1. Nan̈ano akory fiain̈ananao talohany anao nianatra Baiboly?

 KARAKORY fiain̈ananao taminy anao mbala tsy nianatra Baiboly niaraka tamy Vavolombelon̈o Jehovah? Maro amintsika tsy tihieritreritry zen̈y foeky! Tamy zen̈y, raha nataontsika ndreky toetsain̈intsika tsisy nihafa tamy niny donia ty. Ke tsy nanan̈a fan̈antinan̈a sady tsy nanan̈a Jehovah foeky atsika tamy zen̈y. (Efes. 2:12) Fa atsika koa fa nianatra Baiboly, niova fomba fiain̈anantsika.

2. Ino raha nanjary hainao, anao koa fa nianatra Baiboly?

² Anao koa fa nianatra Baiboly, nanjary hainao fa anao manan̈a Baba ten̈a tia anao andan̈itry an̈y. Hainao koa fa, tsy maintsy man̈ova fomba fiain̈ananao ndreky toetsain̈inao anao izikoa tihamparavoravo Jehovah sady man̈iry ho an̈isany fianakavian̈anany. Nianaranao koa karakory atao miain̈y mifan̈araka amy fitsipikinany momba ny tsara ndreky ratsy.​—Efes. 5:3-5.

3. Izikoa Kolosianina 3:9, 10 zahavan̈a, ino raha tiany Jehovah hataontsika, avio ino aby raha hidinihintsika ato?

³ Jehovah Pamôron̈o atsika ndreky Babantsika andan̈itry an̈y. Izy manan̈a zò hivolan̈a amy panomponany raha tokony hataondro ndreky tsy tokony hataondro, fotony iro io an̈isany fianakavian̈anany. Ke alohany atsika hatao batisa, tiany Jehovah izikoa atsika mifen̈y ‘han̈adoso toetrintsika taloha, avio hiala raha jiaby fataontsika tamy zen̈y.’ * (Vakia Kolosianina 3:9, 10.) Ke lahatsoratra ty han̈ampy lan̈iany olo man̈iry hatao batisa havita hamaly fan̈ontanian̈a telo aby ty: 1) Ino aby raha tafiditry amy toetry taloha zen̈y? 2) Nan̈ino Jehovah mampirisiky  atsika han̈adoso toetrintsika taloha? Avio, 3) akory han̈adosoantsika toetrintsika taloha? Maro amintsika iziô efa vita batisa. Ke fianaran̈a ty han̈ampy atsika tsy himpody amy toetrintsika taloha.

4. Man̈ano akory ma olo araiky manan̈a ‘toetry taloha’ zen̈y?

⁴ Manan̈a ‘toetry taloha’ olo araiky, izikoa raha tiany ndreky mamparavoravo izy fo ataony ndreky iritriretiny. Izy mety tia ten̈a, mora meloko, tsy mahay mankasitraka avio man̈ambony ten̈a. Mety tia mizaha ndreky mitandren̈y raha vetaveta koa izy, na tia mizaha filma misy olo kafiry. Marin̈y ndraiky fa izy misy toetry tsara. Mety han̈enjiky izy koa eritreritrinazy lera izy tafivolan̈a ndreky tafan̈ano raha ratsy. Kanefa, tsy an̈atiny jerinany foeky han̈ova toetsain̈inany ndreky raha ataony.​—Gal. 5:19-21; 2 Tim. 3:2-5.

5. Ho vitantsika ma han̈adoso ankitikitin̈y toetrintsika taloha? Hazavà. (Asan’ny Apostoly 3:19)

⁵ Atsika tsy lavorary, ke tsy ho vitantsika han̈adoso eritreritry ratsy ndreky fan̈irian̈a ratsy jiaby an̈atiny fôntsika ndreky sain̈intsika. Misy fotoan̈a, atsika mety han̈ano raha na hivolan̈a raha hanin̈enantsika. (Jer. 17:9; Jak. 3:2) Fa izikoa atsika man̈adoso toetrintsika taloha, hiova toetsain̈intsika ndreky fitondranten̈antsika. Hanjary olo hafa foeky fahitanolo atsika.​—Isaia 55:7; vakia Asan’ny Apostoly 3:19.

