SIHLOKO LESIFUNDVWAKO 10
‘Ungabukhumula Buntfu Lobudzala’
“Khumulani buntfu lobudzala kanye nemikhuba yabo.”—KHOL. 3:9.
INGOMA 29 Kuphila Ngelibito Letfu
LOKUTAWUCOCWA NGAKO KULESIHLOKO *
1. Bekunjani kuphila kwakho ngaphambi kwekutsi ucale kudadisha liBhayibheli?
BEKUNJANI kuphila kwakho ngaphambi kwekutsi ucale kudadisha liBhayibheli naBoFakazi BaJehova? Labanyenti betfu abajabuli nabacabanga ngaloku. Kungenteka umbono walelive ngalokubi nalokuhle boyitsintsa kakhulu indlela lesicabanga ngayo kanye nebuntfu betfu. Nangabe kunjalo, ‘besihlala eveni sibe site litsemba, singamati naNkulunkulu.’ (Ef. 2:12) Kodvwa kudadisha liBhayibheli kwasisita sashintja indlela lebesiphila ngayo!
2. Yini lowayibona njengobe udadisha liBhayibheli?
2 Njengobe udadisha liBhayibheli, wabona kutsi unaBabe losezulwini lokutsandza kakhulu. Wabona kutsi nangabe ufuna kujabulisa Jehova futsi ube yincenye yemndeni wakhe kudzingeka wente lushintjo lolukhulu endleleni lophila ngayo nalocabanga ngayo. Wabona nekutsi kudzingeka uphile ngekuvumelana netimiso takhe letiphakeme.—Ef. 5:3-5.
3. Ngekusho kwaKubaseKholose 3:9, 10, yini Jehova lafuna siyente, futsi sitawucoca ngani kulesihloko?
3 Jehova, longuMdali wetfu naBabe wetfu wasezulwini, unelilungelo lekuncuma kutsi emalunga emndeni wakhe kufanele atiphatse njani. Ulindzele kutsi ngaphambi kwekutsi sibhajatiswe, setame ‘kukhumula buntfu lobudzala kanye nemikhuba yabo.’ * (Fundza KubaseKholose 3:9, 10.) Lesihloko sitawusita labo labafuna kubhajatiswa kutsi baphendvule nayi imibuto lemitsatfu: (1) Buyini “buntfu lobudzala”? (2) Yini leyenta Jehova afune kutsi sibukhumule? (3) Singabukhumula njani? Lesihloko sitawuphindze sisite labo lababhajatisiwe kutsi bangaphindzi bente tintfo nome bacabange ngendlela lebebenta ngayo ngaphambi kwekutsi bakhumule lobuntfu lobudzala.
BUYINI “BUNTFU LOBUDZALA”?
4. Yini leyentiwa ngumuntfu logcoke “buntfu lobudzala”?
4 Umuntfu logcoke “buntfu lobudzala” uvame kucabanga futsi ente tintfo ngendlela lecondziswa yinyama. Uvame kuticabangela yena, asheshe atfukutsele, angabongi futsi atigcabhe. Kungenteka uyakutsandza kubuka tintfo letikhombisa kungcola nekubukela ema-movie lanekutiphatsa kabi nobe budlova. Unebuntfu lobuhle futsi kungenteka uyatisola ngetintfo letimbi latentako nobe latikhulumako. Kodvwa akatimiseli kushintja indlela lacabanga ngayo kanye nendlela lenta ngayo tintfo.—Gal. 5:19-21; 2 Thim. 3:2-5.
Nasikhumula “buntfu lobudzala,” sibese asisalawulwa yimicabango netifiso tenyama (Buka sigaba 5) *
5. Singakhona yini kubukhumula bonkhe buntfu lobudzala? Chaza. (Imisebenti 3:19)
5 Sonkhe sinesono, angeke sikhone kuyisusa yonkhe imicabango lemibi etingcondvweni tetfu netifiso letimbi etinhlitiyweni tetfu. Ngaletinye tikhatsi sitawenta lokutsite nobe sisho lokutsite lesitawutisola ngako. (Jer. 17:9; Jak. 3:2) Kodvwa nasikhumula buntfu lobudzala sibese asisacondziswa yimicabango kanye netento lokulawulwa yinyama. Sibese siyashintja kuloko besingiko.—Isa. 55:7; fundza Imisebenti 3:19.
