ana gaoioiga ma faamatalaga leaga, ae e leai se uunaʻiga e suia ai ona mafaufauga ma amioga.​—Kala. 5:19-21; 2 Timo. 3:2-5.

5. O le ā le manatu talafeagai e tatau ona iā i tatou a o taumafai e toese le tagata tuai? (Galuega 3:19)

⁵ E leai se isi o i tatou e mafai ona aveesea atoatoa manatu ma faanaunauga leaga mai i o tatou loto ma mafaufau, ona e tatou te lē lelei atoatoa. O nisi taimi e tatou te faia ai se gaoioiga po o se faamatalaga e tatou te toe salamō ai. (Iere. 17:9; Iako. 3:2) Ae pe a toese le tagata tuai, o le a lē toe pulea i tatou e uiga ma masaniga leaga. O le a lē toe i ai na uiga iā i tatou.​—Isa. 55:7; faitau le Galuega 3:19.

6. Aiseā ua uunaʻia ai i tatou e Ieova e liaʻiese mafaufauga sesē, ma masaniga leaga o le tagata tuai?

⁶ Ua uunaʻia i tatou e Ieova ina ia liaʻiese mafaufauga sesē ma masaniga leaga, ona e alofa faapelepele iā i tatou ma e manaʻo ia tatou olioli i le olaga. (Isa. 48:17, 18) E silafia e Ieova pe a tatou lolo atu i faanaunauga sesē, e tatou te faatigā ai iā i tatou lava ma isi. E matuā tigā lona finagalo pe a tatou mafatia, faapea isi.

7. I le Roma 12:1, 2, o ā filifiliga e tatou te faia?

⁷ E ono tauemu mai nisi o a tatou uō ma tauaiga, pe a tatou taumafai e faia suiga i o tatou uiga. (1 Pete. 4:3, 4) E latou te ono faapea mai, e iā i tatou le aiā e faia ai so o se mea e mananaʻo ai, ma e lē tatau ona tatou faatagaina isi e taʻu mai le mea e tatau ona fai. Ae o i latou e teena tapulaa a Ieova, ua latou faatagaina manatu o le lalolagi a Satani e taaʻina ai i latou. (Faitau le Roma 12:1, 2.)  Ae e iai se filifiliga e manaʻomia ona tatou faia: E tatou te filifili pe tumau pea ona iā i tatou le tagata tuai, lea o loo taaʻina e le agasala ma le lalolagi a Satani, po o le faatagaina o Ieova e suia i tatou i se tagata e sili ona lelei i le taimi lenei.​—Isa. 64:8.

8. O le ā e fesoasoani iā i tatou e ʻalofia ai mafaufauga sesē ma masaniga leaga?

⁸ E silafia e Ieova e umi se taimi ma taumafaiga e tatou te faia, ina ia ʻalofia ai mafaufauga sesē ma masaniga leaga. (Sala. 103:13, 14) Peitaʻi ua foaʻi mai e Ieova le atamai, malosi ma le lagolagosua e tatou te manaʻomia e faia ai suiga, e ala mai i lana Afioga, lona agaga paia ma lana faalapotopotoga. E mautinoa na fesoasoani Ieova iā te oe. Seʻi o tatou talanoaina nisi o auala aogā e mafai ona e faia, ina ia faaauau ai ona toese le tagata tuai ma agavaa ai mo le papatisoga.

