1. Fa yu libi ben de fosi yu bigin studeri Bijbel?

 FA YU libi ben de fosi yu bigin studeri Bijbel nanga Yehovah Kotoigi? Furu fu wi no lobi fu prakseri a sani dati. Kande a denki fu a grontapu disi ben abi krakti tapu a denki nanga den fasi fu wi. Efu dati ben de so, dan wi ’no ben abi nowan howpu èn wi no ben sabi Gado na ini grontapu’ (Ef. 2:12). Ma wi libi kenki di wi bigin studeri Bijbel.

2. San yu kon si di yu bigin studeri Bijbel?

² Baka di yu bigin studeri Bijbel, yu kon si taki yu abi wan Papa na hemel di lobi yu trutru. Yu kon si taki efu yu ben wani taki Yehovah feni yu bun èn efu yu ben wani tron wan anbegiman fu en, dan yu ben o abi fu tyari bigi kenki kon na ini a fasi fa yu e libi èn fa yu e denki. Yu ben o abi fu leri fu hori yusrefi na den wet fu en di e sori san bun èn san ogri.​—Ef. 5:3-5.

3. Soleki fa Kolosesma 3:9, 10 e sori, dan san Yehovah wani taki wi du èn san wi o luku na ini na artikel disi?

³ Yehovah na wi Mekiman nanga wi hemel Papa, èn dati meki a abi a reti fu bosroiti fa a wani taki den anbegiman fu en e tyari densrefi. A wani tu taki fosi den dopu den musu kenki a fasi fa den ben de fosi èn den musu tapu nanga den sani di den ben e du. * (Leisi Kolosesma 3:9, 10.) Na artikel disi o yepi den sma di wani teki dopu fu piki dri aksi: (1) San den wortu „a fasi fa unu ben de fosi” wani taki? (2) Fu san ede Yehovah wani taki wi musu kenki a fasi fa wi ben de fosi? (3) Fa wi kan du dati? Efu wi dopu  kaba, dan na artikel disi o yepi wi fu sorgu taki wi no kon abi den fasi nanga den denki moro di wi ben abi fosi.

4. Fa wan sma e tyari ensrefi te a no „kenki a fasi fa a ben de”?

⁴ Nofo tron wan sma di no kenki a fasi fa a ben de fosi e denki èn e tyari ensrefi soleki fa a sondu skin wani. Kande a e denki ensrefi nomo, kande a e atibron esi, kande a no de nanga tangi, noso kande a abi heimemre. Kande a lobi luku porno, noso a e luku felem di abi hurudu nanga ogridu na ini. A no de fu taki dati a abi wan tu bun fasi èn kande a e firi sari fu den takru sani di a e taki noso du. Ma a no e angri fu kenki a fasi fa a e denki noso e tyari ensrefi.​—Gal. 5:19-21; 2 Tim. 3:2-5.

5. Fu san ede wi no musu fruwakti taki wi no o meki fowtu moro te wi kenki a fasi fa wi ben de fosi? Fruklari dati (Tori fu den apostel 3:19).

⁵ Fu di wi alamala na sondu sma, meki wi no man puru ala takru prakseri nanga firi fu wi ati nanga wi frustan. Son leisi wi e du noso taki sani di o hati wi bakaten (Yer. 17:9; Yak. 3:2). Ma te wi e kenki a fasi fa wi ben de fosi, dan wi o man basi den denki nanga den firi fu wi. Wi o tron nyun sma.​—Yes. 55:7; leisi Tori fu den apostel 3:19.

6. Fu san ede Yehovah e gi wi deki-ati fu tapu nanga den fowtu denki nanga gwenti di wi ben abi fosi?

⁶ Yehovah e gi wi deki-ati fu tapu nanga fowtu denki nanga gwenti, fu di a lobi wi trutru èn a wani taki wi de koloku (Yes. 48:17, 18). A sabi taki den sma di no e basi den firi fu den e tyari problema kon gi densrefi èn gi trawan. A e hati Yehovah te a e si taki dati pasa.