6. Yini leyenta Jehova asicele kutsi siyekele imicabango lemibi nemikhuba lemibi lengumphumela webuntfu lobudzala?
6 Jehova usicela kutsi siyekele imicabango lemibi kanye nemikhuba lemibi ngobe usitsandza kakhulu futsi ufuna sikujabulele kuphila. (Isa. 48:17, 18) Uyati kutsi nangabe singalwisani netifiso letimbi sitivisa tsine buhlungu futsi sivise nalabanye. Kumphatsa kabi kusibona siva buhlungu nobe nasivisa labanye buhlungu.
7. Ngekusho kwembhalo waKubaseRoma 12:1, 2, ngutiphi tincumo lokufanele sitente?
7 Labanye bangani betfu nemalunga emndeni bangacale bahlekise ngatsi ngenca yekutsi setama kwenta lushintjo ekuphileni kwetfu. (1 Phet. 4:3, 4) Bangasitjela kutsi sinelilungelo lekwenta nobe yini lesifuna kuyenta nekutsi akukafaneli sivume kutjelwa ngumuntfu kutsi senteni. Kodvwa labo labangatemukeli timiso taJehova bete inkhululeko, ecinisweni bavumela lelive lelibuswa nguSathane kutsi libacondzise. (Fundza KubaseRoma 12:1, 2.) Sonkhe kufanele sente sincumo: Sitawuchubeka yini sigcoke buntfu betfu lobudzala lobulawulwa sono kanye nelive laSathane, nobe sitawuvumela Jehova kutsi asishintje sibe bantfu labancono.—Isa. 64:8.
‘UNGABUKHUMULA’ NJANI BUNTFU LOBUDZALA?
8. Yini lengasisita kutsi sigweme imicabango lemibi nemikhuba lemibi?
8 Jehova uyati kutsi kutasitsatsa sikhatsi kanye nemetamo kuze sigweme imicabango lemibi kanye nemikhuba lemibi. (Hla. 103:13, 14) Nobe kunjalo, Jehova usebentisa liVi lakhe, umoya wakhe nenhlangano yakhe kuze asinike kuhlakanipha, emandla aphindze asisekele kuze sente lushintjo. Siyaciniseka kutsi sewuvele ukusitile. Asesicoce ngaletinye tintfo longatenta kuze uchubeke ukhumula buntfu lobudzala futsi ukufanele kubhajatiswa.
9. LiVi laNkulunkulu lingakusita kutsi wenteni?
9 Sebentisa liBhayibheli kuze utihlole. LiVi laNkulunkulu linjengesibuko; lingakusita ubone indlela locabanga ngayo, lokhuluma ngayo nalowenta ngayo. (Jak. 1:22-25) Lona lodadisha nawe liBhayibheli kanye nalamanye emaKhristu lavutsiwe bangakweluleka. Sibonelo nje, bangasebentisa liBhayibheli kuze bakusite ubone lawenta kahle khona nalapho ubutsakatsaka khona. Bangakufundzisa kutsi ungasitfola njani seluleko lesisekelwe eBhayibhelini lesimayelana nendlela longancoba ngayo imikhuba lemibi. Jehova uhlale akulungele kukusita. Nguye lowati kancono kutsi angakusita njani futsi uyakwati loko lokusenhlitiyweni yakho. (Taga 14:10; 15:11) Ngako hlale uthantaza kuye futsi udadishe liVi lakhe onkhe malanga.
