1. ¿La xlinaw kilatamatkan akxni nina xlikgalhtawakgayaw Biblia?

 AKXNI xtatayananin Jehová nina xlimakgalhtawakgekgoyan Biblia, ¿la xlipina milatamat? Kilhuwakan nipara tsinu lakapastakputunaw uma. Max kintayatkan chu la xlikatsiyaw xlimasiya tuku wan kakilhtamaku xlakata tuku tlan chu tuku nitlan. Komo chuna xtatekgsaw ni xkgalhiyaw takgalhkgalhin chu “ni xlakgapasaw Dios” (Efes. 2:12). Pero putum uma talakgpalilh xlakata tsukuw likgalhtawakgayaw Biblia.

2. ¿Tuku katsini akxni tsuku likgalhtawakgaya Biblia?

² Akxni tsuku likgalhtawakgaya Biblia katsini pi kgalhiya chatum Tlat xalak akgapun tiku lu paxkiyan. Akgatekgsti pi komo xmakgapaxuwaputuna Jehová chu xmakgtapakgsiputuna kxfamilia, wi tuku mililakgpalit xwanit kmilatamat chu kmintalakapastakni. Milikatsinit xwanit la namaxkiya kakni xlimapakgsin Dios (Efes. 5:3-5).

3. 1) Chuna la wan Colosenses 3:9, 10, ¿tuku lakaskin Jehová pi katlawaw? 2) ¿La nakinkamakgtayayan uma artículo?

³ Xlakata Jehová wa kiMalakatsukinakan chu kinTlatkan xalak akgapun, lakgchan nawan la nalikatsikgo tiku makgtapakgsikgo kxfamilia. Chu tiku tamunuputunkgo kawani: «Kamakgxtakgtit xamakgan mintayatkan chu tuku xtlawayatit xapulana» * (kalikgalhtawakga Colosenses 3:9, 10). ¿Wix tamunuputuna? Uma artículo namaxkiyan xtakgalhtin akgtutu takgalhskinin: ¿tuku “xamakgan tayat”?, ¿tuku xlakata Jehová lakaskin nalakgmakganaw? chu ¿la tlan chuna natlawayaw? Chu, komo tamununitawa, uma artículo nakinkamakgtayayan  nialh chuna nalikatsiyaw chu nalakpuwanan chuna la akxni xkgalhiyaw “xamakgan tayat”.

4. ¿Tuku tlawa tiku masta talakaskin pi xamakgan tayat wi tuku namatlawi?

⁴ Tiku masta talakaskin pi “xamakgan tayat” wi tuku namatlawi lakpuwan chu tlawa tuku tlawaputun xamakglakgalhina xmakni. Max lakapala sitsi chu xʼakstu paxkikan, ni paxtikatsininan chu tlankajwanan. Max lakgati lilakgastanan pornografía chu películas niku tasiya talakgxtumit nema ni xlitatlawat o niku lamakgnikan. Max kgalhi xatlan tayat chu max nitlan limakgkatsi xlakata tuku wan o tuku tlawa, pero max wi tuku tsankgani xlakata nalakgpali la lakapastaknan chu tuku tlawaputun (Gál. 5:19-21; 2 Tim. 3:2-5).

5. ¿La xlilat naʼakxilhaw xlakata tuku kilhchanima nalakgmakganaw xamakgan tayat? (Hechos 3:19).

⁵ Xlakata kimputumkan makglakgalhinanin, nila lakgmakganaw putum tuku nitlan lakapastakaw chu tuku nitlan kinkamatlawiputunan kinakujkan. Namin kilhtamaku, nawanaw o natlawayaw tuku alistalh nitlan nalimakgkatsiyaw (Jer. 17:9; Sant. 3:2). Pero akxni lakgmakganaw xamakgan tayat, nialh kinkamatlawiyan tuku nitlan chu tanu la likatsiyaw (Is. 55:7; kalikgalhtawakga Hechos 3:19).

6. ¿Tuku xlakata kinkawaniyan Jehová pi kalakgmakgaw nixatlan talakapastakni chu talismanin nema limasiya xamakgan tayat?

⁶ Jehová kinkawaniyan pi kalakgmakgaw nixatlan kintalakapastaknikan chu kintalismaninkan xlakata lu kinkapaxkiyan chu lakaskin pi tlan kakinkakitaxtunin kkilatamatkan (Is. 48:17, 18). Katsi pi komo natlawayaw tuku nitlan, kiʼakstukan nitlan kintikakitaxtunin chu nitlan nakamamakgkatsiniyaw amakgapitsin. Chu xla nitlan limakgkatsi akxni akxilha pi chuna la.

