UYONO 10
Wo se “Siobọ nẹ Ohwo rẹ Awanre Na”
“Ovwan siobọ nẹ ohwo rẹ awanre na vẹ uruemu rọye ejobi.”—KỌL. 3:9.
UNE 29 Yeren Akpọ ro Fo Odẹ rẹ Avwanre
ỌDJẸKOKO *
1. Oka rẹ akpọ vọ yen wo yerẹn jovwo wọ ke ton uyono ri Baibol phiyọ?
MAVỌ yen akpeyeren wẹn hepha jovwo wọ ke ton uyono ri Baibol vẹ Iseri ri Jihova phiyọ? Buebun avwanre guọnọ roro kpahọ-ọn. Ọka rẹ ẹro rẹ akpọ nana vwo nẹ obo re brare vẹ obo ri yoma, yen avwanre yeren akpo nene jovwo. Ọtiọyena, avwanre ke rhe dia ihwo “ri vwo iphiẹrohọ-ọ, ri vwo Ọghẹnẹ vwẹ akpọ na-a.” (Ẹfe. 2:12) Uyono ri Baibol yen wene enana eje!
2. Die wọ mrẹvughe ọke ru wọ vwọ ton uyono ri Baibol na phiyọ?
2 Wo vwo yono Baibol na, ku wọ rhe mrẹvughe nẹ wo vwo Ọsẹ vwẹ obodjuvwu ro vwo ẹguọnọ wẹn mamọ. Wọ rhe mrẹvughe nẹ wọ da guọnọ ru obo re vwerhen Jihova oma je dia ẹbẹre ọvo rẹ orua rọ vwẹ ẹga kẹ, ko fori nẹ wo ru ewene evo kiriguo vwẹ oborẹ wo yeren akpọ wan, ẹro wo vwo ni emu, kugbe iroro wẹn. Ku wọ cha davwẹngba vwo yeren akpọ wẹn vwo nene iwan rẹ Jihova phiyotọ.—Ẹfe. 5:3-5.
3. Vwo nene obo rehẹ Kọlose 3:9, 10, die yen Jihova guọnọre nẹ e ru, kẹ, die yen a cha fuẹrẹn vwẹ uyono nana?
3 Ọmemama kugbe Ọsẹ rẹ avwanre rọhẹ obodjuvwu Jihova vwo uturhi ro vwo brorhiẹn rẹ oborẹ ihwo rẹ orua rọyen che yeren akpọ wan. Ọ guọnọre nẹ a davwẹngba vwo “siobọ nẹ ohwo rẹ awanre na vẹ uruemu rọye ejobi” tavwen e ki bromaphiyamẹ. * (Se Kọlose 3:9, 10.) Uyono nana cha chọn ihwo re guọnọ bromaphiyame uko vwọ kpahenphiyọ enọ erha nana: (1) Die yen “ohwo rẹ awanre na”? (2) Diesorọ Jihova vwọ vuẹ avwanre nẹ e siobọ no? (3) Mavọ yen e se vwo ru ọtiọyen? Vwọ kẹ ihwo ri bromaphiyame re, uyono nana cha chọn avwanre uko vwọ kẹnoma kẹ ohwo rẹ awanre rẹ avwanre ka dia jovwo e ki bromaphiyame na.
DIE YEN “OHWO RẸ AWANRE NA”?
4. Mavọ yen ohwo ro vwo iruemu rẹ “ohwo rẹ awanre na” yeren akpọ rọyen wan?
4 Ohwo ro ruẹ nene iruemu rẹ “ohwo rẹ awanre na” roro ji nenesi rẹ ojevwe rẹ ugboma. Ohwo tiọyena sa dia ọvwurhuru, ohwo rọ fobọ muophu, ohwo rọ riẹn ẹse-e kugbe ohwo ro phuoma. O se vwo omavwerhovwẹn kpahen re vwo nẹ ihoho rẹ ihwo re banphiyọ vẹ ighe rẹ ozighi yẹrẹ ọfanrhiẹn. O muẹro nẹ ohwo ọtiọyena ji vwo iruemu iyoyovwin evo, ọ je sa dianẹ ẹwẹn obrorhiẹn rọyen kpokpo kpahen erọnvwọn ebrabra rọ ta yẹrẹ ruẹ. Ẹkẹvuọvo, owenvwe o vwori ro vwo wene iroro vẹ iruemu ebrabra rọyen ghwa gan te-e.—Gal. 5:19-21; 2 Tim. 3:2-5.
