ARTÍCULO RÍ MUʼNIGAJMAA 10
Ikháán ma̱ndoo matriʼkuminaʼ
“Guriʼku̱u̱ xóo xa̱bu̱ nindxa̱la nákha ginii ga̱jma̱a̱ rí nuni̱la” (COL. 3:9).
AJMÚÚ 29 Guʼyamajkuíí rí mbiʼyulú
RÍ MUʼNIGAJMAA *
1. Xú káʼnii nikuwáánʼ nákha xóó tségiʼdíi muʼnigajmaa Biblia rá.
XÓO nitani̱ ikháán nákha xóó tsétanigajmaa Biblia gajmiáanʼ Testigos de Jeobá rá. Mbaʼánʼ dí ikháán asndu tsíyulú marmáʼáan a̱jkiu̱lú. Mbáa niʼni ga̱jma̱a̱ nini̱ndxu̱lú xóo nuthi xa̱bu̱ numbaaʼ dí nindxu̱u̱ má májánʼ. Á mu xúʼko̱ niʼni, nda̱a̱ nimbá dí niguaʼti̱i̱n ni má “tuguaʼdaa mbáa Dios náa numbaaʼ” (Efes. 2:12). Mú xúgíʼ rúʼko̱ nixtiʼkhu̱u̱ índo̱ niʼnigajmaa Biblia.
2. Ndiéjunʼ nijmañaaʼ ikháán índo̱ nitanigajma̱a̱ Biblia rá.
2 Índo̱ na̱dxu̱ʼ ratanigajmaa Biblia, ikháán nijmañaaʼ dí xtáa mbáa Ana̱a̱ʼ mekhuíí bi̱ nandoo kaʼyaaʼ wéñuʼ. Nikruaʼaʼ dí ndayóoʼ matriʼkuminaʼ rí xóo natani ga̱jma̱a̱ rí xóo natatsaʼwáminaʼ á mu nandaaʼ matani dí nandoo Jeobá ga̱jma̱a̱ manindxa̱a̱ xa̱bi̱i̱ ikhaa. Ga̱jma̱a̱ ndiyóoʼ majmañaaʼ mbiyamajkuíí ikha ndrígóo Dios (Efes. 5:3-5).
3. a) Xó má naʼthí náa Colosenses 3:9, 10, ndiéjunʼ eyoo Jeobá muʼni rá. b) Ndiéjunʼ gámbáyulú artículo rígi̱ rá.
3 Numuu dí Jeobá nindxu̱u̱ Anu̱lú ga̱jma̱a̱ bi̱ Niʼniáánʼ, ikhaa kaʼyoo maʼthúlú xú káʼnii gíʼmaa muni e̱ji̱i̱n. Ikha jngóo bi̱ nandún majngún iyááʼ, ikhaa naʼthúún: “Guriʼku̱u̱ xóo xa̱bu̱ nindxa̱la nákha ginii ga̱jma̱a̱ rí nuni̱la” * (atraxnuu Colosenses 3:9, 10). * Lá natatsaʼwáminaʼ majnguáanʼ iyááʼ ráʼ. Náa artículo rígi̱ mambáyaʼ matriʼña̱a̱ ajtsú graxe̱: Ndiéjunʼ nindxu̱u̱ “xóo xa̱bu̱ nindxa̱la nákha ginii” rá. Ndíjkha rí Jeobá nandoo dí muniʼñááʼ dí niʼni nákha ginii rá. Ga̱jma̱a̱ xú káʼnii gáʼngulú muniʼñááʼ rá. Ma̱ngaa á mu nijngúlú má iyááʼ, artículo rígi̱ mambáyulú dí xágutangaánʼ muʼni “dí niʼni nákha ginii”.
NDIÉJUNʼ NINDXU̱U̱ “XÓO XA̱BU̱ NINDXA̱LA NÁKHA GINII” RÁ.
