XCHANOBIL 10
Xuʼ me xalokʼ li amol talelale
«Lokʼik li amol talelalik ta skoj li kʼusi nopem xavaʼiik spasele» (KOL. 3:9).
KʼEJOJ 29 Vinajuk ti jaʼutik stestigo Jeovae
LI KʼUSI TA JCHANTIKE *
1. ¿Kʼu toʼox yelan jkuxlejaltik kʼalal skʼan toʼox jchantik li Vivliae?
¿KʼU TOʼOX yelan akuxlejal kʼalal skʼan toʼox xachan Vivlia xchiʼuk li stestigotak Jeovae? Jutuk mu jkotoltikuk mu jkʼan jnopbetik skʼoplal taje. Yuʼun jaʼ toʼox van ta jpastik li kʼusi lek chil balumile. Jaʼ yuʼun, muʼyuk toʼox spatobil koʼontontik xchiʼuk muʼyuk toʼox te oy Dios ta jtojolaltik (Efes. 2:12). Pe jel jkuxlejaltik kʼalal lik jchantik li Vivliae.
2. ¿Kʼusitik laj avaʼibe skʼoplal kʼalal lik achan li Vivliae?
2 Kʼalal lik achan li Vivliae, laj avil ti oy jun Atot ta vinajel ti skʼanojot tajeke. Laj avaʼibe smelolal ti skʼan xajel akuxlejal xchiʼuk ti skʼan xajel li kʼusitik chanop mi chakʼan chamuyubtabe yoʼonton li Jeovae xchiʼuk ti jmoj xatun ta stojolal xchiʼuk li yan yajtuneltake. Laj avaʼi xtok ti skʼan xavakʼ ta akuxlejal li smantaltak Diose (Efes. 5:3-5).
3. 1) Jech kʼuchaʼal chal Kolosenses 3:9 xchiʼuk 10, ¿kʼusi tskʼan Jeova ti akʼo jpastike? 2) ¿Kʼuxi tskoltautik li xchanobil liʼe?
3 Ta skoj ti jaʼ spasojutik li Jeova xchiʼuk ti jaʼ Jtotik ta vinajele, oy sderecho xuʼ xal kʼu yelan skʼan spas stalelal li yutsʼ yalale. Xi chalbe li buchʼutik tskʼan chichʼ voʼe: «Lokʼik li amol talelalik ta skoj li kʼusi nopem xavaʼiik spasele» * (kʼelo Kolosenses 3:9, 10). ¿Mi chakʼan xa chavichʼ voʼ? Li xchanobil liʼe tskoltautik stakʼel li sjakʼobiltak liʼe: ¿kʼusi jaʼ li mol talelale?, ¿kʼu yuʼun tskʼan Jeova ti akʼo jeltike? xchiʼuk ¿kʼuxi xuʼ spas kuʼuntik? Mi kichʼojtik xa voʼe, li xchanobil liʼe tskoltautik sventa mu xa jpastik yan velta kʼuchaʼal li mol talelale.
¿KʼUSI JAʼ LI MOL TALELALE?
4. ¿Kʼu yelan li buchʼu jaʼ jech tspas stalelal kʼuchaʼal li mol talelale?
4 Jutuk mu skotoluk li buchʼu jaʼ jech tspas stalelal kʼuchaʼal li mol talelale jaʼ jech tsnop xchiʼuk jaʼ tspas li kʼusi tskʼan sbekʼtal ti jmulavile. Xuʼ van ta anil noʼox snaʼ x˗ilin, jaʼ noʼox tspas li kʼusi tskʼan stuke, mu snaʼ stoj ta vokol xchiʼuk jtoyba. Xuʼ van lek chaʼi skʼelel pornografia (videoetik, lokʼoletik, musikaetik xchiʼuk kʼusitik tsʼibabil ti tstij oʼontonal sventa mulivajele) xchiʼuk pelikulaetik ti chakʼ ta ilel mulivajel o majbaile. Oy onoʼox van lek stalelaltak xchiʼuk chopol van chaʼi li kʼusi chal o tspase. Pe muʼyuk mas oy ta yoʼonton ti sjel li kʼusi tsnop xchiʼuk tspase (Gal. 5:19-21; 2 Tim. 3:2-5).