E de siobọnu “ohwo rẹ awanre na vẹ iruemu rọyen,” ojevwe rẹ ugboma na rhe che sun iruemu vẹ iroro rẹ avwanre-e (Ni ẹkorota 5) *
5. E ghini se siobọnu ohwo rẹ awanre na kare kare? Djekpahọn. (Iruo Rẹ Iyinkọn Na 3:19)
5 Avwanre ihwo eje gbare-e, ọtiọyena e che se si iroro vẹ urhurusivwe echọchọ nẹ udu vẹ ẹwẹn avwanre kare kare-e. Ọkievo, a sa ta yẹrẹ ru erọnvwọn evo re cha rhoma da avwanre obọ. (Jẹr. 17:9; Jems 3:2) Ẹkẹvuọvo, siẹrẹ e de siobọnu ohwo rẹ awanre na vẹ iruemu rọyen, ojevwe rẹ ugboma na rhe che se sun iruemu vẹ iroro rẹ avwanre-e. Ọnana cha nẹrhẹ avwanre rhe dia ihwo re fẹnẹ oka rẹ ohwo rẹ avwanre hepha jovwo.—Aiz. 55:7; se Iruo Rẹ Iyinkọn Na 3:19.
6. Diesorọ Jihova vwo jiro kẹ avwanre nẹ e siobọnu iroro vẹ iruemu echọchọ rẹ ohwo rẹ awanre na?
6 Jihova jiriro vwọ kẹ avwanre nẹ, e gbobọnyẹ iroro echọchọ kugbe iruemu ebrara kidie o vwo ẹguọnọ rẹ avwanre mamọ, ọ je guọnọ nẹ avwanre riavwerhen rẹ akpeyeren. (Aiz. 48:17, 18) Jihova riẹnre nẹ ihwo re sa kẹnoma vwọ kẹ erharhe rẹ iroro vẹ iruemu-u, so omaẹkuọn vwọ kẹ ihwo efa vẹ ihwo re riariẹ ayen phiyọ. Ọ da Jihova mamọ siẹrẹ avwanre da so omaẹkuọn kẹ oma rẹ avwanre kugbe ihwo efa.
7. Vwo nene obo rehẹ Rom 12:1, 2, ojẹ vọ yen avwanre vwori?
7 Igbeyan vẹ ihwo rẹ orua rẹ avwanre evo vwẹ avwanre jehwẹ, kidie nẹ a davwẹngba e vwo wene iruemu vẹ iroro rẹ avwanre. (1 Pita 4:3, 4) Ayen sa tanẹ, avwanre vwo uturhi e vwo ru oborẹ a guọnọ ru eje, nẹ ofori a vwọ vwẹ uphẹn kẹ ihwo efa nẹ ayen vuẹ avwanre obo re che ru-u. Ẹkẹvuọvo, ọ dia ẹdia rẹ ugbomọphẹ yen ihwo re sen iwan ri Jihova hepha-a. Vwọrẹ uyota, ayen vwẹ uphẹn vwọ kẹ akpọ rẹ Eshu na nẹ o sun ayen. (Se Rom 12:1, 2.) Avwanre eje vwo ojẹ rẹ a cha jẹ: Sẹ a cha sẹro rẹ iruemu vẹ iroro rẹ awanre na yẹrẹ a cha vwẹ uphẹn vwọ kẹ Jihova nẹ o wene avwanre phiyọ ohwo ro me yovwin a sa dia enẹna.—Aiz. 64:8.
