DILONGI 10
Ngie Wulenda “Vula Kimutu Kikhulu”
“Vulanu kimutu kikhulu ayi mavanga mandi mambi.”—KOLO. 3:9.
NKUNGA 29 Tukinzika Dizina Ditu
MAMBU TUANLONGUKA *
1. Buidi bubela luzingu luaku ava kutona kulonguka Kibibila?
BUIDI bubela luzingu luaku ava kutona kulonguka Kibibila na Zimbangi zi Yave? Ḿba ngie wuzolanga ko kuyindula mawu, kibila ḿba mayindu maku ayi zikhadulu ziaku ziaba tuadusuluanga mu mambu batu mu nza bammonanga ti madi mamboti voti mambi. Boti buawu—buna ngie ‘wisa ba ko kivuvu ayi mvandi wisa zaba ko Nzambi.’ (Efe. 2:12) Vayi ndongukulu yi Kibibila yibalula nzingulu’aku!
2. Mbi wuyiza zaba bo wutona kulonguka Kibibika?
2 Bo wutona kuloguka Kibibila, ngie wuyiza zaba ti vadi Tata yi diyilu wu kuzolanga beni. Ayi mvandi wuvisa ti boti wuntomba kukuangidika Yave ayi kuba va dikanda diandi, vabe tombulu kubalula mua mambu mu luzingu luaku ayi kuzingila mu zithuadusulu zi Yave.—Efe. 5:3-5.
3. Dedi bummonisina Kolosai 3:9, 10, mbi Yave kantomba tuvanga ayi mbi tunkuiza longuka mu dilongi adidi?
3 Mu kuba Mvangi ayi Tat’itu yi diyilu, Yave widi nsua wu kutsikika buidi dikabu diandi bafueti zingila. Ayi nandi wuntomba ti ava tubotama tufueti ‘vula kimutu kikhulu.’ * (Tanga Kolosai 3:9, 10.) Dilongi adidi dinkuiza sadisa batu bantomba kubotama kubaka mimvutu mi biuvu bitatu: (1) Mbi binsundula “kimutu kikhulu”? (2) Kibila mbi Yave kantombila tubika kiawu? (3) Buidi tulenda vangila mawu? Ayi dinkuiza sadisa mvandi batu bamana botama kubika zikhadulu zi kimutu kikhulu.
MBI BINSUNDULA “KIMUTU KIKHULU”?
4. Buidi mutu wuntuadusuluanga mu “kimutu kikhulu kadidi”?
4 Mutu wuntuadusuluanga mu kimutu kikhulu, wumbikanga zinzinunu zi kinsuni zituadisa mayindu ayi mavanga mandi. Nandi kalenda monisa zikhadulu dedi: buimi, kufika fuemanga ayi lungundayi. Mvandi kalenda zola kutala zifilme zimmonisa batu bambundana nyitu ayi zi buphunya. Vayi mvandi kalenda ba zikhadulu zimboti, diawu kalenda ba mu kiunda mu kibila ki mambu mabi kantuba ayi kamvanga. Vayi ḿba kasi ko mangolo mantombulu muingi kubalula mayindu ayi zikhaduku ziandi.—Ngala. 5:19-21; 2 Timo. 3:2-5.
Befu kuvanga mangolo ma kuvula “kimutu kikhulu” zinzinunu zi kinsuni ayi zikhadulu zimbi zisinkuiza tuadisa ko luzingu luitu (Tala lutangu 5) *
5. Tulenda nunga kubika mayindu moso mambi? Sudikisa? (Mavanga 3:19)
5 Bo tuidi batu ba masumu, tulendi nunga ko kumanisa mayindu moso mambi mu kilunzi ayi mu ntim’itu. Khumbu zinkaka tumbanga mu kiunda mu kibila ki mambu tube vanga voti tube tuba. (Yele. 17:9; Yako. 3:2) Vayi befu kuvanga mangolo muingi kuvula kimutu kikhulu, zikhadulu zimbi zisinkuiza tuadisa ko luzingu luitu. Ayi batu basinkuiza tuzabila ko mu zikhadulu beni.—Yesa. 55:7; tanga Mavanga 3:19.