4. Xú kaʼnii eʼni mbáa bi̱ na̱nguá eriʼkhu̱u̱ xóo eʼni nákha ginii rá.
4 Bi̱ naʼni xó má “niʼni nákha ginii” nandxa̱ʼwáminaʼ ga̱jma̱a̱ naʼni xó má naʼni xuwiʼ, xóo muʼthá, xó má naguʼwuun naʼni bi̱ nakiéʼkúun má xúʼko̱. Mbáa, nakiʼnáa mbá nacha̱, nandoo maguma i̱ndó dí nandoo ikhaa, na̱nguá gíʼdoo gamajkuu ga̱jma̱a̱ naʼni mbamína. Mbáa naniguuʼ mbaʼyoo pornografía ga̱jma̱a̱ película náa nuni aʼkhá xa̱bu̱ o náa nuxmijná wéñuʼ. Mú mbáa nindxu̱u̱ májáanʼ xa̱bu̱ ga̱jma̱a̱ asndu nagawúun edxu̱u̱ dí naʼni o dí naʼthí, mú ndayóoʼ maʼni tsiakimínáʼ mariʼkhu̱u̱ xóo endxa̱ʼwáminaʼ ga̱jma̱a̱ rí xóo naʼni (Gál. 5:19-21; 2 Tim. 3:2-5).
Índo̱ nuniʼñáʼ dí niʼni nákha ginii nánguá eʼni dí raʼkhí ni má nánguá “ni̱ndxu̱lú xóo nákha ginii”. (Atayáá kutriga̱ 5). *
5. Ndiéjunʼ eyóoʼ muʼni á mu nandulú muniʼñáʼ ranindxulúʼ xóo nákha ginii rá. (Hechos 3:19.)
5 Numuu rí ni̱ndxu̱lú xa̱bu̱ aʼkhá, nimbáa dí ikháanʼ xáʼngo̱o̱ gáʼni gámbáa mbájkhu dí nundxaʼwamíjná dí raʼkhí, ga̱jma̱a̱ dí nagua̱ʼa̱ muʼni. Nguáná nuʼthá o nuʼni mbá dí nda̱wa̱á nagáwi̱i̱nʼ a̱jkiu̱lú (Jer. 17:9; Sant. 3:2). Mú, índo̱ nuniʼñáʼ dí niʼni nákha ginii nánguá eʼni dí raʼkhí ni má nánguá ni̱ndxu̱lú xóo nákha ginii (Is. 55:7; atraxnuu Hechos 3:19). *
6. Ndíjkha naʼthúlú Jeobá dí gíʼmaa muniʼñááʼ rundxaʼwamíjna dí raʼkhí ga̱jma̱a̱ i̱ʼwáʼ dí niʼni nákha ginii rá.
6 Jeobá nandoo kaʼyulú wéñuʼ ga̱jma̱a̱ nandoo dí makuwáánʼ májánʼ, ikha jngóo naʼthúlú dí gíʼmaa muniʼñááʼ rundxaʼwamíjna dí raʼkhí ga̱jma̱a̱ i̱ʼwáʼ dí niʼni nákha ginii (Is. 48:17, 18). Ikhaa ndaʼyoo rí á mu nuʼni dí raʼkhí, nuʼni gawumijná má ikháanʼ ga̱jma̱a̱ nuʼni gawúún eʼwíinʼ, ikhaa nagawúunʼ wéñuʼ índo̱ ndaʼyoo dí narígá xúʼko̱.
7. Xó má naʼthí náa Romanos 12:1, 2, ndiéjunʼ gíʼmaa muraʼwíí muʼni rá.
7 Mbáa nguáná tikhun bi̱ kuʼñúún ga̱jma̱a̱ bi̱ nambáxulú gajmiúlú mutsijmáánʼ numuu rí nuʼnimi̱jna̱ muriʼkhu̱u̱ xóo xa̱bu̱ ni̱ndxu̱lú (1 Ped. 4:3, 4). Mbáa muthulú dí ma̱ndoo makuwáánʼ xó má eyulú dí nimbáa xáʼyóoʼ maʼthúlú ndiéjunʼ gíʼmaa muʼni. Mú bi̱ nunigaʼduunʼ ikha ndrígóo Jeobá na̱nguá kúwá májánʼ. Nuniñami̱jna̱ muni xóo nandoo numbaaʼ ndrígóo Gixa̱a̱ (atraxnuu Romanos 12:1, 2). * Xúgiáánʼ ma̱ndoo muraʼwíí mbá dí muʼni: Á mu muʼni má xúʼko̱ xó má eʼni nákha ginii xó má eyoo numbaaʼ ndrígóo Gixa̱a̱ o muniʼñámíjná dí Jeobá mariʼkuáánʼ mu manindxu̱lúʼ itháan májáanʼ xa̱bu̱ (Is. 64:8).
XÚ KÁʼNII GÁNDOO MATRIʼKUMINAʼ RÁ.