MAVỌ WO SE VWO “SIOBỌ NẸ” OHWO RẸ AWANRE NA?
8. Die yen sa chọn avwanre uko vwọ kẹnoma kẹ iroro echọchọ kugbe erharhe rẹ iruemu?
8 Jihova riẹnre nẹ ọ cha reyọ ọke vẹ ẹgba a ke sa kẹnoma vwọ kẹ iroro echọchọ vẹ erharhe rẹ iruemu. (Une 103:13, 14) Ẹkẹvuọvo, Jihova womarẹ Baibol na, ẹwẹn ọfuanfon rọyen, kugbe ukoko rọyen vwọ kẹ avwanre aghwanre, ẹgba kugbe obicha ra guọnọre e se vwo ru ewene. Aphro herọ-ọ nẹ ọ chọn wẹ uko re. Enẹna, e gbe jẹ a ta ota vwọ kpahen owọẹjẹ evo ru wọ sa jẹ re sa chọn wẹ uko vwo siobọnu ohwo rẹ awanre na ji muwan vwọ kẹ omaebrophiyame.
9. Die yen Ota rẹ Ọghẹnẹ sa chọn wẹ uko vwo ru?
9 Reyọ Baibol na vwọ fuẹrẹn oma wẹn. Ota rẹ Ọghẹnẹ họhọ ughegbe rọ sa chọn wẹ uko vwọ nabọ fuẹrẹn oborẹ wo roro, obo wọ ta ota wan kugbe obo wo ruẹ erọnvwọn wan. (Jems 1:22-25) Ohwo ro yono uwe Baibol na kugbe Inenikristi efa ri tedje sa vwẹ odjekẹ yẹrẹ uchebro vwọ kẹ wẹ. Kerẹ udje, ayen sa vwẹ Baibol na vwọ chọn wẹ uko vwọ riẹn asan wọ da gan kugbe asan wọ da vwiẹrẹ. Ayen se yono uwe oborẹ wọ sa vwọ mrẹ evuẹ re mu kpahen Baibol na re vwẹ uchebro vwọphia kpahen obo ra sa vwọ kẹnoma kẹ iruemu ebrabra. Jihova muegbe rọ vwọ chọn wẹ uko ọkieje. Ọ riẹn idjerhe ro me yovwin rọ sa vwọ vwẹ ukẹcha kẹ wẹ, ọ je riẹn obo rehẹ ubiudu wẹn. (Isẹ 14:10; 15:11) Ọtiọyena, gbe muomaphiyọ ẹrhovwo ẹnẹ kugbe eyono rẹ Ota rọyen kẹdẹ kẹdẹ.