6. Kibila mbi Yave ka tukindisilanga tubika kimutu kikhulu ayi zikhadulu zimbi?
6 Yave wu tuzolanga beni ayi wuntomba tubaka mayangi mu luzingu, diawu ka tukindisilanga tubika kimutu kikhulu ayi mavanga mambi. (Yesa. 48:17, 18) Yave zebi ti batu bambikanga zikhadulu zimbi zituadisa luzingu luawu, ba kituadisanga ziphasi ayi mvandi kuidi bankaka. Ayi nandi wumbanga beni mu kiunda bo kammona mawu.
7. Dedi bummonisina Loma 12:1, 2, luaku mbi befu boso tuidi?
7 Va thonono basi dikanda ayi bakundi bitu balenda ku tuseva bo tumvanga mangolo muingi kubalula kimutu kitu. (1 Pete. 4:3, 4) Bawu balenda ku tukamba ti tuidi nsua wu kuvanga mamoso tuntomba ayi tulendi bika ko bankaka ba tukamba mbi tufueti vanga. Vayi batu bammanganga kuzingila mu phila Yave kantombila basi ko kiphuanza, kibila Satana nandi wuntuadisanga luzingu luawu. (Tanga Loma 12:1, 2.) Befu boso tuidi luaku lu kusola: Kutatamana na kimutu kikhulu ayi kubika Satana katuadisa luzingu luitu voti kubika Yave ka tutuadisa ayi ka tusadisa kubalula kimutu kitu.—Yesa. 64:8.
KIBILA MBI TUFUETI “VUDILA” KIMUTU KIKHULU?
8. Lusalusu mbi Yave ka tuvananga muingi tubika mayindu ayi zikhadulu zimbi?
8 Yave zebi ti vantombulu thangu ayi mangolo muingi tubika zikhadulu ayi mayindu mambi. (Minku. 103:13, 14) Vayi mu nzila Kibibila, phevi’andi yinlongo ayi kimvuka kiandi, Yave wu tuvananga nduenga ayi mangolo muingi kubalula kimutu kitu. Ayi tuidi lufiatu ti nandi wu kusadisanga. Buabu, tuemmona mua mambu malenda kusadisa kubika kimutu kikhulu ayi kuba wufuana muingi kubotama.
9. Mbi Kibibila kilenda kusadisa kuvanga?
9 Sadila Kibibila muingi kuyifiongunina. Kibibila kidi buka lumuenu; ayi kiawu kilenda kusadisa kufiongunina phila wuyindudilanga, thubulu’aku ayi mavanga maku. (Yako. 1:22-25) Nlongisi’aku wu Kibibila ayi zikhomba zinkaka ziyonzuka mu kiphevi balenda kuvana malongi. Dedi, bawu balenda sadila Kibibila muingi ku kusadisa kumona zikhadulu zimboti widi ayi zio wufueti vangila mangolo muingi kukuna. Mvandi balenda ku kusadisa kubakula minsua mi Kibibila milenda kusadisa kubalula zikhadulu zimbi. Yave wu kuzebi buboti ayi zebi mambu madi mu ntim’aku ayi nandi widi wukubama muingi ku kusadisa. (Zinga. 14:10; 15:11) Diawu ba kifu ki kusambilanga ayi kutanganga Kibibila kadika kilumbu.