8. Ndiéjunʼ gambáyulú muniʼñááʼ rundxaʼwamíjna ga̱jma̱a̱ muniʼñááʼ muʼni dí raʼkhí rá.
8 Jeobá ndaʼyoo dí ndayóoʼ tsiakii ga̱jma̱a̱ mbayuuʼ mbiʼi muniʼñáaʼ ru̱ʼni̱ dí raʼkhí (Sal. 103:13, 14). Mú ikhaa najmuu Ajngá rawuunʼ, najmuu tsiakii ndrígóo ga̱jma̱a̱ najmuu xuajñuu mu maxnúlú ku̱ma̱, maxnúlú tsiakii ga̱jma̱a̱ mambáyulú náa gáʼyóoʼ muriʼkumijnálu. Mbáa ikháán má nitayáá xú káʼnii Jeobá nimbáyáaʼ. Rí xúgi̱, mbuʼyáá ndiéjunʼ i̱ʼwáʼ gándoo matani̱ mu matatsiʼñáʼ rí xóo ninindxa̱ʼ nákha ginii mu ma̱ndoo majnguáanʼ iyááʼ.
9. Índo̱ nuraxnulú Ajngá rawuunʼ Dios, ndiéjunʼ gambáyulú muʼni rá.
9 Gajmaaʼ Biblia mu ma̱ta̱ya̱a̱ náa eyóoʼ matriʼkuminaʼ. Ajngá rawuunʼ Dios nindxu̱u̱ xóo mbá niwanʼ, ma̱ndoo mambáyaʼ ma̱ta̱ya̱a̱ xóo etatsaʼwáminaʼ, xóo erathá ga̱jma̱a̱ xóo tani (Sant. 1:22-25). Bi̱ naʼsngáaʼ ga̱jma̱a̱ eʼwíinʼ a̱ngiu̱lú bi̱ mbayuuʼ má kúwá rajmañún dí gajkhun ma̱ndoo muxnaʼ ikha. Xú káʼnii gúni xá. Mumbayáaʼ ga̱jma̱a̱ dí naʼthí Biblia mu matayaa á mu dí rígá tikhu dí natani má májánʼ ga̱jma̱a̱ á mu rígá dí ndayóoʼ xóó, ma̱ngaa musngáaʼ mataʼyáʼ i̱ʼwáʼ i̱yi̱i̱ʼ dí nagájnuu náa Biblia náa mambáyaʼ matatsiʼñááʼ ratani̱ dí raʼkhí. Ma̱ngaa Jeobá xtáa má xúʼko̱ xawii mambáyaʼ. Nda̱wa̱a̱ imba̱a̱ xóo ikhaa bi̱ mambáyaʼ numuu rí ikhaa ndaʼyoo ndiéjunʼ gíwanʼ náa a̱jkia̱nʼ (Prov. 14:10; 15:11). Ikha jngó, gaguʼwaanʼ maratakháñii ga̱jma̱a̱ matanigajmaa̱ Ajngá rawuunʼ xúgíʼ mbiʼi.
10. Ndiéjunʼ ejmañaaʼ ikháán rí xóo nigíʼnuu Elie rá.
10 Atayáá gajkhun dí xúgíʼ ikha ndrígóo Jeobá nindxu̱u̱ itháan májánʼ. Xúgíʼ dí naʼthúlú Jeobá nindxu̱u̱ mu mambáyulú makuwáánʼ májánʼ. Bi̱ nduyamajkuíí ikha ndrígóo Jeobá nundxaʼwamíjná májánʼ, nakúwá itháan májánʼ ga̱jma̱a̱ nakúwá itháan tsímáá (Sal. 19:7-11). Mú, bi̱ na̱nguá enimbánii ikha ndrígóo, ikhiin má numíniiʼ. Guʼyáá dí naʼthí mbáa xa̱biya̱ bi̱ mbiʼyuu Elie dí narígá índo̱ mbáa nanújngorámuuʼ ikha ndrígóo Jeobá. Maski ajndu anu̱u̱ ga̱jma̱a̱ ru̱dúu̱ nindúún kuyáá Jeobá, mú índo̱ ikhaa niʼni wáá kayuʼ nikhi̱i̱ nimbájxu̱u̱ gajmíi̱n bi̱ nini dí raʼkhí. Nigi̱ʼdu̱u̱ nitsikhá droga, niʼtsíin gajmíinʼ gu̱ʼu̱ ga̱jma̱a̱ niʼni kuʼwáʼ. Niʼthí dí mámbá mbiʼi