Kʼalal ta jlokʼ li jmol talelaltike, muʼyuk xa tspasutik ta mantal li jchopol talelaltike xchiʼuk li kʼusitik nopem xkaʼitik spasele. (Kʼelo parafo 5). *
5. ¿Mi xuʼ jlokʼestik ta j˗echʼel li jmol talelaltike? Albo smelolal (Echos 3:19).
5 Ta skoj ti jmulavilutike, jkotoltik oy kʼusi chopol chtal ta jnopbentik xchiʼuk oy kʼusi chopol tskʼan koʼontontik. Bakʼintike, oy kʼusi ta jpastik o chkaltik ti chopol chkaʼi jbatik˗o yuʼun ta tsʼakale (Jer. 17:9; Sant. 3:2). Pe kʼalal ta jlokʼ li jmol talelaltike, muʼyuk xa tspasutik ta mantal li kʼusi chopol tskʼan jbekʼtaltike xchiʼuk chjel jtalelaltik (Is. 55:7; kʼelo Echos 3:19).
6. ¿Kʼu yuʼun chalbutik Jeova ti akʼo jiptik lokʼel li kʼusi chopol ta jnoptik xchiʼuk li kʼusi nopem xkaʼitik spasele?
6 Li Jeovae chalbutik ti akʼo jiptik lokʼel li kʼusitik chopol ta jnoptik xchiʼuk li kʼusi chopol nopem xkaʼitik spasel ta skoj ti skʼanojutik tajeke xchiʼuk tskʼan ti lek xbat jkuxlejaltike (Is. 48:17, 18). Snaʼoj ti chkil jvokoltik xchiʼuk chkakʼbetik svokol yantik mi la jpastik li kʼusi chopol oy ta koʼontontike. Kʼux chaʼi mi jech kʼot ta pasele.
7. Jech kʼuchaʼal chal Romanos 12:1 xchiʼuk 2, ¿kʼusi ti skʼan jnoptike?
7 Junantik kutsʼ kalaltik xchiʼuk kamigotaktike xuʼ van tsnaʼleutik ta skoj ti yakal chkakʼtik persa sjelel li jtalelaltike (1 Ped. 4:3, 4). Xuʼ van xi chalike: «Oy jderechotik sventa jpastik li kʼusi tskʼan koʼontontike xchiʼuk muʼyuk buchʼu xuʼ xalbutik li kʼusi skʼan jpastike». Pe li buchʼutik muʼyuk chchʼunbeik smantal Jeovae muʼyuk kolemik ta melel, yuʼun jaʼ tspasatik ta mantal yuʼun li sbalumil Satanase (kʼelo Romanos 12:1, 2). Jkotoltik skʼan jnoptik li kʼusi ta jpastike: mi ta jlap˗o li jmol talelaltik ti jaʼ tspasat ta mantal yuʼun li mulil xchiʼuk li sbalumil Satanase o mi chkakʼtik ti akʼo sjel jtalelaltik li Jeova sventa xlekub jtalelaltik ti bu kʼalal xuʼ kuʼuntik avie (Is. 64:8).
¿KʼUXI XUʼ JEL LI JMOL TALELALTIKE?
8. ¿Kʼusi xuʼ skoltautik yiktael li kʼusi chopol ta jnoptik xchiʼuk li kʼusi nopem xkaʼitik spasele?
8 Li Jeovae snaʼoj ti mu kʼunuk chkaʼitik xchiʼuk ti mu ta aniluk chkiktatik li kʼusitik chopol ta jnoptike xchiʼuk li kʼusitik chopol nopem xkaʼitik spasele (Sal. 103:13, 14). Pe chakʼ jpʼijiltik, kipaltik xchiʼuk tskoltautik sventa jel li jtalelaltike. Jaʼ tstunes Skʼop, xchʼul espiritu xchiʼuk s˗organisasion. Aviloj xa van kʼu yelan skoltaojot li Jeovae. Ta jkʼeltik batel kʼusi xuʼ xapas sventa jechuk˗o xalokʼ li amol talelale xchiʼuk ti xuʼuk xavichʼ voʼe.
