MWAHA ONITHOKORERIWA 10
Munoowerya Orula “Omutthu wa Khalai”
“Murule omutthu wa khalai ni miteko saya”.—AKOL. 3:9.
NSIPO 29 Neetteke Moovarihana ni Nsina Nahu
ELE NINROWA AHU WIIXUTTA *
1. Okumi anyu waari sai muhinatthi opacerya omusoma Biibiliya?
OKUMI ANYU waari sai muhinatthi opacerya omusoma Biibiliya ni Anamoona a Yehova? Anamunceene a hiyo, hata olavula paahi mwaha owo khonaasivela. Muupuwelo ahu ni moota naapaka ahu itthu, weettihiwa ni ele olumwenku waahimya aya okhala yooloka ni yoohiloka. Akhala wira ti siiso, ‘naakhala mulaponi-mu nihirina nlipelelo ni nihimusuwelaka Muluku’. (aEef. 2:12) Masi nuumala opacerya omusoma Biibiliya okumi ahu wooturukeya.
2. Exeeni mwaixuntte anyu okathi mwaapacenrye anyu omusoma Biibiliya?
2 Nuumala opacerya omusoma Biibiliya, mwaahoona wira mookhalana Tiithi anyu a wiirimu onoophentani vanceene. Nave mwaahoona wira mwaaphavelaka omuhakalaliha Yehova ni wiirela mpantta emusi awe, mwaahaana olokiherya okumi anyu ni muupuwelo anyu. Yoosoma anyu ya Biibiliya yaahiwooniheryani wira mwaahaana opaka itthu Yehova onihimya awe wira ti sooloka ni okhootta itthu sihinimusivela.—aEef. 5:3-5.
3. Sintoko onihimya awe aKolosi 3:9, 10, exeeni Yehova oniphavela awe wira nipakeke, nave ninrowa othokorerya exeeni mwaha ola?
3 Mpattuxa ahu ni Tiithi ahu a wiirimu, Yehova, ookhalana ediretu yoohimya moota atthu aniirela mpantta emusi awe akhanle aya oopaka itthu. Nto oniphavela wira nihinatthi opatisiwa, niimananiheke orula “omutthu wa khalai ni miteko saya”. * (Mmusome aKolosi 3:9, 10.) Mwaha ola onimwaakhaliherya ale anniphavela opatisiwa waakhula makoho mararu: (1) “Omutthu wa khalai”, exeeni”? (2) Xeeni Yehova onniruma awe orula? (3) Ninrowa opaka sai eyo? Yoosoma ela enimwaakhaliherya ale apatisiwe, ohitthikela wuupuwela aahiiso ovara itthu soohiloka yaavara aya ahinatthi orula omutthu wa khalai.
“OMUTTHU WA KHALAI”, EXEENI?
4. Onikhala sai mutthu oneettihiwa ni “omutthu wa khalai”?
4 Okhalawene mutthu oneettihiwa ni “omutthu wa khalai”, itthu onipaka awe ni onuupuwela awe khasimmusivela Yehova. Owo pooti okhala oowiittottopa, oowaakuva onanariwa, ni oohixukhuru. Pooti osiveliwaka oweha epornografia, aahiiso ifilme sintumererya otakhala. Ikwaha sikina mutthu owo pooti ookhalana mikhalelo sooreera, nave-tho pooti wiivahaka nthowa mwaha wa itthu soohiloka ohimmye awe wala opanke awe. Masi khoniphavela olokiherya muupuwelo awe ni moota onipaka awe itthu.—aGal. 5:19-21; 2 Tim. 3:2-5.
Okathi ninrula ahu “omutthu wa khalai”, ninnihiya okhala epottha ya miyuupuwelo ni mweettelo woohiloka (Nwehe ettima 5) *
5. Niireke vanniweryaneya orula moomalela omutthu wa khalai? (Mit. 3:19)
5 Ootheene ahu niyariwe nitthenke ene. Tivonto khaninwerya okumiha moomalela vamurimani vahu itthu soohiloka murima ahu oniphavela aya. Ikwaha sikina hiyo pooti wuupuwelaka etthu aahiiso olavula nuumala-vo nnaikhupanyerya. (Yer. 17:9; Yak. 3:2) Masi okathi ninrula ahu omutthu wa khalai, ninnihiya weettihiwa ni itthu siniphavela aya erutthu yoottheka. Okathi owo ninnipakeya mutthu mukina.—Yes. 55:7; musome Miteko 3:19.