10. Mbi belonguka mu kifuani ki Elie?
10 Ba lufiatu ti zithuadusulu zi Yave ziawu zilutidi. Tumbakanga ndandu mu mamoso Yave ka tudindanga tuvanga. Batu banzingilanga mu zithuadusulu ziandi ba kuba kinzikanga, luzingu luawu luidi tsundu ayi badi mayangi makiedika. (Minku. 19:7-11) Vayi bo bambayisanga zithuadusulu zi Yave, bantovukanga. Tala mambu mamonikina Elie, wubayisa zithuadusulu zi Yave. Matata mandi badi Zimbangi zi Yave ayi banzolanga beni Yave. Vayi bo kayiza ba ditoko, nandi wuyiza ba minkangulu mimbi. Ayi wutona kunuanga zitsunga zingolo, kuvanganga kitsuza ayi kukuibanga. Nandi wutuba ti wuyiza ba mutu wu buphunya ayi wumfika fuemanga. Ayi wubue tuba ti “waba vanganga mamoso kalonguka ti Baklisto balendi vanga ko.” Vayi Elie kasa zimbakana ko mamoso kalonguka mu bumuana buandi. Kuntuala nandi wubue vutuka kulonguka Kibibila ayi wuvanga mangolo muingi kubika zikhadulu zimbi kaba. Bosi mu mvu 2000 nandi wuyiza botama. Ndandu mbi kabaka mu kuzingila mu zithuadusulu zi Yave? Nandi wutuba: “Bubu, yidi ndembama yi ntima ayi kilunzi kidiodila.” * Kifuani akiokio ki tumonisa ti batu bambayisanga zithuadusulu zi Yave, ba kiyituadisanga ziphasi. Vayi Yave widi wukubama muingi kuba sadisa kubalula mavanga mawu mambi.
11. Mambu mbi Yave kanlendanga?
11 Mona khenene mambu Yave kanlendanga. (Minku. 97:10) Kibibila kimmonisa ti Yave wunlendanga ‘thadulu yi lunangu, ludimi luntotula mambu ma luvunu, mioko mintengulanga menga ma batu bakhambulu kibila.’ (Zinga. 6:16, 17) Nandi mvandi ‘wunlendanga batu ba buphunya ayi bankua luvunu.’ (Minku. 5:6) Yave wunlendanga mambu amomo, diawu katuludila mbandu yi Nowa kibila bawesa ntoto woso buphunya. (Ngene. 6:13) Tala kifuani kinkaka. Mu nzila mbikudi Malaki, Yave wutuba ti wunlendanga batu bamvambananga na mutu wukuelana yawu mu khambu kibila. Nzambi kakikininanga ko mbuongimini’awu ayi wala bafundisa mu kibila ki mavanga mawu.—Mala. 2:13-16; Ebe. 13:4.
Kuvanga mambu Yave kanlendanga kuidi dedi mueka na kudia bidia bibola (Tala lutangu 11-12)
12. Mbi binsundula kumona “khenene mambu Yave kanlendanga”?
12 Yave wuntomba “tumona khenene mambu mambi.” (Loma 12:9) Kikuma “kumona khenene” kinsundula, kulenda diambu ayi kumona diawu khenya. Yindula buidi wunkuiza bela ba kukudinda wudia bidia bibola. Kuyindula to mu mambu amomo kulenda kubika bubi. Bobuawu mvandi, wufueti mona khenya kuyindula kuvanga mambu Yave kanlendanga.
13. Kibila mbi tufueti yadila mayindu mitu?
13 Yala mayindu maku. Mayindu mitu, mantuadisanga mambu tumvanga. Diawu Yesu ka tulongila kulenda mayindu malenda ku tunata kuvanga disumu dingolo. (Matai 5:21, 22, 28, 29) Befu tuntomba kukuangidika ntima wu Tat’itu yi diyilu. Diawu nkinza beni kufika botula mayindu mambi ma tukuizila va kilunzi!