10. Die yen wo yono vwo nẹ ikuegbe ri Elie rhe?
10 Jẹ o muwẹro nẹ iwan ri Jihova yen me yovwin. A sa mrẹ erere vwo nẹ kemu kemu rẹ Jihova guọnọre nẹ e ru eje rhe. Ihwo ri yeren akpọ nene iwan rọyen, riomaghwa, yeren omamọ rẹ akpọ, ji vwo uvi rẹ omavwerhovwẹn vwẹ akpeyeren. (Une 19:7-11) Vwọ fẹnẹ ayen, ihwo ri gbobọnyẹ iwan ri Jihova rioja rẹ ọmiaovwẹ ro nẹ obuko rẹ uruemu ọtiọyena cha. Jokaphiyọ oborẹ ọshare ọvo re se Elie ta kpahen obo re sa phia siẹrẹ e de gbobọnyẹ iwan rẹ Ọghẹnẹ. Ọsẹ vẹ oni rọyen vwo ẹguọnọ ri Jihova. Ẹkẹvuọvo, vwẹ ọke rẹ eghene rọyen, Elie da jẹ ojẹ ro vwo nene erharhe rẹ igbeyan. Ọnana da nẹrhẹ o rhi vwobọ vwẹ erharhe rẹ iruemu kerẹ ẹreyọ rẹ ihuvwun egangan, ọfanrhiẹn kugbe ujiecho. Elie tare nẹ, kọyen muophu ji gbozighi mamọ. Ọ da ta: “Vwọrẹ uyota, kemu kemu re yono uvwe kerẹ Onenikristi nẹ me kẹnoma kẹ keyen me rhoma ruẹ.” Ẹkẹvuọvo, Elie kpairoro vrẹ obo re yoniro ọke ọ vwọ hẹ eghene-e. Ukuotọ rọyen, ọ da rhoma rhe ton uyono ri Baibol na phiyọ. Ọ wianre gangan mamọ o se vwo siobọnu erharhe iruemu rọyen na, o de bromaphiyame vwẹ ukpe ri 2000. Idjerhe vọ yen ọ vwọ mrẹ erere kidie nẹ o yeren akpọ nene iwan ri Jihova? Elie da ta: “Enẹna mi rhi vwo uvi rẹ ufuoma vẹ ẹwẹn obrorhiẹn ro fiotọ re.” * Kirobo ikuegbe nana djere, ihwo re sen iwan ri Jihova sua ọmiaovwẹ vwọ kẹ oma rayen. Tobọ vwẹ ẹdia ọtiọyena, Jihova ji vwo owenvwe rọ vwọ chọn ayen uko vwo ru ewene.
11. Erọnvwọn vọ yen Jihova vwo utuoma kpahen?
11 Davwẹngba vwo vwo utuoma kpahen obo ri tuẹ Jihova oma. (Une 97:10) Baibol na vuẹ avwanre nẹ Jihova vwo utuoma kpahen “ẹro rọ jẹfia, erẹnvwe rọ vwọrọn efian, vẹ abọ ri sun ọbara ekueku.” (Isẹ 6:16, 17) O ji “tuoma rẹ otu re vọnre vẹ ọbara kugbe ephiẹn ihwo.” (Une 5:6) Jihova vwo utuoma kpahen iruemu nana te ẹdia rẹ ọ da ghwọrọ ihwo umwemwu eje re herọ vwẹ ọke ri Noa kidie akpọ na rhe vọn vẹ uruemu rẹ ozighi rayen. (Jẹn. 6:13) Roro kpahen udje ọfa. Womarẹ ọmraro Malakae, Jihova da tanẹ Ọyen vwo utuoma kpahen ihwo re vwẹ ona vwọ guọnọ oborẹ ayen cha vwọ fan orọnvwe rayen. Ọghẹnẹ sen ẹga rayen, ọ je cha vwẹ ayen guẹdjọ fikirẹ uruemu rayen na.—Mal. 2:13-16; Hib. 13:4.
E jẹ ẹwẹn rẹ vwo ru oborẹ Jihova tare nẹ ọ brare tu avwanre oma kirobo rẹ iroro ra vwọ re emu ro si tutu re tu ohwo oma (Ni ẹkoreta 11-12)
12. Die yen o mudiaphiyọ rẹ ‘umwemwu vwo tu avwanre oma.’?
12 Jihova guọnọre nẹ “umwemwu tu [avwanre] oma.” (Rom 12:9) Ota na ‘tuoma’ dje oborẹ e bi sheri te vwọ kẹ orọnvwọn; o mudiaphiyọ nẹ e che vwo utuoma ọgangan kpahen orọnvwọn na. Vwẹ ẹwẹn roro oborẹ oma che ru we siẹrẹ a da vuẹ wẹ nẹ wọ re emu ro si tutu re. Iroro rẹ emu na ọvo sa tobọ so ọga kẹ wẹ. Ọtiọyena, kirobo rẹ iroro ra vwọ re emu ro si tutu re tu ohwo oma ye, e gbe jẹ iroro re vwo ru oborẹ Jihova tare nẹ ọ brare ji tu avwanre oma.