10. Yini loyifundze kuloko lokwenteka ku-Elie?
10 Ciniseka kutsi timiso taJehova tilungile. Singazuza kuto tonkhe tintfo Jehova lasicela kutsi sitente. Labo labaphila ngekuvumelana netimiso takhe bativa bahloniphekile, banenjongo ekuphileni futsi bajabule mbamba. (Hla. 19:7-11) Kodvwa labo labangatilaleli timiso taJehova babhekana nemiphumela lebuhlungu leletfwa kwenta imisebenti yenyama. Naka naku lokushiwo ngu-Elie mayelana nekungatilaleli timiso taNkulunkulu. Wakhuliswa batali labatsandza Jehova. Kodvwa ngesikhatsi aseminyakeni yekutfomba waba nebangani lababi. Wacala kusebentisa kabi tidzakamiva, watiphatsa kabi futsi waba sigebengu. Elie utsi waba nebudlova kakhulu futsi besekasheshe atfukutsele. Naku lakusho: “Ngakwenta cishe konkhe lebengifundziswe kutsi ngingakwenti nangingumKhristu.” Nobe kunjalo, Elie akazange akukhohlwe loko lakufundza nakasemncane. Waphindze wadadisha liBhayibheli. Watimisela kuyekela imikhuba lemibi futsi wabhajatiswa nga-2000. Kumsite njani kuphila ngekuvumelana netimiso taJehova? Elie utsi: “Nyalo senginekuthula kwengcondvo nanembeza lomsulwa.” * Njengobe lendzaba isikhombisa, labo labangaphili ngekuvumelana netimiso taJehova batilimata bona. Nobe kunjalo, Jehova utimisele kubasita kutsi bashintje.
11. Ngutiphi tintfo Jehova latenyanyako?
11 Kwenyanye loko Jehova lakwenyanyako. (Hla. 97:10) LiBhayibheli lisitjela kutsi Jehova uyakwenyanya ‘kutiphakamisa, kukhuluma emanga, nekubulala bantfu labangenacala.’ (Taga 6:16, 17) Liphindze lisitjele kutsi “uyabenyanya bantfu labanebudlova nalabakhohlisako.” (Hla. 5:6) Jehova utenyanya kakhulu letintfo, kungako abhubhisa bantfu lababi ngemalanga aNowa ngobe umhlaba bewugcwele budlova ngenca yabo. (Gen. 6:13) Nasi lesinye sibonelo. Asebentisa umphrofethi Malakhi, Jehova watsi uyabenyanya labo labasebentisa bucili kuze badivose bantfu labashade nabo labangenacala. Nkulunkulu akakwemukeli kukhonta kwabo futsi utawubenta balandzise ngaloko labakwentile.—Mal. 2:13-16; Heb. 13:4.
Kwenta intfo Jehova latsi yimbi kufanele sikwenyanye njengekudla kudla lokubolile (Buka tigaba 11-12)
12. Kusho kutsini ‘kutondza lokubi’?
12 Jehova ufuna ‘sikutondze lokubi.’ (Rom. 12:9) Leligama lelitsi ‘kutondza’ lisho kuyenyanya kakhulu intfo letsite, ikucansule. Asewucabange nje umuntfu akunika kudla lokubolile kutsi ukudle. Kucabanga ngako nje kuhlatimulisa umtimba. Kucabanga ngekwenta intfo Jehova latsi yimbi kufanele kusente sitive ngendlela lefanako.
13. Kubaluleke ngani kutsi sisuse imicabango lemibi etingcondvweni tetfu?
13 Tigadze tintfo loticabangako. Tintfo lesiticabangako tiyasifaka sandla kuloko lesikwentako. Kungako Jesu asifundzisa kutsi sikhweshise imicabango lengasenta sigcine sente sono lesikhulu. (Mat. 5:21, 22, 28, 29) Sifuna kumjabulisa Babe wetfu wasezulwini. Kungako kubalulekile kutsi sisheshe siyisuse etingcondvweni tetfu imicabango lemibi!
14. Loko lesikukhulumako kuvetani ngatsi, futsi ngumiphi imibuto lokufanele sitibute yona?
14 Lawula lulwimi lwakho. Jesu watsi: “Tintfo letiphuma emlonyeni tivela enhlitiyweni.” (Mat. 15:18) Tintfo lesitikhulumako tiveta kutsi sibantfu labanjani. Ngako tibute: ‘Ngihlale ngikhuluma liciniso yini ngisho nobe kwenta njalo kungangifaka enkingeni? Nangabe ngishadile, angidlali yini ngelutsandvo nebantfu bebulili lobehlukile? Ngiyakubalekela yini kukhuluma tintfo letingcolile? Nangabe umuntfu angikwatisa, ngimphendvula kahle yini?’ Kutakusita kucabanga ngalemibuto. Tintfo lotikhulumako tingafananiswa nemtfungo. Nangabe wetama kamatima kungawakhulumi emanga, tintfo letingcolile nobe letilimatako, utakutfola kumelula kukhumula lobuntfu lobudzala.
15. Kusho kutsini kubetsela buntfu betfu lobudzala “elugodvweni”?
15 Timisele kwenta nobe yini ledzingekile. Umphostoli Pawula wasebentisa umfanekiso kuze asifundzise kutsi kubaluleke kangakanani kwenta lushintjo ekuphileni kwetfu. Wabhala watsi kufanele sibetsele buntfu betfu lobudzala “elugodvweni.” (Rom. 6:6) Ngalamanye emagama, kufanele silingise sibonelo saKhristu. Kufanele siyekele kucabanga ngendlela Jehova langayitsandzi futsi siyekele nekwenta tintfo latenyanyako. Nangabe senta njalo sitawuba nanembeza lomsulwa futsi sibe nelitsemba lekuphila kuze kube phakadze. (Joh. 17:3; 1 Phet. 3:21) Khumbula kutsi Jehova angeke aze ashintje timiso takhe kuze nje tivumelane naloko tsine lesikufunako. Kunaloko, kufanele sishintje buntfu betfu futsi silalele timiso takhe.—Isa. 1:16-18; 55:9.
16. Yini leyenta kudzingeke kutsi uchubeke ulwa netifiso letimbi?
16 Chubeka ulwa netifiso letimbi. Ngisho nangemuva kwekubhajatiswa, kutawudzingeka kutsi uchubeke ulwa netifiso letimbi. Cabanga ngesibonelo saMaurício. Ngesikhatsi asemusha, wacala kutsandzana nebantfu bebulili lobufana nebakhe. Ngekuhamba kwesikhatsi, wahlangana naBoFakazi BaJehova futsi wacala kudadisha liBhayibheli. Ngemuva kwekwenta lushintjo ekuphileni kwakhe, wabhajatiswa nga-2002. Nanobe sekakhonte Jehova iminyaka leminyenti, Maurício utsi: “Ngaletinye tikhatsi kudzingeke kutsi ngilwe netifiso letimbi.” Akakuvumeli loko kutsi kumdvumate. Kunaloko utsi: “Kuyangidvudvuta kwati kutsi nangingakwenti loko lengikufisako, ngijabulisa Jehova.” *
17. Yini lekukhutsatile kulokwenteka kuNabiha?
17 Thantaza kuJehova ucele akusite futsi wetsembele emoyeni wakhe longcwele hhayi emandleni akho. (Gal. 5:22; Fil. 4:6) Kufanele sisebente kamatima nangabe sifuna kukhumula buntfu lobudzala futsi singaphindzi sibugcoke. Cabanga ngalokwenteka kuNabiha. Babe wakhe wamshiya ngesikhatsi aneminyaka lengu-6 nje kuphela. Nabiha utsi: “Loko kwangivisa buhlungu kakhulu.” Njengobe akhula, wacala kusheshe atfukutsele, washushumbisa tidzakamiva, waboshwa futsi wacitsa iminyaka ejele. BoFakazi lebebavakashela lelijele bekakulo bacala kudadisha naye liBhayibheli futsi Nabiha wenta lushintjo lolukhulu ekuphileni kwakhe. Utsi: “Leminye imikhuba yami kwaba melula kusheshe ngiyiyeke, kodvwa bekumatima kakhulu kuyekela kubhema.” Kwaphela sikhatsi lesingetulu kwemnyaka etama kuyekela kubhema futsi wagcine akhonile. Wasitwa yini? Utsi: “Lokwangisita kakhulu kuhlale ngithantaza kuJehova.” Uchubeka atsi: “Nangabe mine ngakhona kwenta lushintjo ekuphileni kwami kuze ngijabulise Jehova nalabanye bangakhona!” *
UNGAKUFANELA KUBHAJATISWA!
18. Ngekusho kwa-1 KubaseKhorinte 6:9-11, yini tikhonti taNkulunkulu letinyenti letikhone kuyenta?
18 Ngesikhatsi semaKhristu ekucala, lamanye kulamadvodza nebafati labakhetfwa nguJehova kutsi babuse naKhristu bebake benta tintfo letimbi. Sibonelo nje, labanye babo bebaphinga, batitabani futsi batigebengu. Kodvwa basitwa ngumoya longcwele waNkulunkulu, bakhona kwenta lushintjo endleleni lebebaphila ngayo. (Fundza 1 KubaseKhorinte 6:9-11.) Nalamuhla liBhayibheli lisite tigidzi tebantfu kutsi bente lushintjo ekuphileni kwabo. * Bakhonile kuyekela imikhuba lebekumatima kakhulu kuyiyekela. Sibonelo sabo siyakhombisa kutsi nawe ungalwenta lushintjo ekuphileni kwakho futsi uncobe imikhuba lemibi kuze ukufanele kubhajatiswa.
19. Sitawucoca ngani esihlokweni lesilandzelako?
19 Ngetulu kwekukhumula buntfu lobudzala, labo labafuna kubhajatiswa kufanele bagcoke buntfu lobusha. Esihlokweni lesilandzelako sitawucoca ngekutsi singakwenta njani loko, nekutsi labanye bangasisita njani.
INGOMA 41 Lalela Umthantazo Wami
^ sig. 5 Kuze sigcine sibhajatisiwe, kufanele sitimisele kwenta lushintjo endleleni lesiphila ngayo. Lesihloko sitasisita sibone kutsi singabona ngani kutsi umuntfu ugcoke buntfu lobudzala, yini leyenta kudzingeke kutsi sibukhumule, nekutsi singabukhumula njani. Sihloko lesilandzelako sitasisita sibone kutsi singachubeka njani sigcoke buntfu lobusha nangemuva kwekubhajatiswa.
^ sig. 3 INCHAZELO YELIGAMA: ‘Kukhumula buntfu lobudzala’ kusho kuyekela kucabanga ngendlela lengamjabulisi Jehova nekwenta tintfo letingamjabulisi. Letintfo kufanele sitiyekele ngaphambi kwekutsi sibhajatiswe.—Ef. 4:22.
^ sig. 10 Kuze ufundze lokunyenti ngalendzaba, buka sihloko lesitsi “LiBhayibheli Liyakugucula Kuphila—‘Bengikudzinga Kubuyela KuJehova,’” ku-Sicongosekulindza sa-April 1, 2012.
^ sig. 16 Kuze utfole lokunyenti ngalendzaba, buka sihloko lesitsi “IBhayibheli Lishintsha Ukuphila—‘Babengeve Benomusa Kimi,’” ku-Sicongosekulindza saMay 1, 2012, lesitfolakala ngesiZulu.
^ sig. 17 Kuze utfole lokunyenti ngalendzaba, buka sihloko lesitsi “IBhayibheli Lishintsha Ukuphila—‘Ngaba Intombazane Eyisidlamlilo,’” ku-Sicongosekulindza sa-October 1, 2012, lesitfolakala ngesiZulu.
^ sig. 18 Buka libhokisi lelitsi “ LiBhayibheli Liyakugucula Kuphila.”
^ sig. 64 KUCHAZWA KWESITFOMBE: Kuyekela imicabango lemibi nemikhuba lemibi kunjengekukhumula imphahla.