9. ¿Kʼusi xuʼ skoltaot˗o li Vivliae?
9 Chano Vivlia sventa xakʼel kʼu yelan li atalelale. Li Vivliae xkoʼolaj ta jun nen. Jaʼ yuʼun, xuʼ skoltaot sventa xakʼel lek li kʼusitik chanope, ti kʼu yelan chakʼopoje xchiʼuk li kʼusitik chapase (Sant. 1:22-25). Xuʼ skoltaot li buchʼu chakʼbot estudioe xchiʼuk li yan ermanoetik ti lek xa chanemike. ¿Kʼuxi tspasik? Tstunesik Vivlia sventa xavakʼ venta li kʼusi lek spas avuʼune xchiʼuk li kʼusi vokol chavaʼi spasele. Jech xtok, chakʼik avil kʼuxi xuʼ xasaʼ beiltaseletik ta jvuntik sventa xavikta li kʼusi chopol nopem xavaʼi spasele. Li Jeova eke skotol ora tskʼan tskoltaot. Jaʼ noʼox stuk ti lek xuʼ skoltaote, yuʼun xil li kʼusi oy ta avoʼontone (Prov. 14:10; 15:11). Jaʼ yuʼun, nopuk xavaʼi ti xakʼopone xchiʼuk ti xachanbe Skʼop skotol kʼakʼale.
10. ¿Kʼusi chakʼ achan li kʼusi kʼot ta stojolal Elie?
10 Jpʼeluk ta avoʼonton ti toj lek li smantaltak Jeovae. Skotol li kʼusi chalbutik Jeovae jaʼ sventa jlekilaltik. Li buchʼutik chchʼunbeik smantale oy sbalil chaʼi sbaik, oy smelol li xkuxlejalike xchiʼuk xmuyubajik ta melel (Sal. 19:7-11). Pe li buchʼutik mu xchʼunike chil svokolik ta skoj ti jaʼ tspasik li kʼusi tskʼan sbekʼtalike. Jun vinik ti jaʼ sbi Elie laj yakʼ venta kʼusi chkʼot ta pasel kʼalal muʼyuk ta jchʼunbetik li smantaltak Diose. Akʼo mi skʼanojik Jeova li stot smeʼe, la saʼ xchopol amigotak kʼalal chex kerem toʼoxe, lik slajes droga, lik mulivajuk xchiʼuk lik elkʼajuk. Chal ti mas to simaronibe xchiʼuk ti toj ven saʼ kʼope. Xi chale: «Ta jpas skotol li kʼusi mu stakʼ spas jun yajtsʼaklom Kristoe». Pe muʼyuk xchʼay ta sjol li kʼusi akʼbat xchan yuʼun stot smeʼ ta sbikʼtale. Jaʼ yuʼun, lik xchan Vivlia ta tsʼakal. Laj yakʼ persa yiktael li kʼusi chopol nopem xaʼi spasele, vaʼun laj yichʼ voʼ ta sjabilal 2000. ¿Kʼuxi staojbe sbalil ti xchʼunojbe smantal Jeovae? Xi chale: «Li avie jun noʼox koʼonton xchiʼuk sak li jol koʼontone». * Li kʼusi kʼot ta stojolal Elie chakʼ ta ilel ti jaʼ noʼox chil svokol stukik li buchʼutik mu xchʼunbeik smantal Jeovae. Pe oy ta yoʼonton Jeova ti skoltaan sventa sjel li xkuxlejalike.
11. ¿Kʼusitik spʼajoj li Jeovae?