6. Nan̈ino ma Jehovah man̈iraka atsika han̈adoso toetsain̈y ratsy ndreky raha ratsy mahazatra atsika?

⁶ Jehovah man̈iraka atsika han̈adoso toetsain̈y ratsy ndreky raha ratsy mahazatra atsika, fotony tiany mare atsika, avio tiany atsika ho ravoravo amy fiain̈ana. (Isaia 48:17, 18) Hainy baka fa, izikoa atsika man̈eky ho resiny fan̈irian̈a ratsy, tsy atsika fo ho azondraha, fa olo hafa koa. Ke mampalahelo Jehovah raha zen̈y.

7. Izikoa Romanina 12:1, 2 zahavan̈a, ino aby safidy anan̈antsika?

⁷ Atsika koa fa miezaka man̈ova toetrintsika, amy voanalohany, mety han̈adroadro atsika namantsika ndreky havantsika. (1 Pet. 4:3, 4) Iro mety hivolan̈a fa tsisy olo tokony hambelanao hivolambolan̈a anao amy raha tianao, fa anao fo mahay raha mety aminao. Kanefa, olo tsy man̈araka fitsipikiny Jehovah tsy mety ho  ten̈a libra amy fiain̈ana zen̈y. Ny marin̈y aminany, iro man̈ambela donia fiheziny Satana ty hamolavola iro. (Vakia Romanina 12:1, 2.) Ke aroe fo safidy: Na atsika hitana toetry ratsintsika taloha ke han̈ambela doniany Satana ndreky fahotan̈a hibeko atsika. Na atsika han̈ambela Jehovah han̈ova toetrintsika, ke hanjary tsara toetry atsika rango iziô.​—Isaia 64:8.

8. Ino raha han̈ampy atsika han̈adoso eritreritry ratsy ndreky hiala amy raha ratsy mahazatra atsika?

⁸ Hainy Jehovah fa tsy mora amintsika man̈adoso eritreritry ratsy ndreky hiala amy raha ratsy efa mahazatra atsika efa rango ela. Ke raha zen̈y tsy ho vitantsika betibety. (Sal. 103:13, 14) Fa ndray zen̈y, amezany Volan̈anany ndreky fan̈ahy masin̈inany atsika, avio izy mampiasa fandaminan̈anany han̈ampian̈a atsika. Raha aby zen̈y hazahoantsika fahendrena, angôvo ndreky fan̈ampian̈a ilaintsika, ke ho vitantsika fo han̈ova toetrintsika ndreky hiala amy raha ratsy nahazatra atsika. Hay be fa izy efa nan̈ampy anao. Ino aby raha sasany mety ataonao baka ho vitanao han̈adoso toetrinao taloha ndreky hahafeno fepetra amy batisa? Zen̈y raha hidinihintsika zioty.

9. Afaka man̈ampy anao han̈ino Volan̈a Zan̈ahary?

⁹ Diniha raha koran̈iny Baiboly misy ahaizanao mandininten̈a. Volan̈a Zan̈ahary io miran̈a fitaratra. Izio afaka man̈ampy anao handiniky karakory raha an̈atiny eritreritrinao ao, raha volan̈inao ndreky raha fataonao. (Jak. 1:22-25) Olo mampianatra anao Baiboly ndreky Kristianin̈y hafa matotro koa afaka man̈amia sosokevitry anao. Ohatra iziô, mety hampiasa Baiboly iro han̈ampian̈a anao hahita ino toetry tsaranao ndreky raha mbala mila hiadivanao. Mety ampianarindro anao koa fomba mety hahitanao torohevitry baka amy Soratra Masin̈y han̈ampy anao hiala amy raha ratsy mahazatra anao. Matokisa fa Jehovah vôn̈ono han̈ampy anao. Tsisy olo mahay man̈ampy anao mandilatra izy, fotony hainy raha an̈atiny fônao. (Ohab. 14:10; 15:11) Ke ataova raha hahavy anao ho zatra mivavaka aminany ndreky mamaky Baiboly isanandra.