7. Chuna la wan Romanos 12:1, 2, ¿tuku kililaksakatkan?

⁷ Max lakgachunin makgapitsi tiku xalak kifamiliajkan chu kiʼamigoskan nakinkalikgalhkgamanankgoyan xlakata liskujmaw nalakgpaliyaw kintayatkan (1 Ped. 4:3, 4). Max nawankgo pi akinin kinkalakgchanan nalatamayaw chuna la lakaskinaw chu pi ni talakaskin wi tiku nakinkawaniyaw tuku kilitlawatkan. Pero tiku lakgmakgankgo xlimapakgsin Jehová wi tiku kamapakgsi. Xlakan mastakgo talakaskin pi xkakilhtamaku Satanás  wi tuku nakamatlawi (kalikgalhtawakga Romanos 12:1, 2). Kimputumkan wi tuku kililaksakatkan: o natatamakgxtakgaw xamakgan kintayatkan nema lilakatsukunit talakgalhin chu xkakilhtamaku Satanás, o namastayaw talakaskin pi Jehová kakinkalakgpalin xlakata la uku tlakg tlan nalikatsiyaw (Is. 64:8).

8. ¿Tuku tamakgtay kgalhiyaw xlakata nalakgmakganaw nixatlan talakapastakni chu talismanin?

⁸ Jehová katsi pi lin kilhtamaku chu pi lu kiliskujatkan xlakata nalakgmakganaw nixatlan talakapastakni chu talismanin (Sal. 103:13, 14). Pero limaklakaskin xTachuwin, xʼespíritu santo chu xkachikin xlakata nakinkamaxkiyan liskgalala, litliwakga chu tamakgtay nema maklakaskinaw xlakata nalakgpaliyaw kintayatkan. Max wix akxilhnitata la Jehová makgtayanitan. La uku, nalichuwinanaw tuku tlan natlawaya xlakata chuntiya nalakgmakgana xamakgan tayat chu chuna tlan namakgatsiya tuku talakaskin xlakata natamunuya.

9. ¿Tuku tlan natlawa xTachuwin Dios mimpalakata?

⁹ Kalimaklakaskinti Biblia xlakata miʼakstu nalakputsananikana. Tlan natamalakxtumiyaw xTachuwin Dios akgtum espejo, wa xlakata tlan namakgtayayan nalakputsananiya mintalakapastakni, mintachuwin chu la likatsiya (Sant. 1:22-25). Tiku makgalhtawakgeyan chu amakgapitsi natalan tiku makgasa la skujnanimakgo Dios, tlan nawanikgoyan tuku tlan natlawaya. ¿La natlawakgo? Nalimaklakaskinkgo Biblia xlakata nakatsiya tuku tlan tlawapat chu tuku nitlan tlawapat, chu namasiyanikgoyan la naputsaya likgalhtawakga xalak Biblia nema namakgtayayan nalakgmakgana nixatlan talismanin. Chu Jehová ankgalhin makgtayaputunan. Xlakata xla lakgapasa minaku, kajwatiya xla tlan namakgtayayan (Prov. 14:10; 15:11). Wa xlakata, kalismani natlawaya oración chu chali chali kalikgalhtawakga xTachuwin.

10. ¿Tuku katsiniya wix xlakata tuku titaxtulh Elie?

¹⁰ Liwana kakanajla pi xlimapakgsin Jehová wa tlakg xatlan. Putum tuku kinkawaniyan Jehová kaj kilitlankan. Tiku maxkikgo kakni xlimapakgsin tlan makgkatsikgo chu kgalhikgo tapaxuwan kxlatamatkan (Sal. 19:7-11). Pero tiku lakgmakgankgo, nitlan kakitaxtuni chu patinankgo xlakata tlawakgo tuku lakaskin makni. Kalilakpuwanti tuku wan chatum chixku tiku wanikan Elie xlakata tuku la akxni lakgmakgankan xlimapakgsin Dios. Maski xnatlatni xpaxkikgo Jehová, akxni kajku kgawasaku xwanit tsukulh katalalin nixatlan amigos. Tsukulh wa drogas, tsukulh lin xalimaxana xlatamat chu tsukulh kgalhanan. Wan pi tlakg tsukulh sitsi chu tlakg lixkajnit tsukulh likatsi. Xla wan: «Xaktlawa putum tuku ni xlitlawat chatum kstalanina Cristo». Pero ni patsankgalh tuku xnatlatni xmasiyanikgonit akxni aktsujku xwanit. Wa xlakata titaxtulh kilhtamaku tsukupa likgalhtawakga Biblia. Lu liskujli xlakata namakgxtakga nixatlan talismanin chu tamunulh kkata 2000. ¿La litamakgtayanit xlakata lilatamanit xlimapakgsin Jehová? Wan: «Kkgalhi takaksni chu akgtum tlan talakapastakni». * Chuna la masiya xliʼakxilhtit Elie, tiku lakgmakgankgo xlimapakgsin Jehová xʼakstu katlawanikan tuku nitlan. Pero xla kinkamakgtayaputunan xlakata nalakgpaliyaw kintayatkan.

