1. Муқәддәс китапни үгинишни башлаштин бурун һаятиңиз қандақ еди?

 ЙӘҺВА ГУВАЧИЛИРИ билән Муқәддәс китапни үгинишни башлаштин илгири, қандақ һаят кәчүргән едиңиз? Көпинчимиз өтмүшимизни әсләшни яхши көрмәймиз. Чүнки бизниң көзқаришимиз вә миҗәз-хулқимиз бу дунияниң қиммәт қаришиға, йәни тоғра-хата өлчәмлириниң тәсиригә учриған болуши мүмкин. Әгәр растинла шундақ болса, биз үмитсиз вә Худасиз яшиған (Әфәс. 2:12). Муқәддәс китапни тәтқиқ қилип үгәнгәндин кейин, һаят кәчүрүш усулимиз өзгәрди!

2. Муқәддәс китапни тәтқиқ қилишни башлиғандин кейин қандақ ишларни байқидиңиз?

² Сиз Муқәддәс китапни үгәнгәндә, сизни интайин яхши көридиған асмандики Атиңизниң барлиғини байқидиңиз. Әгәр сиз Йәһвани хурсән қилмақчи вә Униңға ибадәт қилидиған чоң аилиниң бир әзаси болмақчи болсиңиз, һаят кәчүрүш усулиңиз, көзқаришиңизда көплигән өзгәртишләрни қилишиңиз керәклигини тонуп йәттиңиз. Шундақла сиз Йәһва тоғра дегән ишларни қилиш билән биргә, хата дегән ишлардин жирақ қечишни үгинишиңиз керәк (Әфәс. 5:3—5).

3. Колосилиқларға 3:9, 10-айәтләргә асасән, Йәһва немә қилишимизни халайду вә бу мақалидә немиләрни муһакимә қилимиз?

³ Бизниң Яратқучимиз вә әрштики Атимиз Йәһваниң Өз аилисидикиләрниң қандақ ибадәт қилиши керәклигини бәлгүләш һоқуқи бар. У биз чөмдүрүлүштин илгири кона тәбиитимизни бурунқи қилмишлар билән биллә чөрүп ташлашни тәләп қилиду b (Колосилиқларға 3:9, 10-ни оқуң). Бу мақалә чөмдүрүлмәкчи болғанларниң төвәндики үч соалға җавап тепишиға ярдәм бериду: 1) Кона тәбиәт дегән немә? 2) Немә үчүн Йәһва бизни уни чөрүп ташлашқа дәвәт қилиду? 3) Шундақ қилиш үчүн немә қилалаймиз? Аллиқачан чөмдүрүлгәнләр үчүн  болса, бу тәтқиқ мақалиси илгири ташлавәткән кона тәбиитимиздики миҗәз-хулуқларниң қайта пәйда болушиниң алдини елишқа ярдәм бериду.

4. Кона тәбиити тәрипидин контрол қилинған адәм қандақ һәрикәт қилиду?

⁴ «Кона тәбиити» тәрипидин башқурулған адәм адәттә тәнниң хаһишлириға берилип, гуналиқ ишларни ойлайду вә қилиду. У тез аччиқлиниши, шәхсийәтчи, миннәтдарсиз вә тәкәббур болуши мүмкин. У шәһваний материалларни көрүш вә әхлақсизлиқ яки зораванлиқ мәзмун қилинған кино-фильмларни көрүштин һузурлиниши мүмкин. Шәк-шүбһисизки, униң бәзи яхши миҗәз-хулуқлири бар, у бәлким өзи яман гәп-сөзләр яки ишларни қилғанда, өзини гунакардәк һис қилиши мүмкин. Амма униң ой-пикир вә иш-һәрикитини өзгәртиш арзу-истиги күчлүк әмәс (Гал. 5:19—21; Тим. 2-х. 3:2—5).

5. Бизниң кона тәбиитимизни пүтүнләй чөрүп ташлишимиз мүмкинму? Чүшәндүрүң (Әлчиләр 3:19).

