MUSORO WE KUFUNDA 10
Mungakwanisa “Kubvisa Unhu Wekare”
“Bvisai unhu we kare pamwepo no zviito zvawo.”—VAK. 3:9.
NGOMA 29 Mararamiro Edu Ngaakudze Zina Renyu!
ZVATICAFUNDA *
1. Upenyu wenyu wainga wakadini musati mafunda Bhaibheri?
UPENYU wenyu wainga wakadini musati matanga kufunda Bhaibheri no Apupuri a Djehovha? Akawanda edu tinotothya patinozvirangarira. Mushobo wedu wekurangarira no maitiro edu, ainga akatsamira pa zviro zvinozwi no nyika zvakanaka uye zvakashata. Tainga “tisina kariro uye tainga tisina Mwari mu nyika.” (Aef. 2:12) Asi fundo ye Bhaibheri yakacinja zviro zvese izvi!
2. Cinyi cemakaona pamaifunda Bhaibheri?
2 Mu masure me kufunda Bhaibheri, imwimwi makaona kuti Djehovha akaita hingana Baba enyu uye anomuda maningi. Makazwisisawo kuti kana mecida kupfadza Djehovha uye kana mecida kugara nhengo ye mhuri yake, munodikana kuita cinjo dzakakura pa mushobo wenyu we kurangarira. Maidikana kufundira kuita zviro zvinozwi na Djehovha zvakanaka uye kusiya zviro zvaanoti zvakashata.—Aef. 5:3-5.
3. Maererano na Akorosi 3:9, 10, Djehovha anotibvunza kuti tinodikana kuitei, uye ticaonei mu fundo ino?
3 Djehovha ndi baba edu uye Musiki, ndiyo ndaa ano citenderhwa cekubvunza nhengo ye mhuri yake zviro zvaanodikana kuita uye zvaasikadikani kuita. Uye tisati tabhabhatidzwa, Mwari anoda kuti ‘tibvise unhu wekare no maitiro awo.’ * (Erengai Akorosi 3:9, 10.) Fundo ino icabetsera anhu aya anoda kubhabhatidzwa kuti aziye mhinduro dze mibvunzo mitatu: (1) Cinyi cinozwi “unhu wekare”? (2) Ngei Djehovha anoda kuti tibvise unhu wekare? (3) Tingazviita kudini? Fundo ino, icabetserawo aya akabhabhatidzwa kuti asaite uye asarangarire maerano no unhu wekare.
CINYI CINOZWI “UNHU WEKARE”?
4. Munhu unoonererhwa no “unhu wekare” wakaita kudini?
4 Munhu unoonererhwa no “unhu wekare” kajinji unorangarira uye unoita zviro nge mushobo usikapfadzi Djehovha. Iyena unonyanya kudzida, unoshatirhwa ne kukasika, aakwanisi kutenda, uye unodzikudza. pamweni munhuwo unopfarira kuona pornografiya, mafirme asikazi kucena, uye mafirme e kurhwisana. Kunyazi no zvese izvi, munhuwo uno mawara akanaka, uye ungatodzipasa ndaa nge zviro zvakashata zvaanoita uye no zvaanoreketa. Asi iyena aana cido ce kucinja marangariro uye maitiro ake.—Aga. 5:19-21; 2Ti. 3:2-5.
Kana tikasiya “unhu wekare,” aticaonererhwi no marangariro uye maitiro akashata (Onai ndima 5) *
5. Ngekuti tiri anhu asikazi kukwana, tinodikana kuedzurirei? (Zviito 3:19)
5 Tese hedu tiri anhu asikazi kukwana, ndiyo ndaa atizokwanisi kusiya zvacose zvido no marangariro asikazi kunaka. Tisikakariri, ticazoreketa kana kuita zviro zvatinozotsumba. (Dje. 17:9; Tg. 3:2) Asi kana tikasiya unhu wekare, aticaonererhwi nge marangariro uye maitiro akashata. Isusu tinocinja kamare.—Isa. 55:7; erengai Zviito 3:19.