7. Sortu bosroiti wi musu teki, soleki fa Romesma 12:1, 2 e sori?

⁷ Son leisi, sonwan fu den mati nanga famiriman fu wi kan spotu wi fu di wi e pruberi fu kenki a fasi fa wi ben de fosi (1 Petr. 4:3, 4). Kande den feni taki wi abi a reti fu du san wi srefi wani èn taki wi no musu meki trawan taigi wi san wi musu du. Ma te yu luku en bun, den sma di no e gi yesi na den wet fu Gado e kori densrefi.  Fu taki en leti, de e du san a grontapu fu Satan wani. (Leisi Romesma 12:1, 2.) Wi alamala musu teki wan bosroiti. Wi kan tan abi den fasi di wi ben abi fosi èn di meki wi du sondu, noso wi kan meki Yehovah kenki wi kon tron a moro bun sma di wi kan de now.​—Yes. 64:8.

8. Sortu sani kan yepi yu fu basi fowtu denki nanga takru gwenti?

⁸ Yehovah sabi taki a o teki ten fu tapu nanga fowtu denki nanga takru gwenti (Ps. 103:13, 14). Ma nanga yepi fu a Wortu fu en, a yeye fu en, nanga en organisâsi, Yehovah e gi wi a koni, a krakti, nanga a yepi di wi abi fanowdu fu kenki a fasi fa wi de. A no de fu taki dati a yepi yu kaba. Meki wi go luku wan tu fu den sani di yu kan du moro fara fu kenki a fasi fa yu ben de fosi, so taki yu kan doro den marki fu teki dopu.

9. Fa Gado Wortu kan yepi yu?

⁹ Gebroiki Bijbel fu ondrosuku yusrefi bun. Gado Wortu de leki wan spikri. A kan yepi yu fu ondrosuku fa yu e denki, e taki, noso e tyari yusrefi (Yak. 1:22-25). A sma di e studeri Bijbel nanga yu, noso tra lepi Kresten kan sori yu fa yu kan ondrosuku yusrefi. Fu eksempre, den kan gebroiki Bijbel fu yepi yu fu kon sabi san na den bun fasi nanga den swakifasi fu yu. Den kan sori yu fa yu kan feni artikel di e gi Bijbel rai fa fu tapu nanga takru gwenti. Èn ala ten Yehovah de klariklari fu yepi yu. En na a moro bun sma di kan yepi yu fu di a sabi san de na ini yu ati (Odo 14:10; 15:11). Sobun, kon abi a gwenti fu begi èn fu studeri a Wortu fu en ibri dei.

10. San yu leri fu na ondrofenitori fu Elie?

¹⁰ Bribi taki den wet fu Yehovah na den moro bunwan. Ala sani di Yehovah e aksi wi fu du na fu wi eigi bun. Den sma di e hori densrefi na den wet fu Gado e kisi moro lespeki gi densrefi, den sabi san den musu du nanga den libi, èn den de koloku trutru (Ps. 19:7-11). Ma den sma di no e gi yesi na den wet fu Yehovah e kisi bigi problema fu di den e du den sani di a sondu skin wani. Luku san pasa nanga wan man di nen Elie, di a no ben gi yesi na den wet fu Gado. En papa nanga mama ben de sma di ben lobi Yehovah. Ma di a ben e gro kon bigi a ben abi takru mati. Dati meki a bigin gebroiki drugs, a ben e du hurudu, èn a ben e fufuru. Elie taki dati safrisafri a ben e tron wan faya-ati sma di ben lobi du ogri. A taki: „Eigenlijk mi ben e du ala sani di mi leri taki wan Kresten no musu du.” Ma Elie no ben frigiti san a ben leri di a ben yongu. Bakaten a bigin studeri Bijbel baka. A du ala muiti fu tapu nanga den takru gwenti di a ben abi èn a dopu na ini a yari 2000. Fa den wet fu Yehovah yepi en? Elie e taki: „Now mi e firi moro bun èn mi abi wan krin konsensi.” * Soleki fa na ondrofenitori disi e sori, dan den sma di no e gi yesi na den wet fu Yehovah e pori den eigi libi. Èn awinsi den no e gi yesi na den wet fu Yehovah, toku a de klariklari fu yepi den efu den wani kenki.