14. Mbi mambu tuntuba mammonisanga ayi biuvu mbi tufueti kuyikuvusa?
14 Yala mambu wuntuba. Yesu wutuba: “Mambu moso mambasika va munu, mu ntima mamfuminanga.” (Matai 15:18) Bukiedika mambu tuntuba mammonisanga kimutu kitu. Diawu, wukiyuvusa: ‘Minu yimvanganga mangolo ma kutuba kiedika kheti mawu mankuiza thuadisa ziphasi? Boti minu yidi wukuela, bukiedika ti yimvanganga mambu manyikuna mabanza ma mutu wunkaka? Yintubanga mafunza? Yimbanga wuvumbama kheti mu thangu ba kutsoka?’ Wunkuiza baka ndandu mu kuyindula mu biuvu abiobio. Mambu wuntuba malenda dedakana na kuta bikhutu. Ngie kuvanga mangolo ma kuyala mambu wuntuba, kubika kutuba mafunza ayi kuvuna, wunkuiza mona ti disi ko diambu diphasi kuvula kimutu kikhulu.
15. Mbi binsundula kubanda kimutu kikhulu “va dikunzi”?
15 Ba wukubama mungi kuvanga mambu mantombulu. Mvuala Polo wusadila kifuani kimueka muingi ku tulonga nkinza wu kubalula nzingulu’itu. Nandi wutuba ti tufueti vula kimutu kikhulu ayi kubanda kiawu “va dikunzi.” (Loma 6:6) Mawu mansundula ti tufueti landakana kifuani ki Klisto. Tufueti balula mavanga ayi zikhadulu Yave kanlendanga. Befu kuvanga mawu, tunkuiza ba kilunzi kidiodila ayi kivuvu ki kuzinga mvu ka mvu. (Yoa. 17:3; 1 Pete. 3:21) Tebuka moyo ti Yave kasinkuiza balula ko zithuadusulu ziandi muingi ku tuyangidika. Vayi befu tufueti balula kimutu kitu ayi kuzingila mu zithuadusulu ziandi.—Yesa. 1:16-18; 55:9.
16. Kibila mbi wufueti tatiminina kunuana nzingu na zikhadulu zi kinsuni?
16 Tatamana kunuana nzingu wu kubika zikhadulu zi kinsuni. Kheti wubotama mu thama, ngie fueti vanga mangolo ma kutatamana kubika zikhadulu zi kinsuni. Tala kifuani ki dibakala dimueka bantedilanga Maurício. Bo kaba ditoko nandi waba bundananga nyintu na babakala yandi. Vayi buviokila thangu wuzaba Zimbangi zi Yave ayi wutona kulonguka Kibibila. Bo kabalula nzingulu’andi nandi wubotama mu mvu 2002. Kheti wunsadilanga Yave mu mimvu miwombo Maurício wutuba: “Khumbu zinkaka yaba nuananga nzingu mu zikhadulu zi kinsuni.” Vayi nandi kasa bika ko mawu mamvongisa. Nandi wubue tuba: “kuzaba ti yidi mu kukuangidika Yave ma kuphananga mangolo muingi yibika zingila mu zikhadulu zi kinsuni.” *
17. Mbi belonguka mu kinongu ki Nabiha?
17 Dinda lusalusu lu Yave mu nzila nsambu ayi fiatila mu mangolo mandi kubika kuandi mu mangolo maku. (Ngala. 5:22; Fili. 4:6) Tufueti ba bakubama muingi kuvula kimutu kikhulu ayi kubika kubue vutula zikhadulu zimbi tuba. Tala kifuani ki nkieto mueka bantedilanga Nabiha. Tat’andi wunyekula bo kaba to mimvu misambanu. Nandi wutuba: “Mawu mathula beni mu kiunda” ayi bo kaba konzuka nandi waba fika fuemanga, wuyiza ba mutu wu makhesi ayi wutona kusumbisanga zitsunga zingolo, diawu bantudila mu buloku. Zimbangi zi Yave babe kue samunanga ku buloku beni, batona kulongukanga yandi Kibibila. Nabiha wutona kubalula nzingulu’andi. Nandi wutuba: “Diba diambu diluelu kubika bifu binkaka, vayi kubika kifu ki kuvolanga tsunga diba diambu diphasi beni.” Vavioka mvu mueka Nabiha kanuana nzingu muingi kubika kifu akiokio. Buidi kanungina kuvanga mawu? Nandi wutuba: “kutatamana kusambila kuidi Yave kutsadisa kubika vonga.” Ayi nandi wunkindisanga bankaka mu kutuba: “Yidi lufiatu ti boti minu yinunga kubalula nzingulu’ama muingi kukuangidika Yave, buna woso kua mutu kalenda nunga kuvanga mawu!” *
NGIE WULENDA BA WUFUANA MUINGI KUBOTAMA!