11. ¿Tuku xkajni Jehová?

¹¹ Kakatsini naxkajniya tuku Jehová xkajni (Sal. 97:10). Biblia wan pi Jehová xkajni «lakgastapu nema tlankajwanan, simakgat  nema akgsaninan chu makan nema kamakgnikgo tiku nitu tlawakgonit» (Prov. 6:16, 17). Na «kaxkajni xalakluku latamanin chu tiku akgskgawinankgo» (Sal. 5:6). Jehová xkajni umakgolh nixatlan tayat, wa xlakata kamalakgsputulh kxkilhtamaku Noé latamanin tiku nitlan xlikatsikgo xlakata xlimalakgatsamakgonit Katiyatni tuku nitlan (Gén. 6:13). Atanu tuku Jehová na xkajni wa tuku lichuwinalh palakachuwina Malaquías: pi chatum lataman naʼakgskgawi tiku tamakgaxtokga kaj xlakata alistalh nalakxtlawa xtamakgaxtokgat kxlakatinkan mapakgsinanin. Dios lakgmakgan xtakakninkan tiku chuna tlawakgo chu nakaskini kuenta (Mal. 2:13-16; Heb. 13:4).

12. ¿Tuku kilhchanima xkajnikan tuku nitlan?

¹² Jehová kinkalimapakgsiyan: «Kaxkajnitit tuku nitlan» (Rom. 12:9). Tachuwin xkajnikan kinkamalakpuwaniyan tuku makgkatsiyaw. Kilhchanima wi tuku xkajnikan chu lakgmakgankan. Kalilakpuwaw la xmakgkatsiw komo xkinkawanikan pi xwaw liwat nema masnita. Maski kaj lilakpuwanaw nitlan limakgkatsiyaw. Nachuna kilimakgkatsitkan maski kaj nalilakpuwanaw natlawayaw tuku Jehová wan pi nitlan.

13. ¿Tuku xlakata kuenta kilitlawatkan tuku lakpuwanaw?

¹³ Kuenta katlawa tuku lakpuwana. Tuku lakpuwanaw wi tuku kinkamatlawiyan. Wa xlakata Jesús masiyalh pi kililakgmakganatkan kaxatukawa talakapastakni nema nakinkamatlawiyan lanka talakgalhin (Mat. 5:21, 22, 28, 29). ¿Ni xlikana pi makgapaxuwaputunaw kinTlatkan xalak akgapun? Wa xlakata, lu xlakaskinka tunkun nalakgmakganaw nixatlan talakapastakni.

14. ¿Tuku limasiya kintachuwinkan, chu tuku takgalhskinin kililakpuwanatkan?

¹⁴ Kuenta katlawa la chuwinana. Jesús wa: «Putum tuku taxtu kxkilhni chixku, anta kxnaku taxtuyacha» (Mat. 15:18). Chuna. Kintachuwinkan limasiya tuku wi kkinakujkan. Kalilakpuwanti: «¿Ankgalhin kwan tuku xaxlikana maski nitlan nakinkitaxtuni? Chu komo kmakgaxtokga, ¿kuenta ktlawa xlakata ni naklimasiyani achatum pi klakgati? ¿Nipara tsinu klichuwinan talakgxtumit nema ni xlitatlawat? ¿Lakatitum kkgalhtinan akxni wi tiku kimakgasitsi?». Kalimaxtu kilhtamaku xlakata nalilakpuwana umakgolh takgalhskinin. Chuna la chuwinanaw xtachuna la xbotones maktum lhakgat. Komo namaxtuniya xbotones tlakg  ni tuwa nakitaxtuniyan namaxtuya milhakgat. Nachuna, komo lu naliskujaw xlakata nialh namaklakaskinaw xalixkajnit tachuwin, taʼakgsanin chu nialh nalichuwinanaw talakgxtumit nema ni xlitatlawat tlakg ni tuwa nakinkakitaxtuniyan nalakgmakganaw xamakgan tayat.

15. ¿Tuku kilitlawatkan xlakata naxtokgowakayaw kkiwi xamakgan kintayatkan?

¹⁵ Katlawa tuku natalakaskin. Apóstol Pablo maklakaskilh akgtum liʼakxilhtit xlakata nakinkamasiyaniyan pi lu xlakaskinka natalakgpaliyaw. Wa pi xamakgan kintayatkan naxtokgowakayaw kkiwi (Rom. 6:6). Jesús mastalh talakaskin naxtokgowakakan kkiwi xlakata xmakgapaxuwaputun Jehová. Xtachuna uma, komo makgapaxuwaputunaw Dios, kililakgmakganatkan tayat chu talismanin nema xla xkajni. Komo natlawayaw uma, nakgalhiyaw tlan talakapastakni chu takgalhkgalhin xlakata nalatamayaw putum kilhtamaku (Juan 17:3; 1 Ped. 3:21). Kalakapastakwi pi Jehová ni katilakgpalilh xtalakapastakni kaj xlakata nakinkamakgapaxuwayan. Wata akinin tiku kilitalakgpalitkan xlakata nalilatamayaw xlimapakgsin (Is. 1:16-18; 55:9).