6. Ngei Djehovha anoda kuti tisiye marangariro no maitiro atainga tinawo tisati tafunda Bhaibheri?
6 Djehovha anoda kuti tisiye marangariro no maitiro akashata, ngekuti anotida uye anoda kuti tipfadzwe no upenyu. (Isa. 48:17, 18) Ayena anoziya kuti kana tikasama kurhwisa zvido zvakashata, tingapedzesera tadzikuwadza uye tingakuwadzawo amweni. Zvezvirokwazvo, Djehovha wene anotorhwadziwa paanotiona takadaro.
7. Maererano na Aroma 12:1, 2, cisananguro cipi catinodikana kuita?
7 Pamweni tingasekwa no shamwari uye anyaukama edu patinoedza kucinja unhu wedu. (1 Pe. 4:3, 4) Awona angabhuya kuti imwimwi muno citenderhwa cekuita zviro zvamunoda, haiwa kusiya kuti anhu amubvunze zviro zvekuita. Asi kusama kuzwira Djehovha akuiti kuti munhu adziimirire. Zvezvirokwazvo, munhu wakadaro unonga ecitoonererhwa no nyika ya Sathani. (Erengai Aroma 12:1, 2.) Tese isusu tinodikana kuita cisananguro: Tingasanangura kurumbwa tino unhu wekare unoumbwa no citema uye no nyika ino ya Sathani, kana kuti, tingasanangura kusiya kuti Djehovha atibetsere kuita cinjo dzinodikanwa kuti tigare anhu akanaka.—Isa. 64:8.
“TINGABVISA” KUDINI UNHU WEKARE?
8. Cinyi cingatibetsera kuti tisarangarire uye tisaite zviro zvakashata?
8 Djehovha anoziya kuti isusu atikwanisi kucinja nokukasika mishobo yedu yekurangarira uye maitiro edu akashata. (Pis. 103:13, 14) Asi Djehovha anotipasa rubetso ratinoda kuti tiite cinjo idzi. Ayena anotibetsera eciseenzesa Bhaibheri, mwiya wake mucena uye sangano rake. Zvezvirokwazvo, imwimwi makamboona kuti Djehovha akamubetsera kudini. Zvino ngaticionei zvamungaita kuti mubvise unhu wekare, uye mukwaniriswe kuti mubhabhatidzwe.
9. Soko ra Mwari ringamubetsera kudini?
9 Seenzesai Bhaibheri kuti mudziongorore. Soko ra Mwari rakaita hingana supeya ingatibetsera kuona zviro zvakaringana na isusu wene. Ngo muezaniso, mushobo wedu wekurangarira, wekureketa uye wekuita zviro. (Tg. 1:22-25) Mufundisi wenyu we Bhaibheri, kana kuti munhu wakakura pakunamata ungamubetsera. Ngo muezaniso, awona angaseenzesa Bhaibheri kuti amupangidze pamakabambira, uye matii amunodikana kugadzirisa. Awona angamufundisa kukwarakwatisa kuti mugumire masoko angamubetsera kuti murhwise zvirikumunetsa. Uye edzurirai kuti Djehovha akagadzirira kumubetsera nguwa dzese. Akuna munhu wakanaka angamubetsera kupinda Djehovha ngekuti ayena anoziya mwoyo wenyu. (Zvie. 14:10; 15:11) Ndiyo ndaa, kubvira nyamasi uno, garai no musambo wekuita minamato uye wekufunda Bhaibheri mazuwa ese.
