LISAUN ESTUDU 10
Ita bele “hasai tiha hahalok tuan nian”
“Hasai tiha hahalok tuan nian no husik tiha buat sira neʼebé uluk imi halo.”—KOL 3:9.
KNANANUK 29 Ami lori Ita naran Jeová
IHA LISAUN NEʼE *
1. Antes estuda Bíblia, Ita-nia moris mak oinsá?
ANTES Ita estuda Bíblia ho Testemuña ba Jeová, Ita-nia moris mak oinsá? Ema barak lakohi hanoin fali kona-ba sira-nia pasadu. Iha tempu neʼebá, karik mundu nia hanoin kona-ba buat neʼebé loos no sala mak fó influénsia ba ita-nia hanoin no hahalok. Se nuneʼe, uluk “ita la iha esperansa no la hatene Maromak”. (Éf 2:12) Maibé kuandu ita komesa estuda Bíblia, ita-nia moris troka.
2. Saida mak buat balu neʼebé Ita aprende kuandu estuda tiha Bíblia?
2 Bainhira estuda Bíblia, Ita aprende katak Ita-nia Aman iha lalehan hadomi tebes Ita. Ita aprende katak atu halo Jeová kontente no sai parte ba ninia família, Ita tenke halo mudansa boot iha Ita-nia hanoin, hahalok no moris. Ita tenke hakaʼas an atu moris tuir Jeová nia matadalan sira.—Éf 5:3-5.
3. Tuir Koloso 3:9, 10, Jeová hakarak ita atu halo saida, no saida mak ita sei aprende iha lisaun neʼe?
3 Jeová mak ita-nia Kriadór no Aman, tan neʼe nia iha direitu atu deside kona-ba oinsá ninia família presiza halaʼo moris. Antes ita hetan batizmu, Jeová hakarak ita atu ‘hasai tiha hahalok tuan nian no husik tiha buat sira neʼebé uluk ita halo’. * (Lee Koloso 3:9, 10.) Karik ema neʼebé hakarak hetan batizmu husu: (1) Saida mak “hahalok tuan nian”? (2) Tanbasá Jeová haruka ita atu hasai tiha hahalok tuan nian? (3) Oinsá atu halo ida-neʼe? Lisaun neʼe sei hatán ba pergunta sira-neʼe. Lisaun neʼe mós sei ajuda ita neʼebé hetan ona batizmu atu la hatudu fali hahalok tuan nian.
SAIDA MAK “HAHALOK TUAN NIAN”?
4. Ema sei hatudu hahalok saida se nia husik “hahalok tuan nian” mak kontrola nia?
4 Ema neʼebé husik “hahalok tuan nian” atu kontrola nia, baibain hanoin no hatudu hahalok tuir hakarak isin nian. Karik nia hatudu hahalok hanoin an deʼit, lalais atu hirus, la hatudu agradese no foti an. Karik nia gosta atu haree pornografia no haree filme neʼebé la morál ka iha violénsia. Klaru katak nia iha hahalok diʼak balu no karik nia mós sente sala kona-ba buat la diʼak balu neʼebé nia koʼalia ka halo, maibé nia la iha motivasaun atu troka ninia hanoin no hahalok.—Gal 5:19-21; 2 Tim 3:2-5.
Ita-nia toman no hanoin isin nian la kontrola tan ita bainhira ita hasai tiha “hahalok tuan nian” (Haree parágrafu 5) *
5. Ita bele hasai hotu hahalok tuan nian ka lae? Esplika toʼok. (Apóstolu 3:19)
5 Ita la perfeitu, tan neʼe ita labele halakon hotu hanoin no hakarak neʼebé aat husi ita-nia neon no laran. Dala ruma, ita koʼalia ka halo buat ruma neʼebé ikusmai ita arrepende. (Jer 17:9; Tgo 3:2) Ita-nia hanoin no toman neʼebé aat sei la kontrola tan ita, kuandu ita hasai tiha hahalok tuan nian. Ita-nia hahalok sira la hanesan uluk ona.—Isa 55:7; lee Apóstolu 3:19.