⁵ Биз мукәммәл әмәс, шуңа һечқайсимиз қәлбимиз вә мейимиздики барлиқ яман ой-пикирләр вә хаһишларни пүтүнләй чиқирип ташлалмаймиз. Бәзи вақитларда өзүмиз пушайман қилидиған гәп-сөзни яки ишни қилип салимиз (Йәр. 17:9; Яқуп 3:2). Амма биз кона тәбиәтни чөрүп ташлиғанда, тәнниң хаһишлири вә ишлири бизни йәнә башқуралмайду. Биз башқичә бир адәм болимиз (Йәшая 55:7; Әлчиләр 3:19ни оқуң).

6. Немә үчүн Йәһва бизни кона тәбиитимиздики хата ой-хиял вә начар адәтлиримизни ташлашқа үндәйду?

⁶ Йәһва бизни хата ой-хиял вә начар адәтләрни ташлашқа үндәйду, чүнки У бизни сөйиду вә бизниң шат-хорам һаят кәчүрүшимизни бәк халайду (Йәшая 48:17, 18). У хата арзу-һәвәслиригә қарши күрәш қилмиғанларниң өзигә вә өзгиләргә азар беридиғанлиғини билиду. Бизниң өзүмизгә вә башқиларға азар бәргәнлигимизни көргәндә, Униң көңли азаплиниду.

7. Римлиқларға 12:1, 2-айәтләргә асасән, бизниң қандақ таллишимиз бар?

⁷ Бәзи достлиримиз вә аилә әзалиримиз дәсләптә миҗәз-хулуқлиримизни өзгәртишкә урунғанлиғимизни көрүп, бизни мәсхирә қилиши мүмкин (Пет. 1-х. 4:3, 4). Бәлким, улар: «Биз немә қилишни халисақ, шундақ қилиш һоқуқимиз бар, башқиларниң бизгә немә қилишни үгитишигә рухсәт бәрмәслигимиз керәк»,— дәйду. Амма Йәһваниң өлчәмлирини  рәт қилғанлар әмәлийәттә әркин әмәс. Әксичә, улар Шәйтанниң тәсири астидики дунияниң өзлирини башқурушиға йол бәргән (Римлиқларға 12:1, 2ни оқуң). Һәммимиз бир таллашқа дуч келимиз: гуна вә Шәйтанниң дуниясиниң тәсиридә кона тәбиитимиз билән яшаверимиз яки Йәһваниң бизни һазир яхши бир кишигә өзгәртишигә йол беримиз (Йәшая 64:8).

8. Хата ой-пикир вә начар адәтләрдин жирақ болушимизға немә ярдәм берәләйду?

⁸ Йәһва бизниң хата ой-пикир вә начар адәтлиримиздин жирақ болушимиз үчүн вақит вә күч кетидиғанлиғини билиду (Зәб. 103:13, 14). Шундақтиму, Йәһва Өз Сөзи, роһи вә тәшкилати арқилиқ бизгә өзүмизни өзгәртиш үчүн керәклик әқил-парасәт, күч-қувәт вә илһам-мәдәт бериду. Шәк-шүбһисизки, У аллиқачан сизгә ярдәм бәргән. Әнди сиз кона тәбиитиңизни чөрүп ташлап, һәтта чөмдүрүлүшкә лаяқәтлик болуш үчүн қайси бәзи қәдәмләрни басалайдиғанлиғиңизни көрүп чиқайли.

9. Худаниң Сөзи сизгә қандақ ярдәм берәләйду?

⁹ Муқәддәс китаптин пайдилинип, өз-өзүңизни әстаидил тәкшүрүң. Худаниң Сөзи худди әйнәк охшаш. У сизниң ойлаш, сөзләш вә һәрикәт қилиш усулиңизни тәһлил қилишиңизға ярдәм берәләйду (Яқуп 1:22—25). Сиз билән Муқәддәс китап тәтқиқ үгинишини өткүзиватқан киши яки башқа етиқатта пишип йетилгән Йәһва гувачилири сизгә мәслиһәтләрни берәләйду. Мәсилән, улар Муқәддәс китап арқилиқ сизниң артуқчилиқ вә камчилиқ тәрәплириңизни ениқлишиңизға ярдәм бериду. Улар сизгә начар адәтләрни қандақ йеңиш тоғрисида әмәлий мәслиһәтләрни беридиған Муқәддәс китапқа асасланған мәлуматларни қандақ тепишни үгитиду. Униңдин башқа, Йәһва сизгә ярдәм беришкә һәр вақит тәйяр. У сизгә қандақ ярдәм қилишни әң яхши билиду. У көңлүңиздикини билиду (Пәнд н. 14:10; 15:11). Шуңа һәр күни Униңға дуа қилиш вә Униң Сөзини тәтқиқ қилип үгинишни адәткә айландуруң.