nixtiʼkhu̱u̱ kayuʼ xóo ninindxu̱u̱ ga̱jma̱a̱ nijmangu̱u̱ itháan. Ikhaa naʼthí: “Nini xúgíʼ dí nisngóʼ dí ragíʼmaa maʼni mbáa cristiano”. Mú na̱nguá nimbumuu dí niʼsngóo anu̱u̱ ga̱jma̱a̱ ru̱dúu̱ nákha chíʼgíiʼ. Ikha jngóo nda̱wa̱á nigi̱ʼdu̱u̱ niʼnigajmaa Biblia mbu̱júu̱ʼ. Niʼniminaʼ wéñuʼ mu maniñuuʼ xúgíʼ dí raʼkhí niʼni, nda̱wa̱á nijngúun iyááʼ nákha tsiguʼ 2000. Ndiéjunʼ nimbáyúu índo̱ niʼnimbánuu ikha ndrígóo Jeobá xá. Ikhaa naʼthí: “Niʼni tsímáá a̱jkiu̱nʼ ga̱jma̱a̱ naʼni magúʼdoʼ mbá ku̱ma̱ májánʼ”. * Xó má eʼyáá náa xkri̱da ndrígóo Elie, bi̱ nuni gaʼduunʼ munimbánii ikha ndrígóo Jeobá, ikhiin má eni ginamijná. Mú Jeobá má nambáñun muriʼkhumijná.
11. Ndiéjunʼ dí naguiyuuʼ kaʼyoo Jeobá rá.
11 Gajmañaaʼ maguiyaaʼ xtayáá dí Jeobá naguiyuuʼ kaʼyoo (Sal. 97:10). Náa Biblia naʼthí dí Jeobá naguiyuuʼ kaʼñún ‹bi̱ nuxuximi̱jna̱, bi̱ nuni nduwaʼ, ga̱jma̱a̱ bi̱ nuradíin bi̱ nda̱a̱ rí eni̱› (Prov. 6:16, 17). Ma̱ngaa “xa̱bu̱ bi̱ nagudíin a̱ngui̱i̱n ga̱jma̱a̱ bi̱ naʼni nduwaʼ” (Sal. 5:6). Jeobá naguiyuuʼ dí maguma xúgíʼ rígi̱, ikha jngóo dí niʼnigámbíin xúgínʼ bi̱ nini dí raʼkhí nákha nixtáa Noé, numuu rí nini dí marígá wéñuʼ dí raʼkhí náa tsu̱du̱u̱ Ku̱ba̱ʼ (Gén. 6:13). I̱mba̱ rí Jeobá nditháan tsíyoo gáʼyoo nindxu̱u̱ rí niʼthúu̱n gaʼyee Malaquías: Dí mbáa maʼninduwaaʼ a̱ʼgiu̱u̱ i̱ndó numuu rí nandoo maxnúu divorcio. Dios nditháan tsíyoo rí mbuyamajkuíí xa̱bu̱ bi̱ nuni xúʼko̱ ga̱jma̱a̱ ikhaa mandi̱ʼi̱i̱n cuenta (Mal. 2:13-16; Heb. 13:4).
Xó má naguiyulú eʼni mbá ganitsu dí niga̱yu̱u̱ o dí ni̱ʼgá xúʼko̱ má gíʼmaa maguiyulúʼ muʼni mbá dí Jeobá naʼthí dí raʼkhí. (Atayáá kutriga̱ 11 ga̱jma̱a̱ 12).
12. Ndiéjunʼ eyoo gáʼthúu̱n rí maguiyulúʼ kuʼyáá dí raʼkhí rá.
12 Jeobá naʼtáñajunlú: “Gawiyala kuya̱a̱ dí ra̱májánʼ” (Rom. 12:9). Ajngáa gawiyala naʼni mundxaʼwamíjná mbá dí nditháan tséyóoʼ muʼni o mbuʼyáá. Mbá dí ndayóoʼ muʼnigaʼduun mbá kayuʼ. Gundxaʼwámíjná xú káʼnii gúʼni á mu nutulúʼ mu̱ʼphu̱ mbá xúbá ganitsu dí niga̱yu̱u̱ o dí ni̱ʼgá. Mbá núkhu̱ má e̱ʼkhu̱ awunlú eʼni dí i̱ndó nundxaʼwamíjná. Xúʼko̱ má kayuuʼ gíʼmaa makumulúʼ índo̱ nundxaʼwamíjná muʼni mbá dí Jeobá naʼthí dí ragíʼmaa muʼni.