6. Tanbasá Jeová husu ita atu hasai tiha hanoin no toman neʼebé aat?
6 Jeová husu ita atu hasai tiha hanoin no toman neʼebé aat tanba nia hadomi tebes ita no hakarak ita atu moris kontente. (Isa 48:17, 18) Nia hatene katak ema sira neʼebé rende an ba hakarak neʼebé sala sei lori susar ba sira-nia an rasik no mós ema seluk. Jeová sente triste bainhira haree ida-neʼe.
7. Tuir Roma 12:1, 2, ita presiza halo desizaun saida?
7 Foufoun karik ita-nia belun ka família balu goza ita tanba ita hakaʼas an atu troka ita-nia hahalok. (1 Ped 4:3, 4) Karik sira dehan katak ita iha direitu atu halo tuir deʼit ita rasik nia hakarak, no labele husik ema seluk halo desizaun ba ita. Maibé ema neʼebé la halo tuir Jeová nia matadalan la iha liberdade. Tanba tuir loloos, sira husik mundu neʼebé Satanás mak ukun atu domina sira. (Lee Roma 12:1, 2.) Ita hotu presiza hili: Ita sei kontinua hatudu hahalok tuan nian neʼebé hetan influénsia husi sala no Satanás nia mundu ka ita sei fó oportunidade ba Jeová atu ajuda ita troka ita-nia hahalok hodi sai ema neʼebé diʼak liu.—Isa 64:8.
OINSÁ ATU HASAI “HAHALOK TUAN NIAN”?
8. Saida mak bele ajuda ita atu hasees an husi toman no hanoin neʼebé aat?
8 Jeová hatene katak ita presiza tempu no hakaʼas an atu bele hasees an husi toman no hanoin neʼebé aat. (Sal 103:13, 14) Atu ajuda ita halo mudansa, Jeová fó ita matenek, kbiit no apoiu liuhusi Bíblia, ninia espíritu santu, no ninia organizasaun. Klaru katak Ita simu ona ajuda husi Jeová. Mai ita koʼalia kona-ba hakat balu neʼebé bele ajuda Ita atu kontinua hasai tiha hahalok tuan nian no kumpre kritéria atu hetan batizmu.
9. Maromak nia Liafuan bele ajuda Ita atu halo saida?
9 Uza Bíblia atu analiza Ita-nia an. Maromak nia Liafuan mak hanesan espellu. Neʼe bele ajuda Ita atu analiza Ita-nia hanoin, liafuan no hahalok. (Tgo 1:22-25) Ita-nia mestre Bíblia no ema Kristaun neʼebé maduru bele fó matadalan ba Ita. Porezemplu, sira bele uza Eskritura atu ajuda Ita hatene Ita-nia fraku no abilidade. Sira bele hanorin Ita kona-ba oinsá atu hetan informasaun husi Ita-nia publikasaun neʼebé bele ajuda ita manán toman neʼebé aat. Jeová sempre prontu atu ajuda Ita. Nia hatene dalan diʼak liu atu ajuda Ita tanba nia hatene Ita-nia laran. (Prov 14:10; 15:11) Tan neʼe, sai toman atu halo orasaun no estuda Bíblia loroloron.