10. Елиниң мисалидин немини үгәндиңиз?

¹⁰ Йәһваниң өлчәм-қаидилириниң әң яхши екәнлигигә ишиниң. Йәһва биздин қилишни тәләп қилған барчә ишлар биз үчүн пайдилиқтур. Униң өлчәмлири бойичә яшайдиғанлар өз-өзини һөрмәтләйду, мәналиқ һаят кәчүрүп, һәқиқий шат-хорамлиққа еришиду (Зәб. 19:7—11). Амма Йәһваниң өлчәмлирини рәт қилғанлар тәнниң хаһиши билән яшап, яман ақивәткә дучар болиду. Ели исимлиқ бир кишиниң Худаниң өлчәмлирини рәт қилип, немиләрни дегәнлигигә диққәт қилип бақайли. Униң ата-аниси Йәһвани сөйидиған кишиләр болған. Амма Ели өсмүрлүк чеғида яманлар билән арилишишни таллиған. У зәһәрлик чекимлик чекиш, җинсий әхлақсизлиқ вә оғрилиқларни қилишқа башлиған. Ели өзиниң барғансири қәһри-ғәзәп вә зораван болуп кетиватқанлиғини байқиғанлиғини ейтип, шуни етирап қилған: «Ениғирақ ейтқанда, Әйсаниң әгәшкүчилири қилиштин сақлиниши керәк дәп үгитилгән яман ишларниң һәммисини қилдим». Бирақ Ели яш вақитлирида үгәнгәнлирини унтуп қалмиған еди. Ахирида у Муқәддәс китапни қайта үгинишкә башлиған. У өзиниң яман адәтлирини ташлаш үчүн көп тиришчанлиқ көрсәткән вә 2000-жили чөмдүрүлгән. У Йәһваниң өлчәмлири бойичә яшашниң қандақ пайдисини көргән? Ели мундақ дәйду: «Һазир көңлүм тинч-хатирҗәм вә вижданим пак» c. Мошу мисалдин көргинимиздәк, Йәһваниң өлчәмлирини рәт қилғанлар өз-өзигә азар бериду. Шундақтиму, Йәһва һәтта уларниң өзини өзгәртишигә ярдәм беришкә тәйяр.

11. Йәһва немиләрни өч көриду?

 ¹¹ Йәһва өч көридиған ишларни өч көрүшни үгиниң (Зәб. 97:10). Муқәддәс китапта Йәһваниң «тәкәббурлуқ билән қарайдиған көз, ялған сөзләйдиған тил, бигуналарниң қенини төкүзидиған» қолни өч көридиғанлиғи көрситилгән (Пәнд н. 6:16, 17). Йәнә бу һәққидә шундақ сөзләр йезилған: «Қан төкүдиған һәм мәккардин жиркиниду Йәһва» (Зәб. 5:6). Йәһва бундақ илләтләрни вә иш-һәрикәтләрни интайин өч көриду. У Нуһниң заманида йәр йүзини зораванлиқ билән толдурған барчә рәзил кишиләрни һалак қилған (Ярит. 6:13). Башқа бир мисални көрүп бақайли. Йәһва Малаки пәйғәмбәр арқилиқ һелигәрлик билән бегуна һәмрасидин аҗришип, некасини бузған вапасизларни өч көридиғанлиғини ейтқан еди. Худа уларниң ибадәтлирини рәт қилиду вә қилмишлири үчүн улардин һесап алиду (Мал. 2:13—16; Ибр. 13:4).

12. Яманлиқтин жиркиниш дегән немә?

¹² Йәһва бизгә «яманлиқтин жиркиниңлар» дәйду (Рим. 12:9). «Жиркинич» сөзи күчлүк инкас һис-туйғусини тәсвирләйду. Бу бир нәрсини қаттиқ өч көрүш, униңдин безар болуш дегәнни билдүриду. Әгәр сиздин сесип қалған бир тәхсә тамақни йейишни тәләп қилса, қандақ инкас қайтуридиғанлиғиңизни тәсәввур қилип беқиң. Буни ойлашниң өзи көңлүңизни беарам қилиши мүмкин. Худди шуниңға охшаш, Йәһва яман дегән ишни, һәтта ойлаштинму жиркинишимиз керәк.