9. E faapefea ona fesoasoani le Afioga a le Atua iā te oe?

⁹ Ia faaaogā le Tusi Paia e iloilo ai oe lava. E pei le Afioga a le Atua o se faata, e fesoasoani iā te oe e iloilo ai le auala e mafaufau, tautala ma gaoioi ai. (Iako. 1:22-25) E mafai foʻi ona e maua fautuaga mai i lau faiaʻoga o le Tusi Paia, ma isi Kerisiano taʻumatuaina. O se faataʻitaʻiga, e latou te faaaogā le Tusi Paia e fesoasoani ai iā te oe e iloa ai mea e te lelei ai ma ou vaivaiga. E mafai ona latou aʻoaʻoina oe i le auala e maua ai fautuaga aogā faale-Tusi Paia e foʻia ai masaniga leaga. E nofosauni Ieova e fesoasoani iā te oe. E silafia lelei e Ieova le auala sili e fesoasoani ai iā te oe, ma e na te silafia lelei foʻi mea o loo i lou loto. (Faata. 14:10; 15:11) O lea, ia fai ma au masani le tatalo iā Ieova, ma suʻesuʻe lana Afioga i aso taʻitasi.

10. O le ā ua e aʻoaʻoina mai i le mea na tupu iā Elie?

¹⁰ Ia mautinoa e sili ona lelei tapulaa a Ieova. E tatou te maua aogā mai i mea uma ua faatonuina i tatou e Ieova e fai. O i latou e ola i tapulaa a Ieova e latou te mautinoa iā i latou lava, e iai se fuafuaga o o latou olaga ma maua le fiafia moni. (Sala. 19:7-11) Ae o i latou e teena tapulaa a Ieova e mafatia i āuga o galuega a le tino o loo latou fiafia e fai. Mātau le faamatalaga a se tamāloa e igoa iā Elie e uiga i le teena o tapulaa a le Atua. Na tausia aʻe o ia e ni mātua e alolofa iā Ieova. Na filifili Elie e faifaimea faatasi ma ni aumea leaga a o talavou. Na amata ai ona ia faaaogā fualaau faasāina, faia amioga lē mamā ma gaoi. Na ia iloa ane ai ua avea o ia o se tagata maitaita ma matuā sauā. Na ia taʻutino mai: “Na ou faia mea uma na ou aʻoaʻoina e lē tatau ona faia e se Kerisiano.” Peitaʻi, e leʻi galo iā Elie mea na ia aʻoaʻoina a o talavou. O lea, na amata ai ona ia suʻesuʻeina le Tusi Paia. Na ia galue mamafa e liaʻiese ana masaniga leaga, ma papatiso ai i le tausaga 2000. Na faapefea ona aogā iā te ia le ola i tapulaa a Ieova? Na ia faapea mai: “Ua ou maua nei le filemu o le mafaufau ma se lotofuatiaifo mamā.” * Ua faailoa mai i le mea na tupu iā Elie, o i latou e teena tapulaa a Ieova e oo i ai mafatiaga. E ui i lea, e nofosauni Ieova e fesoasoani iā i latou ina ia faia suiga.

11. O ā mea e ʻinoʻino i ai Ieova?

¹¹ Ia ʻinoʻino i mea e ʻinoʻino i ai Ieova. (Sala. 97:10) Ua faailoa mai e le Tusi Paia e ʻinoʻino Ieova i “mata faamaualuga, o le laulaufaiva pepelo, o lima e sasaa le toto o ē e lē sala.” (Faata. 6:16, 17) E ʻinosia foʻi e Ieova le tagata e faamasaatoto ma taufaasesē.’ (Sala. 5:6) E matuā ʻinoʻino Ieova i nei uiga ma gaoioiga,  o le māfuaaga lenā na ia faaumatia ai tagata i aso o Noa ona ua tumu le lalolagi i faiga sauā. (Kene. 6:13) Mātau se isi faaaʻoaʻoga. Na fetalai Ieova e ala i le perofeta o Malaki, e ʻinoʻino o Ia iā i latou e faufau leaga e tatala a latou faaipoipoga, e ui e leʻi faia e le isi paaga se agasala. E teena e le Atua a latou tapuaʻiga, ma e faamasinoina i latou e Ieova.​—Mala. 2:13-16; Epe. 13:4.