13. Ndíjkha rí ndayóoʼ muñewa̱a̱n dí nundxaʼwamíjná muʼni rá.
13 Atie̱wa̱a̱n rí natatsaʼwáminaʼ. Rí nundxaʼwamíjná naʼni dí muguánu muʼni. Ikha jngó Jesús niʼsngáa dí gíʼmaa muʼnigaʼduunʼ mundxaʼwamíjná mbá dí migamíi maʼga̱ kaguáanʼ muxuʼdámíjná aʼkhá (Mat. 5:21, 22, 28, 29). Xúgiáánʼ nandulú muʼni dí nandoo Anulúʼ bi̱ xtáa mekhuíí, ikha jngóo gíʼdoo wéñuʼ numuu muʼnigaʼduunʼ mbá nacha̱ dí naʼni mundxaʼwámijnalú dí raʼkhí.
14. a) Xú káʼnii eʼni makujmáánlú ajngáa dí nuʼthá rá. b) Xú káʼnii graxe̱ gíʼmaa muʼnimijnalu rá.
14 Guñewa̱a̱n dí nuʼthá. Jesús niʼthí: “Rí naʼthí xa̱bu̱ nagájnuu asndu náa a̱jkiu̱u̱n” (Mat. 15:18). Gajkhun kayuuʼ rúʼko̱, ajngáa dí nuʼthá nakujmaa xóo phú ni̱ndxu̱lú. Atraximinaʼ: “Lá natha má xúʼko̱ dí gajkhun maski ajndu migamíi magíʼnuʼ mbá dí ra̱májánʼ rá. Á mu niniʼgún má, lá nañewuminaʼ mu xáni xngaʼwuminaʼ gajmíi̱nʼ eʼwíinʼ ráʼ. Lá nañewuminaʼ mu xáta nimbá dí maxkajxi̱i̱n xa̱bu̱ muni aʼkhá rá. Lá niriʼñuu ga̱jma̱a̱ ajngáa wabaaʼ bi̱ naʼni makiʼnún rá.” Atriyaʼ mbiʼi matatsaʼwamínáʼ náa graxe̱ rígi̱. Ajngáa dí naratá ma̱ndoo maʼni mbríguii ga̱jma̱a̱ xóo putúun dí gíʼdoo náa xtíin. Á mu natrajkuíi putúun, xáni gakhii matríyáa xtíñáan, xúʼko̱ má kayuuʼ, á mu natani xóo eʼngo̱o̱ matatsiʼñán maratha dí raʼkhí, dí nduwaʼ, ajngáa dí xkawiiʼ o maratamíjná gajmiáanʼ eʼwíinʼ dí xkawiʼ, rúʼko̱ gáʼni dí xáʼniaʼ gakhii matatsiʼñáʼ ranindxa̱a̱ʼ xóo nákha ginii.
15. Ndiéjunʼ gíʼmaa muʼni mu muʼdujma náa ixi̱ rí xóo ninindxu̱lú nákha ginii rá.
15 Xátani a̱jma̱ a̱jkia̱a̱nʼ dí matani. Apóstol Pablo nijmuu mbá xkri̱da dí nambáyulúʼ makru̱ʼu̱lú dí gíʼdoo wéñuʼ numuu muriʼkhumijná. Niʼthí dí gíʼmaa muʼdujma náa ixi̱ rí xóo ninindxu̱lúʼ nákha ginii (Rom. 6:6). Jesús niniñaminaʼ rí mudujmaa náa ixi̱, numuu rí nindoo maʼni dí nindoo Jeobá. Xúʼko̱ má kayuuʼ, á mu nandulú muʼni dí nandoo Dios gíʼmaa muniʼñááʼ xúgíʼ rí xóo xa̱bu̱ ni̱ndxu̱lú ga̱jma̱a̱ rí nuʼni dí ikhaa tséniguu. I̱ndó á mu nuʼni xúʼko̱, maguaʼdáá mbá ku̱ma̱ kaʼwu ga̱jma̱a̱ ma̱ndoo muguaʼthi̱i̱n makuwáánʼ kámuu mbiʼi nda̱wa̱á (Juan 17:3; 1 Ped. 3:21). Garmáʼáan a̱jkiu̱lú dí Jeobá xáriʼkhuu̱ ikha ndrígóo maʼni xóo eyulú ikháanʼ. Rí gíʼmaa maguma nindxu̱u̱ dí ikháanʼlu gíʼmaa muriʼkhumijná xó má eʼthí ikha ndrígóo ikhaa (Is. 1:16-18; 55:9).