13. Diesorọ a vwọ sẹro rẹ iroro rẹ avwanre?
13 Sẹro rẹ iroro wẹn. Iroro rẹ avwanre yen suẹn oborẹ avwanre ruẹ. Ọna yen sorọ Jesu vwo yono avwanre nẹ a sen iroro eje re sa nẹrhẹ e ru umwemwu ọgangan. (Mat. 5:21, 22, 28, 29) Aphro herọ-ọ nẹ avwanre guọnọ ru obo re vwerhen Ọsẹ avwanre rọhẹ obodjuvwu oma. Ọtiọyena, ọyen obo re ghanre mamọ a vwọ sen erharhe rẹ iroro re dje ro ẹwẹn rẹ avwanre ugugege re ghwa vwọ djẹ ruọ ye.
14. Die yen eta rẹ avwanre djephia, kẹ, enọ vọ yen ofori nẹ a kpahenphiyọ?
14 Sun oborẹ wọ ta. Jesu da ta: “Obo ri nẹ unu rhe, otọ rẹ udu o nẹ cha.” (Mat. 15:18) Vwọrẹ uyota, eta rẹ avwanre djephia oka rẹ ohwo rẹ avwanre ghene hepha vwẹ obevun. Ọtiọyena, gba nọ oma wẹn: ‘Me ta uyota ọkieje, ọ da tobọ dianẹ uyota na sa so okpetu kẹ vwẹ? Kerẹ ohwo rọ rọvwọnre, me davwẹngba vwọ kẹnoma kẹ uruemu ra vwọ frẹfrẹ nene ohwo rọ dia ọrivẹ rẹ orọnvwe mẹ-ẹ? Me kẹnoma kẹ erharhe eta ri churobọ si ọfanrhiẹn kare kare? Me davwẹngba vwo hwe oma muẹ ọke rẹ ohwo da kpare ovwẹ ophu?’ Ẹfuẹrẹn rẹ enọ nana cha chọn wẹ uko. Kirobo ra vwẹ oruru yọnrọn ẹbẹre rẹ amwa ivẹ kuẹgbe ye, ọtiọyen erharhe rẹ eta je yọnrọn iruemu rẹ ohwo rẹ awanre na kuẹgbe. Ọtiọyena, wọ da davwẹngba vwọ sen eta rẹ ekan, efian, kugbe eta rẹ ọfanrhiẹn, kọyen ọ sa lọhọ vwọ kẹ wẹ wo vwo siobọnu ohwo rẹ awanre na.
15. Die yen o mudipahiyọ ra vwọ kanre oma rẹ avwanre rẹ awanre na mu urhe roja?
15 Vwo owenvwe wo vwo ru obo ri fori. Ọyinkọn Pọl reyọ udje vwo dje kẹ avwanre oboresorọ ọ vwọ ghanre re vwo ru ewene vwẹ akpeyeren rẹ avwanre. O siro phiyotọ nẹ, e jẹ avwanre kanre “oma rẹ avwanre rẹ awanre na” mu urhe roja. (Rom 6:6) Kọyen, avwanre guọnọ vwẹrokere udje ri Jesu. Ofori nẹ e siobọnu iroro vẹ iruemu ri tuẹ Jihova oma kare kare. Ọnana yen cha nẹrhẹ e vwo ẹwẹn obrorhiẹn ro fiotọ ji vwo iphiẹrophiyọ ra vwọ riavwerhen rẹ akpọ ri bẹdẹ na. (Jọn 17:3; 1 Pita 3:21) Karophiyọ nẹ Jihova che se wene iwan rọyen rere oma sa vwọ vwerhen avwanre-e. Ukperẹ ọtiọyen, avwanre yen che wene oka rẹ ohwo rẹ avwanre hepha ji yeren akpọ nene iwan ri Jihova.—Aiz. 1:16-18; 55:9.
