1. Obwomeezi bwawe bukaba nibusisana buta obwokaba otakatandikire kwega Baibuli?

 OBWOMEEZI bwawe bukaba nibusisana buta obwokaba otakatandikire kwega Baibuli n’Abakaiso ba Yahwe? Baingi omuliitwe titugonza kubutekerezaaho. Entekereza hamu n’engeso zaitu nibisobora kuba bikaba nibisigikirra ha bintu ensi erukugamba ngu bihikire rundi bigwire. Obukiraaba nukwo kikaba kiri, tukaba ‘tutanyina okunihira, kandi tutanyina Ruhanga omu nsi.’ (Bef. 2:12) Baitu obutwatandikire kwega Baibuli, obwomeezi bwaitu bukahinduka!

2. Kiki ekiwazoire obuwatandikire kwega Baibuli?

² Hanyuma y’okutandika kwega Baibuli, okakizoora ngu oine So ow’omu iguru arukukugonza muno. Okakyetegereza ngu kakuba oba nogonza kusemeza Yahwe kandi n’okufooka kicweka ky’eka ye ey’abantu abarukumuramya, okaba oine kukora empindahinduka ez’amaani omu ngeso hamu n’omu ntekereza yaawe. Okaba oine kwega kukora Yahwe ebyagamba ngu bihikire kandi oketantara ebintu ebyarukugamba ngu bigwire.​—Bef. 5:3-5.

3. Kusigikirra ha Abakolosai 3:9, 10, kiki Yahwe ekyarukugonza tukole, kandi kiki ekiturukugenda kubazaaho omu kicweka kinu?

³ Yahwe nuwe Omuhangi waitu kandi Isiitwe ow’omu iguru, nahabweki aine obusobozi obw’okucwamu omulingo ab’omu ka ye basemeriire kwetwazaamu. Kandi natwetaagisa kuteekamu amaani “[tujuule] omuntu owaira nengesoze” tutakabatiziibwe. * (Soma Abakolosai 3:9, 10.) Ekicweka kinu nikiija kukonyera abo abarukugonza kubatizibwa kugarukamu ebikaguzo binu bisatu: (1) “Omuntu owaira” nikimanyisa ki? (2) Habwaki Yahwe naturagira tumujuule? (3) Nitusobora kukikora omu mulingo ki? Itwe abaamazire kubatizibwa, ekicweka kinu nikiija kutukonyera  kwerinda engeso ez’omuntu owaira kwongera kutugarukira.

4. Omuntu ow’arukulemwa “omuntu owaira” ayetwaza ata?

⁴ Omuntu owarukulemwa “omuntu owaira,” akira kuteekereza kandi n’okwetwaza omu mulingo omubi. Nasobora kuba nayegonza wenka, ayanguha kukwatwa ekiniga, tarukusiima, kandi aine emyehembo. Nasobora kuba agonza kurora ebisisani eby’orwanju, kandi n’okurora filimu ezirumu obusiihani hamu n’ebikorwa eby’okurwana. Hataroho kugurukyagurukya, nasobora kuba aine emiringo emu enungi, kandi nasobora kuba nayecwera omusango habw’ebintu ebibi ebyarukubaza rundi ebyarukukora. Baitu taine okugonza okurukumara okusobora kumwekambisa kuhindura enteekereza hamu n’ebikorwa bye.​—Bag. 5:19-21; 2 Tim. 3:2-5.

5. Nikisoboka kujurra kimu omuntu owaira? Soborra (Engeso Ezabakwenda 3:19)

⁵ Tituhikiriire, nahabweki busaho n’omu omuliitwe asobora kweyihiramu kimu ebitekerezo ebibi hamu n’okwegomba okubi omu mitima yaitu. Obwire obumu, nitusobora kukora rundi kubaza ekintu ekituhika tukayeyijukya. (Yer. 17:9; Yak. 3:2) Baitu obutujuura omuntu owaira, entekereza hamu n’ebikorwa bye bireka kutulema. Tuhinduka tufooka b’embaganiza.​—Is. 55:7; soma Engeso Ezabakwenda 3:19.

6. Habwaki Yahwe naturagira kujuura entekereza hamu n’ebikorwa ebibi eby’omuntu owaira?

⁶ Yahwe naturagira kweyihiramu kimu entekereza embi n’okuleka ebikorwa ebibi habwokuba natugonza muno kandi nagonza twegondeze omu bwomeezi. (Is. 48:17, 18) Akimanyire ngu abo abaikiriza kuhondera okwegomba okubi, besaaliza bonka kandi basaaliza n’abandi. Kimusaaliza muno obw’arora nitwesaaliza kandi nitusaaliza abandi.