10. Mafundei kubva pa eshiperiensiya ya Elie?
10 Garai no cokwadi cekuti zvese zvatinokumbirhwa na Djehovha zvakatinakira. Tingabetsereka nge zvese zvatinokumbirhwa na Djehovha kuti tiite. Munhu unoita kuda ka Mwari, unodzireremedza, uno upenyu uno cinangwa uye unopfara zvezvirokwazvo. (Pis. 19:7-11) Nge dii rimweni, aya asikaiti zvinorekethwa na Djehovha anosongana no migumisiro inotsukwarisa ngekuita citema. Onai zvakarekethwa no mwanarume unozwi Elie nge zve kusama kuteerera nhungamiriro dza Mwari. Iyena wakarerhwa no abereki eciKristu aida Djehovha. Asi paainga ano thunga re udjaha, iyena wakashamwaridzana no anhu akashata. Elie wakapedzesera aakuseenzesa mitombo inoraradzisa, kuita zviro zvisikazi kucena uye kuba. Iyena wakabhuya kuti wakatanga kugara no hasha, uye kuita zvekurhwisana. Iyena unotendera eciti: “Nge masoko amweni, ndaiita zvese zvandakafundira kuti azvidikani kuizwa no mu Kristu.” Asi Elie aazi kukanganwa zvaakafunda paainga aciri mwana mudoko. Nokuhamba ke nguwa iyena wakahwirirazve kufunda Bhaibheri. Elie wakapeta masimba kuti asiye kuita zviro zvakashata uye wakabhabhatidzwa mu gore ra 2000. Kurarama maererano no mitemo ya Djehovha zvakamubetsera kudii? Elie unoti: “Nyamasi uno ndino runyararo mu mundangariro uye ndino hana yakacena.” * Eshiperiensiya ii inopangidza kuti munhu usikateereri nhungamiriro dza Djehovha, unodziunzisira matambudziko. Kunyazi zvakadaro, Djehovha anoda kubetsera anhu aya kuti acinje.
11. Zviro zvipi zvinozondhwa na Djehovha?
11 Fundirai kuzonda zviya zvinozondhwa na Djehovha. (Pis. 97:10) Bhaibheri rinopangidza kuti Djehovha anozonda “madziso anodzikudza, rurume rinonyepa, uye nyara dzinodurura ngazi isina ndaa.” (Zvie. 6:16, 17) Ayena ‘anozondawo aya anoda zvekurhwisana uye anoda zvekunyepa.’ (Pis. 5:6) Djehovha anozonda maningi zviro izvi, zvekutoti akatoguma pakuparadza anhu e mu nguwa ya Nowa ngekuti aida maningi zvekurhwisana. (Gen. 6:13) Rangarirai muezaniso unoteera. Djehovha akaseenzesa muphorofita Marakiya, kuti abhuye kuti anozonda aya anorangarira kurambana no mwamuna kana mukadzi, pasina cikonzero cakasisira kuti arambane. Kuna Djehovha, kunamata kunoita anhu aya akubetseri ciro, uye ayena acaatonga nge maitiro awo.—Mar. 2:13-16; Ahe. 13:4.
Kuita zviro zvinorekethwa na Djehovha kuti zvakashata, zvinodikana kutinyanyasa hinga kurhya zvekurhya zvakaora (Onai mandima 11-12)
12. “Kuzonda zviro zvakashata” zvinoda kureyei?
12 Djehovha anoda kuti isusu ‘tizonde zvakashata.’ (Aro. 12:9) “Kuzonda” ndi mazwiro akabamba maningi. Kana tikazonda ciro, atidi kugara padhuze naco uye cinototinyanyasa. Isusu tinogara no mazwiro amwewo kana munhu akatikumbira kui tirhye zvekurhya zvakaora. Pamweni tingasemhuswa ngekutozvirangarira basi. Ngo mushobo umwewo, tinodikana kuzwa zvimwezvo kana tikarangarira kuita zviro zvinozwi na Djehovha kuti zvakashata.
13. Ngei tinodikana kudziirira marangariro edu?
13 Dziirirai marangariro enyu. Marangariro edu anoita kuti isusu tiite ciito. Ndiyo ndaa Djesu akatibvunza kuti tirambe marangariro angaita kuti tiite citema cakakura. (Mat. 5:21, 22, 28, 29) Zvezvirokwazvo, ciro catinoda maningi mu upenyu ndi kupfadza Djehovha. Kuti tikwanise kuzviita, zvinokosha maningi kuti tirambe nokukasika marangariro akashata angauya mu ndangariro dzedu!