10. Ino raha nianaranao baka tamy raha niain̈any Elie?

¹⁰ Anao mila resy lahatra fa taridalan̈any Jehovah ny farany tsara. Raha koa fa irahiny Jehovah atao efa mahatsara atsika edy. Lan̈iany olo man̈araka fitsipikiny Jehovah mahatsiaro misy dikany, manan̈a tanjon̈o amy fiainan̈a, avio sambatra. (Sal. 19:7-11) Fa lan̈iany olo tsy mijery fitsipikiny Jehovah ndraiky ho zatra man̈ano asany nôfotro, ke iro hibaby vokatrany raha nataondro. Zen̈y iziô raha navoa lelahy araiky, Elie an̈arany. Tia Jehovah mare ry olobeny, ke nifen̈y iro nampianatra izy fitsipikiny Jehovah. Fa Elie koa fa nahaibe, izy niaraka tamy naman̈a ratsy. Nanomboko nihina jamala izy, nijangajanga, avio nangalatra. Nivolan̈a i Elie fa nanjary nahaikafiry fo izy sady mora meloko. Ho izy: “Raha jiaby nampianarin̈y zaho fa tsy mety ataony Kristianin̈y, nataoko aby.” Fa ndray zen̈y, tsy nadin̈any raha nianarany taminizy mbala hely. Ke nimpody nianatra Baiboly ndraiky izy. Nifen̈y angôvo jiaby izy niala tamy raha ratsy nahazatra izy, ke natao batisa izy tamy taon̈o 2000. Nahatsara Elie ma niain̈y nifan̈araka tamy fitsipikiny Jehovah? Karaha ty ho izy: “Zioty, milamin̈y jerinaka avio zaho tsy hinjehiny eritreritry eky.” * Tantarany Elie in̈y man̈aboaka tsarabe fa mandraora mantsilan̈y lan̈iany tsy man̈eky taridalan̈any Jehovah. Fa na izy man̈ano zen̈y, Jehovah mbala vôn̈ono fo han̈ampy olo karaha zen̈y hiova.

11. Ino aby raha halany Jehovah?

 ¹¹ Ataova raha farany halanao raha halany Jehovah. (Sal. 97:10) Koran̈iny Baiboly fa halany Jehovah “maso miavonkavon̈o, lela zatra mavandy, avio tan̈ana mandatsaka lionolo tsy manantsin̈y.” (Ohab. 6:16, 17) Halany koa ‘olo kafiry ndreky pamitaka.’ (Sal. 5:6) Halany Jehovah toetsain̈y ndreky fomba ratsy aby zen̈y, ary baka amy zen̈y edy nahavy olo ratsy fan̈ahy jiaby taminy andrany Noa naripakany Zan̈ahary, fotony nanjary feno olo kafiry tany ty baka tamy raha nataondro. (Gen. 6:13) Ankoatranizen̈y, Jehovah nan̈iraka Malakia paminan̈y han̈ambara fa ten̈a halany mahita olo fetsifetsy ke mitady hevitry hisarahan̈a amy vady tsy manantsin̈y. Tsy ikeny Jehovah fanompoan̈anolo aby karaha zen̈y, avio mbala hitsarainy iro io fotony iro ratsy fitondranten̈a.​—Mal. 2:13-16; Heb. 13:4.

12. Karakory ma ‘mankahala ny ratsy’ zen̈y?

¹² Tiany Jehovah ‘hankahala ny ratsy’ atsika. (Rom. 12:9) Volan̈a ‘mankahala’ zen̈y manôndro fihetsehampô lalin̈y; izio ivolan̈ana raha araiky ten̈a halanten̈a sady mampangaroharo anten̈a mare. Miniminia hely baka raha tsapanao izikoa misy olo man̈iraka anao hihinan̈a hanin̈y motraka na robaka mare. Ndray mandiniky zen̈y fo mety efa hamparary anao. Karaha zen̈y koa, ndray firitriretan̈a han̈ano raha efa volan̈iny Jehovah fa ratsy fo tokony efa hampangaroharo atsika.