16. Diesorọ o vwo fo wọ vwọ họnre vwọso erharhe rẹ urhurusivwe ọkieje?
16 Rha họnra vwọsua erharhe rẹ urhurusivwe. Wọ da tobọ bromaphiyame re, o ji fo wọ vwọ honre ọkieje vwọso erharhe rẹ urhurusivwe. Jokaphiyọ ikugbe rẹ oniọvo ọshare ọvo rẹ odẹ rọyen dia Maurício. Ọke rọ vwọ hẹ eghene yen ọ vwọ ton uruemu rẹ ọshare vwo duẹ ọshare phiyọ. Ọke vwọ yanran na, ọ da rhe mrẹ ihwo ri Jihova, ọ da ton uyono ri Baibol phiyọ. O vwo ru ewene vwẹ akpeyeren rọyen nu, o de bromaphiyame vwẹ ukpe ri 2002. Dede nẹ ikpe buebun yen ọ ga Jihova cha re, Maurício da je ta: “Me cha rhọnvwe nẹ mi ji nene erharhe rẹ iroro muabọ ọkievo.” Jẹ, o phi uphẹn phiyotọ rẹ ọnana vwọ so eshegberudio vwọ kẹ-ẹ. Ukperẹ ọtiọyen, ọ da ta: “Emuọvo rọ kẹ vwẹ uduephiophiyawọ yen, me vwọ riẹn nẹ siẹrẹ me da jẹ ojẹ re me vwọ kẹnoma kẹ iroro vẹ iruemu ọtiọyen na, ọ kẹ Jihova omavwerhovwẹn.” *
17. Die yen wo yono vwo nẹ ikuegbe ri Nabiha rhe?
17 Nẹrhovwo vwọ yare ukẹcha ri Jihova, wọ vwẹroso ẹwẹn ọfuanfon rọyen, ọ dia ẹgba romobọ wẹ-ẹn. (Gal. 5:22; Fil. 4:6) O fori nẹ avwanre davwẹngba mamọ e se vwo siobọnu ohwo rẹ awanre na je kẹnoma kẹ. Roro kpahen udje rẹ oniọvo rẹ aye Nabiha. Ọsẹ rọyen djẹ jovwo ọke ọ vwọ hẹ ẹgbukpe esan. Ọ da ta: “Ọnana so ẹnwan ọgangan vwọ kẹ vwẹ mamọ.” Nabiha vwọ ghwanra cha, ko rhi vwo uruemu rọ vwọ fobọ muophu, ophu na je gan mamọ. O de rhi vwobọ vwẹ ẹshẹ rẹ ihuvwun egangan, e de muo phiyọ ogba rẹ elọkpa, ọ da ghwọrọ ikpe evo vwẹ uwodi. Iseri ri Jihova ri kpo uwodi na de rhe ghwoghwo vẹ ọyen da ton uyono ri Baibol phiyọ. Nabiha de rhi ru ewene eghanghanre evo. Ọ da ta: “Ọ lọhọ kẹ vwẹ me vwọ dobọ rẹ erharha rẹ iruemu evo ri rhe vwe ji, ẹkẹvuọvo me sa vwọ dobọ rẹ isigati ephopho ji, bẹn kẹ vwẹ mamọ.” Ọ vrẹ ẹgbukpe ọvo rẹ Nabiha vẹ uruemu nana rọ phoriẹn muo oma na muabọ tavwen o ki se phiokparobọ. Mavọ yen o se vwo ruo? Ọ da ta: “Obo re ma ghanre rọ chọn vwẹ uko yen, ẹrhovwo rẹ ọkieje re me nẹ vwo rhe Jihova.” Enẹna, kọ vuẹ ihwo efa: “Mi de se ru ewene ri mi vwo ru obo re vwerhen Jihova ivun, kọyen kohwo kohwo se ruo!” *
WO SE MUWAN VWỌ KẸ OMAEBROPHIYAME!