14. Zvatinoreketa zvinopangidzei nge zvedu, uye mibvunzo dzipi dzatinodikana kudzibvunzisa?
14 Ngwarirai zvamunoreketa. Djesu akati: “Zviro zvese zvinobuda mu muromo zvinobva mu mwoyo.” (Mat. 15:18) Zvezvirokwazvo, zvatinoreketa zvinopangidza zvatiri ngecemukati. Ndiyo ndaa dzibvunzisei kuti: ‘Ndinobhuya cokwadi nguwa dzese kunyazi zvecizondishatira here? Ngekuti ndiri munhu wakacata, ndinongwarira kuti ndisasirire munhu umweni here? Ndinopeta masimba kuti ndisarekete zviro zvisikazi kucena here? Ndinorumbwa ndakaterama kudai munhu akandinyangadza here?’ Kunyasa kurangarira mibvunzo idzi, kungakwanisa kumubetsera maningi. Hingana kushupha kunoita kukhumura hanzu tisati tafunungura mabitau, zvingashuphawo maningi kuti tibvise unhu wekare kana tikarumbwa tecireketa no hasha, tecinyepa uye tecireketa zviro zvisikazi kucena.
15. Zvirikuda kureyei kukhomera unhu wekare “pamutanda”?
15 Itai zvinodikana kuizwa. Muphostori Pauro wakaseenzesa muezaniso wakabamba kuti atibetsere kuzwisisa makoshere azvinoita kuita cinjo mu upenyu wedu. Iyena wakabhuya kuti tinodikana kukhomera “pamutanda” “unhu wekare.” (Aro. 6:6) Kana kuti, tinodikana kuteedzera muezaniso wa Djesu. Ayena ainga akagadzirira kuuraiwa kuti apfadze Djehovha. Ngo mushobo umwewo, isusu tinodikana kugadzirira kuita zviri zvese kuti tisaite ciro cipi haco cinozondhwa na Djehovha kuti timupfadze. Kana tecida kugara no hana yakacena, uye no upenyu usikaperi mune ramangwana, tinodikana kutora matanho aya. (Juau 17:3; 1 Pe. 3:21) Tinodikana kuedzurira kuti Djehovha aazocinji maonero ake nge zve zvakanaka no zvakashata kuti atipfadze. Zvezvirokwazvo, isusu tisu tinodikana kuita cinjo kuti timupfadze.—Isa. 1:16-18; 55:9.
16. Ngei tinodikana kugara takashinga kurhwisana no zvido zvakashata?
16 Rumbwai mecirhwisana no zvido zvakashata. Kunyazi mumasure mekubhabhatidzwa, imwimwi munodikana kurumbwa mecirhwisana no zvido zvakashata. Onai eshiperiensiya ya hama Maurício. Paainga aciri djaha, iyena wakatanga kurarama hingana mwanakadzi. Mu masure mecinguwa, iyena wakaziya Apupuri a Djehovha uye wakatanga kufunda Bhaibheri. Mu masure mekuita cinjo mu upenyu, iyena wakabhabhatidzwa mu gore ra 2002. Kunyazi eciseenzera Djehovha ke makore akawanda, Maurício unoti: “Pano nguwa dzandaidikana kurhwisana no zvido zvakashata.” Asi iyena aasii kuti izvona zvimuodze mwoyo. Iyena unoenderera mberi eciti: “Cinondibambisa kuziya kuti, pandinosanangura kusama kuita zviro maererano no zvido izvona, ndinonga ndecipfadza Djehovha.” *
17. Cinyi canyanya kumushamisa pa eshiperiensiya ya hanzvadzi Nabiha?
17 Kumbirai rubetso kuna Djehovha uye gondai no mwiya mucena wake, haiwa mu simba renyu. (Aga. 5:22; Afi. 4:6) Kuti tibvise unhu wekare zvacose, tinodikana kutopeta masimba. Onai muezaniso we hanzvadzi inozwi Nabiha. Iyona yakatizwa na baba wayo paainga ano makore matanhatu. Iyona inoti: “Izvi zvakandirhwadza maningi.” Nabiha wakazogara munhu unoda zvecisimba. Mumasure mecinguwa, iyena wainga oseenzesa mitombo inoraradzisa, wakakandhwa mukaraboso uye wakagaremo makore manganani. Paainga aciri mukaraboso, wakavhakacirhwa no Mupupuri wa Djehovha uye wakatanga kufunda Bhaibheri. Nabiha wakatanga kuita cinjo dzakakura mu upenyu. Iyena unoti: “Maitiro angu amweni aazi kushupha kusiya.” “Asi cakandishuphira kusiya ndi kubhema.” Nabiha wakarhwisa ke gore rimwe no hafu kuti asiye kubhema. Iyena wakazvikwanisa kudini? Iyena unoti: “Cakanyanya kundibetsera kuti ndikunde dambudziko iri, kuita minamato yekudeketera kuna Djehovha.” Iyena unobvunzawo amweni kuti: “Kana inini ndakakwanisa kucinja kuti ndipfadze Djehovha, ndino rugondo rekuti munhu umweni ungazvikwanisawo!” *
MUNGAPETA MASIMBA KUTI MUBHABHATIDZWE!