11. Sortu sani Yehovah no lobi kwetikweti?

¹¹ Leri fu tegu gi den sani di Yehovah no lobi (Ps. 97:10). Bijbel e taki dati Yehovah no lobi „sma di e luku na wan heimemre fasi, sma di e lei, sma di e kiri trawan  di no du nowan ogri” (Odo 6:16, 17). Boiti dati, „Yehovah no lobi den wan di e kiri sma èn di e bedrigi trawan” (Ps. 5:6). Yehovah e tegu gi den sani disi so te taki a pori ala den ogri sma na ini a ten fu Noa, fu di den ben furu grontapu nanga ogridu (Gen. 6:13). Luku wan tra eksempre. Yehovah ben meki a profeiti Maleaki skrifi taki Yehovah no lobi den sma di e kon nanga ala sortu triki, soso fu man broko trow nanga a trowpatna fu den. Te wan sma e du dati, dan Yehovah no o feni na anbegi fu en bun èn a o krutu a sma dati.​—Mal. 2:13-16; Hebr. 13:4.

12. San a wani taki fu „tegu gi ogri”?

¹² Yehovah wani taki wi musu „tegu gi ogri” (Rom. 12:9). Te wan sma e „tegu” gi wan sani, dan dati wani taki dati a no lobi a sani dati kwetikweti èn a e fisti gi en. Prakseri fa yu ben o firi efu wan sma e aksi yu fu nyan pori nyanyan. Denki nomo yu e denki fu a tori, dan yu wani braak kaba. Na so a musu de tu taki te wi e prakseri nomo fu du wan sani di Yehovah no feni bun, dan wi musu tegu gi dati kaba.

13. Fu san ede wi musu luku bun san wi e prakseri?

¹³ Luku bun san yu e prakseri. Den sani di wi e prakseri abi krakti tapu den sani di wi e du. Dati meki Yesus leri wi fu puru iniwan sani na wi prakseri di kan meki taki wi du wan seryusu sondu (Mat. 5:21, 22, 28, 29). Wi wani plisi wi hemel Papa, a no so? Dati meki wi no musu draidrai fu puru iniwan takru prakseri di e kon na ini wi ede.

14. San den sani di wi e taki e sori fu wi èn san wi musu aksi wisrefi?

¹⁴ Luku bun san yu e taki. Yesus taki: „San e komoto na a mofo e kon fu na ati” (Mat. 15:18). Iya, den sani di wi e taki kan sori suma wi de na inisei. Fu dati ede, aksi yusrefi den sani disi: ’Mi e weigri fu lei, srefi efu mi ben o kon na ini problema te mi taki san tru? Efu mi na wan sma di trow, dan mi e luku bun fu no gi sma a firi taki mi e suku den? Mi e luku bun taki mi no e taki nowan fisti tori nanga tra sma? Efu wan sma meki mi ati bron, mi e du muiti fu piki en na wan switifasi?’ A bun fu prakseri fu den aksi disi. Den sani di yu e taki de leki knopo na wan  krosi. Te yu lusu den knopo, dan a moro makelek fu puru a krosi na yu skin. Na so a de tu taki te yu e du ala muiti fu no kosi, lei, noso taki fisti sani, dan a o moro makelek fu kenki a fasi fa yu ben de fosi.

15. San a wani taki fu spikri a fasi fa wi ben de fosi „na wan postu”?

¹⁵ De klariklari fu tyari kenki kon. Na apostel Paulus ben taki wan moi sani fu sori o prenspari a de fu kenki a fasi fa wi e libi. A ben skrifi taki wi musu spikri a fasi fa wi ben de fosi „na wan postu” (Rom. 6:6). Sobun, wi wani meki muiti fu teki na eksempre fu Krestes. Dati meki wi musu de klariklari fu tapu nanga denki noso gwenti di Yehovah no lobi kwetikweti. Na so wawan wi o man abi wan krin konsensi èn wi o abi a howpu tu fu libi fu têgo (Yoh. 17:3; 1 Petr. 3:21). Hori na prakseri taki Yehovah no o kenki den wet fu en soso fu meki wi firi bun. Na presi fu dati, wi musu kenki a fasi fa wi de èn gi yesi na den wet fu en.​—Yes. 1:16-18; 55:9.