11 Pʼajo li kʼusi tspʼaj Jeovae (Sal. 97:10). Li Vivliae chal ti Jeovae spʼajoj «li jtoyba satile, li jutkʼop eile xchiʼuk li kʼobil ti tsmalbe xchʼichʼel li buchʼu chʼabal smule» (Prov. 6:16, 17). Jech xtok, spʼajoj «li jsaʼkʼopetike xchiʼuk li jloʼlavanejetike» (Sal. 5:6). Li Jeovae chopol tajek chil li buchʼu jech tspase, jaʼ yuʼun la slajesbe skʼoplal li chopol krixchanoetik ta skʼakʼalil Noe ta skoj ti la snojesik ta choplejal li balumile (Jen. 6:13). Li kʼusi yan tspʼaj Jeovae jaʼ kʼalal tsmukul sati snup xchiʼilik sventa xtuchʼ snupunelik jech kʼuchaʼal laj yalbe li j˗alkʼop Malakiase. Akʼo mi chichʼik ta mukʼ Dios yalojik li buchʼutik jech tspase, muʼyuk chchʼambatik xchiʼuk ch˗akʼbat stoj smulik (Mal. 2:13-16; Ebr. 13:4).
Kʼalal ta jpastik li kʼusi chopol chil Jeovae, xkoʼolaj ti ta jlajestik jtosuk veʼlil ti sokem xae. (Kʼelo parafo 11, 12).
12. ¿Kʼusi skʼan xal ti ta jpʼajtik li kʼusi toj chopole?
12 Xi chalbutik li Jeovae: «Pʼajik li kʼusi toj chopole» (Rom. 12:9). Kʼalal pʼajik xie, chakʼ kaʼitik ti skʼan chopol tajek xkiltike xchiʼuk ti ibal sba xkiltike. Jnoptik noʼox ti oy buchʼu xalbutik ti akʼo jlajestik jtosuk veʼlil ti sokem xae, ¿mi ta van jlajestik? Muʼyuk, ch˗ib˗o van koʼontontik akʼo mi jaʼ noʼox ta jnoptik. Skʼan jaʼuk jech xkiltik li kʼusi chopol chil Jeova akʼo mi jaʼ noʼox ta jnoptik.
13. ¿Kʼu yuʼun skʼan pʼijkutik ta sventa li kʼusitik ta jnoptike?
13 Pʼijan me ta sventa li kʼusi chanope. Ta jpastik li kʼusi ta jnopilantike. Jaʼ yuʼun, li Jesuse laj yal ti skʼan jlokʼes ta jnopbentik li kʼusi xuʼ xikʼutik˗o batel ta spasel tsatsal mulile (Mat. 5:21, 22, 28, 29). Mi ta jkʼan ta jmuyubtabetik yoʼonton li Jtotik ta vinajele, toj tsots skʼoplal ti jlokʼestik ta anil li kʼusi chopol chtal ta jnopbentike.
14. ¿Kʼusi chakʼ ta ilel li jkʼopojeltike, xchiʼuk kʼusi skʼan jnopbetik skʼoplal?
14 Nopo lek li kʼusi chavale. Xi laj yal li Jesuse: «Li kʼusitik chlokʼ ta ye jun krixchanoe ta yoʼonton chlik tal» (Mat. 15:18). Li jkʼopojeltike jaʼ chakʼ ta ilel ti kʼu kelantik ta melele. Chʼakbo yorail sventa xanopbe skʼoplal liʼe: «¿Mi melel jnaʼ xikʼopoj skotol ora akʼo mi jnaʼoj ti xuʼ xkil˗o jvokole? Mi nupunemune, ¿mi ta jkʼel jba sventa mu jloʼlabe sjol li yantike? ¿Mi muʼyuk chkalbe skʼoplal mi jsetʼuk li kʼusitik sventa mulivajele? ¿Mi ta slekil koʼonton ta jtakʼbe li buchʼu tsabun jole?». Li jkʼopojeltike xkoʼolaj kʼuchaʼal stsʼisbenaltak jlik kʼuʼil. Jaʼ yuʼun, mi chopol chijkʼopoje, jech˗o jtalelaltik kʼuchaʼal li mol talelale. Mi ta jkʼan ta jlokʼ li jmol talelaltike, skʼan xkakʼtik persa ti mu xij˗utvane, ti mu jutik kʼope xchiʼuk ti mu xkalbetik skʼoplal li mulivajele.
15. ¿Kʼusi skʼan jpastik sventa jbajtik ta jtel teʼ li jmol talelaltike?