10. Saida mak Ita aprende husi Elie nia esperiénsia?
10 Fiar metin katak Jeová nia matadalan sira mak diʼak liu hotu. Buat hotu neʼebé Jeová haruka ita atu halo bele lori benefísiu ba ita. Ema neʼebé moris tuir Jeová nia matadalan sei hafolin sira-nia an, iha objetivu ba moris, no sente kontente neʼebé loos. (Sal 19:7-11) Maibé ema neʼebé la halo tuir Jeová nia matadalan sei hetan konsekuénsia aat husi hahalok isin nian. Haree toʼok buat neʼebé mane ida naran Elie hatete kona-ba la simu Jeová nia matadalan. Ninia inan-aman mak Testemuña. Maibé bainhira nia joven, nia ransu ho ema neʼebé la diʼak. Nia komesa uza droga, halaʼo moris neʼebé la morál no naʼok. Elie nota katak nia sai ema neʼebé hirus-teen no halo violénsia. Nia hatete: “Tuir loloos, haʼu halo buat hotu neʼebé ema Kristaun labele halo.” Maibé Elie la haluha buat neʼebé nia aprende kuandu sei joven. Ikusmai nia komesa estuda fali Bíblia. Nia hakaʼas an atu hasai tiha toman neʼebé aat no hetan batizmu iha tinan 2000. Nia hetan benefísiu saida tanba moris tuir Jeová nia matadalan? Elie hatete: “Agora haʼu-nia neon hakmatek no haʼu iha konxiénsia neʼebé moos.” * Elie nia esperiénsia hatudu katak ema neʼebé la halo tuir Jeová nia matadalan, lori susar ba sira-nia an rasik. Maski nuneʼe, Jeová prontu atu ajuda sira halo mudansa.
11. Hahalok saida deʼit mak Jeová odi?
11 Aprende atu odi buat neʼebé Jeová odi. (Sal 97:10) Bíblia hatete katak Jeová odi “matan neʼebé loko an, nanál neʼebé bosok, liman neʼebé fakar ema laran-moos nia raan”. (Prov 6:16, 17) Nia mós “hakribi ema neʼebé halo violénsia no lohidór”. (Sal 5:6) Jeová odi tebes buat sira-neʼe toʼo nia halakon ema aat iha Noé nia tempu tanba sira halo mundu nakonu ho violénsia. (Gén 6:13) Hanoin kona-ba ezemplu ida tan. Liuhusi profeta Malaquias, Jeová hatete katak nia odi ema sira neʼebé hatudu laran-makerek hodi soe sira-nia feen neʼebé la halo sala. Maromak la simu sira-nia adorasaun no sira tenke hatán ba sira-nia hahalok.—Mal 2:13-16; Ebr 13:4.
Hanesan ita hakribi hahán neʼebé dodok no dois ona, ita mós tenke hakribi buat neʼebé Jeová dehan katak aat (Haree parágrafu 11-12)
12. “Hakribi buat neʼebé aat” katak sá?
12 Jeová hakarak ita atu “hakribi buat neʼebé aat”. (Rom 12:9) “Hakribi” mak sentimentu makaʼas iha ita-nia laran neʼebé hatudu katak ita odi tebes buat ruma. Ita sente oinsá se ema haruka Ita atu han hahán neʼebé dodok no dois ona? Klaru katak Ita lakohi. Hanoin deʼit kona-ba neʼe mós halo ita-nia laran-saʼe. Ita mós hakarak sente hanesan neʼe kona-ba buat neʼebé Jeová dehan katak aat.
13. Tanbasá ita tenke proteje ita-nia hanoin?
13 Proteje Ita-nia hanoin. Ita-nia hanoin fó influénsia ba ita-nia hahalok. Tan neʼe mak Jesus hanorin ita atu halakon tiha hanoin neʼebé bele book ita atu halo sala neʼebé sériu. (Mt 5:21, 22, 28, 29) Ita hakarak halo Aman Jeová kontente, loos ka lae? Tan neʼe importante tebes atu halakon kedas hanoin neʼebé aat.