16. ¿Tuku xlakata chuntiya naliskuja nalakgmakgana tuku nitlan tlawaputuna?

¹⁶ Chuntiya kamakgatlaja tuku nitlan tlawaputuna. Maski tamununitata, chuntiya kaliskujti xlakata namakgatlajaya tuku nitlan tlawaputuna. Kalilakpuwanti tuku titaxtulh Maurício, tiku lata kgawasaku xwanit tsukulh lakgati xtachixku. Titaxtulh kilhtamaku, kalakgapasli xtatayananin Jehová chu tsukulh likgalhtawakga Biblia. Tlawalh talakgpalit kxlatamat chu tamunulh kkata 2002. Maski lhuwata kata la skujnanima Jehová, wan: «Klitaya pi makglhuwa kliskujnit xlakata naklakgmakgan tuku nitlan ktlawaputun». Pero ni masta talakaskin pi uma namaxlajwani, xla wampara: «Tlan klimakgkatsi akxni kkatsi pi Jehová makgapaxuwa akxni ni ktlawa tuku nitlan klakpuwan». *

17. ¿Tuku makgpuwantiniyan tuku titaxtulh Nabiha?

¹⁷ Kaskini tamakgtay Jehová chu xʼespíritu santo chu ni kalipawanti militliwakga (Gál. 5:22; Filip. 4:6). Xlakata tlan nalakgmakgana xamakgan mintayat chu nalilhakganana xasasti tayat, lu xlakaskinka naliskuja. Kalichuwinaw xliʼakxilhtit chatum puskat tiku wanikan Nabiha. Akxni xkgalhi akgchaxan kata  xtlat akgxtakgwililh. Xla wan: «Uma tuku tuwa ktitaxtulh lu nitlan kimamakgkatsinilh». Akxni staktilhalh, tlakg nitlan tsukulh likatsi chu lu ksitsi. Tsukulh makgsta drogas, chipaka chu akglhuwa kata tamaknuka kpulachin. Makgapitsi xtatayananin Jehová tiku xlichuwinankgo Dios kpulachin tsukukgolh limakgalhtawakgekgo Biblia. Chu xla tsukulh tlawa lhuwa talakgpalit. Xla wan: «Makgapitsi nitlan talismanin ni tuwa kmakgxtakgli. […] Pero nakmakgxtakga lixkuli lu tuwa kinkitaxtunilh». Liwaka akgtum kata liskujli xlakata xmakgxtakgli uma chu alistalh makgantaxtilh. ¿La tlawalh? Xla wan: «Xlakata ankgalhin xaktlawani oración Jehová alistalh tlan klakgmakgalh». Chu xaʼawatiya wa: «Liwana kkatsi pi komo akit tlan ktalakgpalilh xlakata nakmakgapaxuwa Jehová, kaxatikawa tlan chuna natlawa». *

18. Chuna la wan 1 Corintios 6:9-11, ¿tuku tlawakgonit lhuwa xlakskujnin Dios?

¹⁸ Kxapulana siglo, makgapitsi lakpuskatin chu lakchixkuwin tiku Jehová kalaksakli xlakata natamapakgsinankgo Cristo, xapulana xtlawakgonit tuku nitlan. Akgtum liʼakxilhtit, makgapitsi xtlawakgo talakgxtumit nema ni xlitatlawat, xlakgatikgo xtachixkukan chu xkgalhanankgo. Pero espíritu santo kamakgtayalh xlakata nalakgpalikgo xtayatkan (kalikgalhtawakga 1 Corintios 6:9-11). La uku, Biblia na kamakgtayanit millones latamanin xlakata nalakgpalikgo xtayatkan. * Makgxtakgkgonit talismanin nema lu xkasmanipasanit. Xliʼakxilhtitkan masiyaniyan pi wix na tlan nalakgpaliya mintayat chu tlan nalakgmakgana ni laktlan talismanin xlakata namakgatsiya tuku talakaskin xlakata natamunuya.

19. ¿Tuku nalichuwinan artículo nema stala?

¹⁹ Tiku tamunuputunkgo ni kajwatiya xliskujatkan xlakata nalakgmakgankgo xamakgan tayat, wata nachuna xlitlawatkan xlakata nalilhakganankgo xasasti tayat. Artículo nema stala nalichuwinan la namakgantaxtiyaw chu la amakgapitsin tlan nakinkamakgtayakgoyan.