18. Dedi bummonisina 1 Kolinto 6:9-11, mbi bawombo mu bisadi bi Nzambi banunga kuvanga?
18 Mu sekulu yitheti, bawombo mu babakala ayi bakieto Yave kasola muingi kuyala na Yesu ku diyilu, baba zikhadulu zimbi. Dedi, bankaka mu bawu babe vanganga kitsuza, babe bundananga nyintu na babakala yawu voti bakieto yawu ayi bankaka baba mivi. Vayi mu lusalusu lu phevi yinlongo yi Nzambi, bawu banunga kubalula zikhadulu aziozio. (Tanga 1 Kolinto 6:9-11.) Bobuawu mvandi bubu, Kibibila kinsadisanga bivevi bi batu kubalula nzingulu’awu. * Bawu bannunganga kubika bifu bimbi. Bifuani biawu bimmonisa ti ngie mvaku wulenda nunga kubalula nzingulu’aku ayi kuba wufuana muingi kubotama.
19. Mbi tuala longuka mu dilongi dinkuiza?
19 Vantombuluanga kuvanga mangolo bika to muingi kuvula kimutu kikhulu. Vayi mvandi kheti kuidi batu bamana botama, bafueti vanga mangolo muingi kutatamana kuvuata kimutu kimona. Dilongi dinlanda, dinkuiza tubila buidi tulenda vangila mawu ayi buidi bankaka balenda ku tusadisila.
NKUNGA 41 Lemvuka, Yuwa Nsambu’ami
^ Lut. 5 Muingi tuba bafuana ayi kubotama, tufueti ba bakubama muingi kubalula kimutu kitu. Dilongi adidi dinkuiza tusadisa kumona zikhadulu mbi zidi mu kimutu kikhulu, kibila mbi tufueti bikila ziawu ayi buidi tulenda vangila mawu. Mu dilongi dinkuiza tuala mona buidi tulenda tatiminina kuvuata kimutu kimona kheti tueka mimvu miwombo tona tubotama.
^ Lut. 3 TSUDUKUSU YI BIKUMA: Kuvula “kimutu kikhulu” kunsundula kubika mavanga ayi zikhadulu zinyongisanga Yave. Ayi tufueti vanga mawu ava kubotama.—Efe. 4:22.
^ Lut. 10 Muingi wubuela zaba matedi kifuani akiokio, tala Kibanga ki Nsungi ki kilumbu 1 Ngonda Yinna, mvu 2012 va tsielu “A Bíblia Muda a Vida das Pessoas—‘Eu Precisava de Voltar para Jeová.’”
^ Lut. 16 Muingi wuluta zaba matedi kinongu akiokio, tala Kibanga ki Nsungi ki kilumbu 1 Ngonda Yintanu mvu 2012 va tsielu “A Bíblia Muda a Vida das Pessoas—‘Elas foram muito atenciosas comigo,’”.
^ Lut. 17 Muingi wuluta zaba matedi kinongu akiokio, tala Kibanga ki Nsungi ki kilumbu 1 Ngonda Yintanu mvu 2012 va tsielu “A Bíblia Muda a Vida das Pessoas—‘Eu me tornei uma jovem revoltada e agressiva,’”.
^ Lut. 18 Tala quadro “ Kibibila Kimbalulanga Luzingu lu Batu.”
[Matangu madi va wanda nkanda]
^ Lut. 64 MAMBU MADI MU ZIFIKULA: Dedi bo tumvudilanga bikhutu, befu mvitu tumvanganga mangolo ma kubalula mavanga makhambu fuana.