13. Немә үчүн чоқум ой-пикримизни қоғдишимиз керәк?

¹³ Ой-пикриңизни қоғдаң. Ой-пикримиз иш-һәрикитимизгә тәсир қилиду. Шуңлашқа, Әйса бизгә еғир гунаға йетәкләйдиған ой-пикирни рәт қилишни үгәткән (Мәт. 5:21, 22, 28, 29). Биз асмандики Атимизни хурсән қилишни халаймиз. Шундақ екән, мейимиздә пәйда болған һәрқандақ яман ой-хиялни дәрһал рәт қилишимиз интайин муһим!

14. Гәп-сөзлиримиз немини ашкарилайду вә қандақ соалларға җавап беришимиз керәк?

¹⁴ Гәп-сөзүңизни башқуруң. Әйса Мәсиһ: «Еғиздин чиққан нәрсә болса, жүрәктин чиқиду, шу нәрсә адәмни булғайду»,— дегән (Мәт. 15:18). Шундақ, ағзимиздин чиққан сөзләр ички дуниямизниң қандақ екәнлигини ашкарилайду. Шуңа өз-өзүңиздин мону соалларни сорап көрүң: «Раст гәп қилсам, көп аваричилиққа қалидиған болсамму, ялған сөзләшни рәт қиламдим? Той қилған адәм болғачқа, ят җинислиқлар билән көз-қаш ойнитиштин еһтият қилимәнму? Мән әхлақсиз гәп-сөзләрни қилиштин пүтүнләй сақлинамдим? Башқилар мени рәнҗиткәндә, еғир бесиқлиқ билән  җавап қайтурамдим?» Бу соаллар үстидә әстаидил ойлиниш сиз үчүн пайдилиқ екәнлигини байқайсиз. Тон чапанни жиңнә тикишлири бир-биригә улап турғандәк, яман гәп-сөзләр кона тәбиәтни тутуп туриду. Демәк, кона тәбиитимизни житип ташлашни халисақ, пүтүн күчимиз билән һақарәтлик, ялған вә әхлақсиз гәп-сөзләрни ишлитишни тохтитишимиз лазим.

15. Кона тәбиитимизни түврүк яғачқа миқлаш немини билдүриду?

¹⁵ Зөрүр ишни қилишқа тәйяр туруң. Әлчи Паул бир тәмсилни ишлитип, бизгә һаят кәчүрүш усулимизни өзгәртишниң бәк муһимлиғини үгәткән. У кона тәбиитимизни чоқум түврүк яғачқа миқлишимиз керәклигини язған еди (Рим. 6:6). Башқичә ейтқанда, биз Мәсиһниң үлгисигә әгишишни халаймиз. Биз Йәһва өч көридиған көзқараш вә адәтләрни ташлишимиз лазим. Пак вижданға вә мәңгүлүк һаят үмүтигә еришиш үчүн чоқум бу қәдәмләрни бесишимиз зөрүр (Йоһ. 17:3; Пет. 1-х. 3:21). Есиңиздә болсунки, Йәһва бизни хошал қилиш үчүн өзиниң өлчәмлирини өзгәртмәйду. Әксичә, биз Униң өлчәмлиригә мас яшаш үчүн өзүмизни өзгәртишимиз лазим (Йәшая 1:16—18; 55:9).

16. Немә үчүн тәнниң аҗизлиқлириға қарши күрәш қилишни қәтъий давамлаштурушиңиз керәк?

¹⁶ Тәнниң хата арзу-һәвәслиригә қарши турушни давамлаштуруң. Сиз чөмдүрүлгәндин кейинму, давамлиқ тәнниң хаһишиға қарши күрәш қилишиңиз керәк. Маурисио исимлиқ кишиниң кәчүрмишлиригә диққәт қилиң. У яш вақитлирида охшаш җинислиқлар билән әхлақсиз турмуш кәчүрүшкә башлиған. Ахирида у Йәһваниң хәлқини учритип, Муқәддәс китапни тәтқиқ қилишни башлиған. У һаят кәчүрүш усулини өзгәртип, 2002-жили чөмдүрүлгән. Гәрчә һазир Йәһваға хизмәт қилғиниға узун жил болған болсиму, Маурисио мундақ дәйду: «Шуни етирап қилишим керәкки, мән бәзидә намувапиқ арзу-һәвәсләргә қарши күрәш қилишим керәк». У буниң уни үмүтсизләндүрүшигә йол бәрмәйду. Әксичә, у мундақ дәйду: «Мән шу арзу-һәвәсләргә әгәшмәсликни таллаш арқилиқ Йәһвани хурсән қилалайдиғанлиғимни билгәчкә, көңлүм тәсәлли тапиду» d.