12. O le ā e uiga atu i ai le “ʻinoʻino i le leaga”?

¹² E finagalo Ieova ia tatou “ʻinoʻino i le leaga.” (Roma 12:9) Ua faamatalaina le upu “ʻinoʻino” i se faalogona malosi e matuā teena ai se mea. Seʻi faaata le malosi o le auala e te tali atu pe a fai atu se tasi e te ʻai i se meaʻai ua mafu. Atonu e te faafaufau pe a e mafaufau i ai. E tatau foʻi ona tatou matuā ʻinoʻino e fai se mea e ʻinoʻino i ai Ieova.

13. Aiseā e tatau ai ona leoleoina o tatou mafaufauga?

¹³ Ia leoleoina ou mafaufauga. O o tatou mafaufauga e aafia ai o tatou uiga. O le māfuaaga lenā na aʻoaʻo ai i tatou e Iesu, ia teena mafaufauga e iʻu atu ai i le faia o se agasala matuiā. (Mata. 5:21, 22, 28, 29) E tatou te mananaʻo e faafiafia lo tatou Tamā i le lagi, a ea? O lea, e tāua le vave ona teena o so o se mafaufauga leaga e oso aʻe i o tatou mafaufau!

14. O le ā e faailoa atu e a tatou faamatalaga, ma o ā fesili e tatau ona tatou taliina?

¹⁴ Ia pulea le auala e tautala ai. Ua faapea mai Iesu: “O mea e sau mai i le gutu e sau lea mai i le loto.” (Mata. 15:18) Ioe, o le auala e tatou te tautatala ai, e faailoa mai ai mea o loo i o tatou loto. O lea, ia fesili ifo: ʻPo o le a ou faailoa atu pea le mea moni e tusa lava pe e oo ai faafitauli iā te aʻu? Pe afai ua ou faaipoipo, po o le a ou faaeteete ina neʻi oʻu faatafai i le isi itupā? Po o le a ou ʻalofia le faia o ni tala faauigalua e faatatau i feusuaʻiga? Po o le a ou tali atu i se leo mālū pe a faatigā mai se tasi?’ E aogā le mafaufau loloto i na fesili. E pei le auala e tatou te tautatala ai o ni faamau o se ofu. Pe a tatala faamau o se ofu e faigofie ona aveese lenā ofu. Pe a tatou faia le mea sili e aveese ai tala faatigā, tala pepelo ma faamatalaga lē mamā, o le a faigofie ai foʻi la ona tatou toese le tagata tuai.

15. O le ā le uiga o le tutuʻi o lo tatou tagata tuai i “luga o le laau”?

¹⁵ Ia lotomalie e maumauaʻi e gaoioi. Na faaaogā e le aposetolo o Paulo se talafaatusa e  aʻoaʻo ai i tatou i le matuā tāua o le faia o suiga i o tatou olaga. Na ia tusi e tatau ona tutuʻi lo tatou tagata tuai i “luga o le laau.” (Roma 6:6) I se isi faaupuga, e tatou te mananaʻo e mulimuli i le faaaʻoaʻoga a Keriso. E manaʻomia ona tatou fasiotia pe aveesea uiga ma gaoioiga e inosia e Ieova. E na o le pau lea o le auala e tatou te maua ai se lotofuatiaifo mamā ma olioli ai i le ola e faavavau. (Ioa. 17:3; 1 Pete. 3:21) Ia manatua, e lē suia e Ieova ana tapulaa ina ia fetaui ma i tatou. Ae e manaʻomia ona suia i tatou, ma ia faafetaui o tatou olaga i ana tapulaa.​—Isa. 1:16-18; 55:9.