7. Kusigikirra ha Abarumi 12:1, 2, ncwamu ki ei tusobora kukora?

⁷ Ha kubanza, bamu h’abanywani baitu hamu n’abanyabuzaale nibasobora kutusekereza habw’okulengaho kukora empindahinduka omu ngeso zaitu. (1 Pet. 4:3, 4) Nibasobora kutugambira ngu twine obugabe obw’okukora kyona ekiturukugonza kandi ngu titusemeriire kwikiriza abandi kutugambira eky’okukora. Baitu abo abanga endengo za Yahwe baba bataine obugabe bwonyini. Amananu gali, baba nibaikiriza ensi erukulemwa Sitaani  kubabumba. (Soma Abarumi 12:1, 2.) Itwena twine encwamu ey’okukora: Nitusobora kucwamu kwikara tujwaire omuntu owaira, arukubumbwa ekibi hamu n’ensi ya Sitaani, rundi kwikiriza Yahwe kutuhindura tukafooka muntu arukukirayo oburungi outusobora kufooka omu kasumi kanu.​—Is. 64:8.

8. Bintu ki ebitwine ebisobora kutukonyera kwerinda entekereza hamu n’ebikorwa ebibi?

⁸ Yahwe akimanyire ngu nikiija kutwetaagisa obwire hamu n’okutamu amaani kusobora kusingura entekereza hamu n’ebikorwa ebibi. (Zab. 103:13, 14) Baitu kurabira omu Kigambo kye, omwoyo ogurukwera, hamu n’ekitebe kye, Yahwe atuha amagezi, amaani, hamu n’obusagiki ebiturukwetaaga kukora empindahinduka. Hataroho kugurukyagurukya, Yahwe akatandika ira kutukonyera. Leka hati tubazeeho ebintu ebimu eby’osobora kukora, ebirakukonyera kweyongera kujurra kimu omuntu owaira kandi n’okuhika ha idaara ery’okubatizibwa.

9. Ekigambo kya Ruhanga nikisobora kukukonyera kukora ki?

⁹ Kozesa Baibuli kwekebera kurungi. Ekigambo kya Ruhanga nikisisana n’endolerwamu; nikisobora kutukonyera kwekebiija omulingo turukutekereza, turukubaza, kandi turukwetwaza. (Yak. 1:22-25) Omwegesa wawe owa Baibuli hamu n’Abakristaayo abandi abakuzire omu by’omwoyo nibasobora kukuha obuhabuzi. Ekyokurorraho, nibasobora kukozesa Ebyahandiikirwe kukukonyera kumanya ebintu ebyorukukora kurungi hamu n’obuceke obwoine. Nibasobora kukwegesa omulingo osobora kutunga obuhabuzi oburukusigikirra ha Baibuli obusobora kukonyera kumanya nk’oku osobora kusingura engeso embi. Kandi Yahwe aikara ayetekaniize obwire bwona kukukonyera. Amanyire omulingo ogurukirayo oburungi ogw’okukonyeramu habwokuba amanyire ekiri omu mutima gwawe. (Nfu. 14:10; 15:11) Nahabweki wemanyiize kwikara n’omusaba kandi n’okwesomesa Ekigambo kye buli kiro.

10. Kiki eky’oyegere kuruga omu kyokurorraho kya Elie?

¹⁰ Kigumye ngu Endengo za Yahwe nizo zirukukirayo oburungi. Nitusobora kugasirwa omu buli kimu kyona Yahwe ekyaturagira kukora. Abo abahondera endengo ze bateekwamu ekitiinisa, batunga ekigendererwa omu bwomeezi, kandi n’okusemererwa kwonyini. (Zab. 19:7-11) Baitu abo abanga kuhondera endengo za Yahwe babonabona habw’ebizibu ebiruga omu kukora engeso ez’omubiri. Tekerezaaho omusaija arukwetwa Elie ekiyagambire ha kwanga kuhondera endengo za Ruhanga. Akakuzibwa abazaire abarukugonza Yahwe. Baitu obwakaba ali musigazi akatunga abanywani ababi. Akatandika kwejumbira omu bikorwa ebibi nk’okunywa ebitokooza bwongo, obusiihani, hamu n’obusuma. Elie akagamba ngu akesanga afookere muntu w’ekiniga kandi warukugonza kwikara narwana. Akagamba ati: “Nkakora buli kimu kyona ekinayegesiibwe ngu Omukristaayo tasemeriire kukora.” Baitu, Elie ateebwe eby’akaba ayegere obwakaba akyali muto. Hanyuma akongera yatandika kwega Baibuli. Akekamba muno kweyihamu engeso ze embi kandi yabatizibwa omu mwaka gwa 2000. Kworobera endengo za Yahwe omu bwomeezi bwe kimugasiire kita? Elie nagamba ati: “Hati nyine obusinge omu mutima hamu n’omuntu ow’omunda omurungi.” * Nk’oku ekyokurorraho eki kirukwoleka, abo abanga endengo za Yahwe besaaliza bonka. Eki n’obukiraaba nukwo kiri, Yahwe ayetekaniize kubakonyera kukora empindahinduka.