15 Jpʼeluk ta avoʼonton li kʼusi chapase. Li jtakbol Pabloe laj yalbe jun skʼelobil ti chakʼ kiltik ti toj tsots skʼoplal ti jel jkuxlejaltike. Laj yal ti skʼan jbajtik ta jtel teʼ li jmol talelaltike (Rom. 6:6). Li Jesuse lokʼ ta yoʼonton ti xichʼ bajel ta jtel teʼ ta skoj ti tskʼan lek ch˗ilat yuʼun li Jeovae. Jaʼ noʼox jech ek, mi ta jkʼantik lek chilutik Diose, skʼan xkiktatik li jchopol talelaltike xchiʼuk li kʼusitik chopol nopem xkaʼitik spasele. Mi jech ta jpastike, lek xa me sak li jol koʼontontike xchiʼuk xuʼ xijkuxi sbatel osil (Juan 17:3; 1 Ped. 3:21). Teuk ta joltik ti muʼyuk tsjel smantaltak li Jeova sventa jun xa koʼontontike. Moʼoj, yuʼun voʼotik skʼan jel jtalelaltik xchiʼuk ti jchʼunbetik li smantaltake (Is. 1:16-18; 55:9).
16. ¿Kʼu yuʼun skʼan jpʼeluk˗o ta koʼontontik stsalel li kʼusi chopol tskʼan koʼontontike?
16 Akʼo˗o persa stsalel li kʼusi chopol tskʼan avoʼontone. Akʼo mi avichʼoj xa voʼ, jechuk˗o me xavakʼ persa stsalel li kʼusi chopol tskʼan avoʼontone. Nopbo skʼoplal li kʼusi kʼot ta stojolal Maurício ti ta skeremal onoʼox lik xchiʼin ta vayel viniketike. Ta tsʼakale, laj yojtikin li stestigotak Jeovae xchiʼuk lik xchan li Vivliae. La sjel xkuxlejal, vaʼun laj yichʼ voʼ ta 2002. Akʼo mi oy xa ta sjayibaluk jabil chtun ta stojolal Jeova, xi chale: «Ti jamal xkaltike, ch˗ayan to ta koʼonton bakʼintik li kʼusi chopole». Pe muʼyuk chchibaj˗o, yuʼun xi to chale: «Jnaʼoj ti mi muʼyuk ta jpas li kʼusi chopol tskʼan koʼontone, xmuyubaj ta jtojolal li Jeovae». *
17. ¿Kʼuxi tspat avoʼonton li sloʼil xkuxlejal Nabihae?
17 Kʼanbo koltael Jeova xchiʼuk akʼo aba ta beiltasel yuʼun li xchʼul espiritue, maʼuk ta avipal atuk (Gal. 5:22; Filip. 4:6). Ep kʼusitik skʼan xavakʼ persa spasel sventa xalokʼ li amol talelale xchiʼuk ti mu xachaʼlape. Kʼelo avil li kʼusi kʼot ta stojolal jun ants ti Nabiha sbie. Iktaat yuʼun stot kʼalal vakib toʼox yuni jabilale. Xi chale: «Toj tsots laj kaʼi xchiʼuk kʼux tajek laj kaʼi li kʼusi kʼot ta pasele». Kʼalal chʼi batele, jpʼel tajek ta kʼop xchiʼuk simaronib. Lik xchon droga, vaʼun tikʼat ta chukel jayibuk jabil. Ta tsʼakale, lik xchan Vivlia xchiʼuk stestigotak Jeova ti te chkʼotik ta chukinabe. Vaʼun, lik sjel li xkuxlejale. Xi chale: «Junantik li kʼusi nopem xkaʼi spasele muʼyuk vokol laj kaʼi yiktael. [...] Pe jaʼ vokol tajek laj kaʼi yiktael li sbutsʼel sikʼolale». Mas ta jun jabil laj yakʼ persa yiktael li kʼusi nopem xaʼi spasele, vaʼun kom onoʼox yuʼun ta persa. ¿Kʼuxi laj yut? Xi chale: «Jaʼ la skoltaun ti nopolik noʼox la jkʼopon li Jeovae». Xi to chale: «Jnaʼoj lek ti buchʼuuk noʼox xuʼ sjel stalelal sventa smuyubtabe yoʼonton Jeova jech kʼuchaʼal la jpase». *