16. Ndíjkha dí gíʼmaa muniʼñááʼ dí nakiéʼkulu rá.
16 Guʼnimi̱jna̱ muniʼñááʼ dí nakiéʼkulu. Maski ajndu nijnguáanʼ má iyááʼ gíʼmaa mataniminaʼ mu xágua̱ʼa̱ matani̱ dí raʼkhí. Atatsaʼwáminaʼ rí xóo nigíʼnuu Maurício, ikhaa nákha xóó dxámá ninindxu̱u̱ ninigu̱u̱ʼ kaʼñún má jiámá. Nda̱wa̱á nigi̱ʼdu̱u̱ niʼnigajmaa Biblia, índo̱ nininiún xa̱bi̱i̱ Jeobá. Niriʼkuminaʼ ga̱jma̱a̱ nijngúun iyááʼ nákha tsiguʼ 2002. Maski ajndu xtáa raʼni ñajuunʼ Jeobá mbayuuʼ tsiguʼ, ikhaa naʼthí: “Natha gajkhun dí mbaʼa nuthu ndiyóoʼ maniminaʼ mu xágua̱ʼa̱ mani dí raʼkhí”. Mú tsékaguábáaʼ, ikhaa naʼthí xóó: “Naʼni̱i̱ a̱jkiu̱nʼ índo̱ nda̱yo̱o̱ dí á mu na̱nguá eni dí nagua̱ʼa̱ mani, Jeobá nadxuu a̱jkiu̱u̱n kaʼyoʼ”. *
17. Xú káʼnii mbayáaʼ ikháán rí xóo nigíʼnuu Nabiha rá.
17 Xátambáyuminaʼ ga̱jma̱a̱ i̱ndó tsiakii ndrígáʼ ikháán, aratháán Jeobá rí mambáyaʼ ga̱jma̱a̱ xi̱ʼ kaʼwu ndrígóo (Gál. 5:22; Filip. 4:6). Mu matatsiʼñáʼ xúgíʼ xóo nitani̱ nákha ginii, ndayóoʼ matanimi̱na̱ʼ wéñuʼ. Guʼyáá xóo nigíʼnuu mbáa a̱ʼgu̱ mbiʼyuu Nabiha. Anu̱u̱ niniñuuʼ índo̱ kaʼnííʼ gíʼdoo majun tsiguuʼ, ikhaa naʼthí: “Rúʼko̱ niʼni magawúnʼ wéñuʼ”. Índo̱ ni̱jkha̱ rakhi̱i̱ niʼni rí makiʼnáa ga̱jma̱a̱ majmangu̱u̱ itháan. Ni̱jkha̱ gajmíi̱n bi̱ nugujua̱ droga, ikhú nirugua̱a̱ ga̱jma̱a̱ ni̱jkha̱ guʼwá e̱jua̱nʼ mbayuuʼ tsiguʼ. Tikhun Testigos de Jeobá bi̱ nagún rutaraʼa náa guʼwá e̱jua̱nʼ nigi̱ʼdi̱i̱ nisngáá ga̱jma̱a̱ numuu Biblia. Nda̱wa̱á ikhaa nigi̱ʼdu̱u̱ niriʼkuminaʼ wéñuʼ. Ikhaa naʼthí: “Tájyúuʼ má niniʼñúuʼ tikhu dí nini. […] Mú niʼniuʼ gakhii wéñuʼ maniʼñúuʼ ratsikha ndíí”. Itháan dí mbá tsiguʼ niʼniminaʼ maniñuuʼ asndu índo̱ nijmaa. Xú káʼnii niʼngo̱o̱ niʼni xá. Ikhaa naʼthí: “Niniʼñúuʼ ga̱jma̱a̱ numuu rí nitakáñuu ngéʼni Jeobá rí mambáyuʼ, nda̱yo̱o̱ gajkhun dí á mu ikhúún nijmún nini xúʼko̱, mu mani rí nandoo Jeobá asndu tsáa majmaa maʼni”. *