17. Нәбиханиң кәчүрмишлиридин немиләрни үгәндиңиз?

¹⁷ Дуа қилип Йәһвадин ярдәм сораң вә өз күчиңизгә таянмай, Униң роһиға тайиниң (Гал. 5:22; Флп. 4:6). Әгәр кона миҗәз-хулқимизни ташлап, униңдин жирақ турушни  халисақ, чоқум көп тиришчанлиқ көрситишимиз керәк. Нәбиха исимлиқ бир аялниң кәчүрмишлирини көрүп бақайли. Әндила алтә яшқа киргәндә, дадиси уни ташлап кәткән еди. У: «Бу маңа роһий вә һиссий җәһәттин еғир зәрбә болған»,— дәйду. Йешиниң чоңийишиға әгишип, Нәбиха барғансири аччиқчан вә тили зәһәрдәк қопал аял болған. У зәһәрлик чекимликләрни сетишқа башлиған вә қолға елинип бирқанчә жил түрмидә ятқан. Түрмини зиярәт қилип, вәз ейтқан Гувачилар униң билән биллә Муқәддәс китап тәтқиқ үгинишини башлиған. Шуниң билән, Нәбиха һәйран қаларлиқ чоң өзгәртишләрни қилған. У мундақ дәйду: «Бәзи яман адәтлиримни ташлаш асан болди, амма тамака ташлашта бәк қийиналдим». Нәбиха бир жилдин көпирәк җапалиқ күрәш қилип, тамакини ахири ташлиған еди. У буни қандақ қилалиған? У мундақ дәйду: «Тамакини ташлашқа ярдәм сорап Йәһваға тохтимай дуа қилдим». У һазир башқиларға: «Мән Йәһвани хурсән қилиш үчүн өзүмни өзгәртәлигән екәнмән, һәрқандақ кишиниң һәм шундақ қилалайдиғанлиғиға ишинимән!»— дәйду e.

18. Коринтлиқларға 1-хәт 6:9—11 айәтләргә асасланғанда, Худаниң нурғунлиған хизмәтчилири немә қилалиған?

¹⁸ Биринчи әсирдә Йәһва тәрипидин Әйса Мәсиһ билән бирликтә падишалар болушқа талланған бәзи әрләр вә аяллар илгири яман адәтләргә қул болуп яшиған еди. Мәсилән, улар зинахорлар, охшаш җинислиқлар билән җинсий мунасивәт қилғучилар вә оғрилар еди. Амма Худаниң муқәддәс роһиниң ярдимидә, улар миҗәз-хулуқлирини өзгәртәлигән (Коринтлиқларға 1-хәт 6:9—11ни оқуң). Худди шуниңдәк бүгүнки күндиму, Муқәддәс китап миллионлиған кишиләрниң һаятини өзгәртишигә ярдәм бериватиду f. Улар өзлиридә чоңқур йилтиз тартқан яман адәтләрни қомуруп ташлиди. Уларниң мисали шуни испатлайдуки, сизму миҗәз-хулуқлириңизни өзгәртип, яман адәтләрни ташлап, чөмдүрүлүшкә лаяқәтлик болалайсиз!

19. Кейинки мақалидә немини муһакимә қилимиз?

¹⁹ Чөмдүрүлүшни халайдиғанлар кона тәбиәт, йәни миҗәз-хулқини чөрүп ташлаштин башқа, йәнә йеңи тәбиәтни кийиш үчүн чоқум тиришчанлиқ көрситиши керәк. Кейинки мақалидә йеңи тәбиәтни қандақ кийәләймиз вә шундақ қилишимизға башқилар қандақ ярдәм берәләйду дегәнләрни муһакимә қилимиз.