XUʼ ME XAJEL ATALELAL SVENTA XAVICHʼ VOʼ
18. Jech kʼuchaʼal chal 1 Korintios 6:9 kʼalal ta 11, ¿kʼusi pasem yuʼunik epal yajtuneltak Dios?
18 Li ta baʼyel sigloe, junantik li buchʼutik tʼujatik yuʼun Jeova sventa jmojuk x˗ajvalilajik xchiʼuk Kristoe oy toʼox kʼusitik chopol spasojik li ta voʼnee. Jech kʼuchaʼal liʼe, sloʼlaoj toʼox xchiʼilik ta nupunel, chchiʼinik toʼox ta vayel xchiʼilik ta vinikal xchiʼuk ch˗elkʼajik toʼox. Pe ta skoj ti koltaatik yuʼun li xchʼul espiritu Jeovae, jel xkuxlejalik (kʼelo 1 Korintios 6:9-11). Li avi eke, li Vivliae skoltaoj ta smiyonal noʼox krixchanoetik yoʼ sjel xkuxlejalik. * Yiktaojik li kʼusi meʼinem xaʼiik spasele. Li kʼusi la spasike chakʼ ta ilel ti xuʼ xajel akuxlejal eke xchiʼuk ti xuʼ xavikta li kʼusi chopol nopem xavaʼi spasel yoʼ xavichʼ voʼe.
19. ¿Kʼusi ta jkʼeltik li ta yan xchanobile?
19 Li buchʼutik tskʼan chichʼik voʼe maʼuk noʼox skʼan xakʼik persa ti slokʼ li smol talelalike, yuʼun skʼan slapik xtok li achʼ talelale. Li ta yan xchanobile, ta jkʼeltik kʼuxi xuʼ jpastik xchiʼuk kʼuxi xuʼ skoltautik li yantike.
KʼEJOJ 41 Avokoluk, Dios, chikintabun j˗orasion
^ Mi tskʼan chichʼ voʼ li buchʼu chichʼ estudioe, skʼan me sjel li stalelale. Li ta xchanobil liʼe, ta jkʼeltik kʼusi jaʼ li mol talelale, kʼu yuʼun skʼan jeltik xchiʼuk kʼuxi xuʼ spas kuʼuntik. Li ta yan xchanobile, ta jkʼeltik kʼuxi xuʼ jechuk jlapojtik˗o li achʼ talelal akʼo mi kichʼojtik xa voʼe.
^ LIʼE TSOTS SKʼOPLAL: Kʼalal ta jlokʼ li jmol talelaltike, jaʼ skʼan xal ti ta jeltik li jtalelaltik ti chopol chil Jeovae xchiʼuk li kʼusitik chopol ta jkʼan ta jpastike. Skʼan jech xlik jpastik kʼalal muʼyuk to kichʼojtik voʼe (Efes. 4:22).
^ Mi chakʼanbe to mas yaʼyejale, kʼelo li mantal ti xi sbie: «Jelbat˗o xkuxlejalik yuʼun li Vivliae: ‹Skʼan xisut ta stojolal Jeova›», ti lokʼ li ta revista Li Jkʼel osil ta toyol ta avril-junio ta 2012.
^ Mi chakʼanbe to mas yaʼyejale, kʼelo li mantal ti xi sbie: «La Biblia les cambió la vida: ‹Fueron muy amables conmigo›», ti lokʼ li ta revista La Atalaya ta 1 yuʼun mayo ta 2012.
^ Mi chakʼanbe to mas yaʼyejale, kʼelo li mantal ti xi sbie: «La Biblia les cambió la vida: ‹Llegué a ser una joven irritable y agresiva›», ti lokʼ li ta revista La Atalaya ta 1 yuʼun oktuvre ta 2012.
^ Kʼelo li rekuadro « Jelbat˗o xkuxlejalik yuʼun li Vivliae».
^ LI KʼUSI XVINAJ TA LOKʼOLE: Kʼalal ta jeltik li jchopol talelaltik xchiʼuk li kʼusitik chopol nopem xkaʼitik spasele, xkoʼolaj ti ta jiptik lokʼel li jmol kʼuʼtike.