13. Nan̈ino ma eritreritrintsika mila arovan̈a?

¹³ Arova eritreritrinao. Raha dinihintsika io misy vokany amy raha ataontsika. Zen̈y nahavy Jesosy nampianatra atsika tsy hieritreritry raha mety hahavy atsika han̈ano fahotan̈a maventy. (Mat. 5:21, 22, 28, 29) Hay be fa tihamparavoravo Jehovah Babanao mare anao. Ke izikoa misy eritreritry ratsy avy amy jerinao, adosoa malaky. Zen̈y raha tokony hatao!

14. a) Man̈ambara ino ma volan̈a aboakantsika? b) Ino aby fan̈ontanian̈a mila dinihintsika?

¹⁴ Pizipizia volan̈a aboakanao. Karaha ty ho Jesosy: ‘Zay raha an̈aty fô fo aboakany vava.’ (Mat. 15:18) Zen̈y ankitin̈y. Baka amy raha volan̈intsika ahaizan̈a raha an̈atiny fôntsika. Ke man̈ontania ten̈a karaha ty: ‘Tsy man̈eky havandy foeky ma zaho, ndray mety hidiranandra izikoa mivolan̈a ny marin̈y? Zaho efa manambady, ke mitandrin̈y ma zaho tsy hisaoma fônolo tsy vadiko? Miezaka ma zaho tsy han̈ano ndreky tsy hitandren̈y koran̈a vetaveta? Kalma  fo ma zaho izikoa misy olo man̈ano raha mampameloko zaho?’ Han̈ampy anao mandiniky fan̈ontanian̈a aby io. Volan̈a io mety ampiran̈iny amy boton amy lamba. Izikoa vahanao boton amy lambanao, ho moramora aminao han̈adoso lambanao. Karaha zen̈y koa, ho moramora aminao han̈adoso toetrinao taloha izikoa anao mifen̈y tsy han̈aboaka volan̈a ratsy, tsy havandy, ndreky tsy han̈ano koran̈a vetaveta.

15. Ino ma dikany mamantsiky toetrintsika taloha ‘amy tsatokazo’ zen̈y?

¹⁵ Anao mila vôn̈ono hiova. Matomboko sarinteny nampiasainy Paoly ampianaran̈a atsika antony mahavy atsika mila man̈ova fomba fiainan̈antsika. Nanoratra izy fa mila fantsihintsika ‘amy tsatokazo’ toetrintsika taloha. (Rom. 6:6) Tihan̈ano raha mifan̈araka amy sitrapôny Jehovah i Jesosy, ke zen̈y nahavy izy nan̈eky nifantsihin̈y tamy tsatokazo. Karaha zen̈y koa, tihamparavoravo Jehovah atsika ke vôn̈ono koa atsika han̈adoso toetrintsika taloha ndreky raha ratsy nahazatra atsika, fotony raha aby zen̈y tsy tiany Jehovah. Izikoa atsika man̈ano zen̈y, hadio eritreritrintsika, avio han̈anten̈a hiain̈y mandrakizay koa atsika. (Jaona 17:3; 1 Pet. 3:21) Tsara alaintsika onon̈o fa, Jehovah tsy han̈ova fitsipikinany hifan̈araka amy lay metimety amintsika. Mifanohitry amy zen̈y aby, atsika ny mila miova ndreky man̈ano raha mifan̈araka amy toro lalan̈anany.​—Isaia 1:16-18; 55:9.