14. Ita-nia liafuan hatudu saida kona-ba Ita, no Ita bele husu pergunta saida deʼit ba Ita-nia an?
14 Kontrola Ita-nia liafuan. Jesus hatete: “Buat neʼebé sai husi ibun mai husi laran.” (Mt 15:18) Ita-nia liafuan bele hatudu sai ita mak ema oinsá. Tan neʼe husu ba Ita-nia an: ‘Haʼu prontu atu la bosok, maski neʼe lori susar mai haʼu ka lae? Nuʼudar kaben-naʼin, haʼu la oin-moris ba ema seluk ka lae? Haʼu hakaʼas an atu la koʼalia iha dalan neʼebé la morál ka lae? Haʼu hatán ho kalma bainhira ema halo haʼu hirus ka lae?’ Diʼak atu hanoin kona-ba pergunta sira-neʼe. Ita bele kompara Ita-nia liafuan ho botaun iha Ita-nia roupa. Kuandu loke tiha botaun, neʼe halo fasil ba Ita atu hasai Ita-nia roupa. Nuneʼe mós se Ita para atu hatún ema, bosok no mós uza liafuan neʼebé la morál, neʼe sei halo fasil ba Ita atu hasai hahalok tuan nian.
15. Prega hahalok tuan nian “ba ai-riin” katak sá?
15 Prontu atu halo mudansa. Apóstolu Paulo esplika katak importante tebes atu troka ita-nia dalan atu halaʼo moris. Nia hakerek katak ita tenke prega hahalok tuan nian “ba ai-riin”. (Rom 6:6) Neʼe katak ita presiza halo tuir Kristu nia ezemplu. Jesus prontu atu halo Jeová kontente hodi husik ema prega nia ba ai-riin. Nuneʼe mós, atu halo Jeová kontente, ita tenke prontu atu “prega” ka halakon hanoin no toman neʼebé Jeová odi. Rezultadu mak ita sei iha konxiénsia neʼebé moos no iha esperansa atu moris ba nafatin. (João 17:3; 1 Ped 3:21) Hanoin-hetan katak Jeová sei la troka ninia matadalan hodi tuir ita-nia hakarak, maibé ita mak tenke troka ita-nia moris hodi tuir ninia matadalan.—Isa 1:16-18; 55:9.
16. Tanbasá Ita presiza kontinua luta hasoru hakarak neʼebé sala?
16 Kontinua atu luta hasoru hakarak neʼebé sala. Depois hetan tiha batizmu, Ita presiza kontinua luta hasoru hakarak neʼebé sala. Hanoin toʼok kona-ba irmaun Maurício nia esperiénsia. Bainhira nia kiʼik, nia komesa halo hahalok omoseksuál. Ikusmai nia hasoru Testemuña no komesa estuda Bíblia. Nia halo mudansa iha ninia moris no hetan batizmu iha tinan 2002. Maski serbí Jeová ba tinan barak ona, irmaun Maurício hatete: “Dala ruma, haʼu nafatin presiza luta hakarak neʼebé sala.” Nia la husik ida-neʼe halo nia sai laran-kraik. Nia hatete: “Haʼu hetan aten-brani hodi hatene katak bainhira haʼu la halo tuir haʼu-nia hakarak neʼebé sala, haʼu halo Jeová kontente.” *
17. Oinsá Nabiha nia esperiénsia anima Ita?
17 Halo orasaun hodi husu Jeová nia ajuda no sadere ba ninia espíritu santu, laʼós ba Ita-nia kbiit rasik. (Gal 5:22; Flp 4:6) Ita tenke hakaʼas an atu bele hasai tiha hahalok tuan nian no la tau fali ida-neʼe. Hanoin toʼok esperiénsia husi feto ida naran Nabiha. Ninia aman husik hela nia kuandu nia tinan neen. Nia hatete: “Haʼu sente laran-kanek tebes.” Bainhira Nabiha sai boot, nia sai hirus lalais no siʼak-teen. Nia faʼan droga, tuirmai polísia kaer nia no hatama nia ba komarka durante tinan balu. Testemuña sira vizita komarka no komesa estuda Bíblia ho nia. Nabiha komesa halo mudansa boot oioin. Nia hatete: “Fasil deʼit ba haʼu atu husik toman balu. Maibé susar atu para fuma.” Nabiha hakaʼas an durante tinan ida liu no ikusmai nia konsege para fuma. Saida mak ajuda nia? Nia hatete: “Importante tebes atu halo orasaun beibeik ba Jeová, neʼe mak ajuda haʼu atu para fuma.” Agora nia anima ema seluk hodi hatete: “Haʼu fiar metin katak se haʼu bele halo mudansa atu halo Jeová kontente, ema seluk mós bele.” *