18. Maererano na 1 Akorinti 6:9-11, ngazvipi zvinosokwaniswa kuizwa no aseenzi a Djehovha akawanda?
18 Mu nguwa ye aphostori, anarume no anakadzi anganani ainga akasanangurhwa kuti atonge na Djesu kudenga, aiita zviro zvakawanda zvakashata paainga asati agara Akristu. Ngo muezaniso, amweni aiita uhure, anarume aiwakana no anarume uye anakadzi aiwakanawo no anakadzi uye amweni ainga ari mambava. Asi no rubetso re mwiya mucena, awona akakwanisa kucinja unhu wawo. (Erengai 1 Akorinti 6:9-11.) Ngo mushobo umwewo, Bhaibheri rinosobetsera mamirionji e anhu mazuwa ano kuti aite cinjo mu upenyu wawo. * Awona akakwanisa kusiya maitiro aainga adjaira kuita mu upenyu wawo. Muezaniso wawo, ndi cipangidzo cekuti imwimwi mungakwanisawo kuita cinjo dzamunodikana kuita pa unhu wenyu kuti mubhabhatidzwe.
19. Ticaonei mu fundo inoteera?
19 Aya anoda kubhabhatidzwa, anodikana kuita zvakawanda pane kundobvisa basi unhu wekare. Awona anodikana kupeta masimba kuti agare no unhu upsva. Fundo inoteera icatipangidza kuti tingazviita kudini uye kuti anhu amweni angatibetsera kudini.
NGOMA 41 Ndapota, Izwai Munamato Wangu
^ par. 5 Kuti tikwanise kubhabhatidzwa, tinodikana kugara takagadzirira kuita cinjo dzakaringana no unhu wedu. Fundo ino icatibetsera kuzwisisa kuti cinyi cinozwi unhu we kare, ngei tecidikana kuubvisa, uye kuti tingazviita kudini. Uye fundo inoteera icatibetsera kuzwisisa kuti tingarumbwa kudini tecipfeka unhu upsva kunyazi mu masure mekubhabhatidzwa.
^ par. 3 NYASAI KUZWISISA: Soko rekuti, “kubvisa unhu wekare” rinoreya kusiya maitiro no zvido zvisikapfadzi Djehovha. Izvona zvinodikana kuitika musati mabhabhatidzwa.—Aef. 4:22.
^ par. 10 Kuti muone masoko akadzara, onai pakazwi “Bhaibheri Rinochinja Upenyu—Ndaida kudzoka kuna Jehovha,’” yakabudiswa mu Murindiri wa 1 ya Abriri wa 2012, mu ciShona.
^ par. 16 Kuti muone masoko akadzara, onai pakazwi “Bhaibheri Rinochinja Upenyu—‘Vakandiitira mutsa chaizvo,’” yakabudiswa mu Murindiri wa 1 ya Mayo wa 2012, mu ciShona.
^ par. 17 Kuti muone masoko akadzara, onai pakazwi “Bhaibheri Rinochinja Upenyu—Ndakaguma ndava musikana ane hasha,” anoda zvokurwa yakabudiswa mu Murindiri wa 1 ya Otubro, 2012 mu ciShona.
^ par. 18 Onai bhokisi rakazwi, “ Bhaibheri Rinocinja Upenyu.”
^ par. 64 KUPANGANIDZWA KE MUFANIKISO: Hingana kubvisa katinoita macira atsakara, tinoseenzawo no simba kuti tibvise maitiro akashata.