11. Bintu ki Yahwe eby’anoba?

¹¹ Yega kunoba ebintu Yahwe eby’anoba. (Zab. 97:10) Baibuli n’eyoleka ngu Yahwe anoba  “amaiso agemyekuniko, orulimi orubiha ebisuba, nengaro ezisesa esagama etaroho musango.” (Nfu. 6:16, 17) Ekindi, Yahwe “nanoba omuzinzi nowebisuba.” (Zab. 5:6) Yahwe anobera kimu entekereza hamu n’ebikorwa ebibi kandi kinu kikamuleetera kuhwerekereza abantu ababi ab’omu kasumi ka Nuha habwokuba ensi baali bagiijwizeemu ebikorwa eby’okurwana. (Kub. 6:13) Tekerezaaho ekyokurorraho ekindi. Kurabira omu nabbi Maraki, Yahwe akagamba ngu anobera kimu abantu abakora orukwe orw’okugaitururwa naabo abali nabo omu buswere abataine musango. Ruhanga ayangira kimu okuramya kwabo kandi naija kubacwera omusango habw’engeso zaabo.​—Mara. 2:13-16; Baheb. 13:4.

12. Nikimanyisa ki ‘kunoba obubi’?

¹² Yahwe nagonza ‘tunobe obubi.’ (Bar. 12:9) Ekigambo ‘kunoba’ nikyolekera kimu enyehurra ey’amaani muno; nikimanyisa kunugira kimu ekintu. Tekerezaaho omulingo wakwehuliiremu kakuba bakugambira kulya ebyokulya ebijunzire. Kukitekerezaaho kyonka nikisobora kukuleetera kwehurra nk’omurwaire. Omu mulingo nugwo gumu, naitwe tusemeriire kunuga n’ekiteekerezo eky’okukora ekintu kyona Yahwe ekyarukutugambira ngu kibi.

13. Habwaki tusemeriire kwangira kimu ebitekerezo ebibi?

¹³ Linda entekereza yaawe. Ebitekerezo byaitu biine akakwate n’ebikorwa byaitu. Egi niyo ensonga habwaki Yesu yatwegeseze kwangira kimu ebitekerezo ebisobora kutuletera kukora ekibi eky’amaani. (Mat. 5:21, 22, 28, 29) Hataroho kugurukyagurukya, nitugonza kusemeza Isiitwe ow’omu iguru, nahabweki kikuru muno kwangiraho aho naaho ekitekerezo kyona ekibi!

14. Ebigambo ebitubaza byoleka ki haliitwe? Kandi bikaguzo ki ebitusemeriire kwekaguza?

¹⁴ Linda akalimi kaawe. Yesu akagamba ati: “Ebituruka omu kanwa biruga omu mutima.” (Mat. 15:18) Ego, ebigambo byaitu byoleka kiki ekituli omunda. Nahabweki wekaguze ebikaguzo nka binu: ‘Nyanga kubaza ebisuba n’obukiba ngu kubaza amananu kiba nikigenda kundugiramu ebizibu? Nk’omuntu owali omu buswere, nyerinda kuletera abantu abantali nabo omu buswere kuteekereza ngu nimbagonza? Nyetantarra kimu kubazaaho ebintu eby’obusiihani? Ngarukamu omu mulingo ogutali gw’ekiniga omuntu n’obwambiihiza?’ Nikiija kukugasira muno kwecumitirizaaho ebikaguzo ebi. Embaza yaawe n’esobora kulengesanizibwa n’amapeesa  g’orugoye. Kakuba osumurra amapeesa, kikwanguhira kujuuramu orugoye. Omu mulingo nugwo gumu, kakuba twekamba kuleka kukozesa ebigambo eby’okujuma, eby’obusiihani, hamu n’okubaza ebisuba, nikiija kutwanguhira kujuura omuntu owaira.

15. Nikimanyisa ki kuhanika omuntu waitu owaira ha muti?

¹⁵ Weheyo kukora kyona ekirukwetaagisa. Omukwenda Paulo akakozesa ekyokurorraho kutwegesa nk’oku kiri kikuru muno kuhindura enyetwaza yaitu. Akahandiika ati tusemeriire kuhanika omuntu owaira ha muti. (Bar. 6:6) Yesu akehayo yahanikwa ha muti kusobora kusemeza Yahwe. Omu mulingo nugwo gumu, naitwe kusobora kusemeza Yahwe, tusemeriire kwehayo tukayeyihamu entekereza hamu n’ebikorwa Yahwe eby’anoba. Tusemeriire kukora ebintu binu kusobora kutunga omuntu ow’omunda omurungi hamu n’okunihira okw’okutunga obwomeezi obutahwaho. (Yoh. 17:3; 1 Pet. 3:21) Ijuka ngu Yahwe tarukwija kuhindura endengo ze kusobora kutusemeza. Baitu niitwe turukwetaaga kukora empindahinduka n’okworobera endengo ze.​—Is. 1:16-18; 55:9.