16. Aiseā e tatau ai ona tatou maumauaʻi pea e teena tuʻinanauga agasala?

¹⁶ Ia faaauau pea ona teena tuʻinanauga agasala. E tusa lava pe ua uma ona e papatiso, e tatau ona teena pea tuʻinanauga agasala. Mātau le mea na tupu i se tamāloa e igoa iā Maurício. Na ia faia amioga faatauatane a o talavou. Mulimuli ane, na feiloaʻi o ia i ni Molimau a Ieova ma amata ona suʻesuʻe le Tusi Paia. Ina ua uma ona ia faia suiga i lona olaga, na papatiso ai loa i le tausaga 2002. E ui ua tele tausaga o auauna iā Ieova, ae na ia faapea mai: “Ou te taʻutino atu e i ai taimi ou te tauivi ai ma na tuʻinanauga.” E na te leʻi faatagaina na mea e faavaivaia ai o ia. Na ia faapea mai: “Na faamalosia aʻu i le iloa, o le teena o le faia o na tuʻinanauga e faafiafiaina ai Ieova.” *

17. E faapefea ona faalaeiauina oe i le mea na tupu iā Nabiha?

¹⁷ Ia tatalo mo le fesoasoani a Ieova ma faalagolago i lona agaga paia, ae lē o lou lava malosi. (Kala. 5:22; Fili. 4:6) E tatau ona tatou maumauaʻi e toese le tagata tuai, ma faaauau pea ona faia faapea. Mātau le mea na tupu i se fafine e igoa iā Nabiha. Na tuua e lona tamā o ia ina ua faatoʻā ono ona tausaga. Na ia faapea mai: “Na ou lagona ai le tuulafoaʻiina.” A o tuputupu aʻe, na avea o ia ma se tagata matuā maitaita ma inainā. Na ia faatauina atu fualaau faasāina, ma na faafalepuipuiina ai o ia mo ni tausaga. Na amata ona ia suʻesuʻeina le Tusi Paia ma Molimau a Ieova na asiasi atu i le falepuipui. Na faia e Nabiha suiga tetele i lona olaga. Na ia faapea mai: “Na faigofie ona ou tuua nisi masaniga leaga, ae na faigatā ona tuu laʻu ulaula.” E silia ma le tausaga o taumafai Nabiha e tuu  lana ulaula, ma na ia manumalo ai. Na faapefea ona ia faia? Na ia faapea mai: “O le mea sili na mafai ona fesoasoani iā te aʻu e taulau ai, o le tatalo e lē aunoa iā Ieova.” Ua ia taʻu atu nei i isi: “Ua ou mautinoa afai na mafai ona ou faia nei suiga e faafiafia ai Ieova, e mafai foʻi la ona faia e so o se tagata!” *

18. I le 1 Korinito 6:9-11, o le ā ua mafai ona faia e le toʻatele o auauna a le Atua?

¹⁸ I le uluaʻi senituri, e iai tane ma fafine na filifilia e Ieova e pule faatasi ma Keriso, na pulea muamua e tuʻinanauga agasala. O se faataʻitaʻiga, na latou faia le mulilua, tauatane, ma le gaoi. Ae o le fesoasoani a le agaga paia o le Atua, na mafai ai ona suia o latou uiga ma amioga. (Faitau le 1 Korinito 6:9-11.) E faapena foʻi aso nei, ua fesoasoani le Tusi Paia i le faitau miliona o tagata e fai suiga i o latou olaga. * Na mafai ona latou manumalo mai i masaniga leaga na mauaa iā i latou. O a latou faaaʻoaʻoga ua faamaonia ai e mafai foʻi ona suia o tatou uiga ma amioga ma foʻia masaniga leaga, ina ia agavaa ai mo le papatisoga.

19. O le ā o le a tatou talanoaina i le mataupu o sosoo mai?

¹⁹ E lē gata e mananaʻo tagata e fia papatiso e toese le tagata tuai, ae e tatau foʻi ona fai taumafaiga ina ia oofu ai i le tagata fou. O le a talanoaina i le mataupu o sosoo mai le auala e tatou te faia ai faapea, ma le auala e mafai ona fesoasoani ai isi iā i tatou.