16. Nan̈ino anao mila tapakevitry fo hiady baka tsy ho resiny fan̈iriana ratsy?

¹⁶ Aza man̈eky ho resiny fan̈irian̈a ratsy. Ndray anao efa vita batisa, anao mbala mila manohitry fakampan̈ahy fo. Diniha hely baka tantarany lelahy araiky ty, Mauricío an̈arany. Mbala manafo lahy izy efa nan̈ano firaisan̈a tamy lelahy karaha izy. Nitraotro tamy Vavolombelon̈o Jehovah izy tafara tatỳ, ke nanomboko nianatra Baiboly. Nivoàny fomba fiainan̈anany tafaranizen̈y, ke natao batisa izy tamy 2002. Efa tan̈atiny taon̈o maro i Mauricío nanompo Jehovah, kanefa ho izy: “Matetiky zaho mbala tafieritreritry raha tsy manjary fo.” Rivan̈a ma izy? Aha! Karaha ty ho izy: “Ten̈a mankahery zaho mieritreritry fa mamparavoravo Jehovah raha ataoko, fotony zaho nifidy tsy han̈araka fan̈irian̈a ratsy aby in̈y eky.” *

17. Ino raha nampahery anao tamy tantarany Nabiha?

 ¹⁷ Aza mitôron̈o angôvonao, fa mivavaha beky Jehovah han̈amia anao fan̈ahinany. (Gal. 5:22; Fil. 4:6) Mila mifen̈y angôvo jiaby atsika baka hahavita hiala amy toetry taloha sady tsy himpody amy zen̈y eky. Diniha baka tantarany Nabiha. Mbala tsaiky man̈angy kadiriny tsiota taon̈o izy efa nialany babany. Ho izy: “Nanjary nijaly mare fônaka.” Nanjary mora meloko sady kafiry i Nabiha koa fa nahaibe. Nanomboko nivarotro jamala koa izy, ke nigadra tan̈atiny taon̈o maro. Isaka herin̈iandra, nisy Vavolombelon̈o Jehovah nitsidiky prizon nisy izy, ke nanomboko nianatra Baiboly niaraka tamindro izy. Nanomboko niova i Nabiha tafaranizen̈y. Izy nivolan̈a: “Tsy sarotro taminaka niala raha sasany nahazatra zaho, fa eto niala sigarety tantara ay!” Tan̈atiny taon̈o araiky mahery, Nabiha niady mare baka ho afaka tamy sigarety. Akory nahavitany zen̈y? Karaha ty ho izy: “Vavaka ny raha ten̈a nan̈ampy zaho. Tsy vôly zaho nangataka tamy Jehovah baka hampiany hiala sigarety.” Zioty, ty raha volan̈iny Nabiha aminolo: “Matoky zaho fa matoa zaho nahavita niova ke nan̈ano raha mamparavoravo Jehovah, dikanizen̈y, olo jiaby mahavita!” *

18. Koa zahavan̈a 1 Korintianina 6:9-11, ino aby raha efa niadivany panompony Jehovah maro?

¹⁸ Tamy taonjato voanalohany, sasany taminolo nifidiny Jehovah hiaraka manjaka amy Kristy navy nan̈ano raha ratsy mare taloha. Nisy tamindro pijangajanga, lelahy manambady lelahy na viavy manambady viavy, avio pangalatra. Fa nampiany fan̈ahy masin̈iny Jehovah iro ke nahavita niova. (Vakia 1 Korintianina 6:9-11.) Karaha zen̈y koa amy zioty, mandeha milion olo nahavita nan̈ova fomba fiain̈anandro, iro koa fa nianatra Baiboly. * Iro zahan̈a karaha tsy hahavita hiova, kanefa vitandro fo niala fomba ratsindro aby zen̈y. Tantarandro zen̈y man̈aboaka fa ho vitanao koa hiova ndreky hiala amy raha ratsy nahazatra anao ke hahafeno fepetra amy batisa.

19. Ino raha hianarantsika amy lahatsoratra man̈araka?

¹⁹ Olo araiky koa man̈iry hatao batisa, mila mifen̈y izy miala amy toetry taloha, avio miezaka hanan̈a toetry vaovao. Hidinihintsika amy man̈araka, akory havitany zen̈y, baka io ino raha mety hataonolo hafa han̈ampian̈a izy.