16. Habwaki osemeriire kucweramu kimu kugumizaamu norwanisa okwegomba okubi?

¹⁶ Gumizaamu norwanisa okwegomba okubi. Na hanyuma y’okubatizibwa, nikiija kukwetaagisa kugumizaamu norwanisa okwegomba okubi. Tekerezaaho ekyokurorraho eky’omusaija barukweta Maurício. Obwakaba akyali muto akatandika kwejumbira omu bikorwa ebyokulya ebisyaga. Hanyuma akatangatangana abantu ba Yahwe kandi yatandika kwega Baibuli. Hanyuma y’okukora empindahinduka omu bwomeezi bwe, akabatizibwa omu 2002. N’obukiraaba ngu amazire emyaka nyingi naheereza Yahwe, Maurício nagamba ati: “Amananu gali, obwire obumu mba nyine kurwanisa okwegomba okubi.” Baitu taikiriza kinu kumumaramu amaani. Oihireho nagamba ati: “Baitu kingarramu amaani kukimanya ngu obunyanga kuhondera okwegomba kwange okubi, kindetera kusemeza Yahwe.” *

17. Omu kyokurorraho kya Nabiha, kiki ekikugarwiremu amaani?

¹⁷ Saba Yahwe akukonyere kandi oyesige omwoyo gwe ogurukwera, omu kiikaro ky’okwesiga amaani gaawe. (Bag. 5:22; Baf. 4:6) Tusemeriire kucweramu kimu kujuura omuntu owaira kandi n’okutongera kumujwara. Tekerezaaho ekyokurorraho eky’omukazi arukwetwa  Nabiha. Ise akamulekaho obwakaba aine emyaka mukaaga yonka. Nagamba ati: “Eki kikandetera obusaasi obwingi muno omu mutima.” Nabiha obuyayeyongiire kukura, akafooka muntu ow’ekiniga kingi. Akatandika kutunda ebitokooza bwongo, hanyuma akakwatwa, kandi yamara emyaka omu nkomo. Abakaiso ba Yahwe abaijaga kutebeza omu nkomo bakatandika kumwegesa Baibuli. Nabiha akatandika kukora empindahinduka ez’amaani. Nagamba ati: “Engeso embi ezimu kyali kyanguhire kuzireka, baitu kuleka kunywa etaaba kikangumira muno.” Nabiha akarwanisa kuleka kunywa etaaba kumara omwaka gumu n’okuhinguraho baitu ha kumalirra akasingura. Kiki ekyamukonyire kukikora? Nagamba ati: “Ekyakizireyo kunkonyera kuleka kunywa etaaba, nukwo kusaba Yahwe buli kiro.” Hati agambira abandi ati: “Ninkigumya ngu, obundaaba nasoboire kukora empindahinduka kusemeza Yahwe, n’omuntu ondi wena nasobora!” *

18. Kusigikirra ha 1 Abakolinso 6:9-11, kiki abaheereza ba Ruhanga baingi ekibasoboire kukora?

¹⁸ Omu kyasa eky’okubanza, abamu h’abasaija n’abakazi Yahwe abayakomere kulema hamu na Yesu, ha kubanza bakaba bakozere ebintu ebibi muno. Ekyokurorraho, bakaba bali basihani, balibebisiyaga, kandi basuma. Baitu omwoyo gwa Ruhanga ogurukwera gukabakonyera kuhindura enyetwaza yabo. (Soma 1 Abakolinso 6:9-11.) Omu mulingo nugwo gumu, Baibuli ekonyire obukaikuru n’obukaikuru bw’abantu kuhindura obwomeezi bwabo. * Basoboire kuleka engeso embi ezikaba zibagumiire kuleka. Ebyokurorraho byabo nibyolekera kimu ngu naiwe nosobora kukora empindahinduka omu bwomeezi bwawe, okasingura engeso embi, kandi okahika ha idaara ery’okubatizibwa.

19. Nitugenda kubazaaho ki omu kicweka ekirukwongeraho?

¹⁹ Kwongerra ha kujuura omuntu owaira, abo abarukugonza kubatizibwa basemeriire kuteekamu amaani kusobora kujwara omuntu omuhyaka. Ekicweka ekirukwongeraho nikiija kubazaaho omulingo tusobora kukikoramu kandi n’omulingo abandi basobora kutukonyera.