6. Xeeni Yehova oniphavela awe wira nittharuweke moota nuupuwela ahu ni opaka itthu nihinatthi opacerya omusoma Biibiliya?
6 Okhala wira Yehova onniniphenta, oniphavela wira nittharuweke wuupuwela ni opaka itthu soohiloka wira nikhalane okumi woohakalaliha. (Yes. 48:17, 18) Oosuwela-tho wira akhala wira khaninxintta soophavela iyo soohiloka, nnoohawa nave-tho nnimwaahaaxa atthu akina. Okathi eyo eniiraneya aya, nave-tho Yehova onnihaawa.
7. Sintoko onihimya awe aRoma 12:1, 2, yoothanla xeeni ninreerela ahu opaka?
7 Woonasa wene amusi ni apatthani ahu akina pooti onitheya, okathi nimmananiha ahu ottharuwa mweettelo ahu wa khalai. (1 Ped. 4:3, 4) Awo pooti ohimyaka wira nookhalana ediretu yoopaka itthu nimphavela ahu, nto nihiweemereryeke atthu akina onileela etthu yoopaka. Masi nihiliyale wira ohimwiiwelela Yehova khoniphwanyiha otaphuwa. Moovirikana ni vo, mutthu onnipakeya epottha ya olumwenku ola wa Satana. (Mmusome aRoma 12:1, 2.) Ootheene ahu nihaana othanla: Akhala wira ninrowa othipelela weettelaka omutthu ahu wa khalai, yoowo oneettihiwa ni etampi ni olumwenku ola wa Satana, aahiiso nnoomweemererya Yehova onikhaliherya opaka marukunuxo wira nikhale atthu ooloka.—Yes. 64:8.
MUNROWA ORULA SAI ‘OMUTTHU WA KHALAI’?
8. Exeeni enrowa onikhaliherya okhootta miyuupuwelo ni soolema soohiloka?
8 Yehova oosuwela wira khaninwerya oturuka moota nnuupuwela ahu, ni ottharuwa soolema soohiloka muhina mwa okathi vakhaani paahi. (Esal. 103:13, 14) Masi hata vari siiso Yehova onnirumeela Nuulumo nawe, munepa awe woowaarya, ni mutthenkeso awe wira onivahe ankhili, ni ikuru wira onikhaliherye opaka marukunuxo. Moohaanyiherya, mooweha moota Yehova ookhalihenryaaweni. Vano nrowe niwehe etthu mukhanle anyu oopaka wira murule omutthu wa khalai ni mphwanelele opatisiwa.
9. Biibiliya onrowa wookhaliheryani sai?
9 Mwiivareryeke mmurumeelaka Biibiliya. Nuulumo na Muluku ninlikana ni exipelyu ennikhaliherya wiiweha moota nnuupuwela ahu, olavula, ni opaka itthu. (Yak. 1:22-25) Ole onoosomihani Biibiliya aahiiso mukristau mukina, nave-tho pooti wookhaliheryani. Mwa ntakiheryo, awosa pooti omurumeela Biibiliya wira awooniheryeni itthu munipaka anyu saana ni iye munreerela anyu olokiherya. Nave pooti wookhaliheryani ophwanya myaha sinrowa wookhaliheryani oxintta soolema soohiloka. Muhiliyale wira okathi wootheene Yehova onniphavela wookhaliheryani. Khuuvo onwerya wookhaliheryani saana onvikana Owo, maana onnisuwela murima anyu. (Mir. 14:10; 15:11) Tivonto, nvekeleke mmusomeke Biibiliya khula nihiku.
10. Itthu simwiiranenle Elie, sinwiixuttiha-ni exeeni?
10 Mukupaliki wira opaka itthu nittharaka moonelo wa Yehova onniniphwanyiha mureerelo. Itthu sootheene Yehova onnivekela awe opaka sinniphwanyiha mureerelo. Mutthu onitthara malakiheryo a Yehova onnisuwela etthu onivara awe mookumini ni onniphwanya ohakalala weekeekhai. (Esal. 19:7-11) Moovirikana ni vo, ale anikhootta otthara malakiheryo a Yehova, annihaawa mwaha wa mixankiho sinikhumelela mwaha woopaka itampi. Nrowe niwehe etthu yaamukhumelenle munna mmosa oniitthaniwa Elie. Apapawe ni amamawe yaanimphenta Yehova. Masi okathi Elie annuwa awe, aahipacerya weetta ni atthu yaapaka itthu soonanara. Nuumala-vo, aahipacerya olya aahiiso opaha mirette soohapala, orupihana woohiloka ni wiiya. Elie ohimmye wira aahipacerya okhala mutthu oowali ni ootakhala. Onihimya so: “Itthu kaapaka aka ti seiye kaixuttihiwe aka ntoko mukristau wira kaahaana onyokha”. Masi hata vari siiso, Elie khaaliyanle itthu aixuttihiwe awe okathi aari awe mwaana. Nuuvira okathi, aahitthikela omusoma Biibiliya. Aahimananiha vanceene olokiherya mweettelo awe ni ottharuwa itthu soohiloka, nuumala-vo aahipatisiwa mwaakha wa 2000. Otthara malakiheryo a Yehova omphwanyinhe sai mireerelo? Elie onihimya so: “Vano kookhalana muupuwelo woomaaleleya nave murima aka khonkiphukela”. * Ntakiheryo nla, nnooniherya wira ale anikhootta weettela malakiheryo a Yehova anniiphwanyiha mixankiho sinceene. Masi hata vari siiso Yehova onniphavela waakhaliherya atthu awo oturuka mweettelo aya.
11. Itthu xeeni Yehova oninyokha awe?
11 Munyokheke itthu Yehova oninyokha awe. (Esal. 97:10) Biibiliya onooniherya wira Yehova onninyokha “maitho òwisona; nlumi nowotha; [ni] matata animwiva ohitthenke”. (Mir. 6:16, 17) Nave-tho khonisiveliwa ni ‘anawiive n’anawoothe’. (Esal. 5:7) Yehova onninyokha vanceene itthu iya, nave-tho aahaaphwetexa atthu mahiku a Nowe okhala wira elapo yootheene yaahisareya otakhala. (Maph. 6:13) Vano nrowe nthokorerye ntakiheryo nikina. Omurumeelaka profeta Malakhiya, Yehova aahihimya wira khaasiveliwa ni atthu yaamwalana ni axaaraya vahikhanle nthowa. Mwa moonelo wa Yehova okokhorela wa atthu anipaka itthu iyo khorina efaita, nave onimwaaphukela mwaha wa mweettelo aya woohiloka.—Mal. 2:13-16; aHeeb. 13:4.
Opaka etthu Yehova onikhoottiha awe ohaana onihiirya ntoko eyoolya yoowuutta (Nwehe ittima 11-12)
12. Onitaphulela-ni ‘othanya itthu sootakhala’?
12 ARoma 12:9 onihimya so: “Muthanyeke itthu sootakhala”. Nuulumo noowi “othanya”, nintaphulela onyokha ni ohisiveliwa ni etthu. Nkahaya muupuwele vakhanle wira ookhala mutthu onoovekelani olya eyoolya yoowuutta. Mwaarowa woonela sai? Wuupuwela paahi eyoolya eyo enniweettihani murima. Moolikanasa, nihaana opaka etthu emosaru okathi nnuupuwela ahu opaka itthu sihinimusivela Yehova.
13. Xeeni ninreerela ahu okhootta miyuupuwelo soohiloka?
13 Mukhootteke miyuupuwelo soohiloka. Itthu nnuupuwela ahu sinniniiriha opaka etthu. Ti maana aya Yesu aaniixuttinhe awe okhootta miyuupuwelo sinrowa oniiriha opaka etampi yuulupale. (Math. 5:21, 22, 28, 29) Moohaanyiherya etthu nimphavelaxa ahu mookumini, omuhakalaliha Tiithi ahu a wiirimu. Masi wira nipake eyo, nihaana okhootta moowakuveya wuupuwela itthu soohiloka.