16. Fu san ede yu musu du ala muiti fu tan kakafutu gi takru lostu?

¹⁶ Tan kakafutu gi takru lostu. Awinsi yu dopu kaba, toku yu o abi fu tan kakafutu gi takru lostu. Luku san ben pasa nanga wan man di nen Maurício. Di a ben yongu a bigin libi wan homo-libi. Te fu kaba, a miti Yehovah Kotoigi èn a bigin studeri Bijbel. A tyari kenki kon na ini en libi èn a dopu na ini 2002. Aladi Maurício e dini Yehovah furu yari kaba, toku a e taki: „Mi no o lei. Son leisi mi ben musu kakafutu gi takru lostu.” Ma a no e meki a sani dati broko en saka. Na presi fu dati a e taki: „Te mi e prakseri taki Yehovah breiti te mi e kakafutu gi takru lostu, dan dati e gi mi deki-ati.” *

17. Fa na ondrofenitori fu Nabiha de wan deki-ati gi yu?

¹⁷ Begi Yehovah fu yepi yu èn frutrow tapu en santa yeye na presi fu frutrow tapu yu eigi krakti (Gal. 5:22; Fil. 4:6). Wi musu wroko tranga efu wi wani kenki a fasi fa wi ben de fosi èn efu wi no wani libi na a fasi dati moro. Luku na ondrofenitori fu wan uma di nen Nabiha. En papa ben gowe libi en di a ben abi siksi yari nomo. A e taki: „A sani dati hati mi srefisrefi.”  Di a ben e gro kon bigi a ben tron wan sma di ben e atibron esi èn a ben lobi feti. A bigin smokkel drugs, skowtu hori en èn a ben musu koti strafu wan tu yari. Den Kotoigi di ben kon luku en na strafu-oso bigin studeri Bijbel nanga en. Nabiha bigin tyari bigi kenki kon. A e taki: „A ben makelek fu tapu nanga wan tu fu den takru gwenti fu mi, ma a ben muilek gi mi fu tapu nanga smoko.” Nabiha feti moro leki wán yari fu tapu nanga smoko, èn te fu kaba a ben man du dati. Fa a du en? A e fruteri: „Wan prenspari sani di yepi mi, na taki mi begi Yehovah doronomo èn dati yepi mi fu tapu nanga smoko.” Now a e taigi tra sma: „Mi de seiker taki efu mi ben man tyari kenki kon so taki Yehovah feni mi bun, dan ala sma man du dati!” *

18. Soleki fa 1 Korentesma 6:9-11 e sori, dan san furu fu den futuboi fu Gado ben man du?

¹⁸ Na ini a ten fu den fosi Kresten, sonwan fu den man nanga uma di Yehovah ben teki fu tiri makandra nanga Krestes na hemel, ben abi takru gwenti fosi. Fu eksempre, den ben e du sutadu, den ben e libi wan homo-libi èn den ben e fufuru. Ma a santa yeye fu Gado yepi den fu kenki a fasi fa den ben de fosi. (Leisi 1 Korentesma 6:9-11.) Na so a de tu na ini a ten disi taki Bijbel yepi milyunmilyun sma fu tyari kenki kon na ini den libi. * Den ben man tapu nanga takru gwenti di den ben abi bun langa kaba. Na eksempre fu den e sori taki yu man kenki den fasi fu yu èn tapu nanga takru gwenti so taki yu kan dopu.

19. San wi o luku na ini a tra artikel?

¹⁹ Boiti taki den sma di wani teki dopu musu du muiti fu kenki a fasi fa den ben de fosi, den musu du muiti tu fu tron nyun sma di kisi nyun fasi. Na ini a tra artikel wi o luku fa wi kan du dati èn fa trawan kan yepi wi.