ITA BELE KUMPRE KRITÉRIA ATU HETAN BATIZMU
18. Tuir 1 Korinto 6:9-11, Jeová nia atan barak konsege halo saida?
18 Iha apóstolu sira-nia tempu, ema balu neʼebé Jeová hili atu ukun hamutuk ho Kristu halo hahalok neʼebé aat antes sira sai ema Kristaun. Porezemplu, sira balu halo sala seksuál, halo hahalok omoseksuál no naʼok. Sira bele troka sira-nia hahalok tanba hetan ajuda husi Jeová nia espíritu santu. (Lee 1 Korinto 6:9-11.) Nuneʼe mós ho ohin loron, Bíblia ajuda ona ema millaun ba millaun atu troka sira-nia moris. * Sira konsege manán toman aat neʼebé susar atu husik. Sira-nia ezemplu hatudu katak Ita mós bele troka Ita-nia hahalok no manán toman neʼebé aat hodi bele kumpre kritéria atu hetan batizmu.
19. Saida mak ita sei aprende iha lisaun tuirmai?
19 Ema neʼebé hakarak atu hetan batizmu presiza hasai tiha hahalok tuan nian no hakaʼas an atu tau fali hahalok foun. Lisaun tuirmai sei koʼalia kona-ba oinsá ita bele halo nuneʼe, no oinsá ema seluk bele ajuda ita.
KNANANUK 41 Rona mai haʼu-nia orasaun
^ par. 5 Atu bele kumpre kritéria hodi hetan batizmu, ita tenke prontu atu troka ita-nia hahalok. Iha lisaun neʼe, ita sei aprende kona-ba saida mak hahalok tuan nian, tanbasá ita presiza hasai tiha ida-neʼe, no oinsá atu halo ida-neʼe. Iha lisaun tuirmai, ita sei aprende kona-ba oinsá ita bele kontinua tau hahalok foun nuʼudar ita-nia roupa maski hetan ona batizmu.
^ par. 3 ESPLIKASAUN BA FRAZE: “Hasai tiha hahalok tuan nian” katak husik tiha hanoin no hakarak neʼebé Jeová odi. Ita presiza komesa halo ida-neʼe antes ita hetan batizmu.—Éf 4:22.
^ par. 10 Atu hetan informasaun liután, haree “Bíblia troka ema nia moris—‘Haʼu presiza fila fali ba Jeová’” neʼebé fó sai iha jw.org, klik BIBLIOTEKA > SÉRIE INFORMASAUN > BÍBLIA TROKA EMA NIA MORIS.
^ par. 16 Atu hetan informasaun liután, haree “Bíblia troka ema nia moris—‘Sira hatudu laran-diʼak mai haʼu’”, iha jw.org, klik BIBLIOTEKA > SÉRIE INFORMASAUN > BÍBLIA TROKA EMA NIA MORIS.
^ par. 17 Atu hetan informasaun liután, haree “Alkitab Mengubah Kehidupan—‘Saya Menjadi Pemarah dan Agresif’” neʼebé fó sai iha Menara Pengawal 1 Outubru 2012.
^ par. 18 Haree kaixa “ Bíblia troka ema nia moris”.
^ par. 64 ESPLIKASAUN BA DEZEÑU: Hasai toman no hanoin neʼebé aat mak hanesan hasai roupa tuan.