IKHÁÁN MA̱NDOO MAJNGUÁANʼ IYÁÁʼ
18. Xó má naʼthí náa 1 Corintios 6:9-11, ndiéjunʼ dí nijmiin nini mbaʼin xa̱bi̱i̱ Dios rá.
18 Nákha siglo timbá, Jeobá niraʼwíin maʼtáñajunʼ gajmíi̱n Cristo tikhun xa̱bekha ga̱jma̱a̱ gu̱ʼu̱ bi̱ nini mbaʼa dí raʼkhí nákha ginii. Mbá xkri̱da, tikhun nixudami̱jná aʼkhá gajmiún eʼwíinʼ, bi̱ nixudami̱jná aʼkhá gajmiún bi̱ kanikhiin xa̱bekha o kanikhiin gu̱ʼu̱ ga̱jma̱a̱ tikhun bi̱ nini kuʼwáʼ. Mú ga̱jma̱a̱ numuu xi̱ʼ kaʼwu ndrígóo Jeobá niʼngu̱u̱n niriʼkumijná (atraxnuu 1 Corintios 6:9-11). * Rí mbiʼi xúgi̱, Biblia nimbáñun mbaʼin wéñuʼ xa̱bu̱ muriʼkhumijná. * Niniñanʼ mbaʼa dí niguʼwún nini nákha ginii. Xkri̱da ndrígu̱ún ikhiin naʼsngáaʼ ikháán ma̱ngaa dí ma̱ndoo matriʼkhu̱u̱ xóo nindxa̱a̱ʼ ga̱jma̱a̱ matatsiʼñáánʼ ratani̱ dí ra̱májánʼ mu ma̱ndoo majnguáanʼ iyááʼ.
19. Ndiéjunʼ guʼyáá náa i̱mba̱ artículo rá.
19 Bi̱ nandún majngún iyááʼ raʼkháa i̱ndó ndaʼyóoʼ muniñaaʼ runi dí raʼkhí, ma̱ngaa ndayóoʼ munimi̱jna̱ muriʼkhumijná. Náa i̱mba̱ artículo mbuʼyáá xóo gándoo muʼni ga̱jma̱a̱ xóo gándoo mumbayulúʼ eʼwíinʼ.
AJMÚÚ 41 Anu̱ʼ, atadxun rí natajkáan
^ párr. 5 Á mu mbáa bi̱ naʼnigajmaa Biblia nandoo majngúun iyááʼ, gíʼmaa mariʼkuminaʼ. Náa artículo rígi̱ mbuʼyáá ndiéjunʼ nindxu̱u̱ rí xóo ni̱ndxu̱lú nákha ginii, ndíjkha dí gíʼmaa muniʼñááʼ ga̱jma̱a̱ xú káʼnii gáʼngo̱o̱ muʼni. Náa i̱mba̱ artículo maʼthí xú káʼnii gándoo muriʼkhumijná má xúʼko̱ maski ajndu nijngúlú má iyááʼ.
^ párr. 3 KU̱MA̱ RÍ GÍʼDOO NUMUU: “Guriʼku̱u̱ xóo xa̱bu̱ nindxa̱la nákha ginii” nandoo gáʼthúu̱n dí muniʼñááʼ rí xóo eʼni ga̱jma̱a̱ dí nagua̱ʼa̱ muʼni dí Jeobá tsénigu̱u̱ʼ. Rígi̱ gíʼmaa muʼni nákha xóó tséjngulu iyááʼ (Efes. 4:22).
^ párr. 3 Colosenses 3:9, 10: “Xúni̱ nduwamijnála. Guriʼku̱u̱ xóo xa̱bu̱ nindxa̱la nákha ginii ga̱jma̱a̱ rí nuni̱la. Ganindxa̱la xóo i̱mba̱a̱ nuxi̱i̱ʼ xa̱bu̱ xó má kaʼnii Dios, awan xóo ejkua runiʼníiʼ Dios xúʼko̱ gáʼga raxtiʼkhuu xóo nindxa̱la”.
^ párr. 5 Hechos 3:19: “Gatanga̱a̱ a̱jkia̱la ga̱jma̱a̱ gágutrígáanʼ mu aʼkhá ndrígála majngudi̱i̱, ga̱jma̱a̱ mínaaʼ má Jeobá gáʼni rí ma̱ʼkha̱ mbiʼi rí maʼni̱i̱ a̱jkia̱la”.
^ párr. 7 Romanos 12:1, 2: “Ikha jngóo a̱ngui̱nʼ, numuu rí Dios niʼni mba̱a̱ a̱jkiu̱u̱n kaʼyala, ikha jngóo natakháñala rí muxnajxí xuyala xóo mbá tsigijñaʼ rí kaʼwu ga̱jma̱a̱ rí ndaʼya mbá rí manigu̱u̱ʼ Dios; mu xúʼko̱ mundxa̱ʼwa̱a̱ májánʼ e̱dxa̱la índo̱ gúni ñajuunʼ Dios. Xúniʼñámíjná rí numbaaʼ rígi̱ maʼniala xó má eyoo; rí itháán gíʼdoo numuu mu̱ni̱ guriʼkumijnáala mu muriʼkui̱i̱ ku̱ma̱ ndrígála mu ikháanʼ mínanʼ mbu̱ya̱a̱la xú káʼnii dí májánʼ dí nanigu̱u̱ʼ ga̱jma̱a̱ xúgíʼ dí Dios nandoo maguma”.
^ párr. 10 Á mu nandaaʼ matayaa itháan, atayáá náa artículo dí naʼthí, “Biblia niriʼkhu̱u̱ rí xóo makuwá: ‹Ndiyóoʼ matanga̱án náa Jeobá›”, dí nigájnuu náa i̱yi̱i̱ʼ Bi̱ Nayejngoo 1 ñajunʼ gu̱nʼ abril tsiguʼ 2012.
^ párr. 16 Á mu nandaaʼ matayaa itháan, atayáá náa artículo dí naʼthí, “Biblia niriʼkhu̱u̱ rí xóo makuwá: ‹Ninindxu̱ún míjíinʼ xa̱bu̱ ga̱jma̱a̱ ni̱ndxu̱ʼ›”, dí nigájnuu náa i̱yi̱i̱ʼ Bi̱ Nayejngoo 1 ñajunʼ gu̱nʼ mayo tsiguʼ 2012.
^ párr. 17 Á mu nandaaʼ matayaa itháan, atayáá náa artículo dí naʼthí, “Biblia niriʼkhu̱u̱ rí xóo makuwá: ‹Ninindxu̱ʼ mbáa dxáʼgú bi̱ nakiʼnáa wéñuuʼ ga̱jma̱a̱ najmangu̱u̱ʼ›”, dí nigájnuu náa i̱yi̱i̱ʼ Bi̱ Nayejngoo 1 ñajunʼ gu̱nʼ octubre tsiguʼ 2012.
^ párr. 18 1 Corintios 6:9-11: “Lá tséya̱a̱ rí bi̱ nuni̱ dí ra̱májánʼ xátaʼa̱án náa naʼtáñajunʼ Xa̱bu̱ Ñajunʼ ndrígóo Dios ráʼ. Xúninduwamijná. Xa̱bu̱ bi̱ nubúúnʼ xkawiʼ kayuuʼ gajmiún eʼwíinʼ, xa̱bu̱ bi̱ nduyamajkhún xándú, bi̱ nubúnʼ gajmiún bi̱ raʼkháa guʼñu̱ún o ajmbiu̱ún, xa̱bekha bi̱ a̱jma̱ ñajúúnʼ, xa̱bekha bi̱ nubúúnʼ gajmiún xa̱bekha. Bi̱ nuni̱ kuʼwáʼ, bi̱ nanigu̱u̱nʼ maguaʼdáá wéñuuʼ, bi̱ najngi̱i̱n, bi̱ nuta wéñúúnʼ eʼwíinʼ ga̱jma̱a̱ bi̱ nuni̱ kuʼwúnʼ eʼwíinʼ xátaʼa̱án náa maʼtáñajunʼ Xa̱bu̱ Ñajunʼ ndrígóo Dios. Xúʼko̱ ni̱ni̱la tikuáanʼ dí ikháanʼ nákha ginii. Mú rí xúgi̱ niguma kaʼwáanʼ, nijuaxtaʼwáanʼ, ga̱jma̱a̱ mbiʼyuu Tátá Jesucristo ga̱jma̱a̱ espíritu santo ndrígóo Dios nijuiʼthá dí ikháanʼ nindxa̱la xa̱bu̱ jmbii”.
^ párr. 18 Atayáá kúgumaʼá náa naʼthí “ Biblia niriʼkhu̱u̱ rí xóo makuwá”.
^ párr. 68 NAʼTHÍ NUMUU XTIʼKHU: Índo̱ nuʼnimi̱jna̱ muniʼñááʼ ru̱ʼni̱ dí raʼkhí ga̱jma̱a̱ xóo ni̱ndxu̱lú, nindxu̱u̱ asndu xóo rí nuriʼyáaʼ xtíñúlúʼ dí wayuu.