18. Vwo nene obo rehẹ 1 Kọrẹnt 6:9-11, die yen idibo rẹ Ọghẹnẹ buebun se ru enẹna re?
18 Vwẹ ẹgbukpe ujorin rẹsosuọ, eya vẹ eshare evo ra jẹreyọ ri che nene Kristi sun ke vwo erharhe rẹ iruemu evo jovwo. Kerẹ udje, evo rayen ka dia evwọfanrhiẹn, eshare ri duẹ eshare, kugbe iji jovwo. Womarẹ ukẹcha rẹ ẹwẹn ọfuanfon ri Jihova, kẹ ayen se wene iruemu rayen. (Se 1 Kọrẹnt 6:9-11.) Ọtiọyen ọ je hepha nonẹna, Baibol na chọn oduduru rẹ ihwo buebun uko vwo ru ewene re. * Erharhe rẹ iruemu re bẹnre ayen vwọ kẹnoma kẹ jovwo, ayen rhe dobọ rayen ji enẹna re. Udje rayen djerephia nẹ e se ru ewene vwẹ akpeyeren rẹ avwanre ji siobọnu iruemu ebrabra rere e se vwo muwan vwọ kẹ omaebrophiyame.
19. Die yen a cha fuẹrẹn vwẹ uyono rọ vwọ kpahen ọnana?
19 Vwọ vrẹ e vwo siobọnu uruemu rẹ ohwo awanre na, ofori nẹ ihwo re guọnọ bromaphiyame je davwẹngba vwo vwo uruemu rẹ ohwo kpokpọ na. Uyono rọ vwọ kpahen ọnana cha fuẹrẹn obo re se vwo ru ọtiọyen, kugbe oborẹ ihwo efa sa vwọ chọn avwanre uko.
UNE 41 Biko Nyo Ẹrhovwo Mẹ
^ ẹko. 5 Ofori nẹ e vwo owenvwe re vwo ru ewene vwẹ iruemu rẹ avwanre, e ki se muwan vwọ kẹ omaebrophiyame. Uyono nana cha chọn avwanre uko vwọ riẹn oborẹ ohwo rẹ awanre na mudiaphiyọ, oboresorọ o vwo fo nẹ e siobọ no kugbe obo re se ru vwo siobọ no. Uyono rọ vwọ kpahen ọnana cha fuẹrẹn obo re se vwo vwo uruemu rẹ ohwo kpokpọ na ọkieje, ọ da tobọ dianẹ e bromaphiyame re.
^ ẹko. 3 OBORẸ OTA NANA MUDIAPHIYỌ: E vwo “siobọ nẹ ohwo rẹ awanre na,” mudiaphiyọ re vwo gbobọnyẹ iruemu kugbe ojevwe ri tuẹ Jihova oma. Ọnana fo obo re ru tavwen e ki bromamphiyame.—Ẹfe. 4:22.
^ ẹko. 10 Wọ da guọnọ evuẹ efa, ni uyovwinrota na “The Bible Changes Lives—‘I Needed to Return to Jehovah,’ ” ra vwọphia vwẹ Uwevwin Orhẹrẹ ri April 1, 2012, (ọ rẹ Ọyibo).
^ ẹko. 16 Wọ da guọnọ evuẹ efa, ni uyovwinrota na “The Bible Changes Lives—‘They Were Very Kind to Me,’ ” ra vwọphia vwẹ Uwevwin Orhẹrẹ ri May 1, 2012, (ọ rẹ Ọyibo).
^ ẹko. 17 Wọ da guọnọ evuẹ efa, ni uyovwinrota na “The Bible Changes Lives—‘I Became an Angry, Aggressive Young Woman,’ ” ra vwọphia vwẹ Uwevwin Orhẹrẹ ri October 1, 2012, (ọ rẹ Ọyibo).
^ ẹko. 18 Ni ekpeti na “ Baibol na Wene Ohwo.”
^ ẹko. 64 IDJEDJE RẸ UHOHO: E vwo siobọnu erharhe rẹ iroro kugbe iruemu pha kerẹsiẹ re de ku ewun rẹ awanre nẹ oma.