14. Moolumo ahu anooniherya-ni? Nave makoho xeeni ninreerela ahu waakhula?
14 Mwiikasoope ni itthu munilavula anyu. Yesu aahimmye so: “Itthu sotheene sinikhuma mwaano, sinikhuma vamurimani”. (Math. 15:18) Veekeekhai itthu ninlavula ahu sinnihimya makhalelo ahu a muhina. Nto mwiikoheke so: ‘Niireke okathi wootheene kinilavula ekeekhai hata ikwaha sikina opaka eyo okiphwanyihaka mixankiho? Akhala wira koothela aahiiso kootheliwa, kiireke kinnikhalana ephoole wira kihilavuleke moovekana ni mutthu ohikhanle iyaka aahiiso mwaaraka? Kinnikhootta moomalela olavula moolumo anitumererya orupihana moohiloka? Kinnilavula moopixa murima okathi kintthekeliwa aka?’ Otthokelela saana makoho ala, pooti wookhaliheryani. Moolumo anyu pooti olikanaka ni ottottha ekuwo yaathanle. Akhala wira munimwiimananiha ottharuwa moolumo ooveeha, wootha, ni olavula itthu sinitumererya orupihana woohiloka, munimoona okhweya orula omutthu wa khalai.
15. Onitaphulela-ni okhomela “vamwirini” omutthu ahu wa khalai?
15 Mwiimananiheke opaka etthu enireerela. Murummwa Paulo oorumeela nlikanyiho nimosa wira onooniherye oreera waya opaka marukunuxo. Aahimmye wira nihaana ‘okhomela vamwirini omutthu ahu wa khalai’. (aRom. 6:6) Ohimya mookwasa, nihaana otthara ntakiheryo na Kristu. Yesu aaheemya okhomeliwa vamwirini va nihaaxeryo wira omuhakalalihe Yehova. Moolikanasa akhala wira nimphavela omuhakalaliha Yehova, nihaana ottharuwa moomalela opaka itthu oninyokha awe. Niira siiso murima ahu khonrowa oniphukelaka. Nave nnookhalana nlipelelo noophwanya okumi woohimala. (Yoh 17:3; 1 Ped. 3:21) Muhiliyale wira Yehova khonituruka malamulo awe wira onisiveliheke. Ohiya-vo hiyo ninreerela orukunuxa mweettelo ahu ni otteeliwa murima ni malamulo awe.—Yes. 1:16-18; 55:9.
16. Xeeni munireerela anyu wiimananiha okhootta soophavela soohiloka?
16 Muhihiye okhootta soophavela soohiloka. Hata nuumala opatisiwa, nihaana wiimananiha okhootta itthu soohiloka murima ahu oniphavela aya. Nrowe niwehe etthu emosa yaamwiiranenle munna mmosa oniitthaniwa Mauricio. Okathi aari awe mmiravo, aahipacerya orupihana ni alopwana akhwaawe. Muhoolo mwaya aahilaleeriwa ni Anamoona a Yehova ni aahipacerya omusoma Biibiliya. Nuumala opaka marukunuxo, aahipatisiwa mwaakha wa 2002. Hata omurumeelaka Yehova mwa iyaakha sinceene, Mauricio onihimya so: “Ikwaha sikina kinniwana ni soophavela soohiloka”. Mauricio khoneemererya okhulumuwa mwaha wa soophavela iyo. Hata vari siiso onihimya so: “Kinnilipa vanceene mwaha woosuwela okathi kinkhootta aka opaka itthu siniphavela murima aka oniphavela aya, kinnimuhakalaliha vanceene Yehova”. *
17. Ntakiheryo na Nabiha noolipinheni sai?
17 Munvekeleke Yehova wira ookhaliheryeni, nave muroromeleke munepa awe, ohiya ikuru sanyu. (aGal. 5:22; aFil. 4:6) Naaphavelaka orula omutthu wa khalai, nihaana wiimananiha vanceene. Nrowe nthokorerye itthu saamwiiranenle murokora mmosa oniihaniwa Nabiha. Apapawe yaamuhiyale orineene iyaakha 6. Nabiha onihimya so: “Khivaareere okiwereya”. Okathi annuwa awe, Nabiha aahipakeya mutthu oowali ni oomusivela onyakulihana. Nuuvira okathi aahipacerya olya mirette soohapala, ni aahivariwa khuviriha iyaakha ori ene mukhatteya. Otthukweliwe ene siiso, Anamoona a Yehova yaahimuxekurya ni yaahipacerya omusomiha Biibiliya. Nuumala-vo aahipacerya opaka marukunuxo maalupale. Nabiha onihimya so: “Soolema sikina saahikikhweela ottharuwa. Masi vaahikixankiha ottharuwa ompaha soona”. Nuuvira okathi, Nabiha aahimananiha ni aahiwerya ohiya ompaha soona. Aawenrye sai opaka eyo? Mwaneene onihimya so: “Etthu yuulupale ekikhalihenrye, onvekela Yehova ikwaha sinceene”. Nabiha onnalipiha atthu anceene ohimyaka so: “Akhala wira miyo koowerya opaka marukunuxo wira kimusiveliheke Yehova, eyo enooniherya wira khula mutthu onoowerya!” *
NYUWO MUNOOWERYA OPHWANELELA OPATISIWA!
18. Moovarihana ni 1 aKorinto 6:9-11, itthu xeeni yaapaka aya arumeyi anceene a Muluku khalai?
18 Eseekulu yoopacerya, atthu akina Yehova aathanlale awe wira yalamuleleke ni Kristu wiirimu, ehinatthi okhala makristau yaahipaka itthu sinceene sootakhala. Mwa ntakiheryo akina yaari anamararuwa, yaarupihana alopwanaru ni yaari alatarau. Masi ekhaliheriwaka ni munepa woowaarya wa Muluku, yaahiwerya orukunuxa mweettelo aya. (Mmusome 1 aKorinto 6:9-11.) Moolikanasa olelo-va Biibiliya onnaakhaliherya atthu anceene orukunuxa mweettelo aya. * Matakiheryo aya anooniherya wira nyuwo-tho munoowerya orukunuxa mweettelo anyu ni oxintta soolema soohiloka wira mphwanelele opatisiwa.
19. Mwaha onittharelana ninrowa othokorerya-ni?
19 Nave ohiya paahi orula omutthu wa khalai, ale aniphavela opatisiwa ahaana-tho wiimananiha owara omutthu wa naanano. Mwaha onittharelana, nnoothokorerya moota woopaka eyo ni moota atthu akina akhanle aya oonikhaliherya.
NSIPO 41 Xontte Mwiiwe Ovekela Waka
^ etti. 5 Naaphavelaka opatisiwa, nihaana weemererya olokiherya mweettelo ahu. Mwaha ola onoonikhaliherya wiiwexexa exeeni ekhanle omutthu wa khalai, nthowa naya ninreerela ahu orula, ni moota woopaka eyo. Mwaha onittharelana nnooweha moota ninrowa ahu ohihiya owara omutthu wa niinano, hata nuumala opatisiwa.
^ etti. 3 MOOLUMO OOTHOKIHERIWA: ‘Orula omutthu wa khalai’ ontaphulela ohiya mweettelo ni soophavela sihimmusivela Yehova. Nihaana opaka eyo nlelo nihinatthi opatisiwa.—aEef. 4:22.
^ etti. 10 Mwaaphavelaka osuwela itthu sikina munwehe A Sentinela 1 a Abril, a 2012, mpantta oni: “A Biblia Muda a Vida das Pessoas”. ‘Eu Precisava Voltar Para Jeova’.
^ etti. 16 Mwaaphavelaka osuwela itthu sikina, nwehe mpantta: “A Bíblia Muda a Vida das Pessoas—‘Elas Foram Muito Atenciosas Comigo’”, A Sentinela 1 a Maio a 2012.
^ etti. 17 Mwaaphavelaka osuwela itthu sikina munwehe, a Sentinela 1 a Outubro, 2012 mpantta onihimya so: “A Bíblia Muda a Vida das Pessoas—‘Eu me Tornei Uma Jovem Revoltada e Agressiva’”.
^ etti. 18 Nwehe ekaaxa enihimya so: “ Biibiliya Onnirukunuxa Mirima sa Atthu”.
^ etti. 64 OTTHOKIHERIWA WA EFOOTU: Ottharuwa opaka itthu soohiloka onlikana ni orula ekuwo